29.6.2007

MT

Il-Ġurnal Uffiċjali ta’ l-Unjoni Ewropea

L 169/10

---

REGOLAMENT TAL-KUMMISSJONI (KE) Nru 737/2007

tas-27 ta’ Ġunju 2007

dwar l-istabbiliment tal-proċedura għat-tiġdid ta’ l-inklużjoni ta’ l-ewwel grupp ta’ sustanzi attivi fl-Anness I tad-Direttiva tal-Kunsill 91/414/KEE u li jistabbilixxi l-lista ta’ dawk is-sustanzi

(Test b’relevanza għaż-ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 91/414/KEE tal-15 ta’ Lulju 1991 li tikkonċerna t-tqegħid fis-suq ta’ prodotti għall-protezzjoni tal-pjanti (1), u b’mod partikolari l-Artikoli 6(1) u (5) tagħha,

Billi:

(1)	Id-Direttiva 91/414/KEE tipprovdi li fuq talba, l-inklużjoni ta’ sustanza tista’ tiġġedded darba, jew aktar, għal perjodu li ma jaqbiżx l-10 snin.

(2)	Il-Kummissjoni irċiviet talba minn ċerti produtturi li talbu għat-tiġdid tas-7 sustanzi attivi li tniżżlu l-ewwel fl-Anness I tad-Direttiva 91/414/KEE.

(3)	Għandha tiġi prevista proċedura li biha l-produtturi interessati kollha jkollhom id-dritt li jinfurmaw lill-Kummissjoni bl-interess tagħhom li jiżguraw l-inklużjoni ta’ sustanza attiva fl-Anness I tad-Direttiva 91/414/KEE.

(4)	Il-produtturi li jixtiequ jiżguraw it-tiġdid ta’ inklużjoni għal sustanza attiva koperta minn dan ir-Regolament għandhom ikunu meħtieġa li jinnotifikaw l-Istat Membru rapporteur rilevanti.

(5)	L-ismijiet u l-indirizzi tal-produtturi li n-notifika tagħhom instabet li hija aċċettabbli għandhom jiġu ppubblikati mill-Kummissjoni sabiex jiġi żgurat li jkunu jistgħu jiġu kkuntattjati għall-preżentazzjoni ta’ dossiers konġunti.

(6)	Ir-relazzjoni bejn il-produtturi, l-Istati Membri, l-Awtorità Ewropea dwar is-Sikurezza ta’ l-Ikel, minn hawn ‘il quddiem l-“Awtorità”, u l-Kummissjoni u l-obbligazzjoni ta’ kull wieħed mill-partijiet għall-implimentazzjoni tal-proċedura għandhom jiġu stipulati.

(7)	Tagħrif tekniku jew xjentifiku dwar sustanza attiva, b’mod partikolari fir-rigward ta’ l-effetti potenzjalment perikolużi tagħha jew ir-residwi tagħha, sottomess fi ħdan il-limiti ta’ żmien rilevanti minn xi partijiet oħrajn interessati għandu jitqies fil-valutazzjonijiet.

(8)

It-tagħrif sottomess għandu jinkludi data ġdida rilevanti għas-sustanza attiva u valutazzjoni tar-riskju ġdida sabiex tirrifletti kwalunkwe tibdiliet fir-rekwiżiti tad-data taħt l-Annessi II u III tad-Direttiva 91/414/KEE, u kwalunkwe tibdiliet fl-għarfien xjentifiku jew tekniku sa minn meta s-sustanza attiva ġiet inkluża għall-ewwel darba fl-Anness I tad-Direttiva 91/414/KEE, kif rifless fid-dokumenti ta’ gwida mis-servizzi tal-Kummissjoni u opinjonijiet rilevanti mill-Kumitat Xjentifiku dwar il-Pjanti (SCP – Scientific Committee on Plants) jew l-Awtorità. Il-firxa ta’ użi sottomessa għandha tirrifletti l-metodu ta’ użu rappreżentattiv. Il-produttur għandu juri, fuq il-bażi tad-data sottomessa, li r-rekwiżiti għad-Direttiva 91/414/KEE fir-rigward tal-kriterji msemmija fl-Artikolu 5 tagħha jistgħu jintlaħqu għal preparazzjoni waħda jew aktar.

