Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32018R1637

    Regolament Delegat tal-Kummissjoni (UE) 2018/1637 tat-13 ta' Lulju 2018 li jissupplimenta r-Regolament (UE) 2016/1011 tal-Parlament Ewropew u tal-Kunsill dwar l-indiċi użati bħala parametri referenzjarji fir-rigward tal-istandards tekniċi regolatorji għall-proċeduri u l-karatteristiċi tal-funzjoni ta' sorveljanza (Test b'rilevanza għaż-ŻEE.)

    C/2018/4430

    ĠU L 274, 5.11.2018, p. 1–5 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

    Legal status of the document In force

    ELI: http://data.europa.eu/eli/reg_del/2018/1637/oj

    5.11.2018   

    MT

    Il-Ġurnal Uffiċjali tal-Unjoni Ewropea

    L 274/1

    REGOLAMENT DELEGAT TAL-KUMMISSJONI (UE) 2018/1637

    tat-13 ta' Lulju 2018

    li jissupplimenta r-Regolament (UE) 2016/1011 tal-Parlament Ewropew u tal-Kunsill dwar l-indiċi użati bħala parametri referenzjarji fir-rigward tal-istandards tekniċi regolatorji għall-proċeduri u l-karatteristiċi tal-funzjoni ta' sorveljanza

    (Test b'rilevanza għaż-ŻEE)

    IL-KUMMISSJONI EWROPEA,

    Wara li kkunsidrat it-Trattat dwar il-Funzjonament tal-Unjoni Ewropea,

    Wara li kkunsidrat ir-Regolament (UE) 2016/1011 tal-Parlament Ewropew u tal-Kunsill tat-8 ta' Ġunju 2016 dwar l-indiċi użati bħala parametri referenzjarji fi strumenti finanzjarji u kuntratti finanzjarji jew dwar il-kejl tal-prestazzjoni ta' fondi ta' investiment u li jemenda d-Direttivi 2008/48/KE u 2014/17/UE u r-Regolament (UE) Nru 596/2014 (1), u b'mod partikolari l-Artikolu 5(5) tiegħu,

    Billi:

    (1)

    L-Artikolu 5 tar-Regolament (UE) 2016/1011 jirrikjedi li l-amministraturi tal-parametri referenzjarji jistabbilixxu funzjoni ta' sorveljanza permanenti u effettiva li għandha ssir minn kumitat separat jew permezz ta' arranġament ta' governanza ieħor xieraq.

    (2)

    L-amministraturi għandhom id-diskrezzjoni li jfasslu l-iktar funzjoni ta' sorveljanza xierqa għall-parametri referenzjarji li jipprovdu biex jissodisfaw ir-rekwiżiti tal-Artikolu 5 tar-Regolament (UE) 2016/1011. Dan ir-Regolament jistabbilixxi lista mhux eżawrjenti ta' arranġamenti ta' governanza xierqa.

    (3)

    L-għoti lill-partijiet interessati esterni ta' funzjoni ta' sorveljanza jista' jipprovdi għarfien espert siewi u l-parteċipazzjoni tagħhom tista' żżid l-effettività tal-funzjoni ta' sorveljanza. Il-kunflitti ta' interess fil-funzjoni ta' sorveljanza jistgħu jinqalgħu minħabba interessi kunfliġġenti ta' dawk il-membri jew minħabba relazzjonijiet bejn membri tal-funzjoni ta' sorveljanza u l-klijenti tagħhom jew partijiet ikkonċernati oħra. Sabiex jittaffew dawn il-kunflitti, jenħtieġ li membri indipendenti li jkunu ħielsa minn kunflitti ta' interess, fejn ikun possibbli, jiġu inklużi fis-sorveljanza ta' dawk il-parametri referenzjarji ta' importanza kritika, minħabba l-importanza tagħhom għall-integrità tas-suq, għall-istabbiltà finanzjarja, għall-konsumaturi, għall-ekonomija reali u għall-finanzjament ta' unitajiet domestiċi u ta' negozji fl-Istati Membri. Fejn tali membri indipendenti ma jkunux meħtieġa skont dan ir-Regolament, jenħtieġ li l-amministraturi jadottaw proċeduri oħra biex jindirizzaw il-kunflitti ta' interess potenzjali bħall-esklużjoni ta' membri minn ċerti diskussjonijiet jew it-tneħħija ta' drittijiet tal-vot ta' membri speċifiċi.

