—

Il-KESE l-ewwel jitlob strateġija ġenerali għas-sostenibbiltà fl-implimentazzjoni tal-Aġenda 2030, iggarantita minn baġit ambizzjuż tal-UE.

—

Il-kompetittività u s-sostenibbiltà ma jmorrux kontra xulxin sakemm l-aspetti soċjali u ambjentali huma parti integrali mid-definizzjoni tal-kompetittività. Il-kompetittività ma tridx tkun definita biss skont il-kwantità u l-ipprezzar imma preferibbilment billi jitqiesu wkoll il-valuri, il-kwalità u s-sostenibbiltà Ewropej, bħala parti minn suq uniku li jiffunzjona tajjeb, żviluppat għalkollox u effiċjenti.

—

L-Ewropa teħtieġ mudell ġdid ta’ tkabbir, wieħed li huwa kwalitattivament differenti minn dak li kellna s’issa, jiġifieri aktar soċjalment inklużiv u ekoloġikament sostenibbli, u kapaċi jħeġġeġ u jakkumpanja l-konverġenza tat-tranżizzjonijiet diġitali u ekoloġiċi fil-pajjiżi u s-soċjetajiet tagħna.

—

L-investiment sostenibbli huwa strument kruċjali biex imexxi u jippromovi l-proċess tat-tisħiħ tat-tmexxija tal-Ewropa lejn soċjetà sostenibbli. Għandu jistimula l-ħolqien ta’ impjiegi ta’ kwalità għolja, tal-enerġija rinnovabbli, tas-sistemi ta’ edukazzjoni, tat-trasport pubbliku ekoloġiku affordabbli u aċċessibbli, tat-teknoloġija diġitali u b’disinn ekoloġiku, tar-riċerka u l-innovazzjoni.

—

Jeħtieġ li l-kumpaniji Ewropej jaqdu r-rwol u r-responsabbiltajiet tagħhom u jaġixxu bħala mexxejja f’għajnejn il-bqija tad-dinja jekk il-kompetittività u s-sostenibbiltà ekonomika tas-sistema Ewropea tagħna jiġu definiti mill-ġdid fir-rigward tal-fruntieri tal-pjaneta unika tagħna.

—

Djalogu Ċivili strutturat irid isir għodda reali tal-parteċipazzjoni demokratika kif previst fl-Artikolu 11(1) u (2) tat-Trattat dwar l-Unjoni Ewropea (TUE) (8).

—

Il-KESE, bħala r-rappreżentant istituzzjonali tal-UE tas-soċjetà ċivili organizzata, se jkompli jkun attur attiv fil-proċess tat-tfassil tal-politika.

—

L-Inizjattiva taċ-Ċittadini Ewropej (ECI), kif previst fl-Artikolu 11(4) tat-TUE u bħala l-ewwel għodda parteċipattiva transnazzjonali dinjija, teħtieġ ukoll aktar appoġġ u titjib. Min-naħa tiegħu, il-KESE ġġieled għal sett ta’ regoli aktar sempliċi u li jinftiehmu aktar għall-implimentazzjoni tagħha (9), u jaġixxi wkoll bħala faċilitatur bejn il-Kummissjoni u ċ-ċittadini, b’mod partikolari billi jorganizza l-konferenza annwali tal-Jum ECI u jipprovdi assistenza u appoġġ lill-organizzaturi tal-ECI.

—

Iż-żgħażagħ għandhom ikunu involuti u jipparteċipaw fil-proċess politiku Ewropew (10) billi jippromovu impenn ċiviku usa’, inkluż permezz tal-votazzjoni, il-volontarjat, li jingħaqdu ma’ organizzazzjonijiet taż-żgħażagħ u li jipparteċipaw fid-demokrazija fuq il-post tax-xogħol u fid-djalogu soċjali (11). Il-Kumitat se jrawwem il-parteċipazzjoni taż-żgħażagħ fl-attivitajiet tiegħu u jiżviluppa avvenimenti mmirati lejn iż-żgħażagħ, bħall-“Your Europe Your Say”(“L-Ewropa Tiegħek, Leħnek!”) u l-premju għall-intraprendituri żgħażagħ.

