(10)

Wara l-analiżi mill-Aġenzija tal-informazzjoni li ħarġet mill-ispezzjonijiet fir-rampa li twettqu fuq l-inġenji tal-ajru tat-trasportaturi tal-ajru tal-Unjoni, kif ukoll mill-ispezzjonijiet ta’ standardizzazzjoni li twettqu mill-Aġenzija, ikkomplimentata wkoll bl-informazzjoni li rriżultat minn spezzjonijiet u minn awditi speċifiċi li twettqu mill-awtoritajiet nazzjonali tal-avjazzjoni, diversi Stati Membri ħadu ċerti miżuri ta’ infurzar u infurmaw lill-Kummissjoni u lill-Kumitat għas-Sikurezza tal-Ajru tal-UE dwar dawk il-miżuri.

(11)

L-Istati Membri saħqu mill-ġdid li huma lesti jaġixxu kif meħtieġ f’każ li l-informazzjoni rilevanti dwar is-sikurezza tkun tindika li jkun hemm riskji imminenti għas-sikurezza minħabba nuqqas ta’ konformità min-naħa tat-trasportaturi tal-ajru tal-Unjoni mal-istandards internazzjonali rilevanti tas-sikurezza.

(12)

F’Ġunju 2020, it-trasportaturi tal-ajru mill-Armenja kienu inklużi fl-Anness A tar-Regolament (KE) Nru 474/2006, bir-Regolament ta’ Implimentazzjoni tal-Kummissjoni (UE) 2020/736 (6).

(13)

Fil-15 ta’ April 2021, il-Kummissjoni, l-Aġenzija, l-Istati Membri u r-rappreżentanti tal-Kumitat tal-Avjazzjoni Ċivili tal-Armenja (“CAC”) kellhom laqgħa teknika li matulha s-CAC ipprovda informazzjoni dwar l-attivitajiet ta’ sorveljanza tiegħu, kif ukoll dwar il-progress tal-pjan ta’ azzjoni korrettiva li ġie żviluppat f’Lulju 2020. Is-CAC ipprovda wkoll ħarsa ġenerali tal-isfidi ffaċċjati matul l-aħħar sena, informazzjoni dwar is-sitwazzjoni kumplessiva tal-ambjent tal-avjazzjoni fl-Armenja u l-lakuni identifikati f’oqsma differenti fir-responsabbilità tas-CAC li għandhom bżonn l-attenzjoni.

(14)

Barra minn hekk, waqt dik il-laqgħa, is-CAC ipprovda preżentazzjoni ddettaljata dwar l-istatus tal-implimentazzjoni tal-azzjonijiet korrettivi għall-osservazzjonijiet li qamu waqt iż-żjara ta’ valutazzjoni fuq il-post tal-Unjoni minn Frar 2020 u ħarsa ġenerali fir-rigward tal-proċess ta’ mmaniġġjar tar-riskju tas-CAC.

(15)

F’dan il-kuntest, is-CAC informa lill-Kummissjoni li ċ-Ċertifikati tal-Operatur tal-Ajru (“AOC”) tat-trasportaturi tal-ajru Atlantis European Airways u Mars Avia ġew irrevokati, u li t-trasportaturi tal-ajru l-ġodda Fly Armenia Airways (AOC Nru 070), Novair (AOC Nru 071) u Shirak Avia (AOC Nru 072) ġew iċċertifikati. Peress li s-CAC ma weriex kapaċità suffiċjenti biex jimplimenta u jinforza l-istandards rilevanti tas-sikurezza, il-ħruġ tal-AOCs lil dawk it-trasportaturi tal-ajru l-ġodda ma jiggarantix konformità biżżejjed mal-istandards tas-sikurezza internazzjonali.

