—

wara li kkunsidra l-Artikoli 144(5) u 132(4) tar-Regoli ta' Proċedura tiegħu,

A.

billi fl-10 ta’ Awwissu 2020, il-kantant Niġerjan Yahaya Sharif-Aminu tressaq quddiem Qorti Suprema tax-Xarija fl-Istat ta’ Kano, fejn ġie pproċessat mingħajr rappreżentanza legali u ġie kkundannat għall-mewt permezz ta’ tgħalliq għall-allegata blasfemija f’kanzunetta li kkompona u kkondivida fuq il-media soċjali li allegatament kien fiha kummenti derogatorji rigward il-Profeta Muhammad;

B.

billi fil-21 ta’ Jannar 2021, il-Qorti Suprema fl-Istat ta’ Kano ordnat proċess ġdid abbażi ta’ irregolaritajiet proċedurali u fis-17 ta’ Awwissu 2022, il-Qorti tal-Appell, ikkonfermat il-kostituzzjonalità tad-dispożizzjonijiet dwar il-blasfemija fil-Kodiċi Penali tax-Xarija u affermat l-ordni ta’ proċess ġdid;

C.

billi f’Novembru 2022, Yahaya Sharif-Aminu ressaq appell quddiem il-Qorti Suprema kontra l-kundanna tiegħu, fejn argumenta li l-liġi dwar il-blasfemija skont il-Kodiċi Penali tax-Xarija tal-Istat ta’ Kano tikser direttament il-Kostituzzjoni tan-Niġerja u t-trattati internazzjonali vinkolanti dwar id-drittijiet tal-bniedem; billi għadu l-ħabs;

D.

billi ħafna nies oħra sofrew ħsara minħabba l-liġijiet tan-Niġerja dwar il-blasfemija; billi fl-2022 l-istudenta Deborah Yakubu ġiet imħaġġra u msawta sal-mewt; billi Rhoda Jatau ġiet attakkata minn folla u għaddejja minn proċess kriminali mingħajr id-dritt għal pleġġ; billi l-umanista Mubarak Bala ġie kkundannat għal 24 sena ħabs;

E.

billi l-Patt Internazzjonali dwar id-Drittijiet Ċivili u Politiċi (ICCPR), li n-Niġerja hija parti għalih, jillimita l-piena kapitali għall-aktar reati serji; billi minkejja dan, ix-Xarija, ipprattikata f’mill-inqas 12-il stat fit-Tramuntana tan-Niġerja, timponi l-piena tal-mewt għall-blasfemija;

F.

billi l-liġijiet dwar il-blasfemija fin-Niġerja jiksru l-impenji internazzjonali tagħha b’rabta mad-drittijiet tal-bniedem, il-Karta Afrikana u l-Kostituzzjoni Niġerjana;