(1)

Le Treoir 2008/113/CE ón gCoimisiún (2) áiríodh tagairt d’fhormheas Bacillus thuringiensis fospeiceas israelensis tréithchineál AM65-52 mar shubstaint ghníomhach in Iarscríbhinn I a ghabhann le Treoir 91/414/CEE ón gComhairle (3).

(2)

I gcomhréir le hAirteagal 78(3) de Rialachán (CE) Uimh. 1107/2009, substaintí gníomhacha a áirítear in Iarscríbhinn I a ghabhann le Treoir 91/414/CEE, meastar iad a bheith formheasta faoi Rialachán (CE) Uimh. 1107/2009 agus liostaítear iad i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (4).

(3)

Formheas na substainte gníomhaí Bacillus thuringiensis fospeiceas israelensis tréithchineál AM65-52, mar a leagtar amach i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011, rachaidh sé in éag an 15 Lúnasa 2024.

(4)

An 27 Aibreán 2016 cuireadh iarratas faoi bhráid na Sualainne, an Ballstát is rapóirtéir, agus faoi bhráid na Spáinne, an Ballstáit is comhrapóirtéir, chun formheas na substainte gníomhaí Bacillus thuringiensis fospeiceas israelensis tréithchineál AM65-52 a athnuachan, i gcomhréir le hAirteagal 1 de Rialachán Cur Chun Feidhme (AE) Uimh. 844/2012 ón gCoimisiún (5) laistigh den tréimhse ama dá bhforáiltear san Airteagal sin.

(5)

Chomh maith leis sin, chuir an t-iarratasóir na sainchomhaid fhorlíontacha a cheanglaítear le hAirteagal 6 de Rialachán Cur Chun Feidhme (AE) Uimh. 844/2012 faoi bhráid an Bhallstáit is rapóirtéir, an Bhallstáit is comhrapóirtéir, an Choimisiúin agus an Údaráis Eorpaigh um Shábháilteacht Bia (‘an tÚdarás’). Chinn an Ballstát is rapóirtéir an t-iarratas a bheith inghlactha.

(6)

D’ullmhaigh an Ballstát is rapóirtéir dréacht-tuarascáil maidir le measúnú ar athnuachan i gcomhairle leis an mBallstát is comhrapóirtéir agus chuir sé faoi bhráid an Údaráis agus faoi bhráid an Choimisiúin í an 27 Iúil 2018. Ina dhréacht-tuarascáil maidir le measúnú ar athnuachan molann an Ballstát is rapóirtéir go ndéanfaí formheas Bacillus thuringiensis fospeiceas israelensis tréithchineál AM65-52 a athnuachan.

(7)

Chuir an tÚdarás an dréacht-tuarascáil maidir le measúnú ar athnuachan in iúl don iarratasóir agus do na Ballstáit chun barúlacha a fháil uathu, sheol sé comhairliúchán poiblí agus chuir sé na barúlacha a fuarthas ar aghaidh chuig an gCoimisiún. Chuir an tÚdarás an sainchomhad achomair forlíontach ar fáil don phobal freisin.

(8)

An 12 Samhain 2020 chuir an tÚdarás an chonclúid uaidh (6) in iúl don Choimisiún, conclúid ina dtugtar le fios gur féidir coinne a bheith leis go gcomhlíonfaidh Bacillus thuringiensis fospeiceas israelensis tréithchineál AM65-52 na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(9)

Chuir an Coimisiún tuarascáil athnuachana maidir le Bacillus thuringiensis fospeiceas israelensis tréithchineál AM65-52 agus dréacht den Rialachán seo faoi bhráid an Bhuanchoiste um Plandaí, Ainmhithe, Bia agus Beatha an 19 Bealtaine 2021 agus an 25 Eanáir 2023, faoi seach.

(10)

D’iarr an Coimisiún ar an iarratasóir a bharúlacha a chur isteach maidir leis an gconclúid ón Údarás agus, i gcomhréir le hAirteagal 14(1), an tríú fomhír, de Rialachán Cur Chun Feidhme (AE) Uimh. 844/2012 (7), a bharúlacha maidir leis an tuarascáil athnuachana. Chuir an t-iarratasóir a bharúlacha isteach, agus rinneadh scrúdú cúramach orthu.

(11)

Maidir le húsáid ionadaíoch amháin nó níos mó a bhaintear as táirge cosanta plandaí amháin ar a laghad ina bhfuil an tsubstaint ghníomhach Bacillus thuringiensis fospeiceas israelensis tréithchineál AM65-52, suíodh gur comhlíonadh na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(12)

Dá bhrí sin, is iomchuí formheas Bacillus thuringiensis fospeiceas israelensis tréithchineál AM65-52 a athnuachan.

(13)

Is gá, áfach, foráil a dhéanamh maidir le coinníollacha áirithe de bhun Airteagal 14(1), arna léamh i gcomhar le hAirteagal 6 de Rialachán (CE) Uimh. 1107/2009, i gcás iarratais ar údarú maidir le húsáidí le haghaidh barra inite. Is iomchuí ansin, go háirithe, mar chur chuige réamhchúraim ar mhaithe le cosaint chothaithí tomhaltóirí a cheangal ar na Ballstát agus measúnú á dhéanamh acu ar iarratais ar údaruithe le haghaidh táirgí ina bhfuil Bacillus thuringiensis fospeiceas israelensis tréithchineál AM65-52 le haghaidh úsáidí i mbarr inite, go socrófar íostréimhse ama idir leathadh na dtáirgí cosanta plandaí sin agus buaint na mbarr inite a thomhlaítear agus iad úr.

(14)

Ina theannta sin, is iomchuí a cheangal ar na Ballstáit, agus measúnú á dhéanamh acu ar iarratais ar údaruithe le haghaidh táirgí cosanta plandaí ina bhfuil Bacillus thuringiensis fospeiceas israelensis tréithchineál AM65-52, aird ar leith a thabhairt ar chosaint oibreoirí agus oibrithe.

(15)

Dá bhrí sin, ba cheart Rialachán Cur Chun Feidhme (AE) Uimh. 540/2011 a leasú dá réir.

(16)

Le Rialachán Cur Chun Feidhme (AE) 2023/689 ón gCoimisiún (8) cuireadh síneadh le tréimhse formheasa Bacillus thuringiensis fospeiceas israelensis tréithchineál AM65-52 go dtí an 15 Lúnasa 2024 chun go bhféadfar an próiseas athnuachana a chur i gcrích sula rachaidh tréimhse formheasa na substainte gníomhaí sin in éag. Ós rud é go ndearnadh cinneadh maidir leis an athnuachan roimh dhul in éag na tréimhse formheasa sin ar cuireadh síneadh léi, áfach, ba cheart feidhm a bheith ag an Rialachán seo tráth is luaithe ná an dáta sin.

(17)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,