(1)

Skond l-Artikolu 27(1) tad-Direttiva 77/388/KEE, il-Kunsill, li jaġixxi b’mod unanimu fuq proposta mill-Kummissjoni, jista’ jawtorizza kwalunkwe Stat Membru sabiex jintroduċi jew jestendi miżuri speċjali derogatorji minn dik id-Direttiva, sabiex tiġi simplifikata l-proċedura li biha tintalab it-taxxa jew biex jiġu prevenuti ċerti tipi ta’ evażjoni jew evitar tat-taxxa.

(2)

Bid-Deċiżjonijiet 95/252/KE (2) u 98/198/KE (3), il-Kunsill awtorizza lir-Renju Unit japplika miżura derogatorja mill-Artikoli 6 u 17 tad-Direttiva 77/388/KEE.

(3)

B’ittra reġistrata għand is-Segretarjat-Ġenerali tal-Kummissjoni fl-14 ta' Ġunju 2004, u sussegwentement ċirkolata ma' l-Istati Membri kollha fis-7 ta' Lulju 2004, il-Gvern tar-Renju Unit talab estensjoni tad-deroga msemmija hawn fuq.

(4)

Id-deroga li għadha valida tippermetti lir-Renju Unit inaqqas għal 50 % d-dritt tal-kerrej jew l-inkwilin għat-tnaqqis tat-taxxa tad-dħul mill-ħlasijiet għall-kera jew tal-lokazzjoni ta' vettura tal-passiġġieri tan-negozju fejn il-vettura hija użata wkoll għal skopijiet privati. Tippermetti wkoll lir-Renju Unit ma jittrattax bħala fornimenti ta' servizzi għal konsiderazzjoni l-użu privat ta' vettura mikrija jew meħudha b'lokazzjoni minn persuna taxxabbli għal skopijiet ta' negozju. Id-deroga tneħħi l-ħtieġa għall-kerrej/inkwilin li jżomm reġistrazzjonijiet dwar il-kilometraġġ privat li jkun twettaq bil-karozzi tan-negozju u biex jiddikkjara t-taxxa fuq il-kilometraġġ attwali ta' kull vettura. Hija għalhekk miżura ta' simplifikazzjoni iżda tillimita wkoll l-ambitu għal abbuż permezz ta' żamma ta' reġistrazzjonijiet mhux korretta.

(5)

Iċ-ċirkostanzi legali u fattwali li ġġustifikaw l-għoti ta' awtorizzazzjoni għall-applikazzjoni tad-deroga oriġinali ma tbiddlux u għadhom għalhekk rilevanti.

(6)

Fid-dawl ta' proposti tal-Kummissjoni għal emenda tad-Direttiva 77/388/KEE fir-rigward ta' restrizzjonijiet fuq id-dritt ta' tnaqqis tal-VAT, huwa xieraq li jiġi estiż il-perijodu ta' l-awtorizzazzjoni sakemm tali emendi relevanti jidħlu fis-seħħ. Madankollu, din l-awtorizzazzjoni ser tiskadi, sa l-aktar tard, fil-31 ta' Diċembru 2007 jekk l-ebda tali emendi ma jkunu daħlu fis-seħħ sa dik id-data, waqt li valutazzjoni tal-ħtieġa derogatorja tkun tista' ssir f'dak il-mument fid-dawl tad-diskussjonijiet ulterjuri tal-proposti li jkunu saru fil-Kunsill.

(7)

Estensjoni mhi ser ikollha l-ebda impatt fuq ir-riżorzi proprji tal-Komunitajiet Ewropej li jinġemgħu mit-taxxa fuq il-valur miżjud,