9.3.2018

MT

Il-Ġurnal Uffiċjali tal-Unjoni Ewropea

L 67/3

---

REGOLAMENT DELEGAT TAL-KUMMISSJONI (UE) 2018/344

tal-14 ta' Novembru 2017

li jissupplimenta d-Direttiva 2014/59/UE tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw il-kriterji li għandhom x'jaqsmu ma' metodoloġiji għall-valwazzjoni tad-differenza fit-trattament fir-riżoluzzjoni

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva 2014/59/UE tal-Parlament Ewropew u tal-Kunsill tal-15 ta' Mejju 2014 li tistabbilixxi qafas għall-irkupru u r-riżoluzzjoni ta' istituzzjonijiet ta' kreditu u ditti ta' investiment (1), u b'mod partikolari l- Artikolu 74(4) tagħha,

Billi:

(1)

Huwa xieraq li wieħed ikollu regoli li jistabbilixxu metodoloġija biex jitwettqu valwazzjonijiet bil-għan li jiġi determinat jekk hemmx xi differenza bejn it-trattament effettiv tal-azzjonisti u l-kredituri fir-rigward ta' liema azzjoni jew azzjonijiet ta' riżoluzzjoni jkunu saru, u l-ammont li dawk l-azzjonisti u l-kredituri kienu jirċievu kieku l-istituzzjoni jew l-entità msemmija fil-punti (b), (c) jew (d) tal-Artikolu 1(1) tad-Direttiva 2014/59/UE (“l-entità”) kienet soġġetta għal proċeduri normali ta' insolvenza, fid-data li fiha d-deċiżjoni li tiġi riżolta din l-entità kienet adottata skont l-Artikolu 82 tad-Direttiva 2014/59/UE.

(2)

Kull differenza fit-trattament li tirriżulta f'telf akbar fir-riżoluzzjoni tal-azzjonisti u l-kredituri partikolari jinħtieġ li tintitola lil dawn l-azzjonisti u l-kredituri għal kumpens minn arranġamenti ta' finanzjament ta' riżoluzzjoni, skont il-punt (e) tal-Artikolu 101(1) tad-Direttiva 2014/59/UE.

(3)

Il-valwazzjoni ex post għandha titwettaq mill-persuna indipendenti mitluba li tissodisfa l-kundizzjonijiet stabbiliti fl-Artikolu 38 tar-Regolament Delegat tal-Kummissjoni (UE) 2016/1075 (2) (“il-valwatur”), kemm jista' jkun malajr wara li jkunu saru l-azzjoni jew l-azzjonijiet ta' riżoluzzjoni, għalkemm it-tlestija tagħha tista' tieħu xi ftit taż-żmien. Din il-valwazzjoni jinħtieġ li tkun ibbażata fuq l-informazzjoni disponibbli rilevanti għad-data meta tiġi addottata d-deċiżjoni sabiex tiġi riżolta xi entità, biex jiġu riflessi b'mod adegwat ċirkustanzi speċifiċi, bħal kundizzjonijiet tas-suq li jinsabu f'diffikultà, li kienu jeżistu f'din id-data d-deċiżjoni tar-riżoluzzjoni. L-informazzjoni miksuba wara d-data tad-deċiżjoni tar-riżoluzzjoni jinħtieġ li tintuża biss meta din setgħet kienet raġonevolment magħrufa f'din id-data.

(4)

Biex jiġi żgurat li titwettaq valwazzjoni komprensiva u kredibbli, il-valwatur jinħtieġ li jkollu aċċess għal kull dokumentazzjoni legali xierqa, inkluża lista ta' kull pretensjoni u pretensjoni kontinġenti kontra l-entità, ikklassifikati skont il-prijorità tagħhom skont proċeduri normali ta' insolvenza. Il-valwatur jinħtieġ li jitħalla jidħol f'arranġamenti biex jikseb pariri speċjalizzati jew għarfien espert kif mitlub miċ-ċirkostanzi.

(5)

Għall-finijiet tad-determinazzjoni tat-trattament li l-azzjonisti u l-kredituri kienu jirċievu li kieku l-entità tpoġġiet taħt proċeduri normali ta' insolvenza, il-valwatur jinħtieġ li jiddetermina ż-żmien mistenni u l-ammont ta' flussi ta' flus netti li kull azzjonist u kreditur kien jirċievi minn proċedimenti ta' insolvenza mingħajr ma jassumi l-ebda għajnuna mill-Istat, skontati bir-rata jew rati ta' skont rilevanti. iex tiġi ddeterminata din l-istima, u fejn ikun disponibbli u rilevanti, il-valwatur jista' jirreferi wkoll għal informazzjoni dwar l-esperjenzi tal-passat reċenti ta' falliment ta' istituzzjonijiet ta' kreditu simili.

