32002L0007

Id-Direttiva 2002/7/KE tal-Parlament Ewropew u tal-kunsill

tat-18 ta' Frar 2002

li temenda d-Direttiva tal-Kunsill 96/53/KE li tipprovdi rigward ċerti vetturi tat-triq li jiċċirkolaw fil-Komunità d-dimensjonijiet massimi awtorizzati fit-traffiku nazzjonali u internazzjonali u l-piżijiet massimi awtorizzati fit-traffiku internazzjonali

Il-PARLAMENT EWROPEW U L-KUNSILL TA' L-UNJONI EWROPEA,

Wara li kkunsidraw it-Trattat li jistabilixxi l-Komunità Ewropea, u partikolarment l-Artikolu 71 tiegħu,

Wara li kkunsidraw il-proposta mill-Kummissjoni [1],

Wara li kkunsidraw l-opinjoni tal-Kunsill Ekonomiku u Soċjali [2],

Wara li kkunsidraw l-opinjoni tal-Kumitat tar-Reġjuni [3],

Waqt li kienu jaġixxu skond il-proċedura stabilita fl-Artikolu 251 tat-Trattat [4],

Billi:

(1) Id-Direttiva 96/53/KE [5] stabbiliet, fil-qafas tal-politika komuni tat-trasport, id-dimensjonijiet massimi armonizzati tal-vetturi għaċ-ċirkolazzjoni fil-każ tal-vetturi tat-triq li jġorru l-merkanzija.

(2) Hemm il-ħtieġa għal daqs massimu armonizzat awtorizzat għaċ-ċirkolazzjoni tal-vetturi li jġorru l-passiġġieri. Id-differenzi bejn in-normi fis-seħħ fl-Istati Membri rigward id-dimensjonijiet tal-vetturi tal-passiġġieri fit-triq jista' jkollhom effetti kuntrarji fuq il-kundizzjonijiet tal-kompetizzjoni u jikkostitwixxu ostakolu għat-traffiku bejn l-Istati Membri.

(3) Billi l-għan ta' l-armonizzazzjoni tad-daqs massimu awtorizzat ta' vetturi fil-każ ta' l-vetturi tat-triq li jġorru l-passiġġieri ma jistax jintlaħaq biżżejjed mill-Istati Membri u jista' għalhekk minħabba l-iskala jew l-effetti ta' l-azzjoni proposta jinkiseb aħjar f'livell tal-Komunità, il-Komunità tista' tadotta miżuri skond il-prinċipju ta' sussidjarjetà kif imniżżel fl-Artikolu 5 tat-Trattat. Skond il-prinċipju ta' l-proporzjonalità kif imniżżel f'dak l-Artikolu, din id-Direttiva ma tmurx 'l hinn minn dak li hu meħtieġ biex jinkiseb dak il-għan.

(4) Fl-implimentazzjoni tas-suq intern, l-iskop tad-Direttiva 96/53/KE għandu jiġi estiż għat-trasport nazzjonali safejn jikkonċerna karatteristiċi li jeffettwaw b'mod sinifikanti l-kundizzjonijiet tal-kompetizzjoni fis-settur tat-trasport u b'mod partikolari l-valuri relatati mat-tul u l-wisa' massimu awtorizzat ta' vetturi maħsuba għall-ġarr tal-passiġġieri.

(5) Ir-regoli armonizzati dwar il-piżijiet u d-dimensjonijiet massimi tal-vetturi għandhom jibqgħu stabbli fuq medda twila. Għalhekk, l-emendi stabiliti f'din id-Direttiva m'għandhomx joħolqu preċedent għall-piżijiet u d-dimensjonijiet massimi awtorizzati ta' karozzi tal-linja u kategoriji oħra ta' vetturi bil-mutur.

(6) Għall-għanijiet ta' sigurtà fit-triq, il-karrozzi tal-linji għandhom jikkonformaw mal-kriterji dwar il-funzjonalità fir-rigward tal-manuvrabilità tagħhom.

(7) Għall-għanijiet ta' sigurtà fit-triq marbuta ma' l-istat ta' l-infrastruttura tagħhom il-Portugall u r-Renju Unit għandhom jiġu awtorizzati, għall-perijodu tranżitorju, biex jirrifjutaw l-użu fuq it-territorju tagħhom ta' karrozzi tal-linja la ma jkunux jissodisfaw ċerti kriterji ta' manuvrabilità.

