31.12.2008

MT

Il-Ġurnal Uffiċjali ta’ l-Unjoni Ewropea

360

---

REGOLAMENT TAL-KUNSILL (KE) Nru 1947/2005

tat-23 ta’ Novembru 2005

dwar l-organizzazzjoni komuni tas-suq fiż-żrieragħ u li jirrevoka r-Regolamenti (KEE) Nru 2358/71 u (KEE) Nru 1674/72

IL-KUNSILL TA’ L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b'mod partikolari l-Artikolu 36 u t-tielet subparagrafu ta' l-Artikolu 37(2) tiegħu,

Wara li kkunsidra l-proposta mill-Kummissjoni,

Wara li kkunsidra l-Opinjoni tal-Parlament Ewropew (1),

Wara li kkunsidra l-Opinjoni tal-Kumitat Ekonomiku u Soċjali Ewropew (2),

Billi:

(1)	L-operazzjoni u l-iżvilupp tas-suq komuni fi prodotti agrikoli għandhom ikunu akkumpanjati mill-istabbiliment ta' politika agrikola komuni sabiex tkun inkluża, b'mod partikolari, organizzazzjoni komuni tas-swieq agrikoli li tista' tieħu diversi forom skond il-prodott ikkonċernat.

(2)

Ir-Regolament tal-Kunsill (KEE) Nru 2358/71 tas-26 ta' Ottubru 1971 dwar l-organizzazzjoni komuni tas-suq taż-żrieragħ (3) ġie emendat b'mod sostanzjali diversi drabi, b'mod partikolari bir-Regolament tal-Kunsill (KE) Nru 1782/2003 tad-29 ta' Settembru 2003 li jistabbilixxi regoli komuni għal skemi ta' appoġġ diretti taħt il-politika agrikola komuni u jistabbilixxi ċerti skemi ta' appoġġ għall-bdiewa (4). Fl-interess taċ-ċarezza, ir-Regolament (KEE) Nru 2358/71/KE għandu jiġi mħassar u sostitwit b'Regolament ġdid.

(3)

Id-dispożizzjonijiet tar-Regolament tal-Kunsill (KEE) Nru 1674/72 tat-2 ta' Awwissu 1972 li jistabbilixxu regoli ġenerali għall-għoti u l-iffinanzjar ta' l-għajnuna għaż-żrieragħ (5) kienu inkorporati fir-regoli implimentattivi fil-Kapitolu 10 tar-Regolament tal-Kunsill (KE) Nru 1973/2004 tad-29 ta' Ottubru 2004 li jistabbilixxi regoli dettaljati għall-applikazzjoni tar-Regolament tal-Kunsill (KE) Nru 1782/2003 rigward l-iskemi ta' appoġġ previsti fit-Titoli IV u IVa ta' dak ir-Regolament u l-użu ta' l-art li titħalla għall-produzzjoni ta' materja prima (6). Ir-Regolament (KEE) Nru 1674/72 għandu għalhekk jitħassar.

(4)	Sabiex ikun issorveljat il-volum ta' kummerċ fiż-żrieragħ ma' pajjiżi terzi, għandu jsir provvediment għal skema ta' liċenza ta' importazzjoni bid-depożitu ta' sigurtà biex ikun żgurat li jseħħu l-operazzjonijiet li għalihom intalbu tali liċenzi.

(5)	Is-sistema ta' dazji doganali tagħmilha possibbli li jiġu ddispensati l-miżuri protettivi l-oħra kollha fil-każ ta' prodotti importati minn pajjiżi terzi.

(6)

Is-suq intern u l-mekkaniżmu ta’ dazju jistgħu, f’ċirkostanzi eċċezzjonali, jirriżultaw inadegwati. F’tali każijiet, sabiex is-suq Komunitarju ma jitħalliex mingħajr difiża kontra tfixkil li jista’ jkun hemm, il-Komunità għandha tkun tista’ tieħu l-miżuri meħtieġa kollha mingħajr dewmien. Dawk il-miżuri għandhom jikkonformaw ma' l-obbligi internazzjonali tal-Komunità.

