Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32017D0198

Deċiżjoni ta' Implimentazzjoni tal-Kummissjoni (UE) 2017/198 tat-2 ta' Frar 2017 fir-rigward ta' miżuri li jipprevjenu l-introduzzjoni u l-firxa ġewwa l-Unjoni ta' Pseudomonas syringae pv. actinidiae Takikawa, Serizawa, Ichikawa, Tsuyumu u Goto (notifikata bid-dokument C(2017) 460)

C/2017/0460

ĠU L 31, 4.2.2017, p. 29–34 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document No longer in force, Date of end of validity: 31/03/2020

ELI: http://data.europa.eu/eli/dec_impl/2017/198/oj

4.2.2017   

MT

Il-Ġurnal Uffiċjali tal-Unjoni Ewropea

L 31/29

DEĊIŻJONI TA' IMPLIMENTAZZJONI TAL-KUMMISSJONI (UE) 2017/198

tat-2 ta' Frar 2017

fir-rigward ta' miżuri li jipprevjenu l-introduzzjoni u l-firxa ġewwa l-Unjoni ta' Pseudomonas syringae pv. actinidiae Takikawa, Serizawa, Ichikawa, Tsuyumu u Goto

(notifikata bid-dokument C(2017) 460)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill 2000/29/KE tat-8 ta' Mejju 2000 dwar il-miżuri protettivi kontra l-introduzzjoni ġewwa l-Komunità ta' organiżmi ta' ħsara għall-pjanti jew prodotti tal-pjanti u kontra t-tixrid tagħhom ġewwa l-Komunità (1), u b'mod partikolari t-tielet sentenza tal-Artikolu 16(3) tagħha,

Billi:

(1)

Id-Deċiżjoni ta' Implimentazzjoni tal-Kummissjoni 2012/756/UE (2) pprevediet miżuri li jipprevjenu l-introduzzjoni u l-firxa ġewwa l-Unjoni ta' Pseudomonas syringae pv. actinidiae Takikawa, Serizawa, Ichikawa, Tsuyumu u Goto, minn hawn 'il quddiem “l-organiżmu speċifikat”, l-aġent każwali tal-kankru tal-kiwi. Din id-Deċiżjoni ta' Implimentazzjoni skadiet fil-31 ta' Marzu 2016.

(2)

Għadd ta' Stati Membri talbu li l-miżuri tad-Deċiżjoni ta' Implimentazzjoni 2012/756/UE jibqgħu japplikaw, minħabba r-riskju fitosanitarju maħluq mill-organiżmu speċifikat. Għal din ir-raġuni, l-istess miżuri, bħall-miżuri stabbiliti f'dik id-Deċiżjoni ta' Implimentazzjoni, għandhom jiġu adottati fir-rigward tal-introduzzjoni fl-Unjoni ta' xtieli għat-tħawwil tal-Actinidia Lindl. (minn hawn 'il quddiem “ix-xtieli speċifikati”) minn pajjiżi terzi, kif ukoll il-moviment tagħhom fl-Unjoni.

(3)

Barra minn hekk, l-esperjenza miksuba tul l-applikazzjoni tad-Deċiżjoni ta' Implimentazzjoni 2012/756/UE turi li, bħala alternattivi ekwivalenti għall-ispezzjonijiet viżwali, il-qerda tax-xtieli kollha speċifikati jew l-ittestjar individwali tagħhom jikkostitwixxu wkoll miżuri xierqa biex ikun evitat it-tixrid tal-organiżmu speċifikat f'ċerti żoni, u li dawk il-miżuri joffru reazzjoni ugwalment effiċjenti fil-każ ta' tifqigħa tal-organiżmu speċifikat, għaldaqstant dawk il-miżuri għandhom ikunu permessi wkoll għal xtieli speċifikati li joriġinaw fl-Unjoni jew f'pajjiżi terzi. Barra minn hekk, dik l-esperjenza turi wkoll li żona b'wisa' ta' 100 m, minflok 500 m, madwar post ħieles mill-pesti jew sit tal-produzzjoni ħieles mill-pesti, bi grad ta' iżolament u ħarsien mill-ambjent estern li effettivament jeskludi l-organiżmu speċifikat, huwa biżejjed biex jinkisbu l-għanijiet ta' din id-Deċiżjoni.