—

Għandhom jittieħdu miżuri biex jiżguraw responsabbiltà u trasparenza akbar fit-teħid tad-deċiżjonijiet mill-istituzzjonijiet tal-UE u l-gvernijiet nazzjonali, li jinvolvu wkoll il-livell reġjonali u lokali, biex jiksbu l-appoġġ taċ-ċittadini, bħal riforma tal-metodi ta’ ħidma tal-Kunsill biex itejbu t-trasparenza u jsolvu l-kwistjonijiet ta’ responsabbiltà u trasparenza marbutin mal-użu estensiv ta’ “trilogi”fil-magħluq qabel l-adozzjoni ta’ atti fl-ewwel u fit-tieni qari tal-proċedura leġislattiva ordinarja (12) (13).

—

Għandhom jiġu stabbiliti mekkaniżmi istituzzjonali biex jiżdied l-impatt tal-opinjonijiet tal-KESE fil-proċessi tat-tfassil tal-politika tal-UE u tat-teħid tad-deċiżjonijiet, pereżempju permezz ta’ monitoraġġ imtejjeb tas-segwitu mogħti lill-opinjonijiet tal-Kumitat u l-konklużjoni ta’ ftehim ta’ kooperazzjoni mal-Kunsill tal-UE biex tiġi żgurata, inter alia, il-provvista sistematika lill-gruppi ta’ ħidma tal-Kunsill ta’ informazzjoni dwar l-opinjonijiet tal-Kumitat.

—

Il-kisba ta’ appoġġ pubbliku għall-implimentazzjoni tal-Aġenda 2030 tan-NU għal ftehim soċjali ġdid hija ta’ importanza kbira.

—

“Patt soċjali”ġdid li joffri liċ-ċittadini kollha soċjetà aktar ġusta u ugwali huwa indispensabbli. Għalhekk il-KESE jitlob programm ta’ azzjoni soċjali sabiex jittrasponi l-Aġenda 2030 tan-NU fil-livelli kollha.

—

Il-KESE jitlob titjib ġenerali u żieda fl-investiment fis-sistemi edukattivi u jappoġġja intitolament universali għat-tagħlim tul il-ħajja li jippermetti lin-nies jiksbu l-ħiliet u jerġgħu jiksbuhom u jżidu magħhom; iż-żieda fl-investimenti fl-istituzzjonijiet, politiki u strateġiji li se jappoġġjaw lin-nies waqt tranżizzjonijiet futuri tax-xogħol; u l-implimentazzjoni ta’ aġenda trasformattiva u li tista’ titkejjel għall-ugwaljanza bejn is-sessi huma kollha elementi li għandhom jingħataw appoġġ wiesgħa (14).

—

Il-politiki pubbliċi u l-miżuri leġislattivi għandhom jiżguraw li ċ-ċittadini u r-residenti Ewropej kollha jgawdu l-istess livell ta’ protezzjoni u jkunu jistgħu jeżerċitaw id-drittijiet u l-libertajiet fundamentali tagħhom. L-UE għandha ttejjeb il-politiki u l-azzjonijiet tagħha biex tiżgura l-ugwaljanza bejn is-sessi, minbarra li tiggarantixxi li n-nies kollha li jiffaċċjaw diversi forom ta’ diskriminazzjoni jkollhom opportunitajiet ugwali fis-soċjetà.

—

Fil-kuntest tat-tħassib li qed jiżdied dwar id-diverġenza fil-progress tal-Istati Membri, il-miżuri li jiżguraw paga minima u dħul minimu, bħala parti minn proċess ta’ konverġenza soċjali fl-UE, jistgħu jikkostitwixxu element importanti tal-protezzjoni soċjali. Dan jgħin biex jinkiseb standard ta’ għajxien diċenti fil-pajjiżi kollha, filwaqt li jgħin ukoll biex jappoġġja t-tkabbir u biex itejjeb il-konverġenza, jew jevita d-diverġenza fi ħdan l-UE (15).

—

Tranżizzjoni sostenibbli teħtieġ investiment f’sistemi ta’ protezzjoni soċjali effettivi u integrati li joffru servizzi ta’ kwalità (16).

—

Djalogu soċjali u sistemi robusti ta’ negozjar kollettiv bejn is-sħab soċjali għandhom jipprevalu bħala għodod ewlenin sabiex jiġu antiċipati u ġestiti t-tranżizzjonijiet u l-bidliet.

—

Il-miżuri ta’ hawn fuq għandhom jgħinu biex jinħolqu kundizzjonijiet ekwi sabiex tiġi ffaċilitata l-implimentazzjoni sħiħa tas-suq uniku.

