2.4.2011   

MT

Il-Ġurnal Uffiċjali tal-Unjoni Ewropea

C 104/47

—

jinsisti b’mod qawwi li jingħataw biżżejjed fondi lill-iżvilupp ulterjuri tal-Politika Marittima Integrata (PMI) tal-UE sal-aħħar tal-perspettiva finanzjarja attwali fl-2013. Huwa tal-fehma wkoll li għandu jiġi allokat finanzjament speċifiku u adegwat għall-iżvilupp u t-tisħiħ tal-PMI fil-perjodu baġitarju li jmiss li jibda fl-2014 u jappella lill-partijiet involuti kollha fit-tfassil tal-baġit tal-UE sabiex jagħtu biżżejjed attenzjoni lil dan il-bżonn. Dan huwa importanti biex jinkisbu l-għanijiet stabbiliti u biex jiġi evitat li l-progress u l-investimenti kollha li diġà twettqu jkunu saru għalxejn;

—

jinsisti li għandha ssir enfasi akbar fuq il-prijorità tat-“tkabbir ekonomiku sostenibbli, l-impjiegi u l-innovazzjoni”. Peress li l-Ewropa għadha qed tbati biex tirpilja mill-aktar kriżi ekonomika severa fl-istorja reċenti, l-azzjonijiet għal dan il-għan jistħoqqilhom aktar attenzjoni, mhux l-inqas il-fatt li jistgħu jikkontribwixxu b’mod sinjifikanti għall-ksib tal-għanijiet tal-programm Ewropa 2020;

—

jiġbed l-attenzjoni għall-bżonn li jkompli jiġi allokat il-finanzjament għall-politika marittima integrata wara l-2014 sabiex din tiġi sostnuta u biex tkun effettiva, dan soġġett għad-diskussjoni tal-qafas finanzjarju multiannwali wara l-2013. Il-fond tal-kosta diskuss mill-Kumitat tar-Reġjuni u l-Parlament Ewropew jista’ jservi bħala eżempju f’dan ir-rigward;

—

jitlob li jiġu kkonsultati l-awtoritajiet lokali u reġjonali meta jiġu żviluppati u implimentati azzjonijiet bil-għan li jinkiseb l-objettiv li titjieb il-kwalità tat-teħid ta’ deċiżjonijiet pubbliċi fil-livelli kollha. Il-KtR diġà talab li l-governanza f’dan il-qasam issir fl-ispirtu tal-governanza f’diversi livelli u b’konformità mal-prinċipju tas-sussidjarjetà, u jitlob ukoll għal aktar involviment u kooperazzjoni mal-pajjiżi li mhumiex membri tal-UE fil-kwistjonijiet relatati mal-għarfien tal-baħar. Diġà ġiet rikonoxxuta l-importanza li titjieb il-koordinazzjoni ma’ dawn l-imsieħba f’aspetti oħra tal-politika marittima, u barra minn hekk il-benefiċċji ta’ aktar azzjonijiet komuni f’dan il-qasam huma pjuttost ovvji.

Relatur

:

Noel Formosa (MT/PPE), Sindku ta’ San Lawrenz, Għawdex

Dokumenti ta’ referenza

:

Proposta għal Regolament tal-Parlament Ewropew u tal-Kunsill li jistabbilixxi Programm biex jiġi appoġġjat l-iżvilupp ulterjuri ta’ Politika Marittima Integrata

COM(2010) 494 finali

Komunikazzjoni mill-Kummissjoni lill-Parlament Ewropew u lill-Kunsill dwar – Għarfien dwar il-Baħar 2020 – Dejta u osservazzjoni tal-baħar għat-tkabbir intelliġenti u sostenibbli

COM(2010) 461 finali

1.

