13.2.2018   

MT

Il-Ġurnal Uffiċjali tal-Unjoni Ewropea

C 54/81

1.

jenfasizza l-importanza tas-Suq Uniku biex tingħata spinta lit-tkabbir ekonomiku, jiżdied l-investiment, jogħla l-livell ta’ għajxien u jinħolqu l-impjiegi fir-reġjuni u l-bliet madwar l-UE;

2.

jenfasizza l-urġenza tat-tlestija tas-Suq Uniku għall-oġġetti u s-servizzi kif stipulat fl-Istrateġija tas-Suq Uniku u jinnota li ħafna mill-ostakli ekonomiċi l-aktar sinifikanti li fadal għadhom fil-qasam tas-servizzi;

3.

jenfasizza li s-servizzi huma komponent ewlieni tal-ekonomija Ewropea, u jgħoddu għal madwar 70 % tal-PGD kif ukoll tal-impjiegi; jirrimarka, madankollu, li s-settur tas-servizzi tal-UE huwa kkaratterizzat minn tkabbir bil-mod fil-produttività u kompetizzjoni dgħajfa, li jżommu lura l-potenzjal tiegħu; jenfasizza li t-tneħħija tal-ostakli għall-provvista transkonfinali tas-servizzi b’riżultat ta’ regoli u proċeduri nazzjonali diverġent tista’ tagħti lill-fornituri tas-servizzi u lill-konsumaturi aktar opportunitajiet biex jagħmlu użu sħiħ tal-potenzjal tas-suq intern; għalhekk jistieden lill-Kummissjoni Ewropea u lill-Istati Membri biex ikomplu jadottaw miżuri li jgħaġġlu l-kompetittività fis-settur tas-servizzi, li jżidu l-kompetizzjoni bejn l-intrapriżi u li jeliminaw l-ostakoli legali u proċedurali li jxekklu l-forniment transkonfinali ta’ servizzi;

4.

jisħaq li s-servizzi huma input intermedju importanti fl-ekonomija u li s-servizzi kompetittivi, b’mod partikolari s-servizzi tan-negozju, huma kruċjali għall-produttività u l-kompetittività fl-ispejjeż f’setturi oħra bħal dik tal-manifattura li huma vitali għall-ekonomiji lokali u reġjonali;

5.

jinnota li, għaxar snin wara l-adozzjoni tagħha, il-potenzjal tad-Direttiva dwar is-Servizzi biex jittejjeb il-moviment ħieles tas-servizzi għadu ma ntlaħaqx b’mod sħiħ u li l-fornituri f’firxa ta’ setturi tas-servizzi għadhom iħabbtu wiċċhom ma’ firxa wiesgħa ta’ ostakli meta huma jkunu jixtiequ jistabbilixxu ruħhom fi Stat Membru ieħor jew jipprovdi servizzi fuq bażi transkonfinali temporanja; iħeġġeġ lill-Kummissjoni u lill-Istati Membri biex ikomplu jadottaw miżuri li jeliminaw dawn l-ostakoli; jinnota li l-istimi jindikaw li l-indirizzar tal-ostakli għall-kummerċ transkonfinali u l-investiment fis-servizzi skont il-qafas diġà pprovdut mid-Direttiva dwar is-Servizzi jista’ jżid 1,7 % mal-PDG tal-UE;

6.

jilqa’ t-tħassib tal-Kummissjoni li jiżżarmaw ostakoli burokratiċi mhux ġustifikati fil-provvista tas-servizzi u jemmen li l-proposti jistgħu jagħtu kontribut sabiex jinħoloq Suq Uniku ġenwin fis-servizzi, li jista’ wkoll jagħti spinta lit-tkabbir ekonomiku, l-investiment u l-impjiegi fir-reġjuni u l-bliet tal-Ewropa; jenfasizza, madankollu, il-ħtieġa li jiġu rrispettati l-prinċipji tal-proporzjonalità u s-sussidjarjetà meta jiġi implimentat il-pakkett tas-servizzi;

7.

