14.7.2015   

MT

Il-Ġurnal Uffiċjali tal-Unjoni Ewropea

C 230/39

Relatur:

is-Sur JÍROVEC

Korelatur:

is-Sur PESCI

1.1.

Sabiex jiġu massimizzati l-benefiċċji offruti mill-prodotti tal-injam fil-bilanċ tal-karbonju u tiżdied il-kompetittività tal-industrija Ewropea tax-xogħol fl-injam (1) u l-kapaċità tagħha biex tmexxi l-innovazzjoni, il-Kumitat Ekonomiku u Soċjali Ewropew fassal ir-rakkomandazzjonijiet li ġejjin.

1.2.

Il-KESE jirrikonoxxi li l-leġislazzjoni Ewropea u nazzjonali qed ikollha impatt kbir fuq l-industriji tax-xogħol fl-injam. Għaldaqstant, il-KESE jistieden lill-Istati Membri biex jesploraw l-opportunitajiet kollha relatati mal-użu tal-injam bħala materjal li mhuwiex ta’ ħsara għall-ambjent sabiex jagħtu spinta lill-kompetittività ta’ dan is-settur, jippromovu l-impjieg u jappoġġjaw l-investiment fir-riċerka u l-innovazzjoni.

1.3.

Il-KESE jappella lill-Kummissjoni Ewropea ħalli, b’konsultazzjoni mal-partijiet interessati, tfassal linji gwida Ewropej dwar il-provvista tal-injam ħalli l-provvista tal-injam tiżdied u jiġi promoss użu sostenibbli tas-sorsi tal-injam. Għandhom ikunu inklużi l-prinċipji tal-effiċjenza fl-użu tar-riżorsi. Ir-rakkomandazzjonijiet stipulati fil-gwida ta’ prattika tajba dwar il-mobilizzazzjoni sostenibbli tal-injam fl-Ewropa (2010) għandhom jiġu kkunsidrati u fejn meħtieġ żviluppati.

1.4.

Il-KESE jfakkar fl-importanza li jiġu esklużi “palits u injam li jiġi rkuprat wara l-użu” mid-definizzjoni ta’ “bijomassa terzjarja”.

1.5.

Kif il-KESE diġà rrikonoxxa fl-Opinjoni tiegħu dwar “L-opportunitajiet u l-isfidi għal settur Ewropew tax-xogħol fl-injam u tal-għamara iktar kompetittiv”, adottata f’Ottubru 2011 (2) u b’konformità mal-prinċipji stipulati fil-Komunikazzjoni riċenti tal-UE dwar “Tranżizzjoni għal ekonomija ċirkolari: programm ta’ skart żero għall-Ewropa”, il-KESE jenfasizza l-fatt li l-prinċipju tal-‘użu kaskata’ (użu, użu mill-ġdid, riċiklaġġ, irkupru tal-enerġija) – meta dan ikun teknikament fattibbli b’konformità ma’ karatteristiċi nazzjonali u reġjonali speċifiċi – jirrappreżenta l-aqwa mod biex jiġi massimizzat l-użu effiċjenti ta’ riżorsi tal-injam. Il-KESE huwa sodisfatt li wara t-talba tiegħu għall-għarfien tal-importanza tal-prinċipju “kaskata” tal-injam, dan il-prinċipju ġie traspost f’diversi dokumenti tal-UE bħal “Rinaxximent Industrijali Ewropew”, “Strateġija ġdida tal-UE għall-Foresti”, u d-dokument ta’ ħidma tal-Persunal tal-Kummissjoni “A Blueprint for the EU forest-based industries (woodworking, furniture, pulp & paper manufacturing and converting, printing)” li jakkompanja l-Komunikazzjoni dwar “Strateġija ġdida tal-UE għall-Foresti: għall-foresti u s-settur ibbażat fuq il-foresti”. Madankollu, il-Kumitat ma jistax jappoġġja l-idea ta’ regoli legalment vinkolanti u huwa favur approċċ ibbażat fuq is-suq miftuħ u l-libertà tal-parteċipanti tas-suq.

1.6.

