18.10.2005

MT

Il-Ġurnal Uffiċjali ta’ l-Unjoni Ewropea

123

---

ID-DEĊIŻJONI TAL-KUMMISSJONI

tas-7 ta' Marzu 2005

dwar it-transitu ta' annimali bovini ħajjin fir-Renju Unit

(innotifikata taħt in-numru tad-dokument C(2005) 509)

(Test b'relevanza għaż-ŻEE)

(2005/177/KE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkundsidrat ir-Regolament (KE) Nru 999/2001 tal-Parlament Ewropew u tal-Kunsill tat-22 ta' Mejju 2001 li jistabbilixxu regoli dwar il-prevenzjoni, il-kontroll u l-eradikazzjoni ta' ċerti enkefalopatiji sponġiformi trasmissibbli (1), u partikolarment l-Artikolu 15(3) tiegħu

Billi:

(1)

Id-Deċiżjoni tal-Kunsill 98/256/KE tas-16 ta' Marzu 1998 li tikkonċerna miżuri ta' emerġenza għall-protezzjoni kontra l-enkefalopatija sponġifori bovina, li temenda id-deċiżjoni 94/474/KE u tħassar id-Deċiżjoni 96/239/KEE (2) tipprovdi li ir-Renju Unit għandu jaċċċerta li annimali bovini ħajjin mgħandhomx jitħallew jitilqu mit-territorji tagħhom lejn Stati Membri oħra jew pajjiżi oħrajn.

(2)	L-irtirar imminenti tas-servizz minn naħa ta' kumpaniji tal-laneċ li jittrasportaw baqar ħajjin mill-Irlanda sa l-Ewropa kontinentali ser taffetwa b'mod serju l-kummerċ ta' annimali bovini bejn l-Irlanda u Stati Membri oħra.

(3)	Għalhekk, iridu jitfasslu regoli sabiex ikun jista' jsir it-transitu ta' annimali bovini ħajjin mill-Irlanda permezz tar-Renju Unit. Iżda, tali transitu irid ikun soġġett għall-kondizzjonijiet stretti u kontrolli sabiex ma jiddgħajfux il-miżuri nfurzati skond id-Deċiżjoni (KE) Nru 98/256/KE.

(4)	Il-miżuri pprovduti f'din id-Deċiżjoni huma stipulati b'konformità ma' l-opinjoni tal-Kumitat Permanenti fuq il-Katina Alimentari u s-Saħħa ta' l-Annimal,

ADOTTAT DIN ID-DEĊIŻJONI:

Artikolu 1

Mingħajr preġudizzju għad-Deċiżjoni 98/256/KEE, ir-Renju Unit għandu jawtorizza it-transitu mingħajr tfixkil ta' annimali bovini ħajjin (“l-annimali”) li kienu telqu mill-Irlanda permezz tar-Renju Unit lejn Stati Membri oħra, soġġetti għall-kondizzjonijiet stipulati f'din id-Deċiżjoni.

Artikolu 2

Iċ-ċertifikati tas-saħħa pprovduti fid-Direttiva tal-Kunsill 64/432/KEE (3) li jakkompanjaw l-annimali waqt it-transitu mill-Irlanda permezz tar-Renju Unit lejn Stati Membri ohra għandhom jinkludu it-test li ġej:

“Annimali konformi mad-Deċiżjoni tal-Kummissjoni 2005/177/KE tas-7 ta' Marzu 2005”;

Artikolu 3

It-transitu ta' l-annimali mill-Irlanda permezz tar-Renju Unit lejn Stati Membri oħra, kif ipprovdut fl-Artikolu 1, għandu jitħalla biss jekk mill-inqas tingħata notifika ta' jumejn xogħol minn qabel mill-awtoritajiet kompetenti ta' l-Irlanda lil

a)	l-awtorità ċentrali tar-Renju Unit;

b)	L-awtorità ċentrali ta' kull Stat Membru dwar it-transitu ta' annimali; u

ċ)	l-awtorità kompetenti ċentrali u lokali ta' l-Istat Membru dwar id-deċiżjoni finali.

