(1)

Ir-Regolament (UE) Nru 1380/2013 għandu l-għan li jelimina progressivament il-qbid skartat fis-sajd tal-Unjoni permezz tal-introduzzjoni ta' obbligu tal-ħatt l-art għall-qabdiet ta' speċijiet soġġetti għal limiti ta' qbid u, fil-Mediterran, anki għall-qabdiet ta' speċijiet soġġetti għal daqsijiet minimi kif definiti fl-Anness III tar-Regolament tal-Kunsill (KE) Nru 1967/2006 (2).

(2)

Skont l-Artikolu 15(1)(d) tar-Regolament (UE) Nru 1380/2013, l-obbligu tal-ħatt l-art japplika għas-sajd demersali fil-Baħar Mediterran sa mhux iktar tard mill-1 ta' Jannar 2017 għal dawk l-ispeċijiet li jiddefinixxu dik l-attività tas-sajd u sa mhux iktar tard mill-1 ta' Jannar 2019 għall-ispeċijiet l-oħra kollha.

(3)

Sabiex jiġi implimentat l-obbligu tal-ħatt l-art, l-Artikolu 15(6) tar-Regolament (UE) Nru 1380/2013 jagħti s-setgħa lill-Kummissjoni biex tadotta l-pjanijiet ta' skartar permezz ta' att delegat, għal perjodu ta' mhux iżjed minn tliet snin li jista' jiġġedded għal perjodu totali ulterjuri ta' tliet snin, abbażi ta' rakkomandazzjonijiet konġunti żviluppati mill-Istati Membri b'konsultazzjoni mal-Kunsilli Konsultattivi rilevanti.

(4)

Ir-Regolament Delegat tal-Kummissjoni (UE) 2017/86 (3) stabbilixxa pjan ta' skartar għal ċertu sajd demersali fil-Baħar Mediterran applikabbli mill-1 ta' Jannar 2017 sal-31 ta' Diċembru 2019, wara li ġew ippreżentati tliet rakkomandazzjonijiet konġunti lill-Kummissjoni fl-2016 minn għadd ta' Stati Membri li għandhom interess dirett ta' ġestjoni fil-Baħar Mediterran (il-Greċja, Spanja, Franza, il-Kroazja, l-Italja, Ċipru, Malta u s-Slovenja). Dawk it-tliet rakkomandazzjonijiet konġunti kienu jikkonċernaw il-Punent tal-Baħar Mediterran, il-Baħar Adrijatiku u x-Xlokk tal-Baħar Mediterran rispettivament.

(5)

Ir-Regolament Delegat tal-Kummissjoni (UE) 2017/86 ġie emendat bir-Regolament Delegat tal-Kummissjoni (UE) 2018/153 (4) wara li l-Istati Membri rilevanti li għandhom interess dirett ta' ġestjoni ppreżentaw żewġ rakkomandazzjonijiet konġunti dwar il-Punent tal-Baħar Mediterran u l-Baħar Adrijatiku.

(6)

Fl-4 ta' Ġunju 2018, Franza, l-Italja u Spanja ppreżentaw rakkomandazzjoni konġunta ġdida lill-Kummissjoni għal Pjan ta' Skartar għas-Sajd Demersali fil-Punent tal-Baħar Mediterran (“ir-rakkomandazzjoni konġunta l-ġdida għall-Punent tal-Baħar Mediterran”) wara l-konsultazzjonijiet li saru fil-Grupp reġjonali ta' Livell Għoli Pescamed. Ir-rakkomandazzjoni konġunta ġiet emendata fis-27 ta' Awwissu 2018.

(7)

Fis-7 ta' Ġunju 2018, Ċipru, il-Greċja, l-Italja u Malta ppreżentaw rakkomandazzjoni konġunta ġdida lill-Kummissjoni għal Pjan ta' Skartar għas-Sajd Demersali fix-Xlokk tal-Baħar Mediterran (“ir-rakkomandazzjoni konġunta l-ġdida għax-Xlokk tal-Baħar Mediterran”) wara l-konsultazzjonijiet li saru fil-Grupp reġjonali ta' Livell Għoli Sudestmed. Ir-rakkomandazzjoni konġunta ġiet emendata fit-28 ta' Awwissu 2018.