(16)

Il-Kummissjoni tieħu nota tal-progress li sar mis-CAC fl-indirizzar tat-tħassib tas-sikurezza tal-avjazzjoni li f’Ġunju 2020 wassal għall-inklużjoni tat-trasportaturi Armenjani ċċertifikati fl-Anness A tar-Regolament (KE) Nru 474/2006. Madankollu, attwalment m’hemmx biżżejjed evidenza li tiġġustifika t-tneħħija tar-restrizzjonijiet operazzjonali fuq it-trasportaturi tal-ajru mill-Armenja. Il-Kummissjoni se tkompli bil-monitoraġġ u l-valutazzjoni tagħha ta’ kif is-sitwazzjoni tkompli tiżviluppa.

(17)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tikkunsidra li fir-rigward tat-trasportaturi tal-ajru mill-Armenja, jenħtieġ li tiġi emendata l-lista tat-trasportaturi tal-ajru li huma soġġetti għal projbizzjoni fuq l-operat fi ħdan l-Unjoni, biex Fly Armenia Airways, Novair u Shirak Avia jiġu inklużi fl-Anness A tar-Regolament (KE) Nru 474/2006, u biex Atlantis European Airways u Mars Avia jitneħħew minn dak l-Anness.

(18)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fl-Armenja mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi kollha, skont ir-Regolament (UE) Nru 965/2012.

(19)

F’Ġunju 2018, it-trasportaturi kollha mill-Indoneżja tneħħew mill-Anness A tar-Regolament (KE) Nru 474/2006, bir-Regolament ta’ Implimentazzjoni tal-Kummissjoni (UE) 2018/871 (7).

(20)

Fis-26 ta’ Frar 2021, id-Direttorat Ġenerali tal-Avjazzjoni Ċivili tal-Indoneżja (“DGCA Indonesia”) ipprovda informazzjoni u aġġornament dwar l-attivitajiet ta’ sorveljanza tas-sikurezza għall-perjodu minn Settembru 2020 sa Frar 2021. Barra l-aġġornament dwar il-pjan ta’ azzjoni korrettiva żviluppata abbażi taż-żjara ta’ valutazzjoni fuq il-post tal-Unjoni f’Marzu 2018, l-informazzjoni pprovduta mid-DGCA Indonesia kienet tinkludi wkoll aġġornamenti fir-rigward tal-lista tad-detenturi ta’ AOC, inġenji tal-ajru rreġistrati, aċċidenti, inċidenti serji, u okkorrenzi tal-avjazzjoni u l-miżuri ta’ infurzar li ttieħdu mid-DGCA Indonesia.

(21)

Il-Kummissjoni, wara li eżaminat l-informazzjoni u d-dokumentazzjoni li rċeviet, tikkunsidra li l-osservazzjonijiet miftuħa kollha li fadal, li jirriżultaw miż-żjara ta’ valutazzjoni fuq il-post ta’ Marzu 2018, ġew indirizzati b’suċċess u jistgħu jiġu magħluqa. Fid-dawl tal-progress miksub, il-Kummissjoni jidhrilha li huwa biżżejjed li d-DGCA Indonesia jenħtieġ li jibgħat aġġornament darba fis-sena minflok darbtejn kif kien jagħmel sa issa.

(22)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li fir-rigward tat-trasportaturi tal-ajru mill-Indoneżja, m’hemmx raġuni biex il-lista tat-trasportaturi tal-ajru, li huma soġġetti għal projbizzjoni fuq l-operat fl-Unjoni, tiġi emendata.

(23)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fl-Indoneżja mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi kollha, skont ir-Regolament (UE) Nru 965/2012.

(24)

Fejn kwalunkwe informazzjoni dwar is-sikurezza rilevanti turi riskji imminenti għas-sikurezza minħabba nuqqas ta’ konformità mal-istandards tas-sikurezza internazzjonali, tista’ ssir meħtieġa azzjoni ulterjuri mill-Kummissjoni, f’konformità mar-Regolament (KE) Nru 2111/2005.

(25)

F’Diċembru 2016, it-trasportaturi tal-ajru kollha mill-Każakistan tneħħew mill-Anness A tar-Regolament (KE) Nru 474/2006, bir-Regolament ta’ Implimentazzjoni tal-Kummissjoni (UE) 2016/2214 (8).

