11.5.2011   

MT

Il-Ġurnal Uffiċjali tal-Unjoni Ewropea

L 122/71

(1)

L-inklużjoni tal-karbendażim fl-Anness I tad-Direttiva 91/414/KEE tiskadi fit-13 ta’ Ġunju 2011.

(2)

Fuq talba, l-inklużjoni ta’ sustanza attiva tista' tiġġedded għal perjodu ta’ mhux iktar minn għaxar snin. Fis-6 ta’ Awwissu 2007, il-Kummissjoni rċeviet din it-talba mingħand l-applikant fir-rigward tat-tiġdid tal-inklużjoni għal din is-sustanza.

(3)

Fl-10 ta’ Jannar 2008, l-applikant ressaq id-dejta lill-Ġermanja, l-Istat Membru relatur, b'appoġġ tar-rikjesta tiegħu għat-tiġdid tal-inklużjoni tal-karbendażim.

(4)

L-Istat Membru relatur ħejja abbozz ta’ rapport għar-rivalutazzjoni, li l-applikant għamel il-kummenti tiegħu dwaru fit-13 ta’ Mejju 2009, u wara li dan ġie ffinalizzat ġie ppreżentat lill-applikant u lill-Kummissjoni fl-24 ta’ Lulju 2009. Flimkien mal-valutazzjoni tas-sustanza, dak ir-rapport jinkludi lista tal-istudji li l-Istat Membru relatur ibbaża l-valutazzjoni tiegħu fuqhom.

(5)

Il-Kummissjoni kkomunikat l-abbozz tar-rapport tar-rivalutazzjoni lill-Awtorità Ewropea dwar is-Sigurtà fl-Ikel (minn hawn 'il-quddiem: “l-Awtorità”) u lill-Istati Membri fit-28 ta’ Lulju 2009 għall-kummenti.

(6)

Fuq talba tal-Kummissjoni, l-abbozz tar-rapport ta’ rivalutazzjoni ġie rrevedut b'mod inter pares mill-Istati Membri u mill-Awtorità u l-applikant għamel il-kummenti tiegħu dwaru fl-14 ta’ Diċembru 2009. L-Awtorità ppreżentat il-konklużjoni tagħha dwar ir-reviżjoni inter pares tal-valutazzjoni tar-riskju tal-karbendażim (2) lill-Kummissjoni fit-30 ta’ April 2010. Wara li l-applikant ingħata l-possibbilità li jikkummenta u wara li tqiesu l-kummenti tiegħu li ngħataw fil-31 ta’ Mejju 2010, l-abbozz tar-rapport ta’ rivalutazzjoni u l-konklużjoni mill-Awtorità ġew irreveduti mill-Istati Membri u l-Kummissjoni fi ħdan il-Kumitat Permanenti dwar il-Katina Alimentari u s-Saħħa tal-Annimali u ffinalizzati fit-23 ta’ Novembru 2010 fil-format ta’ rapport ta’ reviżjoni mill-Kummissjoni dwar il-karbendażim.

(7)

Mid-diversi investigazzjonijiet li saru ħareġ li l-prodotti għall-protezzjoni tal-pjanti li fihom il-karbendażim jistgħu jkunu mistennija li jkomplu jissodisfaw ir-rekwiżiti stabbiliti fl-Artikolu 5(1)(a) u (b) tad-Direttiva 91/414/KEE, b'mod partikolari fir-rigward tal-użi li ġew investigati u speċifikati fir-rapport ta’ reviżjoni tal-Kummissjoni. Għaldaqstant huwa xieraq li tiġġedded l-inklużjoni tal-karbendażim fl-Anness I tad-Direttiva 91/414/KEE, biex jiġi żgurat li l-prodotti għall-protezzjoni tal-pjanti li jkun fihom din is-sustanza attiva jistgħu jkomplu jiġu awtorizzati meta jkunu konformi ma’ dik id-Direttiva. Barra mill-użi appoġġjati fl-ewwel inklużjoni, fid-dokument tiegħu ta’ tiġdid l-applikant jappoġġja l-użu fuq il-pitravi tal-għalf. Meta titqies id-dejta addizzjonali mressqa mill-applikant, l-użu fuq il-pitravi tal-għalf għandu jiżdied mal-lista tal-użi li jistgħu jiġu awtorizzati.

(8)

L-Artikolu 5(4) tad-Direttiva 91/414/KEE jistipula li l-inklużjoni ta’ sustanza fl-Anness I tista' tiġi suġġetta għal xi restrizzjonijiet. Sabiex jista' jiġi rifless b'mod korrett il-livell għoli ta’ protezzjoni ta’ saħħet il-bniedem u tal-annimali u tal-ambjent mixtieq fl-Unjoni, huwa meħtieġ li jiġu llimitati l-użi tal-karbendażim lil dawk li proprju jkunu ġew ivvalutati u li jkunu tqiesu li jikkonformaw mal-kundizzjonijiet tal-Artikolu 5(1) tad-Direttiva 91/414/KEE. Dan jimplika li l-użi li mhumiex parti mil-lista ta’ użi stabbiliti fl-Anness I ma’ dik id-Direttiva ma jistgħux jiġu awtorizzati sakemm l-ewwel ma jiġux miżjuda ma’ dik il-lista. Huwa xieraq li jiġu ffissati limiti massimi għall-preżenza ta’ żewġ impuritajiet rilevanti 2-amino-3-idroksifenażin (AHP) u 2,3-dijaminofenażin (DAP) fil-karbendażim immanifatturat kummerċjalment.

