—

tieħu azzjoni dwar il-preokkupazzjonijiet li diġà tfissru fl-2005 fl-opinjoni dwar il-baġit Ġenerali 2006 mressqa mill-Kumitat għall-Affarijiet Barranin tal-Parlament, billi tipprovdi informazzjoni regolari u trasparenti dwar in-nefqa attwali u l-implimentazzjoni ta' l-għajnuna ta' l-UE, speċjalment il-fondi mgħoddija permezz ta' l-IRFI;

—

topera direttament fil-post jekk u meta tippermetti s-sitwazzjoni tas-sigurtà, l-iktar fil-Bwar tan-Nofsinhar, b'mod partikulari mal-popolazzjoni abbandunata, u fir-reġjun Kurd;

—

tinkuraġġixxi lill-aġenziji tan-NU u lil organizzazzjonijiet internazzjonali oħra biex jagħmlu l-istess;

—

tiżgura l-appoġġ sħiħ tal-partijiet interessati lokali — inklużi s-soċjetà ċivili u l-awtoritajiet tal-gvern — fit-tfassil, l-implimentazzjoni u s-sostenibilità tal-proġetti u tal-programmi;

—

tiżgura li l-proġetti ffinanzjati mill-UE ma jidħlux fuq ix-xogħol ta' donaturi oħra internazzjonali imma jikkumplimentawhom;

—

iżżid il-proporzjon ta' finanzjament ta' l-UE għall-għajnuna teknika bilaterali u l-bini tal-kapaċità, u ttejjeb il-kontroll dirett tal-KE fuq il-finanzjament;

—

l-enfasi ewlenija ta' l-appoġġ tal-UE tibda ssir fuq proġetti bilaterali li jagħtu importanza lill-għajnuna teknika u lill-bini ta' kapaċitajiet fl-oqsma ta' l-istat tad-dritt, ta' l-immaniġġjar finanzjarju, tal-governanza demokratika u tad-drittijiet tal-bniedem;

—

tiżgura li għajnuna sostantiva ta' l-UE tingħata għat-titjib ta' l-immaniġġjar tal-finanzi pubbliċi u l-kontroll tal-baġit bil-għan li jiġi żgurat li l-Gvern Iraqin ikun f'pożizzjoni aħjar li juża l-ammont sostanzjali u li qed jiżdied tal-fondi pubbliċi li għandu għad-dispożizzjoni tiegħu;

—

tuża l-esperjenza ta' għajnuna tagħha miksuba minn programmi ma' l-imsieħba tagħha ta' l-ENP sabiex jinstabu modi kif ikun iggarantit involviment iktar effettiv fl-Iraq;

—

jiżdiedu d-daqs, ir-responsabiltajiet u r-riżorsi tad-delegazzjoni tal-Kummissjoni f'Bagdad, jinxtara l-bini ġdid għalija u jiġi żgurat li l-impjegati jkunu jistgħu jgħixu u jaħdmu fis-sikurezza; l-Istati Membri ta' l-UE li m'għandhomx rappreżentanza f'Bagdad jiġu mħeġġa sabiex jerġgħu lura u jużaw dak il-bini u jaqsmu l-ispejjeż marbuta mas-sigurtà;

—

tiġi żgurata l-viżibilità ta' l-UE/KE f'Erbil, f'Nasiriyah, f'Basra u f'zoni oħra ta' l-Iraq fejn is-sitwazzjoni tas-sigurtà tippermetti;

—

jissaħħaħ l-appoġġ għall-istat tad-dritt u l-ġustizzja billi tibqa' tingħata importanza speċjalment lill-istituzzjonijiet ġudizzjarji u entitajiet mhux governattivi fl-oqsma li ġejjin: it-tisħiħ ta' l-Istitut għat-Taħriġ Ġudizzjarju, l-appoġġ għat-twaqqif ta' uffiċċji li jinvestigaw reati kbar, it-tisħiħ tal-Kunsill Ġudizzjarju Għoli, l-appoġġ għat-twaqqif ta' qorti pilota f'Basra, it-tisħiħ tal-Kamra ta' l-Avukati Iraqina u l-appoġġ għat-twaqqif taċ-Ċentri għall-Għajnuna Legali;

