Id-direttiva għandha l-għan li tipproteġi s-saħħa u s-sigurtà tan-nisa fuq il-post tax-xogħol meta jkunu tqal¹ jew wara li jkunu welldu reċentement², u nisa li qed ireddgħu³.

PUNTI EWLENIN

L-Istati Membri tal-Unjoni Ewropea (UE) għandhom jgħarrfu lil min iħaddem u lill-ħaddiema nisa dwar il-linji gwida tal-Kummissjoni Ewropea rigward ir-riskji għas-saħħa u s-sigurtà fuq ix-xogħol ikkawżati minn sustanzi perikolużi u proċessi industrijali.
Meta jiġu identifikati riskji, min iħaddem irid jieħu azzjoni biex jipproteġu lill-ħaddiema nisa kkonċernati, eż. billi jpoġġihom f’pożizzjoni oħra jew jagħtihom il-liv.
Meta jingħata l-liv, min iħaddem għandu jiggarantixxi d-drittijiet tal-impjieg u l-ħlas ta’ allowance adegwata sabiex jikkumpensa għal kwalunkwe telf ta’ introjtu.
Il-ħaddiema nisa tqal mhumiex obbligati li jaħdmu xiftijiet bil-lejl, soġġetti għas-sottomissjoni ta’ ċertifikat mediku.
Il-ħaddiema nisa tqal jistgħu jsirulhom eżaminazzjonijiet mediċi ta’ qabel it-twelid matul is-sigħat tax-xogħol mingħajr ma jitilfu mill-paga tagħhom.
Id-Direttiva tipprovdi għal minimu ta’ 14-il ġimgħa kontinwa ta’ liv tal-maternità qabel u/jew wara t-twelid, inkluż mill-inqas ġimagħtejn ta’ liv tal-maternità obbligatorju.
In-nisa ma għandhomx jitkeċċew mix-xogħol minħabba t-tqala u l-maternità tagħhom.
L-emendar tar-Regolament (UE) 2019/1243 jagħti lill-Kummissjoni s-setgħa li tadotta atti delegati biex tagħmel emendi strettament tekniċi għall-Anness I, sabiex tqis il-progress tekniku, il-bidliet fir-regolamenti jew fl-ispeċifikazzjonijiet internazzjonali u sejbiet ġodda.
L-Anness I fih lista mhux eżawrjenti ta’ aġenti fiżiċi, bijoloġiċi u kimiċi u l-kundizzjonijiet tax-xogħol imsemmija fl-Artikolu 4 tad-Direttiva (valutazzjoni u informazzjoni).
L-Anness II fih lista mhux eżawrjenti ta’ aġenti u kundizzjonijiet tax-xogħol imsemmija fl-Artikolu 6 tad-Drettiva (każijiet li fihom l-espożizzjoni hija pprojbita).

MINN META TAPPLIKA D-DIRETTIVA?

Ilha tapplika mill-24 ta’ Novembru 1992 u kellha ssir liġi fl-Istati Membri sal-24 ta’ Novembru 1994.

SFOND

L-Artikolu 153 tat-Trattat dwar il-Funzjonament tal-Unjoni Ewropea jagħti lill-UE l-awtorità li tadotta leġiżlazzjoni fil-qasam tas-sigurtà u s-saħħa fuq il-post tax-xogħol, sabiex tappoġġa u tikkomplementa l-attivitajiet tal-Istati Membri.
Id-Direttiva 92/85/KEE hija waħda minn bosta “direttivi derivati” adottati skont id-Direttiva Qafas 89/391/KEE dwar is-saħħa u s-sigurtà tal-ħaddiema fuq ix-xogħol (ara s-sommarju).
Il-prinċipju 10 tal-Pilastru Ewropew tad-Drittijiet Soċjali jiddikjara li l-ħaddiema għandhom id-dritt għal livell għoli ta’ protezzjoni tas-saħħa u s-sigurtà tagħhom fuq il-post tax-xogħol.
Għal aktar informazzjoni, ara:
- Saħħa u sigurtà fuq il-post tax-xogħol (il-Kummissjoni Ewropea)
- Direttiva 92/85/KEE ħaddiema nisa tqal (Aġenzija Ewropea għas-Saħħa u s-Sigurtà fuq il-Post tax-Xogħo).

TERMINI EWLENIN

Ħaddiema nisa tqila. Mara tqila li tgħarraf lil min iħaddimha dwar il-kundizzjoni tagħha, f’konformità mal-leġiżlazzjoni nazzjonali u/jew prattika nazzjonali.
Ħaddiema nisa li welldu reċentement. Mara li welldet reċentement skont it-tifsira tal-leġiżlazzjoni nazzjonali u/jew prattika nazzjonali u li tgħarraf lil min iħaddimha dwar il-kundizzjoni tagħha, f’konformità ma’ dik il-leġiżlazzjoni u/jew prattika.
Ħaddiema nisa li qed ireddgħu. Mara li qed treddgħa kif definit fil-leġiżlazzjoni nazzjonali u/jew prattika nazzjonali u li tgħarraf lil min iħaddimha dwar il-kundizzjoni tagħha, f’konformità ma’ dik il-leġiżlazzjoni u/jew prattika.

DOKUMENT PRINĊIPALI

Id-Direttiva tal-Kunsill 92/85/KEE tad-19 ta’ Ottubru 1992 dwar l-introduzzjoni ta’ miżuri sabiex jinkoraġġixxu titjib fis-sigurtà u s-saħħa fuq il-post tax-xogħol għall-ħaddiema nisa tqal u ħaddiema li welldu reċentement, jew qed ireddgħu (l-għaxar Direttiva individwali fit-tifsira tal-Artikolu 16(1) tad-Direttiva 89/391/KEE) (ĠU L 348, 28.11.1992, pp. 1–7).

Emendi suċċessivi tad-Direttiva 92/85/KEE ġew inkorporati fit-test oriġinali. Din il-verżjoni konsolidata għandha valur dokumentarju biss.