(7)

Il-ħidma tajba tas-suq intern fiż-żrieragħ tkun preġudikata bl-għoti ta' għajnuna nazzjonali. Għaldaqstant, id-dispożizzjonijiet tat-Trattat li jirregolaw l-għajnuna statali japplikaw għall-prodotti koperti minn din l-organizzazzjoni tas-suq intern. Madankollu, mill-adeżjoni, il-Finlandja tista', soġġetta għal awtorizzazzjoni mill-Kummissjoni, tagħti għajnuna rispettivament għal ċerti kwantitajiet ta' żrieragħ u għal ċerti kwantitajiet ta' żerriegħa ta' ċereali li huma prodotti biss fil-Finalandja, minħabba l-kondizzjonijiet klimatiċi speċifiċi tagħha.

(8)	Peress li s-suq intern fiż-żrieragħ qed jevolvi kostantement, l-Istati Membri u l-Kummissjoni għandhom iżommu lil xulxin forniti b'informazzjoni rilevanti għal żviluppi f'dan il-qasam.

(9)	Il-miżuri meħtieġa għall-implimentazzjoni ta’ dan ir-Regolament għandhom jiġu adottati skond id-Deċiżjoni tal-Kunsill 1999/468/KE tat-28 ta’ Ġunju 1999 li tistabbilixxi l-proċeduri għall-eżerċizzju tas-setgħat ta’ implimentazzjoni mogħtija lill-Kummissjoni (7).

ADOTTA DAN IR-REGOLAMENT:

KAPITOLU 1

DISPOŻIZZJONIJIET INTRODUTTIVI

Artikolu 1

Għandha tiġi stabblita organizzazzjoni komuni tas-suq fiż-żrieragħ u għandha tkopri l-prodotti li ġejjin:

Kodiċi NM	Deskrizzjoni tal-prodotti
0712 90 11	Ibridi tal-qamħ ħelu għaż-żriegħ
0713 10 10	Piżelli (Pisum sativum) għaż-żriegħ
ex 0713 20 00	Ċiċri għaż-żriegħ
ex 0713 31 00	Fażola ta' l-ispeċi Vigna mungo (L) Hepper jew Vigna radiata (L) Wilczek għaż-żriegħ
ex 0713 32 00	Fażola (Adzuki) żgħira ħamra (Phaseolus or Vigna angularis) għaż-żriegħ
0713 33 10	Fażola kidnija, inkluża fażola mill-bajda (Phaseolus vulgaris) għaż-żriegħ
ex 0713 39 00	Fażola oħra għaż-żriegħ
ex 0713 40 00	Għads għaż-żriegħ
ex 0713 50 00	Ful (Vicia faba var. major) u ful ta' varjetà raffa (Vicia faba var. equina and Vicia faba var. minor)
ex 0713 90 00	Ħaxix leguminuż imnixxef ieħor għaż-żriegħ
1001 90 10	Spelt għaż-żriegħ
ex 1005 10	Ibridu tal-qamħirrun (qamħ)
1006 10 10	Ross fil-qoxra (fil-ħliefa jew aħrax) għaż-żriegħ
1007 00 10	Ibridi tas-sorgu tal-qamħ għaż-żriegħ
1201 00 10	Fażola tas-sojja, imkissra jew le, għaż-żriegħ
1202 10 10	Karawett, mhux mixwi jew imsajjar b'xi mod ieħor, fil-qoxra, għaż-żriegħ
1204 00 10	Linseed, imkisser jew le, għaż-żriegħ
1205 10 10	Żrieragħ tar-rapa jew tal-kolza, imkissra jew le, għaż-żriegħ
1206 00 10	Żerriegħa tal-ġirasol, imkissra jew le, għaż-żriegħ
ex 1207	Żrieragħ taż-żejt oħra u frott żejtni, imkisser jew le, għaż-żriegħ
1209	Żrieragħ, frott u spori, ta’ għamla li tintuża għaż-żriegħ

Artikolu 2

Is-sena tas-suq għaż-żrieragħ għandha tibda fl-1 ta’ Lulju ta’ kull sena u tispiċċa fit-30 ta’ Ġunju tas-sena ta’ wara.

Artikolu 3

Dan ir-Regolament għandu japplika mingħajr preġudizzju għall-miżuri previsti fir-Regolament (KE) Nru 1782/2003.

KAPITOLU II

KUMMERĊ MA' PAJJIŻI TERZI

Artikolu 4

1.   Importazzjonijiet fil-Komunità ta' kwalunkwe mill-prodotti elenkati fl-Artikolu 1 jistgħu jkunu soġġetti għall-preżentazzjoni ta' liċenza ta' importazzjoni. Il-prodotti li għalihom meħtieġa liċenzi ta' importazzjoni għandhom ikunu determinati skond il-proċedura msemmija fl-Artikolu 10(2).

