(1)

Permezz tar-Regolament ta’ Implimentazzjoni tal-Kummissjoni (UE) 2017/969 (2), il-Kummissjoni Ewropea (“il-Kummissjoni”), imponiet dazju kumpensatorju definittiv fuq importazzjonijiet ta’ ċerti prodotti ċatti b’laminazzjoni termali (hot-rolled flat - HRF) tal-ħadid, azzar mhux illigat jew liga oħra tal-azzar li joriġinaw mir-Repubblika tal-Poplu taċ-Ċina (ir-RPĊ jew “il-pajjiż ikkonċernat” jew “iċ-Ċina”) (“ir-regolament oriġinali”). Id-dazji kumpensatorji li bħalissa huma fis-seħħ ivarjaw minn 4,6 % għal 35,9 % (“il-miżuri oriġinali”). L-investigazzjoni li wasslet għall-impożizzjoni tal-miżuri oriġinali minn hawn ’il quddiem se tissejjaħ “l-investigazzjoni oriġinali”.

(2)

Permezz tar-Regolament ta’ Implimentazzjoni tal-Kummissjoni (UE) 2017/649 (3), il-Kummissjoni, imponiet dazju anti-dumping definittiv fuq importazzjonijiet ta’ ċerti prodotti ċatti b’laminazzjoni termali tal-ħadid, azzar mhux illigat jew liga oħra tal-azzar li joriġinaw mir-Repubblika tal-Poplu taċ-Ċina (ir-RPĊ). Id-dazji anti-dumping li bħalissa huma fis-seħħ ivarjaw minn 0 % għal 31,3 %.

(3)

Wara l-pubblikazzjoni ta’ avviż ta’ skadenza imminenti (4), il-Kummissjoni rċeviet talba għall-bidu ta’ rieżami ta’ skadenza tal-miżuri kumpensatorji skont l-Artikolu 18 tar-Regolament bażiku.

(4)

It-talba għal rieżemi (“it-talba”) ġiet ippreżentata fid-9 ta’ Marzu 2022 mill-EUROFER, l-Assoċjazzjoni Ewropea tal-Azzar, (“l-applikant”) f’isem l-industrija tal-Unjoni ta’ ċerti prodotti ċatti b’laminazzjoni termali tal-ħadid, azzar mhux illigat jew liga oħra tal-azzar skont it-tifsira tal-Artikolu 10(6) tar-Regolament bażiku.

(5)

L-applikant sostna li l-iskadenza tal-miżuri kumpensatorji hija probabbli li tirriżulta fil-kontinwazzjoni jew fir-rikorrenza ta’ sussidjar u fir-rikorrenza ta’ dannu lill-industrija tal-Unjoni.

(6)

Wara li ddeterminat li kienet teżisti evidenza suffiċjenti għall-bidu ta’ rieżami ta’ skadenza, il-Kummissjoni bdiet, fit-8 ta’ Ġunju 2022, rieżami ta’ skadenza fir-rigward tal-importazzjonijiet lejn l-Unjoni ta’ ċerti prodotti ċatti b’laminazzjoni termali tal-ħadid, azzar mhux illigat jew liga oħra tal-azzar li joriġinaw mir-RPĊ abbażi tal-Artikolu 18(2) tar-Regolament bażiku. Hija ppubblikat Notifika ta’ Bidu f’Il-Ġurnal Uffiċjali tal-Unjoni Ewropea (5) (“in-Notifika ta’ Bidu”).

(7)

Qabel il-bidu tar-rieżami, fit-12 ta’ Mejju 2022 il-Kummissjoni nnotifikat lill-Gvern taċ-Ċina (il-“GTĊ”) (6) li hija kienet irċeviet talba ddokumentata kif suppost, u stiednet lill-GTĊ għal konsultazzjonijiet f’konformità mal-Artikolu 10(7) tar-Regolament bażiku. Fl-istess jum, il-GTĊ issottometta wkoll kummenti bil-miktub fejn sostna li, b’mod ġenerali, it-talba ma fihiex evidenza suffiċjenti biex jinbeda rieżami ta’ skadenza, speċjalment fir-rigward tal-ispeċifiċità tas-sussidji allegati lill-produtturi tal-HRF. Il-Kummissjoni ħadet nota tal-kummenti mqajma mill-GTĊ u tat attenzjoni partikolari lil dawn l-elementi matul l-investigazzjoni tar-rieżami ta’ skadenza.

(8)

Permezz ta’ avviż ippubblikat f’Il-Ġurnal Uffiċjali tal-Unjoni Ewropea fil-5 ta’ April 2022 (7), il-Kummissjoni ħabbret ukoll il-bidu ta’ rieżami ta’ skadenza skont l-Artikolu 11(2) tar-Regolament (UE) 2016/1036 tal-Parlament Ewropew u tal-Kunsill (8) tal-miżuri anti-dumping definittivi fis-seħħ fir-rigward tal-importazzjonijiet fl-Unjoni ta’ ċerti prodotti ċatti b’laminazzjoni termali tal-ħadid, azzar mhux illigat jew liga oħra tal-azzar li joriġinaw mir-RPĊ.

(9)

L-investigazzjoni ta’ kontinwazzjoni jew ta’ rikorrenza tas-sussidjar kopriet il-perjodu mill-1 ta’ Jannar 2021 sal-31 ta’ Diċembru 2021 (“il-perjodu ta’ investigazzjoni tar-rieżami”). L-eżaminazzjoni tax-xejriet rilevanti għall-valutazzjoni tal-probabbiltà ta’ kontinwazzjoni jew ta’ rikorrenza ta’ dannu kienet tkopri l-perjodu mill-1 ta’ Jannar 2018 sa tmiem il-perjodu ta’ investigazzjoni tar-rieżami (“il-perjodu taħt kunsiderazzjoni”).

(10)

Fin-Notifika ta’ Bidu, il-partijiet interessati ġew mistiedna jikkuntattjaw lill-Kummissjoni sabiex jieħdu sehem fl-investigazzjoni. Il-Kummissjoni speċifikament informat lill-applikant, lill-produtturi tal-Unjoni kollha magħrufin, lill-produtturi magħrufin fir-RPĊ u lill-awtoritajiet tar-Repubblika tal-Poplu taċ-Ċina kif ukoll lill-importaturi, l-utenti u n-negozjanti magħrufin dwar il-bidu tar-rieżami ta’ skadenza u stednithom jipparteċipaw.

(11)

Il-partijiet interessati kellhom l-opportunità li jikkummentaw dwar il-bidu tar-rieżami ta’ skadenza u li jitolbu seduta ta’ smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali.

(12)

Fin-Notifika ta’ Bidu tagħha, il-Kummissjoni ddikjarat li hija tista’ tieħu kampjun tal-partijiet interessati f’konformità mal-Artikolu 27 tar-Regolament bażiku.

(13)

Fin-Notifika ta’ Bidu, il-Kummissjoni ħabbret li hija kienet għażlet kampjun tal-produtturi tal-Unjoni b’mod provviżorju. F’konformità mal-Artikolu 27 tar-Regolament bażiku, il-Kummissjoni għażlet il-kampjun abbażi tal-akbar volum ta’ produzzjoni tal-prodott simili fl-Unjoni matul il-perjodu ta’ investigazzjoni tar-rieżami li seta’ jiġi investigat b’mod raġonevoli fiż-żmien disponibbli. Dan il-kampjun kien jikkonsisti minn tliet produtturi tal-Unjoni. Il-produtturi tal-Unjoni inklużi fil-kampjun kienu jirrappreżentaw madwar 29 % tal-produzzjoni totali stmata fl-Unjoni. Il-Kummissjoni stiednet lill-partijiet interessati jikkummentaw dwar il-kampjun provviżorju. Ma wasal l-ebda kumment u l-Kummissjoni kkonfermat il-kampjun magħżul b’mod provviżorju. Il-kampjun huwa rappreżentattiv tal-industrija tal-Unjoni.

(14)

Sabiex tiddeċiedi jekk il-kampjunar kienx meħtieġ u, jekk iva, biex tagħżel kampjun, il-Kummissjoni talbet lil importaturi mhux relatati jipprovdu l-informazzjoni speċifikata fin-Notifika ta’ Bidu. L-ebda importatur mhux relatat ma ppreżenta ruħu u pprovda l-informazzjoni mitluba.

(15)

Sabiex tiddeċiedi jekk kienx hemm bżonn ta’ kampjunar fir-rigward tal-produtturi esportaturi, u jekk kien hemm bżonn, tagħżel kampjun, il-Kummissjoni talbet lill-produtturi magħrufa kollha fir-RPĊ biex jipprovdu l-informazzjoni speċifikata fin-Notifika ta’ Bidu. Barra minn hekk, il-Kummissjoni talbet lill-Missjoni tar-RPĊ għall-Unjoni Ewropea biex tidentifika u/jew tikkuntattja produtturi oħra, jekk ikun hemm, li jistgħu jkunu interessati li jipparteċipaw fl-investigazzjoni. L-ebda wieħed mill-produtturi fir-RPĊ ma pprovda l-informazzjoni mitluba.

(16)

Konsegwentement, il-Kummissjoni informat lill-awtoritajiet tar-RPĊ permezz ta’ Note Verbale tat-2 ta’ Settembru 2022, li tista’ tirrikorri għall-użu tal-fatti disponibbli skont l-Artikolu 28(1) tar-Regolament bażiku meta teżamina l-kontinwazzjoni jew ir-rikorrenza tas-sussidjar. L-awtoritajiet tar-RPĊ ma rreaġixxewx għan-Nota.

(17)

Il-Kummissjoni bagħtet kwestjonarji lit-tliet produtturi kampjunati tal-Unjoni, lill-applikant u lill-GTĊ. It-tweġibiet għall-kwestjonarji waslu mingħand it-tliet produtturi tal-Unjoni inklużi fil-kampjun u mingħand l-applikant.

(18)

Il-Kummissjoni vverifikat l-informazzjoni kollha li hija qieset neċessarja sabiex tistabbilixxi l-probabbiltà ta’ kontinwazzjoni jew rikorrenza tas-sussidjar u d-dannu, u tat-test dwar l-interess tal-Unjoni. Twettqu żjarat ta’ verifika fuq il-post tal-partijiet interessati li ġejjin:

(19)

Fl-4 ta’ April 2023, il-Kummissjoni ddivulgat il-fatti u l-konsiderazzjonijiet essenzjali li abbażi tagħhom kienet beħsiebha timponi dazji kumpensatorji. Il-partijiet kollha ngħataw perjodu li fih setgħu jikkummentaw dwar id-divulgazzjoni.

(20)

Il-kummenti li għamlu l-partijiet interessati ġew ikkunsidrati mill-Kummissjoni u ttieħdu inkunsiderazzjoni, fejn xieraq. Il-partijiet li talbu dan ingħataw seduta ta’ smigħ. CISA talbet u ngħatat seduta ta’ smigħ mas-servizzi tal-Kummissjoni fit-12 ta’ April 2023.

(21)

Il-prodott soġġett għal dan ir-rieżami huwa l-istess bħal dak fl-investigazzjoni oriġinali, jiġifieri ċerti prodotti llaminati ċatti tal-ħadid, azzar mhux illigat jew liga oħra tal-azzar, f’koljaturi jew le (inklużi prodotti “cut-to-length” u “strixxi dojoq”), mhux maħdumin aktar ħlief b’laminazzjoni termali, mhux miksijin, indurati jew mgħottijin (“HRF” jew “il-prodott taħt rieżami”).

Il-prodotti li ġejjin ma humiex koperti minn dan ir-rieżami:

Il-prodott ikkonċernat attwalment jaqa’ taħt il-kodiċijiet NM 7208 10 00, 7208 25 00, 7208 26 00, 7208 27 00, 7208 36 00, 7208 37 00, 7208 38 00, 7208 39 00, 7208 40 00, 7208 52 10, 7208 52 99, 7208 53 10, 7208 53 90, 7208 54 00, 7211 13 00, 7211 14 00, 7211 19 00, ex 7225 19 10 (il-kodiċi TARIC 7225191090), 7225 30 90, ex 7225 40 60 (il-kodiċi TARIC 7225406090), 7225 40 90, ex 7226 19 10 (il-kodiċijiet TARIC 7226191091, 7226191095), 7226 91 91 u 7226 91 99. Il-kodiċijiet NM u TARIC huma mogħtija għall-informazzjoni biss, bla preġudizzju għal bidla sussegwenti fil-klassifikazzjoni tat-tariffi.

(22)

Il-prodotti ċatti b’laminazzjoni termali tal-azzar huma prodotti permezz ta’ laminazzjoni termali. Dan huwa proċess li jifforma l-metall li bih metall sħun jiġi mgħoddi minn par wieħed jew aktar ta’ laminaturi termali biex titnaqqas il-ħxuna u biex il-ħxuna ssir uniformi, li permezz tiegħu t-temperatura tal-metall tkun ogħla mit-temperatura ta’ rikristallizzazzjoni tiegħu. Jistgħu jiġu pprovduti f’bosta forom; f’koljaturi (mogħtija ż-żejt jew le, imnaddfin bl-aċidu jew le), maqtugħin f’tulijiet (folji) jew fi strixxi rqaq.

(23)

Hemm żewġ użi prinċipali tal-prodotti ċatti tal-azzar b’laminazzjoni termali. L-ewwel nett, dawn huma l-materjal ewlieni għall-produzzjoni ta’ diversi prodotti tal-azzar downstream b’valur miżjud, li jibdew minn prodotti tal-azzar ċatti u miksija llaminati bil-kesħa. It-tieni, dawn jintużaw bħala input industrijali li jinxtara mill-utenti finali għal varjetà ta’ applikazzjonijiet, inkluż fil-kostruzzjoni (il-produzzjoni ta’ tubi tal-azzar), fil-bini ta’ bastimenti, f’kontenituri tal-gass, f’karozzi, f’reċipjenti taħt pressjoni u f’pipelines tal-enerġija.

(24)

Il-prodott ikkonċernat minn din l-investigazzjoni huwa l-prodott taħt rieżami li joriġina mir-Repubblika tal-Poplu taċ-Ċina.

(25)

Kif huwa stabbilit fl-investigazzjoni oriġinali, din l-investigazzjoni ta’ rieżami ta’ skadenza kkonfermat li l-prodotti li ġejjin għandhom l-istess karatteristiċi fiżiċi bażiċi kif ukoll l-istess użi bażiċi:

(26)

Għalhekk, dawn il-prodotti huma kkunsidrati bħala prodotti simili skont it-tifsira tal-Artikolu 2(c) tar-Regolament bażiku.

(27)

F’konformità mal-Artikolu 18 tar-Regolament bażiku, u kif huwa ddikjarat fin-Notifika ta’ Bidu, il-Kummissjoni eżaminat jekk l-iskadenza tal-miżuri eżistenti għandhiex probabilità li twassal għal kontinwazzjoni tas-sussidjar.

(28)

Fit-12 ta’ Lulju 2022 il-Kummissjoni bagħtet kwestjonarju lill-GTĊ. Il-GTĊ intalab jibgħat kwestjonarju lill-banek u istituzzjonijiet finanzjarji oħrajn li l-GTĊ kien jaf li pprovdew self lill-industrija kkonċernata kif ukoll lill-produtturi u lid-distributuri ta’ azzar b’laminazzjoni termali u bil-kesħa li jipprovdi inputs għall-produzzjoni tal-prodott taħt rieżami.

(29)

Il-Kummissjoni ma rċeviet l-ebda tweġiba.

(30)

Permezz tan-Note Verbale tat-2 ta’ Settembru 2022, il-Kummissjoni informat lill-awtoritajiet Ċiniżi li wara n-nuqqas ta’ kooperazzjoni mill-GTĊ u l-produtturi tal-prodott taħt rieżemi, il-Kummissjoni kellha l-ħsieb li tagħmel is-sejbiet tagħha abbażi tal-fatti disponibbli, f’konformità mal-Artikolu 28(1) tar-Regolament bażiku. Huma ġew informati wkoll li sejba bbażata fuq il-fatti disponibbli tista’ tkun anqas favorevoli milli kieku l-GTĊ u l-produtturi kkooperaw.

(31)

Ma wasal l-ebda kumment f’dan ir-rigward. Il-Kummissjoni, f’konformità mal-Artikolu 28 tar-Regolament bażiku, qieset l-użu tal-fatti disponibbli meħtieġa sabiex tiġi stabbilita l-kontinwazzjoni tal-prattiki ta’ sussidju taċ-Ċina fl-industrija tal-azzar ċatt b’laminazzjoni termali.

(32)

Għaldaqstant, il-Kummissjoni użat għall-analiżi tagħha l-fatti kollha disponibbli għaliha, b’mod partikolari:

(33)

Qabel analizzat l-allegat sussidjar fil-forma ta’ sussidji speċifiċi jew programmi ta’ sussidju (it-taqsimiet 3.3 u wara, ta’ hawn taħt), il-Kummissjoni vvalutat il-pjanijiet, il-proġetti u dokumenti oħrajn tal-gvern, li kienu rilevanti għal aktar minn wieħed mis-sussidji jew mill-programmi ta’ sussidju. Hija sabet li s-sussidji jew il-programmi ta’ sussidju kollha taħt valutazzjoni jifformaw parti mill-implimentazzjoni tal-ippjanar ċentrali tal-GTĊ għar-raġunijiet li ġejjin.

(34)

Fl-investigazzjoni attwali l-Kummissjoni stabbiliet li d-dokument prinċipali ta’ rilevanza matul il-perjodu ta’ investigazzjoni tar-rieżami kien l-14-il Pjan ta’ Ħames Snin dwar l-iżvilupp tal-industrija tal-materja prima, bħal dik tal-azzar. L-industrija tal-azzar hija parti importanti mill-industrija tal-materja prima, hija tirrappreżenta qasam ewlieni li jifforma l-vantaġġi kompetittivi internazzjonali taċ-Ċina, u l-“kamp tal-battalja prinċipali” għar-ristrutturar tal-fondazzjoni industrijali u l-iżvilupp industrijali ekoloġiku. Il-Pjan jenfasizza l-kultivazzjoni ta’ grupp ta’ intrapriżi ewlenin fil-katina industrijali bi tmexxija ekoloġika u kompetittività ewlenija.

