This document is an excerpt from the EUR-Lex website
Document 32023R1119
Commission Implementing Regulation (EU) 2023/1119 of 12 January 2023 laying down implementing technical standards for the application of Directive (EU) 2019/2034 of the European Parliament and of the Council with regard to standard forms, templates and procedures for the information sharing between the competent authorities of home and host Member States (Text with EEA relevance)
Regolament ta’ Implimentazzjoni tal-Kummissjoni (UE) 2023/1119 tat-12 ta’ Jannar 2023 li jistabbilixxi standards tekniċi ta’ implimentazzjoni għall-applikazzjoni tad-Direttiva (UE) 2019/2034 tal-Parlament Ewropew u tal-Kunsill fir-rigward ta’ formoli, mudelli u proċeduri standard għall-kondiviżjoni tal-informazzjoni bejn l-awtoritajiet kompetenti tal-Istati Membri tad-domiċilju u dawk ospitanti (Test b’rilevanza għaż-ŻEE)
Regolament ta’ Implimentazzjoni tal-Kummissjoni (UE) 2023/1119 tat-12 ta’ Jannar 2023 li jistabbilixxi standards tekniċi ta’ implimentazzjoni għall-applikazzjoni tad-Direttiva (UE) 2019/2034 tal-Parlament Ewropew u tal-Kunsill fir-rigward ta’ formoli, mudelli u proċeduri standard għall-kondiviżjoni tal-informazzjoni bejn l-awtoritajiet kompetenti tal-Istati Membri tad-domiċilju u dawk ospitanti (Test b’rilevanza għaż-ŻEE)
C/2023/188
ĠU L 148, 8.6.2023, p. 29–35
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
- Date of document:
- 12/01/2023; Data ta' adozzjoni
- Date of effect:
- 28/06/2023; Dħul fis-seħħ Data tal-pubblikazzjoni +20 Ara Art. 6
- Date of end of validity:
- No end date
- Author:
- Il-Kummissjoni Ewropea, Direttorat Ġenerali għall-Istabilità Finanzjarja, is-Servizzi Finanzjarji u l-Unjoni tas-Swieq Kapitali
- Responsible body:
- FISMA
- Form:
- Regolament implimentattiv
- Additional information:
- Rilevanza għaż-ŻEE
- Treaty:
- Trattat dwar il-Funzjonament tal-Unjoni Ewropea
- Legal basis:
-
- 32019L2034 - A13P8L2
- Link
- Link
- Link
- Select all documents mentioning this document
- Instruments cited:
- Link
- EUROVOC descriptor:
- Subject matter:
- Directory code:
|
8.6.2023 |
MT |
Il-Ġurnal Uffiċjali tal-Unjoni Ewropea |
L 148/29 |
REGOLAMENT TA’ IMPLIMENTAZZJONI TAL-KUMMISSJONI (UE) 2023/1119
tat-12 ta’ Jannar 2023
li jistabbilixxi standards tekniċi ta’ implimentazzjoni għall-applikazzjoni tad-Direttiva (UE) 2019/2034 tal-Parlament Ewropew u tal-Kunsill fir-rigward ta’ formoli, mudelli u proċeduri standard għall-kondiviżjoni tal-informazzjoni bejn l-awtoritajiet kompetenti tal-Istati Membri tad-domiċilju u dawk ospitanti
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva (UE) 2019/2034 tal-Parlament Ewropew u tal-Kunsill tas-27 ta’ Novembru 2019 dwar is-superviżjoni prudenzjali tad-ditti tal-investiment u li temenda d-Direttivi 2002/87/KE, 2009/65/KE, 2011/61/UE, 2013/36/UE, 2014/59/UE u 2014/65/UE (1), u b’mod partikolari l-Artikolu 13(8) u t-tieni subparagrafu tiegħu,
Billi:
|
(1) |
Kooperazzjoni effiċjenti u f’waqtha bejn l-awtoritajiet kompetenti tal-Istati Membri tad-domiċilju u dawk ospitanti teħtieġ, fi ħdan il-kompetenzi superviżorji rispettivi ta’ dawk l-awtoritajiet, skambju adegwat ta’ informazzjoni bidirezzjonali. Sabiex jiġi appoġġat dan l-objettiv, jenħtieġ li jiġu stabbiliti formoli, mudelli u proċeduri operattivi standard, inkluż l-iskedi ta’ żmien, għall-iskambju ta’ informazzjoni. Peress li l-informazzjoni skambjata għandha tkun f’waqtha u aġġornata, jenħtieġ li l-awtoritajiet kompetenti jagħmlu ħilithom biex jiskambjaw informazzjoni kemm jista’ jkun malajr, mingħajr dewmien żejjed, qabel l-iskadenza ta’ kwalunkwe skadenza massima ta’ rimessa. |
