(1)

Fil-31 ta' Ottubru 2013, il-fornitur DENSO Corporation (l-“Applikant”) issottometta applikazzjoni għall-approvazzjoni tal-alternatur effiċjenti DENSO bħala teknoloġija innovattiva. Il-kompletezza tal-applikazzjoni ġiet ivvalutata skont l-Artikolu 4 tar-Regolament ta' Implimentazzjoni tal-Kummissjoni (UE) Nru 725/2011 (2). Il-Kummissjoni sabet li fl-applikazzjoni oriġinali tħalliet barra ċerta informazzjoni rilevanti u talbet lill-Applikant biex jipprovdiha. L-Applikant ipprovda l-informazzjoni fit-30 ta' Jannar 2014. Instab li l-applikazzjoni kienet kompleta u l-perjodu għall-valutazzjoni tal-applikazzjoni mill-Kummissjoni beda l-għada tad-data tal-wasla uffiċjali tagħha, jiġifieri l-31 ta' Jannar 2014.

(2)

L-applikazzjoni ġiet ivvalutata skont l-Artikolu 12 tar-Regolament (KE) Nru 443/2009, skont ir-Regolament ta' Implimentazzjoni tal-Kummissjoni (UE) Nru 725/2011 u skont il-Linji Gwida Tekniċi għat-tħejjija tal-applikazzjonijiet għall-approvazzjoni ta' teknoloġiji innovattivi skont ir-Regolament (KE) Nru 443/2009 (il-Linji Gwida Tekniċi) (3).

(3)

L-applikazzjoni tirreferi għall-alternatur effiċjenti DENSO, għall-klassijiet ta' output ta' 150 A, 180 A u 210 A. L-alternatur EG għandu effiċjenza ta' mill-inqas 77 fil-mija kif iddeterminat skont l-approċċ VDA deskritt fil-punt 5.1.2 fl-Anness I tal-Linji Gwida Tekniċi. Dak l-approċċ jirreferi għall-metodoloġija tal-ittestjar speċifikata fl-istandard Internazzjonali ISO 8854:2012 (4). L-alternatur tal-Applikant għandu effiċjenza ogħla meta mqabbel mal-alternatur ta' referenza, peress li jnaqqas dawn it-tliet tipi ta' telf: telf ta' rettifikazzjoni billi jottimizza r-rettifikazzjoni permezz tal-“modulu MOSFET”, jiġifieri, Metal–Oxide–Semiconductor Field-Effect Transistor; telf min-nukleu tal-ħadid tal-istator bl-użu ta' nukleu fin laminat magħmul mill-azzar manjetiku; u telf mill-winding tar-ram tal-istator bl-użu ta' “konduttur magħmul minn segmenti”, li għandu fattur ta' spazju ogħla u kojl tat-tarf iqsar. Din it-teknoloġija hija differenti ferm mill-Alternatur ta' Ġenerazzjoni Effiċjenti Valeo approvat bħala ekoinnovazzjoni bid-Deċiżjoni ta' Implimentazzjoni tal-Kummissjoni 2013/341/UE (5).

(4)

Il-Kummissjoni ssib li l-informazzjoni pprovduta mill-applikant turi li l-kundizzjonijiet u l-kriterji msemmija fl-Artikolu 12 tar-Regolament (KE) Nru 443/2009 u fl-Artikoli 2 u 4 tar-Regolament ta' Implimentazzjoni (UE) Nru 725/2011 intlaħqu.

(5)

L-Applikant wera li l-użu tal-alternatur ta' effiċjenza għolja tat-tip deskritt f'din l-applikazzjoni ma kienx iktar minn ta' 3 % tal-karozzi ġodda tal-passiġġieri rreġistrati fis-sena ta' referenza 2009.

(6)

Sabiex jiġi ddeterminat l-iffrankar ta' CO2 li t-teknoloġija innovattiva se tagħti meta vettura tiġi mgħammra biha, huwa meħtieġ li tiġi ddefinita l-vettura ta' referenza li magħha se tiġi mqabbla l-effiċjenza tal-vettura mgħammra bit-teknoloġija innovattiva kif ipprovdut fl-Artikoli 5 u 8 tar-Regolament ta' Implimentazzjoni (UE) Nru 725/2011. Il-Kummissjoni ssib li huwa xieraq li jitqies alternatur b'effiċjenza ta' 67 % bħala teknoloġija xierqa ta' referenza fil-każ li t-teknoloġija innovattiva tiġi installata fuq tip ta' vettura ġdida. Meta l-alternatur effiċjenti DENSO jiġi installat fuq tip ta' vettura eżistenti, it-teknoloġija ta' referenza għandha tkun l-alternatur tal-verżjoni l-aktar reċenti ta' dak it-tip imqiegħed fis-suq.

