Gníomhartha dlíthiúla

Sonraítear in Airteagal 288 den Chonradh ar Fheidhmiú an Aontais Eorpaigh (CFAE) gur féidir le hinstitiúidí AE suas le 5 chineál gníomhartha dlíthiúla a ghlacadh:

• is gnách go mbíonn rialachán infheidhme. Tá sé ina cheangal go huile agus go hiomlán agus baineann feidhm dhíreach leis maidir le gach Ballstát AE;
• tá treoir ceangailteach, maidir leis an toradh atá le baint amach, agus cuirtear gach Ballstát a bhfuil sé dírithe air faoin gceangal sin. Mar sin féin, féadfaidh gach Ballstát an fhoirm agus na modhanna a úsáidfear chun an toradh a bhaint amach a roghnú;
• tá cinneadh ina cheangal go huile agus go hiomlán. I gcás go sonraítear i gcinneadh iad siúd chuig a ndíreofar é is orthu siúd amháin a bheidh sé ina cheangal;
• níl aon bhrí cheangailteach le moltaí ná tuairimí.

In Airteagal 289 CFAE déantar idirdhealú idir:

• gníomhartha reachtacha — gníomhartha a ghlactar faoi ghnáthnós imeachta reachtach nó faoi nós imeachta reachtach speisialta;
• gníomhartha neamhreachtacha — gníomhartha a ghlacann an Coimisiún Eorpach go ginearálta, i ndiaidh tarmligin (gníomhartha tarmligthe) nó chun gníomh reachtach a chur chun feidhme (gníomhartha cur chun feidhme).

In Airteagal 132 CFAE tugtar cumhachtaí don Bhanc Ceannais Eorpach (BCE) an méid seo a leanas a dhéanamh:

• rialacháin a dhéanamh nuair is gá chun cúraimí áirithe a shainítear i Reacht an Chórais Eorpaigh Banc Ceannais agus an Bhainc Cheannais (CEBC) agus BCE agus i gcásanna a leagtar síos i ngníomhartha a ghlac an Chomhairle a dhéanamh;
• cinntí is gá a dhéanamh chun na cúraimí a chuirtear ar CEBC faoi na Conarthaí agus faoin Reacht a dhéanamh;
• moltaí a dhéanamh agus tuairimí a sheachadadh.

Le hAirteagal 14.3 de Prótacal (Uimh. 4) maidir le reacht an Chórais Eorpaigh Banc Ceannais agus an Bhainc Cheannais Eorpaigh tugtar cumhachtaí do BCE treoirlínte a ghlacadh.