(26)

Fi Frar 2020, bħala parti mill-monitoraġġ kontinwu tas-sistema ta’ sorveljanza tas-sikurezza fil-Każakistan, infetħu konsultazzjonijiet formali mal-awtoritajiet kompetenti tal-Każakistan. F’dak il-kuntest, fl-okkażjoni tal-laqgħat tiegħu f’Mejju u f’Novembru 2020, il-Kumitat għas-Sikurezza tal-Ajru tal-UE ġie pprovdut b’ħarsa ġenerali tas-sitwazzjoni ta’ sorveljanza tas-sikurezza fil-Każakistan.

(27)

Bħala segwitu tad-deliberazzjonijiet ta’ Novembru 2020 tal-Kumitat għas-Sikurezza tal-Ajru tal-UE, il-Kummissjoni u l-Aġenzija żammew kuntatt kontinwu mal-Amministrazzjoni tal-Avjazzjoni tal-Każakistan tal-Kumpanija b’Ishma Konġunti (“AAK”). F’dak il-kuntest, saret vidjokonferenza fis-26 ta’ Marzu 2021 bejn il-Kummissjoni, l-Aġenzija, l-Istati Membri u r-rappreżentanti mill-Kumitat tal-Avjazzjoni Ċivili tal-Każakistan u l-AAK. Waqt dik il-laqgħa teknika, l-AAK pprovdiet preżentazzjoni komprensiva tal-miżuri li ttieħdu biex titjieb is-sorveljanza tas-sikurezza fil-Każakistan, inkluża ħarsa ġenerali tal-attivitajiet ta’ sorveljanza tagħha, il-pjanijiet tagħha fir-rigward tar-reklutaġġ u tat-taħriġ ta’ persunal tekniku, u l-azzjonijiet ta’ infurzar li ttieħdu lejn xi wħud mit-trasportaturi tal-ajru ċċertifikati fil-Każakistan. Barra minn hekk, l-AAK enfasizzat l-impenn tagħha biex tkompli ssegwi l-politika tagħha ta’ titjib kontinwu, inkluża l-ħidma essenzjali dwar l-iżvilupp ta’ sorveljanza tas-sikurezza.

(28)

Barra minn hekk, l-AAK ippreżentat l-istrateġija tagħha għall-2021–2025, inkluża l-adozzjoni tal-liġi tal-avjazzjoni l-ġdida u l-emendi konsegwenzjali għal qafas nazzjonali leġiżlattiv tal-Każakistan.

(29)

Abbażi tal-informazzjoni disponibbli attwalment, jista’ jiġi konkluż li saru sforzi sostanzjali u żviluppi konsegwenzjali biex tiġi indirizzata s-sitwazzjoni tas-sikurezza fil-Każakistan. Filwaqt li jitqies il-progress li sar sa issa, jenħtieġ li l-Kummissjoni tkompli bil-monitoraġġ u l-valutazzjoni tagħha ta’ kif is-sitwazzjoni tkompli tiżviluppa. F’dan il-kuntest, il-Kummissjoni għandha ħsieb li twettaq, bl-għajnuna tal-Aġenzija u l-Istati Membri, żjara ta’ valutazzjoni fuq il-post tal-Unjoni fil-Każakistan.

(30)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li fir-rigward tat-trasportaturi tal-ajru mill-Każakistan, m’hemmx raġuni biex il-lista tat-trasportaturi tal-ajru li huma soġġetti għal projbizzjoni fuq l-operat fl-Unjoni, tiġi emendata.

(31)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fil-Każakistan mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi kollha, skont ir-Regolament (UE) Nru 965/2012.