—

Din l-istrateġija trid tiżgura li tal-inqas il-Ftehim ta’ Pariġi jiġi implimentat bis-sħiħ u immedjatament u jiġi rifless permezz tal-allinjament tal-miri tal-UE għat-tnaqqis tal-emissjonijiet għall-2030 u l-2050 bl-impenn li jiġu limitati ż-żidiet fit-temperatura għall-massimu ta’ 1°C u permezz ta’ politiki ambizzjużi tal-UE dwar il-klima, inkluża t-tneħħija gradwali aktar rapida tal-karburanti fossili kollha, li taqleb mill-effiċjenza tal-enerġija għal tnaqqis assolut fl-użu tal-enerġija. L-UE għandha taċċellera t-tranżizzjoni ġusta u sostenibbli għall-ogħla livell possibbli ta’ provvista ta’ enerġija rinnovabbli (21) li hija nadifa, aċċessibbli, li tappoġġja s-sjieda tal-komunità u li, la twassal għal faqar enerġetiku, u lanqas li ddgħajjef il-kompetittività sostenibbli tal-kumpaniji Ewropej fil-livell globali.

—

Il-Patt Ewropew dwar il-Finanzjament għall-Klima jrid iħaddan l-aspetti kollha ta’ politika dwar it-tibdil fil-klima: bħal tranżizzjoni ġusta sabiex jitnaqqsu l-effetti tat-tibdil, u li tikkumpensa wkoll għad-danni u għat-telf, kif ukoll politiki reali ta’ adattament għat-tibdil fil-klima.

—

Il-KESE jtenni s-sejħa tiegħu għall-iżvilupp ta' politika komprensiva dwar l-ikel (22) fl-UE, bl-għan li jiġu pprovduti dieti tajbin għas-saħħa minn sistemi sostenibbli tal-ikel, l-agrikoltura tintrabat ma' servizzi tan-nutrizzjoni u tal-ekosistema, u jiġu żgurati katini ta' provvista li jissalvagwardjaw is-saħħa pubblika għas-sezzjonijiet kollha tas-soċjetà Ewropea. Distribuzzjoni ġusta tal-valur miżjud tul il-katina tal-provvista tal-ikel hija essenzjali.

—

L-agrikoltura tista’ tkun parti mis-soluzzjoni għall-mitigazzjoni tat-tibdil fil-klima (ekonomija ċirkolari, ħżin ta' CO2, eċċ.) peress li tkopri parti kbira mit-territorju Ewropew. Barra minn hekk, agrikoltura sostenibbli għandha rwol importanti fiż-żamma tan-nisġa soċjoekonomika fiż-żoni rurali.

—

L-UE trid tittrasforma ekonomija lineari f’ekonomija ċirkolari u ħielsa mill-karbonju. Il-politiki tal-ekonomija ċirkolari għandhom jiżguraw li ċ-ċikli jkunu dewwiema, żgħar, lokali u nodfa. Għal xi attivitajiet industrijali speċifiċi, id-daqs taċ-ċrieki jista’ jkun kbir (23).

—

Għandhom jiġu stabbiliti u implimentati standards komuni biex jiġu pprovduti arja nadifa u ilma u biex jiġu protetti l-oċeani tagħna. Għandhom jiġu implimentati miżuri ambizzjużi biex jitwaqqfu d-deforestazzjoni u t-telfien tal-bijodiversità fl-Ewropa u fuq livell globali, u biex jintemm l-isfruttament mhux sostenibbli tar-riżorsi naturali, inkluż mill-Global South. Għandhom jittieħdu miżuri biex il-livelli ta’ konsum Ewropew jinġiebu konformi mal-kapaċità tad-Dinja li tipproduċi, inkluż permezz tal-implimentazzjoni ta’ strateġiji ta’ suffiċjenza (24).

—

Ir-raba’ rivoluzzjoni industrijali li għaddejja bħalissa qiegħda timmodifika radikalment l-ekonomija globali, u b’mod partikolari, il-manifattura u s-servizzi relatati mal-industrija. L-Ewropa teħtieġ trasformazzjoni diġitali vera biex terġa’ tikseb il-kompetittività globali sostenibbli u tipprovdi tkabbir u impjiegi sostenibbli. L-Ewropa teħtieġ bidla ġenerali biex issir l-aktar reġjun diġitali dinamiku fid-dinja, filwaqt li tqis in-natura globali tal-ekonomija diġitali u l-integrazzjoni tan-negozju fil-katini tal-valur globali.