(8)

Fit-8 ta' Ġunju 2018, il-Kroazja, l-Italja u s-Slovenja ppreżentaw rakkomandazzjoni konġunta ġdida lill-Kummissjoni għal Pjan ta' Skartar għas-Sajd Demersali fil-Baħar Adrijatiku (“ir-rakkomandazzjoni konġunta l-ġdida għall-Baħar Adrijatiku”) wara l-konsultazzjonijiet li saru fil-Grupp reġjonali ta' Livell Għoli Adriatica. Ir-rakkomandazzjoni konġunta ġiet emendata fid-29 ta' Awwissu 2018.

(9)

It-tliet rakkomandazzjonijiet konġunti l-ġodda ġew ivvalutati mill-Kumitat Xjentifiku, Tekniku u Ekonomiku għas-Sajd (STECF) waqt il-Plenarja tiegħu tas-sajf mit-2 sas-6 ta' Lulju 2018 (5).

(10)

Skont l-Artikolu 18 tar-Regolament (UE) Nru 1380/2013, il-Kummissjoni kkunsidrat kemm il-valutazzjoni tal-STECF kif ukoll il-ħtieġa li l-Istati Membri jiżguraw l-implimentazzjoni sħiħa tal-obbligu tal-ħatt l-art fl-1 ta' Jannar 2019. F'diversi każijiet, l-eżenzjonijiet jeħtieġu attività tas-sajd u ġbir tad-data kontinwi sabiex jiġu indirizzati l-kummenti li saru mill-STECF. F'dawn il-każijiet, il-Kummissjoni hija tal-fehma li l-eżenzjonijiet fuq bażi temporanja huma approċċ pragmatiku u prudenti għall-ġestjoni tas-sajd, bil-fehma li jekk ma jintużax dan l-approċċ, il-ġbir meħtieġ tad-data, li huwa indispensabbli għall-ġestjoni kif suppost u infurmata tal-qbid skartat, ma jkunx jista' jsir fid-dawl tad-dħul sħiħ fis-seħħ tal-obbligu tal-ħatt l-art.

(11)

Ir-rakkomandazzjoni konġunta l-ġdida għall-Punent tal-Baħar Mediterran tissuġġerixxi li l-applikazzjoni tal-eżenzjonijiet ta' sopravivenza tiġi estiża sal-31 ta' Diċembru 2021, kif previst fl-Artikolu 15(4)(b) tar-Regolament (UE) Nru 1380/2013, għall-pellegrini (Pecten jacobeus), għall-vongole (l-ispeċijiet Venerupis) u għall-gandoffli ta' Venere (l-ispeċijiet Venus) maqbuda bil-gangmi mekkanizzati (HMD). Dik l-eżenzjoni ta' sopravivenza ġiet introdotta bir-Regolament Delegat (UE) 2017/86. Meta vvaluta r-rakkomandazzjoni konġunta l-ġdida, l-STECF innota li ma kienet ġiet ipprovduta l-ebda informazzjoni addizzjonali ta' sostenn. Madankollu, hemm ġabra ta' evidenza xjentifika fil-letteratura li turi s-sopravivenza ta' dawk l-ispeċijiet. Għalhekk, filwaqt li qieset il-karatteristiki tal-irkaptu, tal-prattiki tas-sajd u tal-ekosistema u peress li jista' jkun hemm rati għoljin ta' sopravivenza, il-Kummissjoni hija tal-fehma li l-eżenzjoni ta' sopravivenza jenħtieġ li titkompla, ladarba ċ-ċirkostanzi ma nbidlux.