|
(2) |
Sabiex tiġi żgurata trażmissjoni effiċjenti ta’ informazzjoni lil persuni ta’ kuntatt rilevanti fi ħdan l-awtoritajiet kompetenti kif ukoll il-kunfidenzjalità tal-informazzjoni, l-awtoritajiet kompetenti għandhom jistabbilixxu, u regolarment jaġġornaw, listi ta’ persuni ta’ kuntatt. |
|
(3) |
Sabiex tiġi żgurata l-effettività tas-superviżjoni tad-ditti tal-investiment fuq bażi transfruntiera, protezzjoni adegwata tal-klijenti u tas-swieq kif ukoll azzjonijiet korrettivi fil-pront, jenħtieġ li l-awtoritajiet kompetenti tal-Istati Membri tad-domiċilju u dawk ospitanti jinfurmaw lil xulxin mingħajr dewmien żejjed dwar kwalunkwe sitwazzjoni potenzjali li taffettwa l-istabbiltà finanzjarja jew il-funzjonament ta’ fergħa u jipprovdu l-informazzjoni essenzjali u rilevanti kollha rigward dik is-sitwazzjoni. |
|
(4) |
Ir-rekwiżiti dwar it-tip u n-natura tal-informazzjoni li għandha tiġi skambjata mill-awtoritajiet kompetenti tal-Istati Membri tad-domiċilju u dawk ospitanti huma stabbiliti fir-Regolament Delegat tal-Kummissjoni (UE) 2023/1117 (2). Għalhekk, jenħtieġ li l-istabbiliment ta’ formoli, mudelli u proċeduri standard għal tali rekwiżiti ta’ kondiviżjoni tal-informazzjoni jsegwi l-kamp ta’ applikazzjoni u l-approċċ stabbiliti minn dak ir-Regolament Delegat u jieħu kont tal-formoli, il-mudelli u l-proċeduri standard li diġà huma implimentati permezz ta’ mekkaniżmi oħra bħal dawk stabbiliti f’konformità mal-Artikoli 34 u 35 tad-Direttiva 2014/65/UE tal-Parlament Ewropew u tal-Kunsill (3), u b’hekk tiġi evitata d-duplikazzjoni. |
|
(5) |
Il-qafas stabbilit bir-Regolament Delegat (UE) 2023/1117 jispeċifika r-rekwiżiti għat-tip u n-natura tal-informazzjoni li għandha tiġi skambjata mill-awtoritajiet kompetenti. Filwaqt li dan tal-aħħar jipprovdi l-elementi ewlenin li jenħtieġ li jkunu soġġetti għal skambju ta’ informazzjoni bejn l-awtoritajiet kompetenti, ma għandux l-għan li jirrestrinġi l-kamp ta’ applikazzjoni ta’ tali skambju ta’ informazzjoni fil-kuntest tal-promozzjoni ta’ kooperazzjoni wiesgħa bejn l-awtoritajiet kompetenti fuq bażi transfruntiera. |
|
(6) |
Dan ir-Regolament huwa bbażat fuq l-abbozz tal-istandards tekniċi ta’ implimentazzjoni ppreżentat lill-Kummissjoni mill-Awtorità Bankarja Ewropea (EBA) f’konsultazzjoni mal-Awtorità Ewropea tat-Titoli u s-Swieq (ESMA). |
|
(7) |
L-EBA wettqet konsultazzjonijiet pubbliċi miftuħa dwar l-abbozz tal-istandards tekniċi ta’ implimentazzjoni li fuqhom huwa bbażat dan ir-Regolament, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (4), |
ADOTTAT DAN IR-REGOLAMENT:
Artikolu 1
Frekwenza tal-iskambju ta’ informazzjoni
1. L-informazzjoni msemmija fl-Artikolu 2 tar-Regolament Delegat (UE) 2023/1117 għandha tkun disponibbli u aġġornata mill-inqas fuq bażi annwali. L-informazzjoni aġġornata għandha tiġi pprovduta mill-awtoritajiet kompetenti tal-Istat Membru tad-domiċilju lill-awtoritajiet kompetenti tal-Istat Membru ospitanti mhux aktar tard mit-30 ta’ April ta’ kull sena jew, mingħajr dewmien żejjed, wara bidla materjali.