(4)

Jekk ikun jeħtieġ, l-Istati Membri għandhom jadottaw il-leġiżlazzjoni tagħhom sabiex tikkonforma ma' din id-Deċiżjoni.

(5)

Din id-Deċiżjoni għandha tapplika sal-31 ta' Marzu 2020 biex jitħalla żmien għas-sorveljanza tal-evalwazzjoni tas-sitwazzjoni.

(6)

Il-miżuri previsti f'din id-Deċiżjoni jikkonformaw mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DIN ID-DEĊIŻJONI:

Artikolu 1

Projbizzjoni tal-organiżmu dannuż Pseudomonas syringae pv. actinidiae Takikawa, Serizawa, Ichikawa, Tsuyumu u Goto

Pseudomonas syringae pv. actinidiae Takikawa, Serizawa, Ichikawa, Tsuyumu u Goto (minn hawn 'il quddiem “l-organiżmu speċifikat”), ma għandux jidħol jew jinfirex ġewwa l-Unjoni.

Artikolu 2

Id-dħul ta' Actinidia Lindl. fl-Unjoni

Għabra tad-dakra u xtieli ħajjin maħsubin għat-taħwil, għajr għaż-żrieragħ, tal-Actinidia Lindl. (minn hawn 'il quddiem “ix-xtieli speċifikati”), li joriġinaw f'pajjiżi terzi jistgħu jiddaħħlu fl-Unjoni biss jekk jikkonformaw mar-rekwiżiti speċifiċi għad-dħul, kif stabbilit fl-Anness I.

Artikolu 3

Moviment ta' xtieli speċifikati fl-Unjoni

Ix-xtieli speċifikati jistgħu jgħaddu minn post għal ieħor ġewwa l-Unjoni biss jekk jissodisfaw ir-rekwiżiti speċifiċi, kif stabbilit fl-Anness II.

Artikolu 4

Stħarriġiet u notifiki dwar l-organiżmu speċifikat

1.   L-Istati Membri għandhom iwettqu stħarriġiet uffiċjali kull sena għall-preżenza tal-organiżmu speċifiku fuq ix-xtieli speċifikati.

L-Istati Membri għandhom jinnotifikaw ir-riżultati ta' dawn l-istħarriġiet lill-Kummissjoni u lill-Istati Membri l-oħra sal-31 ta' Jannar tas-sena ta' wara s-sena tal-istħarriġ.

2.   Meta operatur professjonali jissuspetta jew isir konxju li l-organiżmu speċifikat jkun preżenti fix-xtieli, fil-prodotti tax-xtieli jew f'oġġetti oħra li jkunu taħt il-kontroll ta' dak l-operatur, u f'żona fejn il-preżenza ta' dak l-organiżmu ma kinitx magħrufa qabel, dan għandu jinnotifika mill-aktar fis lill-korp uffiċjali responsabbli minnu, biex dak il-korp ikun jista' jieħu l-azzjonijiet meħtieġa. Fejn jeħtieġ, l-operatur professjonali għandu wkoll immedjatament jieħu miżuri ta' prekawzjoni biex jipprevjeni l-istabbiliment u t-tixrid ta' dak l-organiżmu speċifiku.

Artikolu 5

Konformità

L-Istati Membri għandhom jgħarrfu minnufih lill-Kummissjoni bil-miżuri li jkunu ħadu biex jikkonformaw ma' din id-Deċiżjoni.

Artikolu 6

Applikazzjoni

Din id-Deċiżjoni għandha tapplika sal-31 ta' Marzu 2020.

Artikolu 7

Destinatarji

Din id-Deċiżjoni hija indirizzata lill-Istati Membri.

Magħmul fi Brussell, it-2 ta' Frar 2017.

Għall-Kummissjoni

Vytenis ANDRIUKAITIS

Membru tal-Kummissjoni

(1)  ĠU L 169, 10.7.2000, p. 1.

(2)  Id-Deċiżjoni ta' Implimentazzjoni tal-Kummissjoni 2012/756/UE tal-5 ta' Diċembru 2012 fir-rigward ta' miżuri li jipprevjenu l-introduzzjoni u l-firxa ġewwa l-Unjoni ta' Pseudomonas syringae pv. actinidiae Takikawa, Serizawa, Ichikawa, Tsuyumu u Goto (ĠU L 335, 7.12.2012, p. 49).

