3.4.2013   

MT

Il-Ġurnal Uffiċjali tal-Unjoni Ewropea

L 91/1

(1)

Id-Direttiva 2010/40/UE teħtieġ li l-Kummissjoni tadotta atti ddelegati fir-rigward tal-ispeċifikazzjonijiet neċessarji biex jiġu żgurati l-kompatibbiltà, l-interoperabilità u l-kontinwità tal-mobilizzazzjoni u tal-użu operattiv ta’ sistemi ta’ trasport intelliġenti (STI).

(2)

Skont l-Artikolu 3(d) tad-Direttiva 2010/40/UE, il-forniment armonizzat ta’ eCall interoperabbli fl-UE kollha għandha tikkostitwixxi azzjoni ta’ prijorità. Għalhekk, il-Kummissjoni għandha tadotta l-ispeċifikazzjonijiet neċessarji f’dan il-qasam.

(3)

L-Artikolu 26 tad-Direttiva 2002/22/KE tal-Parlament Ewropew u tal-Kunsill tas-7 ta’ Marzu 2002 dwar servizz universali u d-drittijiet tal-utenti li jirrelataw ma’ netwerks u servizzi ta’ komunikazzjonijiet elettroniċi (Direttiva dwar is-Servizzi Universali) (2) jeħtieġ li s-sejħiet għan-numru uniku Ewropew ta’ emerġenza 112 jwieġbu kif xieraq u jiġu ttrattati bl-aktar mod adattat għall-organizzazzjoni nazzjonali tas-sistemi ta’ emerġenza, li jinkludu ċ-ċentri li jwieġbu għas-sejħiet ta’ emerġenza (ċentri li jwieġbu għas-sejħiet marbutin mas-sikurezza pubblika).

(4)

Il-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni “eCall: Wasal il-waqt għall-mobilizzazzjoni” (3), tipprevedi miżuri regolatorji ġodda biex iħaffu l-mobilizzazzjoni fl-Unjoni ta’ servizz ta’ sejħiet ta’ emerġenza mmuntat fil-vettura. Waħda mill-miżuri proposti hija li l-aġġornament neċessarju tal-infrastruttura taċ-ċentru li jwieġeb għas-sejħiet marbutin mas-sikurezza pubblika (PSAP) meħtieġ sabiex l-eCalls jiġu riċevuti u ttrattati kif suppost, isir mandatorju.

(5)

Ir-Rakkomandazzjoni tal-Kummissjoni 2011/750/UE (4) dwar appoġġ għal servizz ta’ sejħiet elettroniċi offrut madwar l-UE kollha fin-netwerks tal-komunikazzjoni elettronika għat-trażmissjoni ta’ sejħiet tal-emerġenza bbażati fuq in-numru 112 minn sistemi mmuntati fil-vetturi (“Sejħiet elettroniċi”) tagħti parir lill-Istati Membri biex jindikaw il-PSAP fejn se jiġu ttrasferiti l-eCalls u biex jiżguraw li l-operaturi tan-netwerks mobbli jittrattaw l-eCalls kif suppost.

(6)

Huwa mistenni li bit-tnaqqis fil-ħin ta’ rispons tas-servizzi ta’ emerġenza, l-eCall interoperabbli fl-UE kollha se tnaqqas l-għadd ta’ fatalitajiet fl-Unjoni kif ukoll is-severità tal-ġrieħi kkawżati b’aċċidenti stradali.

(7)

L-eCall interoperabbli fl-UE kollha hija mistennija wkoll li tipprovdi ffrankar ta’ flus għas-soċjetà billi ttejjeb il-ġestjoni tal-inċidenti u billi tnaqqas il-konġestjoni tat-toroq u l-aċċidenti sekondarji.