jinsisti b’mod qawwi li jingħataw biżżejjed fondi lill-iżvilupp ulterjuri tal-Politika Marittima Integrata (PMI) tal-UE sal-aħħar tal-perspettiva finanzjarja attwali fl-2013. Huwa tal-fehma wkoll li għandu jiġi allokat finanzjament speċifiku u adegwat għall-iżvilupp u t-tisħiħ tal-PMI fil-perjodu baġitarju li jmiss li jibda fl-2014 u jappella lill-partijiet involuti kollha fit-tfassil tal-baġit tal-UE sabiex jagħtu biżżejjed attenzjoni lil dan il-bżonn. Dan huwa importanti biex jinkisbu l-għanijiet stabbiliti u biex jiġi evitat li l-progress u l-investimenti kollha li jkunu diġà twettqu jkunu saru għalxejn;

2.

jissottolinja l-importanza kbira li jiġi garantit is-suċċess tal-PMI, peress li l-alternattiva tkun diżastruża kemm mil-lat ambjentali kif ukoll minn dak ekonomiku u soċjali. Hemm wisq reġjuni Ewropej li jiddependu mill-baħar għall-prosperità tagħhom biex dan l-element jiġi traskurat;

3.

jilqa’ l-għan tal-Kummissjoni Ewropea li talloka EUR 50 miljun għal iktar żvilupp u għall-implimentazzjoni ta’ politika marittima integrata matul il-perjodu 2011-2013 bħala appoġġ biex isir iktar progress fil-politika marittima tal-UE, b’mod partikolari “t-tkabbir blu” jew l-użu sostenibbli tal-ibħra, l-oċeani u l-kosti tagħna, il-ħarsien tal-ambjent marittimu u l-promozzjoni tal-impjiegi fis-setturi marittimi;

4.

jinsisti li għandha ssir enfasi akbar fuq il-prijorità tat-“tkabbir ekonomiku sostenibbli, l-impjiegi u l-innovazzjoni”. Peress li l-Ewropa għadha qed tbati biex tirpilja mill-aktar kriżi ekonomika severa fl-istorja reċenti, l-azzjonijiet għal dan il-għan jistħoqqilhom aktar attenzjoni, mhux l-inqas il-fatt li jistgħu jikkontribwixxu b’mod sinjifikanti għall-ksib tal-għanijiet tal-programm Ewropa 2020;

5.

jilqa’ l-intenzjoni tal-Kummissjoni Ewropea li tikkontribwixxi permezz tal-programm ta’ appoġġ għall-implimentazzjoni tal-istrateġiji mfassla għar-reġjuni marittimi individwali. L-istrateġiji marittimi reġjonali jistgħu jintużaw sabiex jinstabu soluzzjonijiet speċifiċi għal sfidi reġjonali permezz tal-allokazzjoni mmirata tal-fondi;

6.

jindika li fil-Komunikazzjoni dwar l-Għarfien dwar il-Baħar 2020, l-akbar tħassib huwa l-ġbir u l-assemblaġġ tad-data – żewġ oqsma li fihom ħafna awtoritajiet lokali u reġjonali jaqdu rwol importanti bħala awtoritajiet ta’ finanzjament. Għalhekk għandu jkun hemm koordinazzjoni aħjar tal-isforzi biex tiġi evitata d-dupplikazzjoni tad-data;

7.

jiġbed l-attenzjoni għall-fatt li l-ippjanar spazjali marittimu huwa strument importanti tal-politika marittima integrata tal-UE u għandu jintuża fejn adatt;

8.

jilqa’ l-prominenza li l-Kummissjoni tat lill-kooperazzjoni mal-pajjiżi li mhumiex membri tal-UE. Hija pożizzjoni issa stabbilita tajjeb ta’ dan il-Kumitat li l-UE waħedha ma tistax taffaċċja b’suċċess il-firxa wiesgħa ta’ sfidi li jiffaċċjaw l-ibħra tagħna u għalhekk huwa kruċjali li l-imsieħba internazzjonali tagħna jiġu involuti mill-qrib kemm jista’ jkun. Inizjattivi bħall-Assemblea Reġjonali u Lokali Ewro-Mediterranja (ARLEM) li bħalissa tinsab fil-fażi inizjali tagħha, eventwalment ser issir għodda effettiva biex jiġu segwiti l-interessi komuni f’kooperazzjoni fil-livell reġjonali;