    (4)

    Persuni li huma involuti direttament fil-forniment tal-parametru referenzjarju jistgħu jattendu l-kumitati iżda ma jivvutawx fuq il-funzjoni ta' sorveljanza billi dawn jistgħu jipprovdu għarfien siewi dwar il-ħidma tal-amministratur. L-istatus tagħhom bħala membri bla vot huwa xieraq biex jiġi żgurat li l-amministratur ma jkollux influwenza indebita fuq id-deċiżjonijiet tal-funzjoni ta' sorveljanza.

    (5)

    Il-funzjoni ta' sorveljanza tista' tinkludi kumitati b'kompetenzi speċifiċi u ddedikati, għal parametri referenzjarji jew familji ta' parametri referenzjarji differenti jew tista' tinkludi diversi funzjonijiet li jwettqu kompiti differenti meta l-persuni b'għarfien espert xieraq ma jkunux jistgħu jkunu kollha fuq kumitat wieħed, pereżempju meta jkunu bbażati f'reġjuni ġeografiċi differenti. Dawn il-funzjonijiet ta' sorveljanza irid ikollhom persuna waħda fiżika jew kumitat inkarigat mill-funzjoni ta' sorveljanza u responsabbli għall-interazzjoni mal-korp maniġerjali tal-amministratur u mal-awtorità kompetenti biex tkun iffaċilitata ċ-ċentralizzazzjoni tas-sorveljanza.

    (6)

    Għal xi parametri referenzjarji sinifikanti inqas użati u inqas vulnerabbli, jista' jkun possibbli għal persuna fiżika waħda biex taġixxi bħala funzjoni ta' sorveljanza, fejn il-persuna fiżika tista' timpenja ruħha għal ammont xieraq ta' żmien għas-superviżjoni tal-parametri referenzjarji rilevanti. Fejn il-funzjoni tas-sorveljanza tkun persuna fiżika, din tkun eżenti minn ċerti proċeduri li huma xierqa biss għal kumitat. Minħabba l-grad għoli ta' użu tal-parametri referenzjarji ta' importanza kritika u r-riskji li jistgħu joħolqu f'ċerti sitwazzjonijiet, il-parametri referenzjarji ta' importanza kritika m'għandhomx ikunu sorveljati minn persuna fiżika.

    (7)

    Biex jissodisfaw ir-responsabbiltajiet tal-funzjoni ta' sorveljanza, il-membri għandu jkollhom għarfien espert dwar il-proċess ta' tħejjija tal-parametri referenzjarji iżda wkoll tas-suq sottostanti li l-parametru referenzjarju jipprova jkejjel. Dan l-għarfien espert jista' jkun ġej minn utenti u kontributuri attivi fis-swieq jew minn fornituri ta' data regolata. Funzjoni ta' sorveljanza tista' tibbenefika mill-għarfien espert tal-kontributuri, sakemm jittieħdu l-miżuri xierqa biex jiġi żgurat in-nuqqas ta' kunflitti ta' interess, u l-utenti jkollhom interess li jiżguraw li l-parametru referenzjarju jkun robust. Huwa għalhekk xieraq li l-kontributuri u l-utenti jkunu kkunsidrati bħala membri għal tali parametri referenzjarji.