—

L-appoġġ għal mudelli innovattivi bħal dawn jirrappreżenta opportunità għall-Unjoni Ewropea biex issir mexxej f’mudelli ekonomiċi innovattivi sostenibbli li permezz tagħhom il-kunċetti ta’ prosperità ekonomika, ta’ protezzjoni soċjali ta’ kwalità u ta’ sostenibbiltà ambjentali jsiru inseparabbli u jiddefinixxu "marka Ewropea".

—

Il-kumpaniji Ewropej għandhom jibqgħu muturi ta’ innovazzjoni u kreattività u jirrispettaw standards għoljin rigward ix-xogħol, il-konsumaturi u l-ambjent madwar l-Ewropa. Filwaqt li t-tfassil ta’ politika b’mod intelliġenti u l-governanza tajba għandhom rwol importanti x’jaqdu biex jiddeterminaw il-qafas adatt, huma n-negozji mal-ħaddiema tagħhom, f’kooperazzjoni mill-qrib max-xjenzjati u r-riċerkaturi, li jipprovdu l-innovazzjoni u s-soluzzjonijiet b’rispons għall-ħtiġijiet tas-soċjetà.

—

Ambjent tan-negozju li jgħin fit-tħejjija għall-futur huwa bbażat fuq swieq miftuħa u kompetizzjoni ġusta, fejn l-aspetti soċjali u ambjentali huma parti mid-definizzjoni tiegħu, u li jipprovdi kundizzjonijiet abilitanti u ta’ appoġġ għan-negozju.

—

Gwida u appoġġ għandhom ikunu disponibbli biex jippermettu lill-kumpaniji kollha u, b’mod partikolari, l-SMEs, iħaddnu d-diġitalizzazzjoni, jreġġgħu lura xejriet inadegwati fit-teknoloġija u l-investiment fl-innovazzjoni permezz ta’ tqajjim ta’ kuxjenza, inkoraġġiment ta’ finanzjament, appoġġ għal R&Ż u investiment f’ħiliet xierqa.

—

Bħad-diplomazija u l-politika tal-viċinat tagħha, il-politika kummerċjali tal-UE trid tirrifletti u tkun konsistenti mal-valuri interni tagħha bħala l-mexxejja globali fis-sostenibbiltà. L-UE għandha tkun tista’ żżomm il-kompetittività tagħha u tamministra l-alleanzi tagħha ma’ sħab ewlenin, filwaqt li żżomm, issaħħaħ u ttejjeb il-mudell tagħha ta’ standards għoljin fl-isferi ambjentali u soċjali.

—

Il-KESE jitlob b’mod partikolari aġenda ambizzjuża tal-politika tal-kummerċ fit-tliet livelli kollha, unilaterali, bilaterali u multilaterali – politika li toħloq it-tkabbir u l-impjiegi fl-UE filwaqt li tippromovi politika kummerċjali bbażata fuq ir-regoli fil-livell globali.

—

F’termini unilaterali, l-UE għandha timmodernizza u ttejjeb l-Iskema Ġeneralizzata ta’ Preferenzi (GSP) u Kollox ħlief Armi (EBA) sabiex tinkoraġġixxi l-iżvilupp tal-Pajjiżi l-Inqas Żviluppati u tal-pajjiżi li qed jiżviluppaw.

—

F’termini bilaterali, l-UE għandha tkompli tiftaħ swieq ġodda u żżid l-opportunitajiet ta’ negozju u s-sodisfazzjon tal-konsumatur ma’ aktar sħab filwaqt li tiżgura standards soċjali u ambjentali għoljin fl-agrikoltura, l-industrija u s-servizzi.

—

F’termini multilaterali, l-UE għandu jkollha rwol ewlieni fir-riforma tad-WTO sabiex tevita l-paraliżi tal-Korp tal-Appell tal-Korp għas-Soluzzjoni tat-Tilwim. Dan l-aħħar il-KESE adotta sett ta’ proposti ambizzjużi u li jħares ‘il quddiem għal din ir-riforma fuq medda ta’ żmien qasira u medja (27). L-għanijiet huma li jiġi żgurat li d-WTO, l-uniku gwardjan tal-kummerċ internazzjonali, tagħti kontribut fundamentali biex jinkisbu l-SDGs, iżżomm konsistenza bejn ir-regoli tal-kummerċ u l-istandards internazzjonali tax-xogħol, u tiffaċilita t-twettiq tal-impenji magħmula taħt il-Ftehim ta’ Pariġi.