ANNESS I

Rekwiżiti speċifiċi għad-dl fl-Unjoni, kif imsemmi fl-Artikolu 2

TAQSIMA I

Iċ-ċertifikat fitosanitarju

(1)

Xtieli speċifikati li joriġinaw f'pajjiżi terzi għandhom ikun akkumpanjati minn ċertifikat fitosanitarju, kif imsemmi fl-ewwel sottoparagrafu tal-Artikolu 13(1)(ii) tad-Direttiva 2000/29/KE (minn hawn 'il quddiem “iċ-ċertifikat”), li jinkludi taħt l-intestatura “Dikjarazzjoni addizzjonali” it-tagħrif stabbilit fil-punti (2) u (3).

(2)

Iċ-ċertifikat għandu jinkludi tagħrif li ntlaħaq wieħed mill-punti li ġejjin:

(a)

Ix-xtieli speċifikati tkabbru tul ħajjithom f'pajjiż fejn l-organiżmu speċifiku mhux magħruf li jeżisti;

(b)

Ix-xtieli speċifikati tkabbru tul ħajjithom f'żona ħielsa mill-pesti, stabbilita fir-rigward tal-organiżmu speċifikat mill-Organizzazzjoni Nazzjonali għall-Protezzjoni tal-Pjanti (minn hawn 'il quddiem “l-NPPO”) tal-pajjiż ta' oriġini b'konformità mal-Istandard Internazzjonali tal-FAO għall-Miżuri Fitosanitarji (minn hawn 'il quddiem “ISPM”) Nru 4 (1);

(c)

Ix-xtieli speċifikati ġew prodotti f'post ħieles mill-pesti jew f'sit tal-produzzjoni ħieles mill-pesti, stabbilit fir-rigward tal-organiżmu speċifikat mill-NPPO b'konformità mal-ISPM Nru 10 tal-FAO (2). Ix-xtieli speċifikati tkabbru fi struttura bi grad ta' iżolament u ta' protezzjoni mill-ambjent ta' barra li jeskludi b'mod effettiv l-organiżmu speċifikat. F'dak il-post jew sit ix-xtieli speċifikati ġew uffiċjalment spezzjonati darbtejn fl-aktar żminijiet f'lokhom għall-identifikazzjoni ta' sintomi ta' infezzjoni matul l-aħħar ċiklu komplut ta' veġetazzjoni ta' qabel l-esportazzjoni u nstabu ħielsa mill-organiżmu speċifikat.

Dak il-post jew sit ta' produzzjoni jkun imdawwar minn żona b'raġġ ta' mill-inqas 100 m, fejn waħda mill-kundizzjonijiet segwenti tkun ġiet sodisfatta:

(i)

l-ispezzjonijiet uffiċjali jkunu twettqu darbtejn fl-aktar żminijiet f'lokhom għall-identifikazzjoni ta' sintomi ta' infezzjoni matul l-aħħar ċiklu komplut ta' veġetazzjoni qabel l-esportazzjoni u kull xitla li tkun instabet li turi sintomi ta' infezzjoni, waqt dawn l-ispezzjonijiet, tkun inqerdet minnufih;

(ii)

ix-xtieli speċifikati kollha nqerdu minnufih;

(iii)

kull xitla speċifikata tkun ġiet ittestjata b'mod regolari u nstabet ħielsa mill-organiżmu speċifikat;

(d)

Ix-xtieli speċifikati ġew prodotti f'post ta' produzzjoni ħieles mill-pesti stabbilit fir-rigward tal-organiżmu speċifikat mill-NPPO skont l-ISPM Nru 10 tal-FAO. F'dak il-post ix-xtieli speċifikati ġew spezzjonati, kampjonati u ttestjati uffiċjalment darbtejn fl-aktar żminijiet f'lokhom tul l-aħħar ċiklu komplut ta' veġetazzjoni ta' qabel l-esportazzjoni u nstabu ħielsa mill-organiżmu speċifikat.

