(1)

Tháinig an Coinbhinsiún um Eitlíocht Shibhialta Idirnáisiúnta, a síníodh in Chicago an 7 Nollaig 1944 (“Coinbhinsiún Chicago”), i bhfeidhm an 4 Aibreán 1947. Bunaíodh an Eagraíocht Eitlíochta Sibhialta Idirnáisiúnta (“ICAO”) leis agus rialaítear aeriompar idirnáisiúnta leis.

(2)

Is Páirtithe Conarthacha i gCoinbhinsiún Chicago iad na Ballstáit, agus is Stáit Chonarthacha ICAO iad, agus tá stádas breathnóra ag an Aontas Eorpach i gcomhlachtaí áirithe de chuid ICAO.

(3)

De bhun Airteagal 54(l) de Choinbhinsiún Chicago, féadfaidh Comhairle ICAO (“Comhairle ICAO”) caighdeáin idirnáisiúnta agus cleachtais mholta idirnáisiúnta (“SARPanna”) le haghaidh eitlíocht shibhialta a ghlacadh agus iad a ainmniú mar Iarscríbhinní a ghabhann le Coinbhinsiún Chicago (“Iarscríbhinní ICAO”).

(4)

De bhun Airteagal 90 de Choinbhinsiún Chicago, beidh éifeacht le haon Iarscríbhinn de chuid ICAO nó aon leasú ar Iarscríbhinn de chuid ICAO laistigh de 3 mhí tar éis an Iarscríbhinn sin nó an leasú sin a chur faoi bhráid Stáit Chonarthacha ICAO, nó ag deireadh cibé tréimhse ama is faide a fhorordóidh Comhairle ICAO, mura rud é go gcláróidh tromlach Stáit Chonarthacha ICAO a mhíshástacht idir an dá linn. A luaithe a ghlacfaidh Comhairle ICAO iad agus a thiocfaidh siad chun a bheith éifeachtach, beidh na caighdeáin idirnáisiúnta ina gceangail ar gach Stát Conarthach ICAO, lena n-áirítear Ballstáit uile an Aontais, i gcomhréir leis na teorainneacha a leagtar amach i gCoinbhinsiún Chicago, agus laistigh de na teorainneacha sin, go háirithe in Airteagail 37 agus 38 de.

(5)

De bhun Airteagal 38 de Choinbhinsiún Chicago, más dofheidhmithe d’aon Stát Conarthach ICAO aon chaighdeán idirnáisiúnta a chomhlíonadh go hiomlán, nó a rialacháin nó a chleachtais féin a chur i gcomhréir go hiomlán le haon chaighdeán idirnáisiúnta tar éis leasú a bheidh déanta ar an gcaighdeán sin, nó má mheasann sé é a bheith riachtanach rialacháin nó cleachtais a ghlacadh atá éagsúil ar aon dóigh leis na rialacháin nó na cleachtais arna mbunú le caighdeán idirnáisiúnta, tá an Stát sin le fógra láithreach a thabhairt do ICAO faoi na difríochtaí idir a rialacháin nó a chleachtais féin agus na cinn arna mbunú leis an gcaighdeán idirnáisiúnta. I gcás ina ndéanfar leasuithe ar chaighdeáin idirnáisiúnta, ní mór d’aon Stát nach ndéanfaidh na leasuithe iomchuí ar a rialacháin nó ar a chleachtais féin fógra a thabhairt do ICAO laistigh de 60 lá ón leasú ar an gcaighdeán idirnáisiúnta a bheith glactha, nó an ghníomhaíocht a bheartaíonn sé a dhéanamh a chur in iúl.

