(1)

Ir-Regolament (UE) Nru 1380/2013 tal-Parlament Ewropew u tal-Kunsill (2) għandu l-għan li jelimina b'mod progressiv l-qbid skartat fis-sajd kollu tal-Unjoni bl-introduzzjoni tal-obbligu ta' ħatt l-art għall-qabdiet ta' speċijiet li huma soġġetti għal-limiti ta' qbid.

(2)

L-Artikolu 9 tar-Regolament (UE) Nru 1380/2013 jipprovdi għall-adozzjoni ta' pjanijiet pluriennali li fihom miżuri ta' konservazzjoni għal sajd li jisfrutta ċertu stokkijiet f'żona ġeografika rilevanti.

(3)

Pjanijiet pluriennali bħal dawn jispeċifikaw id-dettalji tal-implimentazzjoni tal-obbligu ta' ħatt l-art u jistgħu jagħtu setgħa lill-Kummissjoni biex tkompli tispeċifika dawk id-dettalji fuq il-bażi tar-rakkomandazzjonijiet konġunti żviluppati mill-Istati Membri.

(4)

Fin-nuqqas ta' pjan pluriennali, l-Artikolu 15(6) tar-Regolament (UE) Nru 1380/2013 jagħti s-setgħa lill-Kummissjoni biex timplimenta l-obbligu ta' ħatt l-art permezz ta' pjanijiet għall-iskartar fuq il-bażi tar-rakkomandazzjonijiet konġunti żviluppati mill-Istati Membri.

(5)

Il-Belġju, id-Danimarka, Franza, il-Ġermanja, in-Netherlands, l-Iżvezja u r-Renju Unit għandhom interess ta' ġestjoni tas-sajd dirett fil-Baħar tat-Tramuntana. Wara li kkonsultaw mal-Kunsill Konsultattiv tal-Baħar tat-Tramuntana, fil-31 ta' Mejju 2017 dawk l-Istati Membri ressqu rakkomandazzjoni konġunta lill-Kummissjoni dwar pjan għall-iskartar għas-sajd demersali fil-Baħar tat-Tramuntana. Ibbażat fuq dik ir-rakkomandazzjoni konġunta, ir-Regolament Delegat tal-Kummissjoni (UE) 2018/45 (3) stabbilixxa pjan għall-iskartar li japplika għal dak is-sajd fis-sena 2018.

(6)

Fl-4 ta' Lulju 2018, il-Parlament Ewropew u l-Kunsill adottaw ir-Regolament (UE) 2018/973 li jistabbilixxi pjan pluriennali għall-istokkijiet demersali fil-Baħar tat-Tramuntana u s-sajd li jisfrutta dawk l-istokkijiet. L-Artikolu 11 ta' dak ir-Regolament jagħti s-setgħa lill-Kummissjoni tadotta atti delegati li jispeċifikaw id-dettalji tal-obbligu ta' ħatt l-art fuq il-bażi tar-rakkomandazzjonijiet konġunti żviluppati mill-Istati Membri.

(7)

Wara li kkonsultaw mal-Kunsill Konsultattiv tal-Baħar tat-Tramuntana u l-Kunsill Konsultattiv tal-Istokkijiet Pelaġiċi, fit-30 ta' Mejju 2018 il-Belġju, id-Danimarka, Franza, il-Ġermanja, in-Netherlands, l-Iżvezja u r-Renju Unit ressqu rakkomandazzjoni konġunta ġdida lill-Kummissjoni li tikkonċerna d-dettalji tal-implimentazzjoni tal-obbligu ta' ħatt l-art għas-sajd demersali fil-Baħar tat-Tramuntana. Ir-rakkomandazzjoni konġunta ġiet emendata fit-30 ta' Awwissu 2018.

(8)

Kif stabbilit fir-Regolament (UE) 2018/973, il-Baħar tat-Tramuntana jinkludi d-Diviżjonijiet 2a, 3a u s-Subżona 4 tal-ICES.

(9)

Inkisbu kontribuzzjonijiet xjentifiċi mingħand il-korpi xjentifiċi rilevanti li ġew evalwati mill-Kumitat Xjentifiku, Tekniku u Ekonomiku għas-Sajd (STECF) (4). Fil-11 ta' Settembru 2018 saret laqgħa tal-grupp ta' esperti li għaliha attendew ir-rappreżentanti tat-28 Stat Membru, tal-Kummissjoni kif ukoll tal-Parlament Ewropew bħala osservatur, u ġew diskussi l-miżuri kkonċernati.

