This document is an excerpt from the EUR-Lex website
Document 32005R0145
Commission Regulation (EC) No 145/2005 of 28 January 2005 imposing a provisional anti-dumping duty on imports of barium carbonate originating in the People's Republic of China
145/2005/KE: Regolament tal-Kummissjoni (KE) Nru 145/2005 tat- 28 ta’ Jannar 2005 li jimponi dazju provviżorju ta’ anti-dumping fuq l-importazzjonijiet tal-karbonat tal-barju li joriġinaw fir-Repubblika tal-Poplu taċ-Ċina
145/2005/KE: Regolament tal-Kummissjoni (KE) Nru 145/2005 tat- 28 ta’ Jannar 2005 li jimponi dazju provviżorju ta’ anti-dumping fuq l-importazzjonijiet tal-karbonat tal-barju li joriġinaw fir-Repubblika tal-Poplu taċ-Ċina
ĠU L 27, 29.1.2005, p. 4–23
(ES, CS, DA, DE, ET, EL, EN, FR, IT, LV, LT, HU, NL, PL, PT, SK, SL, FI, SV) Dan id-dokument ġie ppubblikat f’edizzjoni(jiet) speċjali
(BG, RO)
ĠU L 306M, 15.11.2008, p. 80–99
(MT)
In force
15.11.2008 |
MT |
Il-Ġurnal Uffiċjali ta’ l-Unjoni Ewropea |
80 |
REGOLAMENT TAL-KUMMISSJONI (KE) Nru 145/2005
tat-28 ta’ Jannar 2005
li jimponi dazju provviżorju ta’ anti-dumping fuq l-importazzjonijiet tal-karbonat tal-barju li joriġinaw fir-Repubblika tal-Poplu taċ-Ċina
IL-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Wara li kkunsidrat ir-Regolament tal-Kunsill (KE) Nru 384/96 tat-22 ta' Diċembru 1995 dwar il-protezzjoni kontra l-importazzjonijiet li huma l-oġġett ta' dumping minn pajjiżi mhux membri tal-Komunità Ewropea (1) (ir-Regolament bażiku) u b’mod partikolari l-Artikolu 7 tiegħu,
Wara li kkonsultat lill-Kumitat Konsultattiv,
Billi:
A. IL-PROĊEDURA
1. IL-BIDU
(1) |
Fit-30 t’April 2004, il-Kummissjoni ħabbret, permezz ta’ avviż (l-avviż tal-bidu) ippubblikat fil-Ġurnal Uffiċjali ta’ l-Unjoni Ewropea (2), il-bidu ta’ proċedura ta’ anti-dumping rigward l-importazzjonijiet fil-Komunità tal-karbonat tal-barju li joriġinaw fir-Repubblika tal-Poplu taċ-Ċina (ir-RPĊ jew il-pajjiż ikkonċernat). |
(2) |
Il-proċedura nbdiet minħabba ilment ippreżentat f’Marzu 2004 minn Solvay Barium Strontium GmbH (l-entità li għamlet l-ilment), l-uniku produttur tal-karbonat tal-barju fil-Komunità li jirrappreżenta 100 % mill-produzzjoni Komunitarja. L-ilment kien jinkludi evidenza ta’ dumping ta’ l-imsemmi prodott u ta’ dannu materjali li jirriżulta minnu, li tqieset biżżejjed sabiex ikun iġġustifikat il-bidu ta’ proċedura. |
2. IL-PARTIJIET IKKONĊERNATI MILL-PROĊEDURA
(3) |
Il-Kummissjoni uffiċjalment informat lill-entità li għamlet l-ilment, lill-produtturi li jesportaw, lill-importaturi, lill-fornituri u lill-utenti li kien magħruf li huma kkonċernati, u lir-rappreżentanti tar-RPĊ, bil-bidu tal-proċedura. Il-partijiet interessati ngħataw opportunità li jesprimu l-opinjonijiet tagħhom bil-miktub u li jitolbu smigħ fil-limitu ta’ żmien stabbilit fl-avviż tal-bidu. |
(4) |
Il-produttur li għamel l-ilment, il-produtturi li jesportaw, l-importaturi, l-utenti u l-assoċjazzjonijiet ta’ l-utenti esprimew l-opinjonijiet tagħhom. Il-partijiet interessati kollha, li talbu biex jinstemgħu u wrew li kien hemm raġunijiet partikolari għaliex għandhom jinstemgħu, ngħataw smigħ. |
(5) |
Sabiex il-produtturi li jesportaw fir-RPĊ jitħallew iressqu talba għal trattament ta’ ekonomija tas-suq (MET) jew trattament individwali (IT), jekk huma xtaqu dan, il-Kummissjoni bagħtet formoli ta’ talbiet għal MET u IT lill-kumpaniji Ċiniżi li kien magħruf li huma kkonċernati. Ħames kumpaniji talbu MET skond l-Artikolu 2(7) tar-Regolament bażiku jew IT, jekk l-investigazzjoni tistabbilixxi li huma ma kinux jissodisfaw il-kundizzjonijiet għal MET. |
(6) |
Fl-avviż tal-bidu, il-Kummissjoni indikat li minħabba n-numru kbir apparenti ta’ esportaturi/produtturi u ta’ importaturi, f’din l-investigazzjoni seta’ jiġi applikat it-teħid ta’ kampjuni. Madankollu, meta jitqies in-numru inqas milli mistenni ta’ produtturi li jesportaw fir-RPĊ u ta’ importaturi u ta’ utenti fil-Komunità, li indikaw li kienu lesti li jikkooperaw, kien deċiż li mhemmx għalfejn jittieħdu kampjuni. |
(7) |
Il-Kummissjoni bagħtet kwestjonarji lill-partijiet kollha li kien magħruf li huma kkonċernati u lill-kumpaniji l-oħra kollha li ppreżentaw irwieħhom fl-iskadenzi stabbiliti fl-avviż tal-bidu. Kienu riċevuti risposti mingħand il-produttur Komunitarju li għamel l-ilment, ħames importaturi mhux relatati, fornitur wieħed tal-materja prima, sitt utenti, assoċjazzjoni waħda ta’ l-utenti u ħames produtturi li jesportaw fir-RPĊ. |
(8) |
Il-Kummissjoni fittxet u vverifikat l-informazzjoni kollha li qieset li kienet meħtieġa għal determinazzjoni provviżorja tad-dumping, tad-dannu li rriżulta u ta’ l-interess Komunitarju. Saru żjarat ta’ verifika fl-uffiċċji tal-kumpaniji li ġejjin:
|
(9) |
Minħabba l-ħtieġa li jkun stabbilit valur normali għall-produtturi li jesportaw fir-RPĊ li seta’ ma jingħatalhomx MET, saret żjara ta’ verifika sabiex ikun stabbilit il-valur normali fuq il-bażi tad-data minn pajjiż analogu fl-uffiċċji tal-kumpanija li ġejja:
|
3. IL-PERJODU TA’ INVESTIGAZZJONI
(10) |
L-investigazzjoni tad-dumping u tad-dannu kopriet il-perjodu mill-1 ta’ Jannar 2003 sal-31 ta’ Diċembru 2003 (IP). L-eżami tat-tendenzi rilevanti għall-valutazzjoni tad-dannu kopra l-perjodu minn Jannar 2000 sa tmiem l-IP (il-perjodu meqjus). |
B. IL-PRODOTT IKKONĊERNAT U L-PRODOTT SIMILI
1. IL-PRODOTT IKKONĊERNAT
(11) |
Il-prodott ikkonċernat huwa ċertu karbonat tal-barju b’kontenut ta’ stronzju ta’ aktar minn 0,07 % skond il-piż u b’kontenut ta’ kubrit ta’ aktar minn 0,0015 % skond il-piż, kemm jekk f’forma ta’ trab, f’forma pressata b’mod imrammel jew f’forma ridotta fi trab b’mod imrammel, li joriġina fir-RPĊ, li jaqa’ fil-kodiċi NM ex 2836 60 00. |
2. IL-PRODOTT SIMILI
(12) |
Ma nstabet l-ebda differenza bejn il-prodott ikkonċernat u l-karbonat tal-barjum prodott u mibjugħ fis-suq domestiku fir-RPĊ u fl-Istati Uniti ta’ l-Amerika (USA), li għamluha ta’ pajjiż analogu sabiex ikun stabbilit il-valur normali rigward l-importazzjonijiet mir-RPĊ. Tabilħaqq, il-karbonat tal-barju prodott u mibjugħ fl-USA għandu l-istess karatteristiċi u użi fiżiċi u kimiċi bażiċi meta pparagunat ma’ dak esportat mir-RPĊ lejn il-Komunità. Barra minn hekk, ma nstabet l-ebda differenza bejn il-prodott ikkonċernat u l-karbonat tal-barju prodott mill-industrija Komunitarja u mibjugħ fis-suq Komunitarju. It-tnejn jikkondividu l-istess karatteristiċi u użi fiċiżi u kimiċi. Konsegwentement, il-karbonat tal-barju prodott u mibjugħ fis-suq domestiku tar-RPĊ u l-karbonat tal-barju prodott u mibjugħ fis-suq domestiku tal-pajjiż analogu, kif ukoll il-karbonat tal-barju prodott u mibjugħ fil-Komunità mill-industrija Komunitarja għandu l-istess karatteristiċi u użi fiżiċi u kimiċi bażiċi. Għalhekk, ġie konkluż li t-tipi kollha ta’ karbonat tal-barju jitqiesu li huma simili fit-tifsira ta’ l-Artikolu 1(4) tar-Regolament bażiku. |
C. ID-DUMPING
1. IT-TRATTAMENT TA’ EKONOMIJA TAS-SUQ
(13) |
Fl-investigazzjonijiet ta’ anti-dumping li jikkonċernaw importazzjonijiet li joriġinaw fir-RPĊ, il-valur normali għandu jkun iddeterminat skond il-paragrafi 1 sa 6 ta’ l-Artikolu 2(7)(b) tar-Regolament bażiku għal dawk il-produtturi li nstab li kienu jissodisfaw il-kriterji stabbiliti fl-Artikolu 2(7)(c) tar-Regolament bażiku. |
(14) |
Fil-qosor, u għal faċilità ta’ referenza biss, dawn il-kriterji, li l-kumpaniji applikanti jridu juru li ġew sodisfatti, ġew stabbiliti f’forma mqassra hawn taħt:
|
(15) |
Ħames produtturi li jesportaw fir-RPĊ talbu MET skond l-Artikolu 2(7)(b) tar-Regolament bażiku u mlew il-formola ta’ talba għal MET għall-produtturi li jesportaw. |
(16) |
It-talba ta’ żewġ kumpaniji ġiet miċħuda fuq il-bażi ta’ l-ewwel analiżi tal-formola ta’ talba għal MET li naqset milli turi li l-kriterji kollha kienu sodisfatti. B’mod partikolari, dawn il-kumpaniji, li kienu għalkollox jew b’mod predominanti proprjetà ta’ l-Istat u kellhom bord tad-diretturi għalkollox jew b’mod predominanti magħmul minn diretturi nnominati mill-Istat, ma setgħux juru li ma kien hemm l-ebda interferenza sinifikanti min-naħa ta’ l-Istat fid-deċiżjonijiet tan-negozju tagħhom. Għat-tliet kumpaniji li baqa’, il-Kummissjoni fittxet u vverifikat fl-uffiċċji ta’ dawn il-kumpaniji l-informazzjoni kollha mressqa fl-applikazzjonijiet għal MET u li qieset li kienet meħtieġa. |
(17) |
L-investigazzjoni wriet li żewġ kumpaniji ssodisfaw il-kriterji kollha meħtieġa u għalhekk ingħataw MET. Il-prodotturi li jesportaw fir-RPĊ li ngħataw MET huma:
|
(18) |
It-tabella li ġejja tiġbor fil-qosor id-determinazzjoni għat-tliet kumpaniji li ma ngħatalhomx MET kontra kull wieħed mill-ħames kriterji kif ġew stabbiliti fl-Artikolu 2(7)(c) tar-Regolament bażiku.