(35)

Il-pjan ta’ azzjoni ta’ tliet snin tal-Provinċja ta’ Hebei dwar l-iżvilupp ta’ raggruppamenti fil-katina tal-industrija tal-azzar (2020 – 2022) jelabora r-riforma tas-sjieda mħallta ta’ intrapriżi tal-Istat, jiffoka fuq il-promozzjoni tal-fużjoni u r-riorganizzazzjoni interreġjonali ta’ intrapriżi privati tal-azzar.

(36)

L-14-il Pjan ta’ Ħames Snin tal-Provinċja ta’ Shangdong dwar l-iżvilupp tal-industrija tal-azzar jenfasizza l-kompetittività tal-industrija tal-azzar bħala l-għan, peress li qed jitressaq ’l quddiem il-kontroll strett tal-kapaċità tal-produzzjoni. Barra minn hekk, dan għandu objettivi li jottimizza t-tqassim industrijali, isaħħaħ l-ixprunar tal-innovazzjoni, jippromwovi l-iżvilupp ekoloġiku u jibni bażi industrijali avvanzata tal-manifattura tal-azzar b’kompetittività domestika mill-aqwa u b’influwenza internazzjonali.

(37)

Wara d-divulgazzjoni, iċ-China Iron and Steel Association (CISA) sostniet li l-Kummissjoni ddependiet ħafna fuq l-“14-il Pjan ta’ Ħames Snin” sabiex tagħti prova tal-importanza strateġika tal-industrija rilevanti u b’hekk turi l-eżistenza ta’ sussidji fir-rigward ta’ dan is-settur speċifiku. Is-CISA enfasizzat li l- “pjanijiet ta’ ħames snin” (five year plans - FYP) huma sempliċement dokumenti ta’ gwida li jesprimu fehmiet ta’ politika għall-futur u bħala tali ma għandhomx saħħa vinkolanti minħabba li ma hemm l-ebda klawżola ta’ ksur jew penali f’tali pjanijiet. Barra minn hekk, is-CISA rreferiet f’dan ir-rigward għal dokumenti u rapporti ekwivalenti min-naħa tal-Kummissjoni tal-UE bħall-pubblikazzjoni tal-Kummissjoni stess intitolata “Strateġija Industrijali Ġdida” li fiha l-Kummissjoni nnifisha tidentifika diversi prijoritajiet f’termini ta’ investimenti pubbliċi f’tentattiv ċar biex tidderieġi l-iżvilupp futur tal-industriji ewlenin tal-UE.

(38)

Dan l-argument ma setax jiġi aċċettat. L-ewwel nett, il-FYPs ippubblikati mill-GTĊ mhumiex biss dokumenti ta’ gwida ġenerali, iżda huma ta’ natura legalment vinkolanti. L-14-il FYP ifakkar b’mod espliċitu lill-awtoritajiet kollha biex jimplimentaw il-pjanijiet b’mod diliġenti: “Aħna se nsaħħu s-sistemi ta’ ġestjoni tal-ippjanar bħal katalgi u listi, kompilazzjoni u arkivju, u allinjament u koordinazzjoni, niżviluppaw listi u katalogi bħall-“14-il edizzjoni tal-Pjanijiet Speċjali ta’ Livell Nazzjonali ta’ Ħames Snin”, nippromwovu arkivju tal-pjanijiet li jiddependi fuq il-pjattaforma nazzjonali ta’ informazzjoni dwar il-ġestjoni integrata tal-ippjanar, u nġibu diversi pjanijiet taħt ġestjoni unifikata. Ser nistabbilixxu u ntejbu l-mekkaniżmi ta’ allinjament u koordinazzjoni tal-ippjanar, nallinjaw il-pjanijiet approvati mill-Kumitat Ċentrali tas-CCP u l-Kunsill tal-Istat u l-pjanijiet ta’ żvilupp provinċjali ma’ dan il-pjan qabel is-sottomissjoni għall-approvazzjoni, niżguraw li l-ippjanar spazjali fil-livell nazzjonali, l-ippjanar speċjali, l-ippjanar reġjonali, u livelli oħra ta’ ppjanar jiġu kkoordinati ma’ dan il-pjan f’termini ta’ għanijiet ewlenin, direzzjonijiet ta’ żvilupp, tqassim ġenerali, politiki ewlenin, proġetti kbar, u prevenzjoni u kontroll tar-riskju.” (16) Barra minn hekk, l-14-il FYP dwar l-Iżvilupp tal-Industrija tal-Materja Prima jistipula li “il-lokalitajiet kollha jeħtieġ li jtejbu lilhom infushom b’dan il-Pjan, u jinkludu l-kontenut ewlieni u l-proġetti ewlenin hawnhekk fil-kompiti lokali primarjitagħhom”, filwaqt li “l-azzar u setturi ewlenin oħra għandhom ifasslu opinjonijiet speċifiċi ta’ implimentazzjoni bbażati fuq l-objettivi u l-kompiti ta’ dan il-Pjan.” Għalhekk, it-talba ġiet miċħuda.

(39)

F’din l-investigazzjoni, il-GTĊ ma ppreżenta l-ebda evidenza jew argument li juru l-kuntrarju.

(40)

L-Ordni Nru 35 tal-Kummissjoni Nazzjonali għall-Iżvilupp u r-Riformi – Politiki għall-iżvilupp tal-Industrija tal-Ħadid u tal-Azzar (2005) (“Ordni Nru 35”) hija dokument ieħor ta’ politika li jirregola s-settur tal-azzar Ċiniż. Filwaqt li ġie adottat mill-Kunsill tal-Istat, dan ikopri diversi aspetti tal-kontroll tal-GTĊ fuq l-industrija, inkluż:

(41)

Id-Deċiżjoni Nru 40 hija Ordni tal-Kunsill tal-Istat li għal skop ta’ investiment tikklassifika s-setturi industrijali f’kategoriji differenti, jiġifieri “proġetti mħeġġa, ristretti u eliminati”. Din id-Deċiżjoni tiddikjara li l-“Katalogu ta’ Gwida għall-Aġġustament tal-Istruttura Industrijali”, li huwa miżura ta’ implimentazzjoni tad-Deċiżjoni Nru 40, huwa bażi importanti sabiex jiġu ggwidati d-direzzjonijiet tal-investiment. Huwa jiggwida wkoll lill-GTĊ sabiex jamministra l-proġetti ta’ investiment u sabiex jifformula u jinforza politiki dwar il-finanzi pubbliċi, it-tassazzjoni, il-kreditu, l-art, l-importazzjoni u l-esportazzjoni (17). Fil-Kapitolu VIII ta’ dan il-Katalogu ta’ Gwida, l-industrija tal-azzar hija indikata bħala industrija inċentivata. Fir-rigward tan-natura legali tagħha, il-Kummissjoni nnotat li d-Deċiżjoni Nru 40 hija Ordni mill-Kunsill tal-Istat, li huwa l-ogħla korp amministrattiv fir-RPĊ. F’dak ir-rigward, id-deċiżjoni hija legalment vinkolanti għal korpi pubbliċi oħrajn u għall-operaturi ekonomiċi (18).

(42)

Il-Blueprint for the Adjustment and Revitalisation of the Steel Industry (Pjan Direzzjonali għall-Aġġustament u r-Rivitalizzazzjoni tal-Industrija tal-Azzar) (2009) huwa pjan ta’ azzjoni għall-industrija tal-azzar. Il-pjan għandu l-għan li jindirizza l-kriżi finanzjarja internazzjonali u jindirizza r-rekwiżiti ġenerali ta’ politika tal-GTĊ biex jinżamm it-tkabbir. Dan ifittex ukoll li “jiżgura l-operazzjoni stabbli tal-industrija” peress li din “titqies bħala industrija prinċipali importanti tal-ekonomija nazzjonali”. Id-dokument jipprovdi dan li ġej:

(43)

Skont il-kapitolu VIII tiegħu, il-Katalogu ta’ Gwida għall-Aġġustament tal-Istruttura Industrijali (2019), is-settur tal-azzar huwa settur mħeġġeġ.

(44)

Filwaqt li qieset id-dokumenti msemmija hawn fuq u d-dispożizzjonijiet tagħhom, li dwarhom ma hemm l-ebda evidenza li ma għadhomx aktar fis-seħħ, il-Kummissjoni tenniet il-konklużjoni tagħha mill-investigazzjoni oriġinali li l-industrija tal-azzar Ċiniża baqgħet industrija ewlenija/strateġika matul il-perjodu ta’ investigazzjoni tar-rieżami, li l-iżvilupp tagħha qed ikompli jiġi segwit b’mod attiv u mmexxi mill-GTĊ bħala objettiv strateġiku tal-politika.

(45)

Minħabba n-nuqqas ta’ kooperazzjoni mill-GTĊ u l-produtturi Ċiniżi speċifikati fil-premessi (27) u (30), il-Kummissjoni ddeċidiet li teżamina jekk kienx hemm kontinwazzjoni tas-sussidjar kif ġej. L-ewwel nett, il-Kummissjoni eżaminat jekk is-sussidji kkumpensati fl-investigazzjoni oriġinali komplewx jagħtu benefiċċju lill-industrija tal-azzar ċatt b’laminazzjoni termali. Sussegwentement, il-Kummissjoni analizzat jekk l-industrija bbenefikatx mis-sussidji kollha li ma ġewx ikkumpensati fl-investigazzjoni oriġinali (“sussidji addizzjonali” jew “sussidji ġodda”) kif ġie allegat fit-talba.

(46)

Il-Kummissjoni ddeċidiet li, minħabba s-sejbiet li jikkonfermaw l-eżistenza tal-kontinwazzjoni tas-sussidjar fir-rigward tal-maġġoranza tas-sussidji kkumpensati fl-investigazzjoni oriġinali, kif ukoll ta’ xi wħud mis-sussidji addizzjonali, ma kien hemm l-ebda ħtieġa li jiġu investigati s-sussidji l-oħra kollha li l-applikant allega li jeżistu.

(47)

Wara d-divulgazzjoni, is-CISA sostniet li s-sejbiet li ntlaħqu fil-passat f’investigazzjonijiet antisussidji ma jistgħux sempliċiment jiġu trasposti fl-investigazzjoni attwali tal-Kummissjoni peress li tali treġġigħ lura tal-oneru tal-provi jiddevja mid-drittijiet tad-difiża aċċettati minn kwalunkwe konvenut f’investigazzjonijiet bħal dawn. Skont is-CISA, il-Kummissjoni użat is-sejbiet tal-passat f’investigazzjonijiet separati u mhux relatati oħra biex tpinġi prattiki ekonomiċi fiċ-Ċina bħala eżempji ta’ sussidjar. Madankollu, dan l-approċċ ma jservix ta’ prova tal-eżistenza ta’ sussidjar fir-rigward tal-prodott taħt rieżami.

(48)

Il-Kummissjoni qieset li l-applikant ipprovda provi biżżejjed tal-eżistenza, l-ammont, in-natura, il-benefiċċju u l-ispeċifiċità kif kien raġonevolment disponibbli għalih. Barra minn hekk, il-Kummissjoni qieset ukoll li fin-nuqqas ta’ kooperazzjoni, l-investigazzjonijiet antisussidji reċenti tal-UE relatati mal-istess programmi ta’ sussidju allegati fit-talba kienu eżaminaw ukoll il-benefiċċju, l-ispeċifiċità u l-ammonti ta’ sussidjar tal-istess programmi. Dawn is-sejbiet preċedenti ta’ sussidjar, flimkien mal-ammont kbir ta’ informazzjoni li tinsab fit-talba u kkonfermata mill-Kummissjoni matul din l-investigazzjoni, kienu jikkostitwixxu fatti disponibbli fir-rigward tal-kontinwazzjoni tas-sussidjar skont l-Artikolu 28 tar-Regolament bażiku. Konsegwentement, l-affermazzjoni ġiet miċħuda.

(49)

Fl-investigazzjoni oriġinali (19), il-Kummissjoni stabbiliet li l-banek tal-Istat (“SOBs”) kienu korpi pubbliċi għaliex dawn kienu jwettqu funzjonijiet governattivi u, permezz ta’ dan, dawn eżerċitaw awtorità tal-gvern.

(50)

Fir-rigward tal-banek li pprovdew self lill-produtturi li kkooperaw fl-investigazzjoni oriġinali, il-maġġoranza l-kbira tagħhom kienu tal-Istat. L-informazzjoni disponibbli fl-investigazzjoni oriġinali wriet li mill-anqas 35 mill-45 bank irrapportati kienu banek tal-Istat, inklużi l-banek kummerċjali ewlenin fiċ-Ċina, bħal Bank of China, China Construction Bank u Industrial and Commercial Bank of China. Barra minn hekk, instab ukoll li dawn il-banek kummerċjali tal-istat kellhom post predominanti fis-suq u fil-kapaċità tagħhom bħala korpi pubbliċi ġew involuti f’offerti ta’ self f’rati tal-imgħax aktar baxxi minn dawk tas-suq. Għaldaqstant, ġie konkluż li l-GTĊ kellu politika biex jingħata self preferenzjali lis-settur tal-HRF.

(51)

Il-Kummissjoni stabbiliet ukoll, abbażi ta’, inter alia, l-Artikoli 34 u 38 tal-Liġi Bankarja Kummerċjali u l-Artikoli 17 u 18 tal-Ordni Nru 40, li l-banek kummerċjali bi sjieda privata fiċ-Ċina kienu ġew inkarigati u ngħataw struzzjonijiet mill-GTĊ biex jipprovdu self preferenzjali lill-produtturi skont l-Artikolu 3(1)(a)(iv) tar-Regolament bażiku.

(52)

Għalhekk, il-Kummissjoni kkonkludiet li: kien hemm kontribuzzjoni finanzjarja lill-produtturi tal-HRF fil-forma ta’ trasferiment dirett ta’ fondi mill-gvern skont it-tifsira tal-Artikolu 3(1)(a)(i) tar-Regolament bażiku; u l-banek privati kienu wkoll inkarigati jew ngħataw struzzjonijiet mill-gvern biex jipprovdu kontribuzzjonijiet finanzjarji lill-istess produtturi skont it-tifsira tal-Artikolu 3(1)(a)(iv) tar-Regolament bażiku.

(53)

Instab li jeżisti benefiċċju skont it-tifsira tal-Artikoli 3(2) u 6(b) tar-Regolament bażiku sakemm is-self mill-gvern kienu jingħataw b’termini aktar favorevoli minn dawk li l-riċevitur jista’ fil-fatt jikseb mis-suq. Billi kien stabbilit li s-self mhux mill-gvern fiċ-Ċina ma jipprovdix valur referenzjarju xieraq tas-suq (il-banek privati jkunu inkarigati u jingħataw struzzjonijiet mill-GTĊ), dan il-valur referenzjarju ġie mfassal abbażi tar-rata tas-self standard tal-Bank tal-Poplu taċ-Ċina. Din ir-rata ġiet aġġustata sabiex tirrifletti r-riskju normali tas-suq biż-żieda tal-primjum xieraq mistenni fuq il-bonds li jinħarġu minn ditti bi klassifikazzjoni ta’ bonds ta’ “grad mhux ta’ investiment” (f’rata BB).

(54)

Il-programm ta’ sussidju nstab li kien speċifiku skont it-tifsira tal-Artikolu 4(2)(a) tar-Regolament bażiku, peress li l-industrija tal-azzar kienet tappartjeni għall-kategorija mħeġġa skont id-Deċiżjoni Nru 40 u d-dispożizzjonijiet tas-self kienu limitati biss għal intrapriżi tal-azzar li kienu jikkonformaw b’mod sħiħ mal-politiki ta’ żvilupp għall-industrija tal-ħadid u tal-azzar (l-Ordni Nru 35).

(55)

Barra minn hekk, il-programm instab li huwa speċifiku skont l-Artikolu 4(2)(b) tar-Regolament bażiku, peress li ċerti pjanijiet u dokumenti tal-gvern kienu qed iħeġġu u jagħtu struzzjonijiet biex jingħata appoġġ finanzjarju lill-industrija tal-azzar, anki f’reġjuni ġeografiċi speċifiċi taċ-Ċina.

(56)

Ir-rata tas-sussidju stabbilita fl-investigazzjoni oriġinali għall-produtturi esportaturi fil-kampjun kienet tvarja minn 1,99 % sa 27,91 %.

(57)

Fit-talba u fl-annessi korrispondenti (20), l-applikant ipprovda evidenza li l-produtturi Ċiniżi tal-HRF komplew jibbenefikaw minn self preferenzjali u rati tal-imgħax aktar baxxi minn dawk tas-suq minn banek domestiċi fiċ-Ċina.

(58)

L-applikant ipprovda evidenza tal-preżenza sinifikanti u tad-dominanza kontinwa fis-suq tal-SOBs fis-settur bankarju Ċiniż. Fil-punt (67), it-talba elenkat l-SOBs ewlenin li pprovdew self b’termini preferenzjali lill-produtturi tal-HRF fiċ-Ċina.

(59)

Fl-aħħar nett, l-applikant indika li l-banek privati baqgħu jiġu inkarigati u jingħataw struzzjonijiet mill-GTĊ biex jipprovdu self sussidjat, skont l-Artikolu 3.1(a)(iv) tar-Regolament bażiku. Għalhekk, is-sejbiet tal-Kummissjoni fl-investigazzjoni oriġinali f’dan ir-rigward għadhom validi.

(60)

Fin-nuqqas ta’ kooperazzjoni mill-GTĊ, ma tressaq l-ebda argument li kien jisfida l-evidenza li tressqet mill-applikant fir-rigward tas-sitwazzjoni attwali tas-sistema bankarja Ċiniża.