(10)

Għal xi stokkijiet, bħall-barbun tat-tbajja', l-STECF identifika li r-rati ta' sopravivenza tal-ħut individwali jistgħu ma jkunux robusti bħal dawk li nstabu fi speċijiet oħra. Madankollu, il-Kummissjoni qieset l-impatt relattiv ta' din l-eżenzjoni fuq l-istokk globali, mqabbel mal-ħut individwali, u bbilanċjatu kontra l-ħtieġa li titkompla l-attività tas-sajd biex isir ġbir ta' data sabiex tindirizza l-kummenti mill-STECF. Fil-każijiet fejn l-ammont relattiv tal-qbid skartat mejjet huwa relattivament baxx, il-Kummissjoni tqis bħala approċċ pragmatiku u prudenti lejn il-ġestjoni tas-sajd, li jingħataw eżenzjonijiet fuq bażi temporanja, bil-fehma li jekk dan ma jsirx, ma jsirx il-ġbir tad-data meħtieġ li huwa indispensabbli għal ġestjoni tajba u informata tal-qbid skartat fid-dawl tad-dħul fis-seħħ bis-sħiħ tal-obbligu ta' ħatt l-art.

(11)

Ir-Regolament Delegat (UE) 2018/45 ipprovda għal eżenzjonijiet ta' sopravivenza għal qabdiet tal-lingwata komuni li huma iżgħar mid-daqs minimu ta' referenza għall-konservazzjoni (MCRS) li jkunu saru bix-xbieki tat-tkarkir fid-Diviżjoni 4c tal-ICES, fuq il-bażi ta' evidenza xjentifika li wriet ir-rati ta' sopravivenza għall-qbid skartat. Dik l-evidenza ġiet evalwata fis-snin ta' qabel u l-STECF ikkonkluda (5) li l-evidenza kienet biżżejjed. Ir-rakkomandazzjoni konġunta l-ġdida tissuġġerixxi li dik l-eżenzjoni għandha tibqa' tapplika. L-STECF indika li ma kienet ipprovduta l-ebda informazzjoni ġdida dwar il-lokalizzazzjoni taż-żoni ta' tkabbir (6). Billi fil-preżent ma hemm l-ebda żoni ta' tkabbir identifikati, l-eżenzjoni tista' tiġi inkluża f'dan ir-Regolament, iżda jenħtieġ li l-Istati Membri jippreżentaw l-informazzjoni rilevanti malli jiġu identifikati t-tali żoni.

(12)

Ir-Regolament Delegat (UE) 2018/45 introduċa l-eżenzjoni ta' sopravivenza, kif stipulat fl-Artikolu 15(4)(b) tar-Regolament (UE) Nru 1380/2013, għall-qabdiet tal-iskampu li jkunu saru bin-nases fid-Diviżjonijiet 2a, 3a u s-Subżona 4 tal-ICES, fuq il-bażi tal-evidenza xjentifika li wriet ir-rati ta' sopravivenza. Dik l-evidenza ġiet evalwata fi snin preċedenti u l-STECF ikkonkluda (7) li hija biżżejjed. Ir-rakkomandazzjoni konġunta l-ġdida tissuġġerixxi li dik l-eżenzjoni għandha tibqa' tapplika. Billi ċ-ċirkostanzi ma nbiddlux, dik l-eżenzjoni għalhekk jenħtieġ tiġi inkluża f'dan ir-Regolament.

(13)