|
(19) |
Il-kumpaniji kkonċernati ngħataw opportunità li jikkummentaw dwar is-sejbiet li ssemmew aktar ’il fuq. |
(20) |
Safejn hija kkonċernata l-kumpanija 2, l-azzjonisti tal-kumpanija relatata tagħha ma setgħux jiġu identifikati u ma setax jiġi stabbilit fl-aħħar mill-aħħar min kien jikkontrolla l-kumpanija. Għalhekk ma setgħetx tiġi eskluża interferenza sinifikanti min-naħa ta’ l-Istat. Għalkemm, il-kumpanija kkontestat dan il-fatt, ma setgħet tipprovdi l-ebda informazzjoni jew evidenza li kienet turi li kienet prinċipalment ikkontrollata minn intraprendituri privati u kienet ħielsa minn interferenza sinifikanti min-naħa ta’ l-Istat. Għalhekk, kien konkluż li l-kriterji stabbiliti fl-inċiż 1 ta’ l-Artikolu 2(7)(c) tar-Regolament bażiku ma kinux sodisfatti. |
(21) |
Għall-istess kumpanija, l-investigazzjoni żvelat defiċjenzi sinifikanti fil-kontabbilità vverifikata. B’hekk, l-awdituri tal-kumpanija stess kellhom xi riservi rigward, fost l-oħrajn, il-figuri tal-bejgħ imniżżla fil-kotba, il-valutazzjoni ta’ l-assi u d-deprezzament. Madankollu, ma saret l-ebda korrezzjoni sabiex ikunu rrettifikati n-nuqqasijiet identifikati mill-awdituri u l-kumpanija ma setgħet tagħti l-ebda spjegazzjoni għaliex s’issa ma tqisux ir-riservi li wrew l-awdituri. Meta jitqiesu dawn in-nuqqsijiet, ma kienx ikun possibbli li jsir kalkolu tad-dumping affidabbli fuq din il-bażi. Għalkemm il-kumpanija kkontestat dawn il-konlużjonijiet, hija ma pprovdiet l-ebda spjegazzjoni raġonevoli għaliex il-kontabbiltà tagħha hija affidabbli minkejja dawn in-nuqqasijiet. Minħabba l-elementi stabbiliti aktar ’il fuq li jixħtu dubju fuq l-affidabbiltà tal-kontabbiltà u minħabba li l-problemi identifikati mill-awdituri ma kinux korretti, qed jiġi konkluż li l-kriterju stabbilit fl-inċiż 2 ta’ l-Artikolu 2(7)(c) tar-Regolament bażiku ma ġiex sodisfatt. |
(22) |
Fl-aħħarnett, safejn huwa kkonċernat l-akkwist ta’ l-assi tal-kumpanija 2, il-kumpanija ma setgħetx tispjega f’liema kundizzjonijiet uħud mill-assi tal-kumpanija kienu ttrasferiti mill-kumpanija eżistenti qabel li kienet proprjetà kollettiva. Il-Kummissjoni għalhekk ikkonkludiet li l-kundizzjonijiet ta’ l-inċiż 3 ta’ l-Artikolu 2(7)(c) tar-Regolament bażiku ma kinux sodisfatti. Il-kumpanija 2 ma qablitx ma’ dawn il-konklużjonijiet, iżda ma pprovdiet l-ebda informazzjoni jew evidenza rigward it-trasferiment ta’ l-assi li kien juri li ma kien hemm l-ebda tgħawwiġ sinifikanti mir-reġim preċedenti ta’ ekonomija mhux tas-suq. It-talba li saret mill-kumpanija 2 għalhekk ma kintx fondata u kienet miċħuda. |
(23) |
Ġie kkonsultat il-Kumitat Konsultattiv u l-partijiet direttament ikkonċernati kienu informati b’mod xieraq. L-industrija Komunitarja ngħatat l-opportunità li tikkummenta, u ma opponietx id-determinazzjoni ta’ l-MET. |
2. IT-TRATTAMENT INDIVIDWALI (IT)
(24) |
Skond l-Artikolu 2(7)(a) tar-Regolament bażiku, għall-pajjiżi li jaqgħu fl-ambitu ta’ l-Artikolu 2(7) tar-Regolament bażiku, jiġi stabbilit dazju mal-pajjiż kollu, jekk ikun hemm, ħlief f’dawk il-każi fejn il-kumpaniji jistgħu juru, skond l-Artikolu 9(5) tar-Regolament bażiku, li (a) huma ħielsa li jibagħtu lura f’pajjiżhom il-kapital u l-profitti; (b) il-prezzijiet u l-kwantitajiet ta’ l-esportazzjoni tagħhom, kif ukoll il-kundizzjonijiet u t-termini tal-bejgħ jiġu ddeterminati bil-libertà kollha; (c) il-maġġoranza ta’ l-ishma huma ta' persuni privati. L-uffiċjali ta’ l-Istat fil-bord tad-Diretturi jew li għandhom pożizzjonijiet ewlenin fit-tmexxija jew huma minoranza jew irid jintwera li l-kumpanija, minkejja kollox, hija biżżejjed indipendenti mill-interferenza ta’ l-Istat; (d) il-konverżjonijiet tar-rata tal-kambju jitwettqu skond rati tas-suq, u (e) kwalunkwe interferenza min-naħa ta’ l-Istat mhix tali li tippermetti l-elużjoni tal-miżuri jekk l-esportaturi jingħataw rati differenti ta’ dazju. |
(25) |
It-tliet produtturi li jesportaw li ma ngħatalhomx MET talbu wkoll trattament individwali. Għalhekk, il-Kummissjoni eżaminat jekk dawn it-tliet produtturi li jesportaw urewx li huma konformi mal-kriterji stabbiliti fl-Artikolu 9(5) tar-Regolament bażiku. |
(26) |
Instab li żewġ kumpaniji (kumpanija 1 u 3) kienu għalkollox jew b’mod predominanti proprjetà ta’ l-Istat u kellhom bord tad-diretturi li kien jikkonsisti b’mod sħiħ jew fl-intier tiegħu minn diretturi nnominati mill-Istat. Dawn il-kumpaniji ma setgħux juru li kienu biżżejjed indipendenti minn interferenza min-naħa ta’ l-Istat u konsegwentement ma kinux jissodisfaw il-kundizzjonijiet stipulati fl-Artikolu 9(5)(c) tar-Regolament bażiku. |
(27) |
Għalkemm it-tielet produttur li jesporta (il-kumpanija 2) kien parzjalment proprjetà ta’ persuni privati, ma setax juri fl-aħħar mill-aħħar min kien jikkontrollah u għalhekk ma setgħetx tiġi eskluża interferenza sinifikanti min-naħa ta’ l-Istat. Konsegwentement, il-kumpanija ma setgħetx turi li kienet tissodisfa l-kriterju ta’ l-Artikolu 9(5)(c) tar-Regolament bażiku. |
(28) |
Barra minn hekk, għat-tliet kumpaniji kollha, instab li hemm riskju ta’ elużjoni tal-miżuri jekk dawn l-esportaturi jingħataw rata tad-dazju individwali. Dan ir-riskju jirriżulta parzjalment mill-influwenza min-naħa ta’ l-Istat li ssemmiet aktar ’il fuq f’ħidmet tnejn mill-kumpaniji, u l-fatt li lanqas l-esportatur l-ieħor ma seta’ juri n-nuqqas ta’ influwenza sinifikanti min-naħa ta’ l-Istat. Barra minn hekk, meta titqies in-natura ta’ kommodità tal-prodott ikkonċernat, li ma jistax jiġi identifikat bħala li ġie prodott minn produttur partikolari, ir-riskju ta’ elużjoni tal-miżuri permezz ta’ esportazzjoni permezz ta’ kumpanija b’dazju aktar baxx tqies ukoll li kien sinifikanti. Il-kumpaniji, għaldaqstant, ma kinux jissodisfaw il-kundizzjonijiet stipulati fl-Artikolu 9(5)(e) tar-Regolament bażiku. |
(29) |
Konsegwentement, l-ebda wieħed mit-tliet produtturi li jesportaw ma ssodisfa l-kundizzjonijiet stipulati fl-Artikolu 9(5) tar-Regolament bażiku. Għalhekk kien konkluż li l-IT m’għandu jingħata lill-ebda wieħed mill-produtturi li jesportaw li lilhom ma ngħatax MET. |
3. IL-VALUR NORMALI
3.1. Id-determinazzjoni ta’ valur normali għall-produtturi li jesportaw kollha li ma ngħatawx MET
(a) Il-pajjiż analogu
(30) |
Skond l-Artikolu 2(7)(a) tar-Regolament bażiku, il-valur normali għall-produtturi li jesportaw li ma ngħatawx MET irid jiġi stabbilit fuq il-bażi tal-prezzijiet jew tal-valur mibni f’pajjiż terz b’ekonomija tas-suq (il-pajjiż analogu). |
(31) |
Fl-avviż tal-bidu, l-USA kienu previsti bħala pajjiż terz b’ekonomija tas-suq xieraq sabiex jiġi stabbilit valur normali għar-RPĊ. Il-partijiet interessati kienu mistiedna jikkummentaw dwar din l-għażla. |
(32) |
Tliet produtturi li jesportaw ikkontestaw din l-għażla fejn sostnew li l-livell ta’ żvilupp ekonomiku, il-proċess ta’ manifattura u l-aċċess għall-materja prima kienu differenti fl-USA u fir-RPĊ. Barra minn hekk, kien argumentat li l-livell ta’ kompetizzjoni fl-USA kien baxx meta jitqies li kien hemm biss produttur wieħed tal-karbonat tal-barju u li s-suq domestiku kien protett minn dazji ta’ anti-dumping. Il-Korea t’Isfel, ir-Russja u l-Indja kienu proposti bħala pajjiż analogi alternattivi. |
(33) |
Il-Kummissjoni fittxet kooperazzjoni minn pajjiżi analogi potenzjali oħrajn bħall-Indja, il-Ġappun u l-Brażil. Madankollu, l-ebda wieħed mill-produtturi f’dawn il-pajjiżi ma kien lest li jikkoopera. |
(34) |
Ikun xi jkun il-każ, il-Kummissjoni kkonkludiet li l-Korea t’Isfel ma kinitx pajjiż analogu xieraq għaliex ma kellha l-ebda sors domestiku ta’ baritina, l-aktar materja prima importanti, u biss produzzjoni insinifikanti ta’ karbonat tal-barju. Barra minn hekk, il-Kummissjoni warrbet lir-Russja bħala pajjiż analogu xieraq għaliex il-karbonat tal-barju prodott fir-Russja kien ta’ kwalità ferm aktar baxxa u għalhekk ma kienx paragunabbli mal-prodott magħmul fir-RPĊ u fil-Komunità. L-investigazzjoni żvelat ukoll li s-suq domestiku fil-Brażil kien żgħir u li l-livell ta’ protezzjoni kien ogħla milli fl-USA. Għalhekk, ma tqiesx li l-Brażil kien pajjiż analogu xieraq. Barra minn hekk, ma kienet disponibbli l-ebda evidenza li tindika li kwalunkwe wieħed mill-pajjiżi proposti bħala pajjiż analogu alternattiv kien aktar adattat mill-USA. |
(35) |
Rigward l-USA, instab li l-volum tal-produzzjoni kien sostanzjali u rappreżentativ rigward l-esportazzjonijiet Ċiniżi tal-karbonat tal-barju. |
(36) |
Safejn huma kkonċernati l-livell ta’ żvilupp ekonomiku u l-proċessi differenti ta’ produzzjoni, tqies li tabilħaqq jista’ jkun hemm xi differenzi. L-USA hija ekonomija ferm industrijalizzata u l-produttur fl-USA kien juża metodu ta’ produzzjoni aktar avvanzat u aktar effiċjenti minn dak li kien jintuża fir-RPĊ. Madankollu, għandu jkun innotat li anki jekk dawn id-differenzi jaffetwaw il-valur normali, normalment għandhom jirriżulta f’valur normali aktar baxx fl-USA u b’hekk ikunu ta’ vantaġġ għall-produtturi li jesportaw Ċiniżi. Barra minn hekk, għandu jitfakkar li, jekk ikun hemm għalfejn, jista’ jsir aġġustament xieraq. Ikun xi jkun il-każ, għalkemm varjazzjonijiet lokali fil-proċessi ta’ produzzjoni ma jistgħux jiġu esklużi, ma ntweriex li fi kwalunkwe pajjiż partikolari għajr l-USA il-proċess ta’ produzzjoni ikun aktar paragunabbli ma’ dak li jintuża fir-RPĊ. |
