32003D0100

Id-Deċiżjoni tal-Kummissjoni

Tat-13 ta' Frar 2003

li tippreskrivi r-rekwiżiti minimi għall-istabbiliment ta' programmi ta' tnissil għar-reżistenza għall-enċefalopatiji sponġiformi trasmissibbli fin-nagħaġ

(innotifikata taħt id-dokument numru K(2003) 498)

(Test b'rilevanza għaż-ŻEE)

(2003/100/KE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament (KE) Nru 999/2001 tal-Parlament Ewropew u tal-Kunsill tat-22 ta' Mejju 2001 li jippreskrivi regoli għall-prevenzjoni, kontroll u qerda ta' ċerti enċefalopatiji sponġiformi trasmissibbli [1], kif l-aħħar emendat bir-Regolament tal-Kummissjoni (KE) Nru 1494/2002 [2], u b'md partikolari l-Artikolu 23 tiegħu,

Billi:

(1) Scrapie (Ħakk?) toħloq problema kbira ta' saħħa ta' l-annimali fil-populazzjoni ovina u kaprina tal-Komunità.

(2) M'hemmx metodu dijanjostiku ta' rutina legalment validu biex issir distinzjoni bejn l-enċefalopatija sponġiformi Bovina (ta' l-ifrat) (BSE) u l-infezzjoni ta' scrapie f'annimali ovini u kaprini. L-infezzjoni BSE ma kenitx ippruvata li teżisti f'annimali ovini u kaprini taħt kondizzjonijiet naturali. Madankollu, hemm xi inċertezza jekk BSE setgħetx tinfetta l-populazzjoni ovina u kaprina u tistax għadha preżenti f'dik il-popOlazzjoni. Għalhekk infezzjonjiet minn enċefalopatija sponġiformi trasmessibbli (EST) f'annimali ovini u kaprini joħolqu wkoll riskju potenzJali għas-saħħa pubblika.

(3) Ir-riċerka wriet li ċerti ġenotipi ta' proteina ta' prion jagħtu reżistenza għal scrapie. L-evidenza sa llum tindika li reżistenza għal BSE ddeterminata ġenetikament b'mod simili teżisti fin-nagħaġ meta mogħtija oralment l-infezzjoni BSE taħt kondizzjonijiet sperimentali.

(4) L-opinjoni tal-Kumitat Xjentfiku Direttiv (KXD) ta' l-4 u 5 ta' April 2002 dwar sigurezza ta' sorsi ta' materjali għal ruminanti żgħar ippreskriviet linji gwida għall-punti prinċipali ta' tnissil għal reżistenza għall-EST f''nagħaġ. Il-KXD iqis li programm tali għandu jkun immirat lejn popolazzjonijiet f'riskju jew f'żoni ta' riskju.

(5) Rekwiżit wieħed għall-programm ta' tnissil tali huwa approssimazzjoni tal-frekwenza ta' nagħaġ ARR/ARR għal kull nisel importanti. Biex tinkiseb din l-informazzjoni, id-Deċiżjoni tal-Kummissjoni 2002/1003/KE [3] introduċiet survey tan-nisel tan-nagħaġ fl-Istati Membri.

(6) Għandu jkun possibbli li ssir deroga mir-rekwiżit li jkun stabbilit programm ta' tnissil skond din id-Deċiżjoni għal ċerti nisel b'livell naturali baxx ta' reżistenza u għal nisel lokali indiġenu għaż-żona u f'periklu li jintilef għall-biedja kif jirreferi għalihom ir-Regolament (KE) Nru 445/2002 tas-26 ta' Frar 2002 li jippreskrivi regoli dettaljati għall-applkikazzjoni tar-Regolament tal-Kunsill (KE) Nru 1257/1999 dwar l-appoġġ għall-iżvilupp rurali mill-Fond Agrikolu Ewropew dwar Gwida u Garanzija (FAEGG) [4].

(7) Fl-opinjoni tiegħu, il-KXD irrakkomanda l-istabbiliment taċ-ċertifikazzjoni ta' merħliet b'riskju negliġibbli ta' scrapie/BSE. Waħda mill-għażliet irrakkomandati hija ċ-ċertifikazzjoni ta' merħliet ibbażata fuq reżistenza ġenetika sħiħa għall-ESTi flimkien ma' ttestjar regolari għall-EST.