Ir-Regolament Delegat (UE) 2018/45 inkluda eżenzjoni ta' sopravivenza għall-qabdiet tal-iskampu fis-Subżona 4 tal-ICES għal ċertu rkaptu bil-kundizzjoni li jintuża apparat ta' selettività netgrid. Dik l-eżenzjoni kienet limitata għax-xhur tax-xitwa u ċertu unitajiet funzjonali tal-ICES. Ir-rakkomandazzjoni konġunta l-ġdida tissuġġerixxi li dik l-eżenzjoni tkompli tapplika u li tiġi estiża għad-Diviżjonijiet 2a u 3a tal-ICES. L-Istati Membri pprovdew evidenza xjentifika aġġornata fl-2018 sabiex juru r-rati ta' sopravivenza għall-iskampu maqbud bix-xbieki tat-tkarkir tal-qiegħ iffittjati b'manka li hija ikbar minn 80 mm jew ta' mill-inqas 70 mm u attrezzati b'apparat ta' selettività speċifiku. L-evidenza ġiet ippreżentata lill-STECF, li qajjem tħassib (8) dwar l-istimi tas-sopravivenza li jkopru l-kosta tal-Punent tal-Baħar tat-Tramuntata u dwar jekk dawk l-istimi humiex rappreżentattivi għaż-żona kollha. Madankollu, l-STECF indika li l-informazzjoni xjentifika ta' appoġġ kienet ibbażata fuq approċċ robust u li t-teknika ta' validazzjoni użata fil-kuntest tal-flotot usa' hija raġonevoli. Taħt dawn iċ-ċirkostanzi, l-eżenzjoni tista' tiġi applikata sal-31 ta' Diċembru 2021, iżda l-Istati Membri li għandhom interess ta' ġestjoni dirett jenħtieġ li jissottomettu data dwar is-sajd tal-kosta tal-Punent tal-Baħar tat-Tramuntana.

(14)

Ir-Regolament Delegat (UE) 2018/45 inkluda eżenzjoni ta' sopravivenza għall-qabda aċċidentali ta' speċijiet soġġetti għal limiti ta' qbid fis-sajd li jitwettaq bin-nases u x-xbieki fyke, fuq il-bażi tal-evidenza xjentifika li wriet ir-rati ta' sopravivenza. Dik l-evidenza ġiet evalwata fis-snin ta' qabel u l-STECF ikkonkluda (9) li d-data disponibbli tindika li l-mortalità tal-ħut skartat probabbilment tkun baxxa, madankollu l-qabdiet attwali fis-sajd huma negliġibbli. Billi l-qabdiet mhumiex sinifikanti u ċ-ċirkostanzi ma nbiddlux, l-eżenzjoni tista' tiġi inkluża f'dan ir-Regolament.

(15)

Ir-rakkomandazzjoni konġunta l-ġdida tissuġġerixxi eżenzjoni ta' sopravivenza għall-barbun tat-tbajja' f'sajd imwettaq bl-għeżula u l-pariti fid-Diviżjoni 3a u s-Subżona 4 tal-ICES. L-Istati Membri pprovdew evidenza xjentifika biex juru r-rati ta' sopravivenza tal-qbid skartat għall-barbun tat-tbajja' f'dak is-sajd. L-evidenza ġiet ippreżentata lill-STECF li kkonkluda (10) li kienet ipprovduta informazzjoni raġonevoli li turi s-sopravivenza konsiderevolment għolja. Għalhekk, dik l-eżenzjoni jenħtieġ li tiġi inkluża f'dan ir-Regolament.

(16)

Ir-rakkomandazzjoni konġunta l-ġdida tinkludi eżenzjoni ta' sopravivenza għall-barbun tat-tbajja' fis-sajd imwettaq bit-tartarun Daniż fid-Diviżjoni 3a u s-Subżona 4 tal-ICES. L-Istati Membri pprovdew evidenza xjentifika biex juru r-rati ta' sopravivenza tal-qbid skartat għall-barbun tat-tbajja' f'dak is-sajd. L-evidenza kienet ippreżentata lill-STECF li kkonkluda (11) li d-data tal-istudju dwar ir-rati ta' sopravivenza huma affidabbli, għalkemm jistgħu jintużaw fatturi addizzjonali biex tiżdied is-sopravivenza, billi t-tnaqqis tas-sopravivenza huwa sinifikati jekk il-ħin tas-selezzjoni tal-barbun tat-tbajja' idum iktar minn 30 minuta. Għalhekk, dik l-eżenzjoni tista' tiġi inkluża f'dan ir-Regolament.