(12)

Ir-rakkomandazzjoni konġunta l-ġdida għall-Punent tal-Baħar Mediterran tissuġġerixxi li l-applikazzjoni tal-eżenzjoni ta' sopravivenza għall-iskampu (Nephrops norvegicus) maqbud bix-xbieki tat-tkarkir tal-qiegħ (OTB, OTT, PTB, TBN, TBS, TB, OT, PT, TX) tiġi estiża sal-31 ta' Diċembru 2021. Dik l-eżenzjoni ta' sopravivenza ġiet introdotta bir-Regolament Delegat tal-Kummissjoni (UE) 2018/153. Inizjalment, ir-rakkomandazzjoni konġunta l-ġdida kienet tissuġġerixxi li tiġi applikata din l-eżenzjoni għajr matul ix-xhur ta' Lulju, Awwissu u Settembru, li jkunu soġġetti għal eżenzjoni de minimis ġdida. L-STECF kien tal-fehma li ma kien hemm l-ebda evidenza li tappoġġa eżenzjoni de minimis matul ix-xhur tas-sajf u ma fformula l-ebda kumment ieħor. Madankollu, hemm evidenza xjentifika li turi sopravivenza ta' dik l-ispeċi f'dan ir-reġjun u f'reġjuni oħra. Għalhekk, filwaqt li qieset il-karatteristiki tal-irkaptu, tal-prattiki tas-sajd u tal-ekosistema u peress li jista' jkun hemm rati għoljin ta' sopravivenza, il-Kummissjoni hija tal-fehma li l-eżenzjoni ta' sopravivenza applikabbli għas-sena kollha jenħtieġ li titkompla.

(13)

Ir-rakkomandazzjoni konġunta l-ġdida għall-Baħar Adrijatiku tipproponi li l-eżenzjoni ta' sopravivenza tiġi estiża għal-lingwata komuni (Solea solea) maqbuda bir-rapido (TBB). Dik l-eżenzjoni ta' sopravivenza ġiet introdotta bir-Regolament Delegat tal-Kummissjoni (UE) 2017/86. L-STECF ma vvalutax din it-talba l-ġdida. Madankollu, għadu għaddej studju ad hoc dwar il-kapaċità ta' sopravvivenza ta' dik l-ispeċi fil-GSA17 fil-Baħar Adrijatiku. Għalhekk, il-Kummissjoni hija tal-fehma li l-eżenzjoni jenħtieġ li titkompla għal sena waħda biss. L-Istati Membri kkonċernati jenħtieġ li jipprovdu d-data rilevanti sal-1 ta' Mejju 2019 sabiex l-STECF ikun jista' jwettaq valutazzjoni ulterjuri.

(14)

It-tliet rakkomandazzjonijiet konġunti l-ġodda jissuġġerixxu li l-eżenzjoni ta' sopravivenza tiġi applikata għall-iskampu (Nephrops norvegicus) maqbud bin-nases u bix-xbieki tat-tidwir (FPO, FIX) fil-Punent tal-Baħar Mediterran, fil-Baħar Adrijatiku u fix-Xlokk tal-Baħar Mediterran. L-STECF kien tal-fehma li ma kinitx ġiet ipprovduta informazzjoni speċifika li tappoġġa din l-eżenzjoni. Għalhekk, il-Kummissjoni hija tal-fehma li l-eżenzjoni jenħtieġ li tiġi introdotta għal sena waħda biss. L-Istati Membri kkonċernati jenħtieġ li jipprovdu d-data rilevanti addizzjonali sal-1 ta' Mejju 2019 sabiex l-STECF ikun jista' jwettaq valutazzjoni ulterjuri.

(15)

It-tliet rakkomandazzjonijiet konġunti l-ġodda jissuġġerixxu li l-eżenzjoni ta' sopravivenza tiġi applikata għall-paġella ħamra (Pagellus bogaraveo) maqbuda bis-snanar u bil-konzijiet (LHP, LHM, LLS, LLD, LL, LTL, LX) fil-Punent tal-Baħar Mediterran, fil-Baħar Adrijatiku u fix-Xlokk tal-Baħar Mediterran. L-STECF kien tal-fehma li jenħtieġ li tiġi pprovduta evidenza ulterjuri biex tappoġġa għalkollox l-eżenzjoni proposta. Għalhekk, il-Kummissjoni hija tal-fehma li l-eżenzjoni jenħtieġ li tiġi introdotta għal sena waħda biss. L-Istati Membri kkonċernati jenħtieġ li jipprovdu d-data rilevanti addizzjonali sal-1 ta' Mejju 2019 sabiex l-STECF ikun jista' jwettaq valutazzjoni ulterjuri.