(8) Il-karrozzi tal-linja li kienu rreġistrati jew imqiegħda fiċ-ċirkolazzjoni qabel id-data ta' l-implimentazzjoni ta' din id-Direttiva u li ma jikkonformawx mal-karatteristiċi ta' dimensjoni stabiliti f'din id-Direttiva, minħabba d-diversi dispożizzjonijiet nazzjonali ta' qabel jew minħabba l-metodi tal-kejl, għandhom ikunu permessi għall-perijodu transitorju biex ikomplu jipprovdu servizzi ta' trasport fl-Istat Membru li fih il-vettura tkun irreġistrata jew imqiegħda fiċ-ċirkolazzjoni.

(9) Id-Direttiva 96/53/KE għandha għalhekk tiġi emendata,

ADOTTAW DIN ID-DIRETTIVA:

L-Artikolu 1

Id-Direttiva 96/53/KE qiegħda b'dan tiġi emendata kif ġej:

1. fl-Artikolu 1:

a) il-paragrafu 1(a) għandu jinbidel b'dan li ġej:

"(a) id-dimensjonijiet tal-vetturi bil-mutur fil-kategoriji M2 u M3 u l-karrijiet tagħhom fil-kategorija 0 u l-vetturi bil-mutur fil-kategoriji N2 u N3 u l-karrijiet tagħhom fil-kategoriji 03 u 04, kif definiti fl-Anness II li jinsab mad-Direttiva tal-Kunsill 70/156/KEE tas-6 ta' Frar 1970 dwar l-approssimazzjoni tal-liġijiet ta' l-Istati Membri li għandhom x'jaqsmu ma' l-approvazzjoni dwar it-tip tal-vetturi bil-mutur u l-karrijiet tagħhom [6];";

(b) il-paragrafu li ġej għandu jiżdied:

"3. Din id-Direttiva m'għandhiex tapplika għall-karozzi tal-linja artikolati magħmula minn aktar minn sezzjoni artikolata waħda.";

2. fl-Artikolu 3, it-tieni inċiż għandu jinbidel b'dan li ġej:

"— fit-traffiku nazzjonali, il-vetturi rreġistrati jew imqiegħda fiċ-ċirkolazzjoni f'xi Stat Membru ieħor għal raġunijiet relatati mad-dimensjonijiet tagħhom;";

3. L-Artikolu 4 għandu jiġi emendat kif ġej:

(a) il-paragrafi 1 u 2 għandhom jinbidlu b'dan li ġej:

"1. L-Istati Membri m'għandhomx jawtorizzaw iċ-ċirkolazzjoni normali fit-territorji tagħhom:

(a) ta' vetturi jew kombinazzjonijiet ta' vetturi għat-trasport nazzjonali ta' merkanzija li ma jkunux jikkonformaw mal-karatteristiċi mniżżla fil-punti 1.1, 1.2, 1.4, 1.5, 1.6, 1.7, 1.8, 4.2 u 4.4 ta' l-Anness I;

(b) ta' vetturi għat-trasport nazzjonali tal-passiġġieri, ma jkunux jikkonformaw mal-karatteristiċi mniżżla fil-punti 1.1, 1.2, 1.4a, 1.5 u 1.5a ta' l-Anness I.

2. L-Istati Membri jistgħu madankollu jawtorizzaw iċ-ċirkolazzjoni fuq it-territorji tagħhom:

(a) ta' vetturi jew kombinazzjonijiet ta' vetturi għat-trasport nazzjonali tal-merkanzija li ma jkunux jikkonformaw mal-karatteristiċi mniżżla fil-punti 1.3, 2, 3, 4.1 u 4.3 ta' l-Anness I;

(b) ta' vetturi għat-trasport nazzjonali tal-passiġġieri, li ma jkunux jikkonformaw mal-karatteristiċi mniżżla fil-punti 1.3, 2, 3, 4.1 u 4.3 ta' l-Anness I.";

(b) il-paragrafu 4 għandu jiġi emendat kif ġej:

(i) fl-ewwel subparagrafu, l-espressjonijiet "vetturi jew kombinazzjonijiet ta' vetturi użati għat-trasport tal-merkanzija li…" għandhom jinbidlu b' "vetturi jew kombinazzjonijiet ta' vetturi użati għat-trasport li…";