(8) Il-KXD irrakkomanda lista komprensiva ta' tessuti f'annima ovini u kaprini li jistgħu jitqiesu li joħolqu riskju għas-saħħa umana u ta' l-annimali fil-każ li BSE tkun ikkonfermata jew meqjusa probabbli. Madankollu, l-opinjoni qieset li dawn it-tessuti m'għandhomx joħolqu riskju sinifikanti meta jkun dderivati minn annimali reżistenti u semi-reżistenti taħt l-età ta' 18 u 6 xhur rispettivament. Huwa xieraq li jkun promoss l-iżvilupp ta' merħliet iċċertifikati skond dawn il-linji.

(9) Il-Kummissjoni għandha tipproponi lill-Kunsill u l-Parlament emenda għar-Regolament (KE) Nru 999/2001 biex jipprovdi bażi legali f'dak ir-Regolament għall-miżuri kkontenuti f'din id-Deċiżjoni. Sadanittant, huwa xieraq li tkun adottata din id-Deċiżjoni bħala miżura transizzjonali.

(10) Il-miżuri li tipprovdi għalihom din id-Deċiżjoni huma skond l-opinjoni tal-Kumitat Permanenti dwar il-Katina ta' l-Ikel u s-Saħħa ta' l-Annimali,

ADOTTAT DIN ID-DEĊIŻJONI:

Artikolu 1

Definizzjonijiet

Għall-finijiet ta' din id-Deċiżjoni id-definizjonijiet miġjuba fl-Anness I mad-Deċiżjoni tal-Kummissjoni 2002/1003/KE għandhom japplikaw.

Artikolu 2

Programm ta' tnissil għal reżistenza għall-EST f'nagħaġ ta' razza pura

1. Sa l-1 ta' Jannar 2004, fuq il-bażi tar-riżultat tas-survey li tipprovdi għalih id-Deċiżjoni 2002/1003/KE, kull Stat Membru għandu jintroduċi programm ta' tnissil biex jagħżel għal reżistenza għall-ESTi f'kull waħda min-nagħaġ tiegħu razez li huma nattivi, jew li jifformaw populazzjoni sinifikanti fit-territorju tiegħu. Ir-rekwiżiti minimi għal programm tali għandhom ikunu dawk miġjuba fl-Anness I.

2. L-Istat Membru jista' jiddeċiedi li partiċipazzjoni minn sidien l-imrieħel fil-programmi ta' tnissil li jirreferi għalihom il-paragrafu 1 għandha tkun volontarja sa l-1 April 2005. Madankollu, wara dik id-data, għandha tkun ħaġa obbligatorja għall-imrieħel kollha ta' mertu ġenetiku għoli li jipparteċipaw fil-programm ta' tnissil.

Artikolu 3

Derogi

1. Stati Membri jistgħu jingħataw deroga mir-rekwiżit li jistabbilixxu programm ta' tnissil kif ipprovdut fl-Artikolu 2:

- fuq il-bażi ta' programm nazzjonali ta' kontroll ta' scrapie ssottomess u approvat skond il-punt (b) tal-Parti I tal-Kapitolu A ta' l-Anness VIII għar-Regolament (KE) Nru 999/2001, li jinkludi mmonitorjar attiv kontinwu ta' annimali ovini u kaprini li jmutu fir-razzett fl-imrieħel kollha fl-Istat Membru, jew

- meta l-Kummissjoni tkun irrikonoxxiet li t-territorju tagħha bħala liberu minn scrapie skond il-punt (ċ) tal-Parti I tal-Kapitolu A ta' l-Anness VIII mar-Regolament (KE) Nru 999/2001, ibbażat fuq survey statistika konklużiva.

2. Id-deroga li jipprovdi għaliha l-paragrafu 1 għandha tkun adottata skond il-proċedura li jirreferi għaliha l-Artikolu 24(2) tar-Regolament (KE) Nru 999/2001.

Artikolu 4

Qafas biex ikun irrikonoxxut l-istatus ta' reżistenti għall-EST ta' ċerti mrieħel ta' nagħaġ

1. Sa l-1 ta' Jannar 2004, kull Stat Membru għandu jistabbilixxi qafas għar-rikonoxximent ta' l-istatus ta' reżistenti għall-EST ta' ċerti mrieħel ta' nagħaġ.

Dan il-qafas għandu jsegwi l-kriterji miġjuba fl-Anness II.

2. Ir-rikonoxximent ta' l-istatus ta' reżistenti għall-EST ta' merħla taħt il-qafas li jipprovdi għalih il-paragrafu 1 m'għandux jitqies bħala kriterju meħtieġ biex tkun eskluża l-preżenza ta' EST f'dik il-merħla.