    (8)

    Il-funzjoni ta' sorveljanza hija għodda essenzjali għall-ġestjoni tal-kunflitti ta' interess fil-livell tal-amministratur u sabiex tiġi żgurata l-integrità tal-funzjoni, il-persuni li ġew sanzjonati għal ksur ta' regoli dwar is-servizzi finanzjarji, b'mod partikolari manipulazzjoni jew tentattiv ta' manipulazzjoni skont ir-Regolament (UE) Nru 596/2014 tal-Parlament Ewropew u tal-Kunsill (2), għandhom ikunu pprojbiti milli jsiru membri ta' funzjoni ta' sorveljanza.

    (9)

    Partijiet interessati esterni jista' jkollhom interess fil-parametru referenzjarju meta jkun użat ħafna fis-swieq tagħhom u jkunu jistgħu jipprovdu għarfien espert addizzjonali. L-amministraturi jistgħu jistabbilixxu proċeduri li jippermettulhom li jieħdu sehem bħala osservaturi għall-funzjoni ta' sorveljanza.

    (10)

    Kumitati indipendenti ma jistgħux jiġu separati kompletament mill-organizzazzjoni tal-amministratur billi d-deċiżjonijiet finali fir-rigward tax-xogħol tal-amministratur huma f'idejn il-korp maniġerjali, u kumitat separat jista' jieħu deċiżjonijiet mingħajr ma jkun konxju bis-sħiħ tal-impatt detrimentali potenzjali ta' tali deċiżjonijiet fuq in-negozju tal-amministratur. Funzjoni ta' sorveljanza integrata fl-organizzazzjoni tal-amministratur, jew tal-kumpanija ewlenija tal-grupp li għalih tappartjeni, hija għalhekk fl-aħjar pożizzjoni biex tikkontesta d-deċiżjonijiet tal-amministratur fir-rigward tal-parametri referenzjarji li jipprovdi.

    (11)

    Sabiex il-korp ta' sorveljanza jwettaq il-funzjoni mogħtija lilu mir-Regolament (UE) 2016/1011, huwa importanti li dan ikollu l-kapaċità li jivvaluta b'mod sħiħ u li jikkontesta d-deċiżjonijiet tal-korp maniġerjali tal-amministratur u li, f'każ ta' nuqqas ta' qbil, id-deliberazzjonijiet tal-funzjoni ta' sorveljanza f'dan ir-rigward jkunu rreġistrati.

    (12)

    Proċeduri dwar il-kriterji għall-għażla tal-membri u l-osservaturi, dwar il-ġestjoni tal-kunflitti ta' interess u, fil-każ li l-funzjoni ta' sorveljanza tkun kumitat, proċeduri li jkopru s-soluzzjoni tat-tilwim huma meħtieġa biex jiżguraw li l-funzjoni ta' sorveljanza tkun tista' topera mingħajr xkiel. Jista' jkun hemm proċeduri oħra xierqa għall-funzjoni ta' sorveljanza għal ċerti tipi ta' parametri referenzjarji jew amministraturi li mhumiex stabbiliti f'dan ir-Regolament iżda huma neċessarji u xierqa għall-governanza korretta tal-parametri referenzjarji tagħhom. L-amministraturi jistgħu għalhekk jintroduċu proċeduri alternattivi sakemm dawn il-proċeduri jilħqu livell adegwat ta' sorveljanza.

    (13)

    Dan ir-Regolament huwa bbażat fuq l-abbozz tal-istandards tekniċi regolatorji ppreżentat mill-Awtorità Ewropea tat-Titoli u s-Swieq (ESMA) lill-Kummissjoni.

    (14)

    L-ESMA wettqet konsultazzjonijiet pubbliċi miftuħa dwar l-abbozz tal-istandards tekniċi regolatorji li fuqhom dan ir-Regolament huwa bbażat, analizzat l-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Konċernati tat-Titoli u s-Swieq stabbilit skont l-Artikolu 37 tar-Regolament (UE) Nru 1095/2010 (3).

