(1)

Le Treoir (AE) 2018/2001 leagtar síos ceanglais maidir le breoslaí áirithe, is iad sin bithbhreoslaí, bithleachtanna, breoslaí bithmhaise, breoslaí leachtacha agus gásacha in-athnuaite de thionscnamh neamh-bhitheolaíoch agus breoslaí carbóin athchúrsáilte. Áirithítear leis na ceanglais sin nach féidir na breoslaí sin a áireamh mar chuid de na spriocanna a leagtar amach sa Treoir sin ach amháin más rud é gur táirgeadh go hinbhuanaithe iad agus go sábháiltear líon mór astaíochtaí gás ceaptha teasa leo i gcomparáid le breoslaí iontaise. Le hAirteagal 29 den Treoir sin, leagtar síos critéir inbhuanaitheachta agus critéir i ndáil le hastaíochtaí gás ceaptha teasa a laghdú maidir le bithbhreoslaí, bithleachtanna agus breoslaí bithmhaise. Thairis sin, le hAirteagal 26 den Treoir agus le Rialachán Tarmligthe (AE) 2019/807 ón gCoimisiún (2) leagtar síos na critéir chun a chinneadh: (i) cé na bunábhair le haghaidh bithbhreoslaí, bithleachtanna nó breoslaí bithmhaise lena ngabhann riosca ard maidir le hathrú indíreach ar thalamhúsáid; agus (ii) cé na bithbhreoslaí, bithleachtanna nó breoslaí bithmhaise lena ngabhann riosca ard maidir le hathrú indíreach ar thalamhúsáid agus a chomhlíonann critéir áirithe ar féidir a dheimhniú ina leith go ngabhann riosca íseal leo maidir le hathrú indíreach ar thalamhúsáid. Le hAirteagal 25(2) de Threoir (AE) 2018/2001, leagtar síos critéir maidir le laghdú ar astaíochtaí gás ceaptha teasa le haghaidh breoslaí in-athnuaite leachtacha agus gásacha de thionscnamh neamh-bhitheolaíoch agus breoslaí carbóin athchúrsáilte a úsáidtear in earnáil an iompair. Le hAirteagal 28(2) den Treoir sin, ceanglaítear ar oibreoirí eacnamaíocha faisnéis a iontráil i mbunachar sonraí de chuid an Aontais maidir leis na hidirbhearta a rinneadh agus maidir le hairíonna inbhuanaitheachta roinnt breoslaí in-athnuaite (bithbhreoslaí, bithghás agus breoslaí in-athnuaite leachtacha agus gásacha de thionscnamh neamh-bhitheolaíoch) agus breoslaí carbóin athchúrsáilte a úsáidtear in earnáil an iompair.

(2)

Le Treoir (AE) 2018/2001, leagtar síos freisin rialacha maidir le rannchuidiú an leictreachais in-athnuaite le spriocanna iompair a ríomh. Go háirithe, le hAirteagal 27(3) den Treoir sin, leagtar síos rialacha maidir leis an gcaoi a ríomhtar an rannchuidiú sin, nuair a úsáidtear an leictreachas go díreach chun feithiclí leictreacha a chumhachtú agus nuair a úsáidtear é chun breoslaí in-athnuaite leachtacha agus gásacha de thionscnamh neamh-bhitheolaíocha a tháirgeadh, ar breoslaí iad a úsáidtear in earnáil an iompair.

(3)