(61)

Barra minn hekk, il-kwistjonijiet kritiċi fl-istabbiliment ta’ dan il-programm ta’ sussidjar u l-kontinwazzjoni tiegħu, jiġifieri l-każijiet fejn l-SOBs jaġixxu bħala korp pubbliku, id-dominanza tagħhom fis-settur bankarju, l-inkarigar u l-għoti ta’ struzzjonijiet tal-banek privati, ġew ikkonfermati mir-Rapport dwar iċ-Ċina (21) u s-sejbiet tal-aktar investigazzjonijiet riċenti dwar it-tajers (22), ir-roti elettriċi (23), OCS (24), il-fibra tal-ħġieġ (25) u l-fojl tal-aluminju (26).

(62)

Fin-nuqqas ta’ kooperazzjoni mill-produtturi Ċiniżi, il-Kummissjoni ma kellha l-ebda informazzjoni speċifika għall-kumpaniji li fuqha seta’ jiġi kkalkolat l-ammont tas-sussidju mogħti matul il-perjodu ta’ investigazzjoni tar-rieżami. Filwaqt li l-ammont ta’ sussidjar matul il-perjodu ta’ investigazzjoni tar-rieżami ma setax jiġi stabbilit b’mod preċiż minħabba n-nuqqas ta’ kooperazzjoni, abbażi tat-talba, is-sejbiet fl-investigazzjonijiet preċedenti msemmija fil-premessa (61), u fin-nuqqas ta’ kwalunkwe indikazzjoni li turi l-kuntrarju, jista’ jiġi konkluż li l-produtturi Ċiniżi tal-HRF komplew jiġu ssussidjati.

(63)

Il-programm ta’ sussidju inkwistjoni kien għadu speċifiku skont it-tifsira tal-Artikoli 4(2)(a) u 4(2)(b) tar-Regolament bażiku, meta jitqies li s-sitwazzjoni legali deskritta fil-premessa (54) ma kinitx inbidlet u fid-dawl tal-14-il Pjan ġdid ta’ Ħames Snin għas-settur tal-azzar, li kkonferma l-industrija tal-azzar bħala industrija mħeġġa.

(64)

Għaldaqstant, il-Kummissjoni kkonkludiet li hemm biżżejjed evidenza li turi li s-self preferenzjali bħala sussidju kumpensatorju kompliet matul il-perjodu ta’ investigazzjoni tar-rieżami.

(65)

Fl-investigazzjoni oriġinali (27), il-Kummissjoni stabbilixxiet li l-provvista ta’ drittijiet għall-użu tal-art mill-Gvern Ċiniż jenħtieġ li titqies bħala miżura ta’ sussidju skont it-tifsira tal-Artikolu 3(1)(a)(iii) u l-Artikolu 3(2) tar-Regolament bażiku. Peress li ma kien hemm l-ebda suq li jiffunzjona għall-art fiċ-Ċina, il-GTĊ jipprovdi drittijiet għall-użu tal-art għal remunerazzjoni inqas minn adegwata, biex b’hekk jagħti benefiċċju lill-kumpaniji riċevituri. L-użu ta’ valur referenzjarju estern wera li l-ammont li tħallas għad-drittijiet għall-użu tal-art mill-produtturi tal-HRF huwa ferm akar baxx mir-rata normali tas-suq.

(66)

Il-Kummissjoni stabbiliet ukoll li s-sussidju huwa speċifiku skont l-Artikolu 4(2)(a) u 4(2)(c) tar-Regolament bażiku, għaliex l-aċċess għall-art industrijali bil-liġi huwa limitat biss għall-kumpaniji li jirrispettaw il-politiki industrijali stabbiliti mill-Istat. Barra minn hekk, ċerti tranżazzjonijiet biss kienu soġġetti għal proċess ta’ offerti, spiss il-prezzijiet kienu qed jiġu stabbiliti mill-awtoritajiet, u l-prattiki tal-gvern f’dan il-qasam ma humiex ċari u trasparenti.

(67)

Bl-użu tal-valur referenzjarju tal-prezzijiet tal-art fit-Tajwan, ir-rata tas-sussidju fir-rigward ta’ din il-miżura kienet stabbilita fl-investigazzjoni oriġinali għall-produtturi fil-kampjun fil-firxa ta’ bejn 1,20 % sa 7,63 %.

(68)

Fit-talba u fl-annessi korrispondenti (28), l-applikant ipprovda evidenza li l-produtturi Ċiniżi tal-HRF komplew jibbenefikaw minn drittijiet għall-użu tal-art għal remunerazzjoni inqas minn adegwata.

(69)

L-applikant indika li l-liġi li tirregola din il-kwistjoni ma nbidlitx mill-investigazzjoni oriġinali. Is-sjieda privata tal-art hija pprojbita fiċ-Ċina. Il-Liġi dwar l-Amministrazzjoni tal-Art, u b’mod partikolari l-Artikolu 2, għadha tipprevedi li l-art kollha fiċ-Ċina fl-aħħar mill-aħħar hija s-sjieda tal-GTĊ għaliex kollettivament din tappartjeni liċ-Ċina. Il-Liġi dwar il-Proprjetà (l-Artikoli 45-48) tispeċifika li l-art fiċ-Ċina hija jew “proprjetà kollettiva” jew “proprjetà tal-istat”. L-ebda art ma tista’ tinbigħ iżda jistgħu jingħataw drittijiet għall-użu tal-art permezz ta’ offerti pubbliċi, kwotazzjoni jew irkant.

(70)

La l-GTĊ u lanqas il-produtturi ma pprovdew evidenza li tissuġġerixxi li l-industrija tal-HRF ma baqgħetx tibbenefika mill-provvista ta’ drittijiet għall-użu tal-art għal remunerazzjoni inqas minn adegwata.

(71)

Abbażi tal-informazzjoni disponibbli, inklużi l-evidenza fir-Rapport dwar iċ-Ċina (29) f’dan ir-rigward u l-kostatazzjonijiet tal-aktar investigazzjonijiet riċenti dwar id-dazji kumpensatorji li jikkonċernaw ir-RPĊ fejn jidħlu tajers (30), roti elettriċi (31) u cables tal-fibra ottika (32), il-Kummissjoni kkonkludiet li r-rati li tħallsu għall-użu tal-art baqgħu jiġu sussidjati għaliex is-sistema imposta mill-GTĊ ma taderixxix mal-prinċipji tas-suq.

(72)

Fin-nuqqas ta’ kooperazzjoni mill-GTĊ u mill-produtturi Ċiniżi, il-Kummissjoni ma kellha l-ebda informazzjoni speċifika għall-kumpaniji li fuq il-bażi tagħha setgħet tikkalkula l-ammont tas-sussidju mogħti matul il-perjodu ta’ investigazzjoni tar-rieżami. Filwaqt li l-ammont ta’ sussidjar ma setax jiġi stabbilit b’mod preċiż minħabba n-nuqqas ta’ kooperazzjoni, abbażi tat-talba, is-sejbiet fl-investigazzjonijiet preċedenti msemmija fil-premessa (71), u fin-nuqqas ta’ kwalunkwe indikazzjoni għall-kuntrarju, jista’ jiġi konkluż li l-produtturi Ċiniżi tal-HRF komplew jiġu ssussidjati.

(73)

Is-sussidju huwa speċifiku skont it-tifsira tal-Artikoli 4(2)(a) u 4(2)(c) tar-Regolament bażiku. Id-drittijiet għall-użu tal-art jingħataw biss lil grupp limitat ta’ kumpaniji. Barra minn hekk, is-settur tal-azzar, li jagħmel parti mill-kategorija mħeġġa fi ħdan il-qafas tad-Deċiżjoni Nru 40 tal-Istat tal-Kunsill, jaqa’ fi ħdan is-setturi li jibbenefikaw mid-drittijiet għall-użu tal-art.

(74)

Għaldaqstant, il-Kummissjoni kkonkludiet li hemm evidenza suffiċjenti li turi li l-provvista ta’ drittijiet għall-użu tal-art għal remunerazzjoni inqas minn adegwata bħala sussidju kumpensatorju kompliet matul il-perjodu ta’ investigazzjoni tar-rieżami.

(75)

Fl-investigazzjoni oriġinali (33), il-Kummissjoni stabbiliet li l-produtturi tal-HRF kienu qed jieċievu sussidji kumpensatorji relatati mat-trattament preferenzjali taħt programmi u politiki ta’ taxxa fuq l-introjtu u ta’ taxxa diretta oħra.

(76)

Fir-rigward ta’ tliet programmi speċifiċi: Il-privileġġi tat-Taxxa fuq l-Introjtu tal-Intrapriżi (EIT) għall-Prodotti tar-Riżorsi mill-Użu Sinerġiku, l-EIT paċut għall-ispejjeż tar-riċerka u l-iżvilupp u l-Eżenzjoni mit-taxxa fuq l-użu tal-art, il-Kummissjoni bbażat is-sejbiet tagħha għall-bażi ġuridika, l-eliġibbiltà, in-natura tas-sussidju u l-ispeċifiċità tiegħu fuq it-tweġibiet ivverifikati għall-kwestjonarju u setgħet tikkalkula r-rati ta’ sussidju individwali għall-kumpaniji fil-kampjun.

(77)

Instab li l-programmi tat-taxxa fuq l-introjtu u ta’ taxxa diretta oħra huma sussidji skont it-tifsira tal-Artikolu 3(1)(a)(ii) u tal-Artikolu 3(2) tar-Regolament bażiku, fil-forma ta’ dħul tal-gvern mitluf li jagħti benefiċċju lill-kumpaniji riċevituri.

(78)

Instab ukoll li l-iskemi ta’ sussidju huma speċifiċi skont it-tifsira tal-Artikolu 4(2)(a) tar-Regolament bażiku, minħabba li l-leġiżlazzjonijiet li skonthom operat l-awtorità awtorizzanti llimitaw l-aċċess għall-iskemi għal ċerti intrapriżi u industriji biss ikklassifikati bħala mħeġġa, bħal dawk li jappartjenu għall-industrija tal-HRF.

(79)

Ir-rata tas-sussidju stabbilita fl-investigazzjoni oriġinali għall-produtturi esportaturi fil-kampjun kienet tvarja minn 0,00 % sa 0,66 %.

(80)

Fit-talba għal rieżami ta’ skadenza (34), l-applikant ipprovda evidenza li ħafna produtturi Ċiniżi tal-HRF għadhom jibbenefikaw minn diversi programmi tal-privileġġi tat-Taxxa fuq l-Introjtu tal-Intrapriżi (EIT) ikkumpensati fl-investigazzjoni oriġinali. Il-bażi ġuridika tal-programm ta’ privileġġi tal-EIT hija l-Artikolu 28 tal-Liġi tal-EIT u l-Artikolu 93 tar-Regoli ta’ Implimentazzjoni għal-Liġi tar-RPĊ dwar it-Taxxa fuq l-Introjtu tal-Intrapriżi. Barra minn hekk, l-applikant ipprovda evidenza dwar il-kumpens tal-EIT għas-sussidju tar-riċerka u l-iżvilupp b’bażi ġuridika fl-Artikolu 30(1) tal-liġi tal-EIT, flimkien mar-Regoli ta’ Implimentazzjoni għal-Liġi tar-RPĊ dwar it-Taxxa fuq l-Introjtu tal-Intrapriżi.

(81)

L-investigazzjonijiet tal-kejbils tal-fibra ottika (35) u tal-fojl tal-aluminju (36) kkonfermaw li l-iskemi kienu għadhom qed jintużaw u li n-natura tagħhom ma kinitx inbidlet.

(82)

Fin-nuqqas ta’ kooperazzjoni mill-GTĊ, ma tressaq l-ebda argument li kien jisfida l-evidenza li tressqet mill-applikant fir-rigward tal-benefiċċji kontinwi tal-produtturi tal-HRF minn programmi u politiki tat-taxxa fuq l-introjtu u ta’ taxxa diretta oħra.

(83)

L-iskemi inkwistjoni jitqiesu li huma sussidji skont it-tifsira tal-Artikoli 3(1)(a)(ii) u 3(2) tar-Regolament bażiku fil-forma ta’ dħul mitluf tal-gvern li jagħti benefiċċju lill-kumpanniji riċevituri.

(84)

Fin-nuqqas ta’ kooperazzjoni mill-GTĊ u mill-produtturi Ċiniżi, il-Kummissjoni ma kellha l-ebda informazzjoni speċifika għall-kumpaniji li fuq il-bażi tagħha setgħet tikkalkula l-ammont tas-sussidju mogħti matul il-perjodu ta’ investigazzjoni tar-rieżami. Filwaqt li l-ammont ta’ sussidjar ma setax jiġi stabbilit b’mod preċiż minħabba n-nuqqas ta’ kooperazzjoni, abbażi tat-talba, is-sejbiet fl-investigazzjonijiet preċedenti msemmija fil-premessa (81), u fin-nuqqas ta’ kwalunkwe indikazzjoni għall-kuntrarju, seta’ jiġi konkluż li l-produtturi Ċiniżi tal-HRF komplew jiġu ssussidjati.

(85)

L-iskemi huma speċifiċi skont it-tifsira tal-Artikolu 4(2)(a) tar-Regolament bażiku minħabba li l-leġiżlazzjonijiet li skonthom operat l-awtorità awtorizzanti llimitaw l-aċċess għall-iskemi għal ċerti intrapriżi u industriji biss.

(86)

Għaldaqstant, il-Kummissjoni kkonkludiet li hemm biżżejjed evidenza li turi li xi wħud mill-programmi tat-taxxa komplew ikunu bħala sussidji kumpensatorji matul il-perjodu ta’ investigazzjoni tar-rieżami.

(87)

Fl-investigazzjoni oriġinali (37), il-Kummissjoni stabbilixxiet li l-produtturi tal-HRF kienu qed jiriċevu sussidji kumpensatorji relatati mat-trattament preferenzjali taħt żewġ programmi tat-taxxa indiretta u tat-taxxa tal-importazzjoni:

(88)

Instab li l-programmi tat-taxxa indiretta u tat-taxxa tal-importazzjoni huma sussidji skont it-tifsira tal-Artikolu 3(1)(a)(ii) u 3(2) tar-Regolament bażiku, fil-forma ta’ dħul tal-gvern mitluf li jagħti benefiċċju lill-kumpaniji riċevituri.

(89)

Instab ukoll li l-iskemi ta’ sussidju huma speċifiċi skont it-tifsira tal-Artikolu 4(2)(a) tar-Regolament bażiku, minħabba li l-leġiżlazzjonijiet li skonthom operat l-awtorità awtorizzanti llimitaw l-aċċess għall-iskemi għal ċerti intrapriżi u industriji biss. Barra minn hekk, in-nuqqas ta’ kooperazzjoni mill-GTĊ ma ppermettiex lill-Kummissjoni tilħaq il-konklużjoni dwar jekk kinux jeżistu kriterji oġġettivi ta’ eliġibbiltà għal ċerti skemi li għamluhom ukoll speċifiċi skont l-Artikolu 4(2)(b) tar-Regolament bażiku.

(90)

Ir-rata tas-sussidju stabbilita fl-investigazzjoni oriġinali għall-produtturi esportaturi fil-kampjun kienet ta’ 1,01 %.

(91)

It-talba kif ukoll is-sejbiet tal-aktar investigazzjonijiet antisussidji reċenti mwettqa mill-Kummissjoni dwar l-industriji mħeġġa fiċ-Ċina bħat-tajers (38), l-OCS (39) u l-investigazzjonijiet tal-fojl (40) tal-aluminju kkonfermaw li l-iskemi kienu għadhom qed jintużaw u li n-natura tagħhom ma nbidlitx.

(92)

Fin-nuqqas ta’ kooperazzjoni mill-GTĊ u l-produtturi Ċiniżi tal-HRF, ma tressaq l-ebda argument li kien jisfida l-evidenza li tressqet mill-applikant fir-rigward tal-benefiċċji kontinwi tal-produtturi tal-HRF minn programmi u politiki tat-taxxa indiretta u tat-taxxa tal-importazzjoni.

(93)

L-iskemi inkwistjoni jitqiesu li huma sussidji skont it-tifsira tal-Artikoli 3(1)(a)(ii) u 3(2) tar-Regolament bażiku fil-forma ta’ dħul mitluf tal-gvern li jagħti benefiċċju lill-kumpanniji riċevituri.

(94)

Fin-nuqqas ta’ kooperazzjoni mill-GTĊ u mill-produtturi tal-HRF Ċiniżi, il-Kummissjoni ma kellha l-ebda informazzjoni speċifika għall-kumpaniji li fuq il-bażi tagħha setgħet tikkalkula l-ammont tas-sussidju mogħti matul il-perjodu ta’ investigazzjoni tar-rieżami. Filwaqt li l-ammont ta’ sussidjar ma setax jiġi stabbilit b’mod preċiż minħabba n-nuqqas ta’ kooperazzjoni, abbażi tat-talba, is-sejbiet fl-investigazzjonijiet preċedenti msemmija fil-premessa (91), u fin-nuqqas ta’ kwalunkwe indikazzjoni għall-kuntrarju, seta’ jiġi konkluż li l-produtturi tal-HRF komplew jiġu ssussidjati.

(95)

L-iskemi huma speċifiċi skont it-tifsira tal-Artikolu 4(2)(a) tar-Regolament bażiku, peress li l-aċċess għall-iskemi huwa limitat għal ċerti intrapriżi u industriji biss.

(96)

Għaldaqstant, il-Kummissjoni tikkonkludi li hemm evidenza suffiċjenti li turi li l-programmi tat-taxxa indiretta u tat-taxxa tal-importazzjoni komplew ikunu sussidji kumpensatorji matul il-perjodu ta’ investigazzjoni tar-rieżami.

(97)

Fl-investigazzjoni oriġinali (41), il-Kummissjoni kkonkludiet li l-kumpaniji kollha fil-kampjun ibbenefikaw minn varjetà ta’ għotjiet relatati mal-protezzjoni ambjentali u t-tnaqqis tal-emissjonijiet u minn għotjiet relatati mar-R &D, l-aġġornament teknoloġiku u l-innovazzjoni.