(37) |
Rigward il-kompetizzjoni fis-suq domestiku ta’ l-USA, il-produttur ta’ l-USA kien suġġett għal kompetizzjoni minn importazzjonijiet mir-RPĊ, mill-Ġermanja u mill-Messiku. L-importazzjonijiet ta’ dawn il-pajjiżi kienu jirrappreżentaw bejn wieħed u ieħor 30 % tas-suq, li kien meqjus bħala ammont sostanzjali. Għaldaqstant kien konkluż li fl-USA kien hemm livell ġust ta’ kompetizzjoni. |
(38) |
Safejn huwa kkonċernat l-aċċess għall-materja prima, instab li l-USA, flimkien mar-RPĊ, kienu wieħed mill-akbar produtturi tal-baritina u kellhom riservi sostanzjali tal-baritina. Għalhekk kien konkluż li l-aċċess għall-materja prima f’termini ta’ disponibbiltà kien paragunabbli fl-USA u fir-RPĊ. |
(39) |
Minħabba dak li ntqal aktar ’il fuq, kien provviżorjament konkluż li l-Istati Uniti jikkostitwixxu pajjiż analogu xieraq skond l-Artikolu 2(7) tar-Regolament bażiku. |
(b) Id-determinazzjoni tal-valur normali fil-pajjiż analogu
(40) |
Skond l-Artikolu 2(7)(a) tar-Regolament bażiku, il-valur normali għall-produtturi li jesportaw li ma ngħatawx MET kien stabbilit fuq il-bażi ta’ l-informazzjoni vverifikata riċevuta mill-produttur fil-pajjiż analogu rigward l-ispejjeż domestiċi u l-bejgħ tal-prodott simili fis-suq ta’ l-USA għal tipi paragunabbli ta’ prodott. |
(41) |
Il-valur normali kien stabbilit billi intużat il-metodoloġija deskritta fil-qosor fil-premessi 43 sa 47 u 53 sa 59. Il-bejgħ domestiku fl-USA kien rappreżentattiv, għalkemm ċerti tipi ta’ prodott ma kinux jinbiegħu fl-andament ordinarju tal-kummerċ, jigifieri nbiegħu b’telf. Għal dawn it-tipi ta’ prodott, il-valur normali kien mibni skond l-Artikolu 2(3) u 2(6) tar-Regolament bażiku, billi ġie miżjud ammont raġonevoli ta’ spejjeż tal-bejgħ, ġenerali u amministrattivi (SG&A) u ammont raġonevoli ta’ marġni ta’ profitt ma’ l-ispiża tal-manifattura. Peress li l-bejgħ domestiku tal-prodott ikkonċernat kien rappreżentattiv, l-SG&A tal-kumpanija tqies li kienu afiddabbli u ntużaw. Safejn huwa kkonċernat il-marġni ta’ profitt, il-marġni ta’ profitt tal-kumpanija stess irrealizzat għall-bejgħ domestiku tal-prodott ikkonċernat ma setax jintuża għaliex, globalment, dan il-bejgħ sar b’telf. Peress li ma kkoopera l-ebda produttur ieħor fl-USA, il-Kummissjoni użat il-marġni ta’ profitt applikabbli għall-produzzjoni u għall-bejgħ ta’ l-istess kategorija ġenerali ta’ prodotti skond l-Artikolu 2(6)(b) tar-Regolament bażiku. |
(42) |
Għat-tipi l-oħra kollha ta’ prodott, il-valur normali kien stabbilit bħala l-prezz medju u mkejjel (bil-komponenti ta’ medja ta’ fatturi) tal-bejgħ domestiku lil klijenti mhux relatati mill-produttur li kkoopera fl-USA, aġġustat kif ġie deskritt aktar ’l isfel. |
3.2. Id-determinazzjoni tal-valur normali għall-produtturi li jesportaw li ngħataw MET
(43) |
Safejn hija kkonċernata d-determinazzjoni tal-valur normali, għal kull produttur li jesporta li jikkoopera, il-Kummissjoni l-ewwel stabbiliet jekk il-bejgħ domestiku totali tal-karbonat tal-barju tiegħu kienx rappreżentattiv meta pparagunat mal-bejgħ totali mill-esportazzjoni lejn il-Komunità. Skond l-Artikolu 2(2) tar-Regolament bażiku, il-bejgħ domestiku tqies li kien rappreżentattiv meta l-volum totali ta’ tali bejgħ kien jirrappreżenta mill-inqas 5 % tal-volum tal-bejgħ totali mill-esportazzjoni tal-produttur lejn il-Komunità. Fuq din il-bażi, għaż-żewġ produtturi li jesportaw, il-bejgħ domestiku globali tal-prodott ikkonċernat matul l-IP sar fi kwantitajiet rappreżentattivi. |
(44) |
Sussegwentement, il-Kummissjoni identifikat dawk it-tipi tal-prodott ikkonċernat mibjugħa f’ambitu domestiku li kienu identiċi jew direttament paragunabbli mat-tipi mibjugħa għall-esportazzjoni lejn il-Komunità. |
(45) |
Għal kull tip mibjugħ mill-produtturi li jesportaw fis-swieq domestiċi tagħhom u li nstab li kien direttament paragunabbli mat-tip ta’ karbonat tal-barju mibjugħ għall-esportazzjoni lejn il-Komunità, kien stabbilit jekk il-bejgħ domestiku kienx biżżejjed rappreżentattiv għall-finijiet ta’ l-Artikolu 2(2) tar-Regolament bażiku. Il-bejgħ domestiku ta’ tip partikolari ta’ karbonat tal-barju tqies li kien biżżejjed rappreżentattiv meta l-volum tal-bejgħ domestiku totali ta’ dak it-tip matul l-IP kien jirrappreżenta 5 % jew aktar tal-volum tal-bejgħ totali tat-tip paragunabbli tal-karbonat tal-barju esportat lejn il-Komunità. Minħabba din l-analiżi, it-tipi kollha tal-prodott ħlief wieħed inbiegħu fi kwantitajiet rappreżentattivi. |
(46) |
Il-Kummissjoni sussegwentement eżaminat jekk il-bejgħ domestiku ta’ kull tip ta’ karbonat tal-barju, mibjugħ f’ambitu domestiku fi kwantitajiet rappreżentattivi, setax jitqies bħala li sar fl-andament ordinarju tal-kummerċ skond l-Artikolu 2(4) tar-Regolament bażiku, billi jiġi stabbilit il-proporzjon ta’ bejgħ profittabbli lil klijenti indipendenti tat-tip ta’ karbonat tal-barju in kwistjoni. |
(47) |
It-tranżazzjonijiet tal-bejgħ domestiku tqies li kienu profittabbli fejn il-prezz ta’ unità ta’ tip ta’ prodott speċifiku kien daqs jew aktar mill-ispiża tal-produzzjoni. L-ispiża tal-produzzjoni għal kull tip ta’ prodott mibjugħ fis-suq domestiku matul l-IP għalhekk kienet iddeterminata. |
(48) |
Produttur li jesporta wieħed talab aġġustament għall-ispejjeż tal-bidu fuq il-bażi li l-produzzjoni b’rati normali ta’ l-użu tal-kapaċità bdew biss wara li beda l-IP. Il-kumpanija bdiet tipproduċi l-karbonat tal-barju biss ftit qabel ma beda l-IP. Il-kumpanija argumentat li wara li xtrat il-linji ta’ produzzjoni tagħha, hija investit ammonti sostanzjali f’tiswijiet qabel il-produzzjoni bħala test u fl-aħħar bdiet il-produzzjoni normali. Ġie sostnut li l-fażi medja tal-bidu għaż-żewġ linji ta’ produzzjoni kienet ta’ 11-il xahar u li l-produzzjoni normali kellha tibda tmien xhur wara l-bidu ta’ l-IP. |
(49) |
B’kuntrast għal dak li ġie sostnut minn dan il-produttur li jesporta, instab li l-produzzjoni u l-volum tal-bejgħ ta’ kull xahar kienu fuq l-istess livell matul l-IP kollu u f’uħud mill-każi saħansitra qabżu l-volumi ta’ kull xahar prodotti u mibjugħa fil-perjodu fejn allegatament intlaħqu rati normali ta’ l-użu tal-kapaċità. Il-volumi tal-bejgħ sostanzjali matul l-IP kollu ma kinux jindikaw bejgħ minn sempliċi produzzjoni bħal test. Konsegwentement, ġie konkluż li l-kumpanija pproduċiet b’rati normali ta’ l-użu tal-kapaċità matul l-IP kollu. Barra minn hekk, il-kumpanija ma wrietx li matul l-allegata fażi tal-bidu, l-ispejjeż ta’ l-unitajiet ta’ produzzjoni kienu ogħla milli fil-perjodu fejn allegament intlaħqu rati normali ta’ l-użu tal-kapaċità. Ikun xi jkun il-każ, anki jekk l-ispejjeż kienu jkunu ogħla, dan ma kienx ikun konsegwenza ta’ volumi ta’ produzzjoni aktar baxxi kif jintwera biċ-ċar aktar ’il fuq. Konsegwentement, ġie konkluż li t-talba għal aġġustament rigward l-ispejjeż tal-bidu kienet kontradittorja u ma kienet ikkonfermata mill-ebda evidenza u għalhekk ġiet miċħuda. |
(50) |
L-istess produttur sostna li l-metodu ta’ deprezzament li ntuża mill-kumpanija għal “investimenti fuq assi fissi” ma kienx raġonevolment jirrifletti l-ispejjeż assoċjati mal-produzzjoni u mal-bejgħ tal-prodott ikkonċernat. L-investimenti li saru kienu jikkorrispondu għall-ispejjeż inizjali tat-tiswija tal-linji ta’ produzzjoni wara li ġew akkwistati u kienu spjegati f’sena finanzjarja waħda, meta jitqies li l-kumpanija qieset li l-ħajja utli ta’ l-assi msewwija kellha tkun ta’ inqas minn sena. Il-kumpanija stenniet li mbagħad wara dan il-perjodu tagħmel aktar investimenti. Meta jitqies, madankollu, li ma kienet meħtieġa l-ebda tiswija ulterjuri fil-linji ta’ produzzjoni, il-ħajja effettiva ta’ l-investimenti kienet itwal milli oriġinarjament kien mistenni. Il-kumpanija sostniet li l-perjodu ta’ deprezzament b’hekk għandu jkun adattat skond ir-realtà ekonomika u li l-ispejjeż kif imniżżla fil-kotba tal-kontabbiltà għandhom jiġu aġġustati b’mod xieraq skond l-Artikolu 2(5) tar-Regolament bażiku. |
(51) |
Rigward id-dikjarazzjoni t’aktar ’il fuq, qed jitqies li spejjeż tat-tiswija ogħla min-normal fl-ewwel sena tas-sjieda ta’ tagħmir użat mhumiex rari u li tali spejjeż ogħla jitniżżlu fil-kotba tal-kontabbiltà fl-ewwel sena jikkorrispondi għal prassi normali tal-kontabbiltà. Il-metodoloġija magħżula mill-kumpanija għalhekk ma kinitx irraġonevoli, imma kienet tikkorrispondi għal prattika normali. Il-fatt li wara ma saret l-ebda spiża ulterjuri għal tiswijiet ma jiġġustifikax devjazzjoni mill-prattika normali tal-kontabbiltà. It-talba tal-kumpanija sabiex l-ispejjeż ikunu aġġustati f’dan ir-rigward għalhekk ma kinitx iġġustifikata u kienet miċħuda. |
(52) |
Il-produttur li jesporta l-ieħor sostna li l-valur ta’ prodott sekondarju (il-kubrit) għandu jitnaqqas mill-ispiża tal-produzzjoni tal-prodott ikkonċernat. Il-kubrit jiġi pproċċessat ulterjorment minn gass (H2S) li jiġi rilaxxat awtomatikament meta jkun prodott il-karbonat tal-barju. Madankollu, il-kumpanija ma kellha l-ebda mezz tekniku sabiex tkejjel il-kwantità ta’ gass użat fil-produzzjoni tal-kubrit u għalhekk ma setgħetx tikkwantifika t-talba tagħha. Barra minn hekk, fis-sistema tal-kontabbiltà tal-kumpanija, il-kubrit u l-prodott ikkonċernat kienu ttrattati bħala żewġ prodotti separati u l-ispejjeż tal-produzzjoni tal-karbonat tal-barju kienu stabbiliti mingħajr ma tqies il-valur tal-kubrit. Fuq din il-bażi, it-talba kienet provviżorjament miċħuda. |
