Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32023R0652

    Regolament ta’ Implimentazzjoni tal-Kummissjoni (UE) 2023/652 tal-20 ta’ Marzu 2023 li jawtorizza t-tqegħid fis-suq ta’ qlub inkaljati u mfaqqgħin miż-żrieragħ tal-Euryale ferox Salisb. (makhana) bħala ikel tradizzjonali minn pajjiż terz skont ir-Regolament (UE) 2015/2283 tal-Parlament Ewropew u tal-Kunsill u li jemenda r-Regolament ta’ Implimentazzjoni tal-Kummissjoni (UE) 2017/2470 (Test b’relevanza għaż-ŻEE)

    C/2023/1783

    ĠU L 81, 21.3.2023, p. 23–26 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

    Legal status of the document In force

    ELI: http://data.europa.eu/eli/reg_impl/2023/652/oj

    21.3.2023   

    MT

    Il-Ġurnal Uffiċjali tal-Unjoni Ewropea

    L 81/23

    REGOLAMENT TA’ IMPLIMENTAZZJONI TAL-KUMMISSJONI (UE) 2023/652

    tal-20 ta’ Marzu 2023

    li jawtorizza t-tqegħid fis-suq ta’ qlub inkaljati u mfaqqgħin miż-żrieragħ tal-Euryale ferox Salisb. (makhana) bħala ikel tradizzjonali minn pajjiż terz skont ir-Regolament (UE) 2015/2283 tal-Parlament Ewropew u tal-Kunsill u li jemenda r-Regolament ta’ Implimentazzjoni tal-Kummissjoni (UE) 2017/2470

    (Test b’relevanza għaż-ŻEE)

    IL-KUMMISSJONI EWROPEA,

    Wara li kkunsidrat it-Trattat dwar il-Funzjonament tal-Unjoni Ewropea,

    Wara li kkunsidrat ir-Regolament (UE) 2015/2283 tal-Parlament Ewropew u tal-Kunsill tal-25 ta’ Novembru 2015 dwar ikel ġdid, li jemenda r-Regolament (UE) Nru 1169/2011 tal-Parlament Ewropew u tal-Kunsill u li jħassar ir-Regolament (KE) Nru 258/97 u r-Regolament tal-Kummissjoni (KE) Nru 1852/2001 (1), u b’mod partikolari l-Artikolu 15(4) tiegħu,

    Billi:

    (1)

    Ir-Regolament (UE) 2015/2283 jipprevedi li huwa biss ikel ġdid awtorizzat u inkluż fil-lista tal-Unjoni li jista’ jitqiegħed fis-suq tal-Unjoni. Abbażi tad-definizzjoni stabbilita fl-Artikolu 3(2)(c) tar-Regolament (UE) 2015/2283, ikel tradizzjonali minn pajjiż terz jitqies bħala ikel ġdid.

    (2)

    Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (2) stabbilixxa lista tal-Unjoni ta’ ikel ġdid.

    (3)

    Fit-8 ta’ Ottubru 2021, il-kumpanija Zenko Superfoods Pte. Ltd (“l-applikant”) issottometta notifika lill-Kummissjoni bl-intenzjoni li jqiegħed fis-suq tal-Unjoni qlub inkaljati u mfaqqgħin miż-żrieragħ tal-Euryale ferox Salisb. (makhana) bħala ikel tradizzjonali minn pajjiż terz f’konformità mal-Artikolu 14 tar-Regolament (UE) 2015/2283. L-applikant talab li l-qlub inkaljati u mfaqqgħin miż-żrieragħ tal-Euryale ferox Salisb. (makhana) jintużaw bħala ikliet ħfief mill-popolazzjoni ġenerali.

    (4)

    Skont l-Artikolu 7(3) tar-Regolament ta’ Implimentazzjoni tal-Kummissjoni (UE) 2017/2468 (3), il-Kummissjoni talbet informazzjoni addizzjonali lill-applikant fir-rigward tar-rekwiżiti għall-validità tan-notifika. L-informazzjoni mitluba ġiet sottomessa fid-9 ta’ Frar 2022.

    (5)

    In-notifika tikkonforma mar-rekwiżiti stabbiliti fl-Artikolu 14 tar-Regolament (UE) 2015/2283. Id-data ppreżentata mill-applikant turi li l-qlub inkaljati u mfaqqgħin miż-żrieragħ tal-Euryale ferox Salisb. (makhana) ikkonsmati bħala ikliet ħfief għandhom esperjenza ta’ użu sikur bħala ikel fl-Indja.

    (6)

    Fit-22 ta’ Marzu 2022, skont l-Artikolu 15(1) tar-Regolament (UE) 2015/2283, il-Kummissjoni bagħtet in-notifika valida lill-Istati Membri u lill-Awtorità Ewropea dwar is-Sigurtà fl-Ikel (“l-Awtorità”).

