(1)

Ir-Regolament (KE) Nru 1831/2003 jipprevedi l-awtorizzazzjoni tal-addittivi għall-użu fl-għalf tal-annimali u r-raġunijiet u l-proċeduri għall-għoti ta' din l-awtorizzazzjoni. L-Artikolu 10 ta' dak ir-Regolament jipprevedi l-evalwazzjoni mill-ġdid ta' addittivi awtorizzati skont id-Direttiva tal-Kunsill 70/524/KEE (2).

(2)

Il-komposti tal-ħadid klorur ferriku eżaidrat, tal-ossidu ferriku, tal-karbonat ferriku, tal-kelat ferriku tal-idrat tal-aċidi amminiċi, tal-kelat ferriku tal-idrat tal-gliċina, tal-fumerat ferriku, tas-sulfat ferruż ettaidrat u tas-sulfat ferruż monoidrat kienu awtorizzati mingħajr limitu ta' żmien mir-Regolament tal-Kummissjoni (KE) Nru 1334/2003 (3) u mir-Regolament tal-Kummissjoni (KE) Nru 479/2006 (4) skont id-Direttiva 70/524/KEE. Dawk is-sustanzi sussegwentement iddaħħlu fir-Reġistru tal-addittivi fl-għalf bħala prodotti eżistenti, skont l-Artikolu 10(1) tar-Regolament (KE) Nru 1831/2003.

(3)

B'konformità mal-Artikolu 10(2) tar-Regolament (KE) Nru 1831/2003 flimkien mal-Artikolu 7 tiegħu, ġew sottomessi l-applikazzjonijiet għall-evalwazzjoni mill-ġdid tal-klorur ferriku eżaidrat, tal-ossidu ferriku, tal-karbonat ferruż, tal-kelat ferruż tal-idrat tal-aċidi amminiċi, tal-kelat ferruż tal-idrat tal-gliċina, tal-fumerat ferruż, tas-sulfat ferruż ettaidrat u tas-sulfat ferruż monoidrat bħala addittivi fl-għalf għall-ispeċijiet kollha tal-annimali. Barra minn hekk, b'konformità mal-Artikolu 7 ta' dak ir-Regolament, ġiet sottomessa applikazzjoni għad-dekstran tal-ħadid bħala addittiv fl-għalf għall-ħnienes. L-applikanti talbu li dawk l-addittivi jiġu kklassifikati fil-kategorija tal-addittivi “addittivi nutrittivi”. Mal-applikazzjonijiet intbagħtu d-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(4)

Għal raġunijiet xjentifiċi, l-Awtorità Ewropea dwar is-Sigurtà fl-Ikel (“l-Awtorità”) irrakkomandat fl-opinjonijiet tagħha tad-19 ta' Ġunju 2013 (5), tat-30 ta' Jannar 2014 (6), tal-5 ta' Marzu 2014 (7), tat-28 ta' April 2014 (8) u tas-27 ta' Jannar 2016 (9) biex l-isem Ferriku jinbidel f'Ħadid(III) u Ferruż f'Ħadid(II), sabiex jiġu evitati l-ambigwitajiet potenzjali. L-Awtorità tirrakkomanda wkoll li taqsam il-kelat tal-ħadid(II) tal-aċidi amminiċi fiż-żewġ gruppi li ġejjin, minħabba l-karatteristiċi kimiċi tagħhom; Kelat tal-ħadid(II) tal-idrat tal-aċidi amminiċi u kelat tal-ħadid(II) tal-idrolizzati tal-proteina.

(5)

L-awtorità kkonkludiet li skont il-kundizzjonijiet proposti tal-użu, il-karbonat tal-ħadid(II), il-klorur tal-ħadid(III) eżaidrat, is-sulfat tal-ħadid(II) monoidrat, is-sulfat tal-ħadid(II) ettaidrat, il-fumarat tal-ħadid(II), il-kelat tal-ħadid(II) tal-idrat tal-aċidi amminiċi, il-kelat tal-ħadid(II) tal-idrolizzati tal-proteina u l-kelat tal-ħadid(II) tal-idrat tal-gliċina ma għandhom l-ebda effett negattiv fuq is-saħħa tal-annimali, fuq is-sikurezza tal-konsumatur u fuq l-ambjent. Meta wieħed iqis li jista' jkun hemm irritazzjoni tal-ġilda, irritazzjoni respiratorja jew irritazzjoni tal-għajnejn minħabba l-preżenza tan-nikil f'kull kompost tal-ħadid(III), jenħtieġ li jittieħdu miżuri protettivi xierqa fir-rigward tat-trattament tal-addittivi kkonċernati u tat-taħlitiet lesti minn qabel li fihom dawk is-sustanzi, sabiex jiġi evitat li jinqala xi tħassib dwar is-sikurezza għall-utenti.

