This document is an excerpt from the EUR-Lex website
Document 52012AE1581
Opinion of the European Economic and Social Committee on the ‘Proposal for a regulation of the European Parliament and of the Council establishing, as part of the Internal Security Fund, the instrument for financial support for external borders and visa’ COM(2011) 750 final — 2011/0365 (COD), ‘Proposal for a regulation of the European Parliament and of the Council establishing the Asylum and Migration Fund’ COM(2011) 751 final — 2011/0366 (COD), ‘Proposal for a regulation of the European Parliament and of the Council laying down general provisions on the Asylum and Migration Fund and on the instrument for financial support for police cooperation, preventing and combating crime, and crisis management’ COM(2011) 752 final — 2011/0367 (COD) and the ‘Proposal for a regulation of the European Parliament and of the Council establishing, as part of the Internal Security Fund, the instrument for financial support for police cooperation, preventing and combating crime, and crisis management’ COM(2011) 753 final — 2011/0368 (COD)
Opinjoni tal-Kumitat Ekonomiku u Soċjali Ewropew dwar il- “Proposta għal Regolament tal-Parlament Ewropew u tal-Kunsill li jistabbilixxi, bħala parti mill-Fond għas-Sigurtà Interna, l-istrument għall-appoġġ finanzjarju għall-fruntieri esterni u l-viża” COM(2011) 750 final — 2011/0365 (COD) il- “Proposta għal Regolament tal-Parlament Ewropew u tal-Kunsill li jistabbilixxi l-Fond għall-Migrazzjoni u l-Ażil” COM(2011) 751 final — 2011/0366 (COD) il- “Proposta għal Regolament tal-Parlament Ewropew u tal-Kunsill li jistabbilixxi dispożizzjonijiet ġenerali dwar il-Fond għall-Migrazzjoni u l-Ażil u dwar l-istrument għal appoġġ finanzjarju għall-kooperazzjoni tal-pulizija, il-prevenzjoni u l-ġlieda kontra l-kriminalità u l-ġestjoni tal-kriżi” COM(2011) 752 final — 2011/0367 (COD) il- “Proposta għal Regolament tal-Parlament Ewropew u tal-Kunsill li jistabbilixxi, bħala parti mill-Fond għas-Sigurtà Interna, l-istrument għal appoġġ finanzjarju għall-kooperazzjoni tal-pulizija, il-prevenzjoni u l-ġlieda kontra l-kriminalità u l-ġestjoni tar-riskji” COM(2011) 753 final — 2011/0368 (COD)
Opinjoni tal-Kumitat Ekonomiku u Soċjali Ewropew dwar il- “Proposta għal Regolament tal-Parlament Ewropew u tal-Kunsill li jistabbilixxi, bħala parti mill-Fond għas-Sigurtà Interna, l-istrument għall-appoġġ finanzjarju għall-fruntieri esterni u l-viża” COM(2011) 750 final — 2011/0365 (COD) il- “Proposta għal Regolament tal-Parlament Ewropew u tal-Kunsill li jistabbilixxi l-Fond għall-Migrazzjoni u l-Ażil” COM(2011) 751 final — 2011/0366 (COD) il- “Proposta għal Regolament tal-Parlament Ewropew u tal-Kunsill li jistabbilixxi dispożizzjonijiet ġenerali dwar il-Fond għall-Migrazzjoni u l-Ażil u dwar l-istrument għal appoġġ finanzjarju għall-kooperazzjoni tal-pulizija, il-prevenzjoni u l-ġlieda kontra l-kriminalità u l-ġestjoni tal-kriżi” COM(2011) 752 final — 2011/0367 (COD) il- “Proposta għal Regolament tal-Parlament Ewropew u tal-Kunsill li jistabbilixxi, bħala parti mill-Fond għas-Sigurtà Interna, l-istrument għal appoġġ finanzjarju għall-kooperazzjoni tal-pulizija, il-prevenzjoni u l-ġlieda kontra l-kriminalità u l-ġestjoni tar-riskji” COM(2011) 753 final — 2011/0368 (COD)
ĠU C 299, 4.10.2012, p. 108–114
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
4.10.2012 |
MT |
Il-Ġurnal Uffiċjali tal-Unjoni Ewropea |
C 299/108 |
Opinjoni tal-Kumitat Ekonomiku u Soċjali Ewropew dwar il-“Proposta għal Regolament tal-Parlament Ewropew u tal-Kunsill li jistabbilixxi, bħala parti mill-Fond għas-Sigurtà Interna, l-istrument għall-appoġġ finanzjarju għall-fruntieri esterni u l-viża”
COM(2011) 750 final — 2011/0365 (COD)
il-“Proposta għal Regolament tal-Parlament Ewropew u tal-Kunsill li jistabbilixxi l-Fond għall-Migrazzjoni u l-Ażil”
COM(2011) 751 final — 2011/0366 (COD)
il-“Proposta għal Regolament tal-Parlament Ewropew u tal-Kunsill li jistabbilixxi dispożizzjonijiet ġenerali dwar il-Fond għall-Migrazzjoni u l-Ażil u dwar l-istrument għal appoġġ finanzjarju għall-kooperazzjoni tal-pulizija, il-prevenzjoni u l-ġlieda kontra l-kriminalità u l-ġestjoni tal-kriżi”
COM(2011) 752 final — 2011/0367 (COD)
il-“Proposta għal Regolament tal-Parlament Ewropew u tal-Kunsill li jistabbilixxi, bħala parti mill-Fond għas-Sigurtà Interna, l-istrument għal appoġġ finanzjarju għall-kooperazzjoni tal-pulizija, il-prevenzjoni u l-ġlieda kontra l-kriminalità u l-ġestjoni tar-riskji”
COM(2011) 753 final — 2011/0368 (COD)
2012/C 299/20
Relatur: is-Sur PARIZA CASTAÑOS
Nhar is-16 ta’ Frar 2012, il-Kunsill iddeċieda, b’konformità mal-Artikolu 304 tat-Trattat dwar il-Funzjonament tal-Unjoni Ewropea, li jikkonsulta lill-Kumitat Ekonomiku u Soċjali Ewropew dwar
|
il-Proposta għal Regolament tal-Parlament Ewropew u tal-Kunsill li jistabbilixxi, bħala parti mill-Fond għas-Sigurtà Interna, l-istrument għall-appoġġ finanzjarju għall-fruntieri esterni u l-viża COM(2011) 750 final – 2011/0365(COD) |
|
il-Proposta għal Regolament tal-Parlament Ewropew u tal-Kunsill li jistabbilixxi l-Fond għall-Migrazzjoni u l-Ażil COM(2011) 751 final – 2011/0366 (COD) |
|
il-Proposta għal Regolament tal-Parlament Ewropew u tal-Kunsill li jistabbilixxi dispożizzjonijiet ġenerali dwar il-Fond għall-Migrazzjoni u l-Ażil u dwar l-istrument għal appoġġ finanzjarju għall-kooperazzjoni tal-pulizija, il-prevenzjoni u l-ġlieda kontra l-kriminalità u l-ġestjoni tal-kriżi COM(2011) 752 final – 2011/0367 (COD) |
|
il-Proposta għal Regolament tal-Parlament Ewropew u tal-Kunsill li jistabbilixxi, bħala parti mill-Fond għas-Sigurtà Interna, l-istrument għal appoġġ finanzjarju għall-kooperazzjoni tal-pulizija, il-prevenzjoni u l-ġlieda kontra l-kriminalità u l-ġestjoni tar-riskji COM(2011) 753 final – 2011/0368 (COD) |
Is-Sezzjoni Speċjalizzata għax-Xogħol, l-Affarijiet Soċjali u ċ-Ċittadinanza, inkarigata sabiex tipprepara l-ħidma tal-Kumitat dwar is-suġġett, adottat l-Opinjoni tagħha nhar it-28 ta’ Ġunju 2012.
