a)

Jallinjaw, f’kooperazzjoni mill-qrib mal-partijiet ikkonċernati rilevanti, l-istrateġiji u l-pjanijiet fl-edukazzjoni u t-taħriġ mat-tranżizzjoni ekoloġika u l-iżvilupp sostenibbli, inkluż dawk relatati mal-kurrikuli u l-valutazzjoni u t-taħriġ inizjali tal-edukaturi u l-iżvilupp professjonali kontinwu. Jappoġġaw l-implimentazzjoni ta’ strateġiji u politiki nazzjonali u oħrajn, inkluż dwar kunċetti relatati bħall-edukazzjoni għall-iżvilupp sostenibbli, permezz ta’ mekkaniżmi għal segwitu u monitoraġġ.

b)

Jinvestu, fejn xieraq, f’tagħmir, f’riżorsi u f’infrastruttura ekoloġiċi u sostenibbli (bini, ġonna u teknoloġija) u jipprovdu t-taħriġ fihom, għall-apprendiment, għas-soċjalizzazzjoni u għar-rikreazzjoni biex jiżguraw ambjenti ta’ apprendiment tajbin għas-saħħa, siguri, inklużivi, kreattivi u reżiljenti.

c)

Iqajmu kuxjenza dwar il-benefiċċji u l-opportunitajiet tal-apprendiment favur it-tranżizzjoni ekoloġika u l-iżvilupp sostenibbli, u jappoġġaw l-istituzzjonijiet tal-edukazzjoni formali u mhux formali u tat-taħriġ, inkluż l-edukazzjoni u kura bikrija tat-tfal, biex jagħmlu t-tibdil fil-klima, il-protezzjoni ambjentali, il-bijodiversità u l-kwistjonijiet ta’ sostenibbiltà rilevanti għall-ħajja ta’ kuljum tal-istudenti tagħhom u jrawmu kultura ta’ sostenibbiltà.

d)

Jiżviluppaw l-għarfien, il-ħiliet u l-attitudnijiet tal-istudenti ta’ kull età biex jgħixu b’mod aktar sostenibbli, jippromwovu xejriet sostenibbli tal-konsum u l-produzzjoni, jadottaw stili ta’ ħajja aktar tajbin għas-saħħa u aktar konxji mill-ambjent u jikkontribwixxu b’mod individwali u b’mod kollettiv għat-trasformazzjoni tas-soċjetajiet tagħna.

e)

Jappoġġaw u jtejbu t-tagħlim u l-apprendiment favur it-tranżizzjoni ekoloġika u l-iżvilupp sostenibbli billi jipprovdu infrastruttura, għodod u riżorsi diġitali, u jappoġġaw il-kompetenzi diġitali tal-edukaturi.

f)

Jinvolvu, b’mod sinifikanti u b’mod ikkoordinat, lill-istudenti kollha biex jipproponu u joħolqu flimkien approċċi dwar kif jitgħallmu, fejn jitgħallmu u x’jitgħallmu dwar it-tranżazzjoni ekoloġika u l-iżvilupp sostenibbli, u għalihom. Iħeġġu parteċipazzjoni bbilanċjata bejn il-ġeneri ta’ studenti minn kull sfond, inkluż dawk b’inqas opportunitajiet. Jagħtu s-setgħa lill-istudenti kollha biex jipparteċipaw fit-teħid tad-deċiżjonijiet u jinvolvu ruħhom fihom, fil-livell tal-istituzzjoni tagħhom kif ukoll fil-komunitajiet lokali u usa’ tagħhom.

g)

Jiżviluppaw u jappoġġaw, f’kooperazzjoni mill-qrib mal-partijiet ikkonċernati rilevanti, programmi u oqfsa tal-kurrikulu, li jippermettu ż-żmien u l-ispazju għall-istudenti biex jiżviluppaw kompetenzi ta’ sostenibbiltà (17) minn età bikrija. L-apprendiment interġenerazzjonali u l-eżempji, il-problemi u r-risponsi lokali jistgħu jagħmlu l-kurrikuli aktar rilevanti għall-istudenti, filwaqt li juru li t-tibdil fil-klima, il-bijodiversità, il-protezzjoni ambjentali u s-sostenibbiltà huma lokali u azzjonabbli.

h)