Bhí ról mór ag scéimeanna deonacha maidir le fianaise a sholáthar ar chomhlíonadh na gcritéar inbhuanaitheachta agus na gcritéar maidir le laghdú ar astaíochtaí gás ceaptha teasa le haghaidh bithbhreoslaí agus bithleachtanna. Faoi Threoir (AE) 2018/2001, is féidir scéimeanna deonacha a úsáid: (i) chun a dheimhniú go gcomhlíonann na breoslaí uile a tháirgtear ó bhithmhais, lena n-áirítear breoslaí gásacha agus soladacha, na critéir inbhuanaitheachta a leagtar síos sa Treoir sin; (ii) chun sonraí cruinne a sholáthar maidir leis an laghdú ar astaíochtaí gás ceaptha teasa a bhaineann leis na breoslaí sin; (iii) chun a dheimhniú go gcomhlíonann breoslaí in-athnuaite iompair leachtacha agus gásacha de thionscnamh neamh-bhitheolaíoch agus breoslaí carbóin athchúrsáilte a gcritéir maidir le laghdú ar astaíochtaí gás ceaptha teasa; agus (iv) chun comhlíonadh fhorálacha Airteagal 27(3) den Treoir sin a chruthú maidir leis an sciar leictreachais in-athnuaite in earnáil an iompair a ríomh. Is féidir scéimeanna deonacha a úsáid freisin chun a chruthú go n-iontrálann oibreoirí eacnamaíocha faisnéis chruinn sna bunachair sonraí de chuid an Aontais nó sna bunachair sonraí náisiúnta maidir le roinnt breoslaí in-athnuaite agus breoslaí carbóin athchúrsáilte a úsáidtear in earnáil an iompair i gcomhréir le hAirteagal 28(4) de Threoir (AE) 2018/2001. Thairis sin, is féidir scéimeanna deonacha a úsáid chun bithbhreoslaí, bithleachtanna agus breoslaí bithmhaise lena ngabhann riosca íseal maidir le hathrú indíreach ar thalamhúsáid a dheimhniú. Féadfaidh an Coimisiún a chinneadh gur féidir na scéimeanna deonacha náisiúnta nó idirnáisiúnta a úsáid chun na gcríoch sin ar fad nó cuid díobh.

(4)

Faoi Airteagal 30(9) de Threoir (AE) 2018/2001, i gcás ina soláthróidh oibreoir eacnamaíoch cruthúnas nó sonraí i dtaca le comhlíonadh na gcritéar inbhuanaitheachta agus na gcritéar maidir le laghdú ar astaíochtaí gás ceaptha teasa, ar cruthúnas nó sonraí iad a fhaightear i gcomhréir le scéim dheonach atá aitheanta ag an gCoimisiún, a mhéid a chumhdaítear leis an gcinneadh aitheantais, níl Ballstát le ceangal ar an soláthraí tuilleadh fianaise a sholáthar.

(5)

An 28 Lúnasa 2020 chuir scéim “KZR IniG” iarraidh ar aitheantas faoi bhráid an Choimisiúin faoi Airteagal 30(4) de Threoir (AE) 2018/2001. Mar thoradh ar an iarraidh, rinne an Coimisiún measúnú ar an scéim sin, agus sainaithníodh roinnt saincheisteanna a d’fhág nárbh fhéidir a mheas go raibh an scéim comhoiriúnach leis na critéir inbhuanaitheachta, mar a leagtar síos in Airteagal 29 de Threoir (AE) 2018/2001. San athiarraidh an 25 Meitheamh 2021, tugadh aghaidh mar ba cheart ar na saincheisteanna sin leis an scéim. I measúnú an Choimisiúin, thángthas ar an gconclúid maidir leis an scéim: (i) go gcumhdaítear léi go leormhaith na critéir inbhuanaitheachta maidir le bithmhais talmhaíochta a leagtar síos in Airteagal 29(2) go (5) de Threoir (AE) 2018/2001; (ii) go raibh sonraí cruinne inti maidir le laghdú ar astaíochtaí gás ceaptha teasa chun críche Airteagal 29(10) de Threoir (AE) 2018/2001; agus (iii) go gcuirtear modheolaíocht maidir le maischothramaíocht i bhfeidhm léi i gcomhréir le ceanglais Airteagal 30(1) agus (2) de Threoir (AE) 2018/2001. Níor mheas an Coimisiún áfach go gcumhdaítear leis an scéim go leormhaith na critéir inbhuanaitheachta maidir le bithmhais foraoise, a leagtar síos in Airteagal 29(6) agus (7) de Threoir (AE) 2018/2001. Dá bhrí sin, le Cinneadh Cur Chun Feidhme (AE) 2022/603 ón gCoimisiún (3), níor aithníodh scéim “KZR IniG” ach amháin chun a léiriú go bhfuil na ceanglais a leagtar amach in Airteagal 29(2) go (5) agus Airteagal 29(10) de Threoir (AE) 2018/2001 á gcomhlíonadh.