(9)	Għandu jiġi stabbilit li l-Istati Membri rapporteur għandhom jibagħtu rapporti tal-valutazzjonijiet tagħhom lill-Awtorità u lill-Kummissjoni malajr kemm jista’ jkun.

(10)

Ir-rapporti ta’ valutazzjoni mħejjija mill-Istati Membri rapporteur jistgħu, fejn meħtieġ, ikunu soġġetti għal eżaminazzjoni minn esperti ta’ Stati Membri oħrajn fi ħdan programm ikkoordinat mill-Awtorità qabel ma dawn jintbagħtu lill-Kumitat Permanenti dwar il-Katina Alimentari u s-Saħħa ta’ l-Annimali.

(11)

Ir-regoli dwar il-ħarsien tad-data skond l-Artikolu 13 tad-Direttiva 91/414/KEE huma maħsuba sabiex jipprovdu inċentiv għan-notifikanti sabiex jiġbru l-istudji ddettaljati meħtieġa skond l-Annessi II u III ta’ dik id-Direttiva. Madankollu, il-ħarsien tad-data ma għandhiex tiġi estiża b’mod artifiċjali bil-produzzjoni ta’ studji ġodda li mhumiex meħtieġa għal deċiżjoni dwar it-tiġdid ta’ sustanza attiva. Għal dan il-għan, in-notifikanti għandhom jintalbu jidentifikaw b’mod espliċitu liema studji huma ġodda meta mqabbla mad-dossier oriġinali użat għall-ewwel inklużjoni tas-sustanza fl-Anness I tad-Direttiva 91/414/KEE.

(12)	Il-miżuri previsti f’dan ir-Regolament huma skond l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali,

ADOTTAT DAN IR-REGOLAMENT:

Artikolu 1

Ambitu

Dan ir-Regolament jistipula l-proċedura għat-tiġdid ta’ l-inklużjoni fl-Anness I tad-Direttiva 91/414/KEE tas-sustanza attiva elenkata fl-Anness I ta’ dan ir-Regolament.

Artikolu 2

Definizzjoni

Għall-għanijiet ta’ dan ir-Regolament,

(a)	‘produttur’ tfisser il-persuna li waħidha timmanifattura s-sustanza attiva jew il-persuna li tgħaddi l-kuntratt għall-manifattura lil parti oħra jew lil persuna magħżula mill-manifattur bħala r-rappreżentant waħdieni tiegħu għall-għanijiet ta’ konformità ma’ dan ir-Regolament.

(b)	‘Kumitat’ tfisser il-Kumitat Permanenti dwar il-Katina Alimentari u s-Saħħa ta’ l-Annimali, imsemmi fl-Artikolu 19 tad-Direttiva 91/414/KEE.

(ċ)	‘Notifikant’ għandha t-tifsira mogħtija mill-Artikolu 4(1) ta’ dan ir-Regolament.

(d)	‘Dossier oriġinali’, fir-rigward ta’ sustanza attiva, tfisser id-dossier li fuq il-bażi tiegħu ġiet miżjuda s-sustanza attiva fl-Anness I tad-Direttiva 91/414/KEE.

Artikolu 3

Awtorità ta’ l-Istat Membru magħżula

1.   Kull Stat Membru għandu jaħtar awtorità jew awtoritajiet sabiex iwettqu l-obbligi ta’ l-Istati Membri kif definiti f’dan ir-Regolament.

2.   L-awtoritajiet nazzjonali elenkati fl-Anness II għandhom jikkoordinaw u jiżguraw il-kuntatti meħtieġa man-notifikanti, Stati Membri oħrajn, il-Kummissjoni u l-Awtorità, skond dan ir-Regolament.