—

Il-ftuħ għall-kummerċ jeħtieġ strumenti effettivi ta’ difiża tal-kummerċ u mekkaniżmu operattiv ta’ skrinjar għall-Investiment Dirett Barrani f’setturi strateġiċi tal-UE. Dawn ovvjament huma meħtieġa biex jiġu protetti l-UE u l-konsumaturi, l-ħaddiema u l-kumpaniji tagħha minn prattiki kummerċjali inġusti u predatorji.

—

Huwa essenzjali li tissaħħaħ il-kooperazzjoni fil-livell internazzjonali mal-organizzazzjonijiet rilevanti kollha (OECD, UNECE, ILO, WTO u oħrajn) sabiex jiġu indirizzati b’mod effiċjenti l-isfidi globali inklużi l-bidla fil-klima, il-faqar, il-frodi, l-evażjoni tat-taxxa u ċ-ċiberattakki.

—

L-awtoritajiet pubbliċi jeħtieġ li jmexxu l-għanijiet ta’ żvilupp sostenibbli permezz tal-kuntratti ta’ akkwist pubbliku tagħhom billi japplikaw b'mod proattiv il-kriterji ta’ akkwist ambjentali u soċjali kif definiti fil-leġislazzjoni Ewropea l-ġdida dwar l-akkwist pubbliku.

—

Servizzi pubbliċi bażiċi (30) bħall-edukazzjoni, is-saħħa, il-kura tat-tfal u t-trasport pubbliku, u oġġetti pubbliċi bħall-ilma tax-xorb nadif, l-arja nadifa u l-ħamrija mhux ħażina, eċċ., iridu jkunu aċċessibbli għal kulħadd u bi spejjeż affordabbli.

—

Ir-riforma meħtieġa tal-UEM għandha tinkludi koordinazzjoni fiskali akbar bejn il-membri tagħha u rappreżentanza unifikata tal-euro f’organizzazzjonijiet internazzjonali.

—

Il-KESE jappoġġja t-tassazzjoni ġusta u l-ġlieda kontra l-frodi, l-evażjoni tat-taxxa, il-ħasil tal-flus u l-prattiki finanzjarji tar-rifuġji fiskali; objettiv komuni tal-istituzzjonijiet tal-UE, il-gvernijiet u n-negozji għandu jkun li jaħdmu flimkien sabiex jistabbilixxu mekkaniżmi effiċjenti bħal dawn iż-żewġ direttivi kontra l-evażjoni tat-taxxa (31).

—

Il-koordinazzjoni fil-ġlieda kontra l-frodi u l-evażjoni tat-taxxa għandha tinkludi miżuri kontra l-erożjoni tal-bażi korporattiva u t-trasferiment tal-profitt: il-Kummissjoni Ewropea stmat li dan kien jammonta għal EUR 50-70 biljun fis-sena qabel bdew jiġu implimentati l-miżuri. Il-VAT mhux miġbura hija stmata li tlaħħaq madwar EUR 150 biljun kull sena.

—

L-UE għandha tikkoopera ma’ reġjuni ekonomiċi oħrajn biex tiġġieled b’mod effettiv il-korruzzjoni u l-evażjoni tat-taxxa mad-dinja kollha u biex tiżgura li r-regoli internazzjonali dwar it-taxxa korporattiva jkunu ċari, trasparenti, oġġettivi u prevedibbli.

—

Il-pubbliku qed jitlob dejjem aktar li t-tassazzjoni tintuża biex tiġi żgurata l-koeżjoni soċjali, jiġi miġġieled it-tisħin globali u jiġi promoss it-tkabbir sostenibbli.

—

Il-KESE jappella għal miżuri ta’ tassazzjoni effettivi u kkoordinati biex jiġi żgurat li l-kumpaniji kollha jħallsu s-sehem ġust tagħhom fir-rigward tat-taxxi u jikkontribwixxu għal baġits pubbliċi nazzjonali u Ewropej biex jipopermettu lill-gvernijiet jissodisfaw id-drittijiet soċjali tagħhom (32). Il-KESE jappoġġja l-proposta tal-Kummissjoni dwar l-istabbiliment ta’ Bażi Komuni Konsolidata għat-Taxxa Korporattiva (BKKTK) (33).

