(1)

Ir-Regolament tal-Kunsill (UE) 2022/109 (1) jistabbilixxi għall-2022 l-opportunitajiet tas-sajd għal ċerti stokkijiet tal-ħut u ċerti gruppi ta’ stokkijiet tal-ħut, applikabbli fl-ilmijiet tal-Unjoni u, għal bastimenti tas-sajd tal-Unjoni, f’ċerti ilmijiet mhux tal-Unjoni.

(2)

Ir-Regolament (UE) 2022/109, kif emendat bir-Regolament tal-Kunsill (UE) 2022/1091 (2), jistabbilixxi qabda totali permissibbli (TAC) proviżorja għall-inċova (Engraulis encrasicolus) fis-subżoni 9 u 10 tal-Kunsill Internazzjonali għall-Esplorazzjoni tal-Baħar (ICES) u fl-ilmijiet tal-Unjoni tal-Kumitat tas-Sajd għall-Atlantiku Ċentrali tal-Lvant (CECAF) 34.1.1 għall-perjodu mill-1 ta’ Lulju 2022 sat-30 ta’ Settembru 2022, sakemm jiġi ppubblikat il-parir xjentifiku pprovdut mill-ICES għall-perjodu mill-1 ta’ Lulju 2022 sat-30 ta’ Ġunju 2023. Wara l-pubblikazzjoni ta’ dak il-parir fis-17 ta’ Ġunju 2022, li jippermetti li s-sajd ikompli, jenħtieġ li tiġi stabbilita t-TAC definittiva għall-perjodu mill-1 ta’ Lulju 2022 sat-30 ta’ Ġunju 2023. Jenħtieġ li t-TAC jiġi stabbilit fil-livell ta’ 15 777 tunnellata indikat f’dak il-parir.

(3)

Ir-Regolament (UE) 2022/109 jistabbilixxi kondizzjoni speċjali dwar il-kwoti għas-sawrell (Trachurus spp.) fis-subżona 9 tal-ICES. Ir-Regolament (UE) 2022/109 ma jistabbilixxix il-perċentwal soġġett għal dik il-kondizzjoni speċjali, sakemm isir disponibbli parir xjentifiku aġġornat mill-ICES rigward il-flessibbiltajiet bejn iż-żoni bejn is-subżona 9 u d-diviżjoni 8c tal-ICES. Fit-18 ta’ Awwissu 2022, l-ICES ippubblika Servizz Tekniku dwar il-flessibbiltajiet bejn iż-żoni bejn is-subżona 9 u d-diviżjoni 8c tal-ICES. Huwa xieraq li l-Unjoni tistabbilixxi l-perċentwal soġġett għal dik il-kondizzjoni speċjali f’konformità ma’ dak is-Servizz Tekniku tal-ICES.

(4)

Għalhekk, jenħtieġ li r-Regolament (UE) 2022/109 jiġi emendat skont dan.

(5)

Il-limitu tal-qbid għall-inċova fis-subżoni 9 u 10 tal-ICES u fl-ilmijiet tal-Unjoni tas-CECAF 34.1.1 jenħtieġ li japplika mill-1 ta’ Lulju 2022. Il-kondizzjoni speċjali rigward il-kwoti għas-sawrell (Trachurus spp.) fis-subżona 9 tal-ICES jenħtieġ li tapplika mill-1 ta’ Jannar 2022. Tali applikazzjoni retroattiva ma taffettwax il-prinċipji taċ-ċertezza ġuridika u tal-protezzjoni tal-aspettattivi leġittimi billi żdiedu l-opportunitajiet tas-sajd għall-inċova u ġiet introdotta flessibbiltà bejn iż-żoni għall-opportunitajiet tas-sajd għas-sawrell. Minħabba l-urġenza biex jiġu evitati interruzzjonijiet fl-attivitajiet tas-sajd„ dan ir-Regolament jenħtieġ li jidħol fis-seħħ fid-data tal-pubblikazzjoni tiegħu f’Il-Ġurnal Uffiċjali tal-Unjoni Ewropea,