ANNESS

“ TIROLER SPECK ”

Nru tal-UE: PGI-AT-02162 — 8.8.2016

DOP ( )

IĠP (X)

1.   Isem/Ismijiet

“Tiroler Speck”

2.   Stat Membru jew Pajjiż Terz

L-Awstrija

3.   Deskrizzjoni tal-prodott agrikolu jew tal-oġġett tal-ikel

3.1.   Tip ta' prodott

Klassi 1.2. Prodotti tal-laħam (imsajra, immellħa, affumikati, eċċ.)

3.2.   Deskrizzjoni tal-prodott li għalih japplika l-isem f'(1)

It-“Tiroler Speck” IĠP huwa prodott tal-majjal artiġanali, ippriżervat b'mod tradizzjonali, magħmul mill-koxxa, flett, żaqq, spalla jew għonq mingħajr għadam, li mbagħad jitmellaħ fix-xott, jitħawwar b'taħlita partikulari ta' ħwawar — fosthom tal-anqas il-ġniebru, il-bżar iswed u t-tewm —, jiġi affumikat fil-kesħa skont proċess speċifiku għar-reġjun bl-użu ta' mill-inqas 50 % injam tal-fagu jew tal-fraxxnu, u jitnixxef bl-arja. Il-lewn ta' barra jkun kannella skura, u l-wiċċ mal-qtugħ jagħti fl-aħmar, b'saff abjad tax-xaħam. Ir-riħa tkun pikkanti, b'mod intens u aromatiku, u bi sfumaturi ċari ta' maturazzjoni u aroma tad-duħħan. It-togħma tkun kemxejn pikkanti, u tibda minn sfumaturi ċari u inekwivokabbli tad-duħħan, tgħaddi għal togħma sħiħa tal-laħam, u tagħqad b'togħma rikonoxxibbli tal-melħ.

Karatteristiċi fiżikokimiċi u mikrobijoloġiċi:

Proporzjon ilma/proteini: massimu ta' 1,7 (tolleranza + 0,2)

Kontenut ta' melħ (NaCl): massimu ta' 5,0 % (tolleranza + 1,5 % [fil-qalba] + 2,0 % [fix-xifer])

It-“Tiroler Speck” jiġi prodott esklussivament fiż-żona ġeografika ddefinita, u jkun disponibbli, fl-għamla aħħarija tiegħu, ippakkjat fil-vakwu jew f'atmosfera kkontrollata, u jew f'biċċiet sħaħ, jew imqatta' jew f'fetet.

3.3.   Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

Il-qatgħat tal-laħam użati għat-“Tiroler Speck” IĠP joriġinaw fl-Unjoni Ewropea, u jkunu magħmula mill-koxxa bil-qoxra, bin-naħa l-għolja tagħha jew mingħajrha, mill-flett bil-qoxra, miż-żaqq bil-qoxra (bl-għadam artab jew mingħajru), mill-umeru tal-ispalla bil-qoxra, u mill-għonq bla qoxra, kollha bil-għadam imneħħi, u maqtugħin skont prassi tajba ta' manifattura.

3.4.   Passi speċifiċi tal-produzzjoni li jridu jsiru fiż-żona ġeografika ddefinita

Il-passi kollha tal-produzzjoni (mit-tmelliħ sal-prodott aħħari) jsiru fiż-żona ġeografika ddefinita.

3.5.   Regoli speċifiċi dwar it-tqattigħ, it-taħkik, l-ippakkjar, eċċ.

It-“Tiroler Speck” IĠP għandu jitqatta' minn espert imħarreġ fil-produzzjoni tat-“Tiroler Speck” IĠP, magħruf bħala “ Tiroler Speckmeister ”, jew inkella jitqatta' taħt is-superviżjoni tiegħu jew tagħha. Waqt it-tqattigħ, kull lott lest għandu jgħaddi minn verifika sensorjali biex tiżgura li ma hemm ebda devjazzjoni mhux mixtieqa fil-lewn jew fit-togħma. Jekk ikun hemm xi difett (taħsir, difetti fl-ilwien, jew il-formazzjoni mhux mixtieqa ta' xifer xott), għandhom jittieħdu passi minnufih biex jiġu aġġustati l-parametri ta' kontroll (fosthom it-temperatura, l-umdità jew it-tul taż-żmien ta' kull stadju) għal-lottijiet jew unitajiet li jkunu għadhom fil-proċess ta' produzzjoni. Biex din l-assigurazzjoni tal-kwalità ssir fil-pront, l-attivitajiet għall-produzzjoni tal-unitajiet ippakkjati tat-“Tiroler Speck” IĠP isiru esklussivament fl-azjenda tal-produzzjoni jew fil-grupp ta' azjendi (jiġifieri azjenda b'iktar minn post wieħed, b'kull post iwettaq stadji individwali tal-produzzjoni tat-“Tiroler Speck” IĠP, jew b'aktar minn indirizz postali wieħed fl-istess distrett).

