15.1.2015   

MT

Il-Ġurnal Uffiċjali tal-Unjoni Ewropea

C 12/99

1.1.1

Il-Kumitat jilqa' b'sodisfazzjon il-proposta għal programm ġdid dwar soluzzjonijiet ta' interoperabbiltà għall-amministrazzjonijiet pubbliċi, is-soċjetà ċivili u ċ-ċittadini Ewropej (“ISA2”) Il-proposta hija ppreżentata tajjeb u x'aktarx tikkontribwixxi għall-Aġenda Diġitali għall-Ewropa billi tiżgura li l-amministrazzjonijiet pubbliċi jkunu jistgħu jaqsmu flimkien b'mod effiċjenti u effikaċi data bbażata fuq livelli u għodod komuni.

1.1.2

Għalkemm l-amministrazzjonijiet pubbliċi huma l-punt fokali tal-ISA2, il-KESE jemmen li hemm benefiċċju potenzjali għas-soċjetà ċivili, u l-Kumitat jittama li dan il-benefiċċju jista' jitwettaq għalkollox.

1.1.3

Madankollu hemm żewġ preokkupazzjonijiet ewlenin li, jekk jiġu indirizzati, isaħħu l-ISA2.

1.1.4

L-ewwel nett, iċ-ċittadini huma dejjem aktar konxji u mħassba li l-amministrazzjonijiet pubbliċi jiġbru u jużaw data personali jew data miġbura b'mod aktar mifrux. Huma konxji wkoll li interoperabbiltà akbar għandha implikazzjonijiet dwar kif id-data tiġi kondiviża u użata. Il-proposta ma ssemmix riskji jew preokkupazzjonijiet bħal dawn, la għaċ-ċittadini u lanqas għat-twassil b'suċċess tal-ISA2. Il-KESE jiġbed l-attenzjoni wkoll għal waħda mill-Opinjonijiet preċedenti tiegħu dwar il-protezzjoni tad-data, u l-fehma tal-Kontrollur Ewropew għall-Protezzjoni tad-Data u jenfasizza l-ħtieġa li jissaħħu s-salvagwardji għaċ-ċittadini (1) (ara l-ittra tal- Kontrollur Ewropew għall-Protezzjoni tad-Data dwar il-Proposta għal Regolament dwar il-protezzjoni tad-data ġenerali: https://secure.edps.europa.eu/EDPSWEB/webdav/site/mySite/shared/Documents/Consultation/Comments/2014/14-02-14_letter_Council_reform_package_EN.pdf).

1.1.5

It-tieni nett, l-ISA2 jista' jkollu l-potenzjal li jfixkel is-suq attwali għas-soluzzjonijiet ta' interoperabbiltà, b'mod partikolari permezz tat-tħaddim ta' attivitajiet 'fl-inkubatur'.

1.2.1

Il-KESE jilqa' b'sodisfazzjoni il-programm ISA2 dwar l-interoperabbiltà u jappoġġja din il-proposta.

1.2.2

Il-Kumitat jirrakkomanda li l-programm jibni fuq il-programm attwali ISA u programmi oħra biex iwassal l-Aġenda Diġitali għall-Ewropa.

1.2.3

Il-KESE jixtieq jiġi informat tal-progress li jagħmel l-ISA2.

1.2.4

Il-fiduċja pubblika u l-kunfidenza fl-amministrazzjonijiet u l-kapaċità tagħhom li jiġġestixxu data personali u jirrispettaw il-privatezza hija raġuni għat-tħassib. Il-proposta ma ssemmix il-fiduċja pubblika u l-kunfidenza bħala riskji, u ma tinnota l-ebda riskju ieħor jew żvantaġġi għall-interoperabbiltà. Għandha tikkunsidra wkoll kwalunkwe tħassib li jista' jkollu l-Kontrollur Ewropew għall-Protezzjoni tad-Data fir-rigward tal-ipproċessar tad-data personali f'aktar minn Stat Membru wieħed. Dawn il-kwistjonijiet għandhom jiġu indirizzati b'mod aktar ċar fl-attivitajiet tal-programm.