L-opzjonijiet tal-ġestjoni għall-materjali tal-kostruzzjoni għandhom jinkludu miżuri sabiex jiġi evitat li materjali ta’ riċiklaġġ bħall-injam jintremew f’miżbla. Il-KESE jitlob lill-Kummissjoni tal-UE u lill-partijiet interessati sabiex jiddefinixxu linji gwida u rakkomandazzjonijiet dwar il-ġbir tal-iskart tal-injam u soluzzjonijiet għat-trattament tal-injam wara l-użu.

1.7.

Il-KESE jitlob lill-Kummissjoni tal-UE biex tintroduċi regola li tirrifletti sew il-karatteristiċi akustiċi ta’ spazji magħluqa, peress li l-injam jista’ jkollu rwol essenzjali fl-iżolament akustiku. Fil-fatt, l-injam għandu l-kapaċità jiżola kmamar b’mod akustiku minn ħsejjes esterni u jnaqqas il-ħin ta’ riverberazzjoni. Għandhom jiġu esplorati l-opportunitajiet relatati mal-applikazzjonijiet tal-injam.

1.8.

Il-KESE jitlob lill-Istati Membri u lill-partijiet interessati sabiex jiddefinixxu pjani ta’ azzjoni nazzjonali mfassla biex iżidu l-użu tal-injam fil-kostruzzjoni u l-infrastrutturi ekoloġiċi. L-awtoritajiet lokali għandhom ikunu direttament involuti fl-implimentazzjoni ta’ dawn il-pjani ta’ azzjoni.

1.9.

Il-KESE, billi jirrikonoxxi li l-injam mhuwiex daqstant familjari fost il-bennejja u l-periti daqs materjali oħra, jistieden lill-Istati Membri sabiex jistabbilixxu inizjattivi għall-promozzjoni ta’ kultura tal-injam. Barra minn hekk, ir-rappreżentanti tal-industriji Ewropej tax-xogħol fl-injam u l-imsieħba soċjali Ewropej għandhom jiddefinixxu kampanji nazzjonali koordinati sabiex ipinġu stampa aktar attraenti tas-settur.

2.1.

L-industriji Ewropej tax-xogħol fl-injam jiġġeneraw introjtu annwali ta’ madwar EUR 122 biljun fuq valur ta’ produzzjoni ta’ aktar minn EUR 115-il biljun. Skont il-Eurostat, fl-2012 l-industriji tax-xogħol fl-injam kienu jammontaw għal aktar minn 3 11  000 kumpanija. Madwar 1 26  000 kumpanija kienu attivi wkoll fin-negozju tal-għamara. Fl-industriji tax-xogħol tal-injam stricto senso, l-industrija fejn jisserraw l-injam kienet magħmula minn madwar 40  000 kumpanija, filwaqt li s-sottosetturi l-oħra tal-prodotti tax-xogħol fl-injam kienu jammontaw għal madwar 1 45  000 kumpanija. Minkejja t-titjib li sar, dawn iċ-ċifri ma jirriflettux is-sitwazzjoni reali peress li mhux bilfors qed jitqiesu l-kumpaniji ż-żgħar, skont ir-rappurtar tal-Istat Membru. Fis-settur tal-għamara u tal-elementi tal-kostruzzjoni, l-għadd ta’ kumpaniji żgħar huwa konsiderevoli. Għaldaqstant, l-għadd reali tal-kumpaniji jista’ jiġi stmat li hu aktar minn 3 75  000 kumpanija.

2.2.

Fl-2012, is-settur tax-xogħol fl-injam esperjenza tnaqqis kbir fl-għadd ta’ impjiegi madwar l-UE kollha. It-tnaqqis medju ammonta għal 4,4 %, iżda ċ-ċifri varjaw minn -3,2 % fil-Ġermanja għal saħansitra -13,7 % fi Spanja. Il-Kroazja u d-Danimarka wrew l-akbar żidiet fl-għadd ta’ impjiegi filwaqt li Spanja (-13,7 %), Ċipru (-13,1 %) u s-Slovakkja (-11,5 %) esperjenzaw l-akbar tnaqqis fl-2012.