Matul l-482 sessjoni plenarja tiegħu li saret fil-11 u t-12 ta’ Lulju 2012 (seduta tal-11 ta’ Lulju), il-Kumitat Ekonomiku u Soċjali Ewropew adotta din l-Opinjoni b’133 vot favur u 2 astensjonijiet.
1. Kummenti ġenerali
1.1 |
Il-proposti tal-Kummissjoni Ewropea dwar il-baġit għall-affarijiet interni għall-2014-2020 huma fundamentali sabiex tinħoloq Żona ta’ Sigurtà, Libertà u Ġustizzja kif ukoll Ewropa aktar miftuħa, sigura u bbażata fuq is-solidarjetà. Il-KESE jappoġġja l-fatt li tissaħħaħ l-importanza tal-Fondi għall-Ażil, il-Migrazzjoni u s-Sigurtà Interna fi ħdan il-baġit. |
1.2 |
Il-Kumitat iqis li l-Unjoni Ewropea tagħti valur miżjud kbir lil dawn il-politiki, peress li l-ġestjoni tal-flussi ta’ migrazzjoni, l-ażil u t-theddidiet għas-sigurtà huma oqsma li l-Istati Membri ma jistgħux jindirizzaw huma nfushom. |
1.3 |
Il-Kumitat jappoġġja l-proposta tal-Kummissjoni li tipproponi l-kondiviżjoni tal-ġestjoni u approċċ orjentat lejn ir-riżultati, waqt li jitfasslu programmi multiannwali fil-kuntest ta’ djalogu politiku ta’ livell għoli, sabiex il-programmi nazzjonali jkunu konsistenti mal-għanijiet politiċi u l-prijoritajiet tal-UE. |
1.4 |
Huwa essenzjali li l-azzjonijiet iffinanzjati kollha jkunu bbażati fuq il-politiki (l-għanijiet taż-żona ta’ libertà, sigurtà u ġustizzja) ikollhom valur miżjud Ewropew u jikkontribwixxu għall-ksib tal-għanijiet politiċi tal-UE. |
1.5 |
Il-KESE jilqa’ l-isforzi tal-Kummissjoni Ewropea sabiex tissemplifika l-istrumenti finanzjarji permezz tal-ħolqien ta’ żewġ Fondi, wieħed għall-Migrazzjoni u l-Ażil (1), u l-ieħor għas-Sigurtà Interna (2), li huma akkumpanjati minn Regolament orizzontali, b’għadd ta’ regoli komuni dwar l-ipprogrammar, l-informazzjoni, il-ġestjoni finanzjarja, il-kontroll u l-evalwazzjoni (3). |
1.6 |
Il-KESE jappoġġja l-qafas orizzontali komuni li jissemplifika b’mod sinifikanti s-sistema attwali, jipprovdi aktar flessibbiltà lill-ġestjoni finanzjarja u l-implimentazzjoni tagħha, kif ukoll isaħħaħ is-sistema ta’ monitoraġġ u evalwazzjoni. |
1.7 |
Il-KESE jappoġġja l-proposta tal-Kummissjoni li tistabbilixxi ammont bażiku u ieħor varjabbli jew flessibbli meta jitqassmu r-riżorsi finanzjarji fost l-Istati Membri. |
1.8 |
Għandhom jittejbu s-sistemi li jevalwaw ir-riżultati, bl-użu ta’ indikaturi adegwati, u għalhekk għandhom jiġu ffinanzjati l-ħidmiet indipendenti taċ-ċentri ta’ riċerka u tal-organizzazzjonijiet tas-soċjetà ċivili. |
1.9 |
Il-KESE jappoġġja l-fatt li l-programmi nazzjonali jkunu bbażati fuq il-prinċipju ta’ sħubija, iżda jqis li għandhom jittejbu s-sistemi ta’ parteċipazzjoni tal-partijiet interessati kollha: tal-awtoritajiet nazzjonali, reġjonali u lokali, tal-organizzazzjonijiet tas-soċjetà ċivili u tal-imsieħba soċjali. Il-prinċipju ta’ sħubija għandu jkun ippreċiżat fir-regolamenti sabiex ma jkunx jiddependi mir-regoli u l-prattiki nazzjonali. |
1.10 |
Il-KESE, li jaħdem mal-istituzzjonijiet l-oħra tal-UE fl-iżvilupp tal-politiki tal-immigrazzjoni u l-ażil, jimpenja ruħu b’mod speċjali fl-attivitajiet tal-Forum Ewropew għall-Integrazzjoni. Għalhekk jenfasizza l-importanza tal-Fond għall-Migrazzjoni u l-Ażil għall-integrazzjoni tal-immigranti u r-refuġjati u jqis li l-politiki tal-integrazzjoni għandhom ukoll jiġu kkomplementati bir-riżorsi tal-Fond Soċjali Ewropew. |
1.11 |
Il-KESE jipproponi li jiżdiedu r-riżorsi finanzjarji għall-“Azzjonijiet tal-Unjoni”, peress li għandhom valur miżjud kbir Ewropew. Għal dawn l-azzjonijiet hemm bżonn li jiġu allokati 20 % tal-Fond, u l-Kummissjoni għandha tistabbilixxi djalogu mal-KESE u mal-Forum Ewropew għall-Integrazzjoni, waqt li jitqies li permezz ta’ dan l-istrument finanzjarju ser jissaħħu l-attivitajiet tal-Forum u jiġu appoġġjati n-netwerks Ewropej tas-soċjetà ċivili u tal-imsieħba soċjali. |
1.12 |
Il-KESE ppropona li fil-livell nazzjonali, reġjonali u lokali jinħolqu forums u pjattaformi li fihom jipparteċipaw l-organizzzzjonijiet tal-immigranti u organizzazzjonijiet oħra tas-soċjetà ċivili. Il-funzjonament ta’ dawn l-attivitajiet għandu jiġi ffinanzjat mir-riżorsi tal-Fond għall-Migrazzjoni u l-Ażil. |
1.13 |
Il-KESE jikkunsidra li l-politiki tal-integrazzjoni, b’enfasi fuq it-tnaqqis tal-esklużjoni soċjali taċ-ċittadini Ewropej, tal-minoranzi u tal-immigranti, għandhom ukoll jiġu kkomplementati bir-riżorsi finanzjarji tal-Fond Soċjali Ewropew. |
1.14 |
L-Ewropa għandha tirreaġixxi b’mod deċiżiv għaż-żieda fir-razziżmu u l-ksenofobija fir-rigward tal-immigranti. L-istituzzjonijiet tal-Unjoni għandhom ikunu aktar attivi kontra din l-imġiba u dawn l-ideoloġiji. |
1.15 |
Il-protezzjoni tad-drittijiet tal-bniedem u r-rispett għall-Karta tad-Drittijiet Fundamentali għandhom ikunu totalment garantiti fl-azzjonijiet kollha li jiġu ffinanzjati mill-Fondi għall-Migrazzjoni u l-Ażil u għas-Sigurtà Interna. |
1.16 |