Artikolu 4

L-awtorità kompetenti ta' l-Irlanda għandha taċċerta li il-mezz ta' transport ta' l-annimali huwa ssiġillat b'siġill uffiċjali li jrid jibqa' f'postu għaż-żmien kollu ta' transitu permezz tar-Renju Unit, ħlief għal raġunijiet ta' spezzjoni uffiċjali jew f'ċirkostanzi ta' benesseri ta' l-annimali li huma stipulati fl-Artikolu 5.

In-numru(i) tas-siġill irid jiġi rreġistrat mill-awtorità kompetenti ta' l-Irlanda fuq iċ-ċertifikat tas-saħħa msemmi fl-Artikolu 2.

Artikolu 5

Fejn, għall-ħtiġijiet ta' benesseri f' emerġenza jew f'ispezzjoni uffiċjali, l-annimali jridu jitħottew fir-Renju Unit, it-trasportatur għandu jinnotifika immedjatament lill-awtorità kompetenti ta' dak l-Istat Membru.

Dawk l-annimali m'għandhomx jitħallew jkomplu it-transitu tagħhom sakemm il-kondizzjonijiet li ġejjen jiġu mħarsa:

a)	it-tagħbija mill-ġdid issir taħt superviżjoni ta' l-awtorità kompetenti fir-Renju Unit;

b)	il-mezz ta' trasport jiġi ssiġillat mill-ġdid immedjatament wara t-tagħbija; u

ċ)	ċertifikat suplimentari huwa pprovdut kif stipulati fl-Anness.

Artikolu 6

L-awtorità kompetenti tar-Renju Unit għandu jġib fis-seħħ kontrolli approprjati sabiex tkun aċċertata l-implimentazzjoni ta' din id-Deċiżjoni u b'mod partikolari sabiex ikun hemm kontroll ta' l-integrità tas-siġilli, kif ipprovdut fl-Artikolu 5 għall-mezzi ta' trasport li jitilqu mir-Renju Unit.

Dik l-awtorità kompetenti għandha tikkonferma il-qbil ma' din id-Deċiżjoni billi tapplika timbru uffiċjali fuq iċ-ċertifikat imsemmi fl-Artikolu 2, jew billi toħroġ ċertifikat supplimentari ieħor kif stipulate fl-Anness.

Fil-każijiet ta' nuqqas ta' konformità ma' din id-Deċiżjoni l-annimali m'għandhomx jitħallew ikomplu l-vjaġġ tagħhom lejn id-destinazzjoni finali. Tali annimali jistgħu jinżammu pendenti, soġġetti għall-konsiderazzjonijiet dwar saħħa ta' l-annimali u tal-pubbliku, għad-dbiċċir, distruzzjoni jew, bi ftehim ma' l-Istat Membru minn fejn kienu telqu, li jirritornaw lura lejn il-post minn fejn telqu.

Artikolu 7

Id-Deċiżjoni hija ndirizzata lill-Istati Membri.

---

(1)  ĠU L 147, tal-31.5.2001, p. 1. Regolament kif emendat l-aħħar mir-Regolament tal-Kummissjoni (KE) Nru 1993/2004 (ĠU L 344, 20.11.2004, p. 12).

(2)  ĠU L 113, tal-15.4.1998, p. 32. Direttiva kif l-aħħar emendata bid-Direttiva tal-Kummissjoni 2002/670/KE (ĠU L 228, ta-24.8.2002, p. 22).

(3)  ĠU 121, tad-29.7.1964, p. 1977. Direttiva kif l-aħħar emendata bid-Direttiva tal-Kummissjoni (KE) Nru 1226/2002 (ĠU L 179, tad-9.7.2002, p. 13).

---

---