jenfasizza r-rabtiet li għandhom bejniethom id-diversi komponenti tal-pakkett u l-ħtieġa li jiġu kkunsidrati bħala parti minn sistema integrata sħiħa u li jiġu evalwati l-merti tal-proposti individwali f’dan il-kuntest;

8.

iqis li l-proposta għall-proċedura ta’ notifika għandha x’aktarx tiġi emendata fid-dawl tas-sentenza tal-Qorti Ewropea tal-Ġustizzja fil-Każ C-320/16 Uber France SAS li l-Avukat Ġenerali ta l-opinjoni preliminari tiegħu dwarha fl-4 ta’ Lulju 2017, billi stqarr li “L-Istati Membri jistgħu jipprojbixxu u jikkastigaw l-eżerċizzju illegali ta’ attività ta’ trasport bħal UberPop mingħajr ma jkun hemm bżonn li tiġi notifikata l-Kummissjoni bl-abbozz ta’ liġi bil-quddiem”;

9.

jindika li d-Direttiva dwar is-Servizzi tirrikjedi lill-Istati Membri jnaqqsu l-ostakli amministrattivi li jiskoraġġixxu lill-fornituri tas-servizzi milli joperaw b’mod transkonfinali iżda din ma kinitx effettiva bis-sħiħ f’dan ir-rigward;

10.

jilqa’ l-e-Card tas-servizzi l-ġdida bħala kontribut utli sabiex tiġi promossa l-mobbiltà tal-fornituri tas-servizzi, iżda jitlob kjarifika dwar sa liema punt l-e-Card tas-servizzi l-ġdida hija relatata ma’ skemi li diġà jeżistu bħas-Sistema ta' Informazzjoni tas-Suq Intern u l-Karta Professjonali Ewropea. Jemmen li l-e-Card tista’ tgħin biex jitnaqqsu l-kumplessità u l-ispejjeż amministrattivi għall-fornituri tas-servizzi transkonfinali meta jiġu sodisfati l-formalitajiet amministrattivi; l-SMEs, li huma s-sinsla tal-ekonomiji reġjonali u lokali, jintlaqtu b’mod partikolari hawnhekk peress li huma l-aktar li jintlaqtu mill-kumplessità amministrattiva meta joperaw b’mod transkonfinali;

11.

jopponi l-approċċ tat-trasferiment tar-responsabbiltà ewlenija għall-proċedura lill-awtoritajiet tal-Istat Membru tad-domiċilju safejn dan huwa f’kunflitt mal-prinċipju tal-Istat Membru ospitanti li jirregola d-Direttiva tas-Servizzi. Tabilħaqq, l-e-Card tas-servizzi ma għandhiex tipprevjeni jew tipperikola l-kontrolli li l-awtoritajiet pubbliċi rilevanti fl-Istat Membru ospitanti jrid iwettaq fuq l-attivitajiet ekonomiċi li jsiru fuq it-territorju tiegħu. Il-proposta dwar l-e-Card tas-servizzi kif ippreżentata mill-Kummissjoni tkun tippermetti lill-fornituri tas-servizzi biex jittrattaw esklussivament mal-Istat Membru ta’ oriġini bħala intermedjarju u jiġi armonizzat l-iskambju ta’ data abbażi tal-prinċipju tal-pajjiż ta’ oriġini.

12.

jistaqsi dwar l-impatt tal-proposta ta’ e-Card Ewropea tas-servizzi fuq il-karti tal-identità soċjali settorjali li diġà qed jiġu implimentati fuq l-inizjattiva tal-awtoritajiet pubbliċi kompetenti fl-Istati Membri jew tal-imsieħba soċjali;

13.

jiġbed l-attenzjoni għall-fatt li l-proposta ma tispeċifikax liema huma l-kriterji li l-Istat Membru ta’ oriġini għandu jivvaluta sabiex jiddetermina li fornitur tas-servizzi huwa stabbilit legalment fit-territorju tiegħu filwaqt li d-Direttiva 2014/67/UE tinkludi elementi fattwali sabiex tiddetermina jekk impriża ġenwinament twettaqx attivitajiet sostanzjali fl-Istat Membru inkwistjoni;

14.

