(1)

Le Rialachán (AE) 2021/953 ó Pharlaimint na hEorpa agus ón gComhairle (2), leagtar síos an creat chun deimhnithe idir-inoibritheacha COVID-19 i ndáil le vacsaíniú, tástáil agus téarnamh (Deimhniú Digiteach COVID AE) a eisiúint agus a fhíorú, agus chun go nglacfaí leo, chun feidhmiú cheart na sealbhóirí chun na saorghluaiseachta a éascú le linn phaindéim COVID-19. Ina theannta sin, leis an Rialachán sin rannchuidítear le héascú a dhéanamh ar dheireadh a chur de réir a chéile agus ar mhodh comhordaithe le srianta ar an tsaorghluaiseacht a chuir na Ballstáit i bhfeidhm, i gcomhréir le dlí an Aontais, chun leathadh SARS-CoV-2 a theorannú.

(2)

De réir Rialachán (AE) 2021/953, tá deimhnithe tástála le heisiúint ar bhonn dhá chineál tástála le haghaidh ionfhabhtú SARS-CoV-2, eadhon tástálacha aimpliúcháin mhóilínigh aigéid núicléasaigh (tástálacha NAAT), lena n-áirítear na tástálacha sin ina n-úsáidtear imoibriú slabhrúil polaiméaráise cúl-trascrioptáise (RT-PCR), agus mearthástálacha antaiginí, ar tástálacha iad a bhraitheann ar phróitéiní víreasacha (antaiginí) a bhrath trí úsáid a bhaint as imdhíonmheasúnacht sreafa chliathánaigh agus a chuireann torthaí ar fáil i níos lú ná 30 nóiméad, ar choinníoll go ndéanann gairmithe sláinte nó pearsanra tástála oilte iad.

(3)

Ní chumhdaítear le Rialachán (AE) 2021/953 measúnachtaí antaigineacha saotharlainn-bhunaithe, amhail measúnachtaí imdhíonsúiteachta einsímnasctha nó imdhíonmheasúnachtaí uathoibrithe. Ó mhí Iúil 2021 i leith, an mheitheal theicniúil um thástálacha diagnóiseacha COVID-19, ar meitheal í atá freagrach as nuashonruithe a ullmhú ar liosta coiteann an Aontais de thástálacha antaiginí COVID-19 arna gcomhaontú ag an gCoiste Slándála Sláinte a bunaíodh de bhun Airteagal 17 de Chinneadh Uimh. 1082/2013/AE ó Pharlaimint na hEorpa agus ón gComhairle (3), tá athbhreithniú á dhéanamh aici ar thograí a chuireann na Ballstáit agus monaróirí chun cinn le haghaidh mheasúnachtaí antaiginí saotharlainn-bhunaithe COVID-19. Rinneadh measúnú ar na tograí sin i gcomparáid leis na critéir chéanna a úsáidtear le haghaidh mearthástálacha antaiginí, agus tá liosta bunaithe ag an gCoiste Slándála Sláinte de na measúnachtaí antaiginí saotharlainn-bhunaithe a chomhlíonann na critéir sin.

(4)

