(1)

Id-Direttiva tal-Kummissjoni 2004/20/KE (2) daħħlet il-chlorpropham bħala sustanza attiva fl-Anness I tad-Direttiva tal-Kunsill 91/414/KEE (3).

(2)

Is-sustanzi attivi inklużi fl-Anness I tad-Direttiva tal-Kunsill 91/414/KEE jitqiesu li ġew approvati skont ir-Regolament (KE) Nru 1107/2009 u huma mniżżlin fil-Parti A tal-Anness tar-Regolament ta' Implimentazzjoni tal-Kummissjoni (UE) Nru 540/2011 (4).

(3)

Kif stabbilit fil-Parti A tal-Anness tar-Regolament ta' Implimentazzjoni (UE) Nru 540/2011, l-approvazzjoni tas-sustanza attiva chlorpropham tiskadi fil-31 ta' Lulju 2019.

(4)

Ġiet ippreżentata applikazzjoni għat-tiġdid tal-approvazzjoni tal-chlorpropham skont l-Artikolu 1 tar-Regolament ta' Implimentazzjoni tal-Kummissjoni (UE) Nru 844/2012 (5) fil-perjodu taż-żmien previst f'dak l-Artikolu.

(5)

Task force magħmul minn tliet applikanti bagħat il-fajls addizzjonali meħtieġa skont l-Artikolu 6 tar-Regolament ta' Implimentazzjoni (UE) Nru 844/2012. L-Istat Membru relatur sab li l-applikazzjoni kienet kompluta.

(6)

L-Istat Membru relatur ħejja rapport dwar il-valutazzjoni tat-tiġdid b'konsultazzjoni mal-Istat Membru korelatur u fid-29 ta' April 2016 bagħtu lill-Awtorità Ewropea dwar is-Sigurtà fl-Ikel (minn hawn 'il quddiem, “l-Awtorità”) u lill-Kummissjoni.

(7)

L-Awtorità bagħtet ir-rapport dwar il-valutazzjoni tat-tiġdid lill-applikant u lill-Istati Membri għall-kummenti tagħhom u għaddiet il-kummenti li rċeviet lill-Kummissjoni. L-Awtorità ppubblikat ukoll is-sommarju tal-fajl addizzjonali.

(8)

Fit-18 ta' Ġunju 2017, l-Awtorità bagħtet il-konklużjoni (6) tagħha lill-Kummissjoni dwar jekk il-chlorpropham jistax jiġi mistenni jissodisfa l-kriterji għall-approvazzjoni previsti fl-Artikolu 4 tar-Regolament (KE) Nru 1107/2009 jew le. L-Awtorità kkonkludiet li ma tistax titwettaq valutazzjoni finali tar-riskju lill-konsumaturi mill-konsum djetetiku minħabba bosta lakuni fid-data u minħabba l-inċertezzi identifikati għall-użi tal-għelejjel. Madankollu, ġie identifikat qasam kritiku ta' tħassib għall-chlorpropham rigward ir-riżultati ta' valutazzjoni indikattiva tar-riskju lill-konsumaturi fejn ġew identifikati riskji djetetiċi akuti u kroniċi għall-konsumaturi kemm mill-chlorpropham kif ukoll mill-metabolit ewlieni tiegħu, it-3-kloroanilina. Barra minn hekk, l-Awtorità kkonkludiet ukoll li hemm bżonn ta' aktar valutazzjonijiet xjentifiċi tal-proprjetajiet potenzjali tat-tfixkil tas-sistema endokrinali tal-chlorpropham u li l-valutazzjoni tar-riskju għall-artropodi mhux fil-mira għall-użi fuq il-post ma setgħetx tiġi ffinalizzata.

(9)

Il-Kummissjoni stiednet lill-applikanti biex jippreżentaw il-kummenti tagħhom dwar il-konklużjoni tal-Awtorità u dwar l-abbozz tar-rapport tat-tiġdid skont l-Artikolu 14(1) tar-Regolament ta' Implimentazzjoni (UE) Nru 844/2012. L-applikanti bagħtu l-kummenti tagħhom, li ġew eżaminati bir-reqqa.

(10)

Madankollu, minkejja l-argumenti mressqa mill-applikanti, it-tħassib relatat mas-sustanza attiva ma setax jiġi eliminat.

(11)

Fit-23 ta' Jannar 2019, wieħed mill-membri tat-Task Force li kien ressaq l-applikazzjoni għat-tiġdid tal-approvazzjoni tal-chlorpropham, informa lill-Kummissjoni li kien iddeċieda li jirtira l-appoġġ tiegħu għall-użu rappreżentattiv tal-chlorpropham bħala suppressant tan-nebbieta tal-patata. Fit-19 ta' Marzu 2019, it-Task Force għarrfet lill-Kummissjoni li kienet irtirat l-appoġġ tagħha għall-użi rappreżentattivi kollha, ħlief għal għelejjel li ma jittiklux, jiġifieri l-basal tal-fjuri.

(12)

Għaldaqstant, fir-rigward ta' wieħed jew aktar mill-użi rappreżentattivi ta' mill-inqas prodott wieħed għall-protezzjoni tal-pjanti, ma ġiex stabbilit li l-kriterji tal-approvazzjoni previsti fl-Artikolu 4 tar-Regolament (KE) Nru 1107/2009 ġew issodisfati. Huwa għalhekk xieraq li ma tiġġeddidx l-approvazzjoni tas-sustanza attiva chlorpropham f'konformità mal-Artikolu 20(1)(b) ta' dak ir-Regolament.

(13)

Għaldaqstant, jenħtieġ li r-Regolament ta' Implimentazzjoni (UE) Nru 540/2011 jiġi emendat skont dan.

(14)

Jenħtieġ li l-Istati Membri jingħataw żmien biżżejjed biex jirtiraw l-awtorizzazzjonijiet tal-prodotti għall-protezzjoni tal-pjanti li fihom il-chlorpropham.

(15)

Rigward il-prodotti għall-protezzjoni tal-pjanti li fihom il-chlorpropham, meta l-Istati Membri jagħtu xi perjodu ta' grazzja f'konformità mal-Artikolu 46 tar-Regolament (KE) Nru 1107/2009, dak il-perjodu għandu jiskadi sa mhux aktar tard mit-8 ta' Ottubru 2020.

(16)

Ir-Regolament ta' Implimentazzjoni tal-Kummissjoni (UE) 2018/917 (7) estenda d-data ta' skadenza tal-chlorpropham sal-31 ta' Lulju 2019 biex jippermetti li l-proċess tat-tiġdid jitlesta qabel ma tiskadi l-approvazzjoni ta' dik is-sustanza. Madankollu, billi ttieħdet deċiżjoni qabel dik id-data ta' skadenza estiża, jenħtieġ li dan ir-Regolament japplika malajr kemm jista' jkun.

(17)

Dan ir-Regolament ma jipprevenix il-preżentazzjoni ta' applikazzjoni oħra għall-approvazzjoni tal-chlorpropham skont l-Artikolu 7 tar-Regolament (KE) Nru 1107/2009.

(18)

Il-Kumitat Permanenti dwar il-Pjanti, l-Annimali, l-Ikel u l-Għalf ma tax opinjoni qabel l-iskadenza stipulata mill-President tiegħu. Tqies li kien meħtieġ att ta' implimentazzjoni u l-President bagħat l-abbozz tal-att ta' implimentazzjoni lill-kumitat tal-appell għal iktar deliberazzjoni. Il-kumitat ta' appell ma tax opinjoni,