—

Il-mudelli l-ġodda tan-negozju li jużaw il-pjattaformi tal-internet u għodod diġitali oħrajn irriżultaw f’kumpaniji li jiddependu inqas fuq preżenza fiżika f’pajjiż. Il-KESE jemmen li huwa importanti ħafna li jiġu żviluppati prinċipji ġodda dwar kif il-profitti korporattivi jiġu attribwiti lil pajjiż tal-UE u kif għandhom jiġu ntaxxati, fi djalogu mal-imsieħba kummerċjali, u biex ikun hemm parteċipazzjoni attiva fid-diskussjonijiet li għaddejjin fil-livell tal-OECD/G20 dwar ftehim globali dwar l-ekonomija diġitalizzata, sabiex tiġi evitata kwalunkwe eskalazzjoni ta’ tensjonijiet kummerċjali u tat-taxxa bejn l-atturi ekonomiċi ewlenin fid-dinja (34).

—

L-UE teħtieġ li tiżgura li l-politiki interni u esterni kollha tagħha jkunu koerenti u allinjati mal-SDGs sabiex il-prinċipji tal-effiċjenza, tal-proporzjonalità u tas-sostenibbiltà jiġu kkunsidrati kif xieraq.

—

L-użu ta’ għodod aħjar ta’ regolamentazzjoni tal-Kummissjoni Ewropea huwa mod ieħor biex tiġi żgurata l-integrazzjoni ulterjuri tal-iżvilupp sostenibbli fil-politiki Ewropej. Il-valutazzjonijiet kollha tal-impatt tal-Kummissjoni jridu jevalwaw l-impatti ambjentali, tal-klima, soċjali u ekonomiċi sabiex is-sostenibbiltà tkun ikkunsidrata u meqjusa sewwa. L-evalwazzjonijiet ex post iridu janalizzaw ukoll it-tliet dimensjonijiet f’approċċ integrat b’saħħtu. Huma meħtieġa wkoll konsultazzjonijiet mas-sħab soċjali, filwaqt li jiġu rrispettati d-dispożizzjonijiet tat-Trattat li jitolbu l-konsultazzjoni speċifika tax-xogħol u tal-ġestjoni fir-rigward tal-leġislazzjoni dwar kwistjonijiet soċjali (Artikolu 154(2)); il-konsultazzjonijiet mal-Kumitat Ekonomiku u Soċjali Ewropew, il-Kumitat Ewropew tar-Reġjuni u l-Parlamenti nazzjonali jiffurmaw komponent ieħor tal-għodod tar-regolamentazzjoni aħjar biex jiġu ssodisfat ir-rekwiżit tal-inklużività li jinsab fil-qalba tal-Aġenda 2030.

—

Billi jitqiesu l-għanijiet tal-iżvilupp sostenibbli, il-Pjattaforma REFIT u l-valutazzjonijiet u l-evalwazzjonijiet tal-impatt iridu jgħinu biex jiżguraw li l-leġislazzjoni tkun favorevoli għan-negozju u għaċ-ċittadini. Dawn l-għodod għandhom, fil-futur, ikomplu jużaw is-sorsi kollha disponibbli, inkluża s-soċjetà ċivili, biex jivvalutaw kif jistgħu jtejbu l-effettività u l-effiċjenza tal-leġislazzjoni tal-UE fid-dawl tal-għanijiet tagħha. Dawn l-għodod għandhom jikkontribwixxu għal titjib regolatorju estensiv ta’ żvilupp sostenibbli fid-dimensjonijiet kollha tiegħu, bil-għan mhux biss li jissimplifikaw u jnaqqsu l-piżijiet mhux meħtieġa u biex jiżguraw il-kisba effettiva tal-għanijiet leġislattivi mingħajr ma jbaxxuhom, iżda wkoll biex jgħinu sabiex jirrevedu, jivvalidaw, jemendaw, itejbu jew jinfurzaw aħjar il-leġislazzjoni eżistenti.

—

Is-Semestru Ewropew bħala l-qafas ta’ governanza ekonomika tal-UE għandu xi enfasi fuq l-impjiegi u l-prestazzjoni soċjali, iżda huwa dgħajjef fejn jidħlu l-perikli ppreżentati mit-tibdil fil-klima u fuq il-progress tal-UE lejn il-kisba tal-miri ta’ Pariġi, kif irrappurtat fl-Istħarriġ Annwali dwar it-Tkabbir 2019 (35). Il-KESE jitlob strateġija ta’ żvilupp sostenibbli li tħares ’il quddiem inkorporata f’Ċiklu ta’ Żvilupp Sostenibbli, ibbażata fuq indikaturi u miri soċjali, ekonomiċi u ambjentali komplementari.