Mar thoradh ar na forbairtí sin agus chun raon feidhme na gcineálacha éagsúla tástálacha diagnóiseacha a leathnú, ar tástálacha iad a fhéadfar a úsáid chun Deimhniú Digiteach COVID AE a eisiúint, ba cheart an sainmhíniú ar mhearthástálacha antaiginí a leasú chun measúnachtaí antaiginí saotharlainn-bhunaithe a chur san áireamh. Ba cheart, dá bhrí sin, na Ballstáit a bheith in ann deimhnithe tástála agus, tar éis do Rialachán Tarmligthe (AE) 2022/256 ón gCoimisiún (4) a bheith glactha, deimhnithe téarnaimh a eisiúint ar bhonn na dtástálacha antaiginí a áirítear ar liosta coiteann an Aontais de thástálacha antaiginí COVID-19, ar liosta é a dhéanann an Coiste Slándála Sláinte a chomhaontú mar liosta a chomhlíonann na critéir cháilíochta atá leagtha síos agus a nuashonrú go tráthrialta. Ós rud é go bhfuil difríochtaí ann maidir le straitéisí tástála COVID-19 na mBallstát, ba cheart, dá bhrí sin, an fhéidearthacht atá ag na Ballstáit úsáid a bhaint as tástálacha antaiginí ar mhaithe le deimhnithe i ndáil le téarnamh a eisiúint leanúint de bheith roghnach, féidearthacht atá le húsáid, go háirithe, i gcás ina bhfuil ganntanas acmhainneacht NAAT ann toisc líon ard ionfhabhtuithe a bheith sa limistéar lena mbaineann nó ar chúis eile. I gcás ina mbíonn go leor acmhainneacht NAAT ar fáil, is féidir leis na Ballstáit leanúint de bheith ag eisiúint deimhnithe téarnaimh ar bhonn thástálacha NAAT agus ar an mbonn sin amháin, a meastar gurb iad an mhodheolaíocht is iontaofa chun cásanna COVID-19 agus teagmhálacha COVID-19 a thástáil. Ar an gcuma chéanna, le linn tréimhsí ina bhfuil méadú ar ionfhabhtuithe SARS-CoV-2, rud a fhágann go mbíonn éileamh ard ar thástálacha nó ganntanas thástálacha NAAT ann, d'fhéadfadh na Ballstáit, ar bhonn sealadach, deimhnithe téarnaimh a eisiúint bunaithe ar thástálacha antaiginí. Nuair a thagann laghdú ar ionfhabhtuithe, is féidir leis na Ballstáit leanúint de bheith ag eisiúint deimhnithe téarnaimh ar bhonn tástálacha NAAT agus ar an mbonn sin amháin arís.

(5)

I gcomhréir le hAirteagal 5 de Rialachán (AE) 2021/953, áireofar ar na deimhnithe vacsaínithe a eisíonn na Ballstáit líon na ndáileog a tugadh don sealbhóir. Is gá a shoiléiriú go bhfuil sé beartaithe go léireofar an riachtanas seo na dáileoga uile a tugadh in aon Bhallstát, agus ní hamháin na dáileoga a tugadh sa Bhallstát a eisíonn an deimhniú vacsaínithe. Chun tásc na ndáileog a tugadh roimhe sin amháin a fuarthas sa Bhallstát a eisíonn an deimhniú vacsáinithe a chur san áireamh, d’fhéadfadh neamhréireacht a bheith ann idir líon iomlán iarbhír na ndáileog a tugadh le duine agus líon na ndáileog atá sonraithe ar an deimhniú vacsaínithe, agus d’fhéadfadh sé sin cosc a chur ar shealbhóirí a ndeimhniú vacsaínithe a úsáid agus an ceart chun saorghluaiseachta laistigh den Aontas á fheidhmiú acu. Déantar tabhairt na ndáileog roimhe sin i mBallstáit eile a chruthú trí bhíthin Deimhniú Digiteach COVID AE.Níor cheart do Bhallstát faisnéis bhreise ná fianaise bhreise a éileamh ar shaoránaigh an Aontais a bhfuil deimhnithe vacsaínithe den sórt sin acu, amhail baiscuimhir na ndáileog roimhe sin. Ba cheart na Ballstát a bheith in ann ceangal ar dhuine cruthúnas bailí céannachta agus deimhniú bailí vacsaínithe nó téarnaimh roimhe sin a chur i láthair. Sa chomhthéacs sin, tá feidhm ag na rialacha maidir le glacadh le deimhnithe vacsaínithe a eisíonn na Ballstáit eile mar a leagtar amach in Airteagal 5(5) de Rialachán (AE) 2021/953. Ina theannta sin, maidir le deimhnithe a chumhdaítear le gníomh cur chun feidhme arna ghlacadh de bhun Airteagail 3(10) agus 8(2) de Rialachán (AE) 2021/953, tá na deimhnithe sin le glacadh, ionas go n-éascófar do na sealbhóirí a gceart chun saorghluaiseachta a fheidhmiú, faoi na coinníollacha céanna le Deimhnithe Digiteacha COVID AE a eisíonn na Ballstáit. I gcomhréir le hAirteagal 3(4) de Rialachán (AE) 2021/953, duine a bhfuil Deimhniú Digiteach COVID AE ina sheilbh aige, tá sé i dteideal a iarraidh go n-eiseofar deimhniú nua mura bhfuil na sonraí pearsanta atá sa deimhniú bunaidh cruinn, lena n-áirítear sonraí maidir le vacsaíniú an tsealbhóra.