Kull Stat Membru għandu jikkomunika modifiki dwar l-awtorità ta’ koordinazzjoni nazzjonali magħżula lill-Kummissjoni, lill-Awtorità u lill-awtorità ta’ koordinazzjoni magħżula ta’ l-Istati Membri oħrajn.

Artikolu 4

Notifika

1.   Produttur li jixtieq iġedded l-inklużjoni fl-Anness I tad-Direttiva 91/414/KEE ta’ sustanza attiva msemmija fil-kolonna A ta’ l-Anness I ta’ dan ir-Regolament, jew kwalunkwe varjanti tagħha bħal melħ, esteri jew ammini, għandu jibgħat notifika, separatament għal kull sustanza attiva, lill-Istat Membru rapporteur elenkat fil-kolonna B ta’ dak l-Anness u lill-Istat Membru ko-rapporteur elenkat fil-kolonna C ta’ dak l-Anness mhux aktar tard mis-6 ta’ Ottubru 2007, skond il-mudell fl-Anness III. Tali produttur huwa minn hawn ‘il quddiem irreferut bħala ‘in-notifikant’.

Kopja tan-notifika għandha tintbagħat lill-Kummissjoni.

2.   Notifika konġunta tista’ tintbagħat minn assoċċjazzjoni ta’ produtturi magħżula mill-produtturi għall-għan ta’ konformità ma’ dan ir-Regolament.

3.   Produttur li ma bagħatx notifika għas-sustanza attiva ikkonċernata sa mhux aktar tard mis-6 ta’ Ottubru jew li n-notifika tiegħu ġiet irrifjutata bħala inaċċettabli, ma għandux jipparteċipa fil-kumplament tal-proċedura, minbarra flimkien ma’ produttur ieħor li bagħat notifika aċċettabbli.

Artikolu 5

L-aċċettabbilità tan-notifiki u ta’ data ta’ pubblikazzjoni fir-rigward tan-notifikanti

1.   Għal kull sustanza attiva l-Istat Membru rapporteur għandu jeżamina n-notifiki msemmija fl-Artikolu 4(1) u, minn ta’ l-anqas xahar wara d-data msemmija f’dak il-paragrafu, jevalwa l-aċċettabbilità tan-notifiki riċevuti, filwaqt li jqis il-kriterji msemmija fl-Anness IV. Għandu jikkomunika l-valutazzjoni tiegħu lill-Kummissjoni, li għandha tiddeċiedi liema notifiki huma aċċettabbli, filwaqt li tqis il-valutazzjoni ta’ l-Istat Membru rapporteur.

2.   Il-Kummissjoni għandha tippubblika, għal kull sustanza attiva, l-ismijiet u l-indirizzi tan-notifikanti kkonċernati.

Artikolu 6

Sottomissjoni tad-data

1.   Sa mhux aktar tard mill-31 ta’ Awwissu 2008, in-notifikanti kkonċernati għandhom jibagħtu dan li ġej lill-Istat Membru rapporteur u lill-Istat Membru ko-rapporteur:

(a)	kopja tan-notifika u, fil-każ ta’ notifika konġunta skond l-Artikolu 4(2), l-isem tal-persuna magħżula mill-produtturi kkonċernati bħala r-responsabbli għad-dossier konġunt u għall-ipproċessar tad-dossier skond dan ir-Regolament;

(b)

kwalunkwe data ġdida mqabbla mad-dossier oriġinali tas-sustanza attiva u kwalunkwe valutazzjonijiet tar-riskju ġodda sabiex jirriflettu tibdiliet fir-rekwiżiti tad-data skond l-Annessi II u III tad-Direttiva 91/414/KEE, jew kwalunkwe tibdiliet fl-għarfien xjentifiku u tekniku sa minn meta s-sustanza attiva kkonċernata ġiet inkluża għall-ewwel darba fl-Anness I tad-Direttiva 91/414/KEE;

(ċ)	lista ta’ kontroll li turi li d-dossier huwa komplut, li tindika li d-data hija ġdida.