(16)

It-tliet rakkomandazzjonijiet konġunti l-ġodda jissuġġerixxu li l-eżenzjoni ta' sopravivenza tiġi applikata għall-awwisti (Homarus gammarus) u għall-awwisti mxewka (Palinuridae) maqbuda bix-xbieki (GNS, GN, GND, GNC, GTN, GTR, GEN) kif ukoll bin-nases u bix-xbieki tat-tidwir (FPO, FIX) fil-Punent tal-Baħar Mediterran, fil-Baħar Adrijatiku u fix-Xlokk tal-Baħar Mediterran. L-STECF kien tal-fehma li l-istudju dwar is-sopravvivenza għall-awwisti mxewka pprovdut mill-Istati Membri kkonċernati huwa studju raġonevolment sod li juri rati ta' sopravivenza fuq medda qasira ta' żmien, għalkemm innota li d-daqs tal-kampjun kien żgħir. Jenħtieġ li tiġi pprovduta evidenza xjentifika ulterjuri kemm għall-awwisti mxewka kif ukoll għall-awwisti. Għalhekk, il-Kummissjoni hija tal-fehma li l-eżenzjoni jenħtieġ li tiġi introdotta għal sena waħda biss. L-Istati Membri kkonċernati jenħtieġ li jipprovdu d-data rilevanti addizzjonali sal-1 ta' Mejju 2019 sabiex l-STECF ikun jista' jwettaq valutazzjoni ulterjuri.

(17)

Ir-rakkomandazzjonijiet konġunti l-ġodda għall-Baħar Adrijatiku u għax-Xlokk tal-Baħar Mediterran jipproponu li l-eżenzjoni ta' sopravivenza għall-iskampu (Nephrops norvegicus) maqbud bix-xbieki tat-tkarkir tal-qiegħ (OTB, OTT, PTB, TBN, TBS, TB, OT, PT, TX) fil-Baħar Adrijatiku u fix-Xlokk tal-Baħar Mediterran jenħtieġ li tiġi applikata. Inizjalment, ir-rakkomandazzjoni konġunta l-ġdida kienet tissuġġerixxi li tiġi applikata din l-eżenzjoni għajr matul ix-xhur ta' Lulju, Awwissu u Settembru, li jkunu soġġetti għal eżenzjoni de minimis ġdida. L-STECF kien tal-fehma li ma kien hemm l-ebda evidenza li tappoġġa eżenzjoni de minimis matul ix-xhur tas-sajf u ma fformula l-ebda kumment ieħor. Madankollu, hemm evidenza xjentifika li turi s-sopravivenza ta' dik l-ispeċi f'reġjuni oħra. Għalhekk, filwaqt li qieset il-karatteristiki tal-irkaptu, tal-prattiki tas-sajd u tal-ekosistema, u peress li jista' jkun hemm rati għoljin ta' sopravivenza, il-Kummissjoni hija tal-fehma li l-eżenzjoni ta' sopravivenza applikabbli għas-sena kollha jenħtieġ li tiġi introdotta.

(18)

