30.5.2006   

MT

Il-Ġurnal Uffiċjali ta’ l-Unjoni Ewropea

123

(1)

Skond ir-Regolament tal-Kunsill (KE) Nru 974/98 tat-3 ta' Mejju 1998 dwar l-introduzzjoni tal-Euro (1), l-Euro ħa post il-munita ta' kull Stat Membru parteċipanti mill-1 ta' Jannar 1999.

(2)

Il-Komunità għandha l-kompetenza, mill-istess data, f'temi monetarji u f'sistema ta' kambju fl-Istati Membri li qed jadottaw l-Euro.

(3)

Il-Kunsill huwa responsabbli biex jiddetermina l-arranġamenti għan-negozjar u l-konklużjoni ta' ftehim dwar temi monetarji u sistemi ta' kambju.

(4)

Il-Komunità kkonkludiet ftehim monetarji ma' Monaco (2), il-Belt tal-Vatikan (3) u San Marino (4). Dawn il-pajjiżi kienu kkonkludew aktar kmieni ftehim monetarju ma' Franza jew ma' l-Italja, qabel l-introduzzjoni ta' l-Euro.

(5)

Il-Prinċipalità ta' Andorra (“Andorra”) m'għandhiex munita uffiċjali, u lanqas ma kkonkludiet ftehim monetarju ma' xi Stat Membru jew pajjiż terz. Muniti u flus tal-karti Spanjoli u Franċiżi kienu jintużaw oriġinarjament de facto f'Andorra, u kienu sostituti minn flus tal-karti u muniti Euro mill-1 ta' Jannar 2002.

(6)

Andorra talbet formalment fil-15 ta' Lulju 2003 il-konklużjoni ta' ftehim monetarju mal-Komunità.

(7)

Minħabba ir-relazzjonijiet ekonomiċi mill-qrib bejn Andorra u l-Komunità, huwa xieraq li l-ftehim bejn il-Komunità u Andorra għandu jinkludi disposizzjonijiet dwar flus tal-karti u muniti Euro, l-istatus legali ta' l-Euro f'Andorra, kif ukoll l-aċċess għal sistemi ta' ħlas f'żona ta' l-Euro. Peress li l-Euro diġà jintuża f'Andorra, għandu jiġi miftiehem li Andorra għandha tuża l-Euro bħalha l-munita uffiċjali tagħha u li hi ser tagħti status tal-valuta legali lill-flus tal-karti u muniti Euro maħruġa mis-Sistema Ewropea tal-Banek Ċentrali u l-Istati Membri li adottaw l-Euro.

(8)

Li l-Euro jsir il-munita uffiċjali ta' Andorra ma toħolqilha l-ebda dritt li toħroġ flus tal-karti u muniti, kemm jekk denominati f'Euro kif ukoll f'denominazzjoni oħra, jew li toħroġ sostituti tal-flus, sakemm il-ftehim monetarju ma jkunx fih dispożizzjonijiet espliċiti b'dan l-effett. Andorra bħalissa toħroġ muniti għall-kollezzjoni denominati f'diner u l-possibbiltà li titkompla din il-prassi ser tiġi eżaminata.

(9)

Huwa importanti li Andorra tiggarantixxi li regoli tal-Komunità dwar flus tal-karti u muniti denominati f'Euro japplikaw f'Andorra. Flus tal-karti u muniti Euro għandhom bżonn protezzjoni adattata kontra frodi u falsifikazzjoni. Huwa wkoll importanti li Andorra tieħu l-miżuri kollha neċessarji u għandha tikkoopera mal-Komunità f'dan il-kamp.

(10)

Andorra għandha tieħu r-reponsabbiltà li timplimenta l-mizuri rilevanti kollha li jifformaw parti mill-qafas tal-Komunità dwar regolamenti bankarji u finanzjarji, li jinkludu prevenzjoni ta' ħasil tal-flus, il-prevenzjoni ta' frodi u falsifikazzjoni ta' mezzi ta' ħlas mingħajr l-użu tal-flus u ħtiġijiet għal rappurtar ta' l-istatistiċi. L-applikazzjoni ta' miżuri bħal dawn ser jikkontribwixxu inter alia biex jiġu stabbiliti kondizzjonijiet komparabbli u ġusti bejn istituzzjonijiet finanzjarji li jinsabu f'żona ta' l-Euro u dawk li jinsabu f'Andorra.

(11)

Il-Bank Ċentrali Ewropew u l-banek ċentrali nazzjonali jistgħu jagħmlu kull tip ta' tranżazzjoni bankarja li jikkonċernaw istituzzjonijiet finanzjarji li jinsabu f'pajjiżi terzi. Il-Bank Ċentrali Ewropew u l-banek ċentrali nazzjonali jistgħu, b'kondizzjonijiet adattati, jagħtu aċċess lill-istituzzjonijiet finanzjarji f'pajjiżi terzi għas-sistemi ta' ħlas tagħhom. Ftehim bejn il-Komunità u Andorra m'għandux jimponi xi obbligi fuq il-Bank Ċentrali Ewropew jew fuq kwalunkwe bank ċentrali nazzjonali.

(12)

Il-Kummissjoni għandha tingħata s-setgħa li tmexxi n-negozjati ma' Andorra. Il-pajjiżi ġirien ta' Andorra, Spanja u Franza, għandhom jieħdu sehem attiv fin-negozjati, u l-Bank Ċentrali Ewropew għandu jieħu sehem attiv fil-kamp ta' kompetenza tiegħu.

(13)

Din id-Deċiżjoni tkopri biss il-ftehim li ser jiġi stabbilit bejn Andorra u l-Komunità dwar temi monetarji, b'esklużjoni ta' temi oħra li jeħtieġu jsiru bi ftehim separat. Andorra ġiet mistiedna biex taqbel ma' miżuri ekwivalenti f'ċertu oqsma, b'mod partikolari dwar it-tassazzjoni tad-dħul minn savings. Il-Kunsill ser jeżamina, fid-dawl tal-progress li sar fuq in-negozjar u l-bidu ta' ftehim tat-taxxa tas-savings, u abbażi ta' rakkomandazzjoni mill-Kummissjoni, jekk il-kondizzjonijiet neċessarji ġewx mwettqa għall-ftuħ ta' negozjati dwar ftehim monetarju.

(14)

Il-Kummisjoni għandha tissottometti l-abbozz tal-ftehim lill-Kumitat Ekonomiku u Finanzjarju għall-opinjoni tiegħu. L-abbozz tal-ftehim għandu jkun ukoll sottomess lill-Kunsill jekk Spanja u Franza, jew il-Bank Ċentrali Ewropew, jew il-Kumitat Ekonomiku u Finanzjarju, huma ta' l-opinjoni li dan huwa neċessarju,