Il-Kumitat jixtieq li jitjieb il-bilanċ bejn il-libertà u s-sigurtà. L-Unjoni Ewropea għandha tibqa’ tkun soċjetà ħielsa u miftuħa, ibbażata fuq l-istat tad-dritt, u qatt m’għandha tissagrifika l-valuri tal-libertà u tal-protezzjoni tad-drittijiet fundamentali. |
1.17 |
Il-KESE jikkunsidra li hemm bżonn li r-Regolament jassigura rwol aktar attiv għas-soċjetà ċivili organizzata meta jiġu evalwati l-impatt, l-effettività u l-valur miżjud tal-inizjattivi u l-azzjonijiet previsti fl-Istrateġija Ewropea dwar is-Sigurtà Interna. |
2. Il-Fond għall-Migrazzjoni u l-Ażil: l-approċċ tas-soċjetà ċivili
2.1 |
B’mod ġenerali, il-Kumitat huwa favur l-inizjattivi u l-linji baġitarji proposti mill-Kummissjoni u jappoġġja l-fatt li jissaħħaħ il-prinċipju ta’ sħubija. |
2.2 |
Il-KESE jqis b’interess speċjali l-proposti li jinsabu fil-Fond għall-Migrazzjoni u l-Ażil, u jipproponi li, matul in-negozjati fi ħdan il-Kunsill, l-Istati Membri japprovaw il-kwantitajiet proposti mill-Kummissjoni mingħajr ma dawn jitnaqqsu, peress li l-kwistjonijiet tal-ażil, il-migrazzjoni, l-integrazzjoni u l-protezzjoni tad-drittijiet fundamentali tal-bniedem għandhom bżonn ir-riżorsi neċessarji, speċjalment matul il-kriżi ekonomika. |
2.3 |
B’differenza għas-sistema baġitarja attwali, ir-rwol tal-Parlament Ewropew (PE) ser ikun deċiżiv, peress li huwa koleġislatur, u jkun jista’ jevalwa demokratikament l-inizjattivi kollha u jassigura l-valur miżjud Ewropew. |
2.4 |
Il-KESE jikkunsidra li l-PE għandu jsaħħaħ id-dimensjoni Ewropea tal-prijoritajiet politiċi li ser jirċievu finanzjament, anke fil-livell nazzjonali. Il-proċess politiku li matulu jiġu approvati r-Regolamenti għandu jiffaċilita l-parteċipazzjoni tas-soċjetà ċivili u organizzata permezz tal-prinċipju ta’ sħubija u l-ħolqien ta’ fora u pjattaformi kif ukoll ta’ valutazzjonijiet indipendenti. |
2.5 |
Il-KESE jilqa’ d-dispożizzjonijiet il-ġodda fir-Regolamenti li jgħinu lis-soċjetà ċivili taċċessa s-sussidji, iżda jirrakkomanda li l-proċeduri jkunu aktar flessibbli sabiex ikunu jistgħu jipparteċipaw ukoll l-organizzazzjonijiet iż-żgħar u b’hekk jitnaqqsu l-piżijiet amministrattivi u finanzjarji. |
2.6 |
Is-soċjetà ċivili tagħti valur miżjud kbir fl-identifikazzjoni tal-bżonnijiet abbażi ta’ rapporti indipendenti u sabiex jitwettqu l-istudji u l-evalwazzjonijiet tal-politiki. Huma l-organizzazzjonijiet tas-soċjetà ċivili li għandhom esperjenza vasta u għarfien tar-realtà fil-livell lokali u għalhekk jafu tajjeb il-mod li bih jitwettqu l-azzjonijiet. |
2.7 |
Il-KESE jikkunsidra li l-prinċipju ta’ sħubija huwa ass ċentrali tal-qafas finanzjarju l-ġdid, li għandu jiggarantixxi approċċ aktar parteċipattiv mill-partijiet interessati kollha: l-awtoritajiet nazzjonali, reġjonali u lokali, l-organizzazzjonijiet tas-soċjetà ċivili u l-imsieħba soċjali. |
2.8 |
Il-prinċipju ta’ sħubija għandu jiġi implimentat matul il-fażijiet kollha, mill-preparazzjoni u l-implimentazzjoni sal-monitoraġġ u l-evalwazzjoni tal-finanzjament mogħti, waqt li jiġu inklużi kemm l-Istati Membri kif ukoll l-azzjonijiet tal-UE (4). |
2.9 |
Il-KESE jappoġġja l-fatt li fir-Regolament Finanzjarju, l-Istati Membri għandhom l-obbligu li joħolqu sħubijiet mal-awtoritajiet u l-korpi kompetenti bil-għan li jiġu żviluppati u implimentati l-programmi nazzjonali. Fost dawn l-awtoritajiet u l-korpi għandhom jiġu inklużi l-awtoritajiet reġjonali u lokali, is-soċjetà ċivili (l-organizzazzjonijiet nongovernattivi, l-organizzazzjonijiet tal-immigranti u l-imsieħba soċjali) u l-organizzazzjonijiet internazzjonali (UNHCR, OIM, eċċ.). |
3. Il-prijoritajiet u d-djalogu politiku
3.1 |
Il-KESE jindika li “djalogu politiku” huwa fundamentali sabiex jiġu stabbiliti l-prijoritajiet tal-programmi nazzjonali, iżda jqis li, apparti l-Kummissjoni Ewropea u l-Istati Membri, il-partijiet interessati istituzzjonali Ewropej kollha (il-PE, il-KESE u l-KtR) għandhom jieħdu sehem fid-djalogu. |
3.2 |
Fil-kuntest tad-djalogu politiku, kemm il-KESE kif ukoll il-Forum Ewropew għall-Integrazzjoni għandu jkollhom rwol konkret sabiex jidentifikaw il-prijoritajiet u l-objettivi għall-finanzjament u jiġu megħluba l-ostakli. Il-Forum u l-KESE jistgħu jsaħħu l-valur miżjud Ewropew tal-Fond għall-Migrazzjoni u l-Ażil fl-ipprogrammar multiannwali ta’ kull Stat Membru. |
3.3 |
Il-Forum u l-KESE għandhom jiġu kkonsultati wkoll meta jiġu stabbiliti l-prijoritajiet tal-azzjonijiet transnazzjonali jew li għandhom interess speċjali għall-Unjoni Ewropea, kif ukoll meta ssir ir-reviżjoni intermedja tal-azzjonijiet speċifiċi. Il-Kummissjoni Ewropea għandha tistabbilixxi wkoll sħubija mal-imsieħba soċjali u l-organizzazzjonijiet nongovernattivi, fil-qafas tal-“Azzjonijiet tal-Unjoni”. |
3.4 |
Il-KESE jipproponi wkoll li l-qafas finanzjarju l-ġdid jiggarantixxi li l-Istati Membri kollha jniedu djalogu strutturat u plurali fil-livell nazzjonali mal-imsieħba soċjali u l-organizzazzjonijiet nongovernattivi sabiex ikollhom rwol importanti meta jistabbilixxu l-prijoritajiet nazzjonali qabel id-djalogu mal-Kummissjoni Ewropea. |