(32)

Fejn kwalunkwe informazzjoni dwar is-sikurezza rilevanti turi riskji imminenti għas-sikurezza minħabba nuqqas ta’ konformità mal-istandards tas-sikurezza internazzjonali, tista’ ssir meħtieġa azzjoni ulterjuri mill-Kummissjoni, f’konformità mar-Regolament (KE) Nru 2111/2005.

(33)

F’Ottubru 2006, trasportaturi tal-ajru mill-Kirgiżistan kienu inklużi fl-Anness A tar-Regolament (KE) Nru 474/2006, bir-Regolament ta’ Implimentazzjoni tal-Kummissjoni (KE) Nru 1543/2006 (9).

(34)

Fil-25 ta’ Novembru 2020, fuq talba tal-Kirgiżistan u bħala parti minn attivitajiet kontinwi ta’ monitoraġġ, il-Kummissjoni, l-Aġenzija u r-rappreżentanti tal-Aġenzija Ċivili tal-Avjazzjoni tar-Repubblika tal-Kirgiżistan (“CAA KG”) kellhom laqgħa teknika, li matulha s-CAA KG pprovdiet preżentazzjoni komprensiva tal-organizzazzjoni u l-funzjonijiet tagħha, inklużi l-prinċipji bażiċi tat-twettiq tas-sorveljanza tas-sikurezza tagħha. Informazzjoni oħra li ġiet provduta mis-CAA KG kienet tinkludi l-isfidi tal-persunal li qed taffaċċja, ħarsa ġenerali tal-qafas leġiżlattiv tal-Kirgiżistan, u l-approċċ strateġiku tagħha għall-iżvilupp tekniku fil-kuntest tal-bini tal-kapaċità tas-sikurezza tal-avjazzjoni. Ipprovdiet ukoll aġġornament fir-rigward tal-lista tad-detenturi ta’ AOC u l-inġenji tal-ajru rreġistrati.

(35)

Barra minn hekk, fl-14 ta’ Diċembru 2020, bħala segwitu tal-laqgħa teknika tal-25 ta’ Novembru 2020, is-CAA KG infurmat lill-Kummissjoni li t-trasportaturi tal-ajru Heli Sky (AOC Nru 47), Valor Air (AOC Nru 07), AeroStan (AOC Nru 08), KAP.KG Aircompany (AOC Nru 52) u FlySky Airlines (AOC Nru 53) għandhom AOC attiv. Peress li s-CAA KG ma wrietx li għandha kapaċità suffiċjenti biex timplimenta u tinforza l-istandards tas-sikurezza rilevanti, il-ħruġ ta’ AOCs lil dawk it-trasportaturi tal-ajru l-ġodda ma jiggarantix konformità biżżejjed mal-istandards tas-sikurezza internazzjonali.

(36)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tikkunsidra li fir-rigward tat-trasportaturi tal-ajru mill-Kirgiżistan, jenħtieġ li tiġi emendata l-lista tat-trasportaturi tal-ajru li huma soġġetti għal projbizzjoni fuq l-operat fi ħdan l-Unjoni, biex AeroStan, FlySky Airlines, Heli Sky, KAP.KG Aircompany u Valor Air jiġu inklużi fl-Anness A tar-Regolament (KE) Nru 474/2006.

(37)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fil-Kirgiżistan mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi kollha, skont ir-Regolament (UE) Nru 965/2012.

(38)

F’April 2019, it-trasportaturi kollha tal-ajru mill-Moldova, ħlief Air Moldova, Fly One u Aerotranscargo kienu inklużi fl-Anness A tar-Regolament (KE) Nru 474/2006, bir-Regolament ta’ Implimentazzjoni tal-Kummissjoni (UE) 2019/618 (10).

(39)

Permezz ta’ ittra tat-2 ta’ Marzu 2021, l-Awtorità tal-Avjazzjoni Ċivili tal-Moldova (“CAAM”) pprovdiet informazzjoni u aġġornament komprensiv dwar il-pjan ta’ azzjoni korrettiva li jindirizza l-osservazzjonijiet u r-rakkomandazzjonijiet li rriżultaw miż-żjara ta’ valutazzjoni fuq il-post tal-Unjoni fi Frar 2019.

