1)

Leġiżlazzjoni nazzjonali, bħal dik applikata mill-awtoritajiet, li bis-saħħa tagħha l-użu, mingħajr obbligu ġdid ta’ reġistrazzjoni, ta’ vettura barranija mqiegħda b’mod sporadiku u għal żmien qasir għad-dispożizzjoni ta’ ċittadin li jirrisjedi fil-Belġju minn ċittadin stabbilit fi Stat Membru ieħor tal-Unjoni Ewropea, huwa suġġett għall-kundizzjoni li dan iċ-ċittadin li jirrisjedi fil-Belġju jżomm fil-vettura attestazzjoni li turi li huwa awtorizzat juża l-vettura għal finijiet privati, jiġifieri attestazzjoni fis-sens tal-punt 6 tal-Artikolu 3(2) tal-Königlichen Erlasses vom 20. Juli 2001 über die Zulassung von Fahrzeugen (id-Digriet Irjali tal-20 ta’ Lulju 2001 dwar ir-Reġistrazzjoni tal-Vetturi), tmur kontra r-regoli rilevanti tad-dritt Ewropew u b’mod partikolari, minn naħa, kontra l-Artikoli 20 u 21 TFUE, dwar il-libertà tal-persuni u l-libertà ta’ moviment tal-kapital u/jew, min-naħa l-oħra, kontra l-Artikoli 63 u 64 TFUE, dwar il-libertà ta’ moviment tal-kapital, bħala tnejn mill-erba’ libertajiet fundamentali tal-Unjoni?

2)

Leġiżlazzjoni nazzjonali bħal dik deskritta iktar ’il fuq u implimentata mill-Wallonische Region (ir-Reġjun ta’ Wallonie) hija ġġustifikata minn rekwiżiti marbuta mas-sigurtà pubblika jew ma’ miżuri oħra ta’ protezzjoni u, sabiex jintlaħaq l-għan imfittex, huwa meħtieġ li din il-leġiżlazzjoni nazzjonali tiġi osservata billi tiġi interpretata fis-sens li teżiġi ż-żamma obbligatorja fil-vettura ta’ dokument redatt mill-proprjetarju barrani tal-vettura li jawtorizza temporanjament l-użu tal-vettura, b’indikazzjoni tal-perijodu ta’ validità, mingħajr ebda possibbiltà li tali dokumenti jiġu ppreżentati ulterjorment, jew l-għan seta’ jintlaħaq b’mod ieħor permezz ta’ mezzi inqas stretti u inqas formalistiċi?