—

Skont ir-rikorrenti, il-konvenuta hija tal-fehma li l-għajnuna tissodisfa r-rekwiżiti tar-Regolament (UE) Nru 651/2014 (2). Dan jipprekludi lill-konvenuta milli twettaq proċedura ta’ investigazzjoni preliminari u milli tadotta deċiżjoni fis-sens tal-Artikolu 4(2), (3) jew (4) tar-Regolament (UE) Nru 2015/1589. Din il-fehma hija vvizzjata bi żball ta’ liġi peress li l-konvenuta hija awtorizzata tissuġġetta għajnuna bbażata fuq ir-Regolament (UE) Nru 651/2014 għal investigazzjoni preliminari. Il-perijodu ta’ iktar minn tliet snin u nofs tal-proċedura ta’ investigazzjoni jmur lil hinn minn eżami prima facie u jikkostitiwixxi investigazzjoni preliminari. Għaldaqstant, il-konvenuta hija obbligata, skont l-ewwel sentenza tal-Artikolu 15(1) tar-Regolament (UE) 2015/1589, tadotta deċiżjoni fis-sens tal-Artikolu 4(2), (3) jew (4) tar-Regolament (UE) 2015/1589. Madankollu, il-konvenuta kisret dan l-obbligu, sa fejn ċaħdet l-ilment bħala infondat mingħajr ma stabbilixxiet li l-għajnuna materjali ma tqajjem ebda dubju dwar il-kompatibbiltà tagħha mas-suq intern.

—

Il-konvenuta hija tal-fehma li d-diskrezzjoni tagħha, fir-rigward tal-għajnuna bbażata fuq ir-Regolament (UE) Nru 651/2014, hija limitata għall-eżami tal-kundizzjonijiet ta’ eżenzjoni previsti f’dan ir-regolament. Din il-fehma hija vvizzjata bi żball ta’ liġi peress li, skont il-ġurisprudenza tal-qrati tal-Unjoni, l-osservanza tal-kundizzjonijiet tar-Regolament (UE) Nru 651/2014 għandha biss bħala konsegwenza l-prevalenza tal-preżunzjoni tal-kompatibbiltà fuq eżami individwali. Din il-prevalenza ma tapplikax f’każijiet bħal dak inkwistjoni, fejn l-għajnuna tingħata, prima facie, importanza partikolari fir-rigward tal-effetti fuq il-kompetizzjoni. F’tali każijiet, il-konvenuta tkun awtorizzata twettaq eżami individwali barra mill-kuntest tar-Regolament (UE) Nru 651/2014, billi tieħu inkunsiderazzjoni d-dritt primarju u l-prinċipji ġenerali tad-dritt tal-Unjoni Ewropea. Billi ma eżerċitatx dan id-dritt, il-konvenuta kisret l-Artikolu 107(3)(a) TFUE.

—

Barra minn hekk, il-konvenuta kisret l-Artikolu 109 TFUE flimkien mal-Artikolu 58(1) tar-Regolament (UE) Nru 651/2014, peress li applikat retroattivament l-imsemmi regolament għall-każ inkwistjoni, minkejja li r-rekwiżiti għal dan ma kinux issodisfatti. L-għajnuna inkwistjoni hija għajnuna ad hoc għal kumpannija kbira. L-effett ta’ tali għajnuna bħala inċentiv huwa suġġett għal kundizzjonijiet partikolarment stretti skont l-Artikolu 6(3)(a) tar-Regolament (UE) Nru 651/2014. Il-prova neċessarja, li fuq il-bażi tagħha l-awtoritajiet Slovakki kienu żguraw l-osservanza tal-kundizzjonijiet abbażi tad-dokumenti tal-benefiċjarju tal-għajnuna, ma ġietx prodotta.

—

Fl-aħħar nett, il-konvenuta kisret l-Artikolu 108(2) TFUE flimkien mal-Artikolu 4(4) tar-Regolament (UE) 2015/1589, peress li ma kinitx tat bidu għal proċedura ta’ investigazzjoni formali. Il-konvenuta evalwat il-kwalità ta’ SME tal-benefiċjarju tal-għajnuna preżunta minnha biss b’mod insuffiċjenti u inkomplet matul iktar minn tliet snin u nofs ta’ proċedura ta’ investigazzjoni. Barra minn hekk, il-konvenuta kellha diffikultajiet kbar waqt laqgħa fir-rigward tal-evalwazzjoni dwar jekk l-għajnuna ngħatatx abbażi ta’ skema ta’ għajnuna jew jekk hijiex għajnuna ad hoc. Il-konvenuta setgħet tħalli din il-kwistjoni mhux riżolta li kieku vverifikat b’mod suffiċjenti u stabbilixxiet il-kwalità ta’ SME tal-benefiċjarja. Madankollu, dan ma kienx il-każ. Barra minn hekk, kien biss fid-deċiżjoni kkontestata li l-konvenuta rrikonoxxiet li ma kien hemm ebda kompatibbiltà skont ir-Regolament (KE) Nru 800/2008 (3), wara li kienet sostniet il-kuntrarju matul diversi snin.