2. L-informazzjoni rigward kwalunkwe sitwazzjoni ta’ nuqqas ta’ konformità mar-rekwiżiti, kif speċifikat fl-Artikoli 3 sa 6 u l-Artikolu 8 tar-Regolament Delegat (UE) 2023/1117 u l-applikazzjoni ta’ miżuri superviżorji jew sanzjonijiet amministrattivi oħra jew il-miżuri amministrattivi msemmija fl-Artikolu 9 tar-Regolament Delegat (UE) 2023/1117 għandha tiġi pprovduta mingħajr dewmien żejjed u mhux aktar tard minn 14-il jum kalendarju wara d-determinazzjoni mill-awtoritajiet kompetenti tas-sitwazzjoni ta’ nuqqas ta’ konformità, jew l-applikazzjoni tal-miżura superviżorja jew amministrattiva oħra, jew l-applikazzjoni ta’ sanzjoni amministrattiva.
3. L-informazzjoni msemmija fl-Artikoli 3 sa 7 tar-Regolament Delegat (UE) 2023/1117 għandha tkun disponibbli u aġġornata mill-inqas fuq bażi annwali. L-informazzjoni aġġornata għandha tiġi pprovduta mill-awtoritajiet kompetenti tal-Istat Membru tad-domiċilju lill-awtoritajiet kompetenti tal-Istat Membru ospitanti sa mhux aktar tard mit-30 ta’ April ta’ kull sena, abbażi tal-għeluq kontabilistiku mill-31 ta’ Diċembru jew, mingħajr dewmien żejjed, wara bidla materjali.
4. B’deroga mill-paragrafu 3, f’sena kalendarja, meta l-awtoritajiet kompetenti tal-Istat Membru tad-domiċilju jlestu r-rieżami u l-evalwazzjoni superviżorji għad-ditti tal-investiment imwettqa f’konformità mal-Artikolu 36 tad-Direttiva (UE) 2019/2034, l-informazzjoni speċifikata fil-paragrafu 3 għandha tiġi pprovduta mhux aktar tard minn xahar wara t-tlestija tar-rapport.
Artikolu 2
Proċeduri operazzjonali għat-trażmissjoni tal-informazzjoni
1. L-awtoritajiet kompetenti tal-Istat Membru tad-domiċilju għandhom iżommu u jaqsmu mal-awtoritajiet kompetenti tal-Istati Membru ospitanti lista ta’ kuntatt aġġornata rigward kull ditta tal-investiment li fiha l-persuni ta’ kuntatt u l-informazzjoni ta’ kuntatt rilevanti, inkluż kuntatti ta’ emerġenza, għall-iskambju ta’ informazzjoni bejn l-awtoritajiet kompetenti tal-Istat Membru tad-domiċilju u tal-Istati Membri ospitanti.
2. L-awtoritajiet kompetenti ta’ Stati Membri ospitanti għandhom jinfurmaw lill-awtoritajiet kompetenti tal-Istat Membru tad-domiċilju bil-persuni ta’ kuntatt u bl-informazzjoni ta’ kuntatt tagħhom u bi kwalunkwe bidla mingħajr dewmien żejjed. L-awtoritajiet kompetenti tal-Istat Membru tad-domiċilju u l-Istati Membri ospitanti għandhom jirrevedu u jaġġornaw il-lista ta’ kuntatti mill-inqas darba fis-sena.
3. L-awtoritajiet kompetenti tal-Istat Membru tad-domiċilju u l-awtoritajiet kompetenti tal-Istati Membri ospitanti għandhom jiskambjaw informazzjoni bil-miktub jew f’forma elettronika u għandhom jindirizzaw l-informazzjoni lill-persuni ta’ kuntatt rilevanti identifikati fil-lista ta’ kuntatt imsemmija fil-paragrafu 1 sakemm ma jkunx speċifikat mod ieħor minn awtorità kompetenti li titlob l-informazzjoni.
