(1)

Skont l-Artikolu 10 tar-Regolament (UE) 2015/478, sorveljanza tal-Unjoni tista’ tkun introdotta meta x-xejra fl-importazzjonijiet ta’ prodott thedded li tikkawża dannu lill-produtturi tal-Unjoni, u meta l-interessi tal-Unjoni hekk jeħtieġu. L-Artikolu 7 tar-Regolament (UE) 2015/755 jippermetti l-possibbiltà li tiġi introdotta sorveljanza meta l-interessi tal-Unjoni hekk jeħtieġu. Sorveljanza retrospettiva, li tirrikjedi li kull Stat Membru jittrażmetti data dwar l-importazzjoni lill-Kummissjoni Ewropea ftit wara li tkun saret l-importazzjoni attwali, tista’ tiġi introdotta fl-ambitu taż-żewġ Regolamenti skont l-Artikolu 10(1)(a) u l-Artikolu 7(1)(a) rispettivament.

(2)

Fuq il-bażi tal-informazzjoni disponibbli għall-Kummissjoni, l-importazzjonijiet tal-etanol rinnovabbli użat bħala karburant dan l-aħħar żdiedu b’ammonti sinifikanti.

(3)

L-importazzjonijiet mill-oriġini kollha tal-bijoetanol użat bħala karburant żdiedu bi kważi 80 % bejn l-2021 u l-2022 (fin-nuqqas tal-kodiċijiet TARIC, dawn il-volumi huma bbażati fuq kodiċijiet NM kompleti u jistgħu jinkludu wkoll tipi oħra ta’ bijoetanol). Fl-2022, l-aktar pajjiżi esportaturi importanti f’termini ta’ volumi kienu l-Brażil, l-Istati Uniti, ir-Renju Unit u l-Perù.

(4)

Analiżi addizzjonali, ibbażata fuq data TARIC estrapolata għall-aktar tliet kodiċijiet NM rappreżentattivi (jiġifieri aktar minn 90 % tal-importazzjonijiet fil-livell TARIC), uriet li l-importazzjonijiet tal-bijoetanol użat bħala karburant żdiedu b’45 % bejn l-2021 u l-2022. Barra minn hekk, wieħed josserva żieda ta’ 43,5 % oħra fl-ewwel ħames xhur tas-sena 2023 meta mqabbla mal-ewwel ħames xhur tas-sena 2022.

(5)

Fuq dik il-bażi estrapolata, l-akbar tliet pajjiżi tal-esportazzjoni lejn l-Unjoni huma l-Istati Uniti, il-Brażil u l-Perù. Il-Pakistan huwa r-raba’ pajjiż l-aktar importanti f’termini ta’ kwantitajiet importati, li juri l-ogħla żieda fl-importazzjonijiet b’179 % bejn l-2021 u l-2022. Għall-istess perjodu, l-importazzjonijiet mill-Istati Uniti żdiedu b’96 %, u mill-Brażil b’37 %. L-importazzjonijiet mill-Perù naqsu bi 13 %.

(6)

Is-suq tal-UE jidher attraenti ħafna minħabba l-prezzijiet għoljin tiegħu. Il-prezzijiet tal-importazzjoni mill-Brażil u mill-Istati Uniti huma aktar minn 15 % aktar baxxi mill-prezzijiet tal-UE (3). Barra minn hekk, iż-żewġ pajjiżi għandhom kapaċitajiet ta’ produzzjoni kbar ħafna.

(7)

Kif turi t-tabella ta’ hawn taħt, l-Istati Uniti u l-Brażil qed jipproduċu ħafna aktar mill-konsum domestiku tagħhom stess li jfisser li għandhom kapaċità żejda għas-swieq tal-esportazzjoni. Il-konsum tal-UE huwa ta’ madwar 4,6 miljun tunnellata u l-produtturi tal-Istati Uniti u tal-Brażil għandhom kapaċità żejda kkombinata ta’ 5,5 miljun tunnellata disponibbli għall-esportazzjoni, u għalhekk kapaċi jissodisfaw id-domanda tal-Unjoni.