    (15)

    Jenħtieġ li l-amministraturi jingħataw żmien biżżejjed biex jiżguraw konformità mar-rekwiżiti ta' dan ir-Regolament. Jenħtieġ li dan ir-Regolament għalhekk jibda japplika xahrejn wara li jidħol fis-seħħ,

    ADOTTAT DAN IR-REGOLAMENT:

    Artikolu 1

    Kompożizzjoni tal-funzjoni ta' sorveljanza

    1.   L-istruttura u l-kompożizzjoni tal-funzjoni ta' sorveljanza għandhom ikunu proporzjonati mas-sjieda u l-istruttura ta' kontroll tal-amministratur u għandhom, bħala regola ġenerali, jiġu ddeterminati skont arranġament xieraq ta' governanza wieħed jew aktar elenkati fl-Anness għal dan ir-Regolament. L-amministraturi għandhom jipprovdu lill-awtoritajiet kompetenti b' ġustifikazzjoni għal kwalunkwe devjazzjoni minn dawn l-arranġamenti.

    2.   Meta l-parametru referenzjarju jkun parametru referenzjarju ta' importanza kritika, il-funzjoni ta' sorveljanza għandha titwettaq minn kumitat b'mill-inqas żewġ membri indipendenti. Il-membri indipendenti għandhom ikunu persuni fiżiċi li jattendu l-kumitat fuq il-funzjoni ta' sorveljanza li mhumiex direttament affiljati mal-amministratur ħlief permezz tal-involviment tagħhom fil-funzjoni ta' sorveljanza, u ma għandu jkollhom l-ebda kunflitt ta' interess, b'mod partikolari fuq il-livell tal-parametru referenzjarju relevanti.

    3.   Il-funzjoni ta' sorveljanza għandha tkun magħmula minn membri li flimkien ikollhom il-ħiliet u l-għarfien espert xieraq għas-sorveljanza tal-forniment ta' parametru referenzjarju partikolari u għar-responsabbiltajiet li l-funzjoni ta' sorveljanza hija meħtieġa li tissodisfa. Il-membri tal-funzjoni ta' sorveljanza għandu jkollhom għarfien xieraq tas-suq sottostanti jew ir-realtà ekonomika li l-parametru referenzjarju huwa maħsub biex ikejjel.

    4.   L-amministraturi tal-parametri referenzjarji ta' data regolata għandhom jinkludu, bħala membri tal-funzjoni ta' sorveljanza, rappreżentanti mill-entitajiet elenkati fid-definizzjoni ta' data regolata fil-punt (a) tal-Artikolu 3(1)(24) tar-Regolament (UE) 2016/1011 u, fejn applikabbli, minn entitajiet li jikkontribwixxu valuri netti tal-assi ta' fondi ta' investiment għal parametri referenzjarji ta' data regolata. L-amministraturi għandhom jipprovdu lill-awtoritajiet kompetenti b'ġustifikazzjoni għal kwalunkwe esklużjoni ta' rappreżentanti minn dawn l-entitajiet.

    5.   Meta parametru referenzjarju jkun ibbażat fuq kontribuzzjonijiet u rappreżentanti tal-kontributuri tiegħu jew ta' entitajiet taħt superviżjoni li jużaw il-parametru referenzjarju bħala membri tal-funzjoni ta' sorveljanza, l-amministratur għandu jiżgura li n-numru ta' membri b'kunflitti ta' interess ma jammontax għal jew jaqbeż maġġoranza sempliċi. Qabel il-ħatra tal-membri, l-amministraturi għandhom ukoll jidentifikaw u jqisu l-konflitti li joħorġu mir-relazzjonijiet bejn il-membri potenzjali u partijiet ikkonċernati esterni oħrajn, b'mod partikolari b'riżultat ta' interess potenzjali fil-livell tal-parametri referenzjarji rilevanti.