4. Meta l-informazzjoni tiġi skambjata f’forma elettronika, għandhom jintużaw kanali siguri ta’ komunikazzjoni sakemm, u mingħajr preġudizzju għall-applikazzjoni tal-Artikolu 15 tad-Direttiva (UE) 2019/2034 u tar-regoli dwar l-ipproċessar ta’ data personali, l-awtoritajiet kompetenti li jipprovdu u jirċievu l-informazzjoni jaqblu, fejn xieraq, li jużaw kanali ta’ komunikazzjoni mhux siguri.
5. Skont l-urġenza ta’ sitwazzjoni speċifika, meta l-awtoritajiet kompetenti jkunu identifikaw sejbiet dwar kwalunkwe problema u riskju potenzjali maħluqa minn ditta tal-investiment għall-protezzjoni tal-klijenti jew l-istabbiltà tas-sistema finanzjarja fl-Istat Membru ospitanti jew każijiet ta’ nuqqas ta’ konformità, l-informazzjoni li ġejja tistal-ewwel tiġi pprovduta bil-fomm qabel ma jiġu kkonfermati bil-miktub jew f’forma elettronika:
|
(a) |
informazzjoni dwar nuqqas ta’ konformità mar-rekwiżiti msemmija fl-Artikolu 8 tar-Regolament Delegat (UE) 2023/1117; |
|
(b) |
informazzjoni dwar l-applikazzjoni ta’ miżuri superviżorji jew miżuri oħra amministrattivi; |
|
(c) |
informazzjoni dwar l-impożizzjoni ta’ sanzjonijiet amministrattivi; |
6. Mal wasla tal-informazzjoni, l-awtoritajiet kompetenti għandhom jikkonfermaw li rċevewha. Fejn l-informazzjoni tkun ġiet ipprovduta f’forma elettronika permezz ta’ mezz sikur ta’ komunikazzjoni, il-konferma tal-wasla għandha tiġi pprovduta permezz tal-istess mezz. Ma għandhiex tkun meħtieġ konferma tal-wasla fil-każ ta’ informazzjoni li tkun ġiet ipprovduta bil-fomm jew bl-użu ta’ kanal sikur ta’ komunikazzjoni li tippermetti lill-emittent li jirċievi konferma li r-riċevent ikun irċieva l-informazzjoni.
7. Meta kulleġġ ta’ superviżuri jkun ġie stabbilit f’konformità mal-Artikolu 48(1) tad-Direttiva (UE) 2019/2034 u l-awtoritajiet kompetenti tal-Istat Membru tad-domiċilju u l-awtoritajiet kompetenti tal-Istati Membri ospitanti jieħdu sehem fil-kulleġġ bħala membri jew parteċipanti oħra f’konformità mar-Regolament Delegat tal-Kummissjoni (UE) 2023/1118 (5), il-paragrafi 1 sa 6 ta’ dan l-Artikolu ma għandhomx japplikaw. F’tali każijiet, l-informazzjoni għandha tiġi skambjata f’konformità mal-Artikolu 48(6) tad-Direttiva (UE) 2019/2034.
Artikolu 3
Formoli standard li għandhom jintużaw għall-iskambju ta’ informazzjoni dwar ditti tal-investiment li joperaw permezz ta’ fergħa
1. L-informazzjoni msemmija fl-Artikoli 2 sa 4 u l-Artikolu 7 tar-Regolament Delegat (UE) 2023/1117 għandha tiġi skambjata permezz tal-mudell u l-formola stabbiliti fl-Anness.
2. L-informazzjoni u s-sejbiet dwar kwalunkwe problema u riskju potenzjali maħluqa mill-fergħa jew l-attivitajiet tagħha fl-Istat Membru ospitanti li jkollhom impatt sinifikanti fuq il-protezzjoni tal-klijenti jew l-istabbiltà tas-sistema finanzjarja fl-Istat Membru ospitanti għandhom jiġu pprovduti mill-awtoritajiet kompetenti tal-Istat Membru ospitanti fil-forma meqjusa xierqa minn dawk l-awtoritajiet.
3. L-informazzjoni msemmija fl-Artikolu 8 tar-Regolament Delegat (UE) 2023/1117 u l-informazzjoni dwar l-applikazzjoni ta’ miżuri superviżorji jew amministrattivi oħra jew sanzjonijiet amministrattivi kif imsemmi fl-Artikolu 1(2) ta’ dan ir-Regolament għandhom jiġu pprovduti fil-forma meqjusa xierqa mill-awtorità kompetenti li tipprovdi l-informazzjoni.