2.   Għandhom jinħarġu liċenzi ta' importazzjoni mill-Istati Membri lil kwalunkwe persuna li titlobhom, irrispettivament mill-post ta' l-istabbiliment tagħha fil-Komunità.

3.   Dawn il-liċenzi għandhom ikunu validi għal importazzjonijiet li jsiru fi kwalunkwe post fil-Komunità. Il-ħruġ tagħhom għandu jkun soġġett għall-preżentazzjoni ta’ assigurazzjoni li tiggarantixxi li l-prodotti huma importati matul il-perijodu ta’ validità tal-liċenzja. Ħlief f’każijiet ta’ force majeure, l-assigurazzjoni għandha tintilef kollha jew parti minnha jekk l-operazzjoni ma titwettaqx, jew titwettaq biss parzjalment, fi ħdan dak il-perijodu.

Artikolu 5

Sakemm dan ir-Regolament ma jipprovdix mod ieħor, għandhom japplikaw ir-rati ta' dazji fit-Tariffa Doganali Komuni għall-prodotti elenkati fl-Artikolu 1.

Artikolu 6

1.   Ir-regoli ġenerali għall-interpretazzjoni tan-Nomenkaltura Magħquda u r-reġoli dettaljati għall-applikazzjoni tagħha għandhom japplikaw għall-klassifikazzjoni tat-tariffa ta’ prodotti msemmija fl-Artikolu 1. In-nomenklatura tat-tariffa li tirriżulta mill-applikazzjoni ta’ dan ir-Regolament għandha tiġi inkluża fit-Tariffa Doganali Komuni.

2.   Minbarra fejn previst mod ieħor f’dan ir-Regolament jew fid-dispożizzjonijiet adottati sussegwentement għal dan, dan li ġej għandu jiġi pprojbit f’kummerċ ma’ pajjiżi terzi:

(a)	l-intaxxar ta’ kwalunkwe ħlas li għandu effett ekwivalenti għal dazju doganali;

(b)	l-applikazzjoni ta’ kwalunkwe restrizzjoni jew miżura kwantitattiva li għandha effett ekwivalenti.

Artikolu 7

1.   Jekk, minħabba importazzjonijiet jew esportazzjonijiet, is-suq Komunitarju fi prodott wieħed jew aktar elenkati fl-Artikolu 1 ikun affettwat, jew ikun mhedded b'disturbi serji li x'aktarx jippreġudikaw il-kisba ta' l-objettivi mniżżlin fl-Artikolu 33 tat-Trattat, jistgħu jkunu applikati miżuri xierqa f’negozju ma’ pajjiżi mhux membri ta' l-Organizzazzjoni Dinjija tal-Kummerċ sakemm tali disturb jew theddid ta' disturb ikun waqaf.

2.   Jekk is-sitwazzjoni msemmija fil-paragrafu 1 isseħħ, il-Kummissjoni għandha, fuq it-talba ta' Stat Membru jew fuq l-inizjativa tagħha stess, tiddeċiedi dwar il-miżuri meħtieġa. L-Istati Membri għandhom ikunu notifikati b'tali miżuri, li għandhom ikunu applikabbli immedjatament. Jekk il-Kummissjoni tirċievi talba minn Stat Membru, hija għandha tieħu deċiżjoni dwarha fi żmien tliet ijiem ta' ħidma minn meta tirċievi t-talba.

3.   Il-miżuri msemmijin fil-paragrafu 2 jistgħu jintbagħtu lill-Kunsill minn kwalunkwe Stat Membru fi żmien tlett ijiem ta' ħidma mill-jum li fih ġew innotifikati. Il-Kunsill għandu jiltaqa’ immedjatament. Huwa jista', filwaqt li jaġixxi b'maġġoranza kwalifikata, jemenda jew iħassar il-miżuri in kwistjoni fi żmien xahar mill-jum li fih il-miżuri ġew mibgħuta lilu.

4.   Arranġamenti adottati taħt dan l-Artikolu għandhom jqisu l-obbligi li jirriżultaw minn ftehim konklużi skond l-Artikolu 300(2) tat-Trattat.