(17)

Ir-rakkomandazzjoni konġunta l-ġdida tissuġġerixxi eżenzjoni ta' sopravivenza għall-qabdiet u l-qabdiet inċidentali tal-barbun tat-tbajja' fis-sajd immirat lejn il-pixxiċatt jew il-ħut tond imwettaq bix-xbieki tat-tkarkir fid-Diviżjoni 3 u s-Subżona 4 tal-ICES fix-xhur tax-xitwa. L-Istati Membri pprovdew parir xjentifiku sabiex juru r-rati ta' sopravivenza tal-qabdiet skartati għall-barbun tat-tbajja' f'dak is-sajd. L-evidenza kienet ippreżentata lill-STECF, li kkonkluda (12) li r-rati ta' sopravivenza fl-istudju ta' appoġġ jonqsu jekk il-ħin tas-selezzjoni jkun itwal minn 60 minuta fix-xhur tas-sajf, għalhekk ir-rata ta' sopravivenza baxxa tal-barbun tat-tbajja' fis-sajf tiġġustifika li l-eżenzjoni tkun ristretta għax-xhur tax-xitwa. Għalhekk, dik l-eżenzjoni jenħtieġ li tiġi inkluża f'dan ir-Regolament.

(18)

Ir-rakkomandazzjoni konġunta l-ġdida tissuġġerixxi eżenzjoni ta' sopravivenza għall-qabdiet tal-barbun tat-tbajja' iżgħar mill-MCRS li jsiru bi xbieki tat-tkarkir bi travu fis-Subżona 4 u d-Diviżjoni 2a tal-ICES. L-Istati Membri pprovdew evidenza xjentifika sabiex juru r-rati ta' sopravivenza tal-qabdiet skartati f'dak is-sajd. L-evidenza kienet ippreżentata lill-STECF li kkonkluda (13) li s-sopravivenza f'dak is-sajd hija affettwata minn diversi fatturi u hija varjabbli ħafna. L-STECF kellu wkoll dubji li minħabba r-rati relattivament għoljin indikattivi ta' qabdiet skartati u r-rati relattivament baxxi ta' sopravivenza, huwa probabbli li kwantitajiet sinifikanti tal-barbun tat-tbajja' skartati ma jgħixux. Sabiex tinġabar din id-data, is-sajd ikun irid jitkompla u b'hekk, il-Kummissjoni tqis li l-eżenzjoni jenħtieġ li tingħata, iżda li l-Istati Membri jenħtieġ li jkollhom l-obbligu li jissottomettu d-data rilevanti li tippermetti l-STECF jivvaluta bis-sħiħ il-ġustifikazzjoni u li tippermetti l-Kummissjoni twettaq evalwazzjoni. Taħt dawk iċ-ċirkostanzi, l-eżenzjoni tista' tiġi applikata proviżorjament sal-31 ta' Diċembru 2019. L-Istati Membri li għandhom interess ta' ġestjoni dirett għandhom jissottomettu: (a) pjan direzzjonali żviluppat biex iżid is-sopravivenza, sabiex jiġi vvalutat xjentifikament mill-STECF, u (b) rapporti annwali dwar il-progress u l-modifiki/aġġustamenti li jsiru lill-programm ta' sopravivenza.

(19)

Għar-rebekkini u r-raj maqbudin b'kull tip ta' rkaptu tas-sajd fid-Diviżjonijiet 2a u 3a tal-ICES, u s-Subżona 4 tal-ICES, ma hemmx evidenza xjentifika dettaljata dwar ir-rati ta' sopravivenza għas-segmenti u l-kombinazzjonijiet kollha ta' flotot li jibbenefikaw mill-eżenzjoni. Madankollu, bi ftit eċċezzjonijiet, ir-rati ta' sopravivenza huma meqjusin bħala ġeneralment robusti, iżda huma meħtieġa iktar dettalji. Sabiex tinġabar din id-data, is-sajd ikun irid jitkompla u b'hekk, il-Kummissjoni tqis li l-eżenzjoni jenħtieġ li tingħata, iżda li l-Istati Membri jenħtieġ li jkollhom l-obbligu li jissottomettu d-data rilevanti li tippermetti l-STECF jivvaluta bis-sħiħ il-ġustifikazzjoni u li tippermetti l-Kummissjoni twettaq evalwazzjoni. L-Istati Membri li għandhom interess ta' ġestjoni dirett għandhom jissottomettu sal-31 ta' Mejju ta' kull sena: (a) pjan direzzjonali żviluppat biex iżid is-sopravivenza u biex jimla l-lakuni fid-data identifikati mill-STECF, biex jiġi vvalutat kull sena mill-STECF, (b) rapporti annwali dwar il-progress u kwalunkwe modifiki jew aġġustamenti li jsiru għall-programmi ta' sopravivenza.