(ii) fit-tielet sub-paragrafu, l-espressjonijiet "iċ-ċirkolazzjoni fit-territorju tagħhom, f'operazzjonijiet ta' trasport nazzjonali ta' merkanzija, ta' vetturi…" għandhom jinbidlu bi "iċ-ċirkolazzjoni fit-territorju tagħhom, f'operazzjonijiet nazzjonali ta' trasport, ta' vetturi…"

(ċ) il-paragrafu li ġej għandu jiżdied:

"7. Sal-31 ta' Diċembru 2020 l-Istati Membri jistgħu jawtorizzaw li karrozzi tal-linja li kienu rreġistrati jew imqiegħda fiċ-ċirkolazzjoni qabel l-implimentazzjoni ta' din id-Direttiva iżda li d-dimensjonijiet tagħhom jeċċedu dawk stabiliti fil-punti 1.1, 1.2, 1.5 u 1.5a ta' l-Anness I biex jiċċirkolaw fuq it-territorji tagħhom.";

4. L-Artikolu 7 għandu jiġi mibdul bit-test li ġej:

"L-Artikolu 7

Din id-Direttiva m'għandhiex tipprekludi l-applikazzjoni tad-dispożizzjonijiet dwar it-traffiku fit-toroq fis-seħħ f'kull Stat Membru li jippermetti li l-piż u/jew id-dimensjonijiet tal-vetturi fuq ċerti toroq jew strutturi ta' inġinerija ċivili jkun limitat, irrispettivament mill-Istat tar-reġistrazzjoni ta' dawk il-vetturi jew l-Istat fejn dawk il-vetturi jkunu tqiegħdu fiċ-ċirkolazzjoni.

Dan jinkludi l-possibiltà li jiġu imposti restrizzjonijiet lokali dwar id-dimensjonijiet massimi awtorizzati u/jew il-piżijiet tal-vetturi li jistgħu jintużaw f'żoni speċifiċi jew fuq toroq speċifiċi, fejn l-infrastruttura ma tkunx adattata għal vetturi twal u tqal, bħal ċentri ta' l-ibliet, villaġġi żgħar u postijiet ta' interess naturali speċjali.";

5. l-Artikolu li ġej għandu jiddaħħal:

"L-Artikolu 8a

Il-Portugall u r-Renju Unit jistgħu jirrifjutaw jew jipprojbixxu l-użu fuq it-territorju tagħhom sad-9 ta' Marzu 2005 tal-karrozzi tal-linja msemmija fil-punt 1.1 ta' l-Anness sakemm dawn ma jkunux jissodisfaw il-kriterji dwar il-manuvrabilità li ġejjin:

- meta l-karrozza tal-linja tkun wieqfa u jkollha r-roti tagħha miksura b'tali mod li jekk il-vettura titmexxa, il-punt l-aktar 'il barra fuq quddiem nett jagħmel ċirku ta' radius ta 12,50 m, pjan vertikali tanġenzjali mal-ġenb tal-vettura li jħares 'il barra miċ-ċirku għandu jiġi stabilit billi tiġi mmarkata linja fl-art. Fil-każ ta' karrozza tal-linja artikolata, iż-żewġ porzjonijiet riġidi għandhom ikunu allineati mal-pjan,

- meta l-karrozza tal-linja titmexxa 'l quddiem fuq kull naħa waqt li ssegwi ċ-ċirku ta' radius ta'12,50 m, ebda parti tagħha ma tista' tisporġi 'l barra mill-pjan vertikali b'aktar minn 0,80 m fil-każ ta' karrozza tal-linja riġida sa tul sa 12-il m u b'mhux aktar minn 1,20 m fil-każ jew ta' karrozza tal-linja riġida ta' tul ta' aktar minn 12-il m jew ta' karrozza tal-linja artikolata.";

6. l-Artikolu li ġej għandu jiddaħħal:

"l-Artikolu 10a

Fir-rigward ta' l-Anness I, il-punt 1.5a, il-Kummissjoni għandha, mhux aktar tard mid-9 ta'Marzu 2005, tippreżenta rapport dwar kemm huwa possibbli li jitnaqqas il-valur ta' 0,60 m msemmi fit-tieni sub-paragrafu ta' dan il-punt biex jittejbu l-kundizzjonijiet tas-sigurtà relatati mal-manuvrabilità ta' karrozzi tal-linja twal. Fejn japplika, ir-rapport għandu jkun akkumpanjat minn proposta leġislattiva biex tiġi hekk emendata din id-Direttiva.";