(6)

It-trattament reali li l-azzjonisti u l-kredituri jirċievu fir-riżoluzzjoni jinħtieġ li jiġi stabbilit wara li jiġi kkunsidrat jekk dawn l-azzjonisti u l-kredituri jkunux irċevew rispettivament kumpens fil-forma ta' ekwità, dejn jew flus kontanti bħala riżultat tal-adozzjoni tal-azzjoni ta' riżoluzzjoni.

(7)	Dan ir-Regolament huwa msejjes fuq l-abbozz ta' standards tekniċi regolatorji ppreżentat mill-Awtorità Bankarja Ewropea (EBA) lill-Kummissjoni.

(8)

L-EBA għamlet konsultazzjonijiet pubbliċi miftuħa f'dak li għandu x'jaqsam mal-abbozz tal-istandards tekniċi regolatorji li fuqhom huwa bbażat dan ir-Regolament, analizzat l-ispejjeż u l-benefiċċji potenzjali relatati u talbet l-opinjoni tal-Grupp tal-Partijiet Bankarji Interessati stabbilit skont l-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (3),

ADOTTAT DAN IR-REGOLAMENT:

Artikolu 1

Dispożizzjonijiet Ġenerali

1.   Għall-finijiet tad-determinazzjoni tat-trattament tal-azzjonisti u l-kredituri skont proċeduri normali ta' insolvenza, il-valwazzjoni għandha tkun ibbażata biss fuq informazzjoni dwar il-fatti u ċ-ċirkustanzi li kienu jeżistu u li setgħu raġonevolment kienu magħrufa fid-data tad-deċiżjoni tar-riżoluzzjoni li, kieku l-valwatur kien jafhom, kien jiġi affettwat il-kejl tal-assi u l-obbligazzjonijiet tal-entità f'din id-data.

Għall-finijiet ta' dan ir-Regolament, “id-data tad-deċiżjoni tar-riżoluzzjoni” tfisser id-data li fiha d-deċiżjoni biex tiġi riżolta entità, hija adottata skont l-Artikolu 82 tad-Direttiva 2014/59/UE.

2.   Għall-finijiet tad-determinazzjoni tat-trattament reali tal-azzjonisti u l-kredituri f'riżoluzzjoni, il-valwatur għandu jiddependi fuq l-informazzjoni disponibbli dwar il-fatti u ċ-ċirkustanzi eżistenti tad-data jew id-dati tat-trattament reali li fihom l-azzjonisti u l-kredituri jkunu rċevew kumpens (“id-data jew id-dati tat-trattament reali”).

3.   Id-data ta' referenza tal-valwazzjoni għandha tkun id-data tad-deċiżjoni tar-riżoluzzjoni, li tista' tkun differenti mid-data reali tat-trattament reali. Sa fejn il-valwatur jikkunsidra bħala negliġibbli l-impatt ta' xi skontar ta' rikavat, ir-rikavat mhux skontat ir-rikavat fid-data li fiha ġiet implimentata l-azzjoni tar-riżoluzzjoni jista' jiġi mqabbel direttament mal-ammont skontat tar-rikavat ipotetiku li l-azzjonisti u l-kredituri jkunu rċevew kieku l-entità daħlet fi proċedimenti normali ta' insolvenza fid-data tad-deċiżjoni tar-riżoluzzjoni.

Artikolu 2

Inventarju tal-assi u l-pretensjonijiet

1.   Il-valwatur għandu jistabbilixxi inventarju tal-assi kontinġenti identifikabbli kollha li huma proprjetà tal-entità. Inventarju bħal dan għandu jinkludi l-assi li għalihom tintwera jew tista' tkun raġonevolment mistennija l-eżistenza tal-flussi ta' flus assoċjati.

2.   Lista tal-pretenstjonijiet u l-pretensjonijiet kontinġenti kollha kontra entità, għandha tkun disponibbli għall-valwatur. Dik il-lista għandha tikklassifika pretenstjonijiet u l-pretensjonijiet kontinġenti kollha skont il-livelli ta' prijorità tagħhom fi proċedimenti normali ta' insolvenza. Il-valwatur għandu jitħalla jidħol f'arranġamenti għal pariri speċjalizzati jew għarfien espert f'dak li għandu x'jaqsam mal-konsistenza tal-gradazzjoni tat-l-pretensjonijiet skont il-liġi applikabbli tal-insolvenza.