2.   Fejn id-dossier ikun fih studji li huma aktar riċenti minn dawk misjuba fid-dossier oriġinali, in-notifikant irid jispjega għal kull studju ġdid għaliex huwa rilevanti.

3.   Il-firxa ta’ użi sottomessa għandha tirrifletti l-metodu ta’ użu rappreżentattiv. Id-data sottomessa min-notifikant għandha turi li, għal preparazzjoni waħda jew aktar, is-sustanza attiva tilħaq ir-rekwiżiti stipulati fl-Artikolu 5(1) tad-Direttiva 91/414/KEE.

4.   Fejn ikun hemm bosta notifiki għal sustanza attiva elenkata fl-Anness I, in-notifikanti kkonċernati għandhom jieħdu l-passi raġonevoli kollha sabiex jibagħtu d-data kollettivament. Fejn id-data ma tkunx sottomessa b’mod konġunt min-notifikanti kollha kkonċernati, in-notifikanti għandhom isemmu l-isforzi magħmula u r-raġunijiet għaliex ċerti notifikanti ma ħadux sehem. Għal sustanzi attivi nnotifikati minn aktar minn notifikant wieħed, dawn in-notifikanti għandhom għal kull studju li jinvolvi annimali vertebrati, jagħtu spjegazzjoni ddettaljata dwar l-attentati li saru sabiex jiġi evitat ittestjar doppju u jagħtu, jekk applikabbli, ir-raġunijiet u ġustifikazzjoni għat-twettiq ta’ studju doppju.

5.   Jekk mitlub mill-Awtorità jew minn Stat Membru, in-notifikant għandu jagħmel disponibbli d-dossier oriġinali u aġġornamenti sussegwenti mibgħuta għall-ewwel inklużjoni fl-Anness I tad-Direttiva 91/414/KEE.

Artikolu 7

Sottomissjoni sussegwenti

1.   Mingħajr preġudizzju għall-Artikolu 7 tad-Direttiva 91/414/KEE, l-Istat Membru rapporteur ma għandux jaċċetta s-sottomissjoni ta’ tagħrif addizzjonali wara l-31 ta’ Awwissu 2008.

2.   B’deroga minn paragrafu 1, l-Istat Membru rapporteur jista’ jirrikjedi tagħrif addizzjonali filwaqt li jistabbilixxi perjodu ta’ żmien għas-sottomissjoni tiegħu li jintemm mhux aktar tard mill-31 ta’ Marzu 2009. L-Istat Membru rapporteur għandu jinforma lill-Kummissjoni u lill-Awtorità bi kwalunkwe tali talba li jagħmel.

Tagħrif li ma ġiex mitlub, jew li ma ntbagħatx qabel il-31 ta’ Marzu 2009, ma għandux jitqies.

3.   L-Istat Membru rapporteur għandu jinforma lill-Kummissjoni u lill-Awtorità b’każijiet fejn jirċievi tagħrif min-notifikant, li huwa jqis mhux meħtieġa skond id-dispożizzjonijiet ta’ dan l-artikolu.

Artikolu 8

Tmiem tal-parteċipazzjoni

1.   Meta notifikant jiddeċiedi li jtemm il-parteċipazzjoni tiegħu fil-proċedura ta’ tiġdid għal sustanza attiva, dan għandu jinforma lill-Istat Membru rapporteur, lill-Istat Membru ko-rapporteur, lill-Kummissjoni u lin-notifikanti oħrajn għas-sustanza kkonċernata, filwaqt li jsemmi r-raġunijiet.

Fejn notifikant itemm il-parteċipazzjoni tiegħu jew jonqos milli jissodisfa l-obbligi tiegħu previsti f’dan ir-Regolament, il-proċeduri previsti fl-Artikoli 10 sa 14 ma għandhomx jitkomplew għad-dossier tiegħu. B’mod partikolari, fejn notifikant ma jibgħatx, fejn meħtieġ, id-dossier imsemmi fl-Artikolu 6(5), il-parteċipazzjoni tiegħu titqies li tkun intemmet.