(53) |
Kif issemma fil-premessa 46, kien stabbilit il-proporzjon ta’ bejgħ profittabbli lil klijenti indipendenti fis-suq domestiku tat-tip ta’ prodott in kwistjoni. F’każi fejn il-volum tal-bejgħ tat-tip ta’ karbonat tal-barju, mibjugħ bi prezz nett tal-bejgħ daqs jew aktar mill-ispiża kkalkulata tal-produzzjoni, kien jirrappreżenta aktar minn 80 % tal-volum tal-bejgħ totali ta’ dak it-tip, u fejn il-prezz medju u mkejjel (bil-komponenti ta’ medja ta’ fatturi) ta’ dak it-tip kien daqs jew aktar mill-ispiża tal-produzzjoni, il-valur normali kien ibbażat fuq il-prezz domestiku effettiv, ikkalkulat bħala l-medja mkejla (bil-komponenti ta’ medja ta’ fatturi) tal-prezzijiet tal-bejgħ domestiku kollu ta’ dak it-tip li sar matul l-IP, irrispettivament minn jekk dan il-bejgħ kienx profittabbli jew le. F’każi fejn il-volum tal-bejgħ profittabbli tat-tip ta’ karbonat tal-barju kien jirrappreżenta 80 % jew inqas tal-volum tal-bejgħ totali ta’ dak it-tip, jew fejn il-prezz medju u mkejjel (bil-komponenti ta’ medja ta’ fatturi) ta’ dak it-tip kien inqas mill-ispiża tal-produzzjoni, il-valur normali kien ibbażat fuq il-prezz domestiku effettiv, ikkalkulat bħala l-medja mkejla (bil-komponenti ta’ medja ta’ fatturi) tal-bejgħ profittabbli ta’ dak it-tip biss, sakemm dan il-bejgħ kien jirrapreżenta 10 % jew aktar tal-volum tal-bejgħ totali ta’ dak it-tip. |
(54) |
F’każi fejn il-volum tal-bejgħ profittabbli ta’ kwalunkwe tip ta’ prodott kien jirrappreżenta inqas minn 10 % tal-volum tal-bejgħ totali ta’ dak it-tip, tqies li dan it-tip partikolari ma nbiegħx fi kwantitajiet biżżejjed biex il-prezz domestiku jipprovdi bażi xierqa ħalli jkun stabbilit il-valur normali. |
(55) |
B’riżultat ta’ l-analiżi t’aktar ’il fuq, instab li t-tipi kollha tal-prodott, ħlief wieħed, inbiegħu fl-andament ordinarju tal-kummerċ minħabba l-prezz. |
(56) |
Għat-tipi kollha ta’ prodott li jew ma nbiegħux fi kwantitajiet rappreżentattivi jew li ma nbiegħux fl-andament ordinarju tal-kummerċ minħabba l-prezz, il-prezzijiet domestiċi tal-produttur li jesporta in kwistjoni ma setgħux jintużaw sabiex ikun stabbilit il-valur normali u kellu jiġi applikat metodu ieħor. |
(57) |
F’dan ir-rigward, il-Kummissjoni użat valur normali mibni, skond l-Artikolu 2(3) u 2(6) tar-Regolament bażiku. |
(58) |
Skond l-Artikolu 2(3) tar-Regolament bażiku, il-valur normali kien mibni fuq il-bażi ta’ l-ispiża tal-manifattur ta’ kull produttur li jesporta flimkien ma’ ammont raġonevoli għall-ispejjeż tal-bejgħ, ġenerali u amministrattivi (SG&A) u għall-profitt. |
(59) |
Peress li l-SG&A u l-profitt irrealizzat minn kull wieħed mill-produttur li jesportaw ikkonċernati fis-suq domestiku kienu jikkostitwixxu data affidabbli fit-tifsira ta’ l-Artikolu 2(6) tar-Regolament bażiku, l-SG&A u l-profitt tal-produttur li jesporta intużaw fil-każi kollha fejn il-valur normali kien mibni. |
4. IL-PREZZIJIET TA’ L-ESPORTAZZJONI
(60) |
Għall-produtturi li jesportaw u li kkooperaw Ċiniżi kollha li ngħataw MET, il-bejgħ mill-esportazzjoni kien iddeterminat fuq bażi ta’ kumpanija individwali. Il-bejgħ mill-esportazzjoni kollu lejn il-Komunità tal-produtturi li jesportaw ikkonċernati sar direttament lil klijenti indipendenti fil-Komunità u għalhekk, il-prezz ta’ l-esportazzjoni kien stabbilit skond l-Artikolu 2(8) tar-Regolament bażiku fuq il-bażi tal-prezzijiet effettivament imħallsa jew li jistgħu jitħallsu. |
5. IL-PARAGUN
(61) |
Il-valur normali u l-prezzijiet ta’ l-esportazzjoni kienu pparagunati fuq bażi ex-fabbrika fuq l-istess livell ta’ kummerċ. Sabiex ikun żgurat paragun ġust bejn il-valur normali u l-prezz ta’ l-esportazzjoni, saret konċessjoni xierqa fil-forma ta’ aġġustamenti għad-differenzi li jaffetwaw il-prezzijiet u l-paragunabbiltà tal-prezzijiet skond l-Artikolu 2(10) tar-Regolament bażiku. Ingħataw aġġustamenti xierqa fil-każi kollha fejn instab li kienu raġonevoli, preċiżi u sostnuti minn evidenza vverifikata. |
(62) |
Fuq din il-bażi, saru konċessjonijiet għad-differenzi fl-ispejjeż ta’ l-ippakkjar, fl-ispiża tal-kreditu, fl-iskonti u fir-ribassi, fil-kummissjonijiet, fil-ġarr intern tal-merkanzija, fl-assigurazzjoni, fl-immaniġġjar, fis-servizzi ta’ wara l-bejgħ u fil-livell tal-kummerċ. Safejn għandhom x’jaqsmu l-ispejjeż bankarji, sar aġġustament skond l-Artikolu 2(10)(k) tar-Regolament bażiku. |
(63) |
Safejn huwa kkonċernat il-livell tal-kummerċ, instab li l-maġġoranza tal-bejgħ domestiku fl-USA sar lil utenti aħħarija, filwaqt li l-bejgħ mill-esportazzjoni tal-prodott ikkonċernat mir-RPĊ sar esklussivament lid-distributuri. L-aġġustament kien ikkalkulat fuq il-bażi tad-differenza medja fil-prezzijiet tal-bejgħ lill-utenti aħħarija u tal-bejgħ lid-distributuri fis-suq domestiku ta’ l-USA skond l-Artikolu 2(10)(d) tar-Regolament bażiku. |
(64) |
Instab ukoll li fir-RPĊ kienu aċċessibbli kwantitajiet kbar tal-materja prima ewlenija, il-baritina, mingħajr l-ebda proċess speċifiku ta’ tħaffir fil-minjieri filwaqt li fl-USA l-baritina kienet tinsab fil-minjieri jew fis-superfiċje jew taħt l-art. Barra minn hekk, il-materja prima fiċ-Ċina tiġi ttrasportata lejn fabbriki fil-qrib li prattikament ma jinvolvi l-ebda spiża għat-trasport, filwaqt li fl-USA l-ispiża biex il-baritina tiġi ttrasportata mill-minjieri lejn il-fabbriki kienet sostanzjali. |
(65) |
Għalhekk tqies li aġġustamenti xierqa għall-valur normali fl-USA kienu ġġustifikati sabiex il-kundizzjonijiet tal-produzzjoni tal-karbonat tal-barju fl-USA jinġiebu għal livell paragunabli ma’ dawk fir-RPĊ. Għalhekk, il-valur normali kien aġġustat billi tqiesu d-differenzi ewlenin fil-kundizzjonijiet tal-produzzjoni, jiġifieri d-differenzi fl-ispejjeż għall-produzzjoni u għat-trasport tal-materja prima ewlenija, il-baritina. |
(66) |
Fl-aħħarnett, instab li fl-USA ntefqu spejjeż ambjentali sostanzjali, filwaqt li fir-RPĊ ma kienx hemm tali spejjeż. Għalhekk, il-valur normali kien aġġustat b’mod xieraq. |
6. IL-MARĠNI TAD-DUMPING
6.1. Għall-produtturi li jesportaw li kkooperaw li ngħataw MET
(67) |
Skond l-Artikolu 2(11) tar-Regolament bażiku, il-marġni tad-dumping għal kull produttur li jesporta kien stabbilit fuq il-bażi ta’ pargun bejn il-valur normali medju u mkejjel (bil-komponenti ta’ medja ta’ fatturi) u l-prezz ta’ l-esportazzjoni medju u mkejjel (bil-komponenti ta’ medja ta’ fatturi) għal kull tip ta’ prodott, kif ġie ddeterminat aktar ’il fuq. |
(68) |
Il-marġnijiet provviżorji tad-dumping għall-produtturi li jesportaw li kkooperaw li ngħatalhom MET, espressi bħala perċentwal tal-prezz CIF nett ħieles fuq il-fruntiera, qabel id-dazju, huma:
|
6.2. Għall-produtturi li jesportaw l-oħra kollha
(69) |
Sabiex ikun ikkalkulat il-marġni tad-dumping għall-pajjiż kollu applikabbli għall-esportaturi l-oħra kollha fir-RPĊ, il-Kummissjoni l-ewwel stabbiliet il-livell ta’ kooperazzjoni. Sar paragun bejn l-importazzjonijiet totali tal-prodott ikkonċernat li joriġinaw fir-RPĊ, ikkalkulati fuq il-bażi ta’ l-Eurostat, u r-risposti effettivi għall-kwestjonarju riċevuti mingħand l-esportaturi fir-RPĊ li ma ngħatalhomx MET. Fuq din il-bażi, kien stabbilit li l-livell ta’ kooperazzjoni kien qrib il-100 %. |
(70) |
Il-marġni tad-dumping għall-esportaturi li kkooperaw li ma ngħatalhomx MET li baqa’ konsegwentement kien ikkalkulat billi l-valur normali medju u mkejjel (bil-komponenti ta’ medja ta’ fatturi) għall-pajjiż analogu kien ipparagunat mal-prezz ta’ l-esportazzjoni medju u mkejjel (bil-komponenti ta’ medja ta’ fatturi) irrapportat mill-esportaturi li kkooperaw sabiex wieħed jasal għal marġni tad-dumping medju u mkejjel (bil-komponenti ta’ medja ta’ fatturi) għall-esportaturi li kkooperaw li baqa’. |
(71) |
Fuq din il-bażi, il-livell tad-dumping għall-pajjiż kollu kien provviżorjament stabbilit fuq livell ta’ 34,0 % tal-prezz CIF fuq il-fruntiera Komunitarja. |
D. ID-DANNU
1. ID-DEFINIZZJONI TA’ L-INDUSTRIJA KOMUNITARJA
(72) |
L-uniku produttur Komunitarju li kkoopera kien responsabbli għal 100 % mill-produzzjoni Komunitarja tal-karbonat tal-barju matul l-IP. Għalhekk jitqies li jikkostitwixxi l-industrija Komunitarja fit-tifsira ta’ l-Artikolu 4(1) u ta’ l-Artikolu 5(4) tar-Regolament bażiku. |
(73) |
Peress li l-industrija Komunitarja b’hekk hija kkostitwita minn produttur wieħed biss, il-figuri kollha relatati ma’ ta’ l-aħħar kellhom jiġu indiċjati għal raġunijiet ta’ kunfidenzjalità. |
2. IL-KONSUM KOMUNITARJU
(74) |
Il-konsum Komunitarju kien stabbilit fuq il-bażi tal-volumi tal-bejgħ ta’ l-industrija Komunitarja fuq is-suq Komunitarju flimkien ma’ l-importazzjonijiet mir-RPĊ u minn pajjiżi terzi oħra, fuq il-bażi ta’ l-Eurostat. Bejn l-2000 u l-2002, il-konsum Komunitarju tal-karbonat tal-barju naqas b’10 % minħabba s-sitwazzjoni ekonomika diffiċli b’mod ġenerali. Wara, irkupra għal-livell ta’ l-2000, filwaqt li l-importazzjonijiet mir-RPĊ żdiedu, kif jidher fit-tabella t’hawn taħt.