(40)

Il-Kummissjoni, wara li eżaminat l-informazzjoni u d-dokumentazzjoni li rċeviet, tqis li l-ispjegazzjonijiet li ngħataw dwar il-pjan ta’ azzjoni korrettiva huma strutturati tajjeb u adegwati.

(41)

Fil-25 ta’ Marzu 2021, fuq talba tal-Moldova u bħala parti minn attivitajiet kontinwi ta’ monitoraġġ, il-Kummissjoni, l-Aġenzija, l-Istati Membri u rappreżentanti mis-CAAM kellhom laqgħa teknika, li matulha s-CAAM pprovdiet ħarsa ġenerali komprensiva tal-organizzazzjoni u tal-funzjonijiet tagħha, inklużi l-prinċipji bażiċi tat-twettiq tas-sorveljanza tas-sikurezza tagħha. Informazzjoni oħra li ġiet pprovduta mis-CAAM kienet tinkludi ħarsa ġenerali aġġornata tal-iżviluppi u tas-sitwazzjoni attwali tal-pjan ta’ azzjoni korrettiva li jindirizza l-osservazzjonijiet u r-rakkomandazzjonijiet li jirriżultaw miż-żjara ta’ valutazzjoni fuq il-post tal-Unjoni fi Frar 2019. Is-CAAM iddikjarat li l-biċċa l-kbira tal-osservazzjonijiet tal-pjan ta’ azzjoni korrettiva kienu magħluqa, u erba’ osservazzjonijiet biss kienu għadhom miftuħa.

(42)

Matul dik il-laqgħa, is-CAAM infurmat lill-Kummissjoni li t-trasportaturi tal-ajru kollha tal-Moldova reġgħu ġew iċċertifikati skont ir-regolament operattiv il-ġdid li ttraspona fil-leġiżlazzjoni tal-Moldova r-Regolament tal-Kummissjoni (UE) Nru 965/2012 (11). Attwalment, hemm 11-il detentur ta’ AOC fil-Moldova. Il-maġġoranza tat-tmien detenturi ta’ AOC li m’għandhomx l-awtorizzazzjoni TCO qed iwettqu operazzjonijiet minn bażi esterni tal-Moldova. Skont is-CAAM, is-sorveljanza ta’ dawn il-bażijiet esterni tal-Moldova qed jitwettqu f’konformità mal-istandards tas-sikurezza internazzjonali.

(43)

Barra minn hekk, is-CAAM infurmat lill-Kummissjoni li t-trasportatur tal-ajru l-ġdid HiSky (AOC Nru MD 025) ġie ċċertifikat. Peress li s-CAAM ma wrietx li għandha kapaċità suffiċjenti biex timplimenta u tinforza l-istandards rilevanti tas-sikurezza, il-ħruġ ta’ AOC għal din il-kumpanija l-ġdida tal-ajru, ma jiggarantix konformità biżżejjed mal-istandards tas-sikurezza internazzjonali.

(44)

Abbażi tal-informazzjoni disponibbli attwalment, jidher li s-CAAM għamlet sforzi sostanzjali fl-implimentazzjoni tal-istandards tas-sikurezza internazzjonali. Madankollu, attwalment m’hemmx biżżejjed evidenza li tiġġustifika t-tneħħija tar-restrizzjonijiet operazzjonali fuq it-trasportaturi tal-ajru mill-Moldova. Jenħtieġ li l-informazzjoni pprovduta rigward it-titjib tiġi vverifikata aktar matul żjara ta’ valutazzjoni fuq il-post tal-Unjoni fil-Moldova.

(45)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tikkunsidra li fir-rigward tat-trasportaturi tal-ajru mill-Moldova, jenħtieġ li tiġi emendata l-lista tat-trasportaturi tal-ajru li huma soġġetti għal projbizzjoni fuq l-operat fi ħdan l-Unjoni, biex HiSky tiġi inkluża fl-Anness A tar-Regolament (KE) Nru 474/2006.