1.2.5

Għandu jiġi żviluppat Sommarju konsistenti għaċ-Ċittadini li jindirizza t-tħassib dwar il-bilanċ bejn spiża u valur u jiġġustifika l-benefiċċji soċjali ddikjarati mill-programm.

1.2.6

Għandhom jiġu użati aktar każijiet ta' użu prattiku li juru l-ħtieġa prattika, mill-perspettiva taċ-ċittadini, tal-interoperabbiltà bejn l-amministrazzjonijiet pubbliċi nazzjonali.

1.2.7

Il-KESE jirrakkomanda li għandu jsir sforz partikolari biex il-ħidma mwettqa fl-ISA2 għas-soċjetà ċivili tiġi komunikata, peress li l-organizzazzjonijiet jistgħu jgawdu mill-ħidma fuq l-interoperabbiltà, jew jikkontribwixxu biex iwasslu l-programm.

1.2.8

It-tħaddim ta' attivitajiet ta' “inkubatur” u tal-“pont tas-soluzzjonijiet” għandu l-potenzjal li jfixkel is-suq. Għalhekk:

1.2.9

Ir-restrizzjoni għal skopijiet mhux kummerċjali jista' jillimita l-impatt tal-ISA2: jekk is-soċjetà ċivili ma tistax tibni fuq il-ħidma tal-ISA2 għal skopijiet kummerċjali, mhux probabbli li ser juru interess fil-programm.

1.2.10

Għal raġunijiet ta' multilingwiżmu, kull soluzzjoni tal-IT trid tkun kompatibbli mal-Universal Character Set (Unicode, ISO/IEC 10646) (UCS), kif ġie mitlub mir-rapport finali tal-Grupp ta' Livell Għoli dwar il-Multilingwiżmu (2007). Jekk hemm rekwiżit legali attwali jew potenzjalment futur għall-interoperabbiltà fil-livell Ewropew, irid jiġi speċifikat sottogrupp tal-UCS biex titħaffef il-ġestjoni.

2.1

Spiss sar l-argument li d-data għandha l-potenzjal li tittrasforma s-servizzi taċ-ċittadini u l-organizzazzjonijiet li jwassluhom fis-setturi pubbliċi u privati u madwar is-soċjetà ċivili. Id-data għandha l-potenzjal li tippromovi r-riċerka u l-iżvilupp, u tkabbar il-produttività u l-innovazzjoni. Mhux ta' b'xejn il-frażi “Id-data saret ir-riżorsa naturali l-ġdida” daqstant popolari. Pereżempju ara l-artiklu: http://www.forbes.com/sites/ibm/2014/06/30/why-big-data-is-the-new-natural-resource.

2.2

Dejjem aktar data qed tinħoloq u tinġabar dwar l-aspetti kollha ta' ħajjitna: minn proċessi amministrattivi bħal forom ta' tassazzjoni elettroniċi, għall-ġbir passiv ta' data dwar is-saħħa minn arloġġ intelliġenti. L-hekk imsejħa “data kbira” bħad-data mill-utenti tas-sistemi tat-trasport pubbliku, għandha l-kapaċità li toħloq revoluzzjoni fil-mod li bih niddisinjaw u nippjanaw is-servizzi pubbliċi. Filfatt inizjattivi ta' politika jew servizzi pubbliċi dejjem aktar qed jiddependu mill-kapaċità diġitali. Eżempju attwali fir-Renju Unit huwa taxxa fuq il-vetturi: it-tpartit tal-karta tonda tat-taxxa tal-karozza jiddependi mill-interoperabbiltà (għal definizzjoni ta' interoperabbiltà ara: http://www.ariadne.ac.uk/issue24/interoperability) tal-bażijiet tad-data tal-assigurazzjoni, is-sjieda u l-MOT (verifika ta' sigurtà). Dan wassal biex l-applikazzjoni għat-taxxa tal-karozza issir eħfef għaċ-ċittadini, filwaqt li hemm rapporti li juru konformità akbar mas-sistema. Fil-qosor, aħna ngħixu f'soċjetà diġitali li fiha huwa possibbli li ntejbu b'mod sostanzjali l-kapaċità tagħna li nipprovdu servizzi konnessi b'kapaċità diġitali. L-UE għandha firxa ta' programmi u “Aġenda Diġitali għall-Ewropa” aktar mifruxa li tappoġġja t-twettiq ta' ekonomija u soċjetà diġitali (ara http://ec.europa.eu/digital-agenda).