Artikolu 4
Talbiet ta’ informazzjoni dwar fornituri ta’ servizzi transfruntiera
1. L-awtoritajiet kompetenti ta’ Stat Membru ospitanti, li fih ditta tal-investiment twettaq l-attivitajiet tagħha skont il-libertà li jiġu pprovduti s-servizzi, li jitolbu lill-awtoritajiet kompetenti tal-Istat Membru tad-domiċilju jipprovdu l-informazzjoni dwar dawk is-servizzi kif stabbilit bir-Regolament Delegat (UE) 2023/1117 għandhom:
|
(a) |
jipprovdu t-talba għal informazzjoni bil-miktub jew f’forma elettronika lill-persuna ta’ kuntatt rilevanti identifikata fil-lista ta’ kuntatt imsemmija fl-Artikolu 2(1); |
|
(b) |
jindikaw żmien raġonevoli sa meta r-rispons huwa mistenni li jkun disponibbli. |
2. L-awtoritajiet kompetenti tal-Istat Membru tad-domiċilju li jirċievu t-talba msemmi fil-paragrafu 1 għandhom jipprovdu l-informazzjoni mingħajr dewmien żejjed u għandhom jagħmlu kull sforz biex iwieġbu saż-żmien indikat fit-talba. Jekk dawk l-awtoritajiet kompetenti ma jkunux jistgħu jwieġbu saż-żmien indikat fit-talba, għandhom jinfurmaw lill-awtoritajiet kompetenti rikjedenti mingħajr dewmien żejjed biż-żmien li fih ser jipprovdu l-informazzjoni.
Artikolu 5
Talbiet ad hoc għal informazzjoni
1. Kwalunkwe talba oħra ad hoc għal informazzjoni li mhijiex speċifikata skont ir-Regolament Delegat (UE) 2023/1117 għandha tiġi trażmessa bil-miktub jew f’forma elettronika lill-persuni ta’ kuntatt rilevanti identifikati fil-lista ta’ kuntatt imsemmija fl-Artikolu 2(1) ta’ dan ir-Regolament.
2. Awtoritajiet kompetenti li jagħmlu t-talba msemmija fil-paragrafu 1 għandhom jispjegaw kif l-informazzjoni x’aktarx tiffaċilita s-superviżjoni jew il-monitoraġġ ta’ ditta tal-investiment jew il-protezzjoni tal-istabbiltà tas-sistema finanzjarja.
3. L-awtoritajiet kompetenti li jitlobu l-informazzjoni għandhom jindikaw żmien raġonevoli sa meta r-rispons huwa mistenni li jkun disponibbli, filwaqt li titqies in-natura u l-urġenza tat-talba u l-informazzjoni mitluba.
4. Awtoritajiet kompetenti li jirċievu talba kif imsemmi fil-paragrafu 1 għandhom jipprovdu l-informazzjoni mingħajr dewmien żejjed u għandhom jagħmlu kull sforz biex iwieġbu saż-żmien indikat fit-talba. Jekk dawk l-awtoritajiet kompetenti ma jkunux jistgħu jwieġbu saż-żmien indikat fit-talba, għandhom jinfurmaw lill-awtoritajiet kompetenti rikjedenti mingħajr dewmien żejjed biż-żmien li fih ser jipprovdu l-informazzjoni.
5. Jekk l-informazzjoni mitluba ma tkunx disponibbli, l-awtoritajiet kompetenti li tjirċievu t-talba msemmija fil-paragrafu 1 għandhom jinformaw lill-awtoritajiet kompetenti li jagħmlu t-talba kif xieraq.
Artikolu 6
Id-dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, it-12 ta’ Jannar 2023.
Għall-Kummissjoni
Il-President
Ursula VON DER LEYEN
(1) ĠU L 314, 5.12.2019, p. 64.
(2) Ir-Regolament Delegat tal-Kummissjoni (UE) 2023/1117 tat-12 ta’ Jannar 2023 li jissupplimenta d-Direttiva (UE) 2019/2034 tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw ir-rekwiżiti għat-tip u n-natura tal-informazzjoni li għandha tiġi skambjata mill-awtoritajiet kompetenti tal-Istati Membri tad-domiċilju u dawk ospitanti (ara l-paġna 10 ta’ dan il-Ġurnal Uffiċjali).
(3) Id-Direttiva 2014/65/UE tal-Parlament Ewropew u tal-Kunsill tal-15 ta’ Mejju 2014 dwar is-swieq fl-istrumenti finanzjarji u li temenda d-Direttiva 2002/92/KE u d-Direttiva 2011/61/UE (ĠU L 173, 12.6.2014, p. 349).