ifakkar f’dan il-kuntest li l-ħruġ tal-formoli portabbli A1 b’rabta mal-istazzjonar tal-ħaddiema diġà xeħet dawl fuq ostakli potenzjali, marbuta ma’ dipendenza esklużiva fuq l-Istat Membru ta’ oriġini għall-validazzjoni tad-data dwar il-fornituri tas-servizzi li jidħlu, b’mod speċjali fil-każ ta’ ħaddiema indipendenti foloz/fittizji. F’dan ir-rigward, il-valutazzjoni tal-impatt li takkumpanja l-proposta li temenda d-Direttiva 96/71/KE dwar l-istazzjonar ta’ ħaddiema tiddikjara li: “Il-preċiżjoni tal-informazzjoni inkluża fid-dokumenti PD A1 ma tistax tiġi garantita minħabba fin-nuqqas ta’ kontrolli formali mill-awtoritajiet fil-pajjiżi li jibgħatu, fost affarijiet oħra.” (1)

15.

jinnota li xi karatteristiċi tal-e-card tas-servizzi bħal pereżempju l-prinċipju “ta’ darba biss” għas-sottomissjoni ta’ informazzjoni, il-perjodu ta’ validità indefinit tagħha, l-obbligu għall-Istati Membri biex jużaw l-informazzjoni li tinsab fl-e-card tas-servizzi mingħajr il-possibbiltà li tintalab prova tal-validità tal-informazzjoni pprovduta fi stadju aktar tard, u kif ukoll peress li proċeduri għal revoka restrittivi li jistgħu jirrikjedu deċiżjoni finali mill-qrati, jistgħu jxekklu l-kontroll tal-konformità mal-liġijiet nazzjonali u l-infurzar tad-drittijiet tal-ħaddiema u d-drittijiet tal-konsumaturi.

16.

jinnota li l-e-Card Ewropea tas-servizzi għandha tinkludi l-informazzjoni dwar il-kopertura tal-assigurazzjoni. Madankollu, il-validità mingħajr limiti ta' żmien tal-card timplika li ser ikun meħtieġ li l-informazzjoni tiġi komunikata darba biss, u dan jirriskja li jipperikola l-effettività tal-ispezzjonijiet u tal-kontrolli fl-Istati Membri ospitanti.

17.

jenfasizza l-fatt li l-e-Card tas-servizzi tkun disponibbli kemm għall-fornituri ta’ servizzi li jipprovdu servizzi transkonfinali fuq bażi temporanja kif ukoll għal dawk li jipprovdu servizzi billi jistabbilixxu fergħa, aġenzija jew uffiċċju fi Stat Membru ieħor;

18.

iqis li huwa importanti li, waqt li huwa obbligatorju għall-Istati Membri li jagħmluha disponibbli, l-e-Card hija volontarja għall-fornituri ta’ servizzi, kemm jekk huma individwi li jaħdmu għal rashom, kif ukoll jekk huma kumpaniji;

19.

jindika li, bħala strument volontarju, l-użu tal-e-Card tas-servizzi ser jiddependi fuq kemm turi li ġġib valur miżjud għall-fornituri tas-servizzi kif ukoll fuq l-isforzi tal-komunità tan-negozju u tal-awtoritajiet rilevanti fl-Istati Membri, inklużi dawk fil-livell reġjonali u lokali, sabiex jippromovu kemm jista’ jkun l-għarfien dwar l-e-Card u l-benefiċċji tagħha;

20.

huwa kritiku tal-approvazzjoni taċita fil-każ li ma jkun hemm l-ebda tweġiba mill-awtorità tal-Istat Membru ospitanti għal applikazzjoni minn fornitur tas-servizzi għal e-Card fil-perjodi ta’ żmien stabbiliti; awtorizzazzjoni ta’ approvazzjoni korrispondenti għandha titħassar mingħajr sostituzzjoni jew għallinqas b’perjodi xierqa ta' eżami u ta’ proċessar;

21.