Il-politiki Ewropej u nazzjonali għandhom impatt kbir fuq il-kompetittività tas-settur tax-xogħol fl-injam. Kif ġie enfasizzat fir-Rapport dwar il-kompetittività tal-UE għall-2014, l-ispejjeż tal-produzzjoni, ix-xogħol u l-materja prima għandhom tendenza jkunu ogħla fl-Ewropa milli f’ħafna reġjuni oħra, li jwassal għal riskju għoli ta’ delokalizzazzjoni għall-partijiet kbar tas-settur. Għaldaqstant, l-Ewropa għandha titlob biex il-prodotti li jidħlu fis-suq tal-UE jkollhom l-istess standards soċjali, ambjentali u ta’ sigurtà bħal dawk prodotti fl-Ewropa. Barra minn hekk, il-KESE jenfasizza l-fatt li s-settur tax-xogħol fl-injam Ewropew ikompli jiffaċċja żidiet sinifikanti fl-ispejjeż tal-produzzjoni, b’mod speċjali fir-rigward tar-reżini u l-enerġija. L-ispejjeż tal-enerġija Ewropea huma tliet darbiet ogħla minn dawk fl-Istati Uniti.

2.3.

L-iżvilupp tal-enerġija rinnovabbli u s-sussidji relatati qed inaqqas id-disponibbiltà tal-materji primi tal-injam u qed iżid il-prezz tagħhom. Fl-2012, madwar 15 % jew 182 miljun metri kubiċi tal-injam kollu maħsud fir-reġjun tal-KEE kien stmat bħala karburant mill-injam. Mill-aktar Inkjesta Konġunta dwar l-Enerġija mill-Injam riċenti tal-KEE/FAO (JWEE 2011), jidher li l-enerġija mill-injam hija l-komponent prinċipali tal-enerġija rinnovabbli, li tammonta għal 38,4 % tas-sorsi tal-enerġiji rinnovabbli kollha. Skont l-istudju Ewropew riċenti dwar “Il-provvista u d-domanda tal-materja prima tal-injam għall-industriji tal-ipproċessar tal-injam” (“Study on the wood raw material supply and demand for the EU wood-processing industries”), ikkummissjonat mill-Kummissjoni Ewropea għall-Indufor (3), “l-ammont ta’ injam użat għal skopijiet ta’ enerġija fl-UE ikun ekwivalenti għall-ammont totali ta’ injam maħsud fil-preżent kieku kellha tintlaħaq il-mira tal-enerġija rinnovabbli sal-2020. Sal-2016 ser ikun hemm 63 Mm3 ta’ injam inqas meta mqabbla mar-rekwiżiti tal-injam antiċipati mill-Istati Membri tal-UE fil-Pjani ta’ Azzjoni Nazzjonali tagħhom dwar l-Enerġija Rinnovabbli.”

2.4.

Filwaqt li jqis il-Komunikazzjoni Ewropea l-ġdida dwar il-qafas tal-enerġija u l-klima 2030, u d-domanda biex jiżdied is-sehem tal-enerġija rinnovabbli għal mill-inqas 27 % sal-2030, il-KESE jqis li huwa essenzjali li jiġu kkunsidrati modi differenti kif tittejjeb il-mobilizzazzjoni tal-injam fl-UE, pereżempju billi jiġu kkunsidrati r-rakkomandazzjonijiet fil-Good practice guidance on the sustainable mobilisation of wood in Europe (Linji gwida ta’ prattika tajba dwar il-mobilizzazzjoni sostenibbli tal-injam fl-Ewropa), sabiex jiġu identifikati soluzzjonijiet biex jiġi evitat kwalunkwe tfixkil tal-kompetizzjoni bejn utenti differenti tar-riżorsi tal-bijomassa.

2.5.

Bil-kunsiderazzjoni ta’ dan, il-KESE jistieden lill-Istati Membri biex jivvalutaw l-ammont tal-bijomassa tal-injam fil-pajjiż jew ir-reġjun li huwa bla dubju disponibbli għall-użu tal-enerġija u l-volumi li l-industrija tax-xogħol fl-injam diġà tuża bħala materja prima.

2.6.