(4) Ir-Regolament (UE) Nru 1093/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Bankarja Ewropea), u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE (ĠU L 331, 15.12.2010, p. 12).
(5) Ir-Regolament Delegat tal-Kummissjoni (UE) 2023/1118 tat-12 ta’ Jannar 2023 li jissupplimenta d-Direttiva (UE) 2019/2034 tal-Parlament Ewropew u tal-Kunsill fir-rigward ta’ standards tekniċi regolatorji li jispeċifikaw il-kundizzjonijiet li taħthom il-kulleġġi tas-superviżuri jeżerċitaw il-kompiti tagħhom (ara l-paġna 17 ta’ dan il-Ġurnal Uffiċjali).
ANNESS
Mudell għall-iskambju ta’ informazzjoni rigward ditti tal-investiment li għandu jiġi pprovdut mill-awtoritajiet kompetenti tal-Istat Membru tad-domiċilju lill-awtoritajiet kompetenti ta’ Stat Membru ospitanti li jissorvelja fergħa:
|
Awtorità Kompetenti: |
Test liberu |
|
Isem id-ditta tal-investiment: |
Test liberu |
|
Data ta’ referenza (JJ/XX/SSSS) |
Data ta’ referenza għall-informazzjoni. |
|
Data ta’ sottomissjoni (JJ/XX/SSSS): |
Data meta l-informazzjoni qed tiġi pprovduta lill-awtoritajiet kompetenti tal-Istat Membru ospitanti. |
|
Informazzjoni pprovduta fuq bażi kkonsolidata (Iva/Le) |
Jekk jogħġbok niżżel “Iva” jekk l-informazzjoni f’dan il-mudell hija pprovduta fuq bażi kkonsolidata u mhux fil-livell tal-grupp ta’ ditti tal-investiment. |
|
Persuna ta’ kuntatt fl-awtoritajiet kompetenti tal-Istat Membru tad-domiċilju |
L-isem u d-dettalji ta’ kuntatt ta’ persuna li tipprovdi informazzjoni għal kwalunkwe mistoqsija ta’ segwitu possibbli |
|
Dikjarazzjoni dwar il-konformità tad-ditta tal-investiment mar-rekwiżiti ta’ fondi proprji stabbiliti fl-Artikolu 11 tar-Regolament (UE) 2019/2033, filwaqt li jittieħed kont tal-arranġamenti tranżizzjonali stabbiliti fl-Artikolu 57 ta’ dak ir-Regolament |
Referenza ġuridika: L-Artikolu 3(1) tar-Regolament Delegat (UE) 2023/1117. Test liberu li jwieġeb il-mistoqsija dwar id-data tar-rappurtar. Jekk ma jkun hemm l-ebda tibdil meta mqabbel mal-perjodu ta’ rappurtar preċedenti, l-awtoritajiet kompetenti jistgħu jirreferu għal informazzjoni diġà pprovduta jew aġġornament kif xieraq Jekk jogħġbok innota li kwistjonijiet ta’ nuqqas ta’ konformità ma’ rekwiżiti regolatorji minimi u kwalunkwe miżura superviżorja meħuda mill-awtoritajiet kompetenti biex jindirizzawhom għandhom jiġu rrappurtati barra dan il-mudell fi skambju regolari ta’ informazzjoni u f’konformità mal-Artikolu 1(2). |
|
Dikjarazzjoni dwar il-konformità tad-ditta tal-investiment ma’ kwalunkwe rekwiżit ta’ fondi proprji addizzjonali impost f’konformità mal-Artikolu 39(2), punt (a), tad-Direttiva (UE) 2019/2034 |
|
|
Dikjarazzjoni dwar il-konformità tad-ditta tal-investiment ma’ kwalunkwe gwida dwar fondi proprji addizzjonali imposta f’konformità mal-Artikolu 41 tad-Direttiva (UE) 2019/2034 |
|
|
Il-valur tar-rekwiżiti ta’ fondi proprji stabbiliti fl-Artikolu 11 tar-Regolament (UE) 2019/2033 |
Referenza ġuridika: L-Artikolu 3(2) tar-Regolament Delegat (UE) 2023/1117. Valur mir-rappurtar superviżorju. Jekk ma jkun hemm l-ebda tibdil meta mqabbel mal-perjodu ta’ rappurtar preċedenti, l-awtoritajiet kompetenti jistgħu jirreferu għal informazzjoni diġà pprovduta jew aġġornament kif xieraq |