jiddispjaċih li aspetti importanti tal-e-Card tas-servizzi, inklużi d-dettalji tal-informazzjoni li għandha tiġi inkluża fil-formola standard ta’ applikazzjoni u d-dokumenti li għandhom jiġu inklużi fl-applikazzjoni bħala evidenza, mhumiex inklużi fl-abbozz ta’ leġislazzjoni, iżda huma intiżi li jiġu speċifikati mill-Kummissjoni b’atti delegati; jiġbed l-attenzjoni lejn il-fatt li dan jista’ jeskludi lill-awtoritajiet reġjonali u lokali milli jgħidu l-fehma tagħhom dwar dawn il-kwistjonijiet importanti; jitlob li l-Kumitat Ewropew tar-Reġjuni jirċievi d-dokumenti kollha relatati ma’ dawn l-atti delegati fl-istess ħin li jirċievuhom l-esperti tal-Istati Membri, il-Parlament Ewropew u l-Kunsill u jkollu aċċess għal-laqgħat tal-gruppi ta’ esperti tal-Kummissjoni li jittrattaw it-tħejjija tal-atti delegati rilevanti sabiex ikun jista’ jressaq kwalunkwe kummenti neċessarji fi żmien xieraq;

22.

jinnota li l-kamp ta’ applikazzjoni tal-e-Card huwa limitat fl-ewwel stadju għas-servizzi tan-negozju u għas-servizzi tal-kostruzzjoni, setturi li huma ta’ importanza ekonomika partikolari iżda li t-tnejn għandhom kummerċ u investimenti transkonfinali limitati u tkabbir baxx tal-produttività, u li għalhekk jisgħu jibbenefikaw minn żieda fil-kompetizzjoni transkonfinali;

23.

jenfasizza li l-funzjonament tajjeb tas-sistema tal-e-Card tas-servizzi ser jistrieħ fuq il-kooperazzjoni bejn l-Istati Membri permezz tas-Sistema ta’ Informazzjoni tas-Suq Intern, li tinkludi l-awtoritajiet lokali u reġjonali, u dan jirrikjedi aktar użu tal-pjattaforma mill-awtoritajiet pubbliċi u aktar investiment fl-iżvilupp tagħha; waqt li jitqies ukoll li l-implimentazzjoni ta’ elementi importanti oħra tal-pakkett tas-servizzi, b’mod partikolari l-proċedura ta’ notifika, ser tiddependi mill-effikaċja tiegħu, jistieden lill-Kummissjoni biex tressaq pjan ta’ azzjoni għall-adattament tal-pjattaforma biex jiġu appoġġjati l-proċeduri meħtieġa;

24.

għaldaqstant jistieden lill-Kummissjoni tiżgura li s-sistema li tipproċessa l-kards elettroniċi tas-servizzi tkun tikkonforma mas-sistemi eżistenti tal-ipproċessar elettroniku fl-Istati Membri u tkun iffaċilitata l-interoperabiltà magħhom..

25.

jappella lill-Kummissjoni Ewropea tkompli testendi l-ambitu tal-e-Card tas-servizzi, sabiex fil-ġejjieni tkun disponibbli għal varjetà wiesgħa ta’ setturi, inklużi l-intrapriżi mikro u żgħar u kumpaniji innovattivi u b’rata għolja ta’ tkabbir;

26.

jappoġġja l-kunċett li l-fornituri tas-servizzi jintalbu jħallsu tariffa sabiex tinħarġilhom e-Card tas-servizzi abbażi li l-livelli tat-tariffa ma jkunux għoljin b’mod sproporzjonat; jirrakkomanda li l-Kummissjoni tissorvelja mill-qrib u tirrapporta dwar il-livelli tat-tariffi li jiġu ċċarġjati mill-Istati Membri minħabba li dawn jistgħu jkunu fattur determinanti importanti tal-użu tal-e-Card bħala strument volontarju;

27.

iqis li karatteristika qawwija tal-e-Card tas-servizzi mill-perspettiva tal-fornituri tas-servizzi hija d-dispożizzjoni fejn l-awtoritajiet fl-Istati Membri m’għandhomx jirrikjedu li detentur tal-e-Card jipprovdi kwalunkwe informazzjoni li diġà tkun tinsab fl-e-Card, inkluż għall-għoti ta’ kuntratt pubbliku, kompetizzjoni dwar id-disinn jew konċessjoni, ħolqien ta’ sussidjarji jew reġistrazzjoni ta’ fergħat taħt il-liġi tal-kumpaniji jew reġistrazzjoni ma’ skemi ta’ assigurazzjoni soċjali obbligatorja, peress li dan ser inaqqas l-ispejjeż amministrattivi ta’ konformità tal-fornituri tas-servizzi b’mod ġenerali, u b’hekk il-Card tkun attraenti għalihom u tħeġġeġ l-użu tagħha;

