(1)

Wara l-opinjoni tal-Kumitat Xjentifiku dwar l-Ikel (SCF) tas-26 ta’ Settembru 2002 (2) u sabiex jiġi żgurat illi l-konsumaturi jirċievu t-tagħrif adegwat meta jixtru l-ikel u l-ingredjenti tal-ikel b’fitosteroli, esteri fitosteroli, fitostanoli u/jew esteri fitostanoli miżjuda, ir-Regolament tal-Kummissjoni (KE) Nru 608/2004 tal-31 ta’ Marzu 2004 li jikkonċerna t-tikkettjar tal-ikel u ingredjenti tal-ikel b’fitosteroli, esteri fitosteroli, fitostanoli u/jew esteri fitostanoli miżjuda (3) jipprovdi għal dettalji obbligatorji minbarra dawk elenkati fl-Artikolu 3 tad-Direttiva 2000/13/KE dwar l-ittikkettjar tat-tali ikel.

(2)

Ir-Regolament (KE) Nru 608/2004 jipprevedi li l-ittikkettjar tat-tali ikel u ingredjenti tal-ikel għandu jkollu, fost l-oħrajn, dikjarazzjoni li l-prodott huwa maħsub esklussivament għan-nies li jixtiequ jbaxxu l-livell tal-kolesterol fid-demm tagħhom. L-għan ta’ din id-dikjarazzjoni mandatorja huwa li jiġi żgurat li l-prodott jilħaq il-grupp tal-mira tiegħu, u għalhekk ikun evitat il-konsum minn gruppi mhux immirati.

(3)

L-inklużjoni volontarja ta’ dikjarazzjonijiet sanitarji dwar in-nutrizzjoni jew is-saħħa fuq it-tikketti tal-ikel hija rregolata permezz tar-Regolament (KE) Nru 1924/2006 tal-Parlament Ewropew u tal-Kunsill tal-20 ta’ Diċembru 2006 dwar indikazzjonijiet dwar in-nutrizzjoni u s-saħħa mogħtija fuq l-ikel (4). Għaldaqstant, ir-Regolament tal-Kummissjoni (KE) Nru 983/2009 tal-21 ta’ Ottubru 2009 dwar l-awtorizzazzjoni u ċ-ċaħda ta’ awtorizzazzjoni ta’ ċerti dikjarazzjonijiet sanitarji mogħtija fuq il-prodotti tal-ikel u li jirreferu għal tnaqqis fir-riskju tal-mard u għall-iżvilupp u s-saħħa tat-tfal (5), u r-Regolament tal-Kummissjoni (UE) Nru 384/2010 tal-5 ta’ Mejju 2010 dwar l-awtorizzazzjoni u ċ-ċaħda tal-awtorizzazzjoni ta’ ċerti indikazzjonijiet dwar is-saħħa fuq il-prodotti tal-ikel u li jirreferu għat-tnaqqis fir-riskju tal-mard u għall-iżvilupp u s-saħħa tat-tfal (6) u r-Regolament tal-Kummissjoni (UE) Nru 432/2012 tas-16 ta’ Mejju 2012 li jistabbilixxi lista ta’ indikazzjonijiet permessi dwar is-saħħa li jsiru fuq l-ikel, barra dawk li jirreferu għat-tnaqqis fir-riskju tal-mard u għall-iżvilupp u s-saħħa tat-tfal (7) jinkludu dikjarazzjonijiet sanitarji fir-rigward tat-tnaqqis u ż-żamma tal-kolesterol fid-demm rigward l-ikel li fih l-isteroli tal-pjanti u l-istanoli tal-pjanti, suġġetti għal ċerti kundizzjonijiet tal-użu.

(4)

Ir-Regolament (KE) Nru 983/2009 awtorizza, taħt ċerti kundizzjonijiet ta’ użu, d-dikjarazzjonijiet sanitarji li ġejjin: “Intwera li l-isteroli mill-pjanti jbaxxu/jnaqqsu l-kolesterol fid-demm. Il-kolesterol għoli huwa fattur ta’ riskju fl-iżvilupp tal-mard koronarju tal-qalb” u”Intwera li l-esteri tal-istanol mill-pjanti jbaxxu/jnaqqsu l-kolesterol fid-demm. Il-kolesterol għoli huwa fattur ta’ riskju fl-iżvilupp tal-mard koronarju tal-qalb”.

(5)

Ir-Regolament (UE) Nru 384/2010 awtorizza, taħt ċerti kundizzjonijiet ta’ użu, id-dikjarazzjoni sanitarja li ġejja: L-esteri tal-isteroli tal-pjanti u l-esteri tal-istanoli tal-pjanti ntwerew li jbaxxu/jnaqqsu l-kolesterol fid-demm. Il-kolesterol għoli huwa fattur ta’ riskju fl-iżvilupp tal-mard koronarju tal-qalb.”

(6)

Ir-Regolament (UE) Nru 432/2012 awtorizza, taħt ċerti kundizzjonijiet ta’ użu, id-dikjarazzjoni sanitarja li ġejja: “L-isteroli/stanoli tal-pjanti jikkontribwixxu għaż-żamma ta’ livelli normali ta’ kolesterol fid-demm”.

(7)

Il-kliem tad-dikjarazzjonijiet sanitarji awtorizzati flimkien mad-dikjarazzjoni mandatorja fir-rigward tal-grupp fil-mira stabbiliti fir-Regolament (KE) Nru 608/2004 jistgħu potenzjalment iwasslu biex konsumaturi li m’għandhomx bżonn li jikkontrollaw il-livell ta’ kolesterol fid-demm tagħhom jużaw il-prodott. Għalhekk, bil-għan li tiġi żgurata l-konsistenza tal-informazzjoni mogħtija fuq l-ittikkettjar tal-ikel u l-ingredjenti tal-ikel b’fitosteroli, esteri fitosteroli, fitostanoli u/jew esteri fitostanoli miżjuda, huwa xieraq li tiġi emendata d-dikjarazzjoni mandatorja stabbilita fir-Regolament (KE) Nru 608/2004 filwaqt li jiġi żgurat li t-test tagħha jservi adegwatament l-għan informattiv li għalih kien inizjalment introdott.

(8)

Sabiex l-operaturi tan-negozji tal-ikel jkunu jistgħu jadattaw l-ittikkjettar tal-prodotti tagħhom mar-rekwiżiti l-ġodda introdotti b’dan ir-Regolament, huwa importanti li jkunu previsti perjodi tranżitorji adegwati għall-applikazzjoni ta’ dan ir-Regolament.

(9)

Il-miżuri stipulati f’dan ir-Regolament huma skont l-opinjoni tal-Kumitat Permanenti dwar il-Katina Alimentari u s-Saħħa tal-Annimali u la l-Parlament Ewropew u lanqas il-Kunsill ma opponewhom,

“3.

għandu jkun hemm dikjarazzjoni li l-prodott mhuwiex maħsub għal persuni li ma jeħtiġux li jikkontrollaw l-livell ta’ kolesterol fid-demm tagħhom.”