This document is an excerpt from the EUR-Lex website
Rialaítear aontachas tíortha nua leis an Aontas Eorpach (AE) le hAirteagal 49 den Chonradh ar an Aontas Eorpach (CAE). Maidir le tír ar mian léi ballraíocht a ghlacadh san AE:
Bronnann an Chomhairle Eorpach an stádas mar thír is iarrthóir i ndiaidh tuairim a fháil ón gCoimisiún Eorpach, a dhréachtaítear i ndiaidh iarratas na tíre sin ar bhallraíocht san Aontas Eorpach a fháil. Nuair a bhronntar an stádas mar thír is iarrthóir ar thír, ní hionann é sin agus ceart uathoibríoch a bheith aici chun ballraíocht a ghlacadh san AE.
Le linn a próisis aontachais, léireoidh an tír iarrthóir go gcomhlíonann sí na critéir aontachais (Cóbanhávan) agus go bhfuil sé ar a cumas na cearta agus na hoibleagáidí a bhaineann le ballraíocht in AE a ghabháil uirthi féin.
Ag brath ar an gcás sonrach, beidh ar an tír is iarrthóir dul trí phróiseas cuimsitheach athchóirithe, mar shampla trí fheabhas a chur ar a bonneagar agus ar a cumais riaracháin chun reachtaíocht nua a chur chun feidhme i gcomhréir leis an gcorpas um dhlíthe agus um chaighdeáin AE (ar a dtugtar acquis). Chun go gcomhlíonfaidh na tíortha is iarrthóirí agus na tíortha is iarrthóirí ionchasacha na coinníollacha maidir le ballraíocht, teastaíonn fócas láidir ar na hathchóirithe bunúsacha maidir leis an smacht reachta, an geilleagar agus feidhmiú na n–institiúidí daonlathacha agus an riarachán poiblí. Le linn an phróisis aontachais, déanann an Coimisiún próiseas aontachais na tíre is iarrthóir agus na dtíortha is iarrthóirí ionchasacha a mhionscrúdú agus tacaíonn sé leis le cúnamh airgeadais agus teicniúil, ag cuidiú léi ullmhú do bhallraíocht in AE.