(98)

L-investigazzjoni oriġinali kkonkludiet ukoll b’mod pożittiv dwar l-eżistenza ta’ għadd ta’ sussidji ad hoc mogħtija lil ċerti produtturi tal-HRF minn livelli differenti ta’ awtoritajiet tal-gvern, jiġifieri lokali, reġjonali u nazzjonali. Eżempji ta’ dawn l-għotjiet kienu fondi għall-privattivi, fondi u premjijiet għax-xjenza u t-teknoloġija, fondi għall-iżvilupp tan-negozju, għotjiet għal infrastruttura bażika, fondi ta’ appoġġ ipprovduti fil-livell distrettwali jew provinċjali, fondi għall-importazzjoni ta’ minerali tal-ħadid, fondi għar-rilokazzjoni tal-kumpanija, fond speċjali għall-introduzzjoni ta’ teknoloġija avvanzata barra mill-pajjiż, skontijiet ta’ mgħax fuq self għal tagħmir importat.

(99)

Dawn l-għotjiet u sussidji ad hoc oħra nstabu li jikkostitwixxu sussidju fis-sens tal-Artikolu 3(1)(a)(i) u tal-Artikolu 3(2) tar-Regolament bażiku, jiġifieri trasferiment ta’ fondi mill-GTĊ fil-forma ta’ għotjiet lill-produtturi tal-prodott ikkonċernat.

(100)

Instab ukoll li dawn kienu speċifiċi jew skont l-Artikolu 4(2)(a) tar-Regolament bażiku, minħabba li jidhru li huma limitati għal ċerti kumpaniji jew għal proġetti speċifiċi f’reġjuni speċifiċi u/jew fl-industrija tal-azzar, jew skont l-Artikolu 4(2)(b), minħabba li l-kundizzjonijiet ta’ eliġibbiltà u l-kriterji attwali tal-għażla għall-intrapriżi biex ikunu eliġibbli ma humiex trasparenti, ma humiex oġġettivi u ma japplikawx awtomatikament.

(101)

Ir-rata tas-sussidju stabbilita fl-investigazzjoni oriġinali għall-produtturi esportaturi fil-kampjun kienet tvarja minn 0,09 % sa 1,45 %.

(102)

Fit-talba għal rieżami ta’ skadenza (42), l-applikant ipprovda evidenza li ħafna produtturi tal-HRF għadhom jibbenefikaw minn programmi ta’ għotjiet.

(103)

Il-kostatazzjonijiet tal-aktar investigazzjonijiet antisussidji reċenti mwettqa mill-Kummissjoni dwar l-industriji mħeġġa fiċ-Ċina bħal OCS (43) u l-fojl tal-aluminju (44) kkonfermaw li l-iskemi kienu għadhom qed jintużaw u li n-natura tagħhom ma nbidlitx.

(104)

Il-biċċa l-kbira tal-għotjiet ngħataw sabiex jiġu ffinanzjati proġetti jew assi partikolari, jingħataw konservazzjoni tal-enerġija jew ħarsien tal-ambjent, u jiġu modernizzati l-funderiji tal-azzar.

(105)

L-applikant ipprovda wkoll evidenza, abbażi tal-analiżi tal-kontijiet annwali ta’ kumpaniji speċifiċi, li mill-inqas 12-il produttur tal-HRF irċevew sussidji bejn l-2018 u l-2021.

(106)

L-għotjiet kollha u s-sussidji ad hoc l-oħra li ġew analizzati matul l-investigazzjoni tar-rieżami ta’ skadenza kienu jikkostitwixxu sussidju skont it-tifsira tal-Artikolu 3(1)(a)(i) tar-Regolament bażiku, fil-forma ta’ trasferiment dirett ta’ fondi fir-rigward tal-għotjiet u trasferimenti simili ta’ riżorsi.

(107)

Fin-nuqqas ta’ kooperazzjoni mill-GTĊ u mill-produtturi tal-HRF, ma tressaq l-ebda argument li kien jisfida l-evidenza li tressqet mill-applikant fir-rigward tal-benefiċċji kontinwi tal-produtturi tal-HRF minn għotjiet jew mogħtija ad hoc.

(108)

Fin-nuqqas ta’ kooperazzjoni mill-GTĊ u mill-produtturi Ċiniżi, il-Kummissjoni ma kellha l-ebda informazzjoni speċifika għall-kumpaniji li fuq il-bażi tagħha setgħet tikkalkula l-ammont tas-sussidju mogħti matul il-perjodu ta’ investigazzjoni tar-rieżami. Filwaqt li l-ammont ta’ sussidjar ma setax jiġi stabbilit b’mod preċiż minħabba n-nuqqas ta’ kooperazzjoni, abbażi tat-talba, is-sejbiet fl-investigazzjonijiet preċedenti msemmija fil-premessa (103), u fin-nuqqas ta’ kwalunkwe indikazzjoni għall-kuntrarju, jista’ jiġi konkluż li l-produtturi tal-HRF komplew jiġu ssussidjati.

(109)

Dawn is-sussidji tqiesu li huma speċifiċi fid-dritt jew fil-fatt, skont it-tifsira tal-Artikolu 4(2) tar-Regolament bażiku. Fin-nuqqas ta’ kooperazzjoni mill-GTĊ u mill-produtturi Ċiniżi tal-HRF, dawn jitqiesu li ngħataw lil għadd limitat ta’ produtturi tal-HRF, u/jew minħabba l-mod li bih ġiet eżerċitata d-diskrezzjoni tal-awtoritajiet awtorizzanti għall-għoti tagħhom.

(110)

Għaldaqstant, il-Kummissjoni kkonkludiet li hemm biżżejjed evidenza li turi li l-produtturi komplew jirċievu għotjiet bħala sussidji kumpensatorji matul il-perjodu ta’ investigazzjoni tar-rieżami.

(111)

It-talba għal rieżami ta’ skadenza (45) kien fiha evidenza li diversi produtturi Ċiniżi tal-HRF kienu involuti fit-tieni ġenerazzjoni tad-dejn għal strumenti azzjonarji mwettqa mill-2016 sal-2019, għal total ikkombinat ta’ RMB 237 biljun ta’ djun. Huwa allegat li d-dejn pendenti dovut mill-produtturi tal-azzar tal-Istat lill-banek kummerċjali tal-Istat (“SOCBS”) ġie kkanċellat bi skambju għall-ekwità permezz tal-involviment ta’ diversi tipi ta’ Aġenziji ta’ Implimentazzjoni (IAs) li huma istituzzjonijiet finanzjarji mhux bankarji taħt il-ġuriżdizzjoni tal-Kummissjoni Regolatorja Ċiniża Bankarja u tal-Assigurazzjoni. L-aktar forma komuni ta’ IAs għall-konverżjoni ta’ dejn f’ekwità (DES) huma kumpaniji ta’ investiment f’assi finanzjarji (FAIC) li jittieħdu minn banek jew minn kumpaniji tal-assigurazzjoni. It-talba affermat ukoll li l-IAs inħolqu speċifikament sabiex jiddisponu minn self improduttiv enormi f’industriji ewlenin, fosthom is-settur tal-azzar u sabiex jistrutturaw mill-ġdid id-djun tal-SOEs fost l-oħrajn permezz ta’ skambji ta’ dejn għal ekwità.

(112)

Minħabba li l-GTĊ naqas milli jipprovdi kwalunkwe informazzjoni dwar dan il-programm, il-Kummissjoni għamlet is-sejbiet tagħha dwar dan il-programm abbażi tal-informazzjoni li tinsab fit-talba u tal-informazzjoni mill-investigazzjoni antisussidji mwettqa mill-Kummissjoni dwar is-settur tal-azzar fiċ-Ċina, jiġifieri l-OCS (46).

(113)

Kif huwa eżaminat fil-premessa (91) hawn fuq, il-Kummissjoni stabbiliet li l-HRF hija industrija mħeġġa u fit-taqsima 3.4.1 sabet li l-produtturi tal-HRF jagħmlu użu minn finanzjament preferenzjali bis-saħħa tal-fatt li l-GTĊ kellu politika li jipprovdi self preferenzjali lis-settur tal-HRF permezz ta’ banek tal-Istat, u wkoll il-banek privati ġew fdati u ordnati mill-GTĊ biex jipprovdu dan is-self preferenzjali lill-produtturi tal-HRF. Barra minn hekk, il-Kummissjoni stabbiliet li l-GTĊ bena ekosistema regolatorja sħiħa madwar il-kunċett ta’ DES li tkopri għadd u varjetà dejjem akbar ta’ kredituri, kumpaniji fil-mira, aġenziji ta’ implimentazzjoni, investituri, pjattaformi ta’ servizzi u istituzzjonijiet superviżorji. U filwaqt li d-dokumenti tal-GTĊ jenfasizzaw b’mod konsistenti l-orjentazzjoni lejn is-suq ta’ din is-sistema, huma jfakkru wkoll lill-parteċipanti li huma mistennija jservu l-ġid aħħari ta’ kulħadd u jippromwovu l-għanijiet tal-politika ekonomika nazzjonali.

(114)

Skont l-“Opinjonijiet ta’ Gwida dwar ir-Regolazzjoni tan-Negozju tal-Ġestjoni tal-Assi tal-Istituzzjonijiet Finanzjarji”, id-dokument imsemmi fit-talba, l-istituzzjonijiet finanzjarji huma mħeġġa jiġbru fondi permezz tal-ħruġ ta’ prodotti għall-ġestjoni tal-assi biex jinvestu f’oqsma li jissodisfaw ir-rekwiżiti tal-istrateġiji nazzjonali u l-politiki industrijali u jissodisfaw ir-rekwiżiti tal-politiki nazzjonali ta’ riforma strutturali min-naħa tal-provvista skont il-premessa ta’ konformità mal-liġijiet u r-regolamenti u s-sostenibbiltà tan-negozju. Barra minn hekk, l-istituzzjonijiet finanzjarji huma mħeġġa wkoll jiġbru fondi permezz tal-ħruġ ta’ prodotti ta’ ġestjoni tal-assi biex jappoġġaw it-trasformazzjoni tal-istruttura ekonomika, jappoġġaw l-iskambju legalizzat ta’ dejn ma’ ekwità orjentat lejn is-suq, u jnaqqsu l-ingranaġġ korporattiv.

(115)

It-talba rreferiet ukoll għal “Opinjonijiet dwar ir-Riżoluzzjoni tal-Kapaċità Eċċessiva fl-Industrija tal-Azzar u r-Rijalizzazzjoni ta’ Rkupru” li enfasizzaw il-ħtieġa li jiżdied l-appoġġ ta’ finanzjament għall-intrapriżi tal-azzar u l-ħtieġa li jiġi attirat kapital ta’ investiment minn sorsi oħra minbarra l-baġit tal-Istat u l-istituzzjonijiet finanzjarji, bħal prodotti ta’ ġestjoni tal-fondi, fondi ta’ pensjoni eċċ. Barra minn hekk, dan id-dokument iħeġġeġ l-iżvilupp ta’ approċċi bbażati fuq is-suq fl-ipproċessar tad-dejn korporattiv u fl-appoġġ lill-banek għad-disponiment ta’ dejn f’diffikultà billi jittrasferixxu pożizzjonijiet ta’ self f’diffikultà lil korporazzjonijiet tal-immaniġġar tal-assi.

(116)

L-“Opinjonijiet dwar l-Appoġġ lill-Industriji tal-Azzar u tal-Faħam għar-Riżoluzzjoni tal-Kapaċità Eċċessiva u r-Rijalizzazzjoni ta’ Rkupru”, ippubblikat fl-2016 mill-Bank tal-Poplu taċ-Ċina u mill-kummissjonijiet regolatorji li jissorveljaw is-setturi bankarji, tal-assigurazzjoni u tat-titoli, jagħti struzzjonijiet dwar kif l-industriji tal-azzar u tal-faħam jistgħu jiġu megħjuna jsolvu problemi ta’ kapaċità żejda u ta’ insolvenza. Dan jinkiseb permezz tal-intrapriżi bir-“rwol ta’ gwida tas-servizzi finanzjarji” li jippermettu lill-industriji tal-faħam u tal-azzar itejbu l-prestazzjoni finanzjarja, teknoloġika u ambjentali tagħhom. Barra minn hekk, l-intrapriżi li jikkonformaw mal-politiki industrijali nazzjonali u li jistgħu jissodisfaw diversi kundizzjonijiet definiti b’mod vag relatati mar-ristrutturar, is-solvenza u l-protezzjoni ambjentali jistgħu jibbenefikaw mill-aġġustament mill-ġdid tal-perjodi ta’ kreditu.

(117)

Fit-talba għal rieżami ta’ skadenza, hemm informazzjoni dwar l-istabbiliment tas-sistema ta’ konferenza konġunta taħt it-tmexxija tal-Kunsill tal-Istat li rreveda u approva politiki regolatorji u ta’ appoġġ, inkluża l-implimentazzjoni ta’ ċiklu ġdid ta’ skambju ta’ dejn ma’ ekwità. Fl-istess ħin, hija ħadmet mekkaniżmi konġunti ta’ kastig biex tissanzjona l-ksur tar-regoli. Barra minn hekk, il-konferenza konġunta talbet li t-tranżazzjonijiet DES ikunu ta’ benefiċċju għall-intrapriżi u għall-industriji b’sinifikat kbir għat-trasformazzjoni ekonomika u kif ukoll għas-sigurtà nazzjonali.

(118)

Fil-Konferenza ta’ Ħidma Finanzjarja tal-2017 tal-Partit Komunista tal-Kumitat Ċentrali taċ-Ċina (CPCCC), is-Segretarju Ġenerali Xi Jinping ikkonferma pożizzjonijiet li ilhom jinżammu li l-istituzzjonijiet finanzjarji jeħtiġilhom jifhmu r-rwol tagħhom l-ewwel u qabel kollox bħala li jservu l-ekonomija reali u jeħtiġilhom jagħmlu ħilithom kollha biex isaħħu l-punti dgħajfa tagħha. Fid-dikjarazzjoni tiegħu huwa elabora fuq id-dmir tas-settur finanzjarju li jservi l-ekonomija reali billi jħarisha minn riskji finanzjarji. Permezz ta’ dan, is-settur finanzjarju jenħtieġ li jtejjeb l-effiċjenza u l-kwalità tas-servizz u jalloka aktar riżorsi f’oqsma ewlenin u dgħajfa ta’ żvilupp ekonomiku u soċjali. Barra minn hekk, il-gvern huwa involut fit-tnaqqis tal-ingranaġġ tal-ekonomija billi b’mod sod imexxi politika monetarja prudenti u jagħti prijorità lit-tnaqqis tal-ingranaġġ f’intrapriżi tal-Istat.

(119)

Il-laqgħa tal-Kumitat Permanenti tal-Kunsill tal-Istat (SC) taċ-Ċina fl-2017 poġġiet it-tnaqqis fl-ingranaġġ tal-SOE proprju fiċ-ċentru tal-kompitu ġenerali ta’ tnaqqis fl-ingranaġġ korporattiv. Il-Kumitat Permanenti ppropona l-iżvilupp ta’ miżuri ta’ appoġġ fiskali rilevanti għal assi tal-Istat b’ingranaġġ eċċessiv fl-industriji tal-azzar u tal-faħam. Huwa ddiskuta wkoll l-istabbiliment ta’ mekkaniżmu komplementari tal-kapital tal-Istat u d-disponibbiltà tal-kapital meħtieġ għat-trasformazzjoni u l-aġġornament.

(120)

Fid-dawl tal-kunsiderazzjonijiet ta’ hawn fuq, il-Kummissjoni kkonkludiet li l-iskambji ta’ dejn ma’ ekwità jikkostitwixxu kontribuzzjoni finanzjarja fil-forma ta’ infużjoni ta’ ekwità u/jew self skont it-tifsira tal-Artikolu 3(1)(a)(i) tar-Regolament bażiku jew fil-forma ta’ dħul mitluf li jirriżulta minn dejn imħassar jew mhux imħallas skont it-tifsira tal-Artikolu 3(1)(a)(ii). Il-gvern ipprovda din il-kontribuzzjoni finanzjarja permezz tal-korpi pubbliċi involuti f’dawn it-tranżazzjonijiet, jiġifieri l-erba’ IAs u diversi SOCBs. Fin-nuqqas ta’ kwalunkwe kooperazzjoni mill-GTĊ matul l-investigazzjoni tar-rieżami ta’ skadenza, il-Kummissjoni kkonkludiet li l-evidenza rreġistrata wriet biżżejjed li l-IAs kienu korpi pubbliċi, peress li dawn inħolqu speċifikament mill-GTĊ biex jiddisponu minn self improduttiv enormi f’industriji ewlenin, inkluż is-settur tal-azzar, u biex jistrutturaw mill-ġdid id-djun tal-SOEs. Konsegwentement, ġie meqjus li l-imġiba tagħhom kienet tikkorrispondi għall-eżerċizzju tal-awtorità tal-gvern.

(121)

Barra minn hekk, it-talba kienet tinkludi evidenza li l-ammont kbir ta’ kanċellazzjonijiet ta’ dejn ma kienx soġġett għal kunsiderazzjonijiet kummerċjali normali, peress li l-GTĊ ma wettaqx valutazzjoni dwar jekk investitur privat normali jkunx wettaq dawn l-iskambji ta’ dejn ma’ ekwità fl-istennija li maż-żmien tiġi ġġenerata rata ta’ ritorn raġonevoli. It-talba kienet tinkludi informazzjoni li l-GTĊ skambja ammonti enormi ta’ dejn ma’ ekwità bl-objettiv li jnaqqas il-proporzjon tal-obbligazzjonijiet meta mqabbla mal-assi tal-produtturi tal-HRF biex iżid il-kompetittività tagħhom mingħajr il-kunsiderazzjonijiet kummerċjali li investitur privat kieku jagħmel. Il-Kummissjoni, wara analiżi bir-reqqa tal-informazzjoni mogħtija fit-talba u fin-nuqqas ta’ kwalunkwe informazzjoni oħra fil-fajl, ikkonkludiet li l-miżuri kienu qed jagħtu benefiċċju skont it-tifsira tal-Artikolu 6(a) tar-Regolament bażiku.