(8)

L-ipproċessar ta’ dejta personali fil-kuntest tat-trattar tal-eCalls mill-PSAPs, is-servizzi ta’ emerġenza u tas-sħab fis-servizz jitwettaq f’konformità mad-Direttiva 95/46/KE tal-Parlament Ewropew u tal-Kunsill tal-24 ta’ Ottubru 1995 dwar il-protezzjoni ta’ individwi fir-rigward tal-ipproċessar ta’ data personali u dwar il-moviment liberu ta’ dik id-data (5) u d-Direttiva 2002/58/KE tal-Parlament Ewropew u tal-Kunsill tat-12 ta’ Lulju 2002 dwar l-ipproċessar tad-data personali u l-protezzjoni tal-privatezza fis-settur tal-komunikazzjoni elettronika (Direttiva dwar il-privatezza u l-komunikazzjonijiet elettroniċi) (6). L-Istati Membri għandhom jiżguraw li jkun hemm din il-konformità mal-awtoritajiet nazzjonali tal-protezzjoni tad-dejta, jew waqt proċeduri ta’ kontroll a priori, bħan-notifiki minn qabel jew waqt verifiki a posteriori, bħal matul l-ilmenti u l-investigazzjonijiet.

(9)

Is-servizz ta’ eCall interoperabbli fl-UE kollha jsegwi r-rakkomandazzjonijiet magħmula mill-Grupp ta’ Ħidma tal-Artikolu 29 dwar il-Protezzjoni tad-Dejta u li jinsabu fid-“Dokument ta’ ħidma dwar il-ħarsien tad-data u l-implikazzjonijiet għall-privatezza fl-inizjattiva eCall”, adottat fis-26 ta’ Settembru 2006 (1609/06/EN — WP 125). Il-vetturi mgħammra bit-tagħmir eCall ma għandhomx ikunu jistgħu jiġu ttraċċati meta jkunu fi status ta’ operat normali. Is-sett minimu ta’ dejta mibgħut mit-tagħmir għall-eCall immuntat fil-vetturi (jiġifieri meta dan jagħti bidu għal sejħa) għandu jinkludi l-informazzjoni minima meħtieġa sabiex is-sejħiet tal-emerġenza jiġu ttrattati kif xieraq.

(10)

Mingħajr preġudizzju għad-Direttiva 95/46/KE, l-Istati Membri għandhom iqisu d-“Dokument ta’ ħidma dwar il-ħarsien tad-data u l-implikazzjonijiet għall-privatezza fl-inizjattiva eCall”, adottat mill-Grupp ta’ Ħidma tal-Artikolu 29 fis-26 ta’ Settembru 2006 (1609/06/EN — WP 125), waqt il-mobilizzazzjoni tal-infrastruttura tal-PSAPs għall-eCall.

(11)

Huwa importanti li l-Istati Membri kollha għandhom jiżviluppaw standards tekniċi u prattiki komuni għall-forniment ta’ servizzi ta’ sejħiet ta’ emerġenza. Għandu jitkompla l-iżvilupp ta’ soluzzjonijiet tekniċi komuni, b’mod partikolari permezz tal-organizzazzjonijiet Ewropej għall-istandardizzazzjoni, sabiex tiġi ffaċilitata l-introduzzjoni tas-servizz tal-eCall, jiġu żgurati l-interoperabilità u l-kontinwità tas-servizz madwar l-UE kollha u jitnaqqsu l-ispejjeż tal-implimentazzjoni għall-Unjoni kollha.

(12)

L-Organizzazzjonijiet Ewropej għall-Istandardizzazzjoni, ETSI u CEN, żviluppaw standards komuni għall-mobilizzazzjoni ta’ servizz ta’ eCall pan-Ewropew, li dan ir-Regolament jagħmel referenza għalih.

(13)

L-infrastrutturi diġà mmobilitati għandhom jingħataw biżżejjed żmien biex jiġu aġġornati, għalhekk ir-Regolament għandu japplika għalihom wara 12-il xahar mid-dħul fis-seħħ tiegħu.

(a)

“servizz ta’ emerġenza” tfisser servizz, rikonoxxut bħala tali mill-Istat Membru, li jipprovdi għajnuna immedjata u malajr f’sitwazzjonijiet fejn ikun hemm, b’mod partikolari, riskju dirett għall-ħajja jew ta’ ġrieħi gravi, għas-saħħa jew għas-sikurezza tal-individwu jew tal-pubbliku, għall-proprjetà privata jew pubblika, jew għall-ambjent, f’konformità mal-leġiżlazzjoni nazzjonali;

(b)

“ċentru li jwieġeb għas-sejħiet marbutin mas-sikurezza pubblika” (PSAP) tfisser post fiżiku fejn is-sejħiet ta’ emerġenza jiġu riċevuti taħt ir-responsabbiltà ta’ awtorità pubblika jew organizzazzjoni privata rikonoxxuta mill-Istat Membru;