Barra minn hekk, it-tliet rakkomandazzjonijiet konġunti l-ġodda jipproponu li l-eżenzjoni de minimis tiġi applikata għall-merluzz (Merluccius merluccius) u għat-trill (l-ispeċijiet Mullus), kif previst fl-Artikolu 15(4)(c) tar-Regolament (UE) Nru 1380/2013, sa mhux iktar minn 6 % tal-qabdiet annwali totali ta' dawk l-ispeċijiet mill-bastimenti li jużaw ix-xbieki tat-tkarkir tal-qiegħ (OTB, OTT, PTB, TBN, TBS, TB, OT, PT U TX) fl-2019 u fl-2020, u sa mhux iktar minn 5 % fl-2021, u sa mhux iktar minn 1 % fl-2019, fl-2020 u fl-2021 tal-qabdiet annwali totali ta' dawk l-ispeċijiet mill-bastimenti li jużaw l-għeżula u l-pariti (GNS, GN, GND, GNC, GTN, GTR, GEN), fil-Punent tal-Baħar Mediterran, fil-Baħar Adrijatiku u fix-Xlokk tal-Baħar Mediterran. Ir-Regolament Delegat tal-Kummissjoni (UE) 2017/86 introduċa eżenzjoni de minimis għal dawk l-ispeċijiet. Abbażi tal-evidenzi xjentifiċi pprovduti f'dik l-okkażjoni fir-rakkomandazzjoni konġunta u rieżaminati mill-STECF u filwaqt li tqiesu l-karatteristiki tal-irkaptu, l-għadd kbir ta' speċijiet fl-operazzjonijiet tas-sajd, ix-xejriet tas-sajd u l-partikolaritajiet tal-Baħar Mediterran (eż. il-predominanza ta' attivitajiet tas-sajd fuq skala żgħira), il-Kummissjoni kienet tal-fehma li kien xieraq li jiġu stabbiliti tali eżenzjonijiet de minimis sabiex jiġu evitati l-kostijiet sproporzjonati marbuta mal-qabdiet mhux intenzjonati. L-STECF ma vvalutax ir-rakkomandazzjoni l-ġdida dwar ix-xbieki tat-tkarkir tal-qiegħ. Meta vvaluta r-rakkomandazzjoni konġunta l-ġdida għall-għeżula u għall-pariti, l-STECF innota li l-informazzjoni pprovduta mill-Istati Membri kkonċernati ma kinitx eżawrjenti biżżejjed. Madankollu, ladarba ċ-ċirkostanzi ma nbidlux, il-Kummissjoni hija tal-fehma li l-eżenzjoni de minimis jenħtieġ li titkompla bil-livelli tal-perċentwali msemmija hawn fuq.

(19)

Ir-rakkomandazzjoni konġunta l-ġdida għall-Baħar Adrijatiku tissuġġerixxi li l-applikazzjoni tal-eżenzjoni de minimis tiġi estiża sa mhux iktar minn 1 % tal-qabdiet annwali totali għall-merluzz (Merluccius merluccius) u għat-trill (l-ispeċijiet Mullus) fl-2019, fl-2020 u fl-2021 mill-bastimenti li jużaw l-irkaptu “rapido” (TBB) u għal-lingwata komuni (Solea solea), sa mhux iktar minn 3 % fl-2019, fl-2020 u fl-2021 tal-qabdiet annwali totali ta' dik l-ispeċi mill-bastimenti li jużaw ix-xbieki tat-tkarkir tal-qiegħ (OTB, OTT, PTB, TBN, TBS, TB, OT, PT u TX) fil-Baħar Adrijatiku. Ir-Regolament Delegat tal-Kummissjoni (UE) 2017/86 introduċa eżenzjoni de minimis għal dawk l-ispeċijiet. Abbażi tal-evidenzi xjentifiċi pprovduti f'dik l-okkażjoni fir-rakkomandazzjoni konġunta u rieżaminati mill-STECF u filwaqt li tqiesu l-karatteristiki tal-irkaptu, l-għadd kbir ta' speċijiet fl-operazzjonijiet tas-sajd, ix-xejriet tas-sajd u l-partikolaritajiet tal-Baħar Mediterran (eż. il-predominanza ta' attivitajiet tas-sajd fuq skala żgħira), il-Kummissjoni kienet tal-fehma li kien xieraq li jiġu stabbiliti tali eżenzjonijiet de minimis (sa mhux iktar minn 1 % għall-merluzz u għat-trill u sa mhux iktar minn 3 % għal-lingwata komuni) sabiex jiġu evitati l-kostijiet sproporzjonati marbuta mal-qabdiet mhux intenzjonati. Meta vvaluta r-rakkomandazzjoni konġunta l-ġdida, l-STECF kien tal-fehma li ma kien hemm l-ebda informazzjoni speċifika pprovduta li tappoġġa żieda kbira fil-livelli perċentwali applikati. Ladarba ċ-ċirkostanzi ma nbidlux biex jiġi applikat il-livell tal-perċentwali attwali, il-Kummissjoni hija tal-fehma li din l-eżenzjoni jenħtieġ li titkompla bil-livelli tal-perċentwali msemmija hawn fuq.