Barra minn hekk, il-KESE jiddeplora l-persistenza f’bosta Stati Membri ta’ dispożizzjonijiet li jillimitaw l-użu tal-injam f’bini ta’ ħafna sulari kif ukoll regolamenti diskriminatorji dwar in-nirien. Ir-regolamenti dwar in-nirien huma l-ostaklu ewlieni għall-użu tal-injam fil-bini f’ħafna pajjiżi. L-istandards Ewropej għas-sigurtà kontra n-nirien fil-bini sar qbil dwarhom, iżda s-sikurezza kontra n-nirien tibqa’ responsabbiltà nazzjonali. Dawn ir-regolamenti għandhom jitneħħew immedjatament peress li dawn jirrappreżentaw biċ-ċar ostakli tas-suq għall-espansjoni tal-prodotti tal-injam fis-settur tal-kostruzzjoni (4).

2.7.

Fl-aħħar nett, il-KESE jiddeplora l-esklużjoni tas-setturi Ewropej tat-twavel b’bażi ta’ injam u ta’ fejn jiġi sserrat l-injam mil-lista tas-setturi li għadhom jiġu meqjusa bħala vulnerabbli għar-rilaxx tal-karbonju. It-tneħħija ta’ dawn is-setturi mil-lista probabbilment ser tintensifika d-delokalizzazzjoni li diġà qed isseħħ tas-setturi ta’ manifattura hawn fuq imsemmija lejn pajjiżi barra mill-UE. Iż-żamma taż-żewġ setturi fil-lista hija essenzjali sabiex jiġi limitat l-impatt negattiv tal-pressjoni kompetittiva li qed isofru l-kumpaniji kollha minħabba ż-żidiet kbar ħafna fil-prezzijiet tal-injam li ġejjin mill-kompetizzjoni mas-settur tal-enerġija tal-bijomassa. Mill-2008 sal-2013, is-settur Ewropew tat-twavel b’bażi tal-injam waħdu għalaq 51 impjant, li rriżulta f’telf tal-kapaċità ta’ 10  386 Mm3. Uħud minn dawn il-linji li ngħalqu żżarmaw u reġgħu ntramaw barra mill-fruntieri tal-Unjoni Ewropea. Iż-żamma tal-industriji tal-manifattura fi ħdan il-fruntieri Ewropej għandha tkun prijorità għal dawk kollha li jfasslu l-politika u b’mod partikolari għall-Kummissjoni Ewropea. Għaldaqstant, id-direttorati ġenerali rilevanti tal-Kummissjoni tal-UE huma mħeġġa jieħdu miżuri sabiex jiggarantixxu l-kompetittività tal-industriji Ewropej u jevitaw id-delokalizzazzjoni tas-settur ta’ manifattura.

2.8.

Miżura effettiva biex tiżgura l-kompetittività tal-industrija tal-Ewropa u tilqa’ kontra d-delokalizzazzjoni tal-produzzjoni tista’ tkun taxxa ġdida tal-enerġija/karbonju li twaqqaf id-diskriminazzjoni tal-produtturi Ewropej.

3.1.

It-tisħin globali jikkostitwixxi tħassib politiku kbir. Fil-fatt, dan għandu impatti serji fuq is-saħħa tal-bniedem u r-riżorsi naturali. L-għażliet li nagħmlu dwar il-materjali li nużaw jista’ jkollhom effett sinifikanti fuq l-emissjonijiet tad-diossidu tal-karbonju li huma waħda mill-kawżiet ewlenin tat-tisħin globali. It-terminoloġija ta’ prodotti “ekoloġiċi” u/jew “mhux ta’ ħsara għall-ambjent” qed jiġu aċċettati aktar fil-wisa’ fost il-produtturi u l-konsumaturi. Fl-istess ħin, qed jiġu stabbiliti politiki nazzjonali u Ewropej sabiex iħeġġu dawn il-prodotti. Il-KESE jqis li l-LCA (5) (il-valutazzjonijiet taċ-ċiklu tal-ħajja – Life-Cycle Assessments) jirrappreżentaw l-għodda ta’ ġestjoni ambjentali adegwata għall-futur.

3.2.