Dak il-post tal-produzzjoni huwa mdawwar minn żona b'raġġ ta' 4 500 m, fejn tkun ġiet sodisfatta waħda mill-kundizzjonijiet segwenti:

(i)

l-ispezzjonijiet, il-kampjunar u l-ittestjar uffiċjali jkunu twettqu darbtejn f'dak il-post tal-produzzjoni u f'dik iż-żona kollha fl-aktar żminijiet f'lokhom għall-identifikazzjoni ta' sintomi ta' infezzjoni matul l-aħħar ċiklu komplut ta' veġetazzjoni qabel l-esportazzjoni. L-organiżmu speċifikat ma nstabx matul l-ispezzjonijiet uffiċjali, il-kampjunar u l-ittestjar;

(ii)

Ix-xtieli speċifikati kollha f'raġġ ta' 500 m minn dak il-post ta' produzzjoni nqerdu minnufih;

(iii)

kull xitla speċifikata f'raġġ ta' 500 m minn dak il-post ta' produzzjoni tkun ġiet ittestjata b'mod regolari fl-aktar żminijiet f'lokhom u tkun instabet ħielsa mill-organiżmu speċifikat.

Fil-każ tal-punti (ii) u (iii), ix-xtieli speċifikati kollha f'dik iż-żona fuq distanza ta' 500 m sa 4 500 m mill-post ta' produzzjoni inqerdu jew ġew ittestjati skont skema ta' kampjunar li tista' tikkonferma b'affidabbiltà ta' 99 % li l-livell tal-preżenza tal-organiżmu speċifikat fix-xtieli speċifikati huwa inqas minn 0,1 %.

(3)

Fejn tingħata l-informazzjoni stabbilita fil-punt (2)(c) jew (2)(d), flimkien ma' dan, iċ-ċertifikat għandu jinkludi l-informazzjoni li ntlaħaq wieħed mill-punti li ġejjin:

(a)

Ix-xtieli speċifikati tnisslu direttament minn xtieli omm mkabbra taħt kundizzjonijiet konformi mal-punti (2)(a) jew (2)(b) jew 2(c);

(b)

Ix-xtieli speċifikati tnisslu direttament minn xtieli omm li kienu suġġetti għal ittestjar individwali minn qabel, li kkonferma li huma ħielsa mill-organiżmu speċifikat;

(c)

Ix-xtieli speċifikati ġew ittestjati skont skema ta' kampjunar li tista' tikkonferma b'affidabilità ta' 99 % li l-livell tal-preżenza tal-organiżmu speċifikat fix-xtieli speċifikati huwa inqas minn 0,1 %.

(4)

Fejn tingħata l-informazzjoni stabbilita fil-punt (2)(b), l-isem taż-żona ħielsa mill-pesti għandu jiġi inkluż taħt l-intestatura taċ-ċertifikat “Post ta' Oriġini”.

TAQSIMA II

Spezzjoni

Ix-xtieli speċifikati introdotti fl-Unjoni akkumpanjati minn ċertifikat fitosanitarju li jikkonforma mat-Taqsima I għandhom jiġu spezzjonati b'mod rigoruż u, fejn jixraq, eżaminati għall-preżenza tal-organiżmu speċifikat fil-punt tad-dħul jew fil-post tad-destinazzjoni stabbilit skont id-Direttiva tal-Kummissjoni 2004/103/KE (3).

F'każ li x-xtieli speċifikati jidħlu fl-Unjoni permezz ta' Stat Membru li mhux l-Istat Membru tad-destinazzjoni ta' dawk ix-xtieli, l-entità uffiċjali responsabbli tal-Istat Membru tad-dħul għandha tgħarraf lill-entità uffiċjali responsabbli tal-Istat Membru tad-destinazzjoni.

(1)  Rekwiżiti għall-istabbiliment ta' żoni ħielsa mill-pesti. ISPM Nru 4 (1995), Ruma, IPPC, FAO 2016.

(2)  Ir-rekwiżiti biex jinstabu postijiet ta' produzzjoni u siti ta' produzzjoni ħielsa mill-pesti. ISPM Nru 10 (1999), Ruma, IPPC, FAO 2016.

(3)  Id-Direttiva tal-Kummissjoni 2004/103/KE tas-7 ta' Ottubru 2004 dwar il-kontrolli tal-identità u s-saħħa tal-pjanti, prodotti tal-pjanti jew oġġetti oħra, elenkati f'Parti B tal-Anness V tad-Direttiva tal-Kunsill 2000/29/KE, li jistgħu jiġu esegwiti f'post ieħor li mhuwiex il-punt tad-dħul fil-Komunità jew f'post ieħor fil-qrib u tispeċifika l-kundizzjonijiet li jirrigwardaw dawn il-kontrolli (ĠU L 313, 12.10.2004, p. 16).

