EUR-Lex Access to European Union law
This document is an excerpt from the EUR-Lex website
Document 62019CN0386
Case C-386/19 P: Appeal brought on 16 May 2019 by Hamas against the judgment of the General Court (First Chamber, Extended Composition) delivered on 6 March 2019 in Case T-289/15 Hamas v Council
Kawża C-386/19 P: Appell ippreżentat fis-16 ta’ Mejju 2019 minn Hamas mis-sentenza mogħtija mill-Qorti Ġenerali (l-Ewwel Awla Estiża) fis-6 ta’ Marzu 2019 fil-Kawża T-289/15, Hamas vs Il-Kunsill
Kawża C-386/19 P: Appell ippreżentat fis-16 ta’ Mejju 2019 minn Hamas mis-sentenza mogħtija mill-Qorti Ġenerali (l-Ewwel Awla Estiża) fis-6 ta’ Marzu 2019 fil-Kawża T-289/15, Hamas vs Il-Kunsill
ĠU C 220, 1.7.2019, p. 27–28
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
1.7.2019 |
MT |
Il-Ġurnal Uffiċjali tal-Unjoni Ewropea |
C 220/27 |
Appell ippreżentat fis-16 ta’ Mejju 2019 minn Hamas mis-sentenza mogħtija mill-Qorti Ġenerali (l-Ewwel Awla Estiża) fis-6 ta’ Marzu 2019 fil-Kawża T-289/15, Hamas vs Il-Kunsill
(Kawża C-386/19 P)
(2019/C 220/33)
Lingwa tal-kawża: il-Franċiż
Partijiet
Appellant: Hamas (rappreżentant: L. Glock, avukat)
Partijiet oħra fil-proċedura: Il-Kunsill tal-Unjoni Ewropea, Il-Kummissjoni Ewropea
Talbiet
L-appellant jitlob li l-Qorti tal-Ġustizzja jogħġobha:
— |
tannulla s-sentenza tas-6 ta’ Marzu 2019, Hamas vs Il-Kunsill, T-289/15; |
— |
tagħti deċiżjoni definittiva fuq il-kwistjonijiet li huma s-suġġett tal-appell; |
— |
tikkundanna lill-Kunsill għall-ispejjeż kollha tal-istanzi quddiem il-Qorti Ġenerali u l-Qorti tal-Ġustizzja. |
Aggravji u argumenti prinċipali
L-appellant jinvoka erba’ aggravji insostenn tal-appell tiegħu.
L-ewwel nett, billi ddeċidiet li l-fatti ċċitati fil-punt 15 tal-Anness A u fil-punt 17 tal-Anness B tal-espożizzjoni tal-motivi tal-atti ta’ Marzu 2015 huma invokati b’mod awtonomu mill-Kunsill, il-Qorti Ġenerali żnaturat l-annessi tal-proċess, issostitwiet il-motivi tagħha għal dawk tal-awtur tal-atti kkontestati, kisret l-obbligu li timmotiva d-deċiżjoni tagħha u ċaħdet lir-rikorrent f’dik il-kawża mill-possibbiltà li jipprepara d-difiża tiegħu.
It-tieni nett, il-Qorti Ġenerali kisret l-Artikolu 1(4) tal-Pożizzjoni Komuni 2001/931, billi aċċettat li deċiżjoni ta’ awtorità amministrattiva ttieħdet minn awtorità kompetenti fis-sens ta’ din id-dispożizzjoni, minkejja li din qatt ma kienet is-suġġett ta’ stħarriġ ġudizzjarju.
It-tielet nett, il-Qorti Ġenerali kisret l-Artikolu 1(4) tal-Pożizzjoni Komuni 2001/93, l-Artikolu 296 TFUE, kif ukoll id-drittijiet tad-difiża u d-dritt għal protezzjoni ġudizzjarja effettiva tar-rikorrent f’dik il-kawża, meta ddeċidiet li d-deċiżjoni Brittanika kienet deċiżjoni ta’ kundanna u li konsegwentement il-Kunsill kellu l-obbligu li jibbaża ruħu kemm jista’ jkun fuq l-evalwazzjoni tal-awtorità li adottatha.
Ir-raba’ nett, billi ddeċidiet li l-Hamas u l-Hamas IDQ kienu entità waħda, il-Qorti Ġenerali kisret ir-regoli fuq l-oneru tal-prova, laqgħet regolarizzazzjoni mill-Kunsill tal-motivi tiegħu matul l-istanza, ħadet inkunsiderazzjoni ta’ provi mingħajr ma vverifikat jekk kinux effettivi, kisret in-natura kontradittorja tad-dibattitu fuq il-fatti, żnaturat il-punti tal-proċess u kisret il-prinċipju tal-indipendenza tal-proċeduri.