Jappoġġaw il-kooperazzjoni u n-networking dwar is-sostenibbiltà, il-protezzjoni ambjentali u l-bijodiversità, li jinvolvu pereżempju l-awtoritajiet lokali, il-ħidma fost iż-żgħażagħ u l-organizzazzjonijiet taż-żgħażagħ, iċ-ċentri tal-edukazzjoni u t-taħriġ ambjentali, iċ-ċentri tal-apprendiment globali, il-foresti, il-parks, l-irziezet, il-mużewijiet, il-libreriji, l-organizzazzjonijiet mhux governattivi, ir-riċerka, l-organizzazzjonijiet tal-konsumaturi u n-negozji, u b’hekk isaħħu r-rabtiet bejn l-apprendiment formali, mhux formali u informali.

i)

Jappoġġaw iż-żieda tal-prattiki tajbin u r-riċerka pedagoġika dwar it-tagħlim u l-apprendiment favur it-tranżizzjoni ekoloġika u l-iżvilupp sostenibbli fil-livelli u t-tipi kollha tal-edukazzjoni u t-taħriġ.

a)

Jipprovdu lill-istudenti, minn meta jkunu fl-iskola preprimarja, l-opportunitajiet biex jifhmu u jimpenjaw ruħhom favur id-dinja naturali u l-bijodiversità tagħha u japprezzawhom, joħolqu sens ta’ kurżità u ta’ meravilja u jitgħallmu jaġixxu favur is-sostenibbiltà, b’mod individwali u b’mod kollettiv.

b)

Isaħħu, inkluż permezz ta’ appoġġ finanzjarju f’konformità mal-iskemi ta’ appoġġ finanzjarju nazzjonali, apprendiment tul il-ħajja ta’ kwalità għolja għat-tranżizzjoni ekoloġika u l-iżvilupp sostenibbli, inkluż traineeships, apprendistati, il-volontarjat, attivitajiet ekstrakurrikulari, attivitajiet ta’ ħidma fost iż-żgħażagħ u forom oħra ta’ apprendiment formali, mhux formali u informali u r-rabtiet bejniethom. Jistimulaw u jirrikonoxxu azzjonijiet u programmi ta’ involviment ċiviku f’dak ir-rigward.

c)

Jiffaċilitaw metodi u approċċi ta’ apprendiment li huma kollaborattivi, esperimentali, orjentati lejn il-prattika u rilevanti għall-kuntesti u t-tradizzjonijiet lokali u li jappoġġaw attivitajiet interdixxiplinari u transkurrikulari. Dan jinkludi l-għoti ta’ opportunitajiet prattiċi lill-istudenti biex josservaw u jieħdu ħsieb in-natura, u biex inaqqsu l-użu, isewwu, jużaw mill-ġdid u jirriċiklaw l-oġġetti, u b’hekk jgħinuhom jifhmu l-importanza ta’ stili ta’ ħajja sostenibbli u tal-ekonomija ċirkolari.

d)

Jipprovdu informazzjoni bbażata fuq il-fatti u aċċessibbli dwar il-kriżi klimatika, ambjentali u dik tal-bijodiversità u l-ixprunaturi tagħhom, kif miftiehem skont il-Konvenzjoni ta’ Aarhus (18).

e)

Jiżviluppaw ħiliet ta’ soluzzjoni tal-problemi u ta’ kollaborazzjoni; irawmu l-ħsieb kritiku, il-ħiliet tal-litteriżmu medjatiku u r-riflessjoni dwar is-sistemi; u jappoġġaw azzjoni pożittiva, inkluż il-volontarjat, biex jikkonfrontaw u jnaqqsu l-biża’ u n-nuqqas ta’ emanċipazzjoni li l-istudenti jistgħu jesperjenzaw quddiem il-kriżijiet planetarji.

a)

Jirrikonoxxu li l-edukaturi kollha, tkun xi tkun id-dixxiplina jew is-settur tal-edukazzjoni tagħhom, huma edukaturi tas-sostenibbiltà li jeħtieġ li jappoġġaw lill-istudenti tagħhom fit-tħejjija għat-tranżizzjoni ekoloġika. Jabilitawhom iżidu l-għarfien tal-istudenti tagħhom dwar l-Għanijiet ta’ Żvilupp Sostenibbli. Jinkludu, jikkonsultaw u jinvolvu lill-edukaturi fl-iżvilupp ta’ kurrikuli u programmi, u f’riformi edukattivi oħra relatati mat-tranżizzjoni ekoloġika u s-sostenibbiltà ambjentali, u fit-tfassil ta’ żvilupp professjonali xieraq.