Sabiex jiġu evitati ħsarat mill-ossidazzjoni jew minn tnixxif eċċessiv, jew minn taħsir mikrobijoloġiku minħabba t-tkabbir tal-moffa, u għaldaqstant biex jiġi evitat telf fil-kwalità, il-ħin li jgħaddi bejn it-tqattigħ u l-ippakkjar għandu jinżamm fil-qasir. Huwa għalhekk li l-ippakkjar tat-“Tiroler Speck” IĠP, f'biċċiet sħaħ jew imqatta' jew f'fetet, fil-vakwu jew f'atmosfera kkontrollata, għandu jsir fiż-żona ġeografika ddefinita. Madankollu, jekk minħabba arranġamenti speċifiċi jkun meħtieġ perjodu ta' ħżin qabel ma jibda t-tqattigħ, dan irid isir biss fi ppakkjar fil-vakwu jew f'atmosfera kkontrollata (l-ippakkjar inizjali) sabiex jiġi evitat telf fil-kwalità minħabba tnixxif eċċessiv jew taħsir mikrobijoloġiku mit-tkabbir tal-moffa. It-“Tiroler Speck” IĠP imbagħad jitqatta' jew f'biċċiet għall-użu domestiku, jew bil-qoxra mneħħija, ippreparat u mqatta' f'fetet jew magħmul “lest għall-kċina”, u ppakkjat jew fil-vakwu jew f'atmosfera kkontrollata (l-ippakkjar aħħari).

It-“Tiroler Speck” IĠP jista' jinbiegħ f'biċċiet sħaħ lil stabbilimenti fis-settur tal-bejgħ tal-ikel bl-imnut, dejjem jekk jitqatta' f'fetet fil-preżenza tax-xerrej, u dejjem jekk dan is-sehem ta' “Tiroler Speck” IĠP mhux imqatta' ma jaqbiżx l-10 % tal-lott korrispondenti tal-ġurnata, kif ukoll bil-kundizzjoni li meta jiġi vverifikat bħala parti mill-proċess ta' tqattigħ (f'qatgħat, fetet, kubi, eċċ.), l-ammont li jifdal ma juri ebda sinjal li l-lott fih xi difetti li jistgħu jissuġġerixxu li l-laħma sħiħa pprovduta kienet difettuża.

3.6.   Regoli speċifiċi dwar it-tikkettar

Fuq kull unità ppakkjata u lesta għall-bejgħ, għandhom jidhru f'post prominenti, b'mod leġibbli u li ma jitħassarx, in-numru tal-azjenda, identifikatur tal-lott fil-forma ta' numru tal-lott jew data, u l-isem tal-indikazzjoni ġeografika protetta, “Tiroler Speck”. L-isem tal-indikazzjoni ġeografika protetta, “Tiroler Speck”, ma għandha tinqaleb f'ebda lingwa oħra.

It-terminu “indikazzjoni ġeografika protetta” u/jew it-taqsira “IĠP” għandhom jidhru eżatt wara l-isem tal-indikazzjoni ġeografika protetta, “Tiroler Speck”, u jistgħu jidhru wkoll f'lingwa komuni oħra apparti l-Ġermaniż, jew minflok il-verżjoni Ġermaniża jew magħha.

Biex ikun hemm informazzjoni aħjar għall-konsumaturi, jistgħu jintużaw ukoll termini deskrittivi tal-prodott, inkluż il-qatgħa tal-laħam li tkun intużat (“bejken”, “Speck tal-flett”, “Speck taż-żaqq”; jew “magħmul mill-perżut”, “magħmul mill-flett tal-majjal”, “magħmul miż-żaqq tal-majjal”), fil-lingwa komuni tal-pajjiż li fih il-prodott ikun qed jiġi kkummerċjalizzat. Madankollu, dawn it-termini għandhom jidhru ċarament mifrudin mill-indikazzjoni ġeografika protetta “Tiroler Speck”. Dan jista' jsir billi t-termini jitqassmu f'linji differenti, iżda għandu jinżamm spazju biżżejjed bejn il-linji. Madankollu, rigward it-“tikkettar tekniku”, jaf ma jkunx possibbli li jinfirdu ż-żewġ termini f'linji differenti minħabba limitazzjonijiet ta' spazju.

Mat-termini deskrittivi tal-prodott ma għandhomx jiżdiedu traduzzjonijiet ta' referenzi għar-reġjun tat-Tirol bħala l-post tal-oriġini.

Jista' jingħata wkoll ir-reġjun tal-produttur fiż-żona ġeografika ddefinita, iżda għandu jidher mifrud mill-indikazzjoni ġeografika protetta “Tiroler Speck” u mit-terminu “indikazzjoni ġeografika protetta” u/jew it-taqsira “IĠP”.

Jistgħu jintwerew ukoll ismijiet, ismijiet kummerċjali u tikketti privati, dejjem jekk l-ippakkjar li jirriżulta ma jqarraqx.