—

isir progress wara l-esperjenza pożittiva tal-EUJUST LEX u jitħejja s-segwitu għall-missjoni, fuq il-bażi ta' l-esperjenza u fuq il-bażi ta' evalwazzjoni esterna fil-fond, bil-għan li jissaħħu aktar il-pulizija Iraqina u s-sistema tal-ġustizzja kriminali billi jintużaw kemm l-ESDP kif ukoll l-istrumenti Komunitarji;

—

jingħata appoġġ għar-riforma ta' l-immaniġġjar tal-finanzi pubbliċi u jingħata kontribut lir-responsabilizzazzjoni;

—

tibqa' tingħata għajnuna teknika għall-organizzazzjoni ta' elezzjonijiet ħielsa u ġusti;

—

jingħata appoġġ għall-proċess ta' rikonċiljazzjoni, l-iktar f'Kirkuk u f'territorji oħra li m'hemmx qbil intern dwarhom, inklużi z-zoni ta' l-Assirja magħrufa bħala l-Pjanuri ta' Nineveh bil-minoranzi Kristjani tagħhom; jiġu appoġġjati inizjattivi tan-NU biex ikun iffaċilitat id-djalogu reġjonali l-aktar billi jinstabu modi u metodi li jtejbu l-kapaċità operattiva, inkluż it-trasport bl-ajru;

—

tiġi sfruttata n-natura speċifika ta' l-Istrument ta' Stabiltà (6) biex tingħata għajnuna sostanzjali, kruċjali għall-iżvilupp f'sitwazzjoni ta' kriżi jew ta' kriżi li titfaċċa bħal dik li qed tiddomina fl-Iraq; jiġi appoġġjat l-iżvilupp ta' istituzzjonijiet demokratiċi, mhux settarji, pluralistiċi, federali, reġjonali u lokali b'enfasi partikulari fuq il-Kunsill tar-Rappreżentanti u l-ħila tiegħu li jimmaniġġja l-proċess leġiżlattiv, li jikkontrolla l-fergħa eżekuttiva u li jiżgura rwol aktar b'saħħtu għan-nisa fis-soċjetà Iraqina; jiġi promoss ir-rispett għad-drittijiet tal-bniedem u l-libertajiet fundamentali, għad-demokrazija u għall-istat tad-dritt, filwaqt li ssir enfasi partikulari fuq id-drittijiet tan-nisa, tal-minoranzi u tat-tfal; jiġu appoġġjati miżuri li jsaħħu l-iżvilupp u l-organizzazzjoni tas-soċjetà ċivili u l-parteċipazzjoni tagħha fil-proċess politiku, u tiġi promossa midja indipendenti, pluralista u professjonali; jiġu appoġġjati attivitajiet ta' tneħħija ta' l-isplussivi ta' l-art; jingħataw pariri u appoġġ lir-reġjun Kurd u lill-gvern tiegħu fl-isforzi li jsiru għall-ġlieda kontra t-traffikar tad-droga;

—

ir-riżorsi ta' l-Istrument għall-Koperazzjoni dwar l-Iżvilupp (7) li jingħataw lill-Iraq, ikomplu jintużaw l-aktar għall-Għanijiet tal-Millennju għall-Iżvilupp (DCI), sabiex ikun garantit bħala kwistjoni ta' l-ogħla prijorità l-aċċess universali għall-kura vitali pubblika tas-saħħa fejn il-bini ta' l-istituzzjoni - u tal-kapaċità - huma meħtieġa b'mod urġenti sabiex jikkoreġu d-defiċit strutturali kbir, tittieħed azzjoni prijoritarja sabiex ikun evitat li s-sistema ta' l-edukazzjoni tibqa' sejra lura, kif ukoll l-implimentazzjoni ta' miżuri prattiċi li jiżguraw li l-bniet ikunu jistgħu jipparteċipaw b'mod sħiħ fl-edukazzjoni fil-livelli kollha u sabiex jappoġġjaw ir-rivalitizzazzjoni tas-sistema ekoloġika u soċjali tal-bwar (marshlands) u tal-protezzjoni tal-wirt kulturali uniku ta' l-Għarab tal-Bwar (“Marsh Arabs”); jintuża d-DCI sabiex jiġi pprovduti għarfien tekniku prattiku u l-iżvilupp tal-ħiliet li jappoġġjaw l-inizjattivi Iraqini sabiex tiġi identifikata u mrażżna l-ħsara ekoloġika u l-effetti tal-bidla fil-klima;