(6)

Maidir le rialacha inmheánacha ICAO, go háirithe na cinn sin a chuireann faoi deara na leaganacha is déanaí de na doiciméid le haghaidh cinntí maidir le SARPanna nua nó leasuithe ar SARPanna a bheith ar fáil do Chomhairle ICAO go déanach, nó na sprioc-amanna arna socrú ag ICAO le haghaidh Stáit Chonarthacha ICAO maidir le fógra a thabhairt faoi dhifríochtaí i ndáil le caighdeáin idirnáisiúnta, chomh maith le líon na ndifríochtaí i réimsí na sábháilteachta eitlíochta sibhialta, na haerloingseoireachta agus an bhainistithe aerthráchta a bhfuil fógra le tabhairt fúthu gach bliain, is deacair an seasamh atá le glacadh thar ceann an Aontais i gCinneadh ón gComhairle arna bhunú ar Airteagal 218(9) den Chonradh ar Fheidhmiú an Aontais Eorpaigh a bhunú go tráthúil i dtaca le SARPanna nua nó le gach leasú ar SARPanna atá le glacadh nó le gach difríocht faoina bhfuil fógra le tabhairt.

(7)

Is iomchuí, dá bhrí sin, na critéir agus an nós imeachta a bhunú atá le leanúint chun an seasamh atá le glacadh thar ceann an Aontais a bhunú maidir le SARPanna a ghlacadh, nó maidir le leasuithe ar SARPanna a ghlacadh, a mhéid a d’fhéadfadh na SARPanna sin tionchar cinntitheach a imirt ar ábhar dhlí an Aontais i réimse na heitlíochta sibhialta, agus maidir le cinntí i ndáil le míshástacht i dtaca le SARPanna a chur in iúl nó gan í a chur in iúl de bhun Airteagal 90 de Choinbhinsiún Chicago agus maidir le fógra a thabhairt faoi dhifríochtaí i ndáil le caighdeáin idirnáisiúnta de bhun Airteagal 38 de Choinbhinsiún Chicago.

(8)

I bhfianaise shainiúlacht na sábháilteachta eitlíochta sibhialta, na haerloingseoireachta agus na bainistíochta aerthráchta i gcomparáid le réimsí eile a ndéileálann ICAO leo, go háirithe líon ard na SARPanna a ghlactar sna réimsí sin ag Comhairle ICAO gach bliain agus líon na ndifríochtaí a bhfuil fógra le tabhairt fúthu gach bliain, níor cheart baint a bheith ag an gCinneadh seo ach le sábháilteacht na heitlíochta sibhialta, leis an aerloingseoireacht agus le bainistiú aerthráchta chun próisis a chuíchóiriú chun an seasamh atá le glacadh thar ceann an Aontais a bhunú go pras chun SARPanna nua agus leasuithe ar SARPanna a ghlacadh, na cinntí maidir le míshástacht i dtaca le SARPanna nó leasuithe ar SARPanna arna nglacadh ag Comhairle ICAO a chur in iúl nó gan í a chur in iúl agus déileáil leis na fógraí iomadúla ar bhealach éifeachtúil.

(9)

Féadfaidh baint a bheith ag na SARPanna arna nglacadh ag Comhairle ICAO i réimse na sábháilteachta eitlíochta sibhialta, na haerloingseoireachta agus na bainistithe aerthráchta le hábhair a bhaineann le hinniúlacht eisiach an Aontais agus d’fhéadfadh siad tionchar cinntitheach a imirt ar ábhar dhlí an Aontais. Dá bhrí sin, tá sé éifeachtúil agus iomchuí, trí bhíthin cinnidh, na critéir agus an nós imeachta a bhunú atá le leanúint chun an seasamh atá le glacadh thar ceann an Aontais i ndáil le SARPanna sna réimsí sin a bhunú, gan dochar do chearta ná d’oibleagáidí na mBallstát mar Stáit Chonarthacha ICAO faoi Choinbhinsiún Chicago. Ar leibhéal ICAO, tá SARPanna maidir le sábháilteacht eitlíochta sibhialta, aerloingseoireacht agus bainistiú aerthráchta le fáil go príomha in Iarscríbhinní 1, 2, 3, 4, 6, 8, 10, 11, 14, 15, 18 agus 19 a ghabhann le ICAO.

