(1)

Id-Direttiva 2009/48/KE tistabbilixxi ċertu rekwiżiti għal sustanzi kimiċi li huma kklassifikati bħala karċinoġeniċi, mutaġeniċi jew tossiċi għar-riproduzzjoni skont ir-Regolament (KE) Nru 1272/2008 tal-Parlament Ewropew u tal-Kunsill (2). L-Appendiċi C tal-Anness II tad-Direttiva jistipula l-valuri ta’ limitu speċifiċi għas-sustanzi kimiċi użati f’ġugarelli maħsuba biex jintużaw minn tfal ta’ taħt is-36 xahar jew f’ġugarelli oħra maħsuba biex jitqiegħdu fil-ħalq.

(2)

Il-formaldeid (in-numru CAS 50-00-0) bħalissa mhuwiex elenkat fl-Appendiċi C tal-Anness II tad-Direttiva 2009/48/KE. Huwa kklassifikat bħala kategorija karċinoġenika 1B skont ir-Regolament (KE) Nru 1272/2008. Skont il-punt 4(a) tal-Parti III tal-Anness II tad-Direttiva 2009/48/KE, il-formaldeid jista’ jintuża sa konċentrazzjoni ta’ 0,1 %, li tikkorrispondi għal 1 000 mg/kg (il-limitu ta’ kontenut).

(3)

Sabiex jagħtiha pariri fit-tħejjija tal-proposti leġiżlattivi u tal-inizjattivi tal-politika fil-qasam tas-sikurezza tal-ġugarelli, il-Kummissjoni stabbiliet il-Grupp ta’ Esperti dwar is-Sikurezza tal-Ġugarelli (3). Il-missjoni tas-sottogrupp tiegħu, il-Grupp ta’ Ħidma dwar is-Sustanzi Kimiċi fil-Ġugarelli, (is-sottogrupp Sustanzi Kimiċi), hija li jagħti pariri lill-Grupp ta’ Esperti dwar is-Sikurezza tal-Ġugarelli fir-rigward tas-sustanzi kimiċi li jistgħu jintużaw fil-ġugarelli.

(4)

Il-formaldeid jintuża bħala monomeru fil-manifattura ta’ materjali polimeriċi. Il-materjali polimeriċi jintużaw ta’ spiss fil-ġugarelli. Għalhekk, it-tfal jistgħu jibilgħu l-formaldeid meta jpoġġu f’ħalqhom ġugarelli li fihom materjali polimeriċi. Id-doża tollerabbli ta’ kuljum (TDI) għall-formaldeid ġiet stabbilita mill-Organizzazzjoni Dinjija tas-Saħħa (WHO) (4) u ġiet ikkonfermata mill-Bord dwar l-Addittivi fl-Ikel, Togħmiet, Għajnuna ta’ Pproċessar u Materjali li jiġu f’Kuntatt mal-Ikel (AFC) tal-Awtorità Ewropea dwar is-Sigurtà fl-Ikel (5). It-TDI hija 0,15 mg/kg piż tal-ġisem kuljum. Għaldaqstant, b’allokazzjoni ta’ 10 % tat-TDI għad-doża ta’ formaldeid fil-ġugarelli (6) , jenħtieġ li t-tfal b’piż tal-ġisem ta’ 10 kg ma jieħdux aktar minn 0,15 mg ta’ formaldeid kuljum. Filwaqt li assuma li l-inġestjoni ta’ kuljum hija ta’ 100 ml ta’ saliva, is-sottogrupp “Sustanzi Kimiċi”, fil-laqgħa tiegħu tas-26 ta’ Settembru 2017 (7), irrakkomanda limitu ta’ migrazzjoni tal-formaldeid ta’ 1,5 mg/l f’materjali polimeriċi meta l-migrazzjoni tal-formaldeid tiġi ddeterminata skont il-metodu ta’ ttestjar fl-istandards EN 71-10:2005 (8) u EN 71-11:2005 (9).