(7)

L-Applikant ipprovda metodoloġija għall-ittestjar tat-tnaqqis ta' CO2 li tinkludi formoli li huma konsistenti mal-formoli deskritti fil-Linji Gwida Tekniċi għall-metodu ssimplifikat fir-rigward tal-alternaturi effiċjenti. Il-Kummissjoni tqis li l-metodoloġija tal-ittestjar se tipprovdi riżultati tal-ittestjar li huma verifikabbli, ripetibbli u komparabbli u li hija kapaċi turi b'mod realistiku l-benefiċċji rigward l-emissjonijiet ta' CO2 tat-teknoloġija innovattiva b'sinifikat statistiku b'saħħtu skont l-Artikolu 6 tar-Regolament ta' Implimentazzjoni (UE) Nru 725/2011.

(8)

Il-Kummissjoni tinnota li, fil-metodoloġija tiegħu, l-Applikant uża formula għall-kalkolu tad-devjazzjoni standard tal-valur tal-effiċjenza tal-alternatur li żżid il-preċiżjoni tar-riżultati meta mqabbla mal-formola (1) tal-metodoloġija speċifikata fl-Anness tad-Deċiżjoni ta' Implimentazzjoni Nru 2013/341/UE. Il-metodoloġija tal-ittestjar tal-Applikant u l-formuli għall-kalkolu tal-iffrankar ta' CO2 huma, fl-aspetti l-oħra kollha, identiċi għall-metodoloġija speċifikata f'dik id-Deċiżjoni ta' implimentazzjoni. Konsegwentement, il-Kummissjoni tqis li l-metodoloġija speċifikata fid-Deċiżjoni ta' Implimentazzjoni Nru 2013/341/UE għandha tintuża biex jiġi ddeterminat it-tnaqqis fl-emissjonijiet ta' CO2 dovut għall-użu tal-alternatur effiċjenti DENSO. Madankollu, fid-dawl ta' iktar preċiżjoni dovuta għall-kalkolu tad-devjazzjoni standard propost mid-DENSO, ikun xieraq li tiġi aġġustata l-formula (1) stipulata fl-Anness tad-Deċiżjoni ta' Implimentazzjoni Nru 2013/341/UE. L-aġġustament m'għandhu jaffettwa ebda frankar ta' CO2 iċċertifikat bl-użu tal-metodoloġija stabbilita fid-Deċiżjoni ta' Implimentazzjoni Nru 2013/341/UE qabel id-dħul fis-seħħ ta' din id-Deċiżjoni ta' Implimentazzjoni.

(9)

F'dan il-kuntest, il-Kummissjoni ssib li l-Applikant wera b'mod sodisfaċenti li t-tnaqqis fl-emissjonijiet miksub mit-teknoloġija innovattiva huwa tal-anqas ta' 1 g CO2/km.

(10)

Il-Kummissjoni tinnota li l-iffrankar tat-teknoloġija innovattiva jista' jintwera parzjalment permezz taċ-ċiklu tat-test standard, u li l-iffrankar totali finali li jrid jiġi ċċertifikat għalhekk għandu jkun iddeterminat skont it-tieni subparagrafu tal-Artikolu 8(2) tar-Regolament ta' Implimentazzjoni (UE) Nru 725/2011.

(11)

Il-Kummissjoni ssib li r-rapport ta' verifika tħejja mill-Vehicle Certification Agency (VCA), li huwa korp indipendenti u ċċertifikat, u li r-rapport jappoġġa s-sejbiet stipulati fl-applikazzjoni.

(12)

F'dan il-kuntest, il-Kummissjoni ssib li ma għandha tagħmel ebda oġġezzjoni fir-rigward tal-approvazzjoni tat-teknoloġija innovattiva inkwistjoni.

(13)

Bil-għan li jiġi stabbilit il-kodiċi tal-ekoinnovazzjoni ġenerali li għandu jintuża fid-dokumenti tal-approvazzjoni tat-tip rilevanti skont l-Annessi I, VIII u IX tad-Direttiva 2007/46/KE tal-Parlament Ewropew u tal-Kunsill (6), għandu jiġi speċifikat il-kodiċi individwali li għandu jintuża għat-teknoloġija innovattiva approvata permezz ta' din id-Deċiżjoni,

(14)

Kwalunkwe manifattur li jixtieq jibbenefika minn tnaqqis tal-emissjonijiet medji speċifiċi ta' CO2 tiegħu sabiex jilħaq il-mira ta' emissjonijiet speċifiċi tiegħu permezz tal-iffrankar ta' CO2 bl-użu tat-teknoloġija innovattiva approvata permezz ta' din id-Deċiżjoni ta' Implimentazzjoni, għandu skont l-Artikolu 11(1) tar-Regolament ta' Implimentazzjoni (UE) Nru 725/2011, jirreferi għal din id-Deċiżjoni ta' Implimentazzjoni fl-applikazzjoni tiegħu għal ċertifikat tal-approvazzjoni tat-tip KE għall-vetturi kkonċernati,