28.

jenfasizza li dan jista’ jkollu implikazzjonijiet prattiċi għall-proċeduri organizzattivi u elettroniċi, eż. dawk għall-akkwist pubbliku fl-awtoritajiet reġjonali u lokali, u jista’ jkun hemm bżonn perjodi transitorji biex jippermettu li s-sistemi jiġu adattati bla xkiel sabiex jilħqu r-rekwiżiti l-ġodda;

29.

jappoġġja d-dispożizzjonijiet biex tiġi ffaċilitata l-konformità mal-formalitajiet amministrattivi relatati mal-istazzjonar tal-persunal u dawk li jiffaċilitaw il-kopertura ta’ assigurazzjoni għal servizzi pprovduti minn naħa għal oħra tal-fruntieri hekk kif dawn ser iżidu l-attraenza tal-e-Card għall-fornituri tas-servizzi u jħeġġu l-użu tagħha;

30.

jenfasizza li l-leġislazzjoni, f’konformità mad-dispożizzjonijiet tad-Direttiva dwar is-Servizzi, ma taffettwax id-definizzjoni jew l-organizzazzjoni tas-servizzi ta’ interess ekonomiku ġenerali u ma tapplikax għal servizzi mhux ekonomiċi ta’ interess ġenerali, servizzi li huma spiss ipprovduti fil-livell lokali u reġjonali, u ma taffettwax il-liġi tax-xogħol jew il-kundizzjonijiet tal-impjiegi;

31.

jistieden lill-Kummissjoni biex tintroduċi sistemi ta’ monitoraġġ effiċjenti tal-e-Card tas-servizzi sabiex jiġi evitat li jkun hemm kompetizzjoni inġusta u frodi. L-infurzar strett ta’ dawn il-verifiki, li mhumiex ibbażati biss fuq sempliċi monitoraġġ tad-data elettronika, inaqqas il-possibilità tad-dumping soċjali u r-rikors għal xogħol mhux iddikjarat;

32.

huwa dubjuż jekk jinkisbx il-bilanċ ġust bejn il-benefiċċji assoċjati mal-introduzzjoni ta’ e-Card tas-servizzi għall-fornituri tas-servizz u l-piż ammnistrattiv b’riżultat tagħha għall-awtoritajiet kompetenti tal-Istati Membri, inklużi dawk fil-livelli reġjonali u lokali. Dan huwa wkoll minħabba l-fatt li diġà hemm punt uniku ta’ kuntatt fl-Istati Membri kollha għal kwalunkwe mistoqsija u problema dwar il-forniment transkonfinali tas-servizzi, u l-awtoritajiet tal-Istati Membri jistgħu jiskambjaw informazzjoni permezz tal-IMI. Jiddispjaċih, barra minn hekk, li l-proposta ma tispeċifikax b’mod ċar liema obbligi amministrattivi fuq il-fornituri tas-servizzi ser isiru superfluwi għad-detenturi ta’ e-Card. F’dan l-isfond, il-KESE jemmen li l-e-Card tas-servizzi hija problematika mil-lat tal-prinċipju tal-proporzjonalità.