    6.   Persuni direttament involuti fl-għoti ta' parametru referenzjarju li jistgħu jkunu membri tal-funzjoni ta' sorveljanza, ma għandu jkollhom l-ebda dritt tal-vot. Rappreżentanti tal-korp maniġerjali m'għandhomx ikunu membri jew osservaturi iżda jistgħu jiġu mistiedna biex jattendu l-laqgħat mill-funzjoni ta' sorveljanza mingħajr ma jkunu jistgħu jivvutaw.

    7.   Il-membri tal-funzjoni ta' sorveljanza ma għandhomx jinkludu persuni li ġew soġġetti għal sanzjonijiet ta' natura amministrattiva jew kriminali relatati mas-servizzi finanzjarji, b'mod partikolari manipulazzjoni jew tentattiv ta' manipulazzjoni skont ir-Regolament (UE) Nru 596/2014.

    Artikolu 2

    Karatteristiċi u pożizzjonament tal-funzjoni ta' sorveljanza

    1.   Il-funzjoni ta' sorveljanza għandha tikkostitwixxi parti mill-istruttura organizzattiva tal-amministratur, jew tal-kumpannija ewlenija tal-grupp li minnu tagħmel parti, iżda tkun separata mill-korp maniġerjali u funzjonijiet oħra ta' governanza tal-amministraturi tal-parametri referenzjarji.

    2.   Il-funzjoni ta' sorveljanza għandha tevalwa, u fejn xieraq, tikkontesta d-deċiżjonijiet tal-korp maniġerjali tal-amministratur fir-rigward tal-għoti ta' parametri referenzjarji biex tiżgura l-issodisfar tar-rekwiżiti tar-Regolament (UE) 2016/1011. Mingħajr preġudizzju għall-punt (i) tal-Artikolu 5(3) tar-Regolament (UE) 2016/1011, il-funzjoni ta' sorveljanza għandha tindirizza r-rakkomandazzjonijiet kollha dwar is-sorveljanza tal-parametri referenzjarji lill-korp maniġerjali.

    3.   Fejn il-funzjoni ta' sorveljanza ssir konxja li l-korp maniġerjali ħa azzjoni jew beħsiebu jieħu azzjoni kontra kwalunkwe rakkomandazzjonijiet jew deċiżjonijiet tal-funzjoni ta' sorveljanza, hija għandha tirreġistra dan il-fatt b'mod ċar fil-minuti tal-laqgħa tagħha li jmiss, jew fir-rekord tagħha ta' deċiżjonijiet fejn funzjoni ta' sorveljanza ġiet stabbilita f'konformità mat-tielet arranġament ta' governanza stipulat fl-Anness għal dan ir-Regolament.

    Artikolu 3

    Proċeduri li jirregolaw il-funzjoni ta' sorveljanza

    1.   Funzjoni ta' sorveljanza għandu jkollha proċeduri mill-inqas relatati mal-oqsma li ġejjin:

    (a)

    it-termini ta' referenza tagħha, il-frekwenza tal-laqgħat regolari tagħha, ir-reġistrazzjoni ta' minuti tal-laqgħat u tad-deċiżjonijiet tagħha u l-kondiviżjoni ta' informazzjoni perjodika mal-korp maniġerjali tal-amministratur;

    (b)

    il-kriterji biex jintgħażlu l-membri tagħha, inklużi kriterji biex jiġi evalwat il-potenzjal tal-ħiliet u l-għarfien espert tal-membri u jekk jistgħux jissodisfaw l-impenji ta' żmien meħtieġa. Dawn il-kriterji għandhom iqisu b'mod partikolari r-rwol tal-membri potenzjali fi kwalunkwe funzjoni ta' sorveljanza oħra;

    (c)

    il-kriterji biex jintgħażlu osservaturi li jistgħu jitħallew jattendu laqgħa tal-funzjoni ta' sorveljanza;