2.3

Nistgħu niksbu l-benefiċċji ta' soċjetà diġitali u b'mod aktar speċifiku l-gvern diġitali, billi d-data ssir aktar aċċessibbli faċilment, jew f'xi każijiet, aktar faċli biex tiġi użata mill-ġdid peress li dawk li jkollhom id-drittijiet jippermettu l-użu mill-ġdid mingħajr restrizzjonijiet (open data; għal definizzjoni ara http://theodi.org/guides/what-open-data). Fejn id-data tkun disponibbli, nistgħu nistabbilixxu standards għall-interoperabbiltà: jiġifieri, tkun aktar faċli li d-data tiġi skambjata u użata mill-ġdid. Dan jista' jkun sempliċi daqs li d-data tkun tista' tinqara bil-magni (flok ma tkun imsakkra f'formati ta' siedja bħall-PDF), jew jiġu identifikati formati għas-sottomissjoni u l-ġbir tad-data (bħall-iXBRL għar-rendikonti tal-kumpaniji; ara http://en.wikipedia.org/wiki/XBRL). Ta' min wieħed jinnota, għall-iskopijiet ta' dan id-dokument, li ħafna mid-data li jiġbru l-amministrazzjonijeit pubbliċi hija ta' natura personali u privata (ara d-dijagramma). Dan huwa importanti għax il-kwistjoni tad-data personali għandha implikazzjonijiet għal x'jifhem il-pubbliku b'interoperabbiltà u l-applikazzjoni tagħha.

Dijagramma 1: Data kbira, Data miftuħa, u Data personali

2.4

Il-Kummissjoni ssostni li l-interoperabbiltà bejn stati nazzjonijiet hija ostaklu elettroniku partikolari biex iċ-ċittadini jużaw is-servizzi pubbliċi, bħal dawk marbutin mass-saħħa b'mod aktar effikaċi, li issa jiddependu ħafna mid-data u l-kapaċità tal-ICT. Huwa sostnut ukoll li n-nuqqas ta' interoperabbiltà huwa ostaklu għall-implimentazzjoni tal-politiki madwar l-UE. Għall-kuntrarju, l-inizjattivi ta' politika bħas-suq uniku jeħtieġu l-interoperabbiltà tar-reġistri nazzjonali tan-negozji. Fil-qosor, l-interoperabbiltà hija essenzjali għal Ewropa moderna u integrata.

3.1

Il-Kummissjoni ilha timplimenta programm biex jiżviluppa l-interoperabbiltà mill-1995 'l hawn. Dan kien fih ukoll l-iżvilupp ta' strateġija u qafas ta' interoperabbiltà (ara http://eur-lex.europa.eu/legal-content/MT/TXT/?qid=1413531806250&uri=CELEX:52010DC0744 għal ħarsa ġenerali eċċellenti). Il-Kummissjoni tisħaq li l-appoġġ għall-interoperabbiltà kellu suċċess: “billi jiffaċilita l-interazzjoni transfruntiera u transsettorjali elettronika effiċjenti u effettiva (bejn l-amministrazzjonijiet) li tippermetti t-twettiq tas-servizzi pubbliċi elettroniċi sabiex jgħin fl-implimentazzjoni tal-politiki u l-attivitajiet tal-Unjoni” (Kwotazzjoni mid-Deċiżjoni tal-Parlament Ewropew u tal-Kunsill dwar soluzzjonijiet ta' interoperabbiltà għall-amministrazzjonijiet pubbliċi, in-negozji u ċ-ċittadini Ewropej (ISA2) (p. 3)).