(5)

Il-formaldeid jintuża wkoll fil-manifattura ta’ prodotti tal-injam illegat bir-reżina bħalma huma l-bord tal-partikuli, il-pannell b’filamenti orjentati (OSB), il-fajberbord ta’ densità għolja (HDF), il-fajberbord ta’ densità medja (MDF) u l-plywood. Ir-reżini tal-formaldeid jinkludu reżini tal-fenol-formaldeid (PF), tal-urea-formaldeid (UF), tal-melamina-formaldeid (MF) u tal-poliaċetal (poliossimetilen — POM). Il-POM għandu t-tendenza li jintuża biss għal komponenti interni żgħar u mhux f’ġugarelli sħaħ. Fil-laqgħa tiegħu tas-26 ta’ Settembru 2017, is-sottogrupp “Sustanzi Kimiċi” rrakkomanda limitu ta’ emissjonijiet ta’ formaldeid ta’ 0,1 ml/m3 meta l-emissjoni ta’ formaldeid tiġi ddeterminata f’tali materjali skont il-metodu tal-kompartiment tal-ittestjar fl-istandard EN 717-1:2004 (10). Dak il-limitu jikkorrispondi għall-valur tal-limitu tal-arja ta’ ġewwa li l-WHO stabbiliet biex tipprevjeni l-irritazzjoni sensorja fil-popolazzjoni ġenerali u biex tipprevjeni l-kanċer (11).

(6)

Il-formaldeid jista’ jkun preżenti wkoll f’materjal tessili tal-ġugarelli minħabba l-użu tiegħu fil-manifattura tat-tessuti. Skont rapport tal-Organizzazzjoni għall-Kooperazzjoni u l-Iżvilupp Ekonomiċi (OECD) ippubblikat fl-2002, l-aktar livell baxx ta’ konċentrazzjoni ta’ formaldeid għad-dermatite tal-kuntatt allerġika hija ta’ 30 mg/kg (12). Fuq dik il-bażi u sabiex jiġu protetti wkoll l-individwi l-aktar sensitizzati, fil-laqgħa tiegħu tas-26 ta’ Settembru 2017, is-sottogrupp “Sustanzi Kimiċi” irrakkomanda limitu tal-kontenut ta’ formaldeid ta’ 30 mg/kg meta l-kontenut tal-formaldeid jiġi ddeterminat skont il-metodu ta’ estrazzjoni tal-ilma fl-istandard EN ISO 14184-1:2011 (13).

(7)

Il-formaldeid jista’ jkun preżenti wkoll f’materjal tal-ġilda tal-ġugarelli minħabba l-użu tiegħu fil-manifattura tal-ġilda. Billi l-materjal tal-ġilda tal-ġugarelli jista’ jwassal għal esponiment simili għall-materjal tessili tal-ġugarelli, fil-laqgħa tiegħu tas-26 ta’ Settembru 2017, is-sottogrupp “Sustanzi Kimiċi” irrakkomanda limitu tal-kontenut ta’ formaldeid ta’ 30 mg/kg meta l-kontenut tal-formaldeid jiġi ddeterminat skont l-istandard EN ISO 17226-1:2008 (14).

(8)

Il-formaldeid f’materjal tal-karti tal-ġugarelli jenħtieġ li jkollu limitu tal-kontenut ta’ 30 mg/kg skont ir-rakkomandazzjoni tas-sottogrupp “Sustanzi Kimiċi” fil-laqgħa tiegħu tas-26 ta’ Settembru 2017, meta jkun iddeterminat skont il-metodu ta’ estrazzjoni tal-ilma fl-istandard EN 645:1993 (15) u fl-istandard EN 1541:2001 (16). Dik il-konklużjoni kienet ibbażata fuq il-kunsiderazzjoni li l-materjal tal-karti tal-ġugarelli jista’ jwassal għal esponiment simili għall-materjal tessili u tal-ġilda tal-ġugarelli.