7. L-Anness I għandu jiġi emendat kif ġej:

(a) il-punt 1.1 għandu jinbidel b'dan li ġej:

"1.1 it-tul massimu:

- vettura bil-mutur minnbarra karrozza tal-linja | 12,00 m |

- karru | 12,00 m |

- vettura artikolata | 16,50 m |

- ferrovija tat-triq | 18,75 m |

- karrozza tal-linja artikolata | 18,75 m |

- karrozzi tal-linja b'żewġ fusien | 13,50 m |

- karrozzi tal-linja b'aktar minn żewġ fusien | 15,00 m |

- karrozza tal-linja + karru | 18,75 m" |

(b) il-punt li ġej għandu jiddaħħal:

"1.4a Jekk xi aċċessorji li jistgħu jitneħħew bħal ski-boxes ikunu ffittjati mal-karrozza tal-linja, it-tul tagħha, inklużi l-aċċessorji, m'għandux jeċċedi t-tul massimu stabilit fil-punt 1.1";

(ċ) il-punt li ġej għandu jiddaħħal:

"1.5a Ħtiġiet addizzjonali fil-każ tal-karrozzi tal-linja

Bil-vettura wieqfa, pjan vertikali tanġenzjali għall-ġenb tal-vettura u jħares 'il barra miċ-ċirku għandu jiġi stabilit billi tiġi mmarkata linja ma' l-art. Fil-każ ta' vettura artikolata, iż-żewġ porzjonijiet riġidi għandhom ikunu allineati mal-pjan,

Meta l-vettura titmexxa dritt mill-faċċata fiż-żona ċirkolari deskritta fil-punt 1.5, ebda parti minnha m'għandha toħroġ 'il barra minn dak il-pjan vertikali b'aktar minn 0,60 m."

L-Artikolu 2

1. L-Istati Membri għandhom iġibu fis-seħħ il-liġijiet, ir-regolament u d-dispożizzjonijiet amministrattivi meħtieġa għall-konformità ma' din id-Direttiva mhux aktar tard mid-9 ta' Marzu 2004. Dawn għandhom jinformaw minnufih lill-Kummissjoni dwar dan.

Fejn l-Istati Membri jadottaw dawn il-miżuri, għandu jkun fihom referenza għal din id-Direttiva jew għandhom ikunu akkumpanjati b'dik ir-referenza fl-okkażjoni tal-pubblikazzjoni uffiċjali tagħhom. Il-metodi ta' kif għandha ssir ir-referenza għandhom ikunu stabiliti mill-Istati Membri.

2. L-Istati Membri għandhom jikkomunikaw mal-Kummissjoni d-dispożizzjonijiet tal-liġi nazzjonali li jadottaw fil-qasam kopert minn din id-Direttiva.

L-Artikolu 3

Din id-Direttiva għandha tidħol fis-seħħ fil-jum tal-pubblikazzjoni tagħha fil-Ġurnal Uffiċjali tal-Komunitajiet Ewropej.

L-Artikolu 4

Din id-Direttiva qed tiġi indirizzata lill-Istati Membri.

Magħmula fi Brussel, fit-18 ta' Frar 2002.

Għall-Parlament Ewropew

Il-President

P. Cox

Għall-Kunsill

Il-President

J. Piqué i Camps

[1] ĠU C 274 E, tas-26.9.2000, p. 32.

[2] ĠU C 123, tal-25.4.2001, p. 76.

[3] ĠU C 144, tas-16.5.2001, p. 15.

[4] L-Opinjoni tal-Parlament Ewropew tat-3 ta' Ottubru 2000 (ĠU C 178, tat-22.6.2001, p. 60), Il-Pożizzjoni komuni tal-Kunsill tas-27 ta' Settembru 2001 (ĠU C 360, tal-15.12.20, p. 7) u d-Deċiżjoni tal-Parlament Ewropew tas-17 ta' Jannar 2002.

[5] ĠU L 235, tas-17.9.1996, p. 59.

[6] ĠU L 42, tat-23.2.1970 p. 1. Id-Direttiva kif l-aħħar emendata bid-Direttiva tal-Parlament Ewropew u tal-Kunsill 2000/40/KE (ĠU L 302, ta' l-10.8.2000, p.9).

--------------------------------------------------