4.   Definizzjoni fil-qosor taż-żona ġeografika

Il-Provinċja tat-Tirol.

5.   Rabta maż-żona ġeografika

Fil-pajsaġġ muntanjuż tat-Tirol, li huwa kkaratterizzat bl-art agrikola, il-produzzjoni tat-“Tiroler Speck” bħala metodu ta' priżervazzjoni tal-laħam frisk ġiet żviluppata u rfinata tul bosta ġenerazzjonijiet. L-għarfien tar-riċetta speċjali ta' ħwawar u l-metodu ta' produzzjoni tradizzjonali għat-“Tiroler Speck” baqgħu jintirtu minn ulied kull ġenerazzjoni ta' bdiewa. Din it-tradizzjoni, mgħoddija minn persuna għall-oħra, maż-żmien issarrfet fi standard ġeneralment aċċettat tal-produzzjoni kummerċjali tat-“Tiroler Speck” tal-lum il-ġurnata. Il-proċess ta' tnixxif fl-arja muntanjuża nadifa tat-Tirol, il-proċess ta' affumikazzjoni ħafifa bl-użu ta' taħlitiet speċifiċi ta' ħwawar, u l-użu tal-injam tal-fagu jew tal-fraxxnu għad-duħħan — ilkoll elementi neċessarji tal-proċess ta' produzzjoni — jikkostitwixxu proċedura speċjali u speċifika għar-reġjun, li tagħti lit-“Tiroler Speck” id-dehra karatteristika tagħha kannella skura. Bl-eċċezzjoni tax-“Schopfspeck” [Speck tal-għonq], il-wiċċ mal-qtugħ juri kisja bajda tax-xaħam, u l-laħam ikun ta' lewn aħmar karg, li jibqa' jiskura lejn in-naħa tal-laħam. Il-karatteristiċi inekwivokabbli ta' dan il-prodott huma r-riħa pikkanti pjaċevoli, bi sfumaturi maturi li jintgħarfu mill-ewwel, u t-togħma kemxejn pikkanti b'laqtiet tad-duħħan u tal-melħ, li magħhom tiżdied l-aroma tal-laħam tal-majjal. F'din il-perspettiva usa', il-varjazzjonijiet reġjonali u bidliet sottili fil-karatteristiċi organolettiċi huma komuni, skont il-partikularitajiet kulturali stabbiliti fir-reġjuni u fil-widien korrispondenti taż-żona ġeografika ddefinita. B'hekk, ċerti aspetti tan-natura tipika tal-prodott, fosthom il-profil tat-togħma jew l-isfumaturi ta' njam affumikat, jadottaw karatteristiċi reġjonali mingħajr ma jolqtu ħażin jew jibdlu l-identità ġenerali tat-“Tiroler Speck” IĠP.

Il-metodu ta' produzzjoni tradizzjonali li żviluppa fiż-żona ġeografika jissejjes fuq l-għarfien espert tal-produtturi, li baqa' jingħadda minn ġidd għal ġidd tul is-sekli.

L-għarfien u t-tradizzjoni artiġjanali tat-Tiroler Speckmeister jiżguraw li tinżamm il-kwalità għolja tal-prodott. Is-sekli ta' esperjenza prattika tat-Tiroler Speckmeister rigward l-effetti li l-materja prima u l-kundizzjonijiet klimatiċi jkollhom fuq il-kwalità tal-prodott (inkluż l-għarfien tal-fatturi li kapaċi jħarbtu l-proċess, il-kawżi tal-abnormalitajiet, il-karatteristiċi l-ħin kollu jinbidlu tal-materja prima u tal-fatturi ambjentali, u l-effetti reċiproċi tal-parametri ta' produzzjoni) jaqdu rwol ewlieni biex jinkiseb l-istandard għoli ta' kwalità tal-prodott aħħari. Għaldaqstant, it-Tiroler Speckmeister ikejjel it-tul ta' żmien tal-proċess ta' tnixxif bl-arja abbażi tal-kundizzjonijiet klimatiċi attwali fir-reġjun u skont il-qatgħa tal-laħam. B'hekk jiżgura proċess ta' tnixxif bil-galbu, u prodott ta' kwalità liema bħalha bil-karatteristiċi tipiċi kollha tiegħu (lewn ta' barra kannella skura, konsistenza bejn medja u soda, togħma tal-ġniebru bi sfumaturi tal-melħ u aroma tad-duħħan li jintgħarfu faċilment).

Is-superviżjoni tal-proċess ta' produzzjoni mit-Tiroler Speckmeister, li jirċievi taħriġ espert kontinwu, tipprevjeni kwalunkwe effett ta' ħsara fuq il-prodott u telf fil-kwalità.

Referenza għall-pubblikazzjoni tal-Ispeċifikazzjoni tal-prodott

(L-Artikolu 6(1), it-tieni subparagrafu tar-Regolament)

https://www.patentamt.at/herkunftsangaben/tirolerspeck/