(10)

Ar leibhéal an Aontais, léirítear go príomha na ceanglais atá sna SARPanna maidir le sábháilteacht eitlíochta sibhialta agus déantar tagairt dóibh i Rialachán (AE) 2018/1139 (1), Rialachán (CE) Uimh. 2111/2005 (2) ó Pharlaimint na hEorpa agus ón gComhairle agus sna gníomhartha cur chun feidhme agus sna gníomhartha tarmligthe arna nglacadh ar an mbonn sin, go háirithe Rialacháin (AE) Uimh. 1178/2011 (3), (AE) Uimh. 748/2012 (4), (AE) Uimh. 965/2012 (5), (AE) Uimh. 139/2014 (6), (AE) Uimh. 452/2014 (7), (AE) Uimh. 1321/2014 (8), (AE) 2015/640 (9) ón gCoimisiún, Rialachán Cur Chun Feidhme (AE) 2019/947 (10) ón gCoimisiún, Rialachán Tarmligthe (AE) 2019/945 (11) ón gCoimisiún agus Rialachán Cur Chun Feidhme (AE) 2021/664 (12) ón gCoimisiún.

(11)

Ar leibhéal an Aontais, maidir leis an aerloingseoireacht agus an bhainistithe aerthráchta, léirítear na ceanglais atá sna SARPanna go príomha i Rialacháin (CE) Uimh. 549/2004 (13), (CE) Uimh. 550/2004 (14), (CE) Uimh. 551/2004 (15) ó Pharlaimint na hEorpa agus ón gComhairle agus sna gníomhartha cur chun feidhme agus tarmligthe arna nglacadh ar an mbonn sin, go háirithe Rialachán Cur Chun Feidhme (AE) Uimh. 923/2012 (16) ón gCoimisiún, Rialachán (AE) Uimh. 1332/2011 (17) ón gCoimisiún, Rialachán Cur Chun Feidhme (AE) 2018/1048 (18) ón gCoimisiún agus Rialachán (AE) 2015/340 (19) ón gCoimisiún agus déantar tagairt dóibh iontu sin.

(12)

Níor cheart baint a bheith ag an gCinneadh seo ach leis na seasaimh atá le glacadh thar ceann an Aontais in ICAO i réimsí a bhaineann le hinniúlacht eisiach an Aontais. Tá an Cinneadh seo gan dochar don fhéidearthacht atá ag an gComhairle cinntí a ghlacadh, ar thogra ón gCoimisiún, bunaithe ar Airteagal 218(9) CFAE lena mbunaítear an seasamh atá le glacadh thar ceann an Aontais in ICAO, go háirithe i réimsí nach dtagann faoi raon feidhme an Chinnidh seo, lena n-áirítear i gcás nár feidhmíodh inniúlacht chomhroinnte an Aontais go fóill.

(13)

Ach amháin i gcásanna áirithe maidir le fógra a thabhairt faoi dhifríochtaí áirithe a eascraíonn as bearta náisiúnta a ghlacadh de bhun Airteagal 71 de Rialachán (AE) 2018/1139, ba cheart an seasamh atá le glacadh thar ceann an Aontais a bheith bunaithe ar dhoiciméad a chuirfidh an Coimisiún faoi bhráid na Comhairle in am trátha phlé agus lena fhormheas. Ba cheart don Choimisiún iarracht a dhéanamh tús a chur le hullmhú an doiciméid sin a luaithe is féidir ionas go mbeidh am leordhóthanach ann chun é a ullmhú, lena n-áirítear aon chomhairliúchán iomchuí a dhéanamh ar leibhéal na saineolaithe. Ba cheart a léiriú sa doiciméad ón gCoimisiún, i gcás inarb iomchuí, agus ar bhonn cás ar chás, ar cheart solúbthacht a thabhairt do na Ballstáit a mhéid a bhaineann le SARPanna nua nó leasuithe ar SARPanna a bheith á nglacadh ag Comhairle ICAO, agus, i gcásanna den sórt sin, méid na solúbthachta sin agus na coinníollacha chun teacht ar chomhaontú maidir le solúbthacht den sórt sin nó a mhéid a bhaineann le foirm an fhógra faoi na difríochtaí atá i gceist. I gcás ina n-éilíonn ICAO é, ba cheart don fhógra faoi dhifríochtaí an fhormáid arna sainiú ag ICAO sa Chóras um Dhifríochtaí a Chomhdú go Leictreonach a leanúint.