4. Programmar u ġestjoni
4.1 |
Il-KESE jikkunsidra li għandha tiżdied il-kapaċità finanzjarja tal-“azzjonijiet tal-Unjoni” li huma l-fondi destinati għal attivitajiet ta’ natura politika prijoritarja (li jappoġġjaw il-leġislazzjoni u l-koordinazzjoni politika) kif ukoll il-proġetti li fihom is-soċjetà ċivili organizzata u l-imsieħba soċjali għandhom rwol x’jaqdu. Għal dan il-għan, il-KESE jappoġġja l-fatt li l-Kummissjoni Ewropea għandha 20 % tal-baġit totali tal-Fond għall-Migrazzjoni u l-Ażil. Għall-ġestjoni tiegħu, il-Kummissjoni għandha tniedi djalogu aktar attiv mal-KESE, mal-Forum u mal-organizzazzjonijiet tas-soċjetà ċivili. |
4.2 |
Il-KESE jappoġġja l-proposta tal-Kummissjoni li l-kontribuzzjoni finanzjarja fil-kuntest tal-programmi nazzjonali tkun tkopri 75 % tat-total tal-infiq eliġibbli tal-proġetti, li jistgħu jkunu wkoll ikkofinanzjati minn sorsi pubbliċi jew privati. |
4.3 |
Huwa favur ukoll il-possibbiltà li l-kontribuzzjoni tiżdied għal 90 % skont il-prijoritajiet strateġiċi mfissra f’kull wieħed mir-Regolamenti speċifiċi jew “f’ċirkostanzi debitament ġustifikati, b’mod partikolari jekk il-proġetti ma setgħux ġew implimentati b’mod ieħor u l-għanijiet tal-programm nazzjonali ma kinux jintlaħqu.” Hawnhekk għandha tingħata prijorità lill-azzjonijiet u l-proġetti mwettqa mill-organizzazzjonijiet nongovernattivi żgħar. |
4.4 |
Il-KESE jaqbel mal-għan li l-piż amministrattiv jiġi ssemplifikat u jitnaqqas, u li l-monitoraġġ u l-evalwazzjoni tal-programmi u l-proġetti jsiru prijorità kemm fil-livell nazzjonali kif ukoll fil-livell Ewropew. Huwa essenzjali li tiġi ggarantita evalwazzjoni indipendenti u tal-ogħla kwalità, flimkien mas-soċjetà ċivili organizzata, u li l-evalwazzjoni jkollha għad-dispożizzjoni tagħha r-riżorsi finanzjarji neċessarji. |
4.5 |
Abbażi tar-rapporti ta’ evalwazzjoni pprovduti mill-Istati Membri (rapport provviżorju fl-2017 u rapport ieħor ex post fl-2023), il-Kummissjoni ser tippreżenta rapport lill-Parlament Ewropew, lill-Kunsill, lill-KESE u lill-KtR dwar l-applikazzjoni u l-impatt tar-Regolamenti. Il-KESE jemmen li s-soċjetà ċivili għandha tingħata rwol fl-evalwazzjoni u għalhekk ser jipproponi lill-Kummissjoni li torganizzata sistema strutturata ta’ konsultazzjoni kif ukoll li ssejjaħ Konferenza |
4.6 |
Il-KESE jappoġġja l-proposta tal-Kummissjoni li tistabbilixxi ammont bażiku u ieħor varjabbli jew flessibbli meta jitqassmu r-riżorsi finanzjarji fost l-Istati Membri. Fir-rigward tal-ammont flessibbli, il-KESE jqis essenzjali li kull Stat Membru jfassal il-programm annwali tiegħu b’konformità mal-prijoritajiet tal-UE u jkun jinkludi l-kooperazzjoni ma’ Stati Membri oħra. |
4.7 |
Fir-rigward tal-Fond għall-Migrazzjoni u l-Ażil, il-KESE jqis li l-ħolqien ta’ fora u/jew pjattaformi nazzjonali, reġjonali u lokali ta’ immigrazzjoni u integrazzjoni, li fihom jipparteċipaw l-organizzazzjonijiet tas-soċjetà ċivili, għandhom jiġu inklużi espressament bħala azzjoni prijoritarja, u ffinanzjati permezz ta’ ammont varjabbli. |
4.8 |
Għandu jkun hemm aktar trasparenza fl-allokazzjoni tal-perċentwali tal-Fond li jiġu ddedikati għal kull wieħed mill-għanijiet speċifiċi, bil-għan li jiġi assigurat bilanċ fil-livell nazzjonali. |
4.9 |
Ir-riżorsi finanzjarji għall-“azzjonijiet tal-Unjoni” għandhom jiġu allokati mhux biss għall-assistenza ta’ emerġenza, in-Netwerk Ewropew dwar il-Migrazzjoni, l-assistenza teknika u l-implimentazzjoni ta’ kompiti operattivi speċifiċi mill-aġenziji tal-Unjoni, iżda wkoll għall-appoġġ tal-Forum Ewropew għall-Integrazzjoni u għan-netwerks Ewropej tas-soċjetà ċivili u tal-imsieħba soċjali. |
4.10 |
Il-KESE ma jaqbilx mal-proposta tal-Kummissjoni li jiġu ffinanzjati biss il-proġetti ta’ riċerka meqjusa bħala “innovattivi” mil-lat tal-applikazzjoni tagħhom mis-servizzi u l-forzi tas-sigurtà. Għandu jinżamm l-appoġġ għal proġetti ta’ riċerka li fihom jipparteċipaw is-soċjetà ċivili, l-imsieħba soċjali u l-organizzazzjonijiet nongovernattivi u li jivvalutaw il-politiki ta’ sigurtà u ta’ immigrazzjoni u l-impatt tagħhom fuq id-drittijiet fundamentali. |
5. Benefiċjarji tal-Fond għall-Migrazzjoni u l-Ażil
5.1 |
Il-KESE jilqa’ l-flessibbiltà li tinsab fil-proposta tal-Kummissjoni relatata mal-benefiċjarji u jenfasizza l-bżonn li jiġi assigurat li l-azzjonijiet iffinanzjati jistgħu jiġu applikati għal grupp akbar ta’ destinatarji, u mhux biss għaċ-ċittadini ta’ pajjiżi terzi b’residenza legali fl-UE. Kien hemm ħafna diskussjonijiet dwar din il-kwistjoni fil-Forum Ewropew għall-Integrazzjoni u fl-opinjonijiet tal-KESE. |
5.2 |