ANNESS II

Rekwiżiti għall-moviment fl-Unjoni, kif imsemmi fl-Artikolu 3

(1)

Ix-xtieli speċifikati li joriġinaw fl-Unjoni jistgħu jgħaddu minn post għal ieħor fl-Unjoni biss jekk ikunu akkumpanjati minn passaport tax-xtieli mħejji u maħruġ skont id-Direttiva tal-Kummissjoni 92/105/KEE (1) u jekk jilħqu r-rekwiżiti stabbiliti fil-punt (2).

(2)

Ix-xtieli speċifikati għandhom jilħqu wieħed mill-punti li ġejjin:

(a)

Ix-xtieli speċifikati tkabbru tul ħajjithom fi Stat Membru fejn l-organiżmu speċifiku mhux magħruf li jidher;

(b)

Ix-xtieli speċifikati tkabbru tul ħajjithom f'żona protetta rikonoxxuta fir-rigward tal-organiżmu speċifikat skont l-Artikolu 2(1)(h) tad-Direttiva 2000/29/KE.

(c)

Il-xtieli speċifikati tkabbru tul ħajjithom f'żona ħielsa minn organiżmi ta' ħsara, stabbilita fir-rigward tal-organiżmu speċifikat mill-entità uffiċjali responsabbli ta' Stat Membru b'konformità mal-ISPM Nru 4 tal-FAO (2);

(d)

Ix-xtieli speċifikati ġew prodotti f'post ħieles mill-pesti jew f'sit tal-produzzjoni ħieles mill-pesti, stabbilit fir-rigward tal-organiżmu speċifikat mill-entità uffiċjali responsabbli tal-Istat Membru ta' oriġini b'konformità mal-ISPM Nru 10 tal-FAO (3). Ix-xtieli speċifikati tkabbru fi struttura bi grad ta' iżolament u ta' protezzjoni mill-ambjent ta' barra li jeskludi b'mod effettiv l-organiżmu speċifikat. F'dak il-post jew sit ix-xtieli speċifikati ġew uffiċjalment spezzjonati darbtejn fl-aktar żminijiet f'lokhom għall-identifikazzjoni ta' sintomi ta' infezzjoni matul l-aħħar ċiklu komplut ta' veġetazzjoni qabel ma jgħaddu minn post għall-ieħor u nstabu ħielsa mill-organiżmu speċifikat.

Dak il-post jew sit ta' produzzjoni jkun imdawwar minn żona b'raġġ ta' mill-inqas 100 m, fejn waħda mill-kundizzjonijiet segwenti tkun ġiet sodisfatta:

(i)

twettqu spezzjonijiet uffiċjali darbtejn fl-aktar żminijiet xierqa għall-identifikazzjoni ta' sintomi ta' infezzjoni matul l-aħħar ċiklu komplut ta' veġetazzjoni qabel iċ-ċaqliq u kull xitla speċifikata li nstab li kienet turi sintomi ta' infezzjoni, waqt dawn l-ispezzjonijiet, inqerdet minnufih;

(ii)

ix-xtieli speċifikati kollha nqerdu minnufih;

(iii)

kull xitla speċifikata tkun ġiet ittestjata b'mod regolari fl-aktar żminijiet f'lokhom u nstabu ħielsa mill-organiżmu speċifikat.

(e)

Ix-xtieli speċifikati ġew prodotti f'post ta' produzzjoni ħieles mill-pesti, stabbilit fir-rigward tal-organiżmu speċifikat mill-entità uffiċjali responsabbli tal-Istat Membru ta' oriġini skont l-ISPM Nru 10 tal-FAO. F'dak il-post ix-xtieli speċifikati ġew spezzjonati, kampjunati u ttestjati uffiċjalment darbtejn fl-aktar żminijiet f'lokhom tul l-aħħar ċiklu komplut ta' veġetazzjoni qabel l-esportazzjoni u nstabu ħielsa mill-organiżmu speċifikat.