3.2

Il-programm attwali, Soluzzjonijiet interoperabbli għall-amministrazzjonijiet pubbliċi Ewropej (ISA) jintemm fil-31 ta' Diċembru 2015. Madankollu għad fadal ħafna xi jsir: “diġitali awtomatikament” għadha fil-bidu tagħha f'xi oqsma. Jekk il-ħtieġa għall-interoperabbiltà ma tiġix ippjanata u appoġġjata fil-punti li fih tkun qed tiġi proposta leġislazzjoni ġdida, x'aktarx l-amministrazzjonijiet pubbliċi ma jiksbux il-benefiċċji tal-interoperabbiltà.

3.3

Programm ISA2 ġdid (http://ec.europa.eu/isa/isa2/index_en.htm) huwa propost li:

3.4

Saret konsultazzjoni wiesgħa dwar il-programm ISA2 il-ġdid. Dawk li ġew ikkonsultati wieġbu li l-amministrazzjonijiet pubbliċi għandhom jibqgħu l-punt fokali tal-ISA. L-aktar rispons fil-wisa' li ntbagħat kien li l-ISA għandu jgħin biex titnaqqas id-duplikazzjoni tal-isforzi u li l-ISA għandu jiffoka fuq li jikkoordina ma' programmi oħra tal-UE.

3.5

Il-programm propost tfassal fid-dawl tal-valutazzjonijiet tal-programmi preċedenti. B'mod partikolari, l-ISA propost ser jiffoka fuq li jipprovdi soluzzjonijiet ta' interoperabbiltà, imbagħad jipprovdi dawn is-soluzzjonijiet lill-amministrazzjonijiet pubbliċi.

3.6

L-ispiża proposta fuq il-programm ISA2 hija ta' EUR 131 miljun għall-perjodu 2014-2020.

3.7

Ġie diskuss li jekk l-ISA2 ma jipproċedix, tnaqqis fl-appoġġ għall-interoperabbiltà ser iwassal għal frammentazzjoni tal-istandards u s-sistemi, u duplikazzjoni tal-isforzi moħlija fl-iżvilupp ta' soluzzjonijiet jew sistemi ġodda. Dan x'aktarx ser iwassal għal tnaqqis fl-effiċjenza peress li l-amministrazzjonijiet pubbliċi jsibuha aktar diffiċli biex jagħmlu tranżazzjonijiet ma' xulxin.

4.1

It-teħeġġiġ u l-investiment kontinwi għall-investiment fl-interoperabbiltà huma kemm neċessarji kif ukoll mixtieqa. L-ISA2 ser ikun meħtieġ biex l-UE tipproċedi bl-Aġenda Diġitali għall-Ewropa, . Ser ikun meħtieġ li jiġi żgurat li l-partijiet interessati jifhmu r-rabtiet bejn il-programmi differenti sabiex jevitaw li jkun hemm konfużjoni (ara pereżempju http://ec.europa.eu/isa/documents/isa_the_difference_between_the_digital_agenda__isa__egov_action_plan_eis_eif_en.pdf li tfiehem kif l-ISA tirrelata mal-Aġenda Diġitali għall-Ewropa).

4.2

Jekk l-esperjenza tar-Renju Unit hija ta' min joqgħod fuqha, hemm evidenza li l-amministraturi pubbliċi għad għandhom bżonn ta' appoġġ u assistenza sabiex jaċċedu u jużaw mill-ġdid id-data (ara http://theodi.org/blog/guest-blog-how-make-open-data-more-open-close-gaps). Dan jinkludi l-ħtieġa għal ħiliet tekniċi. L-ISA2 jista' jgħin biex jipprovdihom.