(20)

Ir-rakkomandazzjoni konġunta l-ġdida għax-Xlokk tal-Baħar Mediterran tissuġġerixxi li l-applikazzjoni tal-eżenzjoni de minimis tiġi estiża sa mhux iktar minn 6 % tal-qabdiet annwali totali, għall-gamblu abjad (Parapenaeus longirostris) fl-2019 u fl-2020, u sa mhux iktar minn 5 % fl-2021 mill-bastimenti li jużaw ix-xbieki tat-tkarkir tal-qiegħ (OTB, OTT, PTB, TBN, TBS, TB, OT, PT u TX) fix-Xlokk tal-Baħar Mediterran. Ir-Regolament Delegat tal-Kummissjoni (UE) 2017/86 introduċa eżenzjoni de minimis għal dik l-ispeċi. Abbażi tal-evidenzi xjentifiċi pprovduti f'dik l-okkażjoni fir-rakkomandazzjoni konġunta u rieżaminati mill-STECF u filwaqt li tqiesu l-karatteristiki tal-irkaptu, l-għadd kbir ta' speċijiet fl-operazzjonijiet tas-sajd, ix-xejriet tas-sajd u l-partikolaritajiet tal-Baħar Mediterran (eż. il-predominanza ta' attivitajiet tas-sajd fuq skala żgħira), il-Kummissjoni kienet tal-fehma li kien xieraq li tiġi stabbilita tali eżenzjoni de minimis sabiex jiġu evitati l-kostijiet sproporzjonati marbuta mal-qabdiet mhux intenzjonati. L-STECF ma vvalutax ir-rakkomandazzjoni l-ġdida. Ladarba ċ-ċirkostanzi ma nbidlux, il-Kummissjoni hija tal-fehma li din l-eżenzjoni jenħtieġ li titkompla bil-livelli tal-perċentwali msemmija hawn fuq.

(21)

Ir-rakkomandazzjonijiet konġunti l-ġodda għall-Punent tal-Baħar Mediterran jissuġġerixxu li l-eżenzjoni de minimis tiġi applikata għall-ispnotta (Dicentrarchus labrax), għall-isparlu (Diplodus annularis), għall-mogħża (Diplodus puntazzo), għas-sargu (Diplodus sargus), għax-xirgien (Diplodus vulgaris), għaċ-ċerna (l-ispeċijiet Epinephelus), għall-istripped seabream (Lithognathus mormyrus), għall-iSpanish seabream (Pagellus acarne), għall-paġella ħamra (Pagellus bogaraveo), għall-paġilla (Pagellus erythrinus), għall-pagru komuni (Pagrus pagrus), għall-ħanżir tal-fond (Polyprion americanus), għal-lingwata komuni (Solea solea), għall-awrat (Sparus aurata) u għall-gamblu abjad (Parapenaeus longirostris), sa mhux iktar minn 5 % tal-qabdiet annwali totali ta' dawk l-ispeċijiet mill-bastimenti li jużaw ix-xbieki tat-tkarkir tal-qiegħ (OTB, OTT, PTB, TBN, TBS, TB, OT, PT, TX) fl-2019; sa mhux iktar minn 3 % tal-qabdiet annwali totali ta' dawk l-ispeċijiet, għajr il-gamblu abjad, maqbuda mill-bastimenti li jużaw l-għeżula u l-pariti (GNS, GN, GND, GNC, GTN, GTR, GEN) fl-2019; u sa mhux iktar minn 1 % tal-qabdiet annwali totali ta' dawk l-ispeċijiet, għajr il-paġella ħamra u l-gamblu abjad, maqbuda mill-bastimenti li jużaw is-snanar u l-konzijiet (LHP, LHM, LLS, LLD, LL, LTL, LX) fl-2019.