9.

jemmen fil-bżonn li jiġu promossi proġetti prinċipali konkreti għall-iżvilupp u t-turija tal-għarfien espert marittimu tal-UE, pereżempju l-iżvilupp ta’ “Port Ewropew Nadif” jew “Bastiment Ewropew Nadif”. Permezz ta’ proġetti prinċipali bħal dawn jistgħu jiġu identifikati approċċi tekniċi b’konformità mal-għanijiet ġenerali ta’ politika, li jistgħu jintużaw sabiex jogħlew l-istandards legali u jiġu integrati fil-livell Ewropew u nazzjonali u b’hekk l-ekonomija tas-setturi marittimi Ewropej issir iktar kompetittiva (pereżempju, fil-qasam tal-effiċjenza fl-użu tal-enerġija, tat-tnaqqis tal-emissjonijiet, tal-propulsjoni alternattiva tal-bastimenti jew tas-sigurtà tal-bastimenti). Proġetti prinċipali bħal dawn jistgħu jitwettqu biss fil-perjodu fit-tul jekk jiġi stabbilit qafas finanzjarju sigur għall-futur;

10.

jilqa’ l-inizjattiva li jinħoloq netwerk integrat aktar għall-għarfien Ewropew tal-baħar. Meta jitqiesu l-livell milħuq mill-ICT u l-kooperazzjoni dejjem akbar bejn il-komunitajiet xjentifiċi tal-pajjizi differenti, l-istruttura frammentata attwali tidher kemm anakronista kif ukoll estremament ineffiċjenti mil-lat ta’ spejjeż;

11.

jiġbed l-attenzjoni għall-bżonn li jkompli jiġi allokat il-finanzjament għall-politika marittima integrata wara l-2014 sabiex din tiġi sostnuta u biex tkun effettiva, dan soġġett għad-diskussjoni tal-qafas finanzjarju multiannwali wara l-2013. Il-fond tal-kosta diskuss mill-Kumitat tar-Reġjuni u l-Parlament Ewropew jista’ jservi bħala eżempju f’dan ir-rigward;

12.

jilmenta li l-awtoritajiet lokali u reġjonali ma jingħatawx aktar attenzjoni, anke jekk il-Komunikazzjoni tittratta b’mod wiesa’ l-kwistjonijiet li jiffurmaw parti mill-kompetenzi tagħhom u li ta’ spiss huma responsabbli mill-finanzjament u/jew mill-implimentazzjoni tagħhom. Il-ġbir tad-data jista’ jkun ir-responsabbiltà tal-Istati Membri imma fil-verità ta’ spiss isir fil-livell lokali u reġjonali;

13.

jitlob li jiġu kkonsultati l-awtoritajiet lokali u reġjonali meta jiġu żviluppati u implimentati azzjonijiet bil-għan li jinkiseb l-objettiv li titjieb il-kwalità tat-teħid ta’ deċiżjonijiet pubbliċi fil-livelli kollha. Il-KtR diġà talab li l-governanza f’dan il-qasam issir fl-ispirtu tal-governanza f’diversi livelli u b’konformità mal-prinċipju tas-sussidjarjetà, u jitlob ukoll għal aktar involviment u kooperazzjoni mal-pajjiżi li mhumiex membri tal-UE fil-kwistjonijiet relatati mal-għarfien tal-baħar. Diġà ġiet rikonoxxuta l-importanza li titjieb il-koordinazzjoni ma’ dawn l-imsieħba f’aspetti oħra tal-politika marittima, u barra minn hekk il-benefiċċji ta’ aktar azzjonijiet komuni f’dan il-qasam huma pjuttost ovvji;

14.