Il-KESE jixtieq li l-Fond għall-Migrazzjoni u l-Ażil ikun jippermetti azzjonijiet immirati lejn kulħadd, indipendentement mill-istatus tagħhom, inklużi l-immigranti mingħajr dokumenti; għalhekk jilqa’ l-proposta tal-Kummissjoni li jiġi estiż il-grupp ta’ benefiċjarji tal-azzjonijiet peress li dan huwa l-uniku mod kif tiġi ffinanzjata l-ħidma tal-integrazzjoni tal-imsieħba soċjali u l-organizzazzjonijiet nongovernattivi li jaħdmu sabiex jintegraw il-persuni “mingħajr karti”. |
5.3 |
Madankollu, il-KESE huwa kontra l-proposta tal-Kummissjoni li tinkludi fl-ambitu ta’ applikazzjoni l-azzjonijiet li jintegraw liċ-ċittadini ta’ Stat Membru bi sfond ta’ migrazzjoni, “li jkollhom mill-inqas ġenitur wieħed (jiġifieri omm jew missier) li huwa ċittadin ta’ pajjiż terz”, peress li din tista’ tinvolvi sitwazzjonijiet ta’ diskriminazzjoni, peress li ċ-ċittadini tal-Istati Membri ma jistgħux ikunu soġġetti għall-programmi jew testijiet ta’ integrazzjoni bħala kundizzjoni għar-residenza u l-moviment ħieles, għax dan imur kontra l-prinċipju tat-trattament indaqs garantit mill-istatut ta’ ċittadinanza tal-Unjoni. |
5.4 |
Il-KESE jikkunsidra li l-Fond għall-Migrazzjoni u l-Ażil huwa strument li jwassal biex jiġu ffinanzjati l-politiki ta’ integrazzjoni u li jilqa’ l-persuni li waslu reċentement fl-Ewropa. Sabiex jiġu evitati l-esklużjoni soċjali u n-nuqqas ta’ opportunitajiet għal xi ċittadini Ewropej li huma dixxendenti ta’ immigranti, jew għal ċittadini Ewropej li jgħixu fi Stat Membru differenti għal dak tan-nazzjonalità tagħhom, l-UE għandha strumenti finanzjarji aktar adegwati bħall-Fond Soċjali Ewropew. |
5.5 |
Il-programmi intiżi li jipproteġu l-persuni partikolarment vulnerabbli għandhom ikunu prijorità għall-finanzjament, speċjalment dawk immirati lejn il-minuri mhux akkumpanjati, in-nisa tqal u l-vittmi tat-traffikar u l-isfruttament sesswali. |
6. Informazzjoni, trasparenza u pubbliċità
6.1 |
Il-KESE jappoġġja l-fatt li fil-qafas finanzjarju l-ġdid jiġu assigurati aktar informazzjoni, pubbliċità u trasparenza. Għandu jiġi assigurat li l-Istati Membri u l-awtoritajiet responsabbli jiggarantixxu l-aċċess għall-informazzjoni dwar il-programmi nazzjonali (permezz tal-ħolqien ta’ portal fuq l-internet). |
6.2 |
Madankollu s-semplifikazzjoni tal-proċeduri m’għandhiex tfisser inqas trasparenza. Il-qafas il-ġdid għandu jsaħħaħ il-livell ta’ trasparenza fl-implimentazzjoni tal-programmi u l-azzjonijiet fil-livell nazzjonali, reġjonali u lokali. |
7. Drittijiet fundamentali
7.1 |
Il-KESE jqis li l-qafas finanzjarju għandu jsaħħaħ il-protezzjoni tad-drittijiet tal-bniedem fl-azzjonijiet kollha, peress li l-Karta tad-Drittijiet Fundamentali għandha impatt pożittiv fuq il-politiki tas-sigurtà interna, l-ażil u l-migrazzjoni. Il-KESE diġà fassal Opinjoni fuq inizjattiva proprja (5) sabiex id-drittijiet tal-bniedem jiġu protetti fil-politiki tal-immigrazzjoni, l-ażil, ir-ritorn u l-fruntieri. |
7.2 |
Il-KESE jipproponi li r-Regolamenti dwar il-Fond għall-Migrazzjoni u l-Ażil u l-Fond għas-Sigurtà Interna jiggarantixxu li l-azzjonijiet u l-proġetti kollha ffinanzjati mill-UE jirrispettaw b’mod rigoruż id-drittijiet fundamentali tal-persuni u jassiguraw li d-drittijiet imnaqqxa fil-Karta jiġu protetti tajjeb. |
7.3 |
L-Aġenzija tad-Drittijiet Fundamentali fi Vjenna għandha taqdi rwol attiv u konkret meta tiġi evalwata l-kompatibilità bejn il-politiki u l-azzjonijiet iffinanzjati mill-UE u d-drittijiet fundamentali. L-organizzazzjonijiet nongovernattivi jistgħu jaqdu rwol essenzjali fl-evalwazzjoni tal-impatt tal-azzjonijiet nazzjonali, reġjonali u lokali fuq l-applikazzjoni tal-Karta tad-Drittijiet Fundamentali. |
7.4 |
Il-Forum Ewropew għall-Integrazzjoni jista’ wkoll jevalwa l-kompatibilità bejn il-politiki tal-integrazzjoni u l-protezzjoni tad-drittijiet fundamentali u n-nondiskriminazzjoni. |
8. Emerġenzi u assistenza teknika
8.1 |
Ir-Regolament il-ġdid jagħti attenzjoni speċjali lis-sitwazzjonijiet ta’ emerġenza u kriżi. Il-KESE jaqbel mal-proposta tal-Kummissjoni li jiġi assigurat li l-UE tkun kapaċi taġixxi b’mod flessibbli, b’biżżejjed riżorsi finanzjarji għall-emerġenzi. |
8.2 |
Il-KESE jilqa’ l-inizjattiva tal-Kummissjoni li jkun hemm riżorsi disponibbli li jistgħu jiġu mmobilizzati malajr fil-każ ta’ “kriżijiet relatati mal-migrazzjoni” jew sabiex jiġu indirizzati “ħtiġijiet urġenti u speċifiċi fil-każ ta’ sitwazzjoni ta’ emerġenza”, u li fil-limiti tar-riżorsi disponibbli, l-għajnuna tista’ tammonta għal 100 % tan-nefqa eliġibbli. |
8.3 |
Madankollu l-Kumitat jipproponi li dawn il-fondi jkunu prinċipalment diretti sabiex jiġu indirizzati s-sitwazzjonijiet ta’ kriżi umanitarja, peress li s-solidarjetà għandha tapplika l-ewwel nett għall-protezzjoni u s-sigurtà tal-persuni milqutin. |
8.4 |
Barra minn hekk għandu jiġi assigurat li l-garanziji, l-istandards u d-drittijiet komuni stabbiliti fil-liġi Ewropea jiġu rispettati mill-Istati Membri u l-awtoritajiet tal-UE, anke fis-sitwazzjonijiet ta’ emerġenza. |
8.5 |