(46)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fil-Kirgiżistan mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi kollha, skont ir-Regolament (UE) Nru 965/2012.

(47)

Fejn kwalunkwe informazzjoni dwar is-sikurezza rilevanti turi riskji imminenti għas-sikurezza minħabba nuqqas ta’ konformità mal-istandards tas-sikurezza internazzjonali, tista’ ssir meħtieġa azzjoni ulterjuri mill-Kummissjoni, f’konformità mar-Regolament (KE) Nru 2111/2005.

(48)

F’Marzu 2007, Pakistan International Airlines kienet inkluża fl-Anness B tar-Regolament (KE) Nru 474/2006 bir-Regolament tal-Kummissjoni (KE) Nru 235/2007 (12) u sussegwentement tneħħiet f’Novembru 2007 bir-Regolament tal-Kummissjoni (KE) Nru 1400/2007 (13).

(49)

Fl-24 ta’ Ġunju 2020, dikjarazzjoni mill-Ministru Federali għall-Avjazzjoni tal-Pakistan wera li għadd kbir ta’ liċenzji ta’ bdoti, maħruġa mill-Awtorità tal-Avjazzjoni Ċivili tal-Pakistan (“PCAA”), inkisbu permezz ta’ mezzi frodulenti.

(50)

Dan l-avveniment, u n-nuqqas apparenti ta’ sorveljanza tas-sikurezza effettiva mill-PCAA, wasslet lill-Aġenzija biex tissospendi l-awtorizzazzjonijiet tat-TCO ta’ Pakistan International Airlines u Vision Air b’effett mill-1 ta’ Lulju 2020.

(51)

Fl-1 ta’ Lulju 2020, il-Kummissjoni fetħet konsultazzjonijiet mal-PCAA skont l-Artikolu 3(2) tar-Regolament (KE) Nru 473/2006, u talbet lill-PCAA biex tipprovdi informazzjoni rigward it-tweġiba tagħha għad-dikjarazzjoni tal-Ministru Federali. B’mod partikolari, il-Kummissjoni talbet informazzjoni rigward is-sorveljanza tat-trasportaturi tal-ajru ċċertifikati fil-Pakistan, inklużi s-Sistemi ta’ Ġestjoni tas-Sikurezza, kif ukoll evidenza li sitwazzjoni simili mhijiex prevalenti f’dominji oħrajn li wkoll huma soġġetti għas-sorveljanza tas-sikurezza tal-PCAA, bħaċ-ċertifikazzjoni tal-ekwipaġġ tal-kabina, il-liċenzjar tal-inġiniera tal-manutenzjoni, jew iċ-ċertifikazzjoni ta’ trasportaturi tal-ajru.

(52)

Fl-2020, il-Kummissjoni organizzat żewġ laqgħat tekniċi mal-PCAA, fid-9 ta’ Lulju u fil-25 ta’ Settembru.

(53)

Bħala preparazzjoni għal-laqgħa tal-Kumitat għas-Sikurezza tal-Ajru tal-UE ta’ Mejju 2021 u filwaqt li jitqiesu r-rekwiżiti proċedurali tal-Aġenzija relatata mas-sospensjonijiet tat-TCO ta’ Pakistan International Airlines u Vision Air, il-Kummissjoni organizzat laqgħa teknika fil-15 u s-16 ta’ Marzu 2021 biex tiżgura l-koordinazzjoni bejn il-Kummissjoni u l-Aġenzija fir-rigward tal-obbligi rispettivi tagħhom. Ir-rappreżentanti tal-Istati Membri attendew dawk il-laqgħat.

(54)

Matul dawk il-laqgħat ġew diskussi diversi kwistjonijiet, b’mod partikolari l-liċenzjar tal-ekwipaġġ, l-operazzjonijiet tal-ajru, l-ajrunavigabbiltà, ir-rapportar tal-okkorrenzi, u t-tweġibiet tal-PCAA għar-rakkomandazzjonijiet tas-sikurezza u s-segwitu tagħhom.