|
3. L-IMPORTAZZJONIJIET MILL-PAJJIŻ IKKONĊERNAT
(a) Il-volum u s-sehem mis-suq
(75) |
Il-volum ta’ l-importazzjonijiet tal-karbonat tal-barju mir-RPĊ fil-Komunità żdied minn 54 167 tunnellata metrika fl-2000 għal 63 742 tunnellata metrika fl-IP, jiġifieri bi 18 % tul il-perjodu meqjus. Għandu jiġi nnotat li fl-2002 l-importazzjonijiet naqsu għal 48 900 tunnellata metrika, qabel ma rkupraw malajr fl-IP. |
(76) |
Fl-2000, is-sehem mis-suq korrispondenti kien ta’ madwar 40 % u tul il-perjodu meqjus żdied bi 19 %, prinċipalment minħabba ż-żieda sostanzjali fl-importazzjonijiet mir-RPĊ fl-2003. |
(b) Il-prezzijiet
(77) |
Il-prezzijiet medji għall-importazzjonijiet mir-RPĊ naqsu b’mod kostanti minn EUR 253/tunnellata metrika fl-2000 għal EUR 186/tunnellata metrika waqt l-IP. |
(c) It-traħħis tal-prezzijiet taħt il-prezz normali (price undercutting)
(78) |
Sabiex ikun analizzat it-traħħis tal-prezzijiet taħt il-prezz normali, il-prezzijiet tal-bejgħ medji u mkejla (bil-komponenti ta’ medja ta’ fatturi) għal kull tip ta’ prodott ta’ l-industrija Komunitarja lil klijenti mhux relatati fis-suq Komunitarju, aġġustati għal bażi barra mill-fabbrika, kienu pparagunati mal-prezzijiet ta’ l-esportazzjoni medji u mkejla (bil-komponenti ta’ medja ta’ fatturi) korrispondenti ta’ l-importazzjonijiet ikkonċernati, stabbiliti fuq bażi CIF b’aġġustament xieraq għad-dazji doganli u għall-ispejjeż ta’ wara l-importazzjoni. Il-paragun sar wara t-tnaqqis tar-ribassi u ta’ l-iskonti. |
(79) |
B’differenza għall-importazzjonijiet mir-RPĊ, l-industrija Komunitarja tiggarantixxi prodott stabbli skond l-ispeċifikazzjonijiet tal-klijenti b’dejjem eżattament l-istess impuritajiet u toffri servizzi lil klijent bħala analiżi fil-laboratorji. Il-valur tas-suq ta’ dawn is-servizzi tqies fil-paragun tal-prezzijiet billi sar aġġustament ta’ 25 % għall-prezzijiet ta’ l-industrija Komunitarja, fuq il-bażi ta’ l-informazzjoni riċevuta mill-industrija Komunitarja. |
(80) |
Diversi importaturi u utenti sostnew li l-industrija Komunitarja titlob prezzijiet ogħla minħabba r-reattività akbar tal-prodott tagħha. Dan l-argument kellu jiġi miċħud peress li l-esportaturi tar-RPĊ jistgħu jipprovdu prodotti ekwivalenti għal kull grad prodott mill-industrija Komunitarja minħabba l-progress tekniku li sar f’dawn l-aħħar snin. Barra minn hekk, l-aktar grad reattiv tal-karbonat tal-barju jammonta għal inqas minn 5 % tal-bejgħ ta’ l-industrija Komunitarja. Għalhekk, tqies li ma kienx hemm għalfejn isir aġġustament għad-differenzi fir-reattività. |
(81) |
Il-paragun wera li, matul l-IP, il-prodott ikkonċernat li joriġina fir-RPĊ inbiegħ fil-Komunità bi prezzijiet li huma irħas mill-prezzijiet ta’ l-industrija Komunitarja bi 28 % sa 31 %, meta espressi bħala perċentwal tal-prezzijiet ta’ l-aħħar. |
4. IS-SITWAZZJONI TA’ L-INDUSTRIJA KOMUNITARJA
(82) |
Skond l-Artikolu 3(5) tar-Regolament bażiku, il-Kummissjoni eżaminat il-fatturi ekonomiċi u l-indiċijiet rilevanti kollha li għandhom influwenza fuq l-istat ta’ l-industrija Komunitarja. |
(83) |
Kien analizzat jekk l-industrija Komunitarja għadiex fil-proċess li tirkupra mill-effetti tas-sussidji jew tad-dumping ta’ l-imgħoddi, imma ma nstabet l-ebda evidenza li dan għandu jkun il-każ. |
(a) Il-produzzjoni
(84) |
Il-produzzjoni ta’ l-industrija Komunitarja naqset bi 13 % tul il-perjodu meqjus. Bejn l-2000 u l-2001, il-produzzjoni baqgħet stabbli u sussegwentement naqset. |
(b) Il-kapaċità u l-użu tal-kapaċità
(85) |
Tul il-perjodu meqjus, l-użu tal-kapaċità naqas b’14 %. Dan mhux spjegat minn żieda żgħira ta’ 2 % fil-kapaċità totali tal-produzzjoni ta’ l-industrija Komunitarja ta’ bejn l-2001 u l-2002 tul il-perjodu meqjus. |
(c) Il-bejgħ, il-prezzijiet u s-sehem mis-suq
(86) |
Il-volum tal-bejgħ lil partijiet mhux relatati fil-Komunità naqas bi 17 % mill-2000 sa l-IP (il-bejgħ lil klijenti mhux relatati kien jikkonsisti f’inqas minn 1 % tal-volum tal-bejgħ totali), biex b’hekk is-sehem mis-sehem tnaqqas bejn 55 % u 60 % bejn 45 % u 50 %. Peress li l-prezz medju għal kull tunnellata metrika naqas b’ 7 %, il-fatturat niżel bi 23 %. |
(d) L-inventarji
(87) |
Bejn l-2000 u l-2001, il-ħażniet tal-prodotti lesti kważi ttriplaw. Dawn tnaqqsu konsiderevolment tul is-sentejn segwenti u matul l-IP kienu jammontaw għal kważi d-doppju ta’ l-2000. |
(e) L-impjiegi, il-produttività u l-pagi
(88) |
Tul il-perjodu meqjus, l-impjiegi fl-industrija Komunitarja naqsu b’10 %. Matul l-istess żmien, il-pagi żdiedu gradwalment b’10 %; ikkalkulat fuq il-bażi tat-tunnellati metriċi prodotti għal kull impjegat l-ewwel żdiedu bi 3 % bejn l-2000 u l-2002 u sussegwementement niżlu bi kważi 6 %. |
(f) It-tkabbir
(89) |
Filwaqt li bejn l-2000 u l-IP il-konsum Komunitarju baqa’ bażikament stabbli, il-volum tal-bejgħ ta’ l-industrija Komunitarja naqas bi 17 %. Min-naħa l-oħra, il-volum ta’ l-importazzjonijiet ikkonċernati tela’ bi 18 %. It-tendenza kienet saħansitra aktar evidenti bejn l-2002 u l-IP, bil-konsum Komunitarju jitla’ b’madwar 10 %, il-volum tal-bejgħ ta’ l-industrija Komunitarja jaqa’ b’aktar minn 10 % u l-importazzjonijiet mir-RPĊ jitilgħu b’aktar minn 30 %. B’hekk, il-bejgħ ta’ l-industrija Komunitarja niżel minkejja domanda dejjem akbar fil-perjodu bejn l-2002 u l-IP. Konsegwentement, is-sehem mis-suq ta’ l-industrija Komunitarja niżel bi kważi 9 punti perċentwali, l-aktar minħabba l-importazzjonijiet mir-RPĊ. B’kuntrast, bejn l-2002 u l-IP, is-sehem mis-suq Ċiniż żdied b’aktar minn 7 punti perċentwali. |
(g) L-investiment
(90) |
Bejn l-2000 u l-2001, l-investimenti aktar minn irduppjaw. Fl-2002, baqgħu stabbli qabel ma fl-2003 irritornaw għal-livell ta’ l-2000. L-investimenti saru prinċiplament għall-protezzjoni ambjentali u għall-manutenzjoni. |
(h) Il-profittabbiltà, il-qligħ fuq l-investiment, il-likwidità u l-ħila li jinġabar kapital
(91) |
Tul il-perjodu kollu meqjus, il-bejgħ ta’ l-industrija Komunitarja tal-prodott simili ma kienx profittabbli. Filwaqt li l-industrija Komunitarja fl-2000 kienet kważi wasslet f’livell fejn la tagħmel telf u lanqas profitt, is-sitwazzjoni ddeterjorat u l-bejgħ xejn ma kien profittabbli matul l-IP (aktar minn – 10 %). |
(92) |
Il-qligħ fuq l-investiment, espress bħala profitti/telf b’relazzjoni għall-valur nett kontabbli ta’ l-assi kien ukoll negattiv tul il-perjodu kollu meqjus u ddeterjora sena wara sena. Fl-IP, il-qligħ fuq l-investiment kien ta’ bejn – 25 % u – 20 %. |
(93) |
Bejn l-2000 u l-IP, il-likwidità ġġenerata mill-prodotti magħmula u mibjugħa fil-Komunità naqset f’daqqa. Filwaqt li kienet għadha ferm pożittiva fl-2000, saret negattiva fl-2001 u niżlet matul is-sentejn segwenti fejn kienet tammonta għal aktar minn — EUR 1 000 000 matul l-IP. |
(94) |
Peress li l-investimenti kienu ferm baxxi, ma nstabx li l-industrija Komunitarja kienet qed tesperjenza diffikultajiet fil-ħila tagħha li tiġbor il-kapital jew fil-forma ta’ self mill-banek jew bħala ishma mill-kumpanija ġenitur. |
(i) Id-daqs tal-marġni tad-dumping
(95) |
Meta jitqiesu l-volum u l-prezzijiet ta’ l-importazzjonijiet suġġetti għal dumping mill-pajjiż ikkonċernat, l-impatt tal-marġnijiet effettivi tad-dumping ma jistax jitqies li kien negliġibbli. |
5. KONKLUŻJONI DWAR ID-DANNU
(96) |
L-eżami tal-fatturi li ssemmew aktar ’il fuq juri li bejn l-2000 u l-IP, is-sitwazzjoni ta’ l-industrija Komunitarja ddeterjorat konsiderevolment. Tul il-perjodu meqjus, il-volum tal-bejgħ niżel bi 17 % fejn irriżulta f’telf sinifikanti fis-sehem mis-suq. Il-prezzijiet medji niżlu u konsegwentement il-fatturat naqas b’mod saħansitra aktar sinifikanti. Il-volum tal-produzzjoni u l-użu tal-kapaċità segwew l-istess tendenza. Minħabba dawn l-iżviluppi negattivi, tul il-perjodu meqjus, il-profittabbiltà, il-qligħ fuq l-investiment u l-likwidità ddeterjoraw konsiderevolment. |
(97) |
B’hekk instab li s-sitwazzjoni ta’ l-industrija Komunitarja ddeterjorat sa tali punt li qed jiġi pprovviżorjament konkluż li l-industrija Komunitarja batiet minn dannu materjali fit-tifsira ta’ l-Artikolu 3(1) u 3(5) tar-Regolament bażiku. |
E. IL-KAWŻALITÀ
1. INTRODUZZJONI
(98) |
Skond l-Artikolu 3(6) tar-Regolament bażiku, il-Kummissjoni eżaminat jekk l-importazzjonijiet suġġetti għal dumping tal-karbonat tal-barju li joriġinaw fil-pajjiż ikkonċernat ikkawżawx dannu lill-industrija Komunitarja sa punt li jista’ jiġi kklassifikat bħala materjali. Skond l-Artikolu 3(7) tar-Regolament bażiku, kienu eżaminat wkoll fatturi magħrufa għajr l-importazzjonijiet suġġetti għal dumping, li fl-istess ħin setgħu kienu qed jagħmlu dannu lill-industrija Komunitarja, sabiex ikun żgurat li d-dannu possibbli kkważat minn dawn il-fatturi l-oħra ma jiġix attribwit lill-importazzjonijiet suġġetti għal dumping. |
2. L-EFFETT TA’ L-IMPORTAZZJONIJIET SUĠĠETTI GĦAL DUMPING
(99) |