(122)

L-iskambji ta’ dejn ma’ ekwità jikkostitwixxu kontribuzzjoni finanzjarja fil-forma ta’ infużjoni ta’ ekwità u/jew self fis-sens tal-Artikolu 3(1)(a)(i) tar-Regolament bażiku jew fil-forma ta’ dħul mitluf li jirriżulta minn dejn imħassar jew mhux imħallas fis-sens tal-Artikolu 3(1)(a)(ii) tar-Regolament bażiku.

(123)

Fin-nuqqas ta’ kwalunkwe kooperazzjoni mill-GTĊ u mill-produtturi Ċiniżi tal-HRF matul dan ir-rieżami, il-Kummissjoni, wara analiżi bir-reqqa tal-informazzjoni mogħtija fit-talba u fin-nuqqas ta’ kwalunkwe informazzjoni oħra fil-fajl, ikkonkludiet li l-miżuri, għaldaqstant, kienu qed jagħtu benefiċċju skont it-tifsira tal-Artikolu 6(a) tar-Regolament bażiku.

(124)

Is-sussidju kien speċifiku f’konformità mal-Artikoli 4(2)(b) tar-Regolament bażiku, peress li ma kien hemm l-ebda kriterju oġġettiv għall-provvista tas-sussidji u ma kienx ċar taħt liema kundizzjonijiet il-produtturi tal-HRF jistgħu jew ma jistgħux ikunu involuti f’dan il-programm. L-iskambji kienu wkoll speċifiċi skont l-Artikolu 4(2)(c) tar-Regolament bażiku, meta titqies id-diskrezzjoni kbira tal-awtoritajiet pubbliċi biex jagħtu s-sussidju u ċerti setturi biss ibbenefikaw mis-sussidju, bħal dawk li jkunu qed ibati minn kapaċità żejda.

(125)

Għaldaqstant, il-Kummissjoni kkonkludiet li hemm biżżejjed evidenza li turi li l-produtturi tal-HRF fir-RPĊ ibbenefikaw mill-iskambji ta’ dejn ma’ ekwità bħala sussidju kumpensatorju matul il-perjodu ta’ investigazzjoni tar-rieżami fil-forma ta’ assistenza finanzjarja biex jitnaqqas id-dejn korporattiv ta’ kumpaniji b’dejn kbir.

(126)

Fid-dawl ta’ dan ta’ hawn fuq, il-Kummissjoni kkonkludiet li l-produtturi tal-HRF fiċ-Ċina komplew jibbenefikaw minn sussidji kumpensatorji matul il-perjodu ta’ investigazzjoni tar-rieżami.

(127)

Wara s-sejba tal-eżistenza ta’ sussidju matul il-perjodu ta’ investigazzjoni tar-rieżami, il-Kummissjoni investigat il-probabbiltà tal-kontinwazzjoni ta’ importazzjonijiet issussidjati mill-pajjiż ikkonċernat, jekk il-miżuri jiġu revokati. Ġew analizzati l-elementi addizzjonali li ġejjin: il-kapaċità tal-produzzjoni u l-kapaċità ta’ riżerva fir-RPĊ u l-attraenza tas-suq tal-Unjoni.

(128)

Fin-nuqqas ta’ kooperazzjoni mill-produtturi fir-RPĊ, il-Kummissjoni bbażat is-sejbiet tagħha fir-rigward tal-kapaċità tal-produtturi l-oħra fuq il-fatti disponibbli u qagħdet fuq l-informazzjoni li tinsab fit-talba għal rieżami ta’ skadenza, kif ukoll sorsi disponibbli oħrajn.

(129)

Fl-2020, iċ-Ċina kienet tirrappreżenta 56,5 % tal-produzzjoni dinjija tal-azzar mhux maħdum, meta mqabbla ma’ 53,3 % fl-2019 (47). F’Settembru 2020, dikjarazzjoni mit-88 Sessjoni tal-Kumitat tal-Azzar tal-OECD innotat li “minkejja x-xokk globali negattiv tad-domanda, il-produzzjoni u l-inventarji żdiedu b’mod sinifikanti mil-livelli ta’ sena ilu fiċ-Ċina”. Barra minn hekk, il-Kumitat tal-Azzar innota “bi tħassib id-diverġenza mix-xejra globali fiċ-Ċina, fejn il-produzzjoni tal-azzar laħqet volumi rekord fl-ewwel semestru tal-2020, u fejn l-inventarji laħqu livelli storikament għoljin. Dawn l-iżviluppi joħolqu riskju ta’ provvista żejda fiċ-Ċina li qed taggrava l-iżbilanċi globali li jirriżultaw mix-xokkijiet tad-domanda tal-COVID-19.” Ix-xejra tal-kapaċità tal-produzzjoni tal-azzar dejjem tikber fiċ-Ċina ġiet appoġġata ulterjorment minn “tnaqqis kbir fil-kundizzjonijiet tal-kreditu”, flimkien ma’ żieda fl-investiment minn produtturi kbar tal-azzar, filwaqt li atturi iżgħar għadhom barra mis-sistema ta’ kontroll tal-kapaċità. Barra minn hekk, ir-Rapport tal-OECD ta’ Frar 2021 innota żieda fil-kapaċità żejda tal-azzar madwar id-dinja u xprunata b’mod partikolari mill-pajjiżi Asjatiċi inkluża ċ-Ċina (48).

(130)

Il-Gvern Ċiniż għandu pjanijiet ambizzjużi għall-industrija tal-azzar tiegħu (49) peress li għandu l-għan li jneħħi impjanti skaduti u kumpaniji mhux kompetittivi bi spejjeż eċċessivi filwaqt li jiffoka fuq it-tisħiħ u l-promozzjoni tal-produtturi tal-azzar li huma konformi mal-politiki u l-prijoritajiet tal-gvern. L-idea hija li l-industrija titnaddaf, li jissaħħu l-atturi ewlenin u li jitneħħew l-operaturi li ma jilħqux l-aħjar prestazzjoni u dawk li ma jikkonformawx (jew jallinjaw ruħhom) mal-prijoritajiet tal-gvern. L-għan huwa li titrawwem “ġenerazzjoni ġdida ta’ mexxejja tal-industrija”. Dan jinkiseb permezz ta’ politiki bħas-sistema ta’ konverżjoni tal-kapaċità, l-iskambju ta’ dejn ma’ ekwità, li jippermettu diskrezzjoni sostanzjali ħafna tal-Istat fuq l-operazzjonijiet ta’ ditti individwali. L-għan sottostanti huwa li jiżdiedu l-kapaċitajiet ta’ atturi “magħżula”, li huma produtturi b’livell għoli ta’ prestazzjoni li jikkonformaw mal-objettivi attwali tal-gvern għall-industrija tal-azzar.

(131)

L-informazzjoni li tinsab fit-talba għal rieżami ta’ skadenza stmat il-kapaċità Ċiniża totali ta’ ċerti prodotti ċatti b’laminazzjoni termali tal-ħadid, azzar mhux illigat jew liga oħra tal-azzar għal aktar minn 345 miljun tunnellata, filwaqt li l-produzzjoni u l-konsum Ċiniż it-tnejn kienu stmati għal 314-il miljun tunnellata fl-2020. Abbażi ta’ dan, il-kapaċità ta’ riżerva fiċ-Ċina kienet stmata għal 31 miljun tunnellata fl-2020, li hija indikattiva għall-kapaċità ta’ riżerva fil-perjodu tal-investigazzjoni ta’ rieżami u li hija kważi daqs il-konsum totali tal-Unjoni fis-suq ħieles (madwar 35 miljun tunnellata) fil-perjodu ta’ investigazzjoni tar-rieżami.

(132)

Id-deċellerazzjoni fid-domanda Ċiniża għall-azzar fil-bidu tal-2021 hija u se tkun mutur ewlieni taż-żieda fl-esportazzjonijiet. L-iżbilanċ li jirriżulta bejn il-kapaċità u d-domanda x’aktarx li jżid il-pressjoni fuq il-produtturi biex jesportaw. Il-kapaċitajiet Ċiniżi huma kbar wisq meta mqabbla mal-ħtiġijiet attwali tal-ekonomija Ċiniża.

(133)

Fuq din il-bażi, huwa probabbli li l-produtturi Ċiniżi se jidderieġu l-kapaċitajiet ta’ riżerva tagħhom lejn is-suq tal-Unjoni fi kwantitajiet kbar bi prezzijiet sussidjati f’każ li l-miżuri jiskadu.

(134)

Is-suq tal-Unjoni huwa fost l-akbar swieq ta’ ċerti prodotti ċatti tal-azzar b’laminazzjoni termali madwar id-dinja. Is-suq Ċiniż ma jistax jassorbi l-kapaċità żejda tal-azzar u s-swieq ewlenin ta’ pajjiżi terzi huma magħluqa għall-esportazzjonijiet Ċiniżi peress li għandhom fis-seħħ miżuri anti-dumping, salvagwardji jew miżuri protettivi oħra kontra r-RPĊ (50). Barra minn hekk, il-livelli tal-prezzijiet fl-Unjoni (il-prezz medju mitlub mill-industrija tal-Unjoni kien ta’ EUR 734/tunnellata matul il-perjodu ta’ investigazzjoni tar-rieżami) huma ogħla mill-prezz medju mitlub mill-produtturi esportaturi Ċiniżi lill-bqija tad-dinja (EUR 714/tunnellata fil-livell CIF). Peress li, kif huwa spjegat fil-premessa (206) hawn taħt, l-HRF huwa prodott ta’ komodità sensittiv ħafna għall-prezz, l-esportaturi Ċiniżi jkollhom inċentiv qawwi biex jidderieġu l-esportazzjonijiet tagħhom lejn l-Unjoni jekk il-miżuri jiskadu.

(135)

Fit-talba tiegħu l-applikant sostna li l-miżuri ta’ salvagwardja tal-azzar tal-Unjoni biss, li japplikaw għall-prodott taħt rieżami, ma jkunux biżżejjed biex jipproteġu s-suq tal-Unjoni kontra l-importazzjonijiet fi kwantitajiet sinifikanti bi prezzijiet sussidjati. Billi ċ-Ċina ma rċeviet l-ebda kwota speċifika għall-pajjiż għall-prodott taħt rieżami, il-produtturi Ċiniżi għandhom aċċess għal ammont kbir ta’ volumi ta’ kwoti residwi li taħthom setgħu jidderieġu l-esportazzjonijiet tagħhom lejn is-suq tal-Unjoni kieku l-miżuri kumpensatorji kellhom jiskadu. B’riżultat ta’ dan, jekk il-miżuri kumpensatorji kellhom jitħassru, il-volumi tal-esportazzjoni Ċiniżi x’aktarx li jiżdiedu b’mod sinifikanti fi ħdan il-kwota residwa u b’hekk jimlew is-suq tal-Unjoni qabel ma jsir applikabbli kwalunkwe dazju barra mill-kwota skont il-miżura ta’ salvagwardja.

(136)

Il-Kummissjoni, abbażi tal-fatti disponibbli, ikkonkludiet li hemm biżżejjed evidenza li s-sussidjar tal-industrija tal-HRF fir-RPĊ kompla matul il-perjodu ta’ investigazzjoni tar-rieżami u x’aktarx li jkompli fil-futur. L-ebda evidenza ma wriet li s-sussidji u l-programmi ta’ sussidju inkwistjoni se jintemmu fil-futur qrib.

(137)

Is-sussidjar tal-industrija tal-HRF jippermetti lill-produtturi Ċiniżi jżommu l-kapaċitajiet tal-produzzjoni tagħhom f’livell li jaqbeż sew id-domanda domestika u possibbilment jista’ jkopri l-konsum tal-Unjoni kollu.

(138)

Għalhekk, il-Kummissjoni sabet li t-tħassir tal-miżuri kumpensatorji x’aktarx jirriżulta f’ridirezzjoni ta’ volumi sinifikanti ta’ importazzjonijiet sussidjati tal-prodott li qed jiġi eżaminat lejn is-suq tal-Unjoni. Diversi programmi ta’ sussidju għadhom qed jiġu offruti mill-GTĊ lill-industrija tal-HRF u l-Kummissjoni ddeterminat li l-industrija tal-HRF ibbenefikat minn għadd minnhom matul il-perjodu ta’ investigazzjoni tar-rieżami.

(139)

Il-prodott simili kien immanifatturat minn 21 produttur fl-Unjoni matul il-perjodu taħt kunsiderazzjoni. Huma jikkostitwixxu l-“industrija tal-Unjoni” skont it-tifsira tal-Artikolu 9(1) tar-Regolament bażiku.

(140)

Il-produzzjoni totali tal-Unjoni tal-prodott taħt rieżami matul il-perjodu ta’ investigazzjoni tar-rieżami ġiet stabbilita għal madwar 70 miljun tunnellata. Il-Kummissjoni stabbiliet iċ-ċifra abbażi tal-informazzjoni kollha disponibbli dwar l-industrija tal-Unjoni, bħat-talba għar-rieżami ta’ skadenza, it-tweġibiet għall-kwestjonarju vverifikati u t-tweġiba għall-kwestjonarju makro mibgħuta mill-EUROFER. Kif huwa indikat fil-premessa (13), il-produtturi tal-Unjoni magħżula fil-kampjun kienu jirrappreżentaw 29 % tal-produzzjoni totali tal-Unjoni tal-prodott simili matul il-perjodu ta’ investigazzjoni tar-rieżami.

(141)

Il-prodott taħt rieżami jitqies bħala materjal primarju għall-produzzjoni ta’ diversi prodotti downstream b’valur miżjud, li jibdew bi prodotti b’laminazzjoni fil-kiesaħ. Minħabba li l-industrija tal-Unjoni hija fil-biċċa l-kbira integrata vertikalment u tipproduċi kemm il-prodott taħt rieżami kif ukoll il-prodotti downstream, kemm is-suq kaptiv kif ukoll dak ħieles ġew analizzati separatament, fejn xieraq.

(142)

Id-distinzjoni bejn suq kaptiv u suq ħieles hija rilevanti għall-analiżi tad-dannu għaliex il-prodotti destinati għas-suq kaptiv ma jiġux esposti għal kompetizzjoni diretta mill-importazzjonijiet, u l-prezzijiet tat-trasferiment, jekk ikun hemm, jiġu stabbiliti fil-gruppi skont politiki varji ta’ prezzijiet. Għall-kuntrarju, il-produzzjoni destinata għas-suq ħieles hija f’kompetizzjoni diretta mal-importazzjonijiet tal-prodott ikkonċernat, u l-prezzijiet huma stabbiliti skont il-kundizzjonijiet tas-suq.

(143)

Biex tipprovdi stampa kemm jista’ jkun kompluta tal-industrija tal-Unjoni, il-Kummissjoni kisbet data għall-attività kollha tal-prodott simili u ddeterminat jekk il-produzzjoni kinitx destinata għas-suq kaptiv jew għas-suq ħieles. Il-Kummissjoni sabet li matul il-perjodu ta’ investigazzjoni tar-rieżami, madwar 60 % tal-produzzjoni totali tal-Unjoni tal-prodott simili kienet destinata għas-suq kaptiv.

(144)

Il-Kummissjoni stabbiliet il-konsum fis-suq ħieles tal-Unjoni abbażi ta’ (a) il-bejgħ fis-suq tal-Unjoni tal-produtturi magħrufa kollha fl-Unjoni, kif irrapportat fit-tweġiba għall-kwestjonarju makro mill-EUROFER u (b) l-importazzjonijiet fl-Unjoni mill-pajjiżi terzi kollha kif irrapportat mill-Eurostat. Il-konsum fis-suq kaptiv tal-Unjoni ġie stabbilit abbażi tal-użu kaptiv u tal-bejgħ kaptiv fis-suq tal-Unjoni tal-produtturi magħrufa kollha fl-Unjoni, kif huwa rrapportat fit-tweġiba għall-kwestjonarju makro mill-EUROFER.

(145)

Il-konsum tal-Unjoni żviluppa kif ġej:

Tabella 1

Konsum tal-Unjoni (000 tunnellata)

(146)

Il-konsum totali tal-Unjoni naqas b’7 % fl-2019 u naqas drastikament bi 12 % oħra fl-2020 minħabba tnaqqis fid-domanda kkawżat mill-pandemija tal-COVID-19. Madankollu, dan it-tnaqqis kien segwit minn irkupru tajjeb xprunat mill-irkupru fid-domanda tal-azzar matul il-perjodu ta’ investigazzjoni tar-rieżami iżda kien għadu 6 % taħt il-livell tal-2018.

(147)

Il-konsum tas-suq ħieles segwa xejra simili għal dik tal-konsum totali tal-Unjoni. Dan naqas drastikament b’19 % sal-2020 u rkupra b’mod qawwi matul il-perjodu ta’ investigazzjoni tar-rieżami, u laħaq livell saħansitra ta’ 1 % ogħla minn dak tal-2018.

(148)

Ix-xejra tal-konsum fis-suq kaptiv kienet kważi identika għax-xejra totali tal-konsum tal-Unjoni, u naqset drastikament sal-2020 bi 18 % segwita minn irkupru li madankollu laħaq biss 89 % tal-livell tal-2018.

(149)

B’mod ġenerali, il-konsum totali tal-Unjoni naqas b’6 % matul il-perjodu taħt kunsiderazzjoni.

(150)

Il-Kummissjoni stabbiliet il-volum tal-importazzjonijiet abbażi tad-data tal-Eurostat. Is-sehem mis-suq tal-importazzjonijiet ġie stabbilit abbażi ta’ tqabbil bejn il-volumi tal-importazzjoni u l-konsum fis-suq ħieles tal-Unjoni, kif huwa rrapportat fit-Tabella 2 hawn fuq.