    (d)

    l-elezzjoni, in-nomina jew it-tneħħija u s-sostituzzjoni tal-membri tagħha;

    (e)

    fejn applikabbli, il-kriterji għall-għażla tal-persuna jew il-kumitat responsabbli għall-koordinazzjoni u d-direzzjoni ġenerali tagħha u biex taġixxi bħala punt ta' kuntatt għall-korp maniġerjali tal-amministratur u għall-awtorità kompetenti, f'konformità mal-arranġamenti ta' governanza xierqa għall-funzjonijiet ta' sorveljanza li jikkonsistu f'diversi kumitati kif stabbilit fl-Anness;

    (f)

    id-divulgazzjoni pubblika ta' dettalji fil-qosor tal-membri tagħha, flimkien ma' kwalunkwe dikjarazzjoni ta' kunflitti ta' interess u ta' kwalunkwe miżuri meħuda biex dawn jittaffew;

    (g)

    is-sospensjoni tad-drittijiet tal-vot tal-membri esterni għal deċiżjonijiet li jkollhom impatt dirett fuq il-ħidma tal-organizzazzjonijiet li jirrappreżentaw;

    (h)

    il-ħtieġa li l-membri jiżvelaw kull kunflitt ta' interess qabel id-diskussjoni ta' suġġett fuq l-aġenda matul il-laqgħat tal-funzjoni ta' sorveljanza u kif jiġu rreġistrati fil-minuti tal-laqgħa;

    (i)

    l-esklużjoni ta' membri minn diskussjonijiet speċifiċi li fir-rigward tagħhom għandhom kunflitt ta' interess u r-reġistrazzjoni tal-esklużjoni fil-minuti tal-laqgħa;

    (j)

    l-aċċess tagħha għad-dokumentazzjoni kollha meħtieġa biex twettaq dmirijietha;

    (k)

    il-ġestjoni tat-tilwim fi ħdanha;

    (l)

    il-miżuri li għandhom jittieħdu fir-rigward tal-ksur tal-kodiċi ta' kondotta;

    (m)

    in-notifika lill-awtorità kompetenti bi kwalunkwe suspett ta' mġiba ħażina minn kontributuri jew mill-amministratur u ta' kwalunkwe data tal-input anomala jew suspettuża;

    (n)

    il-prevenzjoni, l-iżvelar mhux xieraq ta' informazzjoni kunfidenzjali jew sensittiva riċevuta, prodotta jew diskussa mill-funzjoni ta' sorveljanza.

    2.   Fejn il-funzjoni ta' sorveljanza titwettaq minn persuna fiżika:

    (a)

    Il-punti (e), (g), (i), u (k) tal-paragrafu 1 ma japplikawx;

    (b)

    l-amministratur għandu jaħtar korp jew persuna naturali alternattiva xierqa biex tiżgura li d-doveri tal-funzjoni ta' sorveljanza jistgħu jiġu konsistentement imwettqa f'każ ta' nuqqas tal-persuna responsabbli mill-funzjoni ta' sorveljanza.

    Artikolu 4

    Dħul fis-seħħ

    Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

    Għandu japplika mill-25 ta' Jannar 2019.

    Dan ir-Regolament għandu jorbot fl-intier tiegħu u japplika direttament fl-Istati Membri kollha.

    Magħmul fi Brussell, it-13 ta' Lulju 2018.

    Għall-Kummissjoni

    Il-President

    Jean-Claude JUNCKER

    (1)  ĠU L 171, 29.6.2016, p. 1

    (2)  Ir-Regolament (UE) Nru 596/2014 tal-Parlament Ewropew u tal-Kunsill tas-16 ta' April 2014 dwar l-abbuż tas-suq (Regolament dwar l-abbuż tas-suq) u li jħassar id-Direttiva 2003/6/KE tal-Parlament Ewropew u tal-Kunsill u d-Direttivi tal-Kummissjoni 2003/124/KE, 2003/125/KE u 2004/72/KE (ĠU L 173, 12.6.2014, p. 1).