L-Ewropa tista’ tnaqqas b’mod drastiku l-emissjonijiet tas-CO2 billi żżid il-bir ta’ karbonju li nħoloq mill-foresti tagħha (billi tiġi ottimizzata l-ġestjoni tagħhom) u billi jiżdied l-użu ta’ prodotti tal-injam li ġew prodotti b’mod sostenibbli. Huwa xjentifikament ippruvat li l-użu tal-prodotti tal-injam fil-kostruzzjoni u l-ħajja ta’ kuljum għandu effett pożittiv fuq il-klima. L-ammont ta’ karbonju maħżun fis-siġar u fi prodotti tal-injam relatati jiddependi mill-ispeċi tas-siġra, il-kundizzjonijiet ta’ tkabbir (l-ambjent), l-età tas-siġra u d-densità tas-siġar tal-madwar. Madankollu, intwera li jekk jiġi sostitwit metru kubiku ta’ injam b’materjali oħra ta’ kostruzzjoni, dan jirriżulta f’medja sinifikanti ta’ 0,75-1t fi ffrankar ta’ CO2. Barra minn hekk, 1 m3 ta’ injam jaħżen 0,9 t ta’ CO2.

3.3.

Studju riċenti mmexxi mill-Università ta’ Yale, bit-titlu “Carbon” fossil fuel and biodiversity mitigation with wood and forests (6)" (Il-karbonju, il-karburanti fossili u l-mitigazzjoni tal-bijodiversità bl-injam u l-foresti) skopra li l-użu ta’ aktar injam fil-kostruzzjoni tal-bini u tal-pontijiet inaqqas sostanzjalment l-emissjonijiet globali tad-diossidu tal-karbonju u l-konsum tal-karburanti fossili. Ir-riċerkaturi skoprew li żieda fl-użu tal-prodotti tal-injam għall-ekwivalenti ta’ 34 % ikollha effetti profondi u pożittivi. Bejn 14 % u 31 % tal-emissjonijiet tas-CO2 jistgħu jiġu evitati billi s-CO2 jinħażen fiċ-ċelluloża u l-linjin tal-prodotti tal-injam.

3.4.

Il-KESE jitlob lill-Kummissjoni Ewropea biex tappoġġja lill-Istati Membri u lis-settur Ewropew tal-forestrija sabiex jidentifikaw u jistabbilixxu miżuri, u possibbilment inċentivi għall-użu ta’ prodotti tal-injam maħsud b’ċikli tal-ħajja twal (7). Iktar ma jdum jintuża l-injam, u jintuża mill-ġdid, iktar idum jaħżen fih id-diossidu tal-karbonju. L-iskart tal-materjal mill-injam (stricto senso) jista’ jiġi minimizzat prinċipalment peress li l-partijiet kollha tal-injam jistgħu jintużaw u jintużaw mill-ġdid b’mod effiċjenti, filwaqt li fl-aħħar nett dejjem jista’ jinħaraq sabiex tiġi rkuprata l-enerġija tiegħu (8). Jekk l-Ewropa trid tindirizza b’mod effettiv it-tibdil fil-klima, l-Istati Membri u l-istituzzjonijiet Ewropej għandhom iħeġġu l-użu tal-prodotti tal-injam u joħolqu kuntest politiku favorevoli li fih jiġi massimizzat iċ-ċiklu tal-ħajja tal-injam.

4.1.

Il-kostruzzjoni u t-tħaddim tal-bini għandu benefiċċji ambjentali sinifikanti. Globalment, il-binjiet huma responsabbli għal 20 % tal-konsum kollu tal-ilma, 25-40 % tal-użu tal-enerġija, u 30-40 % tal-emissjonijiet tal-gassijiet b’effett ta’ serra. L-għażla tal-prodotti użati għall-kostruzzjoni jew ir-rinovazzjoni għandha impatt sinifikanti fuq l-ambjent. Għaldaqstant, il-KESE jirrikonoxxi li l-injam għandu rwol importanti fl-iżvilupp ta’ binjiet sostenibbli li mhumiex ta’ ħsara għall-ambjent. L-opportunitajiet relatati mal-użu tal-injam fil-kostruzzjoni mhumiex sfruttati bis-sħiħ u dan jaffettwa l-kompetittività tal-industriji tax-xogħol fl-injam. Il-KESE jixtieq janalizza kif jista’ jtejjeb din is-sitwazzjoni mingħajr ma jinħolqu effetti ta’ ħsara għall-materjali l-oħra.

4.2.