(151)

L-importazzjonijiet lejn l-Unjoni mill-pajjiż ikkonċernat żviluppaw kif ġej:

Tabella 2

Volum ta’ importazzjoni (000 tunnellata), sehem mis-suq u prezzijiet (EUR/tunnellata)

(152)

Wara l-impożizzjoni tal-miżuri fl-2017, l-importazzjonijiet miċ-Ċina naqsu għal livell insinifikanti, b’sehem mis-suq negliġibbli ta’ 0,002 % fl-2018. Mill-2018 sal-2020, l-importazzjonijiet naqsu saħansitra aktar. Matul il-perjodu ta’ investigazzjoni tar-rieżami, l-importazzjonijiet mir-RPĊ, madankollu, żdiedu f’April 2021 meta mqabbla mal-livelli baxxi fit-tliet snin preċedenti. Madankollu, is-sehem mis-suq baqa’ baxx ħafna fil-livell ta’ 0,1 %.

(153)

Il-prezzijiet tal-importazzjoni Ċiniżi kif irrapportati fil-Eurostat kienu eċċezzjonalment għoljin matul l-2018, l-2019 u l-2020, għalkemm naqsu matul il-perjodu ta’ investigazzjoni tar-rieżami. Il-prezzijiet eċċezzjonalment għoljin tal-importazzjoni mill-2018 sal-2020 x’aktarx huma marbuta mal-fatt li ċ-Ċina importat volum negliġibbli fl-Unjoni li ma jistax jitqies affidabbli.

(154)

Il-Kummissjoni qieset li l-prezzijiet tal-importazzjoni Ċiniżi rrapportati fl-Eurostat matul il-perjodu taħt kunsiderazzjoni ma humiex rappreżentattivi tal-prezzijiet medji tal-HRF minħabba l-volum baxx ħafna ta’ importazzjonijiet mir-RPĊ matul dak il-perjodu u li ma setgħux jintużaw biex jinġibdu konklużjonijiet sinifikanti jew rilevanti.

(155)

L-importazzjonijiet tal-prodott taħt rieżami minn pajjiżi terzi oħra żviluppaw kif ġej:

Tabella 3

Importazzjonijiet minn pajjiżi terzi

(156)

L-importazzjonijiet totali tal-prodott taħt rieżami minn pajjiżi terzi għajr il-pajjiż ikkonċernat naqsu mill-2018 għall-2020 b’26 % u żdiedu drastikament fl-2021 biex laħqu sehem mis-suq ta’ 28 %, li huwa 20 % ogħla mil-livell tal-2018. B’mod ġenerali, l-Unjoni timporta HRF minn aktar minn 40 pajjiż madwar id-dinja. L-akbar ħames esportaturi tal-HRF lejn l-UE matul il-perjodu ta’ investigazzjoni tar-rieżami kienu r-Russja, l-Indja, it-Turkija, l-Eġittu u t-Tajwan, li jirrappreżentaw 18 % tas-suq ħieles tal-Unjoni u 65 % tal-importazzjonijiet kollha tal-HRF. Individwalment, ir-Russja kienet l-akbar esportatur b’sehem mis-suq ta’ 5,8 % filwaqt li l-erba’ pajjiżi l-oħra kellhom sehem mis-suq ta’ bejn 2 % u 4 %, rispettivament. L-ebda pajjiż ieħor ma għandu sehem mis-suq ta’ aktar minn 2 %. Fost l-akbar esportaturi, l-importazzjonijiet mir-Russja (51) u t-Turkija (52) bħalissa huma koperti minn miżuri anti-dumping.

(157)

F’konformità mal-Artikolu 8(4) tar-Regolament bażiku, l-eżami tal-impatt tal-importazzjonijiet sussidjati fuq l-industrija tal-Unjoni kien jinkludi evalwazzjoni tal-indikaturi ekonomiċi kollha li kellhom effett fuq l-istat tal-industrija tal-Unjoni matul il-perjodu taħt kunsiderazzjoni.

(158)

Sabiex tiddetermina d-dannu, il-Kummissjoni għamlet distinzjoni bejn l-indikaturi tad-dannu makroekonomiċi u dawk mikroekonomiċi. Il-Kummissjoni evalwat l-indikaturi makroekonomiċi abbażi tad-data pprovduta mill-applikant li kienet relatata mal-produtturi kollha tal-Unjoni. Il-Kummissjoni evalwat l-indikaturi mikroekonomiċi abbażi tad-data inkluża fit-tweġibiet għall-kwestjonarju mill-produtturi tal-Unjoni inklużi fil-kampjun. Iż-żewġ settijiet ta’ data nstabu li kienu rappreżentattivi tas-sitwazzjoni ekonomika tal-industrija tal-Unjoni.

(159)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, l-impjiegi, il-produttività, id-daqs tal-ammont ta’ sussidji kumpensabbli, u l-irkupru minn sussidjar preċedenti.

(160)

L-indikaturi mikroekonomiċi huma: il-prezzijiet medji tal-bejgħ, il-kost ta’ unità, il-kostijiet lavorattivi, l-inventarji, il-profittabilità, il-fluss ta’ flus, l-investimenti, ir-redditu fuq l-investimenti, u l-kapaċità li jiġi ġġenerat il-kapital.

(161)

Kif huwa spjegat fil-premessi (143) - (144), biex tipprovdi stampa kemm jista’ jkun kompluta tal-industrija tal-Unjoni, il-Kummissjoni kisbet data għall-produzzjoni kollha tal-prodott ikkonċernat u ddeterminat jekk il-produzzjoni kinitx destinata għas-suq kaptiv jew għas-suq ħieles. Fejn huwa rilevanti u possibbli, il-Kummissjoni analizzat separatament l-indikaturi tad-dannu relatati mas-suq ħieles u dak kaptiv.

(162)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu taħt kunsiderazzjoni:

Tabella 4

Il-produzzjoni, il-kapaċità tal-produzzjoni u l-użu tal-kapaċità

(163)

Il-volum tal-produzzjoni tal-industrija tal-Unjoni segwa xejra simili bħall-konsum totali tal-Unjoni u naqas b’mod ġenerali b’madwar 8 % matul il-perjodu taħt kunsiderazzjoni, bi tnaqqis sinifikanti fl-2020 segwit minn rkupru minħabba r-raġunijiet spjegati fil-premessa (146).

(164)

Filwaqt li l-kapaċità tal-produzzjoni tal-industrija tal-Unjoni żdiedet bi ftit matul il-perjodu meqjus bi 3 %, l-użu tal-kapaċità segwa l-istess xejra negattiva bħall-volum tal-produzzjoni u l-konsum u naqas b’10 % bejn l-2018 u l-perjodu ta’ investigazzjoni tar-rieżami.

(165)

Il-volum tal-bejgħ u s-sehem mis-suq tal-industrija tal-Unjoni żviluppaw kif ġej matul il-perjodu taħt kunsiderazzjoni:

Tabella 5

Volum tal-bejgħ u sehem mis-suq fis-suq ħieles (000 tunnellata)

(166)

Il-volum tal-bejgħ tal-industrija tal-Unjoni fis-suq tal-Unjoni segwa x-xejra tal-konsum matul il-perjodu taħt kunsiderazzjoni. Dan naqas bejn l-2018 u l-2020 għar-raġunijiet spjegati fil-premessa (146), segwit minn irkupru fil-perjodu ta’ investigazzjoni tar-rieżami. Madankollu, l-irkupru fil-perjodu ta’ investigazzjoni tar-rieżami kien għadu taħt il-livelli tal-2018.

(167)

Matul il-perjodu taħt kunsiderazzjoni, is-sehem mis-suq tal-industrija tal-Unjoni f’termini ta’ konsum tal-Unjoni żdied bi ftit mill-2018 għall-2020 minn 77 għal 79 % u naqas b’seba’ punti perċentwali bejn l-2020 u l-perjodu ta’ investigazzjoni tar-rieżami għal 72 %. Kif jidher fit-Tabella 4, dan it-tnaqqis huwa spjegat mill-fatt li s-sehem mis-suq tal-importazzjonijiet minn pajjiżi terzi żdied b’7 % bejn l-2020 u l-perjodu ta’ investigazzjoni tar-rieżami, li jispjega t-telf tal-industrija tal-Unjoni fis-sehem mis-suq ħieles.

Tabella 6

Volum kaptiv fis-suq tal-Unjoni u sehem mis-suq (000 tunnellata)

(168)

Il-volum kaptiv tal-industrija tal-Unjoni (magħmul minn użu kaptiv u bejgħ kaptiv fis-suq tal-Unjoni) naqas bi 18 % mill-2018 sal-2020 u rkupra b’7 punti perċentwali fl-2021, li rriżulta fi tnaqqis ġenerali ta’ 11 % matul il-perjodu taħt kunsiderazzjoni, minn madwar 45 miljun tunnellata għal 40 miljun tunnellata mill-bidu sa tmiem il-perjodu ta’ investigazzjoni tar-rieżami. B’mod ġenerali, is-suq kaptiv u s-suq ħieles segwew l-istess xejra. Għalhekk, il-Kummissjoni kkonkludiet li l-iżvilupp tas-suq kaptiv ma kellu l-ebda impatt sinifikanti fuq il-prestazzjoni tal-industrija tal-Unjoni fis-suq ħieles.

(169)

Is-sehem mis-suq kaptiv tal-industrija tal-Unjoni (espress bħala perċentwal tal-produzzjoni totali) baqa’ relattivament stabbli matul il-perjodu taħt kunsiderazzjoni, u kien ivarja bejn 58,1 % u 60,5 %.

(170)

F’kuntest ta’ tnaqqis fil-konsum u fil-produzzjoni, l-industrija tal-Unjoni tilfet il-volum tal-bejgħ u s-sehem mis-suq fis-suq ħieles. B’mod ġenerali, ma kienx hemm tkabbir għall-industrija tal-Unjoni matul il-perjodu taħt kunsiderazzjoni.

(171)

L-impjiegi u l-produttività żviluppaw kif ġej matul il-perjodu taħt kunsiderazzjoni:

Tabella 7

L-impjiegi u l-produttività

(172)

Bejn l-2018 u l-perjodu ta’ investigazzjoni tar-rieżami, l-għadd ta’ impjegati involuti fil-produzzjoni tal-prodott taħt rieżami segwa x-xejra tal-volum tal-produzzjoni tal-Unjoni, naqas drastikament bejn l-2018 u l-2020 biex irkupra ftit matul il-perjodu ta’ investigazzjoni tar-rieżami. B’mod ġenerali dan irriżulta fi tnaqqis b’7 % matul il-perjodu taħt kunsiderazzjoni.

(173)

Il-produttività tal-forza tax-xogħol tal-industrija tal-Unjoni, imkejla bħala output (tunnellati) għal kull impjegat, baqgħet b’mod ġenerali stabbli matul il-perjodu taħt kunsiderazzjoni.

(174)

Il-Kummissjoni kkonkludiet li hemm biżżejjed evidenza li turi li l-produtturi komplew jirċievu sussidji kumpensabbli matul il-perjodu ta’ investigazzjoni tar-rieżami. L-ammont tas-sussidji kumpensabbli għaċ-Ċina, speċifikat hawn fuq fit-taqsima dwar is-sussidji, huwa sinifikanti.

(175)

Il-miżuri antisussidji imposti wara l-investigazzjoni oriġinali ppermettew lill-industrija tal-Unjoni tirkupra minn sussidjar preċedenti, kif jidher mid-data għall-2018. Dan ġie kkonfermat ukoll mis-sejbiet tal-Kummissjoni fl-investigazzjoni anti-dumping kontra prodotti ċatti b’laminazzjoni termali mit-Turkija. (53)

(176)

Il-prezzijiet medji tal-bejgħ ta’ unità tal-produtturi tal-Unjoni fil-kampjun lil klijenti fl-Unjoni żviluppaw kif ġej matul il-perjodu taħt kunsiderazzjoni:

Tabella 8

Il-prezzijiet tal-bejgħ u l-kost tal-produzzjoni fl-Unjoni (EUR/tunnellata)

(177)

Il-prezzijiet medji tal-bejgħ tal-industrija tal-Unjoni naqsu bi 17 % bejn l-2018 u l-2020 u żdiedu drastikament b’34 % fl-2021. Ix-xejra tal-prezzijiet tal-bejgħ għal kull unità matul il-perjodu taħt kunsiderazzjoni kienet influwenzata mit-tfixkil serju kkawżat mill-pandemija tal-COVID-19 u mit-tkomplija wara l-pandemija fid-domanda. Fl-2021, id-domanda għolja għall-azzar, il-provvista ristretta, u ż-żieda fil-kost tal-produzzjoni kienu l-fatturi li influwenzaw iż-żieda f’daqqa u sinifikanti fil-prezz tal-bejgħ tal-unità.

(178)

Il-kost unitarju tal-produzzjoni żdied b’29 % matul il-perjodu taħt kunsiderazzjoni. Madankollu, fl-2019 il-kost tal-produzzjoni żdied filwaqt li l-prezzijiet tal-bejgħ tal-unità naqsu. In-nuqqas ta’ kapaċità għall-industrija tal-Unjoni li tirrifletti ż-żieda fil-kost tal-produzzjoni fil-prezz tal-bejgħ tagħha kien minħabba l-volumi kbar ta’ importazzjonijiet oġġett ta’ dumping mit-Turkija, li niżżlu l-prezzijiet. Fl-2020, kemm il-kost tal-produzzjoni kif ukoll il-prezzijiet tal-bejgħ naqsu, iżda tal-ewwel naqas b’inqas. Dan kien dovut għat-tnaqqis qawwi fis-suq matul il-pandemija tal-COVID-19, li naqqset il-prezzijiet b’mod sinifikanti filwaqt li l-kost tal-produzzjoni kien inqas affettwat. Il-kost unitarju tal-produzzjoni żdied fl-2021 minħabba żieda fil-prezzijiet tal-enerġija u tal-komoditajiet. Madankollu, minħabba l-irkupru ta’ wara l-COVID, id-domanda żdiedet ukoll u konsegwentement, il-prezzijiet żdiedu wkoll b’mod sinifikanti (aktar minn 50 % bejn l-2020 u l-perjodu ta’ investigazzjoni tar-rieżami), saħansitra aktar miż-żieda fil-kostijiet tal-produzzjoni fl-istess perjodu.

(179)

Il-kostijiet lavorattivi medji tal-produtturi tal-Unjoni inklużi fil-kampjun żviluppaw kif ġej matul il-perjodu taħt kunsiderazzjoni:

Tabella 9

Il-kostijiet lavorattivi medji għal kull impjegat

(180)

Matul il-perjodu taħt kunsiderazzjoni, il-kostijiet lavorattivi medji żdiedu bi 22 %. Filwaqt li l-għadd ta’ impjegati fil-perjodu ta’ investigazzjoni tar-rieżami naqas, meta mqabbel mal-2018, il-kost lavorattiv medju għal kull impjegat żdied.

(181)

Il-livelli tal-istokkijiet tal-produtturi tal-Unjoni inklużi fil-kampjun żviluppaw kif ġej matul il-perjodu taħt kunsiderazzjoni:

Tabella 10

Inventarji

(182)

Matul il-perjodu taħt kunsiderazzjoni, l-istokk tal-HRF tal-industrija tal-Unjoni naqas kontinwament, bi tnaqqis drastiku fl-2020, li huwa spjegat mill-effetti tal-pandemija tal-COVID-19, u l-irkupru fl-2021. L-industrija tal-HRF fl-Unjoni hija kkaratterizzata minn kuntratti qafas (ta’ xahar, trimestrali, ta’ sena) bejn il-produtturi u l-klijenti li jiffissaw il-kwantitajiet u l-prezzijiet. Dawn il-kuntratti qafas huma implimentati permezz ta’ ordnijiet ta’ xiri skont il-ħtiġijiet tal-klijenti. B’riżultat ta’ dan, l-industrija tal-Unjoni tista’ tippjana l-produzzjoni u l-inventarji tagħha. Għaldaqstant, u wkoll kif ġie stabbilit fl-investigazzjoni oriġinali, l-istokks ma humiex meqjusa bħala indikatur importanti tad-dannu għal din l-industrija, peress li l-biċċa l-kbira tat-tipi tal-prodott simili huma prodotti mill-industrija tal-Unjoni abbażi ta’ ordnijiet speċifiċi tal-utenti.

(183)

Il-profittabilità, il-fluss ta’ flus, l-investimenti u r-redditu fuq l-investimenti tal-produtturi tal-Unjoni inklużi fil-kampjun żviluppaw kif ġej matul il-perjodu taħt kunsiderazzjoni:

Tabella 11

Il-profittabbiltà, il-fluss tal-flus, l-investimenti u r-redditu fuq l-investimenti

(184)

Il-Kummissjoni stabbiliet il-profittabbiltà tal-produtturi tal-Unjoni fil-kampjun billi esprimiet il-profitt nett qabel it-taxxa tal-bejgħ tal-prodott simili fis-suq ħieles tal-Unjoni bħala perċentwal tal-fatturat ta’ dak il-bejgħ.

(185)

Il-profittabbiltà varjat matul il-perjodu taħt kunsiderazzjoni għalkemm il-profittabbiltà ġenerali żdiedet b’5,7 punti perċentwali matul il-perjodu taħt kunsiderazzjoni. Wara l-impożizzjoni tal-miżuri fl-2017, l-industrija rkuprat u rreġistrat profitt fl-2018. Madankollu, it-telf iġġarrab fl-2019 u l-profittabbiltà laħqet l-aktar livell baxx tagħha, jiġifieri -18 %, fl-2020 fil-qalba tal-pandemija, filwaqt li fl-2021 il-profitt reġa’ lura b’mod qawwi għal 14,1 %. Fl-istess ħin, wara l-impożizzjoni ta’ miżuri kontra r-RPĊ, l-importazzjonijiet oġġett ta’ dumping bi prezzijiet baxxi mit-Turkija żdiedu malajr, u dan jispjega t-tnaqqis fil-profittabbiltà fl-2019. Dan it-tnaqqis fil-profittabbiltà mbagħad ġie aggravat mix-xokkijiet ikkawżati mill-pandemija globali fl-2020, bħat-tfixkil fil-katina tal-provvista u t-tnaqqis fil-konsum tal-azzar. Żieda qawwija fid-domanda tal-azzar, flimkien ma’ żieda fil-prezzijiet tal-bejgħ, wasslet għal profitti ogħla b’mod mhux tas-soltu fl-2021, li mmarkat sena eċċezzjonali għall-industrija tal-Unjoni.