(6)

I gcomhréir le hAirteagal 5(1) de Rialachán (AE) 2021/953, eiseoidh an Ballstát inar tugadh vacsaín in aghaidh COVID-19 deimhniú vacsaínithe do dhuine lena mbaineann. Mar sin féin, níor cheart go dtuigfí leis sin go gcuirtear cosc ar Bhallstát deimhnithe vacsaínithe a eisiúint dá dtagraítear in Airteagal 3(1), pointe (a), de Rialachán (AE) 2021/953 do dhaoine a sholáthraíonn cruthúnas gur vacsaíníodh iad i mBallstát eile.

(7)

Go háirithe i bhfianaise theacht chun cinn athraitheach nua SARS-CoV-2 ar díol imní iad, is toisc ríthábhachtach sa chomhrac i gcoinne phaindéim COVID-19 vacsaíní in aghaidh COVID-19 a fhorbairt agus staidéar leanúnach a dhéanamh orthu. Sa chomhthéacs sin, tá sé tábhachtach rannpháirtíocht saorálaithe i dtrialacha cliniciúla a éascú, is é sin le rá, staidéir a dhéantar chun sábháilteacht nó éifeachtúlacht leighis a imscrúdú, vacsaín in aghaidh COVID-19, cuir i gcás. Tá ról bunúsach ag an taighde cliniciúil i bhforbairt vacsaíní, agus ní mór, dá bhrí sin, rannpháirtíocht shaorálach i dtrialacha cliniciúla a spreagadh. D’fhéadfadh cosc a chur ar rannpháirtithe i dtralacha cliniciúla ó dheimhnithe vacsaínithe a fháil a bheith ina dhídhreasú mór maidir le páirt a ghlacadh i dtrialacha den sórt sin, rud a chuirfeadh moill ar thabhairt i gcrích trialacha den sórt sin agus, níor ginéaralta,d’fheádfadh sé tionchar diúltach a imirt ar an tsláinte phoiblí. Ina theannta sin, ba cheart sláine na dtrialacha cliniciúla, lena n-áirítear ó thaobh dalladh sonraí agus rúndacht sonraí de, a chaomhnú chun bailíocht na dtorthaí a áirithiú. Ba cheart, dá bhrí sin, do na Ballstáit a bheith in ann deimhnithe vacsaínithe a eisiúint do rannpháirtithe i dtrialacha cliniciúla, ar trialacha cliniciúla iad atá formheasta ag coistí eiticiúla agus údaráis inniúla na mBallstát, is cuma an bhfuil an vacsaín fhéideartha in aghaidh COVID-19 faighte ag na rannpháirtithe nó an dáileog atá á riar ar an ngrúpa rialaithe chun nach mbainfear an bonn ó na staidéir.

(8)