(22)

Ir-rakkomandazzjonijiet konġunti l-ġodda għall-Baħar Adrijatiku jissuġġerixxu li l-eżenzjoni de minimis tiġi applikata għall-ispnotta (Dicentrarchus labrax), għall-isparlu (Diplodus annularis), għall-mogħża (Diplodus puntazzo), għas-sargu (Diplodus sargus), għax-xirgien (Diplodus vulgaris), għaċ-ċerna (l-ispeċijiet Epinephelus), għall-istripped seabream (Lithognathus mormyrus), għall-iSpanish seabream (Pagellus acarne), għall-paġella ħamra (Pagellus bogaraveo), għall-paġilla (Pagellus erythrinus), għall-pagru komuni (Pagrus pagrus), għall-ħanżir tal-fond (Polyprion americanus), għall-awrat (Sparus aurata) u għall-gamblu abjad (Parapenaeus longirostris), sa mhux iktar minn 5 % tal-qabdiet annwali totali ta' dawk l-ispeċijiet mill-bastimenti li jużaw ix-xbieki tat-tkarkir tal-qiegħ (OTB, OTT, PTB, TBN, TBS, TB, OT, PT, TX) fl-2019; sa mhux iktar minn 3 % tal-qabdiet annwali totali ta' dawk l-ispeċijiet, għajr il-gamblu abjad iżda inkluża l-lingwata komuni, maqbuda mill-bastimenti li jużaw l-għeżula u l-pariti (GNS, GN, GND, GNC, GTN, GTR, GEN) fl-2019; u sa mhux iktar minn 1 % tal-qabdiet annwali totali ta' dawk l-ispeċijiet, għajr il-paġella ħamra u l-gamblu abjad iżda inkluża l-lingwata komuni, maqbuda mill-bastimenti li jużaw is-snanar u l-konzijiet (LHP, LHM, LLS, LLD, LL, LTL, LX) fl-2019.

(23)

Ir-rakkomandazzjoni konġunta l-ġdida għax-Xlokk tal-Baħar Mediterran tissuġġerixxi li l-eżenzjoni de minimis tiġi applikata għall-ispnotta (Dicentrarchus labrax), għall-isparlu (Diplodus annularis), għall-mogħża (Diplodus puntazzo), għas-sargu (Diplodus sargus), għax-xirgien (Diplodus vulgaris), għaċ-ċerna (l-ispeċijiet Epinephelus), għall-istripped seabream (Lithognathus mormyrus), għall-iSpanish seabream (Pagellus acarne), għall-paġella ħamra (Pagellus bogaraveo), għall-paġilla (Pagellus erythrinus), għall-pagru komuni (Pagrus pagrus), għall-ħanżir tal-fond (Polyprion americanus), għal-lingwata komuni (Solea solea) u għall-awrat (Sparus aurata), sa mhux iktar minn 5 % tal-qabdiet annwali totali ta' dawk l-ispeċijiet mill-bastimenti li jużaw ix-xbieki tat-tkarkir tal-qiegħ (OTB, OTT, PTB, TBN, TBS, TB, OT, PT, TX) fl-2019; sa mhux iktar minn 3 % tal-qabdiet annwali totali ta' dawk l-ispeċijiet, maqbuda mill-bastimenti li jużaw l-għeżula u l-pariti (GNS, GN, GND, GNC, GTN, GTR, GEN) fl-2019; u sa mhux iktar minn 1 % tal-qabdiet annwali totali ta' dawk l-ispeċijiet, għajr il-paġella ħamra, maqbuda mill-bastimenti li jużaw is-snanar u l-konzijiet (LHP, LHM, LLS, LLD, LL, LTL, LX) fl-2019.