Tul il-perjodu meqjus, l-importazzjonijiet suġġetti għal dumping mill-pajjiż ikkonċernat żdiedu b’mod sinifikanti f’termini ta’ volum (minn 54 167 tunnellata metrika għal 63 742 tunnellata metrika) u ta’ sehem mis-suq (b’aktar minn 7 punti perċentwali). L-aktar żieda importanti fil-volumi ta’ l-importazzjoni saret matul l-IP (żieda bi 30,4 % meta pparagunata ma’ l-2002), filwaqt li tul il-perjodu meqjus kollu l-prezzijiet ta’ l-importazzjoni naqsu. |
(100) |
Dan kien jikkoniċidi ma’ tnaqqis fil-bejgħ u telf konsegwenti fis-sehem mis-suq ta’ l-industrija Komunitarja ta’ kważi 9 punti perċentwali u bi tnaqqis fil-prezzijiet medji tal-bejgħ. L-industrija Komunitarja kellha tbaxxi l-prezzijiet tal-bejgħ tagħha peress li, matul l-IP, l-importazzjonijiet suġġetti għal dumping mir-RPĊ kienu ferm irħas. Minħabba l-prezzijiet baxxi tal-bejgħ, l-industrija Komunitarja ma setgħetx tkopri l-ispejjeż tal-produzzjoni u għalhekk ma kinitx profittabbli. |
3. L-EFFETT TA’ FATTURI OĦRA
(a) L-importazzjonijiet minn pajjiżi terzi oħra
(101) |
Tul il-perjodu meqjus, il-volum ta’ l-importazzjonijiet tal-karbonat tal-barju minn pajjiżi terzi żdied minn 6 500 tunnellata metrika għal 8 700 tunnellata metrika, li, matul l-IP, jirrappreżenta sehem mis-suq ta’ inqas minn 10 %. Il-pajjiżi terżi ewlenin l-oħra li jesportaw il-karbonat tal-barju lejn il-Komunità kienu l-Brażil u r-Russja. |
(102) |
Matul l-IP, il-prezz medju ta’ l-importazzjonijiet mir-Russja kien jammonta għal EUR 278/tunnellata metrika. Dan ifisser li l-prodotti Russi kienu konsiderevolment aktar għaljin mill-importazzjonijiet mir-RPĊ u biss ftit irħas mill-prodotti mibjugħa mill-industrija Komunitarja. Skond l-importaturi u l-utenti, il-kwalità tal-karbonat tal-barju importat mir-Russja hija aktar baxxa mill-kwalità kemm tal-prodott ikkonċernat importat mir-RPĊ kif ukoll tal-prodott simili mibjugħ mill-industrija Komunitarja. Minħabba l-fatt li l-karbonat tal-barju mir-Russja huwa ta’ kwalità aktar baxxa imma aktar għali mill-importazzjonijiet mir-RPĊ, dan mhux kompetittiv fis-suq Komunitarju. Meta pparagunat mal-prodott mibjugħ mill-industrija Komunitrja, il-kwalità tal-karbonat tal-barju mir-Russja hija ferm aktar baxxa u mhix ikkumpensata mid-differenza żgħira fil-prezz. Peress li l-prodott Russu mhux kompetittiv, tul il-perjodu meqjus is-sehem mis-suq tiegħu naqas. Għalhekk kien provviżorjament konkluż li l-importazzjonijiet mir-Russja ma kisrux ir-rabta kawżali bejn id-dumping u d-dannu materjali kkawżat mill-importazzjonijiet Ċiniżi. |
(103) |
Matul l-IP, il-prezz medju ta’ l-importazzjonijiet mill-Brażil kien ta’ EUR 186/tunnellata metrika. Tul il-perjodu meqjus, is-sehem mis-suq ta’ l-importazzjonijiet mill-Brażil tela’ b’madwar 2 punti perċentwali. Meta jitqiesu ż-żieda ċkejkna fil-bejgħ u s-sehem mis-suq ta’ inqas minn 5 %, kien provviżorjament konkluż li dawn l-importazzjonijiet ma kisrux ir-rabta kawżali bejn id-dumping u d-dannu materjali kkawżat mill-importazzjonijiet Ċiniżi. |
(104) |
Minħabba s-sejbiet t’aktar ’il fuq, kien provviżorjament konkluż li l-importazzjonijiet minn pajjiżi terzi oħrajn ma kisrux ir-rabta kawżali bejn id-dumping u d-dannu materjali kkawżat mill-importazzjonijiet Ċiniżi lejn l-industrija Komunitarja. |
(b) L-iżvilupp tad-domanda
(105) |
Rigward l-iżvilupp tad-domanda, bejn l-2000 u l-2002 il-konsum apparenti tal-karbonat tal-barju naqas imma l-industrija Komunitarja rnexxielha żżomm is-sehem mis-suq tagħha. Sussegwentement, il-bejgħ u s-sehem mis-suq ta’ l-industrija Komunitarja niżlu, għalkemm il-konsum żdied konsiderevolment matul l-IP. Fl-istess ħin, l-importazzjonijiet Ċiniżi rnexxielhom jirbħu sehem mis-suq, fejn żdied b’aktar minn 7 punti perċentwali tul il-perjodu kkonċernat. Għalhekk, id-dannu materjali li batiet l-industrija Komunitarja ma jistax jiġi attribwit lil tnaqqis fid-domanda fis-suq Komunitarju. |
(c) Il-varjazzjonijiet fil-munita
(106) |
Uħud mill-partijiet interessati sostnew li d-deprezzament tad-dollaru Amerikan (USD) fil-konfornt ta’ l-euro ffavorixxa l-importazzjonijiet tal-karbonat tal-barju fil-Komunità Ewropew. Il-maġġoranza vasta tat-tranżazzjonijiet ta’ importazzjoni mill-pajjiż ikkonċernat fil-Komunità Ewropea tabilħaqq tniżżlu fil-fatturi bħala USD. Minn nofs l-2002, u b’mod sinifikanti matul l-IP, l-euro apprezzat fil-konfront ta’ l-USD biex b’hekk iffavoriet lill-esportazzjonijiet fiż-żona ta’ l-euro. |
(107) |
Madankollu, anki fuq il-bażi tar-rata tal-kambju prevalenti fil-bidu ta’ l-2002, l-importazzjonijiet mir-RPĊ kienu irħas mill-prezzijiet ta’ l-industrija Komunitarja. Barra dan, din is-sitwazzjoni favorevoli tar-rata tal-kambju kien ikollha impatt anki fuq l-importazzjonijiet minn pajjiżi terzi oħrajn peress li fil-fatturi wkoll tniżżlu prinċipalment bħala USD. Il-fatt li l-varjazzjonijiet fil-munita ma kellhomx effett kbir fuq l-importazzjonijiet minn pajjiżi oħra, jindika li ma jistgħux jitqiesu bħala l-fattur kawżali ewlieni għall-fluss sinifikanti ta’ importazzjonijiet suġġetti għal dumping mill-pajjiż ikkonċernat. |
(108) |
Għalhekk, kien provviżorjament konkluż li, għalkemm l-apprezzament ta’ l-Euro rigward l-USD seta’ ffavorixxa l-importazzjonijiet tal-karbonat tal-barju fil-Komunità Ewropea, mhux biżżejjed sabiex tinkiser ir-rabta kawżali bejn l-importazzjonijiet suġġetti għal dumping u d-dannu materjali li batiet l-industrija Komunitarja. |
(d) L-importazzjonijiet mill-industrija Komunitarja
(109) |
Ġie sostnut li l-industrija Komunitraja importat il-karbonat tal-barju mir-RPĊ u b’hekk ikkontribwiet għad-dannu li batiet hija stess. Madankollu, l-industrija Komunitarja ma xtrat l-ebda prodott mingħand ir-RPĊ wara l-2001 u kienet importatu qabel dik is-sena biss fi kwantitajiet neliġibbli (madwar 1 % tal-produzzjoni tagħha stess). Għalhekk, qed jiġi provviżorjament konkluż li l-importazzjonijiet mill-industrija Komunitarja tal-prodott ikkonċernat mir-RPĊ, jekk kien hemm, ma setgħux ikunu raġuni determinati għad-dannu materjali li batiet l-industrija Komunitarja. |
(e) Fatturi ulterjuri
(110) |
Diversi utenti u importaturi argumentaw li l-Komunità qed tbati dannu minħabba l-kompetizzjoni minn sospensjoni sospiża fl-ilma tal-karbonat tal-barju li telimina t-trab tossiku ġġenerat meta l-karbonat tal-barju jintuża f’forma ta’ trab. Is-sospensjoni tiġi prodotta mill-importaturi fil-Komunità, billi jintuża t-trab importat mir-RPĊ u wara l-importazzjoni jiġu miżjuda l-ilma u xi addittivi speċifiċi. |
(111) |
Dan l-argument irid jiġi miċħud għaliex l-industrija Komunitarja għandha l-għarfien kif tipproduċi sospensjoni imma ma tippromwovihx għaliex tqis li mhux ekonomiku li tittrasporta l-ilma. Għalhekk, f’kooperazzjoni ma’ kumpaniji Ewropej oħra, żviluppat tagħmir speċifiku għall-industrija tal-briks u tal-madum li jippermetti li l-utenti tal-karbonat tal-barju jħalltu t-trab ma’ l-ilma fil-punt tal-produzzzjoni, biex b’hekk jeliminaw ukoll il-ġenerazzjoni ta’ trab tossiku. B’hekk, l-industrija Komunitarja toffri prodott kompetittiv għas-sospensjoni. Madankollu, peress li s-sospensjoni tiġi prodotta b’karbonat tal-barju importat miċ-Ċina bi prezzijiet suġġetti għal dumping, tista’ tinbiegħ bi prezzijiet li huma aktar baxxi mill-prezzijiet tat-trab ipprovdut mill-industrija Komunitarja. Għalhekk, ma titqiesx bħala fattur ieħor li jikkawża dannu, għaliex l-impatt tas-sospensjoni jirriżulta huwa stess mill-importazzjonijiet suġġetti għal dumping. Tabilħaqq, li kieku l-prodott ikkonċernat ma kienx importat bi prezzijiet suġġetti għal dumping, il-prodott offrut mill-industrija Komunitarja li huwa f’kompetizzjoni mas-sospensjoni, kien ikun jista’ jikkompeti b’termini ġusti mas-sospensjoni. |
4. KONKLUŻJONI DWAR IL-KAWŻALITÀ
(112) |
L-analiżi t’aktar ’il fuq wriet li kien hemm żieda sostanzjali fil-volum u fis-sehem mis-suq ta’ l-importazzjonijiet li joriġinaw fil-pajjiż ikkonċernat, speċjalment bejn l-2002 u l-IP, flimkien ma’ tnaqqis konsiderevoli fil-prezzijiet tal-bejgħ tagħhom u livell għoli ta’ traħħis tal-prezzijiet matul l-IP. Din iż-żieda fis-sehem mis-suq ta’ l-importazzjonijiet Ċiniżi bi prezz baxx tikkoniċidi ma’ tnaqqis sinifikanti fis-sehem mis-suq ta’ l-industrija Komunitarja, li, flimkien mal-pressjoni ’l isfel fuq il-prezzijiet, irriżultat, fost l-oħrajn, f’telf sostanzjali ta’ l-industrija Komunitarja matul l-IP. Min-naħa l-oħra, l-eżami tal-fatturi l-oħra li setgħu jagħmlu dannu lill-industrija Komunitarja żvela li l-ebda wieħed minn dawn ma seta’ kellu impatt negattiv sinifikanti jew seta’ jikser ir-rabta kawżali bejn l-importazzjonijiet suġġetti għal dumping mir-RPĊ u d-dannu materjali li batiet l-industrija Komunitarja. |
(113) |
Fuq il-bażi ta’ l-analiżi t’aktar ’il fuq li għamlet distinzjoni xierqa u sseparat l-effetti tal-fatturi magħrufa kollha dwar is-sitwazzjoni ta’ l-industrija Komunitarja mill-effetti dannużi ta’ l-importazzjonijiet li kienu suġġetti għal dumping, qed jiġi provviżorjament konkluż li l-importazzjonijiet mir-RPĊ ikkawżaw dannu materjali lill-Komunità fit-tifsira ta’ l-Artikolu 3(6) tar-Regolament bażiku. |
F. L-INTERESS KOMUNITARJU
1. RIMARKA PRELIMINARI
(114) |