jirrakkomanda li, meta jitqiesu l-miżuri adatti għall-promozzjoni tas-sistemi ta’ informazzjoni kostali fis-segwitu għar-Rakkomandazzjoni dwar il-Ġestjoni Integrata taż-Żoni Kostali, il-Kummissjoni tfittex l-aħjar prattika minn fost ir-reġjuni tal-Ewropa. Xi wħud minnhom, bħall-Brittany, Schleswig-Holstein u Zuid-Holland, fost oħrajn, jinsabu fuq quddiem f’dan il-qasam, u ħafna mill-prattiki tagħhom jistgħu jiġu adattati għal reġjuni oħrajn ukoll;

15.

jilqa’ l-idea li jiġi adottat bħala referenza l-baċir tal-baħar għas-sistemi ta’ osservazzjoni tal-baħar u biex jiġu identifikati nuqqasijiet importanti. Fil-fatt, hija vallapena li tiġi studjata l-idea li tingħata aktar responsabbiltà lill-Konvenzjonijiet Reġjonali tal-Baħar u lill-Kunsilli Reġjonali Konsultattivi għas-sajd, inklużi poteri potenzjali ta’ koordinazzjoni. Fi kwalunkwe każ, madankollu, iridu jiġu żgurati l-interoperabbiltà tad-data u l-osservazzjoni ta’ standards ta’ kwalità għolja;

16.

jipproponi li l-Kummissjoni tappoġġja l-iżvilupp ta’ indikaturi ta’ data reġjonali, li jistgħu jservu sabiex jitfissru aħjar il-prijoritajiet tal-istrateġiji marittimi reġjonali, peress li r-reġjuni huma fost dawk li l-aktar jiġbru u jużaw id-data;

17.

jinnota li huwa iktar probabbli li jinkisbu riżultati aħjar jekk jiġi adottat approċċ iktar olistiku fost aspetti oħra permezz ta’ aktar enfasi fuq ir-rwol potenzjali tal-entitajiet privati fl-iżvilupp ta’ PMI. Mingħajr ma titwarrab id-dimensjoni soċjali tal-Unjoni Ewropea, huwa importanti wkoll li l-partijiet interessati kollha jiġu involuti f’kull pass tal-proċess. Barra minn hekk, il-partijiet interessati kollha mhux biss għandhom jiġu mistiedna jaqsmu l-ispiża tal-ġbir u l-protezzjoni tad-data iżda wkoll jikkontribwixxu l-ideat u l-prattiki t-tajba sabiex jibbenefikaw minn dan u b’hekk jistimulaw it-tkabbir ekonomiku u l-ħolqien tal-impjiegi fiż-żona Ewropea;

18.

jirrikonoxxi li t-titjib fl-għarfien tal-baħar huwa kruċjali mhux biss biex il-proċessi li jseħħu fl-ibħra tagħna jiġu mifhuma aħjar, iżda wkoll biex jissaħħu ż-żewġ għodod l-oħra tal-PMI, jiġifieri l-ippjanar spazjali aħjar u s-sorveljanza marittima integrata;

19.

jinnota li l-Komunikazzjoni attwali tikkonċentra fuq il-ġbir u l-assemblaġġ tad-data, li jiffurmaw l-ewwel żewġ passi fil-proċess tal-iffurmar tal-għarfien. Fl-istess ħin, dawn huma stadji li fihom l-awtoritajiet lokali u reġjonali huma estremament attivi;

20.

jikkondividi l-fehma li l-inizjattiva inkwistjoni hija bbażata fuq il-ħtiġiet ta’ diversi Direttivi li essenzjalment għandhom l-għan li joħolqu aktar programmi kkoordinati ta’ monitoraġġ tal-ibħra marini, jissemplifikaw l-iskambju ta’ informazzjoni bejn l-awtoritajiet pubbliċi, joħorġu d-data pubblika kif ukoll jistabbilixxu ċertu standards komuni;

21.