(9)

Il-formaldeid jista’ jkun preżenti f’materjal b’bażi ta’ ilma tal-ġugarelli minħabba l-funzjoni tiegħu bħala preservattiv. Jista’ jintuża f’materjali b’bażi ta’ ilma tal-ġugarelli bħal bżieżaq tas-sapun jew linek f’pinen bil-ponta tal-feltru, kif ukoll f’materjali niexfa maħsuba biex jitħalltu mal-ilma qabel jintużaw. Fid-dawl tal-opinjoni tal-Kumitat Xjentifiku dwar r-Riskji għas-Saħħa u għall-Ambjent (SCHER) li jenħtieġ li ma jkunx hemm komposti CMR fil-ġugarelli (17), fil-laqgħa tiegħu tat-3 ta’ Mejju 2018 (18), is-sottogrupp “Sustanzi Kimiċi” irrakkomanda limitu tal-formaldeid ta’ 10 mg/kg f’materjal b’bażi ta’ ilma meta l-kontenut tal-formaldeid jiġi ddeterminat skont il-metodu ta’ ttestjar ippubblikat mid-Direttorat Ewropew għall-Kwalità tal-Mediċini u tal-Kura tas-Saħħa tal-Kunsill tal-Ewropa (il-metodu EDQM) dwar id-Determinazzjoni tal-formaldeid liberu fil-prodotti kożmetiċi (19). Il-limitu rrakkomandat huwa qrib il-valur l-aktar baxx li jista’ jiġi ddeterminat b’mod affidabbli bil-metodu EDQM u jqis it-traċċi ta’ formaldeid li jistgħu jiġu rrilaxxati minn ċerti preservattivi oħra.

(10)

Waqt il-laqgħa tiegħu tad-19 ta’ Diċembru 2017 (20), il-Grupp ta’ Esperti dwar is-Sikurezza tal-Ġugarelli ħa nota tar-rakkomandazzjonijiet tas-sottogrupp tiegħu “Sustanzi Kimiċi” rigward il-limiti għall-formaldeid f’materjali differenti tal-ġugarelli. Huwa esprima appoġġ u ssuġġerixxa bosta titjib biex jiġi kkunsidrat mill-Kummissjoni.

(11)

Skont l-Artikolu 46(2) tad-Direttiva 2009/48/KE, ir-rekwiżiti tal-imballaġġ għall-ikel kif stabbiliti fir-Regolament (KE) Nru 1935/2004 iridu jitqiesu meta jiġu adottati valuri ta’ limitu speċifiċi għas-sustanzi kimiċi fl-Appendiċi C ta’ dik id-Direttiva. Is-suppożizzjonijiet bażiċi wara l-limitu ta’ migrazzjoni speċifika għall-formaldeid bħala monomeru fil-materjal tal-plastik li jiġi f’kuntatt mal-ikel (21) huma, madankollu, differenti mis-suppożizzjonijiet bażiċi wara l-limitu ta’ migrazzjoni rrakkomandat għall-formaldeid bħala monomeru fil-ġugarelli. Għalhekk, mhuwiex possibbli li jitqiesu r-rekwiżiti tal-imballaġġ għall-ikel meta jiġi stabbilit limitu għall-formaldeid bħala monomeru fil-ġugarelli.

(12)

Fid-dawl tal-evidenza xjentifika disponibbli u tar-rakkomandazzjonijiet tal-Grupp ta’ Esperti dwar is-Sikurezza tal-Ġugarelli u tas-sottogrupp tiegħu Sustanzi Kimiċi, jeħtieġ li jiġu stabbiliti l-limiti rrakkomandati għall-formaldeid f’materjali differenti tal-ġugarelli.

(13)

Għalhekk, jenħtieġ li l-Appendiċi C tal-Anness II tad-Direttiva 2009/48/KE jiġi emendat skont dan.

(14)

Il-miżuri previsti f’din id-Direttiva huma skont l-opinjoni tal-Kumitat dwar is-Sikurezza tal-Ġugarelli stabbilit skont l-Artikolu 47 tad-Direttiva 2009/48/KE,