(1)

Permezz tad-Deċiżjoni ta’ Implimentazzjoni tal-Kunsill (UE) 2018/485 (2), id-Danimarka ġiet awtorizzata tapplika miżura speċjali li tidderoga mill-Artikolu 75 tad-Direttiva 2006/112/KE biex tapplika skema b’rata fissa għall-użu privat ta’ vetturi kummerċjali b’piż totali awtorizzat ta’ mhux aktar minn tliet tunnellati li jkunu ġew irreġistrati biss għan-negozju (“il-miżura speċjali”). Il-miżura speċjali se tiskadi fil-31 ta’ Diċembru 2023.

(2)

Permezz ta’ ittra rreġistrata mal-Kummissjoni fil-21 ta’ Marzu 2023, id-Danimarka talbet awtorizzazzjoni biex tkompli tapplika l-miżura speċjali lil hinn mill-31 ta’ Diċembru 2023.

(3)

Skont l-Artikolu 395(2), it-tieni subparagrafu,) tad-Direttiva 2006/112/KE, il-Kummisjoni ttrażmettiet it-talba mressqa mid-Danimarka lill-Istati Membri l-oħra permezz ta’ ittri li jġibu d-dat tat-3 u tal-4 ta’ Mejju 2023. Permezz ta’ ittra li ġġib id-data tal-5 ta’ Mejju 2023, il-Kummissjoni nnotifikat lid-Danimarka li kellha l-informazzjoni kollha meħtieġa biex tqis dik it-talba.

(4)

Jekk din il-miżura speċjali tibqa’ tkun applikata, il-persuni taxxabbli li jkunu rreġistraw vettura għan-negozju biss, ikunu jistgħu jużaw dik il-vettura għal finijiet privati, u jkunu jistgħu jikkalkulaw l-ammont taxxabbli tal-provvista preżunta ta’ servizzi skont l-Artikolu 75 tad-Direttiva 2006/112/KE abbażi ta’ rata fissa ta’ kuljum, mingħajr ma jitilfu d-dritt tagħhom li jnaqqsu t-taxxa fuq il-valur miżjud (il-VAT) imħallsa fuq il-kost tax-xiri ta’ dik il-vettura.

(5)

Madankollu, jenħtieġ li dak il-metodu ta’ kalkolu ssimplifikat skont il-miżura speċjali jkun limitat għal 20 jum ta’ użu għal finijiet privati għal kull sena kalendarja.

(6)

Skont l-informazzjoni pprovduta mid-Danimarka fit-talba tagħha, is-sitwazzjoni fattwali li tiġġustifika l-applikazzjoni tal-miżura speċjali ma nbidlitx. Flimkien mat-talba tagħha, id-Danimarka ppreżentat rapport lill-Kummissjoni li jirrieżamina l-ammont b’rata fissa li għandu jitħallas kuljum għall-użu privat ta’ vettura rreġistrata biss għan-negozju. F'dak ir-rapport, id-Danimarka ssostni li l-ammont ta’ VAT impost kuljum jibqa’ DKK 40.

(7)

Id-Danimarka tissottometti li l-miżura speċjali ħadmet tajjeb ħafna f’dawn l-aħħar snin u sar użu minnha minn għadd dejjem akbar ta’ persuni taxxabbli. Id-Danimarka ssostni wkoll li l-miżura speċjali għandha l-għan li tissimplifika l-obbligi tal-VAT tal-persuni taxxabbli li okkażjonalment jagħmlu użu privat minn vettura li kienet irreġistrata biss għan-negozju,, u b'hekk tiġi ssimplifikata l-proċedura għall-ġbir tal-VAT. Madankollu, jibqa’ possibbli li persuna taxxabbli tagħżel li tirreġistra vettura kummerċjali ħafifa għall-użu kemm għal finijiet ta’ negozju kif ukoll għal dawk privati. Meta tagħmel hekk, il-persuna taxxabbli titlef id-dritt li tnaqqas il-VAT imħallsa fuq il-kost tax-xiri tal-vettura iżda ma jkollhiex l-obbligu li tħallas imposta ta’ kuljum għal kwalunkwe użu għal finijiet privati.

(8)

L-awtorizzazzjoni tal-miżura speċjali ma ċċaħħadx lil persuni taxxabbli mid-dritt li jnaqqsu bis-sħiħ il-VAT tal-input fuq vettura rreġistrata biss għan-negozju li tintuża okkażjonalment għal użu privat u hija konsistenti mar-regoli ġenerali dwar it-tnaqqis kif stabbiliti fid-Direttiva 2006/112/KE.

(9)

Għalhekk jixraq li l-applikazzjoni tal-miżura speċjali tiġi estiża. Dik l-estensjoni jenħtieġ li tkun limitata fiż-żmien biex il-Kummissjoni tkun tista’ tevalwa l-effettività u l-adegwatezza tal-miżura speċjali. Għaldaqstant, jenħtieġ li l-awtorizzazzjoni tal-miżura speċjali tiskadi fil-31 ta’ Diċembru 2026.

(10)

Fil-każ li d-Danimarka titlob estensjoni oħra tal-miżura speċjali lil hinn mill-31 ta’ Diċembru 2026, jenħtieġ li tippreżenta rapport lill-Kummissjoni flimkien mat-talba għal estensjoni tagħha sal-31 ta' Marzu 2026.

(11)

Skont l-informazzjoni mogħtija mid-Danimarka, il-miżura speċjali ser ikollha biss effett negliġibbli fuq l-ammont kumplessiv tad-dħul mit-taxxa li tiġbor id-Danimarka fl-istadju tal-konsum finali u mhu ser ikollha l-ebda effett negattiv fuq ir-riżorsi proprji tal-Unjoni dovuti mill-VAT.

(12)

Għalhekk, id-Deċiżjoni ta’ Implimentazzjoni (UE) 2018/485 jenħtieġ li tiġi emendata skont dan,