    (7)

    Il-Kummissjoni ma rċeviet l-ebda oġġezzjoni debitament motivata dwar is-sikurezza għat-tqegħid fis-suq fl-Unjoni ta’ qlub inkaljati u mfaqqgħin miż-żrieragħ tal-Euryale ferox Salisb. (makhana) mill-Istati Membri jew mill-Awtorità fil-perjodu ta’ 4 xhur stabbilit fl-Artikolu 15(2) tar-Regolament (UE) 2015/2283.

    (8)

    Fil-5 ta’ Settembru 2022, l-Awtorità ppubblikat it-“Technical Report on the notification of roasted and popped kernels from the seeds of Euryale ferox Salisb. (makhana) as a traditional food from a third country pursuant to Article 14 of Regulation (UE) 2015/2283” (4). L-Awtorità kkonkludiet li d-data disponibbli dwar il-kompożizzjoni u l-istorja tal-użu ta’ qlub inkaljati u mfaqqgħin miż-żrieragħ tal-Euryale ferox Salisb. (makhana) ma jqajmux tħassib dwar is-sikurezza.

    (9)

    Għalhekk, jenħtieġ li l-Kummissjoni tawtorizza t-tqegħid fis-suq fl-Unjoni ta’ qlub inkaljati u mfaqqgħin miż-żrieragħ tal-Euryale ferox Salisb. (makhana) bħala tali ikla ħafifa u taġġorna l-lista tal-Unjoni ta’ ikel ġdid awtorizzat skont dan.

    (10)

    Jenħtieġ li l-qlub inkaljati u mfaqqgħin miż-żrieragħ tal-Euryale ferox Salisb. (makhana) jenħtieġ li jiġu inklużi bħala ikel tradizzjonali minn pajjiż terz fil-lista tal-Unjoni ta’ ikel ġdid stabbilita fir-Regolament ta’ Implimentazzjoni (UE) 2017/2470. Għaldaqstant, jenħtieġ li l-Anness tar-Regolament ta’ Implimentazzjoni (UE) 2017/2470 jiġi emendat skont dan,

    ADOTTAT DAN IR-REGOLAMENT:

    Artikolu 1

    1.   Il-qlub inkaljati u mfaqqgħin miż-żrieragħ tal-Euryale ferox Salisb. (makhana) huma awtorizzati li jiġu introdotti fis-suq fl-Unjoni.

    Il-qlub inkaljati u mfaqqgħin miż-żrieragħ tal-Euryale ferox Salisb. (makhana) għandhom jiġu inklużi bħala ikel tradizzjonali minn pajjiż terz fil-lista tal-Unjoni ta’ ikel ġdid stabbilita fir-Regolament ta’ Implimentazzjoni (UE) 2017/2470.

    2.   L-Anness tar-Regolament ta’ Implimentazzjoni (UE) 2017/2470 huwa emendat f’konformità mal-Anness ta’ dan ir-Regolament.

    Artikolu 2

    Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

    Dan ir-Regolament għandu jorbot fl-intier tiegħu u japplika direttament fl-Istati Membri kollha.

    Magħmul fi Brussell, l-20 ta’ Marzu 2023.

    Għall-Kummissjoni

    Il-President

    Ursula VON DER LEYEN

    (1)   ĠU L 327, 11.12.2015, p. 1.

    (2)  Ir-Regolament ta’ Implimentazzjoni tal-Kummissjoni (UE) 2017/2470 tal-20 ta’ Diċembru 2017 li jistabbilixxi l-lista tal-Unjoni tal-ikel ġdid skont ir-Regolament (UE) 2015/2283 tal-Parlament Ewropew u tal-Kunsill dwar ikel ġdid (ĠU L 351, 30.12.2017, p. 72).

    (3)  Ir-Regolament ta’ Implimentazzjoni tal-Kummissjoni (UE) 2017/2468 tal-20 ta’ Diċembru 2017 li jistabbilixxi rekwiżiti amministrattivi u xjentifiċi li jikkonċernaw ikel tradizzjonali minn pajjiżi terzi skont ir-Regolament (UE) 2015/2283 tal-Parlament Ewropew u l-Kunsill dwar ikel ġdid (ĠU L 351, 30.12.2017, p. 55).