|
Dikjarazzjoni dwar jekk il-valur ipprovdut fil-linja preċedenti ġiex stabbilit abbażi tal-Artikolu 11(1), punt (a), (b) jew (c) tar-Regolament (UE) 2019/2033 |
Referenza ġuridika: L-Artikolu 3(2) tar-Regolament Delegat (UE) 2023/1117. Test liberu li jipprovdi l-bażi għall-kalkolu tar-rekwiżiti ta’ fondi proprji. Jekk ma jkun hemm l-ebda tibdil meta mqabbel mal-perjodu ta’ rappurtar preċedenti, l-awtoritajiet kompetenti jistgħu jirreferu għal informazzjoni diġà pprovduta jew aġġornament kif xieraq |
|
Il-valur ta’ kwalunkwe rekwiżit ta’ fondi proprji addizzjonali impost f’konformità mal-Artikolu 39(2), punt (a), tad-Direttiva (UE) 2019/2034, u r-raġunijiet għall-impożizzjoni |
Referenza ġuridika: L-Artikolu 3(2) tar-Regolament Delegat (UE) 2023/1117. Valur mir-rappurtar superviżorju. Test liberu li jipprovdi r-raġunijiet għall-impożizzjoni ta’ rekwiżiti ta’ fondi proprji addizzjonali. Jekk ma jkun hemm l-ebda tibdil meta mqabbel mal-perjodu ta’ rappurtar preċedenti, l-awtoritajiet kompetenti jistgħu jirreferu għal informazzjoni diġà pprovduta jew aġġornament kif xieraq |
|
Il-valur ta’ kwalunkwe gwida dwar fondi proprji addizzjonali imposta f’konformità mal-Artikolu 41 tad-Direttiva (UE) 2019/2034. |
Referenza ġuridika: L-Artikolu 3(2) tar-Regolament Delegat (UE) 2023/1117. Valur mir-rappurtar superviżorju. Test liberu li jipprovdi r-raġunijiet għall-impożizzjoni ta’ gwida dwar fondi proprji addizzjonali. Jekk ma jkun hemm l-ebda tibdil meta mqabbel mal-perjodu ta’ rappurtar preċedenti, l-awtoritajiet kompetenti jistgħu jirreferu għal informazzjoni diġà pprovduta jew aġġornament kif xieraq |
|
Dikjarazzjoni dwar il-konformità tad-ditta tal-investiment mar-rekwiżiti ta’ riskju tal-konċentrazzjoni stabbiliti fil-Parti Erbgħa tar-Regolament (UE) 2019/2033 |
Referenza ġuridika: L-Artikolu 4(1) tar-Regolament Delegat (UE) 2023/1117. Test liberu li jwieġeb il-mistoqsija dwar id-data tar-rappurtar. Jekk ma jkun hemm l-ebda tibdil meta mqabbel mal-perjodu ta’ rappurtar preċedenti, l-awtoritajiet kompetenti jistgħu jirreferu għal informazzjoni diġà pprovduta jew aġġornament kif xieraq Jekk jogħġbok innota li kwistjonijiet ta’ nuqqas ta’ konformità ma’ rekwiżiti regolatorji minimi u kwalunkwe miżura superviżorja meħuda mill-awtoritajiet kompetenti biex jindirizzawhom għandhom jiġu rrappurtati barra dan il-mudell fi skambju regolari ta’ informazzjoni u f’konformità mal-Artikolu 1(3) ta’ dan ir-Regolament. |
|
Dikjarazzjoni dwar il-konformità tad-ditta tal-investiment mar-rekwiżiti ta’ likwidità stabbiliti fil-Parti Ħamsa tar-Regolament (UE) 2019/2033, filwaqt li jittieħed kont tal-arranġamenti tranżizzjonali stabbiliti fl-Artikolu 57(1) ta’ dak ir-Regolament |