Ina theannta sin, is gá a shoiléiriú gur cheart do Bhallstáit eile a bheith in ann glacadh le deimhnithe vacsaínithe le haghaidh vacsaíní in aghaidh COVID-19 atá ag dul faoi thrialacha cliniciúla chun srianta ar shaorghluaiseacht a tharscaoileadh, i gcomhréir le dlí an Aontais, mar fhreagairt ar phaindéim COVID-19. Níor cheart tréimhse inghlacthachta na ndeimhnithe vacsaínithe sin a bheith níos faide ná tréimhse inghlacthachta na ndeimhnithe arna n-eisiúint bunaithe ar vacsaíní COVID-19 ar tugadh údarú margaíochta dóibh de bhun Rialachán (CE) Uimh. 726/2004 ó Pharlaimint na hEorpa agus ón gComhairle (5). Is féidir le difríochtaí a bheith i dtréimhse inghlacthachta deimhnithe vacsaínithe den sórt sin, ag brath ar cibé ar tugadh an vacsaín mar chuid den tsraith phríomha vacsaínithe nó mar theanndáileog. Laistigh den tréimhse sin, is féidir leis na Ballstáit glacadh le deimhnithe vacsaínithe den sórt sin mura rud é go ndearnadh iad a chúlghairm tar éis an triail chliniciúil a thabhairt i gcrích, go háirithe i gcás nach ndeonaítear údarú margaíochta do vacsaín in aghaidh COVID-19 ina dhiaidh sin nó i gcás inar eisíodh na deimhnithe vacsaínithe le haghaidh placebo a tugadh don ghrúpa cóimheasa mar chuid de thurgnamh dall. I ndáil leis sin, is inniúlacht de chuid na mBallstát é deimhnithe vacsaínithe a eisiúint do rannpháirtithe i dtrialacha cliniciúla le haghaidh vacsaíní in aghaidh COVID-19 agus glacadh leis na deimhnithe sin. Má dheonaítear údarú margaíochta ina dhiaidh sin de bhun Rialachán (CE) Uimh. 726/2004 do vacsaín in aghaidh COVID-19 atá ag dul faoi thrialacha cliniciúla, tagann deimhnithe vacsaínithe le haghaidh na vacsaíne sin, ó dháta eisiúna an údaraithe margaidh sin, faoi raon feidhme na chéad fhomhíre d’Airteagal 5(5) de Rialachán (AE) 2021/953. Chun cur chuige comhleanúnach a áirithiú, ba cheart cumhacht a thabhairt don Choimisiún a iarraidh ar an gCoiste Slándála Sláinte, ar an Lárionad Eorpach um Ghalair a Chosc agus a Rialú (ECDC) nó ar an nGníomhaireacht Leigheasra Eorpach (EMA) treoir a eisiúint maidir le glacadh le deimhnithe a eisítear le haghaidh vacsaín in aghaidh COVID-19 atá ag dul faoi thrialacha cliniciúla ach nach bhfuil údarú margaíochta deonaithe aici go fóill de bhun Rialachán (CE) Uimh. 726/2004, treoir lenar cheart go gcuirfí san áireamh na critéir eiticiúla agus eolaíocha is gá chun trialacha cliniciúla a dhéanamh.

(9)

Ó glacadh Rialachán (AE) 2021/953, tá athrú suntasach tagtha ar an staid eipidéimeolaíoch i ndáil le paindéim COVID-19. In ainneoin go bhfuil éagsúlachtaí i leibhéal an vacsaínithe i mBallstáit éagsúla, faoin 31 Eanáir 2022, bhí an chéad timthriall vacsaínithe curtha i gcrích ag níos mó ná 80 % de dhaoine fásta san Aontas agus bhí teanndáileog faighte ag níos mó ná 50 % acu. Sa chomhrac i gcoinne phaindéim COVID-19, is cuspóir ríthábhachtach i gcónaí é an ráta vacsaínithe a mhéadú, i bhfianaise na cosanta méadaithe a thugann vacsaíní in aghaidh an ospidéalaithe agus an ghalair thromchúisigh agus, dá bhrí sin, tá ról tábhachtach ag an gcuspóir sin chun a áirithiú gur féidir deireadh a chur le srianta ar shaorghluaiseacht daoine.

(10)