KAPITOLU III

DISPOŻIZZJONIJIET ĠENERALI

Artikolu 8

1.   Minbarra fejn mhux previst mod ieħor f’dan ir-Regolament, l-Artikoli 87, 88 u 89 tat-Trattat għandhom jgħoddu għall-produzzjoni ta', u l-kummerċ fil-prodotti elenkati fl-Artikolu 1.

2.   Madankollu, il-Finlandja tista', soġġetta għal awtorizzazzjoni mill-Kummissjoni, tagħti għajnuna rispettivament għal ċerti kwantitajiet ta' żrieragħ u għal ċerti kwantitajiet ta' żerriegħa ta' ċereali li huma prodotti biss fil-Finalandja, minħabba l-kondizzjonijiet klimatiċi speċifiċi tagħha.

Qabel l-1 ta' Jannar 2006, il-Kummissjoni għandha tibgħat lill-Kunsill, abbażi ta' l-informazzjoni fornita fi żmien debitu mill-Finlandja, rapport dwar ir-riżultati ta' l-għajnuna awtorizzata, akkumpanjat mill-proposti meħtieġa.

Artikolu 9

L-Istati Membri u l-Kummissjoni għandhom jikkomunikaw lil xulxin l-informazzjoni meħtieġa għall-implimentazzjoni ta' dan ir-Regolament.

Artikolu 10

1.   Il-Kummissjoni għandha tkun assistita mill-Kumitat tat-Tmexxija għaż-Żrieragħ (minn hawn ’il quddiem imsejjaħ “il-Kumitat”).

2.   Fejn issir referenza għal dan il-paragrafu, għandhom japplikaw l-Artikoli 4 u 7 tad-Deċiżjoni 1999/468/KE.

Il-perijodu stabbilit fl-Artikolu 4(3) tad-Deciżjoni 1999/468/KE għandu jkun stabbilit għal xahar.

3.   Il-Kumitat għandu jadotta r-Regoli ta' Proċedura tiegħu.

Artikolu 11

Regoli dettaljati dwar l-applikazzjoni ta' dan ir-Regolament, u b'mod partikolari l-perjiodu ta' validità tal-liċenzi msemmijin fl-Artikolu 4 u l-arranġamenti biex tkun ikkomunikata l-informazzjoni msemmija fl-Artikolu 9, għandhom ikunu adottati skond il-proċedura msemmija fl-Artikolu 10(2).

KAPITOLU IV

DISPOŻIZZJONIJIET TRANSITORJI U FINALI

Artikolu 12

1.   Ir-Regolamenti (KEE) Nru 2358/71 u (KEE) Nru 1674/72 huma b'dan revokati.

2.   Referenzi għar-Regolament (KEE) Nru 2358/71 għandhom jittieħdu bħala referenzi għal dan ir-Regolament u għandhom jinqraw skond it-tabella tal-korrelazzjoni fl-Anness.

Artikolu 13

Dan ir-Regolament għandu jidħol fis-seħħ fis-seba’ jum wara l-jum li tal-pubblikazzjoni tiegħu fil-Ġurnal Uffiċjali ta’ l-Unjoni Ewropea.

Huwa għandu japplika mill-1 ta' Lulju 2006.

---

(1)  Opinjoni mogħtija fi … Novembru 2005 (għadha mhux ippubblikata fil-Ġurnal Uffiċjali).

(2)  Opinjoni mogħtija fis-26 ta' Ottubru 2005 wara l-konsultazzjoni mhux obbligatorja (għadha mhux ippubblikata fil-Ġurnal Uffiċjali).

(3)  ĠU L 246, 5.11.1971, p. 1. Regolament kif l-aħħar emendat bir-Regolament (KE) Nru 1782/2003 (ĠU L 270, 21.10.2003, p. 1).

(4)  ĠU L 270, 21.10.2003, p. 1. Regolament kif l-aħħar emendat bir-Regolament tal-Kummissjoni (KE) Nru. 118/2005 (ĠU L 24, 27.1.2005, p. 15).

(5)  ĠU L 177, 4.8.1972, p. 1. Ir-Regolament kif emendat l-aħħar bir-Regolament (KEE) Nru 3795/85 (ĠU L 367, 31.12.1985, p. 21).

(6)  ĠU L 345, 20.11.2004, p. 1. Regolament kif l-aħħar emendat bir-Regolament (KE) Nru 1044/2005 (ĠU L 172, 5.7.2005, p. 76).

(7)  ĠU L 184, 17.7.1999, p. 23.

---

---