4.3

Hekk kif aktar u aktar servizzi pubbliċi jsiru “diġitali awtomatikament”, huwa importanti li tiġi massimizzata l-effiċjenza tal-infiq pubbliku fuq is-soluzzjonijiet tal-ICT. Dan għandu jiġi faċilitat billi jkun żgurat li l-provvista tagħhom hija ppjanata minn fażi bikrija biżżejjed u, fejn ikun possibbli, ikun hemm skambju u użu mill-ġdid ta' soluzzjonijiet sabiex jiġi massimizzat il-valur tal-infiq pubbliku. L-ISA2 huwa kontribut mixtieq għal dan il-għan.

4.4

Minkejja li l-attenzjoni tal-programm propost hija fuq l-amministrazzjonijiet pubbliċi, ta' min wieħed jinnota li l-organizzazzjonijiet tas-soċjetà ċivili ukoll x'aktarx jibbenefikaw mill-attivitajiet ta' interoperabbiltà. Fil-każ tas-soċjetà ċivili, hemm attenzjoni akbar fuq il-koproduzzjoni; u uħud mill-aktar żviluppi innovattivi fis-soċjetà ċivili huma fejn il-koproduzzjoni u s-soluzzjonijiet tat-teknoloġija qed jiġu applikati f'oqsma tas-servizz pubbliku, bħalma huma l-kura tas-saħħa u l-ħarsien soċjali. X'aktarx l-Arkitettura Ewropea ta' Referenza għall-Interoperabbiltà ser tgawdi minn dan il-pajsaġġ li qed jevolvi.

4.5

Il-fiduċja pubblika u l-kunfidenza fl-amministrazzjonijiet u l-kapaċità tagħhom li jiġġestixxu data personali u jirrispettaw il-privatezza hija raġuni għat-tħassib. Il-proposta ma ssemmix il-fiduċja pubblika u l-kunfidenza bħala riskji, u ma tinnota l-ebda riskju ieħor jew żvantaġġi għall-interoperabbiltà.

5.1

Il-Kumitat jilqa' b'sodisfazzjon il-fatt li fit-tfassil tal-ISA2 tqiesu l-fehmiet tal-partijiet interessati u t-tagħlimiet mill-programmi preċedenti. Jilqa' b'sodisfazzjoni ukoll il-fatt li l-programm jibni fuq ix-xogħol eżistenti u ma jippruvax jibda minn direzzjoni kompletament ġdida.

5.2

Jilqa' wkoll l-enfasi kemm fuq il-promozzjoni tal-interoperabbiltà kif ukoll il-provvediment ta' parir u appoġġ aktar prattiċi. Minħabba l-istorja twila ta' problemi tal-ICT fuq skala kbira fl-amministrazzjoni pubblika tar-Renju Unit, huwa partikolarment sodisfatt dwar l-attenzjoni fuq il-fażi bikrija tal-ippjanar għall-impatt tal-bidla leġislattiva fuq l-ICT .

5.3

Il-proposta tissaħħaħ jekk jiġu użati aktar każijiet ta' użu prattiku li juru l-ħtieġa prattika, mill-perspettiva taċ-ċittadini, tal-interoperabbiltà bejn in-nazzjonijiet. Fil-preżent jista' jidher mill-perspettiva tal-partijiet interessati li l-benefiċċji jakkumulaw għall-amministraturi pubbliċi interessati fl-armonizzazzjoni transkonfinali iktar milli għaċ-ċittadini li jużaw servizzi pubbliċi tipiċi. Għandu jiġi żviluppat Sommarju konsistenti għaċ-Ċittadini (is-Sommarju għaċ-Ċittadini tal-2010 jinsab hawnhekk: http://ec.europa.eu/isa/documents/isa_20101216_citizens_summary_en.pdf.) li jindirizza t-tħassib dwar il-bilanċ bejn spiża u valur u jiġġustifika l-benefiċċji soċjali ddikjarati mill-programm.