33.

jappoġġja l-prinċipji li r-regoli nazzjonali li jillimitaw il-libertà tal-istabbiliment u l-libertà tal-forniment ta’ servizzi għandhom ikunu nondiskriminatorji fir-rigward tan-nazzjonalità jew ir-residenza, proporzjonati u ġustifikati minn raġunijiet aktar importanti relatati mal-interess pubbliku;

34.

jappoġġja l-passi li għandhom l-għan li titjieb il-proċedura ta’ notifika għas-servizzi hekk kif l-esperjenza bl-implimentazzjoni tad-Direttiva dwar is-Servizzi tindika li l-proċedura eżistenti hija ineffettiva peress li l-kamp ta’ applikazzjoni tal-obbligu ta’ notifika mhuwiex ċar, u għalhekk hija indirizzata b’mod differenti mill-Istati Membri, u l-partijiet interessati ma għandhomx aċċess għan-notifiki;

35.

iqis li kwalunkwe riforma għandha tirrispetta d-dritt tal-Istati Membri li jirregolaw is-servizzi fit-territorju tagħhomm, soġġett għal konformità mal-prinċipji stabbiliti fid-Direttiva dwar is-Servizzi;

36.

jinnota li l-problemi identifikati mill-Kummissjoni Ewropea, bħal pereżempju n-nuqqas ta’ notifika tal-miżuri kollha, jistgħu jiġu evitati anke permezz tat-titjib tas-sistema attwali ta’ notifika taħt id-Direttiva dwar is-Servizzi. Il-valur miżjud tal-proċedura ta’ notifika l-ġdida li timponi aktar restrizzjonijiet fuq il-leġislatur nazzjonali, inkluż fil-livell reġjonali u lokali, u li hija aktar ikkumplikata biex tiġi implimentata, għandu jiġi dubitat fid-dawl tal-prinċipji tas-sussidjarjetà u tal-proporzjonalità;

37.

jilqa’ l-kjarifika dwar il-miżuri speċifiċi li l-Istati Membri huma obbligati li jinnotifikaw u l-informazzjoni li huma jridu jissottomettu f’dan ir-rigward;

38.

jappoġġja iktar trasparenza iżda jaħseb li għandha ssir referenza iżjed espliċita għall-opportunitajiet speċifiċi li l-partijiet interessati jingħataw sabiex jikkontribwixxu kummenti matul il-perjodu ta’ konsultazzjoni;

39.

jitlob li atti leġislattivi b’rabtiet lokali biss ikunu esklużi mill-kamp ta’ applikazzjoni tad-Direttiva;

40.

huwa tal-fehma li l-konsultazzjoni m'għandhiex tfixkel lill-Istati Membri fl-adozzjoni tal-miżuri inkwistjoni;

41.

huwa tal-fehma li t-twissija tal-Kummissjoni skont l-Artikolu 6(1) għandha tistabbilixxi fid-dettall ir-raġunijiet għaliex tqis li l-abbozz tal-miżura inkwistjoni huwa inkompatibbli mad-Direttiva dwar is-Servizzi u kwalunkwe suġġeriment li jista’ jkollha għal bidliet għall-abbozz ta’ miżura li għandhom jegħlbu t-tħassib tagħha; jissuġġerixxi li l-abbozz ta’ direttiva jkun emendat biex jipprovdi għal dan;

42.

iqis li, wara li tinħareġ twissija, il-Kummissjoni għandha tkun meħtieġa tidħol fi djalogu mal-korpi kompetenti rilevanti, inkluż fil-livell reġjonali u lokali;

43.

huwa mħasseb li d-Deċiżjoni proposta taħt l-Artikolu 7 tillimita bla bżonn il-libertà tal-leġislaturi fil-livell nazzjonali, reġjonali u lokali; iqis li din għandha tkun pjuttost Rakkomandazzjoni mhux vinkolanti li ma tipprevenix lil-leġislaturi nazzjonali u reġjonali milli jikkompletaw il-proċess leġislattiv waqt li titqies ir-Rakkomandazzjoni tal-Kummissjoni; jinnota li l-Kummissjoni għandha s-setgħa li tikkontesta l-legalità ta’ leġislazzjoni fis-seħħ fil-Qorti Ewropea tal-Ġustizzja u dan jirrappreżenta sanzjoni potenzjal importanti li l-leġislaturi nazzjonali u reġjonali, li jkunu rċevew notifika ta’ twissija/Rakkomandazzjoni mingħand il-Kummissjoni fir-rigward l-inkompatibbiltà, ċertament iqisu;

44.