(9)

Bla ħsara għall-konklużjonijiet imsemmija fil-premessa 8, huwa xieraq li jinkiseb iktar tagħrif dwar ċerti punti speċifiċi. L-Artikolu 6(1) tad-Direttiva 91/414/KE jistipula li l-inklużjoni ta’ sustanza fl-Anness I tista' tiġi suġġetta għal kundizzjonijiet. Għalhekk, huwa xieraq li jinħtieġ li l-applikant iressaq iktar informazzjoni fir-rigward tad-degradazzjoni erobika fil-ħamrija, ir-riskju fit-tul għall-għasafar u r-rilevanza ta’ impurità terza, għal raġunijiet ta’ kunfidenzjalità imsemmija bħala AEF037197. Barra minn hekk, l-applikant għandu jintalab li jeżamina l-istudji inklużi fil-lista tal-abbozz tar-rapport ta’ rivalutazzjoni tas-16 ta’ Lulju 2009 (Volum 1, Livell 4, “Iktar informazzjoni”, pp. 155 – 157).

(10)

Diversi Stati Membri esprimew tħassib dwar il-profil ta’ perikolu ta’ din is-sustanza. Kien hemm tħassib simili fi żmien l-ewwel inklużjoni. Id-dokumentazzjoni ta’ tiġdid hija parzjalment ibbażata fuq id-dejta ta’ tossiċità użata waqt il-valutazzjoni tad-dokument imressaq għall-inklużjoni inizjali ta’ din is-sustanza. L-inklużjoni oriġinali kienet limitata għall-perjodu ta’ tliet snin (3). Għandu jitqies ukoll il-fehim progressiv tal-ħtieġa li jkun żgurat livell għoli ta’ protezzjoni ta’ saħħet il-bniedem u tal-annimali u tal-ambjent sostenibbli. Għalhekk, huwa xieraq li jiġi llimitat il-perjodu ta’ tiġdid għal tliet snin u nofs.

(11)

L-istess bħalma huwa l-każ għas-sustanzi kollha inklużi fl-Anness I tad-Direttiva 91/414/KEE, l-istatus tal-karbendażim jista' jiġi rivedut skont l-Artikolu 5(5) ta’ dik id-Direttiva fid-dawl ta’ kwalunkwe tagħrif ġdid li jsir disponibbli, bħal pereżempju l-evalwazzjoni tagħha li għaddejja bħalissa fil-qafas tad-Direttiva 98/8/KE tal-Parlament Ewropew u tal-Kunsill tas-16 ta’ Frar 1998 dwar it-tqegħid fis-suq tal-prodotti bijoċidali (4) kif ukoll abbażi tal-letteratura xjentifika rilevanti.

(12)

Għandu jitħalla jgħaddi perjodu raġjonevoli ta’ żmien qabel ma tiġi mġedda l-inklużjoni ta’ sustanza attiva fl-Anness I tad-Direttiva 91/414/KEE biex jippermetti lill-Istati Membri u lill-partijiet interessati li jħejju ruħhom biex jikkonformaw mar-rekwiżiti l-ġodda li jirriżultaw mit-tiġdid.

(13)

Bla ħsara għall-obbligi ddefiniti mid-Direttiva 91/414/KEE bħala konsegwenza tat-tiġdid tal-inklużjoni ta’ sustanza attiva fl-Anness I tagħha, l-Istati Membri għandhom jingħataw perjodu ta’ sitt xhur wara t-tiġdid biex jirrevedu l-awtorizzazzjonijiet ta’ prodotti għall-protezzjoni tal-pjanti li fihom il-karbendażim sabiex jiżguraw li r-rekwiżiti stipulati fid-Direttiva 91/414/KEE, u b'mod partikolari fl-Artikolu 13 tagħha, u l-kundizzjonijiet rilevanti stipulati fl-Anness I ta’ dik id-Direttiva, ikomplu jiġu ssodisfatti. Kif xieraq, l-Istati Membri għandhom iġeddu, u fejn xieraq b'modifiki, jew jirrifjutaw li jġeddu l-awtorizzazzjonijiet. Permezz ta’ deroga minn dik l-iskadenza, għandu jiġi pprovdut perjodu itwal għas-sottomissjoni u għall-valutazzjoni tal-aġġornament tal-falj komplut tal-Anness III għal kull prodott għall-protezzjoni tal-pjanti għal kull użu intenzjonat skont il-prinċipji uniformi stipulati fid-Direttiva 91/414/KEE.

(14)

Għalhekk huwa xieraq li d-Direttiva 91/414/KEE tiġi emendata skont dan.

(15)

Il-Kumitat Permanenti dwar il-Katina Alimentari u s-Saħħa tal-Annimali ma tax opinjoni fil-limitu taż-żmien stabbilit mill-President tiegħu u għaldaqstant il-Kummissjoni ressqet proposta lill-Kunsill fir-rigward ta’ dawn il-miżuri. Peress li, mal-iskadenza tal-perjodu stipulat fit-tieni sottoparagrafu tal-Artikolu 19(2) tad-Direttiva 91/414/KEE, il-Kunsill la kien adotta l-miżuri proposti u lanqas ma indika li hu kontrihom, dawn għandhom ikunu adottati mill-Kummissjoni,