L-injam ilu rikonoxxut bħala materjal li mhuwiex ta’ ħsara għall-ambjent għal varjetà wiesgħa ta’ prodotti. L-istudji tal-valutazzjoni taċ-ċiklu tal-ħajja wrew li l-prodotti tal-injam joffru vantaġġi ambjentali kbar. L-injam huwa wieħed mill-ftit materjali ta’ kostruzzjoni mija fil-mija rinnovabbli, jaħżen is-CO2 u huwa iżolatur naturali minħabba l-bwiet tal-arja fl-istruttura ċellolari tiegħu. Huwa materjal sigur, sod u tista’ tiddependi fuqu – anki f’kundizzjonijiet ta’ stress għoli bħall-uragani u t-terremoti, kif ukoll meta jkun hemm in-nirien.

4.3.

L-opzjonijiet ta’ ġestjoni ta’ tmiem il-ħajja għall-materjali ta’ kostruzzjoni jinkludu elementi bħall-użu mill-ġdid, ir-riċiklaġġ u l-irkupru. Is-sitwazzjoni attwali turi li ħafna mill-iskart ta’ kostruzzjoni għadu jmur fil-miżbla, li jżid il-piż fuq il-ġestjoni tal-miżbla stess. Il-materjali bħall-injam jistgħu jiġu riċiklati direttament fl-istess prodott għall-użu mill-ġdid jew jistgħu jiġu rikostitwiti fi prodotti oħra għall-użu. Il-KESE juri li r-riċiklaġġ jirrikjedi proċessar mill-ġdid li normalment mhuwiex ekonomikament fattibbli sakemm ma tiġix organizzata ġabra effiċjenti viċin tas-sors tal-materjal. Għal din ir-raġuni, il-KESE jitlob lill-Kummissjoni tal-UE u lill-partijiet interessati involuti sabiex jiġbru l-prattiki tajba kollha eżistenti fil-livell nazzjonali sabiex jiddefinixxu linji gwida u rakkomandazzjonijiet dwar il-ġbir tal-iskart tal-injam u soluzzjonijiet għat-trattament tal-injam wara l-użu. It-tnaqqis u r-riċiklaġġ tal-materjali ta’ kostruzzjoni u demolizzjoni jista’ jnaqqas ukoll l-ispejjeż ġenerali ta’ kostruzzjoni u rimi.

4.4.

L-industrija tal-kostruzzjoni hija l-ikbar utent tal-prodotti tal-injam. F’pajjiż bħall-Finlandja, madwar 70-80 % tal-prodotti tal-injam Finlandiżi jispiċċaw jintużaw fil-kostruzzjoni. Dan l-aħħar, il-kostruzzjoni tal-istrutturi tal-injam ħadet spinta ‘l quddiem f’bosta pajjiżi Ewropej, l-aktar fir-Renju Unit, l-Irlanda u Franza. Madankollu, il-KESE jagħraf li l-użu tal-injam jista’ jikkontribwixxi għall-iżvilupp tal-ekonomija ekoloġika u għal din ir-raġuni għandu jiġi promoss.

4.5.

Il-KESE jirrikonoxxi li l-għarfien dwar il-vantaġġi tal-użu tal-injam fil-kostruzzjoni huwa pjuttost limitat. Dan mhuwiex biss il-każ għall-periti; l-utenti aħħara ta’ spiss ma jkunux jafu biżżejjed dwar il-proprjetajiet tal-injam. Dan l-għarfien limitat ta’ spiss iwassal għal użu limitat tal-injam u b’konsegwenza ta’ dan għal problemi li jaffettwaw ħażin l-immaġni tal-injam. Barra minn hekk, in-nuqqas ta’ ħaddiema kkwalifikati fil-kostruzzjoni tal-istrutturi tal-injam għad-djar inaqqas l-iżvilupp ta’ dan il-metodu ta’ kostruzzjoni f’ħafna pajjiżi Ewropej.

4.6.

Il-KESE jitlob lill-industriji Ewropej tax-xogħol fl-injam u l-imsieħba soċjali biex iwaqqfu kampanji koordinati ta’ informazzjoni sabiex ipinġu stampa aktar attraenti tas-settur. Iż-żgħażagħ għandhom jitħeġġu jagħżlu skemi ta’ edukazzjoni u taħriġ li jħejjuhom adegwatament għal karriera fl-industrija tax-xogħol fl-injam.