—

l-NGOs Ewropej jiġu inkoraġġiti jinvolvu ruħhom mal-kontraenti Iraqini tagħhom — li diġà huma partikolarment attivi fir-Reġjun tal-Kurdi — isir użu estensiv mill-Istrument Ewropew għad-Demokrazija u d-Drittijiet tal-Bniedem (8) meta tingħata għajnuna teknika u finanzjarja lil organizzazzjonijiet tas-soċjetà ċivili, sabiex jiġu ttrattati l-kwistjonijiet li ġejjin: il-parteċipazzjoni ugwali ta' l-irġiel u tan-nisa fil-ħajja politika, ekonomika u soċjali; il-vjolenza kontra n-nisa, l-aktar iż-żwiġijiet sfurzati, ir-reati ta' l-“unur”, it-traffikar u l-mutilazzjoni ġenitali; id-drittijiet tal-popli indiġeni u tal-persuni li jappartjenu għal minornzi u gruppi etniċi, inklużi l-Assirjani (il-Kaldej, is-Sirjaki u komunitajiet Kristjani oħra), il-Yazidi u t-Turkmen; id-drittijiet tat-tfal, speċjalment fil-kuntest tal-ġlieda kontra x-xogħol tat-tfal, il-prostituzzjoni tat-tfal u t-traffikar tat-tfal; il-ġlieda kontra d-detenzjoni arbitrarja u t-tortura; u t-tneħħija tal-piena kapitali;

—

jiġi nkoraġġit u megħjun il-Gvern ta' l-Iraq bħala kwistjoni ta' urġenza eċċezzjonali sabiex idaħħal leġiżlazzjoni ta' emerġenza ħalli jipprovdi għajnuna finanzjarja lil aktar minn miljun mara kapijiet ta' familji u tad-dipendenti tagħhom nieqsa li huma nieqsa minn kollox;

—

jiġi mkabbar il-pakkett finanzjarju tal-programm Erasmus Mundus għall-Iraq; jingħata appoġġ kemm lill-attivitajiet li għaddejjin kif ukoll lil dawk ġodda sabiex jinħolqu networks bejn l-istituzzjonijiet u l-organizzazzjonijiet akkademiċi Iraqini u barranin, akkademiċi individwali, intellettwali u organizzazzjonijiet ta' l-istudenti, sabiex l-ambjent akkademiku jerġa' jingħata l-ħajja;

—

tiġi msaħħa l-kapaċità ta' l-awtoritajiet Iraqini sabiex jeżerċitaw kontrolli tal-fruntiera effettivi, li għandhom, fost l-oħrajn, inaqqsu d-dħul ta' armi u armamenti fil-pajjiż; tingħata għajnuna biex jitwaqqaf il-fluss illegali ta' armi żgħar u ta' armamenti ħfief lejn l-Iraq, anke billi l-Kodiċi ta' Kondotta ta' l-UE dwar l-Esportazzjoni ta' l-Armi jsir jorbot legalment, billi jitjieb il-kontroll tal-Forza ta' l-Unjoni Ewropea (EUFOR) Althea dwar il-ħażna ta' armi fil-Bosnja-Ħerzegovina, billi tiġi aċċellerata l-qerda tal-ħażna ta' l-armi fil-Balkani, u billi tingħata għajnuna lill-awtoritajiet Iraqini sabiex 'ineħħu' l-fdal ta' armi żgħar u ħfief permezz ta' programm għad-diżarm fuq skala kbira, id-demobilizzazzjoni u l-integrazzjoni mill-ġdid, waqt li jsir użu kemm mill-istrumenti ta' l-ESDP kif ukoll mill-istrumenti Komunitarji;

