—

Ir-rikorrenti tilmenta, l-ewwel nett, dwar l-applikazzjoni żbaljata tal-kunċett ta’ “interessi kummerċjali” fis-sens tal-ewwel inċiż tal-Artikolu 4(2) tar-Regolament Nru 1049/2001. Id-deċiżjoni li tirriżulta mir-rapport finali, adottat wara proċess amministrattiv komprensiv dwar l-osservanza minn ICIM tar-regoli – Regolament ta’ Implimentazzjoni (UE) Nru 920/2013 (2) – applikabbli għall-organi nnotifikati, ma fiha l-ebda informazzjoni li tradizzjonalment titqies li hija kummerċjali. F’kull każ, l-allegat dannu għar-reputazzjoni li jirriżulta mill-iżvelar tar-rapport finali ma huwiex, fih innifsu, suffiċjenti sabiex jiġġustifika l-applikazzjoni tad-deroga msemmija fl-ewwel inċiż tal-Artikolu 4(2) tar-Regolament Nru 1049/2001. It-tieni nett, id-deċiżjoni kkontestata ma turix b’mod ċar, analitiku u inekwivoku l-elementi li wasslu lill-Kummissjoni sabiex tqis li jkun ta’ ħsara għal ICIM jekk FTI tingħata aċċess għar-rapport finali, jew, saħansitra, tagħti informazzjoni dwar l-eżitu tal-ibbilanċjar tal-allegati interessi kummerċjali ta’ ICIM u tal-interess tal-imsieħba kummerċjali tagħha – inkluża r-rikorrenti – li jkunu jafu l-grad ta’ affidabbiltà u kredibbiltà tal-organu nnotifikat.

—

Id-deċiżjoni kkontestata għandha tiġi annullata minħabba l-fatt li l-Kummissjoni ddikjarat, minn naħa, li ma kienx hemm interess pubbliku superjuri għall-iżvelar u, min-naħa l-oħra, li ma kienx hemm interessi pubbliċi oħra li huma superjuri għall-interessi protetti mill-ewwel inċiż tal-Artikolu 4(2) tar-Regolament Nru 1049/2001. Ir-rikorrenti ssostni li, kuntrarjament għall-ġurisprudenza fil-kawża Il-Kummissjoni vs EnBW (3), in-natura essenzjali tar-rapport finali għall-finijiet tal-protezzjoni ġudizzjarja quddiem il-qrati nazzjonali ma ġietx ikkunsidrata u ma ġietx meqjusa li hija interess pubbliku superjuri. F’kull każ, id-deċiżjoni kkontestata hija vvizzjata mill-fatt li l-Kummissjoni ma qisitx li l-protezzjoni tal-kompetizzjoni u tas-saħħa pubblika huma interessi pubbliċi superjuri.

—

Fl-aħħar nett, il-Kummissjoni ma evalwatx korrettament il-possibbiltà li jingħata aċċess għar-rapport finali, u dan bi ksur tal-prinċipju ta’ proporzjonalità. L-informazzjoni sensittiva jew oġġettivament sigrieta fid-deċiżjoni ta’ natura amministrattiva meħuda mill-Kummissjoni setgħet tiġi mgħottija. Ma kien hemm xejn li jimpedixxi l-preparazzjoni ta’ verżjoni mhux kunfidenzjali tar-rapport finali li tippermetti li wieħed jifhem suffiċjentement l-evalwazzjoni ta’ ICIM mingħajr ma tiżvela, b’hekk, l-eventwali (għalkemm mhux probabbli) sigrieti kummerċjali tagħha.