(186)

Il-fluss ta’ flus nett huwa l-kapaċità tal-produtturi tal-Unjoni li jiffinanzjaw l-attivitajiet tagħhom stess. Ix-xejra fil-fluss tal-flus nett żviluppat b’mod simili għall-profittabbiltà: tnaqqis drastiku fl-2019-2020, segwit minn irkupru qawwi fil-perjodu ta’ investigazzjoni tar-rieżami.

(187)

Bejn l-2018 u l-perjodu ta’ investigazzjoni tar-rieżami, l-investimenti żdiedu bi 82 %. B’mod ġenerali, matul il-perjodu taħt kunsiderazzjoni, il-flussi ta’ investiment segwew distribuzzjoni bimodali: l-investiment żdied b’mod sinifikanti fl-2019, segwit minn tnaqqis fl-2020 u t-tieni massimu fl-2021. B’mod ġenerali, l-investimenti kellhom l-għan li jtejbu l-kwalità u l-ekoloġizzazzjoni tal-produzzjoni.

(188)

Ir-redditu fuq l-investimenti (ROI) huwa l-profitt f’perċentwal tal-valur kontabilistiku nett tal-investimenti. Ir-redditu fuq l-investiment tjieb b’mod sinifikanti matul il-perjodu ta’ investigazzjoni tar-rieżami meta mqabbel mal-2018. Fil-fatt, matul il-perjodu taħt kunsiderazzjoni, l-ROI żdied bi 8,3 punti perċentwali. Dan żviluppa b’mod simili għall-profittabbiltà: tnaqqis drastiku fl-2019 u fl-2020, segwit minn irkupru qawwi fil-perjodu ta’ investigazzjoni tar-rieżami.

(189)

Il-kapaċità tal-produtturi tal-Unjoni inklużi fil-kampjun li jżidu l-kapital ma ġietx affettwata matul il-perjodu ta’ investigazzjoni tar-rieżami, li ra rkupru rapidu mill-pandemija.

(190)

Wara l-impożizzjoni ta’ miżuri kumpensatorji kontra l-importazzjonijiet ta’ HRF miċ-Ċina fl-2017, l-importazzjonijiet miċ-Ċina naqsu u baqgħu taħt il-livell de minimis matul il-perjodu kkunsidrat, u dan ippermetta lill-industrija tal-Unjoni tibda tirkupra mill-effetti dannużi tal-importazzjonijiet sussidjati miċ-Ċina u, kif ikkonfermat mir-Regolament ta’ Implimentazzjoni tal-Kummissjoni (UE) 2021/1100 (54) dwar l-importazzjonijiet ta’ HRF li joriġinaw mit-Turkija, kienet irkuprat sa tmiem l-2018. Madankollu, l-irkupru tas-sitwazzjoni ekonomika tal-industrija tal-Unjoni waqaf f’daqqa u treġġa’ lura fl-2019, meta l-industrija tal-Unjoni kellha tikkompeti ma’ volumi sinifikanti ta’ importazzjonijiet oġġett ta’ dumping bi prezz baxx minn Türkiye, u ġegħlitha tistabbilixxi l-prezzijiet tagħha taħt il-kostijiet biex iżżomm is-sehem mis-suq tagħha u b’hekk ikkawżat dannu materjali lill-industrija tal-Unjoni (55). F’Lulju 2021, il-Kummissjoni imponiet miżuri definittivi kontra t-Turkija u bis-saħħa ta’ diversi fatturi involuti, kif spjegat fil-premessa (185), is-sitwazzjoni tal-industrija tal-Unjoni tjiebet u rkuprat sal-aħħar tal-2021 għal sitwazzjoni ekonomika simili għal dik tal-2018. Għalhekk, matul il-perjodu ta’ investigazzjoni tar-rieżami, l-industrija tal-Unjoni ma kinitx għadha titqies bħala li ġarrbet dannu.

(191)

B’mod aktar partikolari, kważi l-indikaturi kollha tad-dannu, b’mod partikolari l-produzzjoni, l-użu tal-kapaċità, il-volumi tal-bejgħ u l-prezzijiet tal-bejgħ, l-impjiegi u l-produttività, il-profitt, il-fluss tal-flus u l-ROI segwew xejra simili matul il-perjodu taħt kunsiderazzjoni. Din ix-xejra kienet ikkaratterizzata minn tnaqqis fl-2019, tnaqqis aktar qawwi fl-2020 u rkupru fil-perjodu ta’ investigazzjoni tar-rieżami għal livelli simili għal dawk fil-bidu tal-perjodu taħt kunsiderazzjoni fl-2018. Ir-raġuni għal din ix-xejra irregolari tinsab fil-biċċa l-kbira fil-koinċidenza ta’ influss konsiderevoli ta’ importazzjonijiet oġġett ta’ dumping bi prezz baxx tal-HRF mit-Turkija u d-dinamika unika maħluqa mill-pandemija tal-COVID-19. Il-lockdowns u l-interruzzjonijiet tal-attività industrijali wasslu għal livelli ta’ konsum baxxi ħafna u domanda baxxa għall-azzar fl-2020, filwaqt li d-domanda u l-prezzijiet tal-azzar żdiedu fl-2021 matul l-irkupru ta’ wara l-COVID li wassal, fost l-oħrajn, għal profitti eċċezzjonalment għoljin għall-industrija tal-azzar matul il-perjodu ta’ investigazzjoni tar-rieżami.

(192)

Abbażi ta’ dan ta’ hawn fuq, il-Kummissjoni kkonkludiet li l-industrija tal-Unjoni ma sofrietx dannu materjali skont it-tifsira tal-Artikolu 8 tar-Regolament bażiku matul il-perjodu ta’ investigazzjoni tar-rieżami.

(193)

Madankollu, l-indikaturi ma jistgħux jiġu analizzati mingħajr ma jitqiesu l-kundizzjonijiet eċċezzjonalment favorevoli tas-suq tal-azzar tal-2021. Madankollu, fl-2020, it-tnaqqis fl-attività industrijali kkawżat mill-pandemija u t-tnaqqis konsegwenti fid-domanda għall-azzar, wasslu għal tnaqqis qawwi fir-ritmu tal-prestazzjoni tal-industrija tal-azzar u tal-ekonomija globali b’mod ġenerali. Fl-2021, xprunat minn żieda fid-domanda, il-konsum tal-azzar irkupra b’mod qawwi, kif għamlu l-prezzijiet tal-azzar.

(194)

Kif spjegatfFil-premessa (192), il-Kummissjoni kkonkludiet li l-industrija tal-Unjoni ma ġarrbitx dannu materjali matul il-perjodu ta’ investigazzjoni tar-rieżami. Min-naħa l-oħra, kif huwa spjegat fil-premessa (138), il-Kummissjoni kkonkludiet li t-tħassir tal-miżuri kumpensatorji x’aktarx jirriżulta f’ridirezzjoni ta’ volumi sinifikanti ta’ importazzjonijiet sussidjati tal-prodott taħt rieżami lejn is-suq tal-Unjoni. Għalhekk, il-Kummissjoni vvalutat, f’konformità mal-Artikolu 18(2) tar-Regolament bażiku, jekk ikunx hemm probabbiltà ta’ rikorrenza tad-dannu kkawżata mill-importazzjonijiet sussidjati mir-RPĊ jekk il-miżuri jitħallew jiskadu.

(195)

F’dan ir-rigward, il-Kummissjoni eżaminat il-kapaċità tal-produzzjoni u l-kapaċità ta’ riżerva fiċ-Ċina, l-attraenza tas-suq tal-Unjoni u l-prezzijiet tal-importazzjoni Ċiniżi probabbli u l-impatt fuq l-industrija tal-Unjoni.

(196)

Kif huwa deskritt fil-premessa (131), il-produtturi fiċ-Ċina għandhom kapaċità ta’ riżerva sinifikanti. Tabilħaqq, il-kapaċità ta’ riżerva stmata Ċiniża tikkorrispondi għal 89 % tad-daqs tal-konsum tas-suq ħieles tal-UE. Din il-kapaċità ta’ riżerva tista’ tintuża biex jiġi manifatturat il-prodott taħt rieżami għall-esportazzjoni lejn l-Unjoni f’każ li l-miżuri jitħallew jiskadu. Barra minn hekk, kif huwa ddikjarat fil-premessa (132), it-tnaqqis fid-domanda għall-azzar miċ-Ċina huwa, u se jkun, mutur ewlieni għaż-żieda fl-esportazzjonijiet. L-iżbilanċ li jirriżulta bejn il-kapaċità u d-domanda fiċ-Ċina x’aktarx li jżid il-pressjoni fuq il-produtturi Ċiniżi biex jesportaw.

(197)

Barra minn hekk, wieħed mis-swieq prinċipali, l-Istati Uniti tal-Amerka, huwa protett minn miżuri anti-dumping fuq il-prodott taħt rieżami, li jnaqqas l-aċċess tal-produtturi Ċiniżi.

(198)

Kif huwa deskritt fil-premessa (134), is-suq tal-Unjoni huwa fost l-akbar swieq ta’ ċerti prodotti ċatti tal-azzar b’laminazzjoni termali madwar id-dinja. Barra minn hekk, is-suq Ċiniż ma jistax jassorbi l-kapaċità żejda tal-azzar u s-swieq ewlenin ta’ pajjiżi terzi huma magħluqa għall-esportazzjonijiet Ċiniżi peress li għandhom miżuri anti-dumping, salvagwardji jew miżuri protettivi oħra fis-seħħ kontra r-RPĊ. Barra minn hekk, il-livelli tal-prezzijiet fl-Unjoni huma ogħla mill-prezz medju mitlub mill-esportaturi Ċiniżi lill-bqija tad-dinja. Għalhekk, is-suq tal-Unjoni jirrappreżenta mira attraenti għall-kapaċità ta’ riżerva eżistenti fir-RPĊ jekk il-miżuri antisussidji kellhom jitħassru.

(199)

Wara d-divulgazzjoni, is-CISA kkontestat il-konklużjonijiet fir-rigward tal-attraenza tas-suq tal-Unjoni, bl-argument li l-industrija tal-azzar Ċiniża tiddependi fuq is-suq domestiku tagħha, u li l-konsum domestiku Ċiniż huwa għaxar darbiet akbar mis-segment tas-suq ħieles tal-UE. Hija enfasizzat ukoll li mill-1 ta’ Awwissu 2021, ċerti prodotti tal-azzar, inkluż l-azzar ċatt b’laminazzjoni termali, ma għadhomx eliġibbli għal rifużjonijiet fuq l-esportazzjoni tal-VAT, u b’hekk għandhom effett skoraġġanti fuq l-esportazzjonijiet u jidderieġu mill-ġdid il-produzzjoni tal-azzar Ċiniża lejn l-industrija domestika Ċiniża.

(200)

Il-Kummissjoni rrikonoxxiet li l-konsum domestiku Ċiniż tal-HRF huwa ferm akbar mis-suq ħieles tal-UE iżda kif spjegat fil-premessa (196), il-produtturi fiċ-Ċina għandhom kapaċità żejda sinifikanti li ma jistgħux jużaw fis-suq domestiku tagħhom. Għalhekk ma hemm xejn li jipprevjeni lill-produtturi Ċiniżi milli jużaw din il-kapaċità żejda biex jipproduċu l-prodott taħt rieżami għall-esportazzjoni lejn l-Unjoni jekk il-miżuri jitħallew jiskadu. Barra minn hekk, kif iddikjarat fil-premessa (132), it-tnaqqis fid-domanda Ċiniża għall-azzar huwa, u se jkun, xprun ewlieni biex jiżdiedu l-esportazzjonijiet. L-iżbilanċ li jirriżulta bejn il-kapaċità u d-domanda fiċ-Ċina x’aktarx li jżid il-pressjoni fuq il-produtturi Ċiniżi biex jesportaw. Fir-rigward tal-allegata bidla fis-sistema tal-VAT, il-Kummissjoni nnotat li s-CISA ma pprovdiet l-ebda evidenza li ssostni l-argument li l-bidla tar-rifużjonijiet tal-VAT kienet twassal, jew se twassal, għal xi bidliet sinifikanti fl-imġiba tal-esportazzjoni tal-produtturi Ċiniżi. Għalhekk, il-Kummissjoni ċaħdet din l-affermazzjoni bħala mhux sostanzjata.

(201)

B’kunsiderazzjoni tal-volumi baxxi ta’ importazzjonijiet mir-RPĊ mill-2018 sal-2021, il-Kummissjoni qieset li l-prezzijiet tal-importazzjoni rrapportati fl-Eurostat ma setgħux jiġu invokati biex jiġu stabbiliti l-prezzijiet probabbli tal-importazzjonijiet tal-HRF miċ-Ċina fin-nuqqas ta’ miżuri anti-dumping. Minflok, il-Kummissjoni qieset bħala proxy rappreżentattiv il-prezzijiet tal-esportazzjoni mir-RPĊ lejn il-pajjiżi terzi kollha għajr l-Unjoni (“il-bqija tad-dinja” jew “ROW”).

(202)

Il-Kummissjoni stabbiliet li matul il-perjodu ta’ investigazzjoni tar-rieżami, il-prezzijiet tal-esportazzjonijiet Ċiniżi (FOB) lejn il-bqija tad-dinja kienu bħala medja ta’ EUR 660/tunnellata. Abbażi ta’ dak il-prezz u sabiex jiġi ddeterminat prezz probabbli li bih l-esportazzjonijiet Ċiniżi jaslu fil-fruntiera tal-Unjoni, il-Kummissjoni żiedet il-kost għall-assigurazzjoni u l-merkanzija. Fin-nuqqas ta’ kooperazzjoni mill-produtturi esportaturi Ċiniżi, il-Kummissjoni rrikorriet għall-kostijiet użati fl-investigazzjoni oriġinali, jiġifieri EUR 52/tunnellata, jew 7,9 % tal-prezz/tunnellata, bħala l-aħjar fatti disponibbli. Għaldaqstant, il-Kummissjoni kkonkludiet li l-prezz CIF probabbli tal-importazzjoni tal-esportazzjonijiet Ċiniżi tal-HRF lejn l-Unjoni, fin-nuqqas ta’ miżuri, ma jkunx aktar minn EUR 712/tunnellata.

(203)

Minħabba li ntużat id-data statistika, fin-nuqqas ta’ kooperazzjoni tal-produtturi esportaturi Ċiniżi, seta’ jiġi stabbilit biss prezz medju għal kull tunnellata għal varjetà kbira ta’ tipi ta’ prodotti. Għalhekk, fin-nuqqas ta’ informazzjoni fil-livell tat-tip ta’ prodott, il-Kummissjoni ma setgħetx twettaq kalkolu preċiż tat-twaqqigħ tal-prezz iżda kellha tillimita lilha nnifisha għal tqabbil tal-prezzijiet bejn il-prezzijiet medji għal kull tunnellata.

(204)

Il-prezz tal-esportazzjonijiet Ċiniżi ddeterminat b’dan il-mod tqabbel mal-prezzijiet medji ponderati tal-bejgħ matul l-investigazzjoni tar-rieżami tal-produtturi tal-Unjoni inklużi fil-kampjun imposti fuq il-klijenti fis-suq tal-Unjoni, aġġustati għal livell ex-works.

(205)

It-tqabbil tal-prezzijiet sar fl-istess livell ta’ kummerċ u, b’analoġija ma’ metodoloġija preċiża ta’ kalkolu tat-twaqqigħ tal-prezz, ir-riżultat tat-tqabbil ġie espress bħala perċentwal tal-fatturat teoretiku tal-produtturi tal-Unjoni inklużi fil-kampjun matul il-perjodu ta’ investigazzjoni tar-rieżami. Dan wera li bħala medja l-esportazzjonijiet Ċiniżi lejn l-Unjoni jwaqqgħu l-prezzijiet medji tal-industrija tal-Unjoni b’madwar 8 %.

(206)

L-HRF huwa prodott ta’ komodità sensittiv ħafna għall-prezzijiet u kif osservat fl-investigazzjoni oriġinali dwar l-importazzjonijiet ta’ HRF miċ-Ċina kif ukoll fl-investigazzjoni dwar il-prodott identiku minn Türkiye, livelli pjuttost modesti ta’ twaqqigħ tal-prezz flimkien ma’ volumi kbar huma suxxettibbli li jkollhom impatt sinifikanti u immedjat fuq il-prestazzjoni tal-industrija tal-Unjoni (56). Fiż-żewġ investigazzjonijiet, il-marġnijiet ta’ twaqqigħ tal-prezz taħt il-5 % ġiegħlu lill-industrija tal-Unjoni tnaqqas il-prezzijiet tal-bejgħ (jew titlef is-sehem mis-suq) sa tali punt li ġarrbet dannu materjali fi żmien qasir.

(207)

Minħabba li l-industrija tal-Unjoni matul il-perjodu ta’ investigazzjoni tar-rieżami kienet għadha kemm irkuprat minn perjodu ta’ taqlib u ekonomikament diffiċli, inkluża l-pandemija tal-COVID-19, b’telf akkumulat, għadha f’sitwazzjoni fraġli. Barra minn hekk, il-Kummissjoni stabbiliet li diversi programmi ta’ sussidju għadhom qed jiġu offruti mill-GTĊ lill-industrija tal-HRF u l-Kummissjoni ddeterminat li l-industrija tal-HRF ibbenefikat minn għadd minnhom matul il-perjodu ta’ investigazzjoni tar-rieżami. Għalhekk huwa probabbli ħafna li r-rikorrenza ta’ importazzjonijiet sussidjati bi prezz baxx miċ-Ċina f’volumi sinifikanti li jwaqqgħu l-prezzijiet tal-Unjoni jkollha effett negattiv sinifikanti fuq il-prestazzjoni tal-industrija tal-Unjoni, b’mod partikolari fir-rigward tal-produzzjoni, il-volumi tal-bejgħ u l-prezzijiet, il-profittabbiltà u l-ħtiġijiet tal-investiment, li jirriżulta f’dannu materjali rikorrenti.