    (4)   EFSA Journal 2022;19(9):EN-7538. https://doi.org/10.2903/sp.efsa.2022.EN-7538

    ANNESS

    L-Anness tar-Regolament ta’ Implimentazzjoni (UE) 2017/2470 huwa emendat kif ġej:

    (1)

    L-entrata li ġejja tiddaħħal fit-Tabella 1 (Ikel ġdid awtorizzat):

    Ikel ġdid awtorizzat

    Kundizzjonijiet li fihom jista’ jintuża l-ikel ġdid

    Rekwiżiti tat-tikkettar speċifiċi oħrajn

    Rekwiżiti oħrajn

    “Qlub inkaljati u mfaqqgħin miż-żrieragħ tal-Euryale ferox Salisb. (makhana) (Ikel tradizzjonali minn pajjiż terz)

    Kategorija tal-ikel speċifikat

    Livelli massimi

    Id-denominazzjoni tal-ikel ġdid fuq it-tikkettar tal-oġġetti tal-ikel li fihom dan l-ikel għandha tkun ‘żrieragħ inkaljati tal-Euryale ferox jew ‘żrieragħ inkaljati tal-makhana (Euryale ferox)’”

     

    Ġewż ipproċessat

     

    (2)

    L-entrata li ġejja tiddaħħal fit-Tabella 2 (Speċifikazzjonijiet):

    Ikel ġdid awtorizzat

    Speċifikazzjonijiet

    “Qlub inkaljati u mfaqqgħin miż-żrieragħ tal-Euryale ferox Salisb. (makhana) (Ikel tradizzjonali minn pajjiż terz)

    Deskrizzjoni/Definizzjoni:

    L-ikel tradizzjonali jikkonsisti mill-qlub inkaljati u mfaqqgħin miż-żrieragħ tal-pjanti friski tal-Euryale ferox Salisb. (familja: Nymphaeaceae, li spiss tissejjaħ ukoll warda tal-ilma mxewka) biex jiġi kkunsmat bħala ikla ħafifa. L-ikel tradizzjonali jiġi prodott permezz ta’ sensiela ta’ passi li jinvolvu l-ġbir, il-ħasil u t-tnixxif taż-żrieragħ, l-ewwel inkaljar fiż-żejt, tlewwit f’temperaturi ambjentali, it-tieni inkaljar sussegwenti fiż-żejt biex jinfaqgħu l-qlub, segwit minn daqqiet fuq iż-żrieragħ sħan biex jinħelsu l-qlub mfaqqgħin. L-ikel tradizzjonali huwa magħruf ukoll bħala makhana jew żerriegħa tal-Euryale ferox/makhana.

    Komponenti nutrittivi tipiċi

    Xaħam: 13,0 g/100 g

    Karboidrati: 75,0 g/100 g

    Fibra: 2,5 g/100 g

    Proteina: 7 g/100 g

    Ndewwa (% w/w): < 5,0

    Rmied: < 0,5 g/100 g

    Kriterji mikrobijoloġiċi:

    Għadd totali tal-kolonji: < 103 CFU/g

    Għadd totali ta’ ħmira u moffa: < 100 CFU/g

    Total tal-Enterobacteriaceae: < 10 CFU/g

    Salmonella spp.: Assenti f’25 g

    Listeria monocytogenes: Assenti f’25 g

    Metalli tqal:

    Selenju: ≤ 0,8 mg/kg

    Ram: ≤ 30,0 mg/kg

    Ċomb: ≤ 0,1 mg/kg

    Arseniku: ≤ 0,1 mg/kg

    Kadmju: ≤ 0,1 mg/kg

    Landa: ≤ 3,5 mg/kg

    Merkurju: ≤ 0,025 mg/kg

    Mikotossini:

    Aflatossina B1: ≤ 2,0 μg/kg

    Somma tal-aflatossini B1, B2, G1, G2: ≤ 4,0 μg/kg

    Okratossina A: ≤ 1,0 μg/kg

    Ċitrinina: ≤ 20,0 μg/kg

    Ċjanotossini:

    Mikroċistini: ≤ 0,0015 mg/kg

    Pestiċidi:

    Pestiċidi: ≤ 0,01 mg/kg

    Kontaminanti tal-proċess:

    Akrilammid: ≤ 40,0 μg/kg

    Somma tal-PAHs: ≤ 10,0 μg/kg

    Somma tal-PCBs simili għad-diossini: ≤ 0,35 pg/g

    3-MCPD: ≤ 20,0 μg/kg

    Esteri gliċidiliċi tal-aċidi xaħmin (espressi bħala gliċidol): ≤ 500,0 μg/kg

    Somma ta’ 3-MCPD u l-esteri tal-aċidi xaħmin 3-MCPD: ≤ 750,0 μg/kg

    CFU/g Unitajiet li Jiffurmaw il-Kolonji; PAHs: Idrokarburi Aromatiċi Poliċikliċi; PCBs: Poliklorobifenili; 3-MCPD: 3-Monokloropropandiol.”
    Top