22.11.2008   

MT

Il-Ġurnal Uffiċjali ta’ l-Unjoni Ewropea

19

(1)

Ir-Regolament tal-Kummissjoni (KEE) Nru 1538/91 (2) stabbilixxa regoli dwar l-applikazzjoni tar-Regolament (KEE) Nru 1906/90.

(2)

Sabiex il-konsumatur jiġi protett minn dikjarazzjonijiet li jistgħu jsiru bl-intenzjoni qarrieqa li jġibu prezz ogħla minn dawk il-prezzijiet applikabbli għal-laħam tat-tjur imrobbi b'mod “standard”, l-Artikolu 10 tar-Regolament (KEE) Nru 1538/91 jinnumera b'mod eżawrjenti d-denominazzjonijiet relattivi għall-metodu ta' trobbija. Barra minn hekk l-Anness IV għar-Regolament imsemmi jeħtieġ li l-indikazzjoni tal-metodu tat-trobbija tkun soġġetta għal kriterji speċifiċi.

(3)

Fost il-kriterji speċifiċi li jiddefenixxu l-kundizzjonijiet li bihom il-laħam tat-tjur jista' jiġi kkummerċjalizzat bid-denominazzjonijiet “Imrobbija b'aċċess għall-beraħ” (“Free-range”), “Imrobbija b'aċċess tradizzjonali għall-beraħ” (“Free-range tradizzjonali”) u “Imrobbija b'aċċess tradizzjonali għall-beraħ bla limitu” (“Free-range — libertà totali”), huwa essenzjali li t-tjur ikollhom aċċess għal ħruġ fil-beraħ għal ċertu perjodu matul il-ħajja tal-annimal.

(4)

Restrizzjonijiet, inkluż restrizzjonijiet veterinarji, adottati abbażi tal-leġiżlazzjoni Komunitarja biex titħares is-saħħa pubblika u tal-annimali, jistgħu jillimitaw l-aċċess għaċ-ċirkolazzjoni ħielsa tat-tjur.

(5)

Fejn il-produtturi ma jkunux jistgħu jibqgħu jissodisfaw il-kundizzjonijiet kollha tat-trobbija stipulati fl-Anness IV tar-Regolament (KEE) Nru 1538/91, dawn għandhom, fl-interess tal-konsumatur, jieqfu milli jużaw it-tikkettar fakultattiv dwar il-metodu tat-trobbija.

(6)

Sabiex jitqiesu l-konsegwenzi ekonomiċi possibbli li jista' jkollhom tali restrizzjonijiet temporanji, li mhumiex fil-kontroll tal-produtturi, billi s-settur kollu jeħtieġ perjodu raġonevoli ta' aġġustament, partikolarment fir-rigward tat-tikkettar, u sakemm il-kwalità tal-prodott ma tiġix influwenzata sostanzjalment, għandu jkun previst perjodu ta' tranżizzjoni li matulu l-produtturi jkunu jistgħu jkomplu bit-tikkettar dwar il-metodu tat-trobbija.

(7)

Fl-interess tal-konsumatur, l-applikazzjoni ta' din id-deroga għandha tkun għal żmien limitat.

(8)

Derogi speċifiċi mid-definizzjonijiet tal-metodi differenti tat-trobbija huma neċessarji.

(9)

Għalhekk ir-Regolament (KEE) Nru 1538/91 għandu jiġi emendat skont dan.

(10)

Il-miżuri stipulati f'dan ir-Regolament huma konformi mal-opinjoni tal-Kumitat ta' Ġestjoni għal-Laħam tat-Tjur u l-Bajd,

1)

Il-frażi introduttorja segwenti tiddaħħal wara t-titolu “Anness IV”:

“Il-kundizzjonijiet previsti fl-Artikolu 10 huma kif ġej:”;

2)

Jiżdied is-subparagrafu li ġej:

“F’każ ta’ restrizzjoni, inkluż f’każ ta’ restrizzjoni veterinarja, meħuda abbażi tad-dritt Komunitarju sabiex titħares is-saħħa pubblika u tal-annimali, bil-għan li jiġi ristrett l-aċċess tat-tjur għaċ-ċirkolazzjoni ħielsa, it-tjur imrobbija skont il-modi tal-produzzjoni deskritti fl-ewwel inċiż, punti c), d) u e), minbarra l-fargħuni mrobbija fil-guvi, jistgħu jkomplu jitqiegħdu fis-suq b’referenza partikolari għall-mod tat-trobbija tul ir-restrizzjoni veterinarja iżda fl-ebda każ lil hinn minn tnax-il xahar.”