3.   L-assi gravati u l-pretensjonijiet garantiti minn dawk l-assi għandhom ikunu identifikati b'mod separat minn valwatur.

Artikolu 3

Il-passi tal-valwazzjoni

Għall-finijiet biex jiġi ddeterminat jekk teżistix differenza fit-trattament kif imsemmi fl-Artikolu 74(2) tad-Direttiva 2014/59/UE il-valwatur għandu jivvaluta:

(a)

it-trattament li l-azzjonisti u l-kredituri li fir-rigward tagħhom ikunu saru l-azzjonijiet tar-riżoluzzjoni, jew l-iskema ta' garanzija tad-depożiti rilevanti, kienet tirċievi kieku l-entità, daħlet fi proċedimenti normali ta' insolvenza fid-data tad-deċiżjoni dwar ir-riżoluzzjoni, u tiġi injorata kull dispożizzjoni ta' għajnuna finanzjarja pubblika straordinarja;

(b)

il-valur tal-pretensjonijiet ristrutturati wara l-applikazzjoni tal-għodda ta' rikapitalizzazzjoni interna jew setgħat u għodod oħra ta' riżoluzzjoni, jew ta' rikavat ieħor irċevut mill-azzjonisti u l-kredituri f'data jew dati tat-trattament reali, skontati lura għad-data tad-deċiżjoni tar-riżoluzzjoni jekk ikun ikkunsidrat bħala meħtieġ biex jippermetti paragun ġust mat-trattament imsemmi fil-punt (a);

(c)	jekk l-eżitu t-trattament fil-punt (a) jiżboq l-eżitu tal-valur imsemmi fil-punt (b) għal kull kreditur skont il-livelli prijoritarji fi proċedimenti normali ta' insolvenza kif identifikati skont l-Artikolu 2.

Artikolu 4

Id-determinazzjoni tat-trattament tal-azzjonisti u l-kredituri skont proċeduri normali ta' insolvenza

1.   Il-metodoloġija biex titwettaq valwazzjoni skont il-punt (a) tal-Artikolu 3 għandha tkun limitata li tiddetermina l-ammont skontat ta' flussi ta' kontanti mistennija skont proċeduri normali ta' insolvenza.

2.   Il-flussi ta' flus mistennija għandhom ikunu skontati bir-rata jew bir-rati li jkunu jirriflettu, kif xieraq, iż-żmien assoċjat mal-flussi ta' flus mistennija, iċ-ċirkustanzi prevalenti bħad-data ta' deċiżjoni ta' riżoluzzjoni, ir-rati tal-imgħax mingħajr riskju, il-primjums tar-riskju għal strumenti finanzjarji simili maħruġa minn entitajiet simili, il-kundizzjonijiet tas-suq jew ir-rati tal-iskont applikati minn akkwirenti potenzjali u l-karatteristiċi l-oħra tal-element jew l-elementi li jkunu qegħdin jiġu vvalutati (“rata ta' skont rilevanti”). Ir-rata rilevanti tal-iskont ma għandhiex tapplika fejn ir-rati partikolari, jekk dan ikun rilevanti għall-finijiet tal-imsemmija valwazzjoni, ikunu speċifikati fil-liġi jew il-prattika tal-insolvenza applikabbli.

3.   Il-valwatur għandu jqis dawn li ġejjin meta jiġi biex jiddetermina l-ammont skontat tal-flussi ta' flus mistennija skont proċeduri normali tal-insolvenza:

(a)	il-liġi u l-prattika applikabbli tal-insolvenza fil-ġurisdizzjoni rilevanti, li jistgħu jinfluwenzaw fatturi bħall-perjodu mistenni tad-disponiment jew ir-rati ta' rkupru;

(b)	L-ispejjeż tal-amministrazzjoni raġonevolment prevedibbli, it-tranżazzjoni, il-manutenzjoni, id-disponiment u l-ispejjeż l-oħrajn li kien ikollhom jinġarru minn amministratur jew prattikant tal-insolvenza, kif ukoll l-ispejjeż ta' finanzjament.

(c)	l-informazzjoni dwar il-każijiet ta' insolvenza tal-passat reċenti ta' entitajiet simili, fejn ikun disponibbli u rilevanti.

4.   Għall-assi nnegozjati fis-suq attiv, il-valwatur għandu juża l-prezz osservat, bl-eċċezzjoni fejn ċirkustanzi speċifiċi jxekklu l-kummerċjabbiltà tal-assi tal-entità, bħall-konċentrazzjoni, is-saturazzjoni u l-profondità tas-suq.