Artikolu 5

Rapporti li għandhom ikunu pprovduti lill-Kummissjoni mill-Istati Membri

Stati Membri għandhom jipprovdu lill-Kummissjoni r-rapporti li ġejjin:

(a) rapport dwar ir-rekwiżiti għall-programmi ta' tnissil tagħhom kif ipprovdut fl-Artikolu 2 sa l-1 ta' April 2004;

(b) rapport annwali tal-progress għandu jkun ipprovdut għall-ewwel darba sa l-1 ta' April 2005, tal-progress li sar fil-programmi ta' tnissil.

Artikolu 6

Sommarju tar-rapporti mill-Kummissjoni lill-Istati Membri

Il-Kummmissjoni għandha tippreżenta lill-Istati Membri sommarju tar-rapporti li tirċievi taħt l-Artikolu 5, fi żmien tliet xhur mit-terminu ta' żmien għall-irċevuta tar-rapporti.

Artikolu 7

Reviżjoni

Ir-rekwiżiti ta' din id-Deċiżjoni għandhom ikunu rriveduti:

(a) fuq il-bażi tar-rapporti li jirreferi għalihom l-Artikolu 5,

(b) fir-rigward ta' razez li dwarhom intwera effett ġeneriku negattiv serju matul il-kors tal-programm ta' tnissil,

(ċ) f'kull każ qabel l-1 ta' April 2005, biex tittieħed konsiderazzjoni ta' kull parir xjentifiku ġdid.

Artikolu 8

Destinatarji

Dan id-Deċiżjoni hija indirizzata lill-Istati Membri.

Magħmula fi Brussel, fit-13 ta' Frar 2003.

Għall-Kummissjoni

David Byrne

Membru tal-Kummissjoni

[1] ĠU L 147, tal-31.5.2001, pġ. 1.

[2] ĠU L 225, tat-28.8.2002, pġ. 3.

[3] ĠU L 349, ta’ l-24.12.2002, pġ. 105.

[4] ĠU L 74, tal-15.3.2002, pġ. 1.

--------------------------------------------------

ANNESS I

REKWIŻITI MINIMI GĦAL PROGRAMM TA' TNISSIL GĦAL REŻISTENZA GĦALL-EST F'NAGĦAĠ

Parti 1 – Rekwiżiti ġenerali

1. Il-programm ta' tnissil għandu jikkonċentra fuq merħliet ta' mertu ġenetiku għoli.

2. Għandha tkun stabbilita database li jkun fiha għall-inqas l-informazzjoni li ġejja:

(a) l-identità, nisel u numru ta' l-annimali fl-imrieħel kollha li jipparteċipaw fil-programm ta' tnissil;

(b) l-identifikazzjoni ta' l-annimali indiviwali li servew ta' kampjun taħt il-programm ta' tnissil;

(ċ) ir-riżultati ta' kull test għal ġenotip.

3. Għandha tkun stabbilita sistema ta' ċertifikazzjoni uniformi li biha l-ġenotip ta' kull annimal li serva ta' kampjun taħt il-programm ta' tnissil ikun iċċertifkat b'referenza għan-numru ta' identifikazzjoni individwali tiegħu.

4. Teħid ta' kampjuni għandu jitwettaq minn personal maħtur speċifikament għal dan il-għan taħt il-programm ta' tnissil.

5. Għandhom ikunu stabbiliti sistema ta' identifikazzjoni ta' annimali u kampjuni, l-ipproċċessar ta' kampjuni u l-ħruġ tar-riżultati li timminizza l-possibbiltà ta' żball uman. L-effiċjenza ta' din is-sistema għandha tkun suġġett għall-kontroll regolari bl-addoċċ.

6. Id-determinazzjoni tal-ġenotip tad-demm u tessuti oħra miġbura għall-għanijiet tal-programm ta' tnissil għandha titwettaq f'laboratorji li kienu approvati taħt l-iskema.

7. L-awtorità kompetenti ta' l-Istat Membru tista' tassisti soċjetajiet ta' razez li jixtiequ jagħmlu hekk, jistabbilixxu banek ġenetiċi li jikkonsistu f'semen, ova u/jew embriji rappreżentanti ta' ġenotipi ta' proteina prion li aktarx isiru rari b'riżultat tal-programm ta' tnissil.

8. Programmi ta' tnissil għandhom jinkitbu għal kull razza, filwaqt li jitqiesu:

(a) il-frekwenzi ta' l-alleli differenti ġewwa r-razza;

(b) rarita tar-razza;

(ċ) evitar ta' tnissil fl-istess familja jew drift ġenetiku.