(20)

Meta jitqiesu r-rati ta' sopravivenza tar-rebekkini u r-raj, ir-raja kukù (Leucoraja naevus) nstabu li għandhom rata ta' sopravivenza konsiderevolment iktar baxxa minn speċijiet oħrajn, u ma hemmx biżżejjed fehim xjentifiku robust tagħhom. Madankollu jekk din l-ispeċi tiġi eskluża kompletament mill-eżenzjoni dan jipprevjeni s-sajd u l-ġbir kontinwu u preċiż ta' data. Għalhekk, il-Kummissjoni tqis li din l-eżenzjoni għandha tingħata biss għal sena waħda u li għandhom jiġu żviluppati studji ġodda u miżuri mtejba ta' sopravivenza bħala kwistjoni ta' urġenza u li dawn jiġu pprovduti lill-STECF għal valutazzjoni malajr kemm jista' jkun qabel il-31 ta' Mejju 2019.

(21)

Ir-Regolament Delegat (UE) 2018/45 inkuda eżenzjonijiet de minimis għal:

(22)

L-Istati Membri pprovdew evidenza li tappoġġja dawk l-eżenzjonijiet de minimis. L-STECF (14) evalwa dik l-evidenza u kkonkluda (15) li d-dokumenti sottomessi mill-Istati Membri fihom argumenti raġonati li juru li huwa diffiċli li jinkiseb iktar titjib fis-selettività jew li dan jimplika spejjeż sproporzjonati fl-immaniġġjar tal-qabdiet mhux intenzjonati. Billi ċ-ċirkostanzi ma nbiddlux, huwa għalhekk xieraq li jitkomplew l-eżenzjonijiet de minimis skont il-livell perċentwali u l-modifiki meħtieġa ssuġġeriti fir-rakkomandazzjoni konġunta l-ġdida skont l-Artikolu 15(5)(c) tar-Regolament (UE) Nru 1380/2013.

(23)

Ir-rakkomandazzjoni konġunta l-ġdida tissuġġerixxi eżenzjoni de minimis għal:

(24)

L-Istati Membri pprovdew evidenza xjentifika li tappoġġja l-eżenzjonijiet de minimis il-ġodda fuq il-bażi tad-diffikultajiet biex titjieb is-selettività u l-ispejjeż sproporzjonati tal-immaniġġjar tal-qabdiet. Dik l-evidenza ġiet reviżjonata mill-STECF matul is-sessjoni plenarja tiegħu mit-2 sas-6 ta' Lulju 2018.

(25)

Fir-rigward tal-eżenzjoni għall-merlangu u l-bakkaljaw maqbuda bi xbieki tat-tkarkir tal-qiegħ fid-Diviżjonijiet 4a u 4b tal-ICES, l-STECF ikkonkluda li d-data rilevanti minn ċerti Stati Membri kienet nieqsa. Sabiex tinġabar din id-data, is-sajd ikollu jitkompla u b'hekk, il-Kummissjoni tqis li l-eżenzjoni jenħtieġ li tingħata proviżorjament sal-31 ta' Diċembru 2019, iżda l-Istati Membri jenħtieġ li jkollhom l-obbligu li jissottomettu d-data rilevanti li tippermetti l-STECF jivvaluta bis-sħiħ il-ġustifikazzjoni u li tippermetti l-Kummissjoni twettaq evalwazzjoni. L-Istati Membri konċernati jenħtieġ li jwettqu provi addizzjonali u jipprovdu informazzjoni malajr kemm jista' jkun qabel il-31 ta' Mejju 2019 għal valutazzjoni mill-STECF.

(26)

Fuq il-bażi tal-evidenza pprovduta mill-Istati Membri, l-STECF qies li huwa xieraq li jiġu stabbiliti eżenzjonijiet de minimis għall-barbun tat-tbajja' maqbud b'ċerti xbieki tat-tkarkir tal-qiegħ fis-Subżona 4 tal-ICES.

(27)

L-STECF ikkonkluda li ġiet ipprovduta data raġonevoli sabiex tingħata eżenzjoni de minimis fis-sajd għall-gamblu kannella bi xbieki tat-tkarkir bi travu fid-Diviżjonijiet 4b u 4c tal-ICES.