5.   Għal assi li mhumiex innegozjati f'suq attiv, il-valwatur għandu jikkonsidra numru ta' fatturi meta jiddetermina l-ammont u l-għażla taż-żmien tal-flussi ta' flus mistennija, inklużi:

(a)	il-prezzijiet osservati fi swieq attivi fejn assi simili huma nnegozjati;

(b)	il-prezzijiet osservati fi proċedimenti normali ta' insolvenza jew tranżazzjonijiet li b'xi mod ieħor tpoġġew f'diffikultà li kienu jinvolvu assi ta' natura u kundizzjoni simili;

(c)	il-prezzijiet osservati fi tranżazzjonijiet li kienu jinvolvu l-bejgħ ta' negozju jew it-trasferiment lil istituzzjoni tranżitorja jew veikolu tal-immaniġġar tal-assi f'kuntest ta' riżoluzzjoni rigward entitajiet simili;

(d)	il-probabbiltà ta' assi li jiġġeneraw flussi ta' flus netti skont proċeduri normali ta' insolvenza;

(e)	il-kundizzjonijiet mistennija tas-suq fil-perjodu ta' disponiment, inklużi l-profondità tas-suq u l-kapaċità tas-suq biex jiġi skambjat il-volum tal-assi rilevanti f'dak il-perjodu; kif ukoll

(f)	it-tul tal-perjodu tad-disponiment għandu jirrefletti l-implikazzjonijiet tal-liġi applikabbli dwar l-insolvenza, inkluż it-tul mistenni tal-proċess ta' likwidazzjoni, jew il-karatteristiċi tal-assi rilevanti.

6.   Il-valwatur għandu jikkunsidra jekk il-kundizzjoni finanzjarja tal-entità setgħetx affettwat il-flussi tal-flus mistennija, inklużi permezz ta' restrizzjonijiet fuq il-kapaċità tal-amministratur li jinnegozja t-termini max-xerrejja potenzjali.

7.   Fejn possibbli, u soġġett għal kull dispożizzjoni applikabbli tar-reġim tal-insolvenza rilevanti, il-flussi ta' flus għandhom jirriflettu d-drittijiet kontrattwali, statutorji jew drittijiet legali oħrajn tal-kredituri jew ta' prassi normali ta' insolvenza.

8.   Ir-rikavat ipotetiku li jirriżulta mill-valwazzjoni għandu jiġi allokat lill-azzjonisti u l-kredituri skont il-livell ta' prijorità tagħhom skont il-liġi applikabbli ta' insolvenza, kif previst fl-Artikolu 3.

9.   Għall-fini li jiġi ddeterminat kwalunkwe ammont ta' pretensjonijiet ta' derivati mhux assigurati fil-proċedura tal-falliment, il-valwatur japplika l-metodoloġiji stabbiliti fir-Regolament ta' Delega tal-Kummissjoni (UE) 2016/1401 (4), sa fejn hu konsistenti mal-liġi u l-prattika tal-insolvenza.

Artikolu 5

Id-determinazzjoni tat-trattament reali tal-azzjonisti u l-kredituri f'riżoluzzjoni

1.   Il-valwatur għandu jidentifika l-pretensjonijiet kollha pendenti wara l-valwazzjoni negattiva jew il-konverżjoni tal-istrumenti kapitali u l-applikazzjoni ta' kwalunkwe azzjonijiet ta' riżoluzzjoni, u għandu jassenja dawk il-pretensjonijiet lill-persuni ġuridiċi u fiżiċi li kienu l-azzjonisti u l-kredituri tal-entità fid-data tad-deċiżjoni tar-riżoluzzjoni. Ħlief fejn dawk il-persuni ġuridiċi u fiżiċi li kienu l-azzjonisti u l-kredituri tal-entità fid-data tad-deċiżjoni tar-riżoluzzjoni jirċievu kumpens fi flus kontanti bħala riżultat tar-riżoluzzjoni, il-valwatur għandu jiddetermina t-trattament attwali tagħhom, f'konformità mal-paragrafi minn 2 sa 4.

2.   Jekk dawk il-persuni ġuridiċi u fiżiċi li kienu l-azzjonisti u l-kredituri tal-entità li fid-data d-deċiżjoni tar-riżoluzzjoni jirċievu kumpens f'ekwità bħala riżultat tar-riżoluzzjoni, il-valwatur għandu jiddetermina t-trattament attwali tagħhom billi jipprovdi stima tal-valur totali tal-ishma ttrasferiti jew maħruġa bħala korrispettiv għad-detenturi ta' strumenti kapitali konvertiti jew għall-kredituri rikapitalizzati internament. Dim l-istima tista' tkun ibbażata fuq il-prezz tas-suq ivvalutat li jirriżulta minn metodoloġiji ta' valutazzjoni aċċettati b'mod ġenerali.