—

Jeħtieġ li d-djalogu soċjali jiġi rrikonoxxut bħala għodda ta’ implimentazzjoni tal-aġenda għall-iżvilupp. Id-djalogu soċjali jeħtieġ ambjent abilitanti u qafas istituzzjonali effettiv. Dan jibda bir-rispett għal-libertà ta’ assoċjazzjoni u d-dritt ta’ negozjar kollettiv. L-UE għandha taħdem mas-sħab soċjali biex tippromovi prattiki sodi ta’ relazzjonijiet industrijali u amministrazzjonijiet tax-xogħol li jaħdmu sew.

—

L-Unjoni Ewropea għandha ssaħħaħ ir-rabtiet tagħha mal-Istati Membri u terġa’ tikseb il-fiduċja taċ-ċittadini tagħha permezz ta’ approċċ ta’ Żvilupp Lokali Mmexxi mill-Komunità (CLLD) implimentat tajjeb li jippermetti żvilupp lokali integrat u l-involviment taċ-ċittadini u l-organizzazzjonijiet tagħhom fil-livell bażiku. Il-KESE huwa konvint li s-CLLD jista’ jkollu ħafna vantaġġi bħala għodda għall-iżvilupp lokali Ewropew ta’ suċċess (36).

—

L-UE għandha tadotta politiki u miżuri li japprovaw migrazzjoni sikura, ordnata u regolari u jsaħħu wkoll l-inklużjoni u l-koeżjoni soċjali. L-UE għandha taħdem f’koordinazzjoni aktar mill-qrib mal-ILO f’dak li għandu x’jaqsam mal-programmi ta’ migrazzjoni u integrazzjoni tax-xogħol.

—

Il-KESE jitlob rotot legali u sikuri għar-refuġjati meta jiġu fl-UE. Hemm bżonn ta’ approċċ ikkoordinat mill-Istati Membri kollha u l-partijiet ikkonċernati Ewropej u nazzjonali, ibbażat fuq responsabbiltà kondiviża, allokazzjoni ġusta, konverġenza u rispett għad-drittijiet fundamentali, bil-għan li jiġu inklużi aktar għażliet għal riunifikazzjoni tal-familja, rilokazzjoni u risistemazzjoni.

—

In-nuqqas ta' integrazzjoni ġġib magħħa riskji u spejjeż ekonomiċi, soċjokulturali, u politiċi. Għalhekk, l-investiment fl-integrazzjoni tal-migranti huwa l-aħjar politika tal-assigurazzjoni kontra spejjeż, problemi u tensjonijiet futuri potenzjali.

—

L-integrazzjoni hija proċess bidirezzjonali u l-komunità ospitanti u l-migranti għandhom drittijiet u dmirijiet; għalhekk jeħtieġ li r-responsabbiltà tinqasam bejniethom it-tnejn. La huwa ġust u lanqas sostenibbli li wieħed jistenna minn dawk li għadhom jaslu biex jintegraw mingħajr għajnuna fil-konfront ta’ ostakli soċjali, kulturali u ekonomiċi konsiderevoli. Biex jiġi ffaċilitat dan il-proċess, il-politiki pubbliċi għandhom jindirizzaw il-biżgħat, it-tħassib u l-inkwiet ta’ diversi sezzjonijiet tal-popolazzjoni fis-soċjetajiet tal-UE sabiex jiġu evitati diskorsi ksenofobiċi u kontra l-UE. Il-politiki rilevanti għandhom jinkludu sett ċar, konsistenti u raġunat ta' obbligi kif ukoll denunzja konsistenti ta' retorika u mġiba kontra l-migranti.

—

Il-gwerer, it-tibdil fil-klima u n-nuqqas ta’ prospetti f’pajjiżi terzi jistgħu joħolqu influss kontinwu u saħansitra akbar ta’ refuġjati u migranti. Il-limitazzjoni tal-fatturi li jikkawżaw il-migrazzjoni b'mod ġenerali hija sfida globali. Se jkun hemm aktar migrazzjoni (inklużi refuġjati minħabba raġunijiet ta’ klima) tat-tipi kollha minħabba l-fenomenu dejjem jikber tal-ispustament tan-nies. Minħabba dan, l-UE trid tkun ippreparata aħjar biex tikkoordina d-distribuzzjoni tagħhom fl-Istati Membri kollha. Il-KESE diġà enfasizza kif proċessi ekonomiċi żbilanċjati jistgħu jżidu d-destabbilizzazzjoni f'dan il-kuntest. Għalhekk, il-KESE jappoġġja l-pożizzjoni li t-Trattat ta’ Lisbona jipprovdi mandat wiesgħa biżżejjed biex jirrevedi l-politika tal-immigrazzjoni sabiex jirregola l-istatus ta’ “individwi spostati minħabba raġunijiet tal-ambjent”.