b)

Jappoġġaw l-integrazzjoni tat-tranżizzjoni ekoloġika u l-iżvilupp sostenibbli fi programmi inizjali tat-taħriġ tal-għalliema u l-ħarrieġa; fil-programmi ta’ żvilupp professjonali kontinwu; u fl-istandards u l-oqfsa professjonali tal-għalliema sabiex jappoġġaw l-iżvilupp tal-kompetenzi tal-edukaturi fir-rigward tas-sostenibbiltà.

c)

Jappoġġaw skemi ta’ mentoraġġ u programmi ta’ żvilupp professjonali fil-livell tal-istituzzjonijiet. Jappoġġaw lill-edukaturi fl-użu ta’ għodod u teknoloġiji diġitali fil-prattika tagħhom biex itejbu t-tagħlim u l-apprendiment favur it-tranżizzjoni ekoloġika u l-iżvilupp sostenibbli.

d)

Ikomplu joħolqu u jesploraw opportunitajiet u inċentivi biex l-edukaturi jieħdu sehem fil-programmi ta’ żvilupp professjonali relatati mas-sostenibbiltà, pereżempju billi jqisuhom fil-progressjoni u fl-iżvilupp tal-karriera, u joħolqu rwoli għall-edukaturi bħal koordinatur tas-sostenibbiltà.

e)

Jappoġġaw lill-edukaturi, inkluż billi jagħtuhom iż-żmien u l-ispazju meħtieġa, fl-adozzjoni ta’ pedagoġiji li jtejbu t-tagħlim u l-apprendiment favur it-tranżizzjoni ekoloġika u s-sostenibbiltà ambjentali b’modi interdixxiplinari u jiżviluppaw l-aspetti soċjoemozzjonali tal-apprendiment, sabiex l-istudenti kollha jkunu jistgħu jsiru aġenti tal-bidla u jitgħallmu jirriflettu u jieħdu azzjoni, kemm b’mod individwali kif ukoll b’mod kollettiv, lokalment u globalment, favur dinja aktar sostenibbli.

f)

Iħeġġu u jabilitaw, fejn xieraq, tagħlim u apprendiment trasformattivi u interdixxiplinarji bl-użu ta’ approċċi tal-apprendiment kemm tradizzjonali kif ukoll innovattivi, inkluż l-apprendiment prattiku, l-approċċ STEAM (19), il-hackathons, is-servizz tat-tagħlim u l-ludifikazzjoni.

g)

Jiżviluppaw u jagħmlu disponibbli r-riżorsi biex jappoġġaw lill-edukaturi, inkluż rigward il-valutazzjoni. Jappoġġaw lill-edukaturi fl-użu ta’ għodod u materjali tradizzjonali u ġodda għat-tagħlim u t-taħriġ favur it-tranżizzjoni ekoloġika u s-sostenibbiltà ambjentali f’firxa ta’ kuntesti fuq ġewwa u fuq barra, diġitali u mhux diġitali. Jipprovdu aċċess għal ċentri ta’ għarfien espert, inkluż ċentri għall-edukazzjoni u t-taħriġ ambjentali.

h)

Iħeġġu lill-komunità tar-riċerka u l-innovazzjoni tinvolvi ruħha ma’ fornituri tal-edukazzjoni u t-taħriġ formali, mhux formali u informali biex jappoġġaw lill-edukaturi fit-tranżizzjoni ekoloġika u s-sostenibbiltà ambjentali. Jappoġġaw il-parteċipazzjoni fil-proġetti u r-riċerka esploratorji relatati mal-emerġenza klimatika, il-kriżi ambjentali u s-sostenibbiltà.

a)