Ina theannta sin, tháinig méadú ar líon na n-ionfhabhtuithe, líon na n-ospidéaluithe agus líon na mbásanna mar thoradh ar leathadh athraitheach SARS-CoV-2 ar díol imní é darb ainm ‘Delta’ sa dara leath de 2021, agus, mar gheall air sin, bhí ar na Ballstáit bearta diana sláinte poiblí a ghlacadh mar chuid d’iarrachtaí chun acmhainneacht an chórais cúraim sláinte a chosaint. Go luath in 2022, tháinig méadú mór ar líon ionfhabhtuithe COVID-19 mar thoradh ar athraitheach SARS-CoV-2 ar díol imní é darb ainm “Omicron”, athraitheach atá ag teacht in ionad Delta go gasta agus atá ag sroicheadh déine nach bhfacthas a leithéid riamh roimhe seo maidir le tras-seoladh pobail ar fud an Aontais. Mar a thug ECDC faoi deara sa Mhearmheasúnú Riosca a rinne sé an 27 Eanáir 2022, is cosúil gur lú an seans go mbeidh toradh cliniciúil tromchúiseach a éilíonn ospidéalú nó cóireáil aonad dianchúraim mar thoradh ar ionfhabhtuithe Omicron. Cé gurb iad buntréithe an víris is cúis leis an laghdú ar dhéine i bpáirt, tá sé léirithe ag torthaí ó staidéir ar éifeachtacht vacsaíní go bhfuil ról suntasach ag an vacsaíniú maidir le torthaí cliniciúla tromchúiseacha a eascraíonn as ionfhabhtú Omicron a chosc, agus go bhfuil méadú suntasach ar éifeachtacht na vacsaíní i gcoinne géarbhreoiteachta i measc daoine a fuair trí dháileog den vacsaín. Thairis sin, i bhfianaise leibhéil an-ard tras-seolta pobail, rud a fhágann go bhfuil go leor daoine tinn ag an am céanna, is dócha go mbeidh brú suntasach ar chórais cúraim sláinte agus ar fheidhmiú na sochaí ina hiomláine sna Ballstáit ar feadh tréimhse áirithe, go príomha trí neamhláithreacht ón obair agus ón oideachas.

(11)

Tar éis d’ionfhabhtuithe Omicron a mbuaicphointe a bhaint amach go luath in 2022, táthar ag súil leis go mbeidh cosaint ó COVID-19 ag sciar nach beag den phobal, ar feadh tréimhse áirithe ar a laghad, toisc go bhfuil siad vacsaínithe nó go raibh an víreas orthu roimhe sin, nó an dá rud. Mar thoradh ar na vacsaíní in aghaidh COVID-19 atá ar fáil faoi láthair, is fearr an chosaint freisin atá ag céatadán i bhfad níos airde den daonra ó bheith an-tinn agus ó bhás ó COVID-19. Ní féidir a thuar, áfach, cén tionchar a bheadh ag an méadú a d’fhéadfadh teacht ar ionfhabhtuithe sa dara leath de 2022. Ina theannta sin, ní féidir an fhéidearthacht go rachadh paindéim COVID-19 in olcas mar gheall ar theacht chun cinn athraithigh nua SARS-CoV-2 ar díol imní iad a chur as an áireamh. Mar a thug ECDC faoi deara freisin, tá neamhchinnteachtaí suntasacha ann go fóill ag an gcéim seo de phaindéim COVID-19.

(12)

I bhfianaise na neamhchinnteachtaí atá fós ann maidir le forbairt bhreise phaindéim COVID-19, ní féidir a eisiamh go leanfaidh na Ballstáit de cheangal a chur ar shaoránaigh an Aontais agus ar bhaill dá dteaghlaigh a fheidhmíonn a gceart chun saorghluaiseachta cruthúnas ar vacsaíniú in aghaidh COVID-19, ar thoradh tástála le haghaidh COVID-19 nó ar théarnamh ó COVID-19 a thaispeáint tar éis an 30 Meitheamh 2022, is é sin, an dáta atá Rialachán (AE) 2021/953 le dul in éag. Dá bhrí sin, i gcás ina mbeidh srianta áirithe ar shaorghluaiseacht bunaithe ar an tsláinte phoiblí fós i bhfeidhm tar éis an 30 Meitheamh 2022, tá sé tábhachtach nach mbainfear an deis de shaoránaigh an Aontais ná de bhaill dá dteaghlaigh úsáid a bhaint as a nDeimhnithe Digiteacha COVID AE, rud atá ina bhealach éifeachtach slán chun cruthúnas ar vacsaíniú in aghaidh COVID-19, ar thoradh tástála le haghaidh COVID-19 nó ar théarnamh ó COVID-19 a léiriú, agus a chosnaíonn an príobháideachas freisin, i gcás ina gceanglaíonn na Ballstáit orthu na deimhnithe sin a shealbhú chun a gceart chun saorghluaiseachta a fheidhmiú.