(24)

Fl-aħħar nett, it-tliet rakkomandazzjonijiet konġunti l-ġodda jissuġġerixxu li l-eżenzjoni de minimis tiġi applikata għall-inċova (Engraulis encrasicolus), għas-sardin (Sardina pilchardus), għall-kavall (l-ispeċijiet Scomber) u għas-sawrell (l-ispeċijiet Trachurus), sa mhux iktar minn 5 % tal-qabdiet aċċessorji annwali totali ta' dawk l-ispeċijiet mill-bastimenti li jużaw ix-xbieki tat-tkarkir tal-qiegħ (OTB, OTT, PTB, TBN, TBS, TB, OT, PT u TX), fil-Punent tal-Baħar Mediterran, fil-Baħar Adrijatiku u fix-Xlokk tal-Baħar Mediterran fl-2019.

(25)

L-STECF innota li l-eżenzjonijiet imsemmija fil-premessi (21), (22) u (23) ikopru grupp wiesa' ta' speċijiet b'firxa wiesgħa ta' rati ta' qbid skartat u li dik l-informazzjoni speċifika li tappoġġa għalkollox l-eżenzjonijiet mitluba ma kinitx ġiet ipprovduta. Madankollu, il-Kummissjoni tisħaq li dawk l-eżenzjonijiet japplikaw għal gruppi ta' speċijiet li jkopru l-kumplament tal-ispeċijiet soġġetti għal daqsijiet minimi kif definiti fl-Anness III tar-Regolament (KE) Nru 1967/2006 u li, f'dan l-istadju, mhumiex soġġetti għal limiti ta' qbid; għalhekk, l-Artikoli 15(8) u (9) tar-Regolament (UE) Nru 1380/2013 mhumiex applikabbli. Barra minn hekk, dawk l-ispeċijiet jinqabdu fl-istess ħin, fi kwantitajiet li jvarjaw ħafna, li jagħmilha iktar diffiċli li jintuża approċċ ta' stokk uniku. Dawk l-ispeċijiet jinqabdu minn bastimenti tas-sajd ta' skala żgħira u jinħattu l-art f'ħafna punti differenti ta' ħatt l-art mifruxa ġeografikament tul il-kosta; għaldaqstant, x'aktarx li jkun hemm kostijiet sproporzjonati marbuta mal-qabdiet mhux intenzjonati fl-ewwel snin ta' implimentazzjoni sħiħa tal-obbligu tal-ħatt l-art. Irid jitqies ukoll li l-eżenzjonijiet huma fil-prinċipju inqas mil-limiti massimi permessi. F'dan il-kuntest, il-Kummissjoni hija tal-fehma li dawk l-eżenzjonijiet de minimis jenħtieġ li jiġu introdotti għal sena waħda biss. Jenħtieġ li sal-1 ta' Mejju 2019, l-Istati Membri jippreżentaw id-data rilevanti sabiex l-STECF ikun jista' jivvaluta għalkollox il-ġustifikazzjonijiet għall-eżenzjonijiet u sabiex il-Kummissjoni tkun tista' twettaq rieżami.

(26)

Fl-aħħar nett, il-Kummissjoni tinnota li l-Istati Membri ħadu l-impenn li jżidu s-selettività tal-irkaptu tas-sajd skont ir-riżultati tal-programmi ta' riċerka attwali sabiex jitnaqqsu u jiġu llimitati l-qabdiet mhux intenzjonati, u b'mod partikolari l-qabdiet b'daqsijiet iżgħar mid-daqsijiet minimi ta' referenza għall-konservazzjoni.

(27)

Il-Kummissjoni tinnota wkoll li b'konformità mar-rakkomandazzjoni konġunta għall-Punent tal-Baħar Mediterran, l-Istati Membri kkonċernati jħeġġu l-użu ta' xbieki tat-tkarkir bil-manka u/jew ta' estensjoni mgħammra b'malji T90 b'daqs ta' 50 mm, kif ukoll il-kontinwazzjoni ta' sajd bi prova b'għeluq f'ħin reali.

(28)

Il-miżuri ssuġġeriti fir-rakkomandazzjonijiet konġunti l-ġodda jikkonformaw mal-Artikolu 15(4), mal-Artikolu 15(5)(c) u mal-Artikolu 18(3) tar-Regolament (UE) Nru 1380/2013 u għalhekk jistgħu jiġu inklużi fil-pjan ta' skartar stabbilit bir-Regolament Delegat (UE) 2