iqis li l-kjarifiki li l-abbozz ta’ direttiva jipprevedi fir-rigward tal-kamp ta’ applikazzjoni tal-miżuri li għandhom jiġu notifikati u l-informazzjoni li għandha tiġi ppreżentata, flimkien ma’ konsultazzjoni mtejba, mekkaniżmu ta’ twissija u l-provvediment għal Rakkomandazzjoni tal-Kummissjoni rigward l-inkompatibbiltà, għandhom ikunu biżżejjed biex jipprovdu proċedura ta’ notifika mtejba li hija effettiva filwaqt li jiġu rrispettati l-prerogattivi tal-leġislaturi nazzjonali u reġjonali;

45.

jissuġġerixxi li l-Kummissjoni tħejji l-istimi ta’ żieda annwali fl-għadd ta’ notifiki li tistenna li tirċievi bħala riżultat tal-proċedura ta’ notifika ġdida sabiex, jekk ikun meħtieġ, tkun tista’ tippjana li jkollha l-kapaċità li twieġeb b’mod effettiv għall-volumi mistennija fil-perjodi taż-żmien previsti fl-abbozz ta’ leġislazzjoni;

46.

jenfasizza li s-servizzi professjonali huma ekonomikament importanti ħafna, li jammontaw għal 22 % tal-persuni impjegati fl-UE kollha, jew 47 miljun impjieg;

47.

jenfasizza li r-regolazzjoni tas-servizzi professjonali tibqa’ prerogattiva tal-Istati Membri u li din hija kwistjoni għall-Istati Membri, jekk hux fil-livell nazzjonali, reġjonali jew lokali, li jiddeċiedu jekk u kif għandhom jirregolaw professjoni fi ħdan il-limiti tal-prinċipji tan-nondiskriminazzjoni u tal-proporzjonalità;

48.

jinnota li r-regolamentazzjoni tas-servizzi professjonali tista’ tkun fil-forma ta’ regolament tal-Istat jew awtoregolamentazzjoni mill-korpi professjonali u li, f’ħafna każijiet, ir-regolazzjoni hija mwettqa fil-livelli reġjonali u lokali fl-Istati Membri, u li dan iwassal għal xenarju kumpless u mifrux ħafna fejn l-Istati Membri jridu jissodisfaw l-obbligi tagħhom li jiżguraw valutazzjoni tal-proporzjonalità, inkluż f’dak li jikkonċerna l-involviment tal-partijiet kollha interessati li huma involuti direttament;

49.

jirrikonoxxi li hemm skrutinju irregolari tar-regolamentazzjoni tal-professjonijiet madwar l-UE u li dan għandu impatt negattiv fuq il-forniment ta’ servizzi u l-mobilità tal-professjonisti; jirrikonoxxi li huwa mixtieq li jiġi żgurat qafas legali aktar koerenti fil-livell tal-UE sabiex tiġi vvalutata l-proporzjonalità ta’ rekwiżiti ġodda jew emendati dwar l-aċċess għal jew l-eżerċitar ta’ professjoni regolata, li tinkorpora l-ġurisprudenza tal-Qorti Ewropea tal-Ġustizzja;

50.

iqis li huwa importanti li l-proposta tħalli d-deċiżjonijiet dwar x’għandu jiġu rregolat u kif f’idejn l-Istati Membri u l-korpi kompetenti tagħhom fil-livell reġjonali u lokali iżda għandu jiġi żgurat li dawn id-deċiżjonijiet huma bbażati fuq l-evidenza u magħmula wara valutazzjoni trasparenti u oġġettiva li tiġi applikata b’mod uniformi madwar l-Istati Membri u li tqis l-għanijiet identifikati ta’ interess pubbliku;

51.

huwa tal-fehma li s-sett komprensiv ta’ kriterji stipulati fl-Artikolu 6 għandhom ikunu kkunsidrati bħala indikattivi, peress li mhux il-kriterji kollha jistgħu jiġu applikati jew għandhom l-istess importanza f’kull każ individwali; iqis li, filwaqt li l-valutazzjonijiet tal-proporzjonalità għandhom isiru bir-reqqa, ikunu oġġettivi u bbażati fuq l-evidenza, għandhom ikunu wkoll proporzjonati, peress li l-approċċ “wieħed tajjeb għal kulħadd” jista’ jkun ta’ piż bla bżonn f’ħafna ċirkustanzi. Ir-rekwiżiti tal-Artikolu 6 huma eċċessivi mil-lat tal-kamp ta’ applikazzjoni u l-kumplessità tagħhom;