(55)

Il-PCAA pprovdiet evidenza u informazzjoni rilevanti li ġiet ivvalutata mill-esperti tal-Kummissjoni u tal-Aġenzija. Minkejja li nstab li l-PCAA għandha għadd suffiċjenti ta’ persunal kompetenti u mgħarraf, ġew identifikati xi kwistjonijiet organizzattivi ta’ tħassib. Dawk jinkludu nuqqasijiet ta’ maniġġjar tal-kwalità tal-proċeduri dokumentati, nuqqas ta’ gwida għall-ispetturi, proċess b’nuqqas ta’ konformità mal-kwalifikazzjoni tal-Liċenzji tal-Bdoti tat-Trasport bl-Ajru, ftit li xejn jew l-ebda insegwiment ta’ azzjonijiet korrettivi bħala riżultat tas-sejbiet, u nuqqas ta’ kapaċitajiet proprji tal-analiżi tal-kawżi ewlenin.

(56)

Barra minn hekk, il-PCAA ma setgħetx tipprovdi evidenza li l-Pakistan innotifika l-ICAO bid-derogi sostanzjali tiegħu mill-istandards tas-sikurezza internazzjonali applikabbli tal-ICAO Anness 1, kif stabbilit fis-sezzjoni “Liċenzjar tal-Persunal”.

(57)

Abbażi tal-valutazzjoni tal-evidenza u l-informazzjoni disponibbli, il-Kummissjoni tirrikonoxxi l-isforzi tal-PCAA biex tadotta l-azzjonijiet korrettivi biex jiġu indirizzati n-nuqqasijiet tas-sikurezza identifikati. Madankollu, jenħtieġ li l-Kummissjoni tkompli timmonitorja s-sitwazzjoni fil-Pakistan, inkluż permezz ta’ żjara ta’ valutazzjoni fuq il-post tal-Unjoni fil-Pakistan.

(58)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni tqis li fir-rigward tat-trasportaturi tal-ajru mill-Pakistan, m’hemmx raġuni biex il-lista tat-trasportaturi tal-ajru li huma soġġetti għal projbizzjoni fuq l-operat fl-Unjoni, tiġi emendata.

(59)

Jenħtieġ li l-Istati Membri jkomplu jivverifikaw il-konformità effettiva tat-trasportaturi tal-ajru ċċertifikati fil-Pakistan mal-istandards tas-sikurezza internazzjonali rilevanti permezz tal-prijoritizzazzjoni tal-ispezzjonijiet fir-rampa ta’ dawk it-trasportaturi kollha, skont ir-Regolament (UE) Nru 965/2012.

(60)

Fejn kwalunkwe informazzjoni dwar is-sikurezza rilevanti turi riskji imminenti għas-sikurezza minħabba nuqqas ta’ konformità mal-istandards tas-sikurezza internazzjonali, tista’ ssir meħtieġa azzjoni ulterjuri mill-Kummissjoni, f’konformità mar-Regolament (KE) Nru 2111/2005.

(61)

Il-Kummissjoni, l-Aġenzija u l-awtoritajiet kompetenti tal-Istati Membri komplew jimmonitorjaw mill-qrib il-prestazzjoni tas-sikurezza tat-trasportaturi tal-ajru ċċertifikati fir-Russja u li joperaw fl-Unjoni, inkluż permezz tal-prijoritizzazzjoni tal-ispezzjonijiet fir-rampa li twettqu fuq ċerti trasportaturi tal-ajru Russi, skont ir-Regolament (UE) Nru 965/2012.