jenfasizza li l-Komunikazzjoni ssemmi b’mod speċifiku l-importanza tad-data kostali u l-fatt li ħafna awtoritajiet reġjonali żviluppaw sistemi ta’ informazzjoni kostali. Jidher ovvju li biex jiġu massimizzati l-benefiċċji ta’ dawn l-azzjonijiet, jeħtieġ li jinkiseb ċertu livell ta’ interoperabbiltà. Għal dak il-għan, il-Kummissjoni għandha tfittex modi kif jitjiebu l-kooperazzjoni u l-koordinazzjoni fil-livell reġjonali;

22.

jirrikonoxxi wkoll l-importanza tal-kunċett li d-data għandha tinżamm kemm jista’ jkun qrib tas-sorsi. Filwaqt li l-proposta ċertament hija sensibbli, għandu jiġi assigurat li ma tpoġġix piż addizzjonali fuq l-awtoritajiet lokali u reġjonali. F’dan ir-rigward, il-fehma tal-Kummissjoni, li anke l-partijiet interessati rilevanti kollha għandhom jikkontribwixxu b’mod adegwat għas-salvagwardja tad-data anke wara li ma jibqalhomx valur soċjali u kummerċjali, jistħoqqilha aktar attenzjoni;

23.

jinnota li l-Komunikazzjoni ssegwi tliet objettivi prinċipali:

Il-ksib ta’ dawn l-objettivi u t-tranżizzjoni mill-approċċ ferm frammentat t’issa għal netwerk integrat jistgħu jwasslu biex jiġu ffrankat EUR 300 miljun fis-sena, li l-parti l-kbira minnhom jistgħu jibbenefikaw l-awtoritajiet lokali u reġjonali;

24.

jirrakkomanda li l-objettivi msemmija hawn fuq jintlaħqu b’aktar żvilupp u titjib tal-istrumenti eżistenti tal-UE, bħall-inizjattiva ta’ Monitoraġġ Globali għall-Ambjent u s-Sigurtà (GMES) u s-sistema “ur-EMODnet” (Netwerk Ewropea tal-Osservazzjoni u d-Data tal-Baħar). Barra minn hekk, jirrakkomanda bis-sħiħ li l-Kummissjoni għandha tesplora modi kif id-data minn programmi appoġġati mill-UE dwar l-iżvilupp reġjonali u r-riċerka tal-baħar tibda tkun iktar disponibbli għall-użu mill-ġdid, u b’mod partikolari biex b’hekk ikun żgurat li r-regoli ta’ aċċess għad-data tas-sajd jiġu implimentati bi sħiħ mill-Istati Membri u jkun assigurat li d-data miġbura tilħaq l-istandards komuni u tagħti l-possibbiltà għal diversi użi;

25.

jaqbel mal-intenzjoni tal-Kummissjoni li tkompli timxi lejn it-tlestija ta’ dak li ssejjaħ “arkitettura tad-dejta(sic.) tal-baħar operazzjonali” Sabiex jintlaħaq dan il-għan, huwa tal-fehma li l-Kummissjoni għandha tinvolvi l-partijiet interessati kollha u tħeġġeġ il-komunikazzjoni bejn iċ-ċentri tad-data nazzjonali, kif ukoll twaqqaf segretarjat biex jiġġestixxi s-sistema ur-EMODnet;

26.

jissuġġerixxi li l-komunità marittima tħeġġeġ lill-Istitut Ewropew tal-Innovazzjoni u t-Teknoloġija biex fil-futur qarib jistabbilixxi Komunità tal-Għarfien u l-Innovazzjoni dwar il-ħarsien u l-użu sostenibbli tar-riżorsi marittimi. Komunità bħal din tkun tista’ tkopri firxa wiesgħa ta’ attivitajiet xjentifiċi, teknoloġiċi, ekonomiċi u edukattivi fl-oqsma tar-riżorsi bijoloġiċi u minerali kif ukoll l-enerġija, b’kunsiderazzjoni tal-kwistjonijiet tal-ħarsien tal-ambjent.