Il-KESE jappoġġja wkoll il-ħolqien ta’ mekkaniżmu ta’ emerġenza li jippermetti lill-UE tiffinanzja intervenzjoni inizjali rapida, f’kooperazzjoni mal-Istati Membri, f’każ ta’ diżastri, attakki terroristiċi jew “ċiberattakki” fuq skala kbira. |
9. Dimensjoni esterna
9.1 |
Il-KESE jqis li, peress li d-dimensjoni esterna ta’ dawn il-politiki issa hija prijorità, il-finanzjament tal-azzjonijiet għandu jkun koerenti mal-prijoritajiet interni u esterni tal-UE f’dawn l-oqsma. |
9.2 |
Għandha titjieb il-kooperazzjoni bejn id-DĠ Affarijiet Interni u s-Servizz Ewropew għall-Azzjoni Esterna meta jiġu stabbiliti u miftiehma l-prijoritajiet politiċi. Dan għandu jgħin jassigura li l-politiki u l-proġetti ffinanzjati skont il-qafas baġitarju ġdid ikunu komplementari u mhux kontradittorji għall-politiki tal-iżvilupp u r-relazzjonijiet esterni tal-UE. Għandha titjieb il-kooperazzjoni permezz tal-ftehimiet bejn l-UE u l-pajjiżi terzi, iżda l-għajnuna għall-iżvilupp m’għandhiex tkun ikkundizzjonata bil-ftehimiet dwar ir-riammissjoni u l-kontroll tal-fruntieri. |
9.3 |
L-għan tad-dimensjoni esterna ta’ dawn il-politiki għandu jkun li jitjiebu kemm is-sigurtà interna kif ukoll l-iżvilupp tal-pajjiżi terzi. Il-politika esterna u l-għajnuna għall-iżvilupp huma l-qafas l-aktar koerenti għad-dimensjoni esterna tal-politiki tal-ażil, il-migrazzjoni u s-sigurtà interna (6). |
9.4 |
Il-KESE jipproponi li l-Fondi għall-Migrazzjoni u l-Ażil u l-Fond għas-Sigurtà Interna jintużaw ukoll sabiex itejbu l-iżvilupp relatat mad-drittijiet tal-bniedem u l-kwalità tal-istat tad-dritt, partikolarment sabiex il-pajjiżi terzi jsaħħu s-sistemi tagħhom ta’ ażil u jkun hemm konformità mal-istandards internazzjonali. |
9.5 |
Għandu jitqies ukoll li l-pajjiżi ġirien tal-UE m’għandhomx iħallsu l-ispejjeż kollha tal-proċeduri tal-ażil tal-persuni li jgħaddu mit-territorju tagħhom. L-UE għandha tikkoopera permezz tal-fondi. |
10. Integrazzjoni
10.1 |
Il-KESE jappoġġja l-proposta tal-Kummissjoni li l-politiki tal-integrazzjoni jiġu implimentati fil-livell lokal u reġjonali permezz ta’, pereżempju, korsijiet ta’ orjentazzjoni ċivika, il-parteċipazzjoni fil-ħajja soċjali u ċivili, il-promozzjoni tad-djalogu interkulturali u t-trattament ugwali fl-aċċess għall-prodotti u s-servizzi. Huwa essenzjali li l-azzjonijiet jiġu ġestiti mill-organizzazzjonijiet nongovernattivi u l-awtoritajiet lokali u reġjonali. |
10.2 |
Il-Kumitat fassal Opinjoni fuq inizjattiva proprja (7) bl-istess proposta u organizza Konferenza f’Valencia bl-involviment ta’ diversi awtoritajiet reġjonali u lokali u numru ta’ organizzazzjonijiet tas-soċjetà ċivili. Dan l-approċċ kien appoġġjat ukoll mill-Forum Ewropew għall-Integrazzjoni. |
10.3 |
Għandha tingħata attenzjoni speċjali sabiex jiġu appoġġjati azzjonijiet u proġetti li jikkunsidraw lill-integrazzjoni bħala proċess soċjali bidirezzjonali u dinamiku ta’ adattament reċiproku. |
10.4 |
Il-KESE jappoġġja l-proposta tal-Kummissjoni li l-Fondi Ewropej ikunu ddedikati għall-għanijiet konkreti u ma jintużawx sabiex jiġu ffinanzjati l-programmi nazzjonali li mhumiex marbutin ma’ dawk Ewropej (8). |
10.5 |
Il-Kumitat jipproponi li r-riżorsi tal-Fond għall-Migrazzjoni u l-Ażil m’għandhomx jintużaw sabiex jiġu ffinanzjati programmi nazzjonali li jiksru d-drittijiet tal-bniedem jew jikkontradixxu l-prinċipji bażiċi komuni tal-integrazzjoni. Il-KESE huwa kontra li l-Istati Membri jużaw it-test ta’ integrazzjoni sabiex jiġġeddu l-permessi ta’ residenza, jingħaqdu l-familji jew ikun hemm aċċess għall-prodotti u s-servizzi pubbliċi. |
10.6 |
F’opinjonijiet oħra (9) l-Kumitat indika li hemm bżonn li titjieb il-komplementarjetà bejn il-Fond għall-Integrazzjoni u l-Fond Soċjali Ewropew b’rabta mal-finanzjament ta’ xi programmi. |
11. Ażil
11.1 |
Il-KESE jaqbel mal-prijoritajiet tas-Sistema Ewropea Komuni tal-Ażil u, b’mod partikolari, il-miżuri ta’ appoġġ sabiex jitjiebu l-kundizzjonijiet ta’ akkoljenza u integrazzjoni, il-proċeduri tal-ażil u sabiex tissaħħaħ il-kapaċità tal-Istati Membri. |
11.2 |
Il-Kumitat jipproponi li parti mill-fondi jiġu destinati għal proġetti u attivitajiet immirati sabiex jassiguraw li l-Istati Membri jilħqu l-obbligi tagħhom fir-rigward tal-protezzjoni internazzjonali u jimplimentaw il-leġislazzjoni Ewropea. |
11.3 |
Il-KESE jqis bħala prijorità l-finanzjament tal-evalwazzjoni tal-politiki tal-ażil tal-Istati Membri, li huma partikolarment immirati li jtejbu l-proċeduri u l-kwalità tal-protezzjoni tar-rifuġjati u ta’ dawk li qed ifittxu l-ażil. |
11.4 |
Il-KESE jappoġġja l-iżvilupp ta’ programm ta’ risistemazzjoni għat-trasferiment tar-refuġjati minn barra l-UE u s-sistemazzjoni tagħhom fl-Unjoni. |
11.5 |
Il-Kumitat jappoġġja wkoll il-programm ta’ rilokazzjoni fi ħdan l-UE, bil-provvista ta’ inċentivi finanzjarji għal dawk l-Istati Membri li jidħlu fih. |
11.6 |