Dak il-post tal-produzzjoni huwa mdawwar minn żona b'raġġ ta' 500 m, minn hawn 'il quddiem iż-“żona tal-madwar”, fejn tkun ġiet sodisfatta waħda mill-kundizzjonijiet segwenti:

(i)

l-ispezzjonijiet, il-kampjunar u l-ittestjar uffiċjali jkunu twettqu darbtejn f'dik iż-żona kollha tal-madwar fl-aktar żminijiet f'lokhom waqt l-aħħar ċiklu komplet ta' veġetazzjoni qabel iċ-ċaqliq. L-organiżmu speċifikat ma nstabx matul l-ispezzjonijiet, il-kampjunar u l-ittestjar uffiċjali;

(ii)

ix-xtieli speċifikati kollha fiż-żona tal-madwar inqerdu minnufih;

(iii)

kull xitla speċifikata fiż-żona tal-madwar tkun ġiet ittestjata b'mod regolari fl-aktar żminijiet f'lokhom u nstabet ħielsa mill-organiżmu speċifikat.

Iż-żona tal-madwar hija mdawra b'żona b'wisa' ta' 4 km, fejn tkun ġiet sodisfatta waħda mill-kundizzjonijiet segwenti:

(i)

wara l-ispezzjonijiet, il-kampjunar u l-ittestjar uffiċjali li jkunu twettqu f'dik iż-żona kollha darbtejn fl-aktar żminijiet xierqa għall-identifikazzjoni ta' sintomi ta' infezzjoni matul l-aħħar ċiklu komplut ta' veġetazzjoni qabel ma jgħaddu minn post għal ieħor, ittieħdu miżuri ta' eradikazzjoni fil-każijiet kollha meta l-organiżmu speċifikat ġie identifikat fuq ix-xtieli speċifikati. Dawn il-miżuri kkonsistew fil-qerda immedjata tax-xtieli infettati speċifikati;

(ii)

ix-xtieli speċifikati kollha f'dik iż-żona inqerdu;

(iii)

Ix-xtieli speċifikati kollha f'dik iż-żona ġew ittestjati skont skema ta' kampjunar li tikkonferma b'affidabilità ta' 99 % li l-livell tal-preżenza tal-organiżmu speċifikat fix-xtieli speċifikati huwa inqas minn 0,1 %.

(3)

Fejn ir-rekwiżiti stipulati fil-punti (2)(d) jew (2)(e) jintlaħqu, ix-xtieli speċifikati għandhom, flimkien ma' dan, jilħqu wieħed mir-rekwiżiti li ġejjin:

(a)

Ix-xtieli speċifikati tnisslu direttament mix-xtieli mkabbra taħt kundizzjonijiet konformi mal-punti (2)(a) jew (2)(b) jew 2(c) jew 2(d);

(b)

Ix-xtieli speċifikati tnisslu direttament minn xtieli omm li kienu suġġetti għal ittestjar individwali minn qabel, li kkonferma li huma ħielsa mill-organiżmu speċifikat;

(c)

Ix-xtieli speċifikati ġew ittestjati skont skema ta' kampjunar li tista' tikkonferma b'affidabilità ta' 99 % li l-livell tal-preżenza tal-organiżmu speċifikat fix-xtieli speċifikati huwa inqas minn 0,1 %.

(4)

Ix-xtieli speċifikati introdotti fl-Unjoni minn pajjiżi terzi b'konformità mal-Anness I jistgħu jgħaddu minn post għal ieħor ġewwa l-Unjoni biss jekk ikunu akkumpanjati mill-passaport tax-xtieli msemmi fil-punt (1).

(1)  Id-Direttiva tal-Kummissjoni 92/105/KEE tat-3 ta' Diċembru 1992 li tistabbilixxi grad ta' standardizzazzjoni għal passaporti ta' pjanti biex jintużaw għaċ-ċaqliq ta' ċerti pjanti, prodotti ta' pjanti jew oġġetti oħra ġewwa l-Komunità, u li tistabbilixxi l-proċeduri dettaljati dwar il-ħruġ ta' passaporti simili u l-kundizzjonijiet u l-proċeduri dettaljati għall-bdil tagħhom (ĠU L 4, 8.1.1993, p. 22).

(2)  Rekwiżiti għall-istabbiliment ta' żoni ħielsa mill-pesti. ISPM Nru 4 (1995), Ruma, IPPC, FAO 2016.

(3)  Ir-rekwiżiti biex jinstabu postijiet ta' produzzjoni u siti ta' produzzjoni ħielsa mill-pesti. ISPM Nru 10 (1999), Ruma, IPPC, FAO 2016.

Top