2.   Fejn notifikant jaqbel ma’ produttur ieħor li n-notifikant għandu jinbidel għall-għanijiet ta’ parteċipazzjoni ulterjuri fil-proċedura ta’ tiġdid, in-notifikant u l-produtturi oħrajn għandhom jinfurmaw lill-Istat Membru rapporteur, lill-Istat Membru ko-rapporteur u lill-Kummissjoni permezz ta’ dikjarazzjoni komuni, fejn jaqblu li l-produttur l-ieħor għandu jieħu post in-notifikant fit-twettieq tad-doveri taħt dan ir-Regolament. Huma għandhom jinfurmaw lil kwalunkwe notifikanti oħrajn għas-sustanza kkonċernata fl-istess waqt. F’tali każ, il-produttur l-ieħor jista’ jkun responsabbli għal kwalunkwe miżati li jkunu għadhom ma tħallsux taħt ir-reġim stabbilit mill-Istat Membru rapporteur skond l-Artikolu 15.

Artikolu 9

Sottomissjoni ta’ tagħrif minn partijiet terzi

Kwalunkwe persuna jew Stat Membru li jixtieq jibgħat lill-Istat Membru rapporteur tagħrif li jista’ jkun ta’ kontribut għall-valutazzjoni, b’mod partikolari fir-rigward ta’ l-effetti potenzjalment perikolużi tas-sustanza attiva jew tar-residwi tagħha fuq is-saħħa tal-bniedem u ta’ l-annimali u fuq l-ambjent għandu jagħmel dan sa mhux aktar tard mill-31 ta’ Mejju 2008.

L-Istat Membru rapporteur għandu jibgħat mingħajr dewmien kwalunkwe tagħrif riċevut mill-Awtorità u min-notifikant.

In-notifikant jista’ jibgħat il-kummenti tiegħu dwar it-tagħrif mibgħut lill-Istat Membru rapporteur sa mhux aktar tard mill-31 ta’ Awwissu 2008.

Artikolu 10

Valutazzjoni mill-Istat Membru rapporteur

1.   L-Istat Membru rapporteur għandu jevalwa d-data ġdida u l-valutazzjoni tar-riskju mibgħuta skond l-Artikolu 6(1), u jekk meħtieġ, tagħrif mid-dossier oriġinali filwaqt li jqis it-tagħrif disponibbli dwar l-effetti potenzjalment perikolużi mibgħuta minn kwalunkwe parti terza u kwalunkwe kummenti riċevuti min-notifikant skond l-Artikolu 9.

L-Istat Membru rapporteur għandu jħejji rapport ta’ valutazzjoni b’konsultazzjoni ma’ l-Istat Membru ko-rapporteur, fejn jistabbilixxi, fejn rilevanti, il-punti li l-Istat Membru ko-rapporteur ma qabilx dwarhom.

Ir-rapport għandu jinkludi rakkomandazzjoni dwar id-deċiżjoni li għandha tittieħed fir-rigward tat-tiġdid. Ir-rapport għandu jevalwa ukoll jekk l-istudji l-ġodda identifikati skond l-Artikolu 6(2) humiex rilevanti għall-valutazzjoni.

L-Istat Membru rapporteur għandu jibgħat ir-rapport ta’ valutazzjoni lill-Awtorità u lill-Kummissjoni sa mhux aktar tard mill-31 ta’ Mejju 2009. Ir-rapport għandu jintbagħat fil-format identifikat skond il-proċedura msemmija fl-Artikolu 19(2) tad-Direttiva 91/414/KEE.

2.   L-Istat Membru rapporteur jista’ jikkonsulta lill-Awtorità u jitlob għal tagħrif tekniku u xjentifiku addizzjonali minn Stati Membri oħrajn.