(c)

“PSAP l-aktar xieraq” tfisser PSAP iddefinit minn qabel mill-awtoritajiet responsabbli biex ikopri sejħiet ta’ emerġenza minn żona partikolari jew għal sejħiet ta’ emerġenza ta’ tip partikolari;

(d)

“PSAP għall-eCall” tfisser PSAP l-aktar xieraq iddefinit minn qabel mill-awtoritajiet li l-ewwel jirċievu u jitrattaw l-eCalls;

(e)

“operatur tal-PSAP għall-eCall” tfisser persuna fil-PSAP għall-eCall li jirċievi u/jew jittratta s-sejħiet ta’ emerġenza;

(f)

“sieħeb fis-servizz” tfisser organizzazzjoni pubblika jew privata rikonoxxuta mill-awtoritajiet nazzjonali, li għandha rwol fit-trattar tal-inċidenti relatati mal-eCall (eż. operatur tat-triq, servizz ta’ għajnuna);

(g)

“tagħmir mmuntat fil-vettura” tfisser tagħmir fi ħdan il-vettura li jipprovdi jew għandu aċċess għad-dejta mmuntata fil-vettura meħtieġa biex issir it-tranżazzjoni tal-eCall permezz ta’ netwerk pubbliku tal-komunikazzjoni mobbli mingħajr fili.

(h)

“eCall” (imsemmija fid-Direttiva 2010/40/UE bħala ‘eCall interoperabbli fl-UE kollha’) tfisser sejħa ta’ emerġenza minn sistema mmuntata fil-vettura fuq in-numru 112, magħmula jew b’mod awtomatiku billi jiġu attivati sensuri mmuntati fil-vettura jew b’mod manwali, li twassal sett minimu standardizzat ta’ dejta u li tistabbilixxi kanal tal-awdjo bejn il-vettura u l-PSAP għall-eCall permezz ta’ netwerks pubbliċi tal-komunikazzjoni mobbli mingħajr fili;

(i)

“tranżazzjoni eCall” tfisser l-istabbiliment ta’ sessjoni ta’ komunikazzjoni mobbli mingħajr fili matul netwerk pubbliku tal-komunikazzjoni mobbli mingħajr fili u t-trażmissjoni ta’ sett minimu ta’ dejta minn vettura għal PSAP għall-eCall u l-istabbiliment ta’ kanal tal-awdjo bejn il-vettura u l-istess PSAP għall-eCall;

(j)

“sett minimu ta’ dejta” (MSD) tfisser l-informazzjoni ddefinita bl-istandard tat-‘Telematika tat-trasport u t-traffiku bl-art — Esafety — Sett minimu ta’ dejta (MSD) għall-eCall’ (EN 15722) li tintbagħat lill-PSAP tal-eCall;

(k)

“Numru ta’ Identifikazzjoni tal-Vettura” (VIN) tfisser il-kodiċi alfanumeriku mogħti lil vettura mill-manifattur sabiex tiġi żgurata l-identifikazzjoni xierqa ta’ kull vettura, kif deskritt fl-istandard ISO 3779;

(l)

“netwerk tal-komunikazzjoni mobbli mingħajr fili” tfisser netwerk tal-komunikazzjoni mingħajr fili bi trasferiment omoġenju bejn il-punti ta’ aċċess għan-netwerk;

(m)

“netwerk pubbliku tal-komunikazzjoni mobbli mingħajr fili” tfisser netwerk tal-komunikazzjoni mobbli mingħajr fili disponibbli għall-pubbliku f’konformità mad-Direttiva 2002/22/KE u mad-Direttiva 2002/21/KE tal-Parlament Ewropew u tal-Kunsill (7);

(n)

“ċentru ta’ kontroll ta’ emerġenza” tfisser faċilità użata minn servizz wieħed jew aktar ta’ emerġenza biex jittrattaw is-sejħiet ta’ emerġenza;

(o)

“MSD mhux pproċessat” tfisser rappreżentazzjoni tas-sett minimu ta’ dejta trażmess qabel jiġi ppreżentat b’mod intelliġibbli lill-operatur tal-PSAP għall-eCall.