Jinkoraġġixxu u jiffaċilitaw approċċi effettivi ta’ istituzzjonijiet sħiħa għas-sostenibbiltà li jinkludu t-tagħlim u l-apprendiment; il-viżjoni, l-ippjanar u l-governanza; il-parteċipazzjoni attiva ta’ min qed jitgħallem u tal-persunal; l-involviment tal-familji; il-ġestjoni tal-bini u r-riżorsi; is-sħubijiet ma’ komunitajiet lokali u dawk aktar usa’; u r-riċerka u l-innovazzjoni. Jappoġġaw lill-mexxejja edukattivi fil-ġestjoni tal-bidla organizzazzjonali bi żvilupp u gwida professjonali ddedikati għar-rwoli tagħhom.

b)

Jappoġġaw lill-istituzzjonijiet tal-edukazzjoni u t-taħriġ fit-tfassil, il-monitoraġġ u l-evalwazzjoni tal-istrateġiji ta’ sostenibbiltà tagħhom u/jew l-integrazzjoni tas-sostenibbiltà fil-proċessi u l-miżuri eżistenti (eż. pjanijiet għall-iżvilupp tal-iskejjel, dikjarazzjonijiet tal-missjoni u strateġiji tal-edukazzjoni għolja). Jirrikonoxxu li dan huwa proċess fit-tul li jeħtieġ passi żgħar li jistgħu jitkejlu, li jiġu mmonitorjati u evalwati fuq bażi kontinwa, inkluż permezz ta’ awtovalutazzjoni mill-istituzzjoni.

c)

F’konformità mal-awtonomija istituzzjonali tagħhom, iħeġġu u jappoġġaw iċ-ċentri tal-edukazzjoni u l-kura bikrija tat-tfal, l-iskejjel, l-istituzzjonijiet tal-edukazzjoni għolja, il-fornituri tal-VET, l-istituzzjonijiet tal-apprendiment għall-adulti u fornituri oħra tal-edukazzjoni biex jieħdu sehem f’inizjattivi tal-ekotikketti li jistgħu jġibu benefiċċji ambjentali, soċjali, edukattivi u ekonomiċi. Jipprovdu strutturi ta’ appoġġ għal tali skemi, eż. aġenziji jew korpi biex jappoġġaw approċċi li jinvolvu l-istituzzjoni sħiħa, mentoraġġ u networking, mudelli u gwida, u appoġġ finanzjarju.

d)

Jiffokaw parti mill-mekkaniżmi interni u/jew esterni ta’ rieżami u ta’ assigurazzjoni tal-kwalità tal-organizzazzjonijiet tal-edukazzjoni u t-taħriġ fuq is-sostenibbiltà. Jirrikonoxxu l-involviment effettiv tal-istituzzjonijiet tal-edukazzjoni għolja permezz ta’ mezzi xierqa, inkluż, pereżempju, mekkaniżmi ta’ finanzjament.

e)

Ikomplu jintegraw it-tranżizzjoni ekoloġika u l-iżvilupp sostenibbli fi programmi, sillabi u moduli fil-VET u fl-edukazzjoni għolja (f’konformità mal-awtonomija istituzzjonali u l-libertà akkademika), f’firxa ta’ dixxiplini, inkluż studji tan-negozju, xjenzi soċjali, xjenzi pedagoġiċi, studji umanistiċi, arti, arkitettura u inġinerija, ippjanar u ġestjoni tal-użu tal-art. Jagħmlu użu mir-riżorsi u l-materjali żviluppati minn organizzazzjonijiet mhux governattivi ambjentali u edukattivi u minn korpi rilevanti oħra.

f)

Jappoġġaw lill-istituzzjonijiet tal-edukazzjoni għolja, tal-VET u tal-apprendiment għall-adulti fl-iżvilupp ta’ korsijiet ta’ apprendiment qosra u mfassla apposta dwar it-tranżizzjoni ambjentali u l-iżvilupp sostenibbli, li jistgħu jwasslu, fost l-oħrajn, għal mikrokredenzjali, sabiex japprofondixxu, iwessgħu u jaġġornaw il-kompetenzi professjonali.

g)

Jippromwovu sħubijiet mad-dixxiplini u l-atturi kollha, inkluż negozji, l-arti, azjendi agrikoli, il-wirt kulturali, l-isport, iż-żgħażagħ, istituti tar-riċerka, organizzazzjonijiet tas-soċjetà ċivili, l-industrija tar-riżorsi edukattivi (inkluż it-teknoloġija, il-pubblikazzjoni u tagħmir ieħor tal-kurrikuli) u r-riċerka edukattiva. Jappoġġaw l-iżvilupp ta’ programmi ekstrakurrikulari, tas-sajf u oħrajn filwaqt li jipprovdu appoġġ għal internships, pereżempju, f’laboratorji, f’negozji, f’istituzzjonijiet tar-riċerka u f’organizzazzjonijiet mhux governattivi.