5.1.

Il-KESE jenfasizza l-fatt li ħafna mill-ħaddiema tax-xogħol fl-injam jitħarrġu fuq ix-xogħol u jakkumulaw il-ħiliet b’mod informali minn ħaddiema tal-esperjenza. Ħafna mill-ħaddiema tax-xogħol fl-injam jitgħallmu l-livell bażiku ta’ kif iħaddmu l-magni u l-kompiti tax-xogħol fi ftit xhur, iżda biex isiru ħaddiema tas-sengħa fix-xogħol fl-injam ta’ spiss jeħtieġu sentejn jew iktar. L-impjieg jinħoloq ukoll billi l-ħaddiema jiġu pprovduti b’taħriġ u edukazzjoni adattati għall-ħtiġijiet u r-rekwiżiti tas-suq tax-xogħol. Barra minn hekk, il-KESE jtenni li l-programmi ta’ riċerka u innovazzjoni għandhom jagħtu spinta ‘l quddiem lill-impjiegi u t-tkabbir madwar l-UE kollha. Għaldaqstant, is-settur tax-xogħol fl-injam huwa mħeġġeġ jisfrutta l-opportunitajiet disponibbli fi ħdan il-programm Orizzont 2020.

5.2.

Il-Komunikazzjoni riċenti tal-UE dwar l-Effiċjenza fir-Riżorsi fis-Settur tal-Bini għandha tiġi implimentata b’mod ambizzjuż mill-Istati Membri sabiex ikunu żgurati l-investimenti fir-rinnovazzjoni tal-binjiet u jinħoloq l-impjieg.

5.3.

Il-KESE jirrikonoxxi li l-ħoss akustiku f’żoni pubbliċi għandu impatt serju fuq is-saħħa tal-bniedem (10). L-injam mhuwiex biss materjal importanti li ma jagħmilx ħsara lill-ambjent; jekk jintuża bħala materjal ta’ iżolament jista’ joffri wkoll għadd ta’ benefiċċji soċjali u tas-saħħa. Fil-fatt, l-injam jista’ jkollu rwol essenzjali fl-iżolament akustiku u bħala materjal ta’ assorbiment. L-injam għandu l-kapaċità jinsula kmamar b’mod akustiku minn ħsejjes esterni u jnaqqas il-ħin ta’ riverberazzjoni. Il-KESE jitlob lill-Kummissjoni biex tintroduċi regola li tirrifletti sew il-karatteristiċi akustiċi tal-ispażji magħluqa. Peress li l-injam jista’ jipproduċi ħoss (meta tħabbat fuqu direttament) u jista’ jamplifika jew jassorbi l-mewġiet tal-ħoss li ġejjin minn korpi oħra, għandhom jiġu esplorati l-opportunitajiet relatati mal-applikazzjonijiet tal-injam. L-injam għandu impatt pożittiv, ippruvat xjentifikament, fuq il-kwalità tal-arja/il-kumdità fuq ġewwa.

5.4.

Fil-livell nazzjonali hemm bosta inizjattivi sabiex in-nies jiġu edukati dwar l-opportunitajiet biex jużaw l-injam bħala materjal mhux ta’ ħsara għall-ambjent, iżda m’hemmx koordinazzjoni reali. Żieda fil-konsum tal-prodotti tal-injam hija relatata biċ-ċar għall-kampanji ta’ informazzjoni li għandhom jitwettqu fil-livell nazzjonali. L-għan ewlieni tal-kampanji edukattivi dwar l-injam huwa li jinħolqu attitudnijiet pożittivi – tekniċi u kulturali – favur l-użu tal-injam.

5.5.

Bħala eżempju interessanti ta’ prattika tajba, il-KESE jixtieq isemmi l-inizjattiva bit-titlu “WOODDAYS”. L-avveniment (11) tnieda fil-21 ta’ Marzu 2014 f’Milan. Dan kien programm ta’ għaxart ijiem li ffoka fuq bliet li qed jikbru u d-densifikazzjoni urbana intelliġenti effiċjenti fl-użu tar-riżorsi bl-injam. L-avveniment ittella’ sabiex l-injam jitqiegħed bħala materjal għall-kostruzzjoni li s’issa kellu potenzjal mhux rikonoxxut f’xenarju fejn il-kostruzzjoni bl-injam ser ikollha rwol kbir fil-futur – eżatt fil-qalba tal-bliet tagħna. Dan l-avveniment ser jerġa’ jittella’ wkoll fi bliet Ewropej oħra: Bratislava, Ljubljana u Brussell.