L-Uffiċċju Ewropew ta’ Appoġġ fil-Qasam tal-Ażil f’Malta għandu jkollu mandat ċar sabiex jivvaluta s-sistemi tal-ażil nazzjonali u l-konformità tagħhom mad-drittijiet Ewropej u internazzjonali u mad-drittijiet fundamentali. Din l-evalwazzjoni għandha titwettaq bil-kooperazzjoni tas-soċjetà ċivili u l-Kummissarju Għoli tan-Nazzjonijiet Uniti għar-Rifuġjati. |
12. Ammissjoni
12.1 |
Il-KESE jaqbel mal-approċċ meħud mill-Fond għall-Migrazzjoni u l-Ażil dwar il-possibbiltà li jiġu ffinanzjati miżuri “tal-bini tal-kapaċità”, bħat-tħejjija ta’ strateġiji li jippromovu l-migrazzjoni legali permezz ta’ proċeduri ta’ ammissjoni flessibbli u trasparenti u t-titjib tal-kapaċità tal-Istati Membri għall-iżvilupp u l-evalwazzjoni tal-politiki tagħhom tal-immigrazzjoni. |
13. Is-sħubijiet ta’ mobilità
13.1 |
Il-Kumitat fassal Opinjoni speċifika (10) fejn hemm indikat li l-ftehimiet dwar il-mobilità u l-migrazzjoni għandhom jinkludu erba’ pilastri: l-organizzar u l-iffaċilitar tal-migrazzjoni legali u l-mobilità; il-prevenzjoni u t-tnaqqis tal-migrazzjoni irregolari u t-traffikar tal-bnedmin; il-promozzjoni tal-protezzjoni internazzjonali u t-titjib tad-dimensjoni esterna tal-politika tal-ażil; u l-massimizzazzjoni tal-impatt tal-iżvilupp fuq il-migrazzjoni u l-mobilità. |
14. Ritorn
14.1 |
Il-KESE jqis li l-użu tar-ritorn volontarju għandu jkun prijoritizzat u akkumpanjat minn sistemi ta’ appoġġ u għalhekk jappoġġja l-proposta tal-Kummissjoni li l-azzjonijiet nazzjonali għandhom jinkludu programmi ta’ ritorn volontarju assistit. |
14.2 |
Ir-riżorsi tal-Fond għandhom jintużaw sabiex jiġu pprovduti sistemi ta’ appoġġ għar-ritorn volontarju li jippermettu li r-ritorn ikun wieħed pożittiv għall-persuni u għall-pajjiż ta’ oriġini. |
14.3 |
Meta b’mod eċċezzjonali jintużaw il-proċeduri ta’ ritorn furzat, għandhom jiġu rispettati bis-sħiħ id-drittijiet tal-bniedem filwaqt li jitqiesu r-rakkomandazzjonijiet tal-Kunsill tal-Ewropa (11). |
14.4 |
Madankollu, il-Kumitat huwa kontra li l-Fondi Ewropej jintużaw sabiex jiġu ffinanzjati r-ritorni furzati, li xi wħud minnhom jitqiesu mis-soċjetà ċivili bħala li jmorru kontra l-Karta tad-Drittijiet Fundamentali. |
15. Sigurtà interna u fruntieri
15.1 |
Huwa prijorità li jingħata appoġġ lill-kooperazzjoni tal-pulizija fil-prevenzjoni tad-delinkwenza transkonfinali u l-ġlieda kontra l-kriminalità organizzata. Il-KESE jappoġġja l-miżuri li għandhom l-għan li jtejbu l-kooperazzjoni bejn is-servizzi tas-sigurtà u l-ħidma tal-Europol. |
15.2 |
Il-KESE jaqbel mal-proposta tal-Kummissjoni li tittejjeb il-kooperazzjoni tal-pulizija, il-prevenzjoni u l-ġlieda kontra d-delinkwenza transkonfinali fl-UE, speċjalment il-miżuri li għandhom l-għan li jtejbu l-kooperazzjoni bejn is-servizzi tas-sigurtà fil-ġlieda kontra l-kriminalità organizzata. Huwa essenzjali li l-prijoritajiet kollha jkunu jiffokaw fuq it-tisħiħ tal-fiduċja reċiproka bejn il-forzi tas-sigurtà, inklużi l-aspetti relatati mal-istat tad-dritt. |
15.3 |
Il-fondi għandhom jintużaw sabiex jitjiebu u jiġu żviluppati l-kwalità u t-trasparenza tal-metodoloġiji komuni użati fil-livell Ewropew sabiex jiġu identifikati t-theddid u r-riskji għas-sigurtà tal-Ewropa, bħal pereżempju l-ħidma tal-Europol u r-rapporti tiegħu dwar il-kriminalità organizzata (OCTA). |
15.4 |
L-Unjoni Ewropea għandha ttejjeb il-ġlieda kontra n-netwerks kriminali involuti fit-traffikar illegali tal-bnedmin, waqt li jiġi kkunsidrat li l-fruntieri huma partikolarment vulnerabbli fil-Mediterran u fil-Lvant tal-Ewropa. |
15.5 |
Il-KESE huwa favur il-fatt li l-Fond għas-Sigurtà Interna jappoġġja l-Istati Membri fir-rigward tal-kontrolli tal-fruntieri, sabiex ikunu aktar effikaċi, waqt li jitqies il-fatt li l-kontroll tal-fruntieri huwa servizz pubbliku. Iżda jemmen li din il-kooperazzjoni, inklużi dawk l-azzjonijiet ikkoordinati mill-Frontex, għandha tkun trasparenti u konformi mal-Kodiċi tal-Fruntieri ta’ Schengen u mal-Karta tad-Drittijiet Fundamentali. |
15.6 |
Il-KESE jaqbel mal-bżonn li l-Istati Membri jingħataw l-għajnuna sabiex japplikaw aħjar l-acquis ta’ Schengen, inklużi s-sistema tal-viżi u l-implimentazzjoni ta’ sistema integrata ta’ ġestjoni tal-fruntieri. Huwa kruċjali li jiġi ggarantit li l-Istati Membri kollha japplikaw b’mod koerenti l-istandards komuni dwar il-kontroll tal-fruntieri u li jiġu rrispettati d-drittijiet fundamentali u l-moviment liberu tal-persuni. |
15.7 |
Il-KESE jqis li l-baġit allokat lill-aġenziji Ewropej tas-sigurtà interna, b’mod partikolari l-Europol, l-Eurojust, il-Frontex, eċċ., għandu jkun marbut ma’ skrutinju demokratiku akbar tal-attivitajiet tagħhom mill-Parlament Ewropew, b’mod partikolari dawk il-kompiti li jistgħu joħolqu problemi kbar għall-Karta tad-Drittijiet Fundamentali, bħal pereżempju s-setgħat operattivi tagħhom fil-livell nazzjonali, l-iskambju u l-użu tad-data personali, il-kwalità tal-informazzjoni skambjata mal-awtoritajiet nazzjonali u l-pajjiżi terzi u l-objettività tal-analiżi tagħhom ta’ riskju. |
15.8 |