5.4

Diġà ġie rimarkat li dawk konsultati waqt l-iżvilupp tal-ISA2 wieġbu li l-amministrazzjonijiet pubbliċi għandhom jibqgħu l-punt fokali tal-ISA. Il-KESE nnota bl-istess mod li s-soċjetà ċivili ser tibbenefika mill-interoperabbiltà. Jista' jkun il-każ li l-partijiet interssati fis-soċjetà ċivili ma kinux konxji biżżejjed tal-konsultazzjoni, li rriżulta ffokat fuq l-amministrazzjonijiet pubbliċi għall-ISA2. Jista' jkun il-każ li jeħtieġ attenzjoni akbar fuq il-komunikazzjoni mas-soċjetà ċivili biex l-ISA2 jagħraf l-impatt fuq l-infiq tal-programm.

5.5

Il-proposta tipproponi li l-ISA2 għandu jiżviluppa u jibni (“inkubatur” tas-) soluzzjonijiet ta' interoperabbiltà. Din tgħid ukoll li l-ISA2 għandu jkun “pont għas-soluzzjonijiet” sabiex tkun żgurata s-sostenibbiltà tas-soluzzjonijiet tal-ICT. L-għażla ta' soluzzjonijiet ġodda, u l-għażla ta' soluzzjonijiet għal appoġġ aktar fit-tul sakemm tintlaħaq is-sostenibbiltà, għandhom jiġu pruvati b'mod rigoruż u valutati fi process li l-partijiet interessati jista' jkollhom fiduċja fih.

5.6

It-tħaddim ta' attivitajiet ta' “inkubatur” u tal-“pont tas-soluzzjonijiet” għandu l-potenzjal li jfixkel is-suq. Il-Kummissjoni jista' jkollha bżonn tivverifika li dawn l-attivitajiet mhux ser ifixklu s-suq u jkollhom l-effett li jnaqqsu l-provvista kummerċjali tal-interoperabbiltà tas-soluzzjonijiet tal-ICT.

5.7

Jekk it-tfixkil tas-suq huwa raġuni valida għat-tħassib, l-inkubatur għandu jiffoka minflok fuq l-iżvilupp u l-adozzjoni ta' 'libreriji ta' servizzi' (utility libraries) aktar milli soluzzjonijiet lesti għall-użu (turn-key solutions). Dan se jnaqqas it-tgħawwiġ tas-suq filwaqt li jiffaċilità it-tixrid tal-istandards.

5.8

L-Artikolu 13 jgħid li s-soluzzjonijiet stabbiliti u operati mill-Programm ISA2 jistgħu jintużaw minn inizjattivi mhux tal-Unjoni, għal finijiet mhux kummerċjali. Ir-restrizzjoni għal skopijiet mhux kummerċjali tista' tillimita l-impatt tal-ISA2: jekk l-organizzazzjonijiet tas-soċjetà ċivili ma jistgħux jibnu fuq il-ħidma tal-ISA2 għal skopijiet kummerċjali, mhux probabbli li ser juru interess fil-programm.