Part 2 – Regoli speċifiċi għal imrieħel li jipparteċipaw

1. Il-programm ta' tnissil għandu jkun immirat lejn żieda tal-frekwenza ta' l-allel ARR fil-merħla tan-nagħaġ, filwaqt li titnaqqas il-prevalenza ta' dawk l-alleli li jkunu ntwerew li kkontribwixxew għas-suxxettibilità għall-ESTi.

2. r-regoli minimi għall-imrieħel li jipparteċipaw għandhom:

(a) l-annimali kollha fil-merħla li se jkunu ġenotipati għandhom ikunu individwalment identifikati bl-użu ta' mezzi siguri;

(b) għandu jkun obbligatorju għall-imtaten kollha maħsuba għat-tnissil fil-merħla li jkunu ġenotipati qabel jintużaw għat-tnissil;

(ċ) għandu jkun obbligatorju li jkun ibbiċċerjat jew ikkastrat (jissewwa), fi żmien sitt xur wara d-determinazzjoni tal-ġenotip tiegħu, kull annimal raġel li jġorr l-allel VRQ; kull annimali tali m'għandux iħalli l-azjenda ħlief għal-biċċerija;

(d) għandu jkun ipprojbit għal annimali nisa li jkunu magħrufa li jġorru l-allel VRQ iħallu l-azjenda ħlief għall-biċċerija;

(e) għandu jkun ipprojbit għall-annimali rġiel, inklużi donaturi ta' semen użat għall-inseminazzjoni artifiċjali, barra minn dawk iċċertifikati taħt il-programm, li jintużaw għat-tnissil fil-merħla.

Parti 3 – Protezzjoni ta' razez u karatteristiċi tal-produzzjoni

1. Stati Membri jistgħu jiddeċiedu jagħtu deroga mir-rekwiżiti tal-punt 2(ċ) u (d) tal-Parti 2, fil-każ ta' razez:

(a) li juru livell ta' l-allel ARR taħt il-25 % fis-survey li tirreferi għalih id-Deċiżjoni 2002/1003/KE; or

(b) li huma fil-periklu li jintilfu għal biedja, kif jirreferi għalihom l-Artikolu 14(1)(a) tar-Regolament (KE) Nru 445/2002.

2. Fil-każ ta' razez li juru assenza, jew livell ta' inqas minn 10 %, ta' l-allel ARR fis-survey li tirreferi għalih id-Deċiżjoni tal-Kummissjoni 2002/1003/KE, Stati Membri jistgħu jiddeċiedu jagħtu deroga mill-Partijiet 1 u 2, suġġetta għall-kondizzjoni li razez tali ikunu suġġetti għall-programmi ta' kontroll ta' scrapie.

3. Stati Membri għandhom jgħarrfu lill-Kummissjoni bid-derogi mogħtija taħt il-punti 1 u 2 u bil-kriterji użati.

--------------------------------------------------

ANNESS II

IL-QAFAS GĦAR-RIKONOXXIMENT TA' L-ISTATUS TA' REŻISTENTI GĦALL-EST TA' MRIEĦEL TA' NAGĦAĠ

1. Il-qafas għandu jirrikonoxxi l-istatus ta' reżistenti għall-EST ta' mrieħel ta' nagħaġ li, kemm bħala riżultat tal-parteċipazzjoni fil-programm ta' tnissil kif jipprovdi l-Artikolu 2 kif ukoll mod ieħor, jissodisfaw ċerti kriterji.

Dan ir-rikonoxximent għandu jingħata għall-inqas fuq żewġ livelli:

(a) imrieħel tal-livell I għandhom ikunu mrieħel magħmula kollha kemm huma tal-ġenotip ARR/ARR;

(b) imrieħel tal-livell II għandhom ikunu mrieħel li d-dixxendenti tagħhom ikunu tgħammru esklussivament minn imtaten tal-ġenotip ARR/ARR.

Stati Membri jistgħu jiddeċiedu jagħtu rikonoxximent lil-livelli oħra li jixirqu r-rekwiżiti nazzjonali.

2. Għandu jitwettaq teħid ta' kampjuni bl-addoċċ ta' nagħaġ minn imrieħel reżistenti għall-EST:

(a) jew fir-razzet jew fil-biċċerija biex ikun ivverifikat il-ġenotip tagħhom;

(b) fil-każ ta' mrieħel tal-livell I, f'annimali ta' età ta' 'l fuq minn 18-il xahar fil-biċċerija, għal ittestjar għall-EST skond l-Anness III mar-Regolament (KE) Nru 999/2001.

--------------------------------------------------