5.6.

Il-KESE jixtieq juri li l-programmi kbar għall-kostruzzjoni ekoloġika jvarjaw mhux ftit fit-trattament tal-użu tal-prodotti tal-injam. Filwaqt li wħud jiffukaw fuq il-prestazzjoni iktar milli fuq il-materjal użat, programmi oħra jagħmlu “restrizzjonijiet” fuq l-injam bħala materjal aċċettabbli (mingħajr ma jagħmlu “rekwiżiti” bħal dawn fuq prodotti oħra ta’ kostruzzjoni). Iż-żieda fl-użu tal-injam għandu jkollha varjetà ta’ impatti pożittivi fuq l-ekonomija tal-UE. Għaldaqstant, il-KESE jirrakkomanda li jiġu stabbiliti miri obbligatorji għall-użu tal-injam fil-kostruzzjoni, fuq l-eżempju ta’ Franza.

6.1.

Iż-żieda fl-użu tal-injam fil-kostruzzjoni u fil-ħajja ta’ kuljum teħtieġ soluzzjonijiet u miżuri sabiex tiżdied il-mobilizzazzjoni tal-injam (inklużi soluzzjonijiet imfassla sabiex jiġi rkuprat aktar injam, prodotti u residwi tal-injam minn skart industrijali u dak wara l-użu, għall-użu mill-ġdid u r-riċiklaġġ) u jiġi estiż iċ-ċiklu tal-ħajja tal-prodotti tal-injam.

6.2.

Provvista sostenibbli u kontinwa ta’ materja prima tal-injam hija kruċjali għaż-żamma ta’ industrija kompetittiva ta’ prodotti tal-injam. Ir-rakkomandazzjonijiet stipulati fil-gwida ta’ prattiki tajba dwar il-mobilizzazzjoni sostenibbli tal-injam fl-Ewropa (2010) għandhom jiġu kkunsidrati u, fejn meħtieġ, żviluppati.

6.3.

Fi snin riċenti, il-provvista tal-injam ġiet taħt pressjoni qawwija primarjament minħabba miżuri Ewropej u nazzjonali li jippromovu l-użu ta’ sorsi rinnovabbli ta’ enerġija, li parzjalment irriżultaw fil-ħruq tal-injam. Il-KESE jfakkar fl-importanza li jiġu esklużi “palits u injam li jiġi rkuprat wara l-użu” mid-definizzjoni ta’ “bijomassa terzjarja”. Dawn il-materjali huma kontribut kbir ta’ materja prima f’uħud mit-tipi ta’ prodotti manifatturati minn manifatturi tat-twavel b’bażi tal-injam u f’ċerti każijiet jistgħu jammontaw għal sa 95 % tal-kontribut tal-injam (12).

6.4.

Hawnhekk il-KESE jenfasizza li l-prinċipju tal-“użu kaskata” (użu, użu mill-ġdid, riċiklaġġ, irkupru tal-enerġija) – meta jkun ekonomikament u teknikament fattibbli b’konformità ma’ pekuljaretajiet nazzjonali jew reġjonali speċifiċi u mal-bilanċ bejn id-domanda u l-provvista tal-injam – jirrappreżenta l-aqwa mod biex jiġi massimizzat l-użu effiċjenti tar-riżorsi tal-injam, il-materja prima naturali. Madankollu, il-Kumitat ma jistax jappoġġja l-idea ta’ regoli legalment vinkolanti u huwa favur approċċ ibbażat fuq is-suq miftuħ u l-libertà tal-parteċipanti tas-suq. L-użu tal-injam f’approċċ ta’ “użu kaskata” mhux biss jiżgura l-aqwa użu ekonomiku tal-materja prima, iżda jipprovdi wkoll benefiċċji importanti tal-klima permezz ta’ ħżin kontinwu tal-karbonju u effett ta’ sostituzzjoni, qabel ma jintuża bħala sors tal-enerġija.