(13)

Sa chomhthéacs sin, níor cheart do na Ballstáit a cheangal ar shaoránaigh an Aontais agus ar bhaill dá dteaghlaigh a fheidhmíonn a gceart chun saorghluaiseachta cruthúnas ar vacsaíniú in aghaidh COVID-19, ar thoradh tástála le haghaidh COVID-19 nó ar thearnamh ó COVID-19 a thaispeáint, agus níor cheart dóibh srianta breise a fhorchur amhail tástáil bhreise a bhaineann le taisteal d’ionfhabhtuithe SARS-CoV-2 nó coraintín nó féin-leithlisiú a bhaineann le taisteal, ach amháin i gcás ina bhfuil srianta den sórt sin neamh-idirdhealaitheach, agus riachtanach agus comhréireach chun an tsláinte phoiblí a chosaint bunaithe ar an bhfianaise eolaíoch is déanaí atá ar fáil, lena n-áirítear sonraí eipidéimeolaíocha a fhoilsíonn ECDC ar bhonn Mholadh (AE) 2022/107 ón gComhairle (6), agus i gcomhréir le prionsabal an réamhchúraim.

(14)

Agus srianta á bhforchur ar shaorghluaiseacht ar fhorais na sláinte poiblí, ba cheart do na Ballstáit aird ar leith a thabhairt ar shainiúlachtaí na réigiún is forimeallaí, na n-eachtarchríoch agus na limistéar iargúlta agus an tionchar is dócha a bheidh ag srianta den sórt sin ar na réigiúin trasteorann, i bhfianaise an naisc láidir shóisialta agus eacnamaíoch atá ag na réigiúin sin.

(15)

Níor cheart go mbeadh srianta breise ar shaoirse gluaiseachta laistigh den Aontas ná srianta ar thaisteal laistigh de limistéar Schengen mar thoradh ar aon fhíorú ar na deimhnithe as a gcomhdhéantar Deimhniú Digiteach COVID AE.

(16)

San am céanna, ós rud é gur cheart deireadh a chur le haon srian ar shaorghluaiseacht daoine laistigh den Aontas, ar srianta iad a cuireadh i bhfeidhm chun leathadh SARS-CoV-2 a theorannú, lena n-áirítear ceanglas chun Deimhnithe Digiteacha COVID AE a thaispeáint, ba cheart síneadh 12 mhí a chur le tréimhse chur i bhfeidhm Rialachán (AE) 2021/953. Ina theannta sin, níor cheart an tuiscint a bhaint as an síneadh ar thréimhse chur i bhfeidhm an Rialachán sin go gceanglófar ar na Ballstáit, go háirithe na Ballstáit sin a chuireann deireadh le bearta sláinte poiblí náisiúnta, srianta ar shaoirse gluaiseachta a choinneáil nó a fhorchur. An chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh arna tarmligean chuig an gCoimisiún de bhun Rialachán (AE) 2021/953, ba cheart síneadh a chur leis an gcumhacht sin freisin. Is gá a áirithiú gur féidir creat Dheimhniú Digiteach COVID AE a oiriúnú d’fhianaise nua maidir le vacsaíniú i gcoinne COVID-19, ath-ionfhabhtú tar éis téarnaimh, nó tástáil agus don dul chun cinn eolaíoch maidir le paindéim COVID-19 a choinneáil faoi smacht.

(17)