I gcás ina mbunaítear, de bhun an Chinnidh seo, an seasamh atá le glacadh thar ceann an Aontais i ndoiciméad a chuirfidh an Coimisiún faoi bhráid na Comhairle lena phlé agus lena fhormheas, ba cheart a léiriú sa doiciméad sin, i gcás inarb iomchuí agus ar bhonn cás ar chás, ar cheart solúbthacht a thabhairt do na Ballstáit a mhéid a bhaineann leis an bhfoirm ina dtugtar fógra faoi na difríochtaí atá i gceist. Ina theannta sin, ba cheart don Choimisiún iarracht a dhéanamh tús a chur le hullmhú an doiciméid sin a luaithe is féidir chun am leordhóthanach a thabhairt dó a ullmhú, lena n-áirítear aon chomhairliúchán iomchuí a dhéanamh ar leibhéal na saineolaithe.

(14)

A mhéid a bhaineann le SARPanna nua nó leasuithe ar SARPanna a ghlacadh agus le cinntí chun míshástacht a chur in iúl nó gan í a chur in iúl maidir le SARPanna nó leasuithe ar SARPanna arna nglacadh ag Comhairle ICAO, ba cheart an doiciméad a thíolaic an Coimisiún a bheith bunaithe ar na cuspóirí agus ar na treoirlínte a leagtar amach san Iarscríbhinn agus ba cheart na hábhair a chuir ICAO ar fáil roimh aon phlé maidir le SARPanna nua nó aon leasuithe ar SARPanna ag Comhairle ICAO a chur san áireamh ann chomh maith leis an bhfaisnéis arna soláthar ag Gníomhaireacht Sábháilteachta Eitlíochta an Aontais Eorpaigh (EASA) i gcomhréir le hAirteagal 90(1) agus (3) de Rialachán (AE) 2018/1139, i gcás inarb infheidhme.

(15)

Ba cheart do Bhallstáit an Aontais atá ina gcomhaltaí de Chomhairle ICAO, ag gníomhú dóibh go comhpháirteach chun leas an Aontais, an seasamh a mhéid a bhaineann le Comhairle ICAO a bheith ag glacadh SARPanna nua nó na leasuithe ar SARPanna a chur in iúl.

(16)

Maidir leis an seasamh a mhéid a bhaineann le cinntí chun míshástacht a chur in iúl nó gan í a chur in iúl maidir le SARPanna nua nó leasuithe ar SARPanna arna nglacadh ag Comhairle ICAO, ba cheart do Bhallstáit an Aontais atá ina gcomhaltaí de ICAO é sin a chur in iúl, ag gníomhú dóibh go comhpháirteach chun leas an Aontais.

(17)

Na difríochtaí maidir leis na caighdeáin idirnáisiúnta arna nglacadh, a bhfuil fógra le tabhairt fúthu do ICAO, ba cheart dóibh a bheith bunaithe go háirithe ar an bhfaisnéis arna soláthar ag EASA i gcomhréir le hAirteagal 90(4) de Rialachán (AE) 2018/1139, i gcás inarb infheidhme.