—

Biex tindirizza l-prijoritajiet ekonomiċi, soċjali u ambjentali, ġodda kif ukoll kontinwi, l-UE teħtieġ, f’dan il-mument politikament kritiku, Baġit tal-UE b’saħħtu. Il-proposta tal-Kummissjoni dwar il-Qafas Finanzjarju Pluriennali (QFP) 2021-2027 hija modesta u mhux ambizzjuża. Bħall-Parlament Ewropew u l-Kumitat Ewropew tar-Reġjuni, il-KESE jitlob li r-riżorsi jiġu ffissati għal 1,3 % tal-ING u biex id-dħul jiġi l-aktar mir-riżorsi tal-UE stess, billi jiġu stabbiliti ċ-ċifri tat-taxxa proposti mill-Grupp ta’ Livell Għoli dwar ir-Riżorsi Proprji (HLGOR), ippresedut minn Mario Monti (38).

—

Fil-fehma tal-KESE, ir-riżorsi għandhom jiġu ttrasferiti lill-Istati Membri skont il-kriterji tal-ġustizzja distributtiva biex jirrestawraw it-triq tal-konverġenza ekonomika u soċjali li ġiet interrotta mill-kriżi (39).

—

Il-KESE jqis li huwa neċessarju li l-QFP li jmiss iżid il-finanzjament biex jippermetti (i) l-implimentazzjoni mill-Istati Membri tad-Dikjarazzjoni ta’ Gothenburg dwar il-Pilastru Ewropew tad-Drittijiet Soċjali biex jistimula l-ħolqien ta’ impjiegi ta’ kwalità fil-kuntest ta’ żvilupp sostenibbli, (ii) it-twettiq tal-Aġenda 2030 tan-NU, u (iii) l-implimentazzjoni tal-Ftehim ta’ Pariġi li jippromovi tranżizzjonijiet ġusti lejn soċjetajiet ekoloġiċi u diġitizzati.

—

L-UE teħtieġ baġits ambizzjużi li jkunu strumenti ta' politiki li jiżviluppaw strateġija ċara għat-tisħiħ tal-Unjoni, b'aktar integrazzjoni, aktar demokrazija, appoġġ aktar b'saħħtu għall-organizzazzjonijiet tas-soċjetà ċivili kemm fl-UE kif ukoll barra minnha, appoġġ akbar għall-kumpaniji biex jiffaċċjaw sfidi ambjentali u diġitali, dimensjoni soċjali aktar b'saħħitha u appoġġ akbar għall-ħajja rurali. Huwa biss b'dan il-mod li l-UE tista’ tikkontrolla u tegħleb il-forzi ċentrifugali interni u tindirizza r-riskji ġeopolitiċi esterni.

—

Il-KESE jappoġġja l-proposta li l-Istati Membri jirċievu fondi tal-UE bil-kondizzjoni li jirrispettaw il-prinċipju tal-istat tad-dritt, pilastru fundamentali tal-valuri tal-Unjoni skont l-Artikolu 2 tat-TUE.

—

Ir-rwol ċentrali tal-KESE fit-tnaqqis tad-distakk maċ-ċittadini Ewropej għandu jkun rikonoxxut u appoġġjat aħjar mill-UE.

—

L-UE għandha wkoll tiddeċentralizza d-djalogi taċ-ċittadini tagħha sabiex il-muniċipalitajiet u r-reġjuni jkunu jistgħu jibdew jiżviluppaw skop u identità Ewropea konġunta.

—

Il-politiki tal-UE għandhom ikunu aktar reattivi għall-proposti miċ-ċittadini, il-komunitajiet u l-organizzazzjonijiet tas-soċjetà ċivili, sabiex jagħtuhom raġuni biex ikunu involuti.

—

Il-KESE għandu jevalwa l-implimentazzjoni tal-politiki tal-UE fl-Istati Membri kull sena, abbażi tal-objettivi tal-politika stabbiliti f’din l-Opinjoni, sabiex jipprovdi tweġibiet konkreti liċ-ċittadini dwar l-impatt tas-sħubija tal-UE fuq il-ħajja ta' kuljum tagħhom.