Tabella 1

Produzzjoni u konsum fis-sena 2022

(8)

Iż-żieda fl-importazzjoniet tikkoinċidi mat-tnaqqis ta’ 10 % fis-sehem mis-suq tal-industrija tal-UE. Il-proporzjon tal-importazzjonijiet meta mqabbel mal-produzzjoni tal-UE żdied minn 21 % fl-2021 għal 39 % fl-2022.

(9)

Ta’ min ifakkar li s-sorveljanza retrospettiva dwar l-importazzjonijiet tal-etanol rinnovabbli użat bħala karburant (“bijoetanol”) ġiet introdotta għall-ewwel darba f’Novembru 2020 bir-Regolament ta’ Implimentazzjoni tal-Kummissjoni (UE) 2020/1628 (4). Ir-Regolament introduċa ċerti kodiċijiet TARIC għal perjodu ta’ sena.

(10)

Ir-Regolament ta’ Implimentazzjoni (UE) 2020/1628 skada fl-4 ta’ Novembru 2021 u għalhekk il-kodiċijiet ġew diżattivati fis-sistema doganali. Fl-2021, l-importazzjonijiet tal-bijoetanol kienu naqsu u għalhekk, f’dak iż-żmien ma kien hemm l-ebda raġuni biex is-sorveljanza tiġi estiża.

(11)

Madankollu, fuq il-bażi tax-xejriet reċenti fl-importazzjoni tal-etanol rinnovabbli użat bħala karburant, il-kapaċitajiet kbar ta’ produzzjoni disponibbli b’mod partikolari fl-Istati Uniti u l-Brażil kif iddikjarat fil-premessa(7), u l-livell aktar baxx tal-prezzijiet tal-importazzjonijiet fl-Unjoni, l-effetti dannużi għall-produtturi tal-Unjoni jistgħu għalhekk, ikomplu jmorru għall-agħar fil-futur qrib.

(12)

Kif indikat mill-Industrija tal-Unjoni, mir-raba’ trimestru tal-2021 ’l hawn, il-biċċa l-kbira tal-indikaturi ekonomiċi qegħdin jiddeterjoraw, u qed juru sinjali ta’ dannu mġarrab mill-produtturi tal-UE inklużi fil-kampjun fil-perjodu mir-raba’ trimestru tal-2021 sat-tielet trimestru tal-2022:

(13)

Għalhekk, l-interess tal-Unjoni jeżiġi li l-importazzjonijiet ta’ prodotti tal-etanol rinnovabbli użat bħala karburant jenħtieġ li jkunu soġġetti għal sorveljanza retrospettiva tal-Unjoni sabiex tingħata informazzjoni statistika, qabel tinħareġ l-istatistika uffiċjali dwar l-importazzjonijiet, li tippermetti analiżi rapida tax-xejriet fl-importazzjonijiet mill-pajjiżi terzi kollha. Hemm bżonn ta’ data kummerċjali rapida biex tiġi ttrattata l-vulnerabbiltà tas-suq tal-Unjoni tal-etanol rinnovabbli użat bħala karburant u biex jiġu identifikati bidliet għall-għarrieda fis-suq dinji.

(14)

Billi l-etanol użat bħala karburant jista’ jiġi kklassifikat f’diversi intestaturi tan-NM li jinkludu prodotti oħra, jenħtieġ li jinħolqu kodiċijiet TARIC speċifiċi sabiex jiġi żgurat monitoraġġ adegwat limitat biss għall-prodotti rilevanti. L-ambitu tas-sorveljanza retrospettiva għandu jinkludi l-prodotti elenkati fl-Anness ta’ dan ir-Regolament.

(15)

Sabiex ikun jista’ jsir monitoraġġ xieraq tax-xejriet tal-importazzjoni u biex jiġi evitat li l-kodiċijiet TARIC rilevanti jerġgħu jiġu diżattivati, jenħtieġ li s-sorveljanza retrospettiva tiġi introdotta għal perjodu ta’ tliet snin,