52.

jilqa’ b’sodisfazzjon id-dispożizzjonijiet biex tingħata opportunità lill-partijiet interessati biex jikkontribwixxu l-fehmiet tagħhom dwar id-dispożizzjonijiet leġislattivi, regolatorji jew amministrattivi ġodda li jillimitaw l-aċċess għal jew l-eżerċitar ta’ professjonijiet regolati u jqis li t-trasparenza u l-involviment tal-partijiet interessati kollha huma vitali biex tiġi żgurata regolamentazzjoni xierqa;

53.

jirrimarka li r-regoli l-ġodda dwar il-proporzjonalità, li jinvolvu l-monitoraġġ ta’ dispożizzjonijiet legali, regolatorji u amministrattivi fuq bażi regolari u t-twettiq ta’ testijiet tal-proporzjonalità bir-reqqa, oġġettivi u bbażati fuq l-evidenza, inkluż permezz tal-involviment ta’ bordijiiet indipendenti ta’ skrutinju u b’involviment akbar tal-partijiet interessati, ser iżidu x-xogħol u l-ispejjeż tal-awtoritajiet tal-Istati Membri, anke fil-livell reġjonali u lokali. Dan japplika b’mod partikolari għall-Artikolu 4, li skontu mhux biss l-introduzzjoni ta’ dispożizzjonijiet ġodda fir-regolamentazzjoni tal-professjonijiet, iżda wkoll l-emendi għad-dispożizzjonijiet eżistenti, ikollhom jiġu evalwati mil-lat tal-proporzjonalità tagħhom, li huwa rekwiżit li jista’ jkun ikkunsidrat eċċessiv;

54.

jinnota l-isforzi tal-Kummissjoni biex tiżgura li r-regolazzjoni tal-professjonijiet hija adatta għall-iskop billi l-Istati Membri jitħeġġu jirrevedu jekk ir-rekwiżiti professjonali tagħhom humiex meħtieġa biex jiġu sodisfati l-għanijiet nazzjonali tal-politika pubblika;

55.

jilqa’ b’sodisfazzjon il-gwida għar-riformi nazzjonali fir-regolamentazzjoni dwar il-professjonijiet, li potenzjalment tista’ tkun utli ħafna biex l-Istati Membri jiġu megħjuna jadattaw l-oqfsa regolatorji tagħhom għall-professjonijiet b’potenzjal għoli ta’ tkabbir u impjiegi, inklużi l-periti, l-avukati, il-kontabilisti, l-aġenti tal-brevetti, l-aġenti tal-proprjetà immobbli u l-gwidi turistiċi;

56.

jinnota li l-gwida hija maħsuba biex tikkomplementa l-evalwazzjonijiet tas-Semestru Ewropew u iqis li jista’ jkun hemm mertu fl-integrazzjoni tagħha fil-proċess tas-Semestru Ewropew;

57.

jikkunsidra li l-aspetti tal-proposti fil-pakkett tas-servizzi jqajmu kwistjonijiet importanti rigward is-sussidjarjetà u l-proporzjonalità (2); jiġbed l-attenzjoni lejn il-fatt li diversi parlamenti nazzjonali u reġjonali ħarġu opinjonijiet motivati li jindikaw il-kwistjonijiet tas-sussidjarjetà u tal-proporzjonalità, inkluż tħassib dwar l-interferenza potenzjali fi proċeduri leġislattivi nazzjonali;

58.

jinsab imħasseb li l-proposti għall-e-Card tas-servizzi, il-proċedura ta’ notifika u t-test tal-proporzjonalità ser jimponu piżijiet amministrattivi addizzjonali fuq l-awtoritajiet kompetenti fl-Istati Membri, inklużi l-awtoritajiet reġjonali u lokali, b’konsegwenza fuq il-kapaċità amministrattiva u l-implikazzjonijiet baġitarji.