Referenza ġuridika: L-Artikolu 4(3) tar-Regolament Delegat (UE) 2023/1117. Test liberu li jwieġeb il-mistoqsija dwar id-data tar-rappurtar. Jekk ma jkun hemm l-ebda tibdil meta mqabbel mal-perjodu ta’ rappurtar preċedenti, l-awtoritajiet kompetenti jistgħu jirreferu għal informazzjoni diġà pprovduta jew aġġornament kif xieraq Jekk jogħġbok innota li kwistjonijiet ta’ nuqqas ta’ konformità ma’ rekwiżiti regolatorji minimi u kwalunkwe miżura superviżorja meħuda mill-awtoritajiet kompetenti biex jindirizzawhom għandhom jiġu rrappurtati barra dan il-mudell fi skambju regolari ta’ informazzjoni u f’konformità mal-Artikolu 1(3) ta’ dan ir-Regolament. |
|
Sommarju tal-valutazzjoni ġenerali tal-awtoritajiet kompetenti tal-Istat Membru tad-domiċilju tal-profil tar-riskju ta’ likwidità ta’ ditta tal-investiment u l-ġestjoni tar-riskju |
Referenza ġuridika: L-Artikolu 4(5) tar-Regolament Delegat (UE) 2023/1117. Test liberu li jwieġeb il-mistoqsija dwar id-data tar-rappurtar. Jekk ma jkun hemm l-ebda tibdil meta mqabbel mal-perjodu ta’ rappurtar preċedenti, l-awtoritajiet kompetenti jistgħu jirreferu għal informazzjoni diġà pprovduta jew aġġornament kif xieraq |
|
Sommarju ta’ kwalunkwe riskju materjali kif żvelat mir-rieżami u l-evalwazzjoni superviżorji mwettqa f’konformità mal-Artikolu 36 tad-Direttiva (UE) 2019/2034 jew permezz ta’ kwalunkwe attività superviżorja oħra mwettqa mill-awtoritajiet kompetenti tal-Istat Membru tad-domiċilju |
Referenza ġuridika: L-Artikolu 7(1) tar-Regolament Delegat (UE) 2023/1117. Test liberu li jwieġeb il-mistoqsija dwar id-data tar-rappurtar. Jekk ma jkun hemm l-ebda tibdil meta mqabbel mal-perjodu ta’ rappurtar preċedenti, l-awtoritajiet kompetenti jistgħu jirreferu għal informazzjoni diġà pprovduta jew aġġornament kif xieraq |
Informazzjoni addizzjonali li għandha tiġi skambjata dwar il-ġestjoni u s-sjieda tad-ditta tal-investiment u preparazzjonijiet għal sitwazzjonijiet ta’ emerġenza
Referenza ġuridika: L-Artikolu 2(1) u l-Artikolu 10 tar-Regolament Delegat (UE) 2023/1117.
|
1. |
L-istruttura organizzattiva attwali (l-organigramma) tad-ditta tal-investiment inkluż il-linji ta’ negozju tagħha u r-relazzjoni tagħha mal-entitajiet fi ħdan il-grupp |
|
2. |
Dettalji ta’ kuntatt ta’ emerġenza ta’ persuni fi ħdan l-awtoritajiet kompetenti li huma responsabbli għall-ġestjoni ta’ sitwazzjonijiet ta’ emerġenza u proċeduri ta’ komunikazzjoni li għandhom japplikaw f’sitwazzjonijiet ta’ emerġenza |
Jekk ma jkun hemm l-ebda tibdil meta mqabbel mal-perjodu ta’ rappurtar preċedenti, l-awtoritajiet kompetenti jistgħu jirreferu għal informazzjoni diġà pprovduta jew aġġornament kif xieraq.
Informazzjoni addizzjonali li għandha tiġi pprovduta mill-awtoritajiet kompetenti tal-Istat Membru tad-domiċilju li jissorveljaw ditti tal-investiment li mhumiex identifikati bħala ditti tal-investiment żgħar u mhux interkonnessi f’konformità mal-Artikolu 12 tar-Regolament (UE) 2019/2033
Referenza ġuridika: L-Artikolu 2(2) tar-Regolament Delegat (UE) 2023/1117.
|
1. |
L-istruttura tal-korp maniġerjali u l-maniġment superjuri, inkluż l-allokazzjoni tar-responsabbiltà għas-superviżjoni ta’ fergħa |
|
2. |
Lista ta’ azzjonisti u membri b’parteċipazzjoni kwalifikatorja |
Jekk ma jkun hemm l-ebda tibdil meta mqabbel mal-perjodu ta’ rappurtar preċedenti, l-awtoritajiet kompetenti jistgħu jirreferu għal informazzjoni diġà pprovduta jew aġġornament kif xieraq.