h)

Jappoġġaw programmi li jippromwovu l-innovazzjoni u l-intraprenditorija fis-sostenibbiltà. Isaħħu l-istituzzjonijiet tal-edukazzjoni għolja u tal-VET biex jistabbilixxu jew isaħħu ċentri tas-sostenibbiltà li jsaħħu l-innovazzjoni u l-intraprenditorija għat-tranżizzjoni ekoloġika u l-iżvilupp sostenibbli, l-ekonomija ċirkolari u l-bijodiversità.

a)

Il-qafas strateġiku għall-kooperazzjoni Ewropea fl-edukazzjoni u t-taħriġ lejn iż-Żona Ewropea tal-Edukazzjoni u lil hinn (2021-2030) (20), fejn l-edukazzjoni u t-taħriġ favur it-tranżizzjoni ekoloġika hija qasam prijoritarju ewlieni.

b)

Ixxandar u tħeġġeġ l-użu tal-opportunitajiet għall-promozzjoni, l-appoġġ u l-abilitazzjoni tal-edukazzjoni u t-taħriġ formali u mhux formali favur it-tranżizzjoni ekoloġika u l-iżvilupp sostenibbli fil-programmi ta’ finanzjament tal-UE, bħal Erasmus+, il-Korp Ewropew ta’ Solidarjetà, LIFE, il-Fond Soċjali Ewropew Plus, il-Fond Ewropew ta’ Aġġustament għall-Globalizzazzjoni, Orizzont Ewropa, inkluż l-azzjonijiet Marie Skłodowska-Curie, il-programm tal-Edukazzjoni u Sensibilizzazzjoni għall-Iżvilupp u l-Istrument ta’ Appoġġ Tekniku.

c)

Tikkondividi l-prattiki tajbin minn skambji tal-persunal, proġetti u networks ta’ Erasmus+, inkluż permezz tal-alleanzi tal-Universitajiet Ewropej, il-komunità online eTwinning, l-Akkademji tal-Għalliema tal-Erasmus+, kif ukoll iċ-Ċentru ta’ Eċċellenza Vokazzjonali, l-azzjonijiet Marie Skłodowska-Curie u l-Istitut Ewropew tal-Innovazzjoni u t-Teknoloġija.

d)

Tidentifika, tiddokumenta u tikkondividi prattiki tajbin, inkluż permezz ta’ pjattaformi online eżistenti (21) , u tappoġġa n-networking ta’ organizzazzjonijiet nazzjonali u oħrajn attivi fl-edukazzjoni u fit-tranżizzjoni ekoloġika u l-iżvilupp sostenibbli fl-edukazzjoni u t-taħriġ formali u mhux formali.

e)

Tinvolvi liż-żgħażagħ fl-implimentazzjoni tar-Rakkomandazzjoni, b’mod partikolari permezz tas-Sena Ewropea taż-Żgħażagħ 2022 u d-Djalogu tal-UE maż-Żgħażagħ, biex tiżgura li jitqiesu bis-sħiħ l-opinjonijiet, il-fehmiet u l-ħtiġijiet taż-żgħażagħ u tal-organizzazzjonijiet taż-żgħażagħ.

f)

Toħloq sinerġiji mal-Koalizzjoni ta’ Edukazzjoni għall-Klima u l-Bauhaus Ewropea l-Ġdida.

a)

tipprovdi riżorsi u materjali ta’ appoġġ għall-użu volontarju dwar il-Pjattaforma Ewropea tal-Edukazzjoni Skolastika, l-EPALE u l-Portal Ewropew taż-Żgħażagħ;

b)

tirrikonoxxi sforzi li jispikkaw fit-tagħlim u l-apprendiment favur it-tranżizzjoni ekoloġika u l-iżvilupp sostenibbli permezz ta’ skemi ta’ premjijiet tal-UE, inkluż il-Premju Ewropew għat-Tagħlim Innovattiv, il-Premju eTwinning u l-Premjijiet Ewropej għall-Ħiliet Vokazzjonali.