(208)

Wara d-divulgazzjoni, is-CISA kkontestat l-għażla tal-perjodu kkunsidrat għall-analiżi tad-dannu. Hija argumentat li l-importazzjonijiet oġġett ta’ dumping tal-HRF b’volumi akbar mit-Turkija fl-2019, it-tnaqqis fir-ritmu ekonomiku kkawżat mill-COVID, u ż-żieda fl-irkupru ta’ wara l-pandemija xekklu l-evidenza li sservi bħala bażi għall-analiżi tad-dumping u tad-dannu. Hija sostniet li l-Kummissjoni kellha tanalizza perjodu differenti u ssuġġeriet li teżamina perjodu estiż, li jkopri sena jew sentejn qabel il-perjodu kkunsidrat (2016-2018) kif ukoll wara l-PIR (2022).

(209)

Il-Kummissjoni ċaħdet din l-affermazzjoni. Hija fakkret li d-diversi elementi elenkati mis-CISA bħala li jistgħu jgħawġu l-evidenza matul il-perjodu kkunsidrat kienu ġew rikonoxxuti u kkunsidrati bir-reqqa fl-analiżi tad-dannu tal-Kummissjoni. Il-Kummissjoni osservat ukoll li anki li kieku kien jitqies perjodu estiż qabel il-perjodu tal-investigazzjoni ta’ rieżami, kif issuġġerit mis-CISA, l-istess elementi xorta kienu jkunu preżenti. Għar-rigward tal-perjodu tal-investigazzjoni tar-reviżjoni, il-Kummissjoni fakkret li abbażi tal-Artikolu 6(1) tar-Regolament bażiku, “għandu jintgħażel perjodu ta’ investigazzjoni li, fil-każ ta’ dumping għandu, normalment, ikopri perjodu ta’ mhux inqas min sitt xhur immedjatament qabel il-bidu tal-proċeduri. L-informazzjoni relatata ma’ perjodu sussegwenti għall-perjodu ta’ investigazzjoni, normalment, tiġi kkunsidrata”. Hija ġurisprudenza stabbilita li l-Kummissjoni ma tistax tkun obbligata li tinkorpora fil-kalkoli tagħha fatturi relatati ma’ perijodu sussegwenti għall-perijodu ta’ investigazzjoni, sakemm tali fatturi ma jurux żviluppi ġodda li jagħmlu d-dazju antidumping propost manifestament mhux xieraq (57). L-istess raġunament, b’analoġija, għandu japplika għal investigazzjonijiet ta’ rieżami mibdija skont l-Artikolu 11(2) tar-Regolament bażiku. Is-CISA ma pprovdiet l-ebda evidenza li kellha t-tendenza li turi li l-iżviluppi li segwew il-perjodu tal-investigazzjoni tar-rieżami għamlu l-impożizzjoni mill-ġdid tad-dazju manifestament mhux xierqa.

(210)

Abbażi ta’ dan ta’ hawn fuq, huwa konkluż li n-nuqqas ta’ miżuri x’aktarx li jirriżulta f’żieda sinifikanti fl-importazzjonijiet sussidjati mir-RPĊ bi prezzijiet dannużi u li x’aktarx jerġa’ jseħħ dannu materjali.

(211)

F’konformità mal-Artikolu 31 tar-Regolament bażiku, il-Kummissjoni eżaminat jekk iż-żamma tal-miżuri antisussidji eżistenti tmurx kontra l-interess tal-Unjoni b’mod ġenerali. Id-determinazzjoni tal-interess tal-Unjoni kienet ibbażata fuq apprezzament tad-diversi interessi involuti.

(212)

L-industrija tal-Unjoni tinsab fi 15-il Stat Membru (l-Awstrija, il-Belġju, ir-Repubblika Ċeka, il-Finlandja, Franza, il-Ġermanja, l-Ungerija, l-Italja, in-Netherlands, il-Polonja, il-Portugall, ir-Rumanija, is-Slovakkja, is-Slovenja u Spanja). Hija timpjega aktar minn 38 000 impjegat fir-rigward tal-prodott taħt rieżami.

(213)

Fin-nuqqas ta’ miżuri, l-industrija tal-Unjoni mhux se tkun aktar protetta kontra ż-żieda probabbli ta’ importazzjonijiet sussidjati miċ-Ċina, li se jikkawżaw dannu materjali. L-effett tal-miżuri antisussidji se jkun pożittiv għall-produtturi tal-Unjoni, peress li l-miżuri se jgħinu lill-industrija tal-Unjoni tkompli l-irkupru tagħha mill-importazzjonijiet sussidjati u mill-effetti tal-pandemija tal-COVID-19. Għalhekk, huwa fl-interess ċar tal-industrija tal-Unjoni li l-miżuri jinżammu.

(214)

Il-Kummissjoni kkuntattjat lill-utenti u lill-importaturi mhux relatati kollha magħrufa. L-ebda utent jew importatur mhux relatat ma ppreżenta ruħu u kkoopera f’din l-investigazzjoni billi ppreżenta tweġiba għall-kwestjonarju. Minħabba n-nuqqas ta’ kooperazzjoni tal-utenti u tal-importaturi mhux relatati u fin-nuqqas ta’ kwalunkwe indikazzjoni għall-kuntrarju, il-kontinwazzjoni tal-miżuri ma titqiesx kontra l-interess tal-utenti u tal-importaturi.

(215)

Barra minn hekk, il-Kummissjoni analizzat jekk il-miżuri kontra ċ-Ċina jkollhomx effett negattiv fuq is-sigurtà tal-provvista, peress li hemm ukoll miżuri fis-seħħ fuq l-HRF kontra t-Turkija, il-Brażil, l-Iran u r-Russja. Il-livell tal-użu tal-kapaċità tal-industrija tal-Unjoni kien ta’ 75 % matul il-perjodu ta’ investigazzjoni tar-rieżami, u l-kapaċità tal-produzzjoni totali qabżet il-konsum totali tal-Unjoni bi 18-il miljun tunnellata, skont id-data tal-kwestjonarju makro tal-EUROFER. Barra minn hekk, minkejja l-miżuri kontra xi wħud mill-esportaturi ewlenin tal-HRF, kważi 40 pajjiż esportaw il-prodott taħt rieżami lejn l-Unjoni matul il-perjodu ta’ investigazzjoni tar-rieżami, u b’hekk urew li l-impożizzjoni ta’ miżuri ma taffettwax id-diversifikazzjoni tal-provvista. Għal dawn ir-raġunijiet u fin-nuqqas ta’ kooperazzjoni mill-utenti u mill-importaturi, il-Kummissjoni kkonkludiet li ma kien hemm l-ebda riskju potenzjali fil-livell tal-provvista għall-utenti downstream.

(216)

Wara d-divulgazzjoni, is-CISA rreferiet għas-salvagwardja tal-UE fuq l-importazzjonijiet ta’, fost l-oħrajn, HRF miċ-Ċina, li tillimita b’mod sinifikanti l-possibbiltà għall-produtturi Ċiniżi li jesportaw l-HRF lejn is-suq tal-UE u tirrestrinġi l-flussi tal-kummerċ ħieles għad-detriment tal-produtturi downstream u tal-utenti finali.

(217)

Il-Kummissjoni fakkret li s-salvagwardja inkwistjoni ma tistax titqies ta’ natura dejjiema, u li l-miżura attwalment fis-seħħ (58) ma għandha l-ebda impatt fuq il-valutazzjoni tal-probabbiltà ta’ żieda fl-importazzjonijiet fin-nuqqas ta’ dazji kumpensatorji. Meta titqies in-natura temporanja tas-salvagwardja tal-azzar, il-Kummissjoni għalhekk sabet li dawn ma jistax ikollhom effett fuq il-konklużjonijiet tagħha f’din l-investigazzjoni. Dwar is-sigurtà tal-provvista, kif iddikjarat fil-premessa (215), il-kapaċità tal-produzzjoni totali tal-industrija tal-Unjoni qabżet il-konsum totali tal-Unjoni, u diversi pajjiżi terzi oħra esportaw l-HRF lejn l-Unjoni matul il-perjodu tal-investigazzjoni ta’ rieżami. Barra minn hekk, il-miżura ta’ salvagwardja tiġi rieżaminata u aġġustata regolarment jekk ikun meħtieġ sabiex tiġi żgurata provvista suffiċjenti tal-azzar fis-suq tal-Unjoni. Għalhekk, il-miżuri ta’ salvagwardja ma jikkostitwixxux riskju għas-sigurtà tal-provvista għall-utenti downstream.

(218)

Barra minn hekk, is-CISA affermat ukoll li l-introduzzjoni tal-Mekkaniżmu ta’ Aġġustament tal-Karbonju fil-Fruntieri (CBAM) tiddeterjora l-aċċess għas-suq tal-UE minħabba l-obbligi ta’ rapportar u s-soprataxxi onerużi marbuta mas-CBAM.

(219)

Il-Kummissjoni fakkret li s-CBAM se jidħol fis-seħħ biss f’Ottubru 2023 u li matul perjodu tranżitorju, sal-2026, l-importaturi se jkollhom jirrapportaw biss l-emissjonijiet integrati fil-merkanzija tagħhom mingħajr ma jġarrbu l-ebda tariffa finanzjarja. Ir-raġuni ddikjarata għal dan il-perjodu transnazzjonali hija li l-partijiet jingħataw żmien biex jaġġustaw qabel ma tidħol fis-seħħ is-sistema finali u biex jitnaqqas ir-riskju ta’ tfixkil fil-kummerċ. Għaldaqstant, il-Kummissjoni qieset li huwa prematur li ssir kwalunkwe valutazzjoni tal-impatt potenzjali tas-CBAM fuq il-flussi kummerċjali futuri tal-HRF u ċaħdet l-affermazzjoni.

(220)

Abbażi ta’ dan ta’ hawn fuq, il-Kummissjoni kkonkludiet li ma kienx hemm raġunijiet konvinċenti tal-interess tal-Unjoni kontra l-kontinwazzjoni tal-miżuri eżistenti fuq l-importazzjonijiet ta’ ċerti prodotti ċatti b’laminazzjoni termali tal-ħadid, azzar mhux illigat jew liga oħra tal-azzar li joriġinaw mir-RPĊ.

(221)

Wara d-divulgazzjoni, is-CISA affermat li imisshom jiġu sosipiżi l-miżuri preżenti antisussidji f’konformità mal-Artikolu 24(4) tar-Regolament bażiku, bl-argument li ż-żewġ kundizzjonijiet stabbiliti fl-Artikolu 24(4) imsemmi huma ssodisfati. Affermat li l-kundizzjonijiet tas-suq inbidlu temporanjament b’tali mod li d-dannu ma jkunx probabbli li jkompli jew iseħħ bħala riżultat tas-sospensjoni. F’dik il-perspettiva, is-CISA rreferiet għat-tnaqqis mistenni fil-volum tal-importazzjonijiet mir-Russja u mill-Ukrajna, għan-nuqqas ta’ provvista wara inċidenti fil-faċilitajiet tal-HRF fl-Unjoni Ewropea, u għaż-żidiet fil-prezzijiet tal-prodott ikkonċernat.

(222)

Il-Kummissjoni ċaħdet l-affermazzjoni tas-CISA, peress li kienet ġenerika u ma kinitx issostanzjata. Min-naħa l-oħra, l-investigazzjoni tar-rieżami stabbiliet li d-dannu x’aktarx jerġa’ jseħħ fin-nuqqas ta’ miżuri u, mutatis mutandis, anki f’każ ta’ sospensjoni.

(223)

Abbażi tal-konklużjonijiet milħuqa mill-Kummissjoni dwar il-kontinwazzjoni tas-sussidjar, ir-rikorrenza tad-dannu u l-interess tal-Unjoni, jenħtieġ li jinżammu l-miżuri antisussidji fuq l-importazzjonijiet ta’ ċerti prodotti ċatti b’laminazzjoni termali tal-ħadid, azzar mhux illigat jew liga oħra tal-azzar li joriġinaw mir-RPĊ.

(224)

Sabiex jitnaqqsu r-riskji ta’ ċirkomvenzjoni minħabba d-differenza kbira fir-rati tad-dazju, huma meħtieġa miżuri speċjali sabiex tiġi żgurata l-applikazzjoni tad-dazji kumpensatorji individwali. Il-kumpaniji b’dazji kumpensatorji individwali jeħtiġilhom jippreżentaw fattura kummerċjali valida lill-awtoritajiet doganali tal-Istati Membri. Il-fattura trid tikkonforma mar-rekwiżiti stabbiliti fl-Artikolu 1(3) ta’ dan ir-Regolament. L-importazzjonijiet li ma jkunux akkumpanjati minn dik il-fattura jenħtieġ li jkunu soġġetti għad-dazju kumpensatorju applikabbli għall-“kumpaniji l-oħrajn kollha”.

(225)

Filwaqt li l-preżentazzjoni ta’ din il-fattura hija meħtieġa sabiex l-awtoritajiet doganali tal-Istati Membri jkunu jistgħu japplikaw ir-rati individwali tad-dazju kumpensatorju għall-importazzjonijiet, din ma hijiex l-uniku element li għandu jitqies mill-awtoritajiet doganali. Tabilħaqq, anke jekk jiġu ppreżentati b’fattura li tissodisfa r-rekwiżiti kollha stabbiliti fl-Artikolu 1(3) ta’ dan ir-Regolament, l-awtoritajiet doganali tal-Istati Membri jridu jwettqu l-kontrolli tas-soltu tagħhom u jistgħu, bħal fil-każijiet l-oħrajn kollha, ikunu jirrikjedu dokumenti addizzjonali (dokumenti tat-trasport bil-baħar, eċċ.) biex ikunu jistgħu jivverifikaw l-akkuratezza tad-dettalji li jkun hemm fid-dikjarazzjoni u jiżguraw li l-applikazzjoni sussegwenti tar-rata aktar baxxa tad-dazju tkun iġġustifikata, f’konformità mal-liġi doganali.

(226)

Jekk l-esportazzjonijiet minn waħda mill-kumpaniji li jibbenefikaw minn rati tad-dazju individwali aktar baxxi jiżdiedu b’mod sinifikanti fil-volum wara l-impożizzjoni tal-miżuri kkonċernati, tali żieda fil-volum tista’ titqies bħala waħda li fiha nnifisha tikkostitwixxi bidla fix-xejra tal-kummerċ minħabba l-impożizzjoni ta’ miżuri skont it-tifsira tal-Artikolu 23(1) tar-Regolament bażiku. F’ċirkostanzi bħal dawn u dment li jiġu ssodisfati l-kundizzjonijiet, tista’ tinbeda investigazzjoni kontra ċ-ċirkomvenzjoni. Din l-investigazzjoni tista’, inter alia, teżamina l-ħtieġa għat-tneħħija ta’ rata/i tad-dazju individwali u l-impożizzjoni konsegwenti ta’ dazju għall-pajjiż kollu.

(227)

Ir-rati ta’ dazju kumpensatorju tal-kumpaniji individwali speċifikati f’dan ir-Regolament japplikaw biss għall-importazzjonijiet tal-prodott taħt rieżami li joriġinaw mir-RPĊ u prodotti mill-entitajiet legali msemmija. L-importazzjonijiet tal-prodott taħt rieżami manifatturat minn kwalunkwe kumpanija oħra mhux imsemmija b’mod speċifiku fil-parti operattiva ta’ dan ir-Regolament, inklużi l-entitajiet relatati ma’ dawk speċifikament imsemmija, jenħtieġ li jkunu soġġetti għar-rata ta’ dazju applikabbli għall-“kumpaniji l-oħra kollha”. Dawn jenħtieġ li ma jkunux soġġetti għal xi rati individwali ta’ dazju kumpensatorju.

(228)

Kumpanija tista’ titlob li jiġu applikati dawn ir-rati tad-dazju kumpensatorju individwali jekk sussegwentement tibdel l-isem tal-entità tagħha. It-talba trid tiġi indirizzata lill-Kummissjoni (59). It-talba jrid ikun fiha l-informazzjoni rilevanti kollha li turi li l-bidla ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax id-dritt tagħha li tibbenefika mir-rata tad-dazju li tapplika għaliha, jiġi ppubblikat regolament dwar il-bidla tal-isem f’Il-Ġurnal Uffiċjali tal-Unjoni Ewropea.

(229)

Il-partijiet interessati kollha ġew informati bil-fatti u bil-kunsiderazzjonijiet essenzjali li abbażi tagħhom kien maħsub li jiġi rrakkomandat li jinżammu l-miżuri eżistenti. Huma ngħataw ukoll perjodu biex jagħmlu rappreżentazzjonijiet wara din id-divulgazzjoni.

(230)

Fid-dawl tal-Artikolu 109 tar-Regolament (UE, Euratom) 2018/1046 tal-Parlament Ewropew u tal-Kunsill (60), meta jkollu jiġi rimborżat ammont fid-dawl ta’ sentenza tal-Qorti tal-Ġustizzja tal-Unjoni Ewropea, jenħtieġ li l-imgħax li għandu jitħallas ikun ir-rata applikata mill-Bank Ċentrali Ewropew għall-operazzjonijiet ta’ rifinanzjament ewlenin tiegħu, kif ippubblikata fis-serje C ta’ Il-Ġurnal Uffiċjali tal-Unjoni Ewropea, fl-ewwel jum kalendarju ta’ kull xahar.

(231)

Il-miżuri previsti f’dan ir-Regolament huma f’konformità mal-opinjoni tal-Kumitat stabbilita mill-Artikolu 15(1) tar-Regolament(UE) 2016/1036,