Skond l-Artikolu 21 tar-Regolament bażiku, il-Kummissjoni eżaminat jekk, minkejja l-konklużjoni dwar dumping dannuż, kienx hemm raġunijiet konvinċenti sabiex jiġi konkluż li mhux fl-interess Komunitarju li jiġu adottati miżuri f’dan il-każ partikolari. Id-determinazzjoni ta’ l-interess Komunitarju kienet ibbażata fuq apprezzament ta’ l-interessi differenti kollha involuti, jiġifieri dawk ta’ l-industrija Komunitarja, ta’ l-importaturi u ta’ l-utenti tal-prodott ikkonċernat. |
2. L-INVESTIGAZZJONI
(115) |
Sabiex ikun ivvalutat l-impatt probabbli ta’ l-impożizzjoni jew tan-nuqqas ta’ impożizzjoni tal-miżuri, il-Kummissjoni talbet informazzjoni mingħand il-partijiet interessati kollha. Il-Kummissjoni bagħtet kwestjonarji lill-industrija Komunitarja, lil 10 fornituri ta’ materja prima, lil 18-il importatur u lil 38 utent tal-prodott ikkonċernat. Irrispondew il-produttur Komunitarju, fornitur wieħed ta’ materja prima, ħames importaturi, sitt utenti u assoċjazzjoni waħda ta’ l-utenti. |
3. L-INDUSTRIJA KOMUNITARJA
(116) |
L-industrija Komunitarja linja tal-produzzjoni awtomatizzat għalkollox, fejn topera b’mod ferm effiċjenti fl-infiq rigward materjal mhux skond speċifikazzjoni u n-numru ta’ impjegati għal kull tunnellata metrika prodotta. Għamlet ukoll investimenti ta’ sostituzzjoni u kompliet tesporta. |
(117) |
Jitqies li l-impożizzjoni tal-miżuri se trodd il-kompetizzjoni ġusta fis-suq. Jekk il-miżuri jittieħdu, l-industrija Komunitarja se tkun tista’ tirbaħ mill-ġdid għallinqas parti mis-sehem mis-suq mitluf tagħha b’impatt pożittiv konsegwenti fuq il-profittabbiltà tagħha. |
(118) |
Kif issemma aktar ’il fuq, l-industrija Komunitarja batiet minn dannu materjal kkawżat minn importazzjonjiet suġġetti għal dumping li joriġinaw fil-pajjiż ikkonċernat. Jekk ma jiġux imposti miżuri, huwa probabbli li s-sitwazzjoni ta’ l-industrija Komunitarju tiddeterjora ulterjorment. Dan jinvolvi telf ulterjuri ta’ impjiegi. L-effett ta’ dipressiv fuq il-prezzijiet ta’ l-importazzjonijiet suġġetti għal dumping għandu jkompli jfixkel l-isforzi kollha ta’ l-industrija Komunitarja, b’mod partikolari, sabiex tirbaħ mill-ġdid livell profittabbli. Jekk ma jittieħdux miżuri se jipperikola l-preżenza tul perjodu twil ta’ żmien ta’ l-industrija u ma jistax jiġi eskluż li l-uniku produttur Komunitarja jkollu jagħlaq minħabba l-kompetizzjoni mill-importazzjonijiet suġġetti għal dumping jekk il-miżuri ma jiġux imposti. |
4. IL-FORNITURI TAL-MATERJA PRIMA
(119) |
Risposta waħda għall-kwestjonarju kienet riċevuta mingħand fornitur tal-materja prima li jipprovdi s-sulfat tal-barju naturali lill-industrija Komunitarja. Huwa l-uniku fornitur tal-materja prima ewlenija għall-produzzjoni tal-karbonat tal-barju li jinsab fil-Komunità. |
(120) |
Jekk jiġu imposti miżuri u l-industrija Komunitarja tirbaħ mill-ġdid is-sehem mis-suq mitluf, il-fornitur tal-materja prima wkoll se jkun jista’ jbiegħ aktar mill-prodott tiegħu. Peress li l-materja prima kkonċernata tikkostitwixxi parti ewlenija mill-fatturat ta’ din il-kumpanija, dan se jtejjeb is-sitwazzjoni finanzjarja tal-fornitur tal-materja prima. |
(121) |
Jekk ma jiġux imposti miżuri, il-bejgħ ta’ l-industrija Komunitarja se jkompli jinżel u konsegwentement anki d-domanda tagħha għall-materja prima. Dan se jaffetwa b’mod negattiv il-profittabilità tal-fornitur tal-materja prima. |
5. L-IMPORTATURI
(122) |
Kienu riċevuti ħames risposti għall-kwestjonarju mingħand importaturi li kienu lkoll kontra l-impożizzjoni tal-miżuri. |
(123) |
Parti mill-prodott ikkonċernat importat f’forma ta’ trab mir-RPĊ jiġi sussegwentement ittrasformat mill-importaturi f’sospensjoni, billi jiġu miżjuda l-ilma u xi additivi speċjali. Peress li l-marġni ta’ profitt ta’ l-importaturi għall-bejgħ tal-prodott ikkonċernat u tas-sospensjoni fuq bażi medja u mkejla (bil-komponenti ta’ medja ta’ fatturi) huwa ta’ 6,8 %, l-importaturi se jkunu jistgħu jġorru parti miż-żidiet possibbli fil-prezzijiet u jgħaddu parti minnhom lill-klijenti tagħhom. Minħabba d-dazji relattivament baxxi li għandhom ikunu imposti fuq il-kumpaniji li joperaw f’kundizzjonijiet ta’ ekonomija tas-suq u minħabba s-sorsi alternattivi disponibbli bla ebda dazju, iż-żidiet possibbli fil-prezzijiet se jkunu limitati. |
(124) |
Meta jitqies il-fatt li l-bejgħ tal-prodott ikkonċernat u tas-sospensjoni jammontaw bejn wieħed u ieħor għal madwar 15 % tal-fatturat totali ta’ l-importaturi, is-sitwazzjoni finanzjarja ta’ l-importaturi mhux se tkun serjament affetwata mill-impożizzjoni ta’ dazju. |
(125) |
Fuq il-bażi ta’ dak li ntqal aktar ’il fuq, kien provviżorjament konkluż li l-effett tal-miżuri ta’ anti-dumping, jekk ikun hemm, wisq probabbli mhux se jkollu impatt materjali fuq l-importaturi. |
6. L-UTENTI
(126) |
Kienu riċevuti sitt risposti għall-kwestjonarju mingħand utenti u sottomissjoni waħda mingħand assoċjazzjoni ta’ utenti. Saret żjara ta’ verifika waħda fil-kumpanija li xtrat l-akbar kwantità ta’ karbonat tal-barju matul l-IP. Is-sitt utenti li kkooperaw kienu jirrappreżentaw madwar 9 % tal-konsum Komunitarju totali tal-karbonat tal-barju matul l-IP. In-numru ta’ staff f’dawn il-kumpaniji direttament relatat mal-prodotti li jużaw il-karbonat tal-barju kien ta’ madwar 570 persuna. L-utenti li kkooperaw kollha, ħlief wieħed li qed jixtri mingħand l-industrija Komunitarja, ħadu pożizzjoni kontra l-impożizzjoni tad-dazji ta’ anti-dumping minħabba li jibżgħu li jitilfu sors irħis ta’ provvista, li jagħmel dannu lill-kompetittività tagħhom fis-suq eqreb tal-punt tal-bejgħ milli dak tal-manifattura jew tal-produzzjoni, fil-konfront ta’ kompetituri f’pajjiżi terzi. |
(127) |
L-utenti tal-karbonat tal-barju huma prinċipalment ikkonċentrati fil-produzzjoni tal-ħġieġ tas-settijiet tat-televiżjoni, fl-industrija tal-brikks u tal-madum, fis-settur taċ-ċeramika u fil-produzzjoni tal-ferrite. Fuq il-bażi tar-risposti għall-kwestjonarju u ta’ l-informazzjoni mressqa waqt smigħ, kien stabbilit li s-sehem tal-karbonat tal-barju fl-ispejjeż totali tal-produzzjoni ta’ l-utenti kien bejn wieħed u ieħor taħt it-8 %. |
(128) |
Id-dazji mhux se jirriżultaw fi tnaqqis sinifikanti fil-kompetizzjoni jew f’nuqqas ta’ provvista. Minflok, jista’ jkun previst li l-importazzjonijiet miċ-Ċina se jibqgħu disponibbli bi prezzijiet kompetittivi, peress li d-dazji individwali proposti għall-produtturi li jesportaw Ċiniżi huma taħt il-livelli tat-traħħis taħt il-prezz normali li nstab. Barra minn hekk, huma wkoll disponibbli sorsi alternattivi ta’ provvista minn pajjiżi terzi oħra bl-ebda dazju. Fuq il-bażi ta’ dan kollu, qed jiġi konkluż li l-utenti se jkomplu jkunu jistgħu jixtru karbonat tal-barju bi prezzijiet kompetittivi u huwa mistenni li l-impatt tad-dazji fuq il-kompetittività ta’ l-utenti fil-konfront tal-kompetituri tagħhom f’pajjiżi terzi se jkun limitat. |
(129) |
Kien sostnut li l-industrija Komunitarja mhix f’pożizzjoni li tissodisfa d-domanda kollha għall-karbonat tal-barju fil-Komunità. F’dan ir-rigward, għandu jitfakkar li l-miżuri mhumiex maħsuba li jipprevjenu li l-importazzjonijiet jidħlu fil-Komunità imma li jiżguraw li dawn ma jsirux bi prezzijiet dannużi suġġetti għal dumping. Importazzjonijiet minn diversi oriġini se jkomplu jissodisfaw parti sinifikanti tad-domanda Komunitarja. Għalhekk, mhu mistenni l-ebda nuqqas fil-provvista. |
(130) |
Fuq il-bażi ta’ dak li ngħad aktar ’il fuq, kien provviżorjament konkluż li l-effett tal-miżuri ta’ anti-dumping, jekk hemm, wisq probabbli mhux se jkollu impatt materjali fuq l-utenti. |
7. EFFETTI LI JFIXKLU L-KOMPETIZZJONI U L-KUMMERĊ
(131) |
Rigward l-effetti tal-miżuri possibbli fuq il-kompetizzjoni fil-Komunità, il-produtturi li jesportaw li kkooperaw ikkonċernati, meta jitqiesu l-pożizzjonijiet b’saħħithom fis-suq tagħhom, probabbilment se jkomplu jbiegħu l-prodotti tagħhom, għalkemm bi prezzijiet mhux suġġetti għal dumping. Tabilħaqq, ir-rati tad-dazji relattivament baxxi għaż-żewġ produtturi li jesportaw Ċiniżi li joperaw f’kundizzjonijiet ta’ ekonomija tas-suq għandhom jippermettulhom joperaw f’kundizzjonijiet tas-suq ġusti fil-Komunità. B’hekk, meta titqies il-firxa globali tad-dazji imposti, huwa probabbli li se jkun hemm numru biżżejjed ta’ kompetituri ewlenin fis-suq Komunitarju, inklużi l-produtturi fil-pajjiż ikkonċernat, fil-Brażil, fir-Russja u fl-Indja. Għalhekk, l-utenti se jibqa’ jkollhom l-għażla ta’ fornituri differenti ta’ karbonat tal-barju. Jekk, min-naħa l-oħra, ma tkun imposta l-ebda miżura, il-ġejjieni ta’ l-uniku produttur Komunitarju se jkun f’riskju. L-għibien tiegħu għandu effettivament inaqqas il-kompetizzjoni fis-suq Komunitarju. |
8. KONKLUŻJONI DWAR L-INTERESS KOMUNITARJU
(132) |
Meta jitqiesu r-raġunijiet li ssemmew aktar ’il fuq, qed jiġi provviżorjament konkluż li f’dan il-każ mhemm l-ebda raġuni konvinċenti kontra l-impożizzjoni ta’dazji ta’ anti-dumping. |
G. IL-PROPOSTA GĦAL MIŻURI PROVVIŻORJI TA’ ANTI-DUMPING
1. IL-LIVELL TA’ L-ELIMINAZZJONI TAD-DANNU
(133) |