Faoin 31 Nollaig 2022, ba cheart don Choimisiún an tríú tuarascáil maidir le cur i bhfeidhm Rialachán (AE) 2021/953 a chur faoi bhráid Pharlaimint na hEorpa agus na Comhairle. Ba cheart a bheith sa tuarascáil, go háirithe, forbhreathnú ar an bhfaisnéis a fuarthas de bhun Airteagal 11 den Rialachán sin maidir leis na srianta ar shaorghluaiseacht a chuir na Ballstáit i bhfeidhm chun teorainn a chur le leathadh SARS-CoV-2, forbhreathnú lena ndéantar cur síos ar na forbairtí go léir a bhaineann le húsáidí intíre agus idirnáisiúnta Dheimhniú Digiteach COVID AE, aon nuashonruithe ábhartha a bhaineann leis an measúnú a áirítear sa dara tuarascáil, agus measúnú ar a iomchuí is atá úsáid leanúnach Deimhnithe Digiteacha COVID AE chun críocha an Rialacháin sin, agus na forbairtí eipidéimeolaíocha agus an fhianaise eolaíoch is déanaí atá ar fáil á gcur san áireamh, agus i bhfianaise phrionsabail an riachtanais agus na comhréireachta. Agus an tuarascáil á tarraingt suas aige, ba cheart don Choimisiún treoir a iarraidh ar ECDC agus ar an gCoiste Slándála Sláinte. Gan dochar do cheart tionscnaimh an Choimisiúin, ba cheart togra reachtach a bheith ag gabháil leis an tuarascáil chun tréimhse chur i bhfeidhm Rialachán (AE) 2021/953 a ghiorrú, agus teacht chun cinn na staide eipidéimeolaíche maidir le paindéim COVID-19 agus aon mholtaí ó ECDC agus ón gCoiste Slándála Sláinte ina leith sin á gcur san áireamh.

(18)

Dá bhrí sin, ba cheart Rialachán (AE) 2021/953 a leasú dá réir sin.

(19)

Ós rud é nach féidir leis na Ballstáit cuspóir an Rialacháin seo, eadhon feidhmiú an chirt chun saorghluaiseachta laistigh den Aontas a éascú le linn phaindéim COVID-19 trí chreat a bhunú chun deimhnithe idir-inoibritheacha COVID-19 maidir le vacsaíniú duine in aghaidh COVID-19, toradh tástála duine le haghaidh COVID-19 nó téarnamh duine ó COVID-19 a eisiúint agus a fhíorú, agus chun go nglacfaí leo, a ghnóthú go leordhóthanach agus, de bharr fhairsinge agus éifeachtaí na gníomhaíochta, gur fearr is féidir é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(20)

Ionas go mbeifear in ann é a chur i bhfeidhm go pras agus go tráthúil chun leanúnachas Dheimhniú Digiteach COVID AE a áirithiú, ba cheart don Rialachán seo a theacht i bhfeidhm lá a fhoilsithe in Iris Oifigiúil an Aontais Eorpaigh.

(21)

Chuathas i gcomhairle leis an Maoirseoir Eorpach ar Chosaint Sonraí agus leis an mBord Eorpach um Chosaint Sonraí i gcomhréir le hAirteagal 42(1) agus (2) de Rialachán (AE) 2018/1725 ó Pharlaimint na hEorpa agus ón gComhairle (7) agus thug siad tuairim chomhpháirteach an 14 Márta 2022 (8),

(1)

in Airteagal 2, cuirtear an méid seo a leanas in ionad phointe 5:

(2)

leasaítear Airteagal 3 mar a leanas:

(3)

in Airteagal 4, cuirtear an méid seo a leanas in ionad mhír 2:

(4)

leasaítear Airteagal 5 mar a leanas:

(5)

in Airteagal 6(2), cuirtear an méid seo a leanas in ionad phointe (b):

(6)

leasaítear Airteagal 7 mar a leanas:

(7)

in Airteagal 10, cuirtear an méid seo a leanas in ionad mhír 5:

(8)

cuirtear an méid seo a leanas in ionad Airteagal 11:

(*1)  Moladh (AE) 2022/107 ón gComhairle an 25 Eanáir 2022 maidir le cur chuige comhordaithe chun saorghluaiseacht shábháilte a éascú le linn phaindéim COVID-19 agus a chuirtear in ionad Mholadh (AE) 2020/1475 (IO L 18, 27.1.2022, lch. 110).”;"

(9)

in Airteagal 12, cuirtear an méid seo a leanas in ionad mhír 2:

(10)

leasaítear Airteagal 16 mar a leanas:

(11)

in Airteagal 17, cuirtear an méid seo a leanas in ionad an dara mír:

“Beidh feidhm aige ón 1 Iúil 2021 go dtí an 30 Meitheamh 2023.”;

(12)

san Iarscríbhinn, cuirtear an méid seo a leanas in ionad phointe 2(i):