Hemm bżonn li jitnieda dibattitu politiku mar-rappreżentanti tas-soċjetà ċivili dwar il-valur miżjud u l-impatt baġitarju kif ukoll dwar il-protezzjoni tad-drittijiet fundamentali tas-sistema EUROSUR (is-Sistema Ewropea ta’ Sorveljanza tal-Fruntieri). Huwa essenzjali li fil-każ ta’ inizjattiva politika daqshekk importanti, ikun hemm trasparenza u sigurtà legali totali kemm fl-għanijiet tagħha kif ukoll fl-ambitu ta’ applikazzjoni. |
15.9 |
Il-KESE jappella li l-Parlament Ewropew jagħti attenzjoni speċjali għall-proporzjonalità tal-EUROSUR u l-kontribut tiegħu għall-protezzjoni tad-drittijiet tal-bniedem fil-kontrolli tal-fruntieri u s-sorveljanza fil-Mediterran, waqt li jitqies il-fatt li l-ewwel obbligu tal-gwardji tal-fruntieri huwa s-salvataġġ tal-persuni li jkunu f’sitwazzjoni perikoluża. |
15.10 |
Il-Kumitat jirrakkomanda li l-proposti politiki kollha, speċjalment dawk li għandhom impatt kbir fuq il-baġit, ikunu soġġetti għal dibattitu demokratiku u trasparenti, waqt li jitqiesu l-prinċipju tal-proporzjonalità u d-drittijiet fundamentali. |
16. Sistemi tal-IT fuq skala kbira (VIS, SIS, Eurodac)
16.1 |
Il-KESE jemmen li l-Parlament Ewropew għandu jwettaq valutazzjoni dwar in-neċessità, il-proporzjonalità u l-effikaċja tas-sistemi tal-IT fuq skala kbira li jinsabu fis-seħħ (is-Sistema ta’ Informazzjoni ta’ Schengen (SIS), is-Sistema ta’ Informazzjoni dwar il-Viża (VIS u l-Eurodac), kif ukoll tas-sistemi li qegħdin jiġu implimentati (SIS II). |
16.2 |
Din il-valutazzjoni għandha ssir qabel kwalunkwe deċiżjoni dwar l-iffinanzjar ta’ sistemi ġodda bħal dawk proposti mill-Kummissjoni Ewropea fil-Komunikazzjoni dwar il-“fruntieri intelliġenti”, b’mod partikolari s-sistema ta’ dħul/ħruġ u l-Programm għall-Vjaġġaturi Reġistrati li l-Kummissjoni għandha l-ħsieb li tippreżenta fl-2012. |
16.3 |
Il-Kumitat jenfasizza r-responsabbiltà tal-aġenzija l-ġdida għall-ġestjoni operattiva ta’ sistemi tal-IT, ibbażata f’Tallinn, li hija importanti ħafna għaż-Żona ta’ Libertà, Sigurtà u Ġustizzja, peress li ser tikkoordina s-sistemi li jeżistu llum u dawk li ser jinħolqu fil-futur. L-Aġenzija għandha tkun soġġetta għal aktar skrutinju demokratiku min-naħa tal-Parlament Ewropew, b’mod partikolari fir-rigward tal-kompatibilità tal-azzjonijiet tagħha mal-protezzjoni tad-data, il-privatezza u l-prinċipju tal-limitazzjoni tal-iskop fl-użu tal-informazzjoni u rigward il-possibbiltà li l-kompetenzi attwali jiġu estiżi għall-iżvilupp u l-koordinazzjoni ta’ sistemi futuri tal-IT. |
Brussell, 11 ta’ Lulju 2012.
Il-President tal-Kumitat Ekonomiku u Soċjali Ewropew
Staffan NILSSON
(1) COM(2011) 751 final.
(2) COM(2011) 750 final; COM(2011) 753 final.
(3) COM(2011) 752 final.
(4) Il-kummenti tal-proposti tal-Kummissjoni għal Finanzjament Ġdid tal-UE għall-azzjonijiet tal-ażil u l-migrazzjoni taħt il-qafas finanzjarju multiannwali, Caritas Europa, CCME, COMECE, Eurodiaconia, ICMC, JRS-Europe, QCEA, jinsabu f’http://www.caritas-europa.org/module/FileLib/MFF-Christiangroupstatement_April2012.pdf.
L-istqarrija u r-rakkomandazzjonijiet tas-soċjetà ċivili dwar il-finanzjament futur tal-UE fil-qasam tal-migrazzjoni u l-ażil għall-2014-2020, ECRE u 40 organizzazzjoni oħra tas-soċjetà ċivili, Marzu 2012, jinsabu f’http://www.ecre.org/index.php?option=com_downloads&id=444
(5) Ara l-Opinjoni tal-Kumitat, ĠU C 128, p. 29, 18.5.2010.
(6) L-osservazzjonijiet tal-UNHCR dwar l-arranġamenti futuri għall-finanzjament tal-UE fil-qasam tal-Affarijiet Interni wara l-2013, Ġunju 2011 http://www.unhcr.org/4df752779.pdf
(7) Ara l-Opinjoni tal-Kumitat, ĠU C 318, 29.10.2011, p. 69-75.
(8) Rapport dwar il-Konferenza tal-Partijiet Interessati “The Future of EU Funding for Home Affairs: A Fresh Look” (Il-futur tal-finanzjament tal-UE għall-Affarijiet Interni: Ħarsa ġdida), Kummissjoni Ewropea, DĠ Affarijiet Interni, Brussell, 8 ta’ April 2011, http://ec.europa.eu/dgs/home-affairs/event/docs/mff_conference_report_11-5-2011_final_participants.doc.pdf, li fost il-konklużjonijiet jiddikjara li l-finanzjament tal-UE m’għandhux jitqies bħala sostituzzjoni għall-finanzjament nazzjonali, fi kliem ieħor l-Istati Membri għandhom jibqgħu responsabbli sabiex jassiguraw li hemm biżżejjed fondi nazzjonali disponibbli għall-politiki tal-Affarijiet Interni. Sabiex jiżdied il-valur, l-infiq tal-UE għandu jirrifletti l-prijoritajiet u l-impenji politiċi fil-livell tal-UE u għandu jappoġġja l-implimentazzjoni tal-acquis tal-UE b’rabta mal-Affarijiet Interni.
(9) Ara l-Opinjoni tal-Kumitat, ĠU C 347, p. 19, 18.12.2010.
(10) Ara l-Opinjoni tal-Kumitat dwar “il-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Soċjali u Ekonomiku Ewropew u lill-Kumitat tar-Reġjuni – L-Approċċ Globali għall-Migrazzjoni u l-Mobilità”, relatur: is-Sur Pariza Castaños, korelatur: is-Sinjura King (ĠU C 191, 29.06.2012, p. 134).
(11) “Għoxrin linja gwida dwar ir-ritorn furzat”, COM (2005) 40 final.