(62)

Fl-14 ta’ April 2021, ir-rappreżentanti mill-Kummissjoni, mill-Aġenzija u mill-Istati Membri ltaqgħu ma’ rappreżentanti mill-Aġenzija Federali Russa tat-Trasport bl-Ajru (“FATA”) biex jirrieżaminaw il-prestazzjoni ta’ sikurezza ta’ trasportaturi bl-ajru ċċertifikati fir-Russja abbażi ta’ rapporti tal-ispezzjonijiet fir-rampa li twettqu fil-perjodu mill-15 ta’ Ottubru 2020 sal-14 ta’ April 2021, u biex jidentifikaw f’liema każijiet il-FATA jenħtieġ li ssaħħaħ l-attivitajiet ta’ sorveljanza tagħha.

(63)

Ir-rieżami tal-ispezzjonijiet fir-rampa tas-SAFA ta’ trasportaturi tal-ajru ċċertifikati fir-Russja ma kixifx nuqqasijiet ta’ sikurezza sinifikanti jew rikorrenti.

(64)

Abbażi tal-informazzjoni disponibbli, inkluża l-informazzjoni pprovduta mill-FATA fil-laqgħa tal-14 ta’ April 2021, il-Kummissjoni tqis li f’dan l-istadju, il-FATA għandha l-abilità u r-rieda neċessarja biex tindirizza n-nuqqasijiet ta’ sikurezza meta dawn jiġu identifikati. Abbażi ta’ dawk ir-raġunijiet, ma tqisitx neċessarja seduta tal-awtoritajiet tal-avjazzjoni Russi jew ta kwalunkwe trasportatur tal-ajru ċċertifikat fir-Russja quddiem il-Kumitat għas-Sikurezza tal-Ajru tal-UE.

(65)

F’konformità mal-kriterji komuni stabbiliti fl-Anness tar-Regolament (KE) Nru 2111/2005, il-Kummissjoni, għalhekk tqis li f’dan l-istadju m’hemmx raġuni l-lista tat-trasportaturi tal-ajru li huma soġġetti għal projbizzjoni fuq l-operat fl-Unjoni tiġi emendata billi jiġu inklużi t-trasportaturi tal-ajru mir-Russja.

(66)

Jenħtieġ li l-Istati Membri jkomplu jivverifikaw il-konformità effettiva mal-istandards tas-sikurezza internazzjoni rilevanti mit-trasportaturi tal-ajru mir-Russja, permezz tat-twettiq ta’ spezzjonijiet fir-rampa f’konformità mar-Regolament (UE) Nru 965/2012.

(67)

Fejn dawk l-ispezzjonijiet jidentifikaw riskju imminenti għas-sikurezza minħabba nuqqas ta’ konformità mal-istandards tas-sikurezza internazzjonali, il-Kummissjoni tista’ timponi projbizzjoni fuq l-operat fuq it-trasportaturi tal-ajru ċċertifikati fir-Russja kkonċernati u tinkludihom fl-Anness A jew fl-Anness B tar-Regolament (KE) Nru 474/2006.

(68)

Għalhekk jenħtieġ li r-Regolament (KE) Nru 474/2006 jiġi emendat skont dan.

(69)

Minħabba l-implikazzjonijiet tas-sikurezza, l-Artikoli 5 u 6 tar-Regolament (KE) Nru 2111/2005 jirrikonoxxu l-bżonn li jittieħdu deċiżjonijiet malajr u, meta jkun xieraq, b’urġenza. Għaldaqstant hemm bżonn li, biex jiġu mħarsa l-informazzjoni sensittiva kif ukoll il-pubbliku li jivvjaġġa, jiġu ppubblikati d-deċiżjonijiet fil-kuntest tal-aġġornament tal-lista tat-trasportaturi tal-ajru li huma soġġetti għal projbizzjoni jew restrizzjoni tal-operat fl-Unjoni, u jidħlu fis-seħħ minnufih wara l-adozzjoni tagħhom.

(70)

Il-miżuri previsti f’dan ir-Regolament huma f’konformità mal-opinjoni tal-Kumitat għas-Sikurezza tal-Ajru tal-UE stabbilit bir-Regolament (KE) Nru 2111/2005,