Minħabba l-konklużjonijiet li ntlaħqu rigward id-dumping, id-dannu, il-kawżalità u l-interess Komunitarju, għandhom ikunu imposti miżuri provviżorji ta’ anti-dumping sabiex ikunu ipprevenut li l-importazzjonijiet suġġetti għal dumping jikkawżaw dannu ulterjuri lill-industrija Komunitarja. |
(134) |
Sabiex ikun stabbilit il-livell tad-dazju, tqiesu l-livell tal-marġnijiet tad-dumping misjuba u l-ammont tad-dazju meħtieġ sabiex ikun eliminat id-dannu li batiet l-industrija Komunitarja. |
(135) |
Peress li l-industrija Komunitarja kienet ilha tbati mill-importazzjonijiet suġġetti għal dumping sa mill-1999, il-profitt li seta’ jinkiseb fin-nuqqas ta’ importazzjonijiet suġġetti għal dumping kien ibbażat fuq il-marġni tal-profitt medju u mkejjel (bil-komponenti ta’ medja ta’ fatturi) tal-prodott simili matul is-snin bejn l-1996 u l-1998. Fuq din il-bażi, instab li marġni ta’ profitt ta’ 7.2 % tal-fatturat seta’ jitqies bħala ammont minimu xieraq li l-industrija Komunitarja setgħet tistenna li tikseb fin-nuqqas ta’ dumping dannuż. Iż-żieda meħtieġa fil-prezz imbagħad kienet iddeterminata fuq il-bażi ta’ paragun tal-prezz ta’ l-importazzjoni medju u mkejjel (bil-komponenti ta’ medja ta’ fatturi), kif ġie stabbilit għall-kalkoli tat-traħħis tal-prezzijiet taħt il-prezz normali, mal-prezz mhux dannuż tal-prodotti mibjugħa mill-industirja Komunitarja fis-suq Komunitarju. Il-prezz mhux dannuż inkiseb bl-aġġustament tal-prezz tal-bejgħ ta’ l-industrija Komunitarja mit-telf effettiv li sar matul l-IP u billi jiġi miżjud il-marġni ta’ profitt li ssemma aktar ’il fuq. Kwalunkwe differenza li tirriżulta minn dan il-paragun imbagħad kienet espressa bħala perċentwal tal-valur CIF totali ta’ l-importazzjoni. |
(136) |
Peress li l-livell ta’ l-eliminazzjoni tad-dannu kien ogħla mill-marġni tad-dumping stabbilit, il-miżuri provviżorji għandhom ikunu bbażati fuq ta’ l-aħħar. |
2. IL-MIŻURI PROVVIŻORJI
(137) |
Fid-dawl ta’ dak li ngħad aktar ’il fuq, jitqies li skond l-Artikolu 7(2) tar-Regolament bażiku, għandhom jiġu imposti dazji provviżorji ta’ anti-dumping rigward l-importazzjonijiet li joriġinaw fir-RPĊ fuq il-livell tal-marġnijiet t’isfel tad-dumping u tad-dannu, skond ir-regola ta’ inqas dazju. F’dan il-każ, ir-rati tad-dazju individwali kif ukoll id-dazju għall-pajjiż kollu għandhom jiġu stabbiliti b’mod xieraq fuq il-livell tal-marġnijiet tad-dumping misjuba. |
(138) |
Peress li l-prodott huwa funġibbli u d-differenzi fil-prezzijiet għat-tipi differenti ta’ prodott mhumiex sostanzjali, instab li d-dazju għandu jkun impost fil-forma ta’ ammont speċifiku għal kull tunnellata metrika sabiex tkun żgurata l-effiċjenza tal-miżuri u sabiex ikun skoraġġit kwalunkwe assorbiment tal-miżura ta’ anti-dumping permezz ta’ tnaqqis fil-prezzijiet ta’ l-esportazzjoni. Dan l-ammont jirriżulta mill-applikazzjoni tal-marġni tad-dumping għall-prezzijiet ta’ l-esportazzjoni fil-kalkolu tad-dumping matul l-IP. |
(139) |
Ir-rati tad-dazju ta’ anti-dumping ta’ kumpaniji individwali li ġew speċifikati f’dan ir-Regolament kienu stabbiliti fuq il-bażi tas-sejbiet ta’ din l-investigazzjoni. Għalhekk, dawn jirriflettu s-sitwazzjoni rigward dawn il-kumpaniji li nstabet matul dik l-investigazzjoni. Dawn ir-rati tad-dazju (b’ differenza għad-dazju għall-pajjiż kollu applikabbli għall-“kumpaniji l-oħra kollha”) b’hekk huma esklussivament applikabbli għall-importazzjonijiet tal-prodotti li joriġinaw fil-pajjiż ikkonċernat u li jiġu prodotti mill-kumpaniji u b’hekk mill-entitajiet legali speċifiċi msemmija. Il-prodotti importati prodotti minn kwalunkwe kumpanija oħra mhux speċifikatament imsemmija fil-parti operattiva ta’ dan ir-Regolament b’isimha u bl-indirizz tagħha, inklużi l-entitajiet relatati ma’ dawk speċifikatament imsemmija, ma jistgħux jibbenefikaw minn dawn ir-rati u għandhom ikunu suġġetti għar-rata tad-dazju applikabbli għall-“kumpaniji l-oħra kollha”. |
(140) |
Kwalunkwe talba li titlob l-applikazzjoni ta’ dawn ir-rati tad-dazju ta’ anti-dumping ta’ kumpaniji individwali (eż. wara bidla fl-isem ta’ l-entità jew wara t-twaqqif ta’ entitajiet ġodda tal-produzzjoni jew tal-bejgħ) għandha tkun indirizzata minnufih lill-Kummissjoni (3) bl-informazzjoni rilevanti kollha, b’mod partikolari kwalunkwe modifikazzjoni fl-attivitajiet tal-kumpanija marbuta mal-produzzjoni, mal-bejgħ domestiku u mal-bejgħ mill-esportazzjoni assoċjati ma’, pereżempju, dik il-bidla fl-isem jew dik il-bidla fl-entitajiet tal-produzzjoni u tal-bejgħ. Il-Kummissjoni, jekk ikun xieraq, wara li tikkonsulta lill-Kumitat Konsultattiv, se temenda r-Regolament b’mod xieraq billi taġġorna l-lista tal-kumpaniji li jibbenefikaw mir-rati individwali tad-dazju. |
(141) |
Il-prodott ikkonċernat huwa funġibbli, kif ġie spjegat aktar ’il fuq, u mhux ta’xi marka partikolari. Id-diskrepanza tar-rati individwali tad-dazju hija sinifikanti u hemm numru ta’ produtturi li jesportaw. Dawn l-elementi kollha jistgħu jiffaċilitaw it-tentattivi biex il-flussi ta’ l-esportazzjoni jiġu diretti mill-ġdid permezz ta’ l-esportaturi tradizzjonali li jibbenefikaw mill-aktar rati tad-dazju baxxi. |
(142) |
Konsegwentement, jekk l-esportazzjonijiet minn waħda mill-kumpaniji li tibbenefika minn rati ta’ dazju individwali aktar baxxi jiżdiedu b’aktar minn 30 % fil-volum, il-miżuri individwali kkonċernati għandhom jitqiesu bħala li probabbilment ma jkunux biżżejjed biex ipattu għad-dumping dannuż li nstab. Konsegwentement, u sakemm l-elementi rekwiżiti jiġu sodisfatti, jista’ jingħata bidu għal investigazzjoni sabiex il-miżuri jkunu korretti b’mod xieraq fil-forma jew fil-livell tagħhom. |
H. ID-DISPOŻIZZJONI FINALI
(143) |
Fl-interessi ta’ amministrazzjoni tajba, għandu jkun stabbilit perjodu li fih il-partijiet interessati li ppreżentaw irwieħhom fil-limitu ta’ żmien speċifikat fl-avviż tal-bidu jistgħu jesprimu l-opinjoni tagħhom bil-miktub u jitolbu smigħ. Barra minn hekk, għandu jkun iddikjarat li s-sejbiet li jikkonċernaw l-impożizzjoni ta’ dazji li saru għall-finijiet ta’ dan ir-Regolament huma pproviżorji u jista’ jkollhom jitqiesu mill-ġdid għall-finijiet ta’ kwalunkwe miżura definittiva, |
ADOTTAT DAN IR-REGOLAMENT:
Artikolu 1
1. B’dan qed jiġi impost dazju provviżorju ta’ anti-dumping fuq l-importazzjonijiet tal-karbonat tal-barju b’kontenut ta’ stronzju ta’ aktar minn 0,07 % skond il-piż u b’kontenut ta’ kubrit ta’ aktar minn 0,0015 % skond il-piż, kemm jekk f’forma ta’ trab, f’forma ppressata b’mod imrammel jew f’forma ridotta fi trab b’mod imrammel, li jaqa’ fil-kodiċi NM ex 2836 60 00 (kodiċi TARIC 2836600010), li joriġinaw fir-Repubblika tal-Poplu taċ-Ċina.
2. L-ammont tad-dazju provviżorju ta’ anti-dumping għandu jkun daqs ammont stabbilit kif ġie speċifikat aktar ’l isfel għall-prodotti magħmula mill-manifatturi li ġejjin:
Il-pajjiż |
Il-manifattur |
Ir-rata tad-dazju (EUR/t) |
Il-kodiċi addizzjonali TARIC |
|||
Ir-Repubblika tal-Poplu taċ-Ċina |
|
20,6 |
A606 |
|||
|
45,7 |
A607 |
||||
Il-kumpaniji l-oħra kollha |
60,8 |
A999 |
3. Ir-rilaxx għal ċirkolazzjoni ħielsa fil-Komunità tal-prodott li jissemma fil-paragrafu 1 għandu jkun suġġett għad-dispożizzjonijiet ta’ sigurtà, ekwivalenti għall-ammont tad-dazju provviżorju.
4. F’każi fejn il-merkanzija tkun ġiet iddanneġġjata qabel id-dħul f’ċirkolazzjoni ħielsa u, għalhekk, il-prezz effettivament imħallas jew li għandu jitħallas jitqassam għad-determinazzjoni tal-valur doganali skond l-Artikolu 145 tar-Regolament tal-Kummissjoni (KEE) Nru 2454/93 (4), l-ammont ta’ dazju ta’ anti-dumping, ikkalkulat fuq il-bażi ta’ l-ammonti stabbiliti t’aktar ’il fuq, għandu jitnaqqas b’perċentwal li jikkorrispondi għat-tqassim tal-prezz effettivament imħallas jew li għandu jitħallas.
5. Sakemm ma jkunx speċifikat mod ieħor, għandhom japplikaw id-dispożizzjonijiet fis-seħħ li jikkonċernaw id-dazji doganali.
Artikolu 2
Mingħajr preġudizzju għall-Artikolu 20 tar-Regolament tal-Kunsill (KE) Nru 384/96, il-partijiet interessati jistgħu jitolbu li jiġu żvelati l-fatti u l-konsiderazzjonijiet essenzjali li fuq il-bażi tagħhom kien adottat dan ir-Regolament, jesprimu l-opinjoni tagħhom bil-miktub u japplikaw sabiex jinstemgħu oralment mill-Kummissjoni fi żmien xahar mid-data tad-dħul fis-seħħ ta’ dan ir-Regolament.
Skond l-Artikolu 21(4) tar-Regolament tal-Kunsill (KE) Nru 384/96, il-partijiet ikkonċernati jistgħu jikkummentaw dwar l-applikazzjoni ta’ dan ir-Regolament fi żmien xahar mid-data tad-dħul fis-seħħ tiegħu.
Artikolu 3
Dan ir-Regolament għandu jidħol fis-seħħ l-għada tal-pubblikazzjoni tiegħu fil-Ġurnal Uffiċjali ta’ l-Unjoni Ewropea.
L-Artikolu 1 ta’ dan ir-Regolament għandu japplika għal perjodu ta’ sitt xhur.
Dan ir-Regolament għandu jorbot fl-intier tiegħu u jkun direttament applikabbli fl-Istati Membri kollha.
Magħmul fi Brussell, 28 ta’ Jannar 2005.
Għall-Kummissjoni
Peter MANDELSON
Membru tal-Kummissjoni
(1) ĠU L 56, 6.3.1996, p. 1. Ir-Regolament kif emendat l-aħħar bir-Regolament (KE) Nru 461/2004 (ĠU L 77, 13.3.2004, p. 12).
(2) ĠU C 104, 30.4.2004, p. 58.
European Commission |
Directorate-General for Trade |
Direction B |
B-1049 Brussell. |
(4) ĠU L 253, 11.10.1993, p. 1.