—

jitkomplew in-negozjati ferm milqugħa u produttivi dwar il-Ftehim ġdid dwar il-Kummerċ u l-Koperazzjoni bejn l-UE u l-Iraq, waqt li tkun enfasizzata l-importanza tar-rispett għad-drittijiet tal-bniedem bħala element li jaffettwa r-relazzjonijiet kuntrattwali ta' l-UE ma' kwalunkwe pajjiż terz, anke fil-ġlieda kontra t-terroriżmu;

—

tiġi pprovduta għajnuna amministrattiva u teknika, u jiġi promoss il-bini tal-kapaċità lokali, sabiex jiġi megħjun il-Gvern Iraqi ħalli jimplimenta l-programm reċenti ta' mikro-self (micro-loan) u jaqsam l-aħjar prattiki dwar l-irwol pożittiv li l-mikro-kreditu (micro-credit) għandu fl-emanċipazzjoni tan-nisa fil-komunitajiet tagħhom, speċjalment lil aktar minn miljun mara armla li huma nieqsa minn kollox;

—

iħeġġeġ lill-Kummissjoni sabiex ittaffi l-kundizzjoni tar-refuġjati Iraqini fil-Ġordan u fis-Sirja u fil-pajjiżi l-oħra fir-reġjun effettwati mill-kriżi tar-refuġjati Iraqini, u sabiex iżżid sew it-trasparenza u l-effiċjenza ta' l-għajnuna ta' l-UE lir-refuġjati Iraqini f'dawk il-pajjiżi;

—

jiżdied l-appoġġ ta' l-UE – permezz tad-Direttorat Ġenerali tal-Kummissjoni għall-Għajnuna Umanitarja (DG ECHO) – lill-NGOs, lill-organizzazzjonijiet internazzjonali fl-isforzi tagħhom biex tittaffa l-kundizzjoni tar-refuġjati Iraqini fil-pajjiżi viċin, kif wkoll ta' l-Iraqini spustati internament (IDPs), inklużi l-4 000 familja ta' l-Assiri li fittxew rifuġju prinċipalment fil- Pjanuri ta' Nineveh; iħeġġeġ lill-awtoritajiet Iraqini sabiex jerfgħu r-responsabilitajiet tagħhom ħalli jipprovdu għajnuna finanzjarja u għajnuna mod ieħor għall-integrazzjoni mill-ġdid tar-refuġjati u ta' l-IDPs;

—

jiżdiedu l-possibilitajiet għar-refuġjati Iraqini li jsibu kenn fl-Istati Membri ta' l-UE permezz ta' programmi ta' rilokazzjoni miftehma mal-UNHCR (25 000 każ) jew permezz ta' talbiet individwali għall-ażil, jintemm il-kriterju arbitrarju attwali sabiex tingħata l-protezzjoni u jiġi eveitat kull ritorn bi sforz lejn kwalunkwe parti ta' l-Iraq; tiġi indirizzata b'mod urġenti l-kundizzjoni tar-refuġjati Palestinjani li jinsabu fir-reġjun tal-fruntiera bejn l-Iraq u s-Sirja;

—

jistieden lill-gvern Iraqi u lill-awtoritajiet internazzjonali sabiex jirkupraw l-antikitajiet li ttieħdu mill-Mużew Nazzjonali ta' l-Iraq f'Bagdad u minn postijiet f'partijiet oħra fl-Iraq wara l-intervenzjoni ta' l-2003, sabiex tiġi ppreservata l-istorja u l-kultura Iraqina għall-ġenerazzjonijiet futuri;