(28)

Fir-rigward tal-eżenzjonijiet de minimis għal-lipp maqbud b'ċerti xbieki tat-tkarkir tal-qiegħ b'daqs tal-malja bejn 100 u 119-il mm fis-Subżona 4 tal-ICES, l-STECF qies li huwa diffiċli li jiġi vvalutat b'mod definittiv l-impatt tat-titjib tas-selettività fis-sajd ikkonċernat. L-STECF innota li d-data rilevanti minn ċerti Stati Membri kienet nieqsa. Madankollu, l-STECF irrikonoxxa li l-irkaptu użat fis-sajd rilevanti diġà huwa selettiv u li t-titjib ulterjuri tas-selettività se jwassal biex is-sajd ma jkunx ekonomikament vijabbli. Sabiex tinġabar din id-data, is-sajd ikollu jitkompla u b'hekk, il-Kummissjoni tqis li l-eżenzjoni jenħtieġ li tingħata proviżorjament sal-31 ta' Diċembru 2019, iżda l-Istati Membri jenħtieġ li jkollhom l-obbligu li jissottomettu d-data rilevanti li tippermetti l-STECF jivvaluta bis-sħiħ il-ġustifikazzjoni u li tippermetti l-Kummissjoni twettaq evalwazzjoni. L-Istati Membri għandhom jissottomettu (a) data li turi li t-titjib fis-selettività huwa diffiċli ħafna li jinkiseb fis-sajd rilevanti u (b) informazzjoni addizzjonali dwar il-qabdiet jew il-flotta fuq il-flotot ta' Stati Membri oħrajn li wkoll jistgħu jkunu attivi fis-sajd. L-Istati Membri konċernati jenħtieġ li jwettqu provi addizzjonali u jipprovdu informazzjoni malajr kemm jista' jkun qabel il-31 ta' Mejju 2019 għal valutazzjoni mill-STECF.

(29)

Fuq il-bażi tal-evidenza pprovduta mill-Istati Membri u kif konkluż mill-STECF, jenħtieġ li tingħata eżenzjoni de minimis għal-lipp maqbud b'ċerti xbieki tat-tkarkir tal-qiegħ b'daqs tal-malja ta' 120 mm jew iktar fis-Subżona 4 tal-ICES.

(30)

Fil-konklużjonijiet tiegħu l-STECF innota li kienet ipprovduta informazzjoni dettaljata għall-eżenzjoni de minimis għall-merlangu maqbud b'ċerti xbieki tat-tkarkir bi travu fis-Subżona 4 tal-ICES. Madankollu l-STECF indika limiti fit-titjib tas-selettività għall-merlangu u nnota li l-approċċ użat għall-kalkolu tad-de minimis jista' jirrestrinġi s-selettività tal-merlangu, billi l-qabdied kollha mhux intenzjonati tal-merlangu jistgħu potenzjalment jiġu skartati. Taħt dawk iċ-ċirkostanti l-eżenzjoni għandha tiġi applikata fil-livell tal-qabdiet skartati osservati (2 %) u jenħtieġ li l-Istati Membri jkollhom l-obbligu li jissottomettu d-data rilevanti li tippermetti l-STECF jivvaluta bis-sħiħ il-ġustifikazzjoni u li tippermetti l-Kummissjoni twettaq evalwazzjoni kul sena. L-Istati Membri konċernati jenħtieġ li jwettqu provi addizzjonali u jipprovdu informazzjoni għal valutazzjoni mill-STECF malajr kemm jista' jkun qabel il-31 ta' Mejju ta' kull sena.

(31)

L-evidenza pprovduta mill-Istati Membri dwar l-eżenzjonijiet de minimis li jirrigwardaw is-sawrell u l-kavall maqbuda minn bastimenti li jużaw xbieki tat-tkarkir tal-qiegħ, tartaruni u xbieki tat-tkarkir bi travu kienet evalwata mill-STECF, li kkonkluda li hija meħtieġa iktar informazzjoni. Minħabba l-ħtieġa li titkompla l-attività tas-sajd u l-ġbir tad-data biex tiġi pprovduta din l-informazzjoni, l-eżenzjonijiet individwali għal kull speċi jenħtieġ li jkunu limitati għal sena waħda u l-Istati Membri jenħtieġ li jkollhom l-obbligu li jissottomettu d-data rilevanti li tippermetti l-STECF jivvaluta bis-sħiħ il-ġustifikazzjoni u li tippermetti l-Kummissjoni twettaq evalwazzjoni. L-Istati Membri konċernati jenħtieġ li jwettqu l-provi addizzjonali u jipprovdu informazzjoni malajr kemm jista' jkun qabel il-31 ta' Mejju 2019 għal valutazzjoni mill-STECF. Dawn l-eżenzjonijiet għalhekk jenħtieġ li jiġu applikati proviżorjament sal-31 ta' Diċembru 2019.

