1)

L-eżekuzzjoni tal-Artikolu 1 tad-Deċiżjoni tal-Kummissjoni Ewropea C(2020) 3013 final tal-4 ta’ Mejju 2020 dwar proċedura skont l-Artikolu 18(3) u l-Artikolu 24(1)(d) tar-Regolament tal-Kunsill (KE) Nru 1/2003 (Każ AT.40684 – Facebook Marketplace) sa fejn l-obbligu stabbilit fih jirrigwarda d-dokumenti li ma humiex marbuta mal-attivitajiet kummerċjali ta’ Facebook Ireland Ltd u li jinkludu data personali sensittiva, u sakemm ma tkunx implimentata l-proċedura msemmija fil-punt 2, hija sospiża.

2)

Facebook Ireland għandha tidentifika d-dokumenti li jinkludu d-data msemmija fil-punt 1 u tibgħathom lill-Kummissjoni fuq mezz elettroniku separat. Dawn id-dokumenti mbagħad għandhom jitqiegħdu f’kamra ta’ data virtwali li għandha tkun aċċessibbli għal numru kemm jista’ jkun limitat ta’ membri tat-tim inkarigat bl-investigazzjoni, fil-preżenza (virtwali jew fiżika) ta’ numru ekwivalenti ta’ avukati ta’ Facebook Ireland. Il-membri tat-tim inkarigat bl-investigazzjoni għandhom jeżaminaw u jagħżlu d-dokumenti inkwistjoni, filwaqt li jagħtu l-possibbiltà lill-avukati ta’ Facebook Ireland li jikkummentaw dwarhom qabel ma d-dokumenti meqjusa rilevanti jiġu inklużi fil-fajl. F’każ ta’ nuqqas ta’ qbil fuq il-klassifikazzjoni ta’ dokument, l-avukati ta’ Facebook Ireland għandhom id-dritt li jispjegaw ir-raġunijiet għan-nuqqas ta’ qbil tagħhom. F’każ ta’ nuqqas ta’ qbil persistenti, Facebook Ireland tista’ tibda proċedura ta’ arbitraġġ quddiem id-Direttur tal-Informazzjoni, tal-Komunikazzjoni u tal-Mezzi tal-Komunikazzjoni tad-Direttorat Ġenerali “Kompetizzjoni” tal-Kummissjoni.

3)

Il-kumplament tat-talba għal miżuri provviżorji huwa miċħud.

4)

Id-digriet tal-24 ta’ Lulju 2020, Facebook Ireland vs Il-Kummissjoni (T-452/20 R), huwa rrevokat.

5)

L-ispejjeż huma rriżervati.