    (3)  Ir-Regolament (UE) Nru 1095/2010 tal-Parlament Ewropew u tal-Kunsill tal-24 ta' Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/77/KE (ĠU L 331, 15.12.2010, p. 84).

    ANNESS

    Lista mhux eżawrjenti ta' arranġamenti ta' governanza xierqa

    1.

    		 Kumitat indipendenti ta' sorveljanza li jikkonsisti f'rappreżentazzjoni bbilanċjata ta' partijiet ikkonċernati inklużi entitajiet taħt superviżjoni li jużaw il-parametru referenzjarju, kontributuri għall-parametri referenzjarji u partijiet ikkonċernati esterni oħra bħal operaturi tal-infrastruttura tas-suq u sorsi ta' data tal-input oħrajn, kif ukoll membri indipendenti u l-persunal tal-amministratur li mhumiex involuti direttament fil-forniment tal-parametri referenzjarji rilevanti jew ta' kwalunkwe attività relatata;

    2.

    		 Meta l-amministratur ma jkunx proprjetà ta' jew kontrollat mill-kontributuri għall-parametru referenzjarju jew entitajiet taħt superviżjoni li jużawh u ma jkunux jeżistu kunflitti ta' interess fil-livell tal-funzjoni ta' sorveljanza, il-kumitat ta' sorveljanza għandu jinkludi:

    (a)

    mill-inqas żewġ persuni involuti fil-forniment tal-parametri referenzjarji rilevanti li ma jkunux jistgħu jivvutaw;

    (b)

    mill-inqas żewġ membri tal-persunal li jirrappreżentaw partijiet oħra fl-organizzazzjoni tal-amministratur li mhumiex involuti direttament fil-forniment tal-parametri referenzjarji rilevanti jew ta' kwalunkwe attività relatata, jew,

    (c)

    fejn tali membri tal-persunal xierqa ma jkunux disponibbli, mill-inqas żewġ membri indipendenti;

    3.

    		 Meta parametru referenzjarju ma jkunx ta' importanza kritika u dment li l-kumplessità, il-grad tal-użu jew il-vulnerabbiltà tiegħu ma jindikawx mod ieħor, persuna fiżika li hija membru tal-persunal tal-amministratur jew kwalunkwe persuna fiżika oħra li s-servizzi tagħha jitqiegħdu għad-dispożizzjoni tal-amministratur jew taħt il-kontroll tal-amministratur, li mhijiex direttament involuta fil-forniment ta' kwalunkwe parametru referenzjarju rilevanti u hija ħielsa mill-kunflitti ta' interess, b'mod partikolari dawk li jirriżultaw minn interess potenzjali fil-livell tal-parametru referenzjarju;

    4.

    		 Funzjoni ta' sorveljanza magħmula minn diversi kumitati, kull wieħed responsabbli mis-sorveljanza ta' parametru referenzjarju, tip ta' parametri referenzjarji jew familja ta' parametri referenzjarji, dment li persuna waħda jew kumitat wieħed t/jinħatar bħala responsabbli għat-tmexxija ġenerali u l-koordinazzjoni tal-funzjoni ta' sorveljanza u għall-interazzjoni mal-korp maniġerjali tal-amministratur tal-parametru referenzjarju u l-awtorità kompetenti;

    5.

    		 Funzjoni ta' sorveljanza li tikkonsisti f'diversi kumitati, kull wieħed iwettaq sottosett tar-responsabbiltajiet u l-kompiti tas-sorveljanza, dment li persuna waħda jew kumitat wieħed t/jinħatar bħala responsabbli għat-tmexxija ġenerali u l-koordinazzjoni tal-funzjoni ta' sorveljanza u għall-interazzjoni mal-korp ta' ġestjoni tal-amministratur tal-parametru referenzjarju u l-awtorità kompetenti.
    Top