(32)

Sabiex jiġu żgurati stimi affidabbli tal-livelli ta' skartar biex jiġu stabbiliti l-qabdiet permissibbli totali, jenħtieġ li l-Istati Membri, fil-każijiet fejn l-eżenzjoni de minimis hija bbażata fuq l-estrapolazzjoni ta' sitwazzjonijiet b'data limitata u informazzjoni dwar il-flotot parzjali, jiżguraw provvista ta' data preċiża u verifikabbli għall-flotta sħiħa koperta minn din id-dispożizzjoni de minimis.

(33)

Skont l-Artikolu 15(5)(a) tar-Regolament (UE) Nru 1380/2013, id-dettalji tal-implimentazzjoni tal-obbligu ta' ħatt l-art jistgħu jinkludu miżuri tekniċi imsemmija fl-Artikolu 7(2) ta' dak ir-Regolament. Biex tiżdied is-selettività tal-irkapti u jitnaqqsu l-qabdiet inċidentali fi Skagerrak, jixraq li jinżammu għadd ta' miżuri tekniċi li kienu ġew miftehma bejn l-Unjoni u n-Norveġja fl-2011 (16), u fl-2012 (17) u li l-użu tal-apparat ta' selettività SepNep jiġi awtorizzat.

(34)

Il-miżuri suġġeriti mir-rakkomandazzjoni konġunta l-ġdida huma f'konformità mal-Artikolu 15(4), l-Artikolu 15(5)(c) u l-Artikolu 18(3) tar-Regolament (UE) Nru 1380/2013 u r-Regolament (UE) 2018/973, b'mod partikolari l-Artikolu 11 tiegħu u għalhekk jistgħu jiġu inklużi f'dan ir-Regolament.

(35)

Skont l-Artikolu 18 tar-Regolament (UE) Nru 1380/2013, il-Kummissjoni qieset kemm il-valutazzjoni tal-STECF kif ukoll il-ħtieġa li l-Istati Membri jiżguraw l-implimentazzjoni sħiħa tal-obbligu ta' ħatt l-art fl-1 ta' Jannar 2019. F'diversi każijiet, l-eżenzjonijiet jeħtieġu li jitkomplew l-attività tas-sajd u l-ġbir ta' data sabiex jiġu indirizzati l-kummenti tal-STECF. F'dawn il-każijiet, il-Kummissjoni tqis bħala approċċ pragmatiku u prudenti lejn il-ġestjoni tas-sajd, li tippermetti eżenzjonijiet fuq bażi temporanja, bil-fehim li jekk ma tagħmilx hekk dan jipprevjeni l-ġbir ta' data meħtieġ li huwa indispensabbli għal ġestjoni xierqa u informata tal-qabdiet skartati fid-dawl tad-dħul fis-seħħ bis-sħiħ tal-obbligu ta' ħatt l-art.

(36)

Skont l-Artikolu 16(2) tar-Regolament (UE) 2018/973, il-Kummissjoni ngħatat is-setgħa li tadotta atti delegati dwar l-obbligu ta' ħatt l-art għal perjodu ta' ħames snin mill-5 ta' Awwissu 2018. Għaldaqstant jixraq li l-impatt tal-eżenzjonijiet ta' sopravivenza u de minimis mill-obbligu ta' ħatt l-art jiġi evalwat fit-tielet sena tal-applikazzjoni ta' dan ir-Regolament.

(37)

Billi l-miżuri previsti f'dan ir-Regolament iħallu impatt dirett fuq l-ippjanar tal-istaġun tas-sajd tal-bastimenti tal-Unjoni u fuq l-attivitajiet ekonomiċi relatati, jenħtieġ li dan ir-Regolament jidħol fis-seħħ immedjatament wara l-pubblikazzjoni tiegħu. Dan jenħtieġ li japplika mill-1 ta' Jannar 2019 sal-31 ta' Diċembru 2021,