(18)

Is féidir le difríochtaí i ndáil leis na caighdeáin idirnáisiúnta arna nglacadh ag Comhairle ICAO eascairt as dlí an Aontais mar gheall ar chaighdeán idirnáisiúnta nua nó leasaithe a bheith glactha ag Comhairle ICAO nó mar gheall ar athrú ar dhlí an Aontais. Maidir leis an seasamh atá le glacadh thar ceann an Aontais a mhéid a bhaineann leis na difríochtaí sin, ba cheart é a bheith bunaithe ar dhoiciméad a chuirfidh an Coimisiún faoi bhráid na Comhairle in am trátha lena phlé agus lena fhormheas.

(19)

Is féidir le difríochtaí i ndáil le caighdeáin idirnáisiúnta arna nglacadh ag Comhairle ICAO eascairt as bearta náisiúnta arna nglacadh de bhun Airteagal 71 de Rialachán (AE) 2018/1139 i gcás cúinsí práinneacha neamh-intuartha, i gcás ina bhfuil na bearta sin éagsúil le caighdeáin idirnáisiúnta agus, dá bhrí sin, ina n-éilítear fógra a thabhairt faoi dhifríochtaí do ICAO de bhun Airteagal 38 de Choinbhinsiún Chicago. Dá bhrí sin, is iomchuí a bhunú sa Chinneadh seo freisin na critéir agus an nós imeachta a bheidh le leanúint chun na difríochtaí sin a shainiú. Ba cheart an nós imeachta sin a bheith ag brath ar raon feidhme agus ar fhad na mbeart náisiúnta arna nglacadh agus ba cheart dó é a chur ar a gcumas do na Ballstáit a n-oibleagáidí idirnáisiúnta faoi Airteagal 38 de Choinbhinsiún Chicago a chomhlíonadh gan mhoill. Ba cheart an nós imeachta sin a bheith gan dochar do na coinníollacha agus don nós imeachta a leagtar síos in Airteagal 71 de Rialachán (AE) 2018/1139.

(20)

Ba cheart do Bhallstáit an Aontais atá ina gcomhaltaí de ICAO, ag gníomhú dóibh go comhpháirteach chun leas an Aontais, an seasamh a mhéid a bhaineann le difríochtaí i ndáil leis na caighdeáin idirnáisiúnta arna nglacadh a bhfuil fógra le tabhairt fúthu, a chur in iúl do ICAO.

(21)

Níor cheart sárú ar oibleagáidí na mBallstát faoi dhlí an Aontais ná a n-oibleagáidí idirnáisiúnta faoi Choinbhinsiún Chicago a bheith i gceist le cur chun feidhme an Chinnidh seo.

(22)

Chun críocha chur chun feidhme an Chinnidh seo, ba cheart do na Ballstáit agus don Choimisiún, i gcomhréir le stádas breathnóra an Aontais, gníomhú i ndlúthchomhar le chéile i gcomhréir lena ndualgas maidir le comhar dílis.

(23)

Ba cheart feidhm a bheith ag an gCinneadh seo ar feadh tréimhse theoranta, eadhon go dtí tar éis sheisiún Chomhairle ICAO i ndiaidh 42ú Tionól ICAO. Ba cheart don Choimisiún meastóireacht i scríbhinn ar chur i bhfeidhm an Chinnidh seo a chur faoi bhráid na Comhairle, meastóireacht a bheidh mar bhonn d’aon síneadh a d’fhéadfaí a chur leis an gCinneadh seo, nó d’aon leasú a d’fhéadfaí a dhéanamh air.

(24)

Is iomchuí na critéir agus an nós imeachta a bhunú chun an seasamh atá le glacadh thar ceann an Aontais in ICAO a bhunú a mhéid a bhaineann le caighdeáin idirnáisiúnta agus cleachtais mholta idirnáisiúnta a ghlacadh, nó leasuithe ar chaighdeáin idirnáisiúnta agus ar chleachtais mholta idirnáisiúnta a ghlacadh, agus maidir le fógra a thabhairt faoi dhifríochtaí maidir le caighdeáin idirnáisiúnta arna nglacadh,