3.   Jekk dawk il-persuni ġuridiċi u fiżiċi li kienu l-azzjonisti u l-kredituri tal-entità li fid-data tar-riżoluzzjoni tad-deċiżjoni jirċievu kumpens ta' dejn bħala riżultat tar-riżoluzzjoni, il-valwatur għandu jiddetermina t-trattament reali billi jikkunsidra fatturi bħal bidliet fil-flussi ta' flus kuntrattwali li jirriżultaw minn l-valwazzjoni negattiva jew konverżjoni, jew l-applikazzjoni ta' azzjonijiet oħra ta' riżoluzzjoni, kif ukoll ir-rata rilevanti ta' skont.

4.   Għal kull pretensjoni pendenti, il-valwatur jista' jieħu kont, fejn disponibbli u flimkien mal-fatturi deskritti fil-paragrafi 2 u 3, il-prezzijiet osservati fi swieq attivi għal strumenti identiċi jew simili maħruġa mill-entità taħt riżoluzzjoni jew entitajiet simili oħrajn.

Artikolu 6

Ir-rapport tal-valwazzjoni

Il-valwaturi għandu jħejji rapport ta' valwazzjoni lill-awtorità ta' riżoluzzjoni, li għandu jinkludi mill-inqas l-elementi li ġejjin:

(a)	sommarju tal-valutazzjoni inkluża preżentazzjoni ta'firxiet ta' valutazzjoni u s-sorsi ta' inċertezza tal-valutazzjoni;

(b)	Spjegazzjoni tal-metodoloġiji u s-suppożizzjonijiet ewlenin li ġew adottati, u kemm tkun sensittiva l-valwazzjonijiet għal dawn l-għażliet;

(c)	Spjegazzjoni, fejn hu fattibbli, għaliex il-valwazzjoni hi differenti minn valwazzjonijiet oħra relevanti, inklużi l-valwazzjonijiet tar-riżoluzzjoni immexxija skont ir-Regolament Delegat tal-Kummissjoni (UE) 2018/345 jew valwazzjonijiet oħra regolatorji jew ta' kontabilità.

Artikolu 7

Dħul fis-seħħ

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

---

(1)  ĠU L 173, 12.6.2014, p. 190.

(2)  Ir-Regolament Delegat tal-Kummissjoni (UE) 2016/1075 tat-23 ta' Marzu 2016 li jissupplimenta d-Direttiva 2014/59/UE tal-Parlament Ewropew u tal-Kunsill fir-rigward ta' standards tekniċi regolatorji li jispeċifikaw il-kontenut tal-pjanijiet ta' rkupru, il-pjanijiet ta' riżoluzzjoni u l-pjanijiet ta' riżoluzzjoni tal-grupp, il-kriterji minimi li l-awtorità kompetenti trid tivvaluta fir-rigward tal-pjanijiet ta' rkupru u pjanijiet ta' rkupru tal-grupp, il-kundizzjonijiet għall-appoġġ finanzjarju tal-grupp, ir-rekwiżiti għall-valwaturi indipendenti, ir-rikonoxximent kuntrattwali tas-setgħat ta' valwazzjoni negattiva u konverżjoni, il-proċeduri u l-kontenut tar-rekwiżiti ta' notifika u tal-avviż ta' sospensjoni u l-funzjonament operazzjonali tal-kulleġġi ta' riżoluzzjoni (ĠU L 184, 8.7.2016, p. 1).

(3)  Ir-Regolament (UE) Nru 1093/2010 tal-Parlament Ewropew u tal-Kunsill tal-24 ta' Novembru 2010 li jistabbilixxi Awtorità Superviżorja Ewropea (Awtorità Bankarja Ewropea) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE (ĠU L 331, 15.12.2010, p. 12).

(4)  Ir-Regolament Delegat tal-Kummissjoni (UE) 2016/1401 tat-23 ta' Mejju 2016 li jissupplimenta d-Direttiva 2014/59/UE tal-Parlament Ewropew u tal-Kunsill li tistabbilixxi qafas għall-irkupru u r-riżoluzzjoni ta' istituzzjonijiet ta' kreditu u ditti ta' investiment fir-rigward ta' standards tekniċi regolatorji għal metodoloġiji u prinċipji dwar il-valwazzjoni tal-obbligazzjonijiet li jirriżultaw minn derivattivi (ĠU L 228, 23.8.2016, p. 7).

---