5.9

Ir-reazzjoni tal-pubbliku fir-rigward tal-kapaċità diġitali tal-istat tippreżenta riskju għas-suċċess tal-proposti ta' interoperabbiltà. Hekk kif iċ-ċittadini tgħallmu aktar dwar il-kamp ta' applikazzjoni, in-natura u l-poter tal-“istat ta' sorveljanza”, saru wkoll aktar imħassbin dwar is-salvagwardji meħtieġa li għandhom ikunu implimentati (ara https://www.privacyinternational.org/blog/defining-the-surveillance-state). Iċ-ċittadini qed isiru dejjem aktar imħassbin dwar id-dritt tagħhom għall-privatezza u l-implikazzjonijiet etiċi ta' data konnessa u skambjata, iżda din il-proposta prattikament ma tgħid xejn dwar x'jifhem il-pubbliku b'data jew interoperabbiltà konnessa. Bl-istess mod, il-Kontrollur Ewropew għall-Protezzjoni tad-Data jinsab imħasseb dwar l-ipproċessar tad-data personali f'aktar minn Stat Membru wieħed, attività li x'aktarx titħaffef permezz tal-interoperabbiltà. Il-KESE jixtieq jiġbed l-attenzjoni wkoll għal waħda mill-Opinjonijiet preċendenti tiegħu b'rabta mal-protezzjoni tad-data u jenfasizza l-ħtieġa li jissaħħu s-salvagwardji għaċ-ċittadini b'rabta mad-data personali tagħhom (2) (ara l-ittra tal-Kontrollur Ewropew għall-Protezzjoni tad-Data dwar il-Proposta għal Regolament dwar il-protezzjoni tad-data ġenerali:

https://secure.edps.europa.eu/EDPSWEB/webdav/site/mySite/shared/Documents/Consultation/Comments/2014/14-02-14_letter_Council_reform_package_EN.pdf).

5.10

Il-proposta tissaħħaħ jekk issemmi u tindirizza dan it-tħassib. Barra minn hekk, it-tfassil tal-programm jista' jissaħħaħ billi jissemma b'mod aktar espliċitu x-xogħol mal-organizzazzjonijiet tas-soċjetà ċivili u l-akkademja sabiex nifhmu u jiġi indirizzat il-fehim pubbliku u biex jissaħħu s-salvagwardji etiċi li qed isiru dejjem aktar importanti għar-reputazzjoni u l-fiduċja tal-pubbliku fl-amministrazzjonijiet pubbliċi.

5.11

L-aħħar kumment fid-dettall huwa ta' natura teknika. Il-Universal Character Set huwa kruċjali biex il-multilingwiżmu jkun applikabbli għal-lingwi miktuba. Il-Grupp ta' Livell Għoli dwar il-Multilingwiżmu, li twaqqaf mill-Kummissarju għall-Edukazzjoni tal-UE Ján Figeľ fil-ħarifa tal-2006, ippubblika r-rapport finali tiegħu fil-Jum Ewropew tal-Lingwi 2007 (ara http://www.lt-innovate.eu/resources/document/ec-high-level-group-multilingualism-final-report-2007). Dan jinkludi r-rakkomandazzjoni li l-bażijiet tad-data għall-ġestjoni interna tad-dokumenti u l-interfaċji ta' applikazzjoni ta' softwer u tagħmir ta' ħardwer jinbnew madwar Unicode, li jippermetti r-rappreżentazzjoni tal-alfabetti tal-lingwi kollha. Il-Grupp jappella lil dawk l-awtoritajiet fl-Istati Membri u l-fornituri tal-webmail li għadhom ma għamlux dan biex jaqilbu għall-Unicode sabiex jiġi evitat li tibqa' d-diskriminazzjoni kontra ċ-ċittadini tal-UE fuq il-bażi ta' nazzjonalità jew lingwa. Ser jiġi speċifikat sottogrupp ta' UCS għall-iffaċilitar tal-ġestjoni: dan jista' jkun selezzjoni mill-ittri Latini, jew ittri Latini, Griegi u Ċirilliċi (il-UCS jerfa' aktar minn 90  000 ittra).

5.12

Għal raġunijiet ta' multilingwiżmu, kull soluzzjoni tal-IT trid tkun kompatibbli mal-Universal Character Set (Unicode, ISO/IEC 10646), kif ġie mitlub mir-rapport finali tal-Grupp ta' Livell Għoli dwar il-Multilingwiżmu (2007). Għaldaqstant, jekk hemm rekwiżit legali attwali jew potenzjalment futuri għall-interoperabbiltà fil-livell Ewropew, huwa rakkomandat li jrid jiġi speċifikat sottogrupp tal-UCS biex titħaffef il-ġestjoni.