(6)

Rinneadh breis modhnuithe ar an scéim “KZR IniG” chun a áirithiú go gcumhdaítear go leormhaith na critéir inbhuanaitheachta maidir le bithmhais foraoise, a leagtar síos in Airteagal 29(6) agus (7) de Threoir (AE) 2018/2001. Tar éis breis leasuithe, tugadh aghaidh leormhaith in athiarraidh an 23 Meán Fómhair 2022 ar na saincheisteanna uile a sainaithníodh roimhe sin agus a bhí fós gan réiteach.

(7)

Cumhdaítear na bunábhair seo a leanas leis an scéim “KZR IniG”: bithmhais talmhaíochta, bithmhais foraoise, agus dramhaíl agus iarmhair. Cumhdaítear gach cineál breosla leis an scéim freisin. Tá cumhdach geografach domhanda aici agus áirítear inti an líne chúraim ar fad (le haghaidh bithmheatáin, suas go dtí an t-aonad táirgthe). Tá athmheasúnú déanta ag an gCoimisiún ar scéim “KZR IniG” ó athiarraidh an 23 Meán Fómhair 2022 agus fuair sé amach: (i) go gcumhdaítear léi go leormhaith na critéir inbhuanaitheachta a leagtar síos in Airteagal 29(2) go (7) de Threoir (AE) 2018/2001; (ii) go soláthraítear léi sonraí cruinne maidir le laghdú astaíochtaí gás ceaptha teasa chun críocha Airteagal 29(10) den Treoir sin; agus (iii) go gcuirtear modheolaíocht maidir le maischothramaíocht i bhfeidhm léi i gcomhréir le ceanglais Airteagal 30(1) agus (2) den Treoir sin.

(8)

I measúnú an Choimisiúin ní chuirtear san áireamh an gníomh cur chun feidhme atá le glacadh i gcomhréir le hAirteagal 29(8) de Threoir (AE) 2018/2001 maidir le treoir a sholáthar chun comhlíonadh na gcritéar inbhuanaitheachta a leagtar síos in Airteagal 29(6) agus (7) den Treoir sin a léiriú (4). Dá bhrí sin, déanfar athmheasúnú ar an scéim “KZR IniG” i ndáil leis sin.

(9)

Ní bheidh feidhm ag Rialachán Cur Chun Feidhme (AE) 2022/996 ón gCoimisiún (5) ach ón 30 Nollaig 2023. Ba cheart athmheasúnú a dhéanamh ar an scéim “KZR IniG” i bhfianaise an Rialacháin Cur Chun Feidhme nua.

(10)

Ina mheasúnú ar an scéim “KZR IniG”, fuair an Coimisiún amach go gcomhlíonann sí caighdeáin leordhóthanacha iontaofachta, trédhearcachta agus iniúchóireachta neamhspleáiche agus na ceanglais mhodheolaíocha a leagtar amach in Iarscríbhinn VI a ghabhann le Treoir (AE) 2018/2001.

(11)

Ar chúiseanna trédhearcachta agus deimhneachta dlíthiúla, is iomchuí go leagfar amach i ngníomh aonair ón gCoimisiún, ar bhealach cuimsitheach, gach critéar inbhuanaitheachta agus gach critéar maidir le hastaíochtaí gás ceaptha teasa a mheastar go gcumhdaítear go leormhaith le scéim “KZR IniG”. Dá bhrí sin, ba cheart Cinneadh Cur Chun Feidhme (AE) 2022/603 a ionadú.

(12)

Ba cheart scéim aitheanta “KZR IniG” a chur ar fáil sa roinn ar scéimeanna deonacha ar Europa, suíomh gréasáin an Choimisiúin

(13)

Na bearta dá bhforáiltear sa Chinneadh seo, tá siad i gcomhréir leis an tuairim ón gCoiste um Inbhuanaitheacht Bithbhreoslaí, Bithleachtanna agus Breoslaí Bithmhaise,