(6)

Fl-opinjoni tagħha tal-24 ta' Jannar 2017 (10), l-Awtorità kkonkludiet li, skont il-kundizzjonijiet tal-użu proposti, id-dekstran tal-ħadid ma għandux effett negattiv fuq is-saħħa tal-annimali, fuq is-sikurezza tal-konsumatur u fuq l-ambjent, u li ma hemm l-ebda tħassib dwar is-sikurezza għall-utenti sakemm jittieħdu l-miżuri xierqa ta' protezzjoni.

(7)

L-Awtorità kkonkludiet ukoll li l-karbonat tal-ħadid(III), il-klorur tal-ħadid(III) eżaidrat, is-sulfat tal-ħadid(II) monoidrat, is-sulfat tal-ħadid(II) ettaidrat, il-fumarat tal-ħadid(II), il-kelat tal-ħadid(II) tal-idrat tal-aċidi amminiċi, il-kelat tal-ħadid(II) ta' idrolizzati tal-proteina, il-kelat tal-ħadid(II) tal-idrat tal-gliċina u d-dekstran tal-ħadid huma sorsi effettivi ta' ħadid; madankollu, il-bijodisponibbiltà tal-karbonat tal-ħadid(II) tvarja b'mod sinifikanti, u hija meqjusa li tkun aktar baxxa minn dik tas-sulfat tal-Ħadid(II). L-Awtorità ma tqisx li hemm bżonn ta' rekwiżiti speċifiċi għas-sorveljanza ta' wara t-tqegħid fis-suq. L-Awtorità vverifikat ukoll ir-rapporti dwar il-metodu ta' analiżi tal-addittivi tal-għalf imressqa mil-Laboratorju ta' Referenza stabbilit bir-Regolament (KE) Nru 1831/2003.

(8)

Il-valutazzjoni tal-karbonat tal-ħadid(II), tal-klorur tal-ħadid(III) eżaidrat, tas-sulfat tal-ħadid(II) monoidrat, tas-sulfat tal-ħadid(II) ettaidrat, tal-fumarat tal-ħadid(II), tal-kelat tal-ħadid(II) tal-aċidi amminiċi, tal-kelat tal-ħadid(II) tal-idrolizzati tal-proteina u tal-kelat tal-ħadid(II) tal-idrat tal-gliċina bħala addittivi tal-għalf għall-ispeċijiet kollha tal-annimali u tad-dekstran tal-ħadid għall-ħnienes turi li l-kundizzjonijiet għall-awtorizzazzjoni, kif previst fl-Artikolu 5 tar-Regolament (KE) Nru 1831/2003, ġew issodisfati, minbarra għall-ilma tax-xorb. Għalhekk, jenħtieġ li l-użu ta' dawn is-sustanzi jkun awtorizzat kif speċifikat fl-Anness ta' dan ir-Regolament u jenħtieġ li jiġi pprojbit l-użu tagħhom permezz tal-ilma tax-xorb.

(9)

Minħabba li ngħataw awtorizzazzjonijiet ġodda għal “klorur ferriku eżaidrat”, “karbonat ferruż”, “kelat ferruż tal-idrat tal-aċidi ammiċi”, “fumarat ferruż”, “sulfat ferruż, ettaidrat”, “sulfat ferruż, monoidrat” u “kelat ferruż tal-idrat tal-gliċina” minn dan ir-Regolament u ċ-ċaħda ta' awtorizzazzjoni għal “ossidu ferriku”, l-entrati dwar dawn is-sustanzi fir-Regolamenti (KE) Nru 479/2006 u (KE) Nru 1334/2003 jenħtieġ li jitħassru.

(10)

Billi l-Awtorità ma setgħetx tikkonkludi fl-opinjoni tagħha tal-24 ta' Mejju 2016 (11) dwar is-sikurezza tal-ossidu ferriku għall-ispeċijiet fil-mira, l-addittiv u l-għalf li fihom jinsab dan l-addittiv jenħtieġ li jiġu rtirati mis-suq mill-aktar fis possibbli. Madankollu, għal raġunijiet prattiċi jenħtieġ li jkun permess perjodu tranżitorju limitat għall-irtirar mis-suq tal-prodotti kkonċernati sabiex l-operaturi jkunu jistgħu jikkonformaw kif xieraq mal-obbligu tal-irtirar.

(11)

Peress li r-raġunijiet ta' sikurezza ma jitolbux l-applikazzjoni immedjata tal-modifiki għall-kundizzjonijiet tal-awtorizzazzjoni għal “klorur ferriku eżaidrat”, “karbonat ferruż”, “kelat ferruż tal-idrat tal-aċidi ammiċi”, “kelat ferruż tal-idrat tal-gliċina”, “fumarat ferruż”, “sulfat ferruż, ettaidrat” u “sulfat ferruż monoidrat” hekk kif awtorizzati skont ir-Regolament (KE) Nru 1334/2003 u r-Regolament (KE) Nru 479/2006, huwa xieraq li jkun permess perjodu tranżitorju għall-partijiet interessati biex jitħejjew biex jissodisfaw ir-rekwiżiti l-ġodda li jirriżultaw mill-awtorizzazzjoni.

(12)

Il-miżuri previsti f'dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,