Artikolu 11

Aċċess għar-rapport ta’ valutazzjoni

1.   Wara li tirċievi r-rapport ta’ valutazzjoni l-Awtorità għandha tgħaddih lill-Istati Membri u n-notifikant(i) l-oħrajn għall-kummenti. Tali kummenti għandhom jintbagħtu lill-Awtorità, li għandha tiġborhom u tgħaddihom lill-Kummissjoni.

2.   L-Awtorità għandha tagħmel ir-rapport ta’ valutazzjoni disponnibbli fuq talba jew għall-konsultazzjoni minn kwalunkwe persona, għajr l-elementi tiegħu li ġew aċċettati bħala kunfidenzjali skond l-Artikolu 14 tad-Direttiva 91/414/KEE.

Artikolu 12

Valutazzjoni tar-rapport ta’ valutazzjoni

1.   Il-Kummissjoni għandha tevalwa r-rapport ta’ valutazzjoni u r-rakkomandazzjoni mill-Istat Membru rapporteur u l-kummenti riċevuti.

Il-Kummissjoni tista’ tikkonsulta lill-Awtorità. Tali konsultazzjoni tista’, jekk xieraq, tinkludi rikjesta sabiex tħejji reviżjoni minn esperti ugwali fil-qasam tar-rapport ta’ valutazzjoni ta’ l-Istat Membru rapporteur, sabiex tieħu l-forma ta’ konklużjoni dwar dak ir-rapport.

2.   F’każijiet fejn il-Kummissjoni tikkonsulta l-Awtorità, l-Awtorità għandha tibgħat it-tweġiba tagħha mhux aktar tard minn sitt xhur minn meta tirċievi dak ir-rapport.

3.   Il-Kummissjoni u l-Awtorità għandhom jaqblu dwar skeda għall-għoti tal-konklużjonijiet sabiex jiffaċilitaw it-tħejjija tax-xogħol. Il-Kummissjoni u l-Awtorità għandhom jaqblu dwar il-format li fih jintbagħtu l-konklużjonijiet ta’ l-Awtorità.

Artikolu 13

Preżentazzjoni ta’ abbozz ta’ direttiva jew abbozz ta’ deċiżjoni

1.   Mingħajr preġudizzju lejn kwalunkwe proposta li tista’ tibgħat bil-għan li temenda l-Anness għad-Direttiva tal-Kunsill 79/117/KEE (2), il-Kummissjoni għandha, mhux aktar tard minn sitt xhur minn meta tirċievi r-rapport ta’ valutazzjoni jew il-konklużjoni ta’ l-Awtorità, tibgħat abbozz ta’ rapport ta’ reviżjoni lill-Kumitat sabiex ikun iffinalizzat fil-laqgħa tagħha.

Dan ir-rapport għandu jkun akkumpanjat minn wieħed milli ġejjin:

(a)	abbozz ta’ direttiva sabiex tiġġedded l-inklużjoni tas-sustanza attiva kkonċernata fl-Anness I tad-Direttiva 91/414/KEE, li tistipula, fejn xieraq, il-kundizzjonijiet u r-restrizzjonijiet, inkluż il-perjodu, għal tali inklużjoni; jew

(b)

abbozz ta’ deċiżjoni indirizzata lill-Istati Membri sabiex jirtiraw l-awtorizzazzjonijiet ta’ prodotti għall-ħarsien tal-pjanti li fihom is-sustanza attiva kkonċernata, li permezz tiegħu l-inklużjoni ta’ dik is-sustanza attiva fl-Anness I tad-Direttiva 91/414/KEE ma tiġġeddidx, filwaqt li jistabbilixxi r-raġunijiet għall-ebda inklużjoni.

2.   Id-direttiva jew deċiżjoni msemmija fil-paragrafu 1 għandha tiġi adottata skond il-proċedura msemmija fl-Artikolu 19(2) tad-Direttiva 91/414/KEE.

Artikolu 14

Aċċess għar-rapport ta’ reviżjoni

Ir-rapport ta’ reviżjoni ffinalizzat, għajr għal kwalunkwe partijiet li jirreferu għal tagħrif kunfidenzjali li jinstab fid-dossiers u stabbiliti bħala tali b’konformità ma’ l-Artikolu 14 tad-Direttiva 91/414/KEE, għandhom ikunu disponibbli għall-konsultazzjoni mill-pubbliku.

Artikolu 15

Miżati

1.   L-Istati Membri għandhom jistabbilixxu reġim li jobbliga lin-notifikanti li jħallsu miżata għat-trattament amministrattiv u l-valutazzjoni tan-notifiki kif ukoll id-dossiers li għandhom x’jaqsmu magħhom, li jkunu ntbagħtulhom skond l-Artikolu 4 jew l-Artikolu 6 f’kull każ fejn l-Istat Membru jkun ġie magħżul bħala l-Istat Membru rapporteur jew l-Istat Membru ko-rapporteur.

2.   L-Istati Membri għandhom jistabbilixxu miżata speċifika għall-valutazzjoni tan-notifika.

3.   Għal dan il-għan, l-Istati Membri u l-Istati Membri ko-rapporteur għandhom:

(a)

jeħtieġu l-ħlas ta’ miżata li tikkorrispondi kemm jista’ jkun possibbli ma’ l-ispejjeż tagħhom fit-twettiq tal-proċeduri differenti kollha assoċjati mal-valutazzjoni għal kull sottomissjoni ta’ dossier, kemm jekk introdott minn notifikant wieħed jew kollettivament minn bosta notifikanti interessati.

(b)

jiżguraw li l-ammont tal-miżata huwa stabbilit b’manjiera trasparenti sabiex jikkorrispondi ma’ l-ispiża reali ta’ l-eżaminazzjoni u t-trattament amministrattiv ta’ notifika u ta’ dossier; madankollu, l-Istati Membri jistgħu jipprevedu skala ta’ ħlasijiet fissi msejsa fuq l-ispejjeż medja għall-kalkolu tal-miżata totali.

(ċ)

jiżguraw li l-miżata hija riċevuta skond l-istruzzjonijiet mogħtija mill-awtorità f’kull Stat Membru elenkat fl-Anness II u li d-dħul mill-miżata huwa użat għall-iffinanzjar esklussiv ta’ l-ispejjeż mġarrba mill-Istat Membru rapporteur u mill-Istat Membru ko-rapporteur għall-valutazzjoni u t-trattament amministrattiv tan-notifiki u d-dossiers li għalihom dak l-Istat Membru huwa rapporteur jew ko-rapporteur jew sabiex jiffinanzja l-azzjonijiet ġenerali għall-implimentazzjoni ta’ l-obbligi tiegħu bħala Stat Membru rapporteur jew Stat Membru ko-rapporteur.

Artikolu 16

Ħlasijiet, taxxi jew miżati oħrajn

L-Artikolu 15 huwa mingħajr preġudizzju għad-drittijiet ta’ l-Istati Membri li jżommu jew jintroduċu, skond it-Trattat, ħlasijiet, taxxi jew miżati fir-rigward ta’ l-awtorizzazzjoni, it-tqegħid fis-suq, l-użu u l-kontroll ta’ sustanzi attivi u prodotti għall-ħarsien tal-pjanti għajr għall-miżata prevista fl-Artikolu 15.

Artikolu 17

Id-dħul fis-seħħ

Dan ir-Regolament għandu jidħol fis-seħħ fis-seba’ jum wara dak tal-pubblikazzjoni tiegħu fil-Ġurnal Uffiċjali ta’ l-Unjoni Ewropea.

---

(1)  ĠU L 230, 19.8.1991, p. 1. Id-Direttiva kif emendata l-aħħar bid-Deċiżjoni tal-Kummissjoni 2007/31/KE (ĠU L 140, 1.6.2007, p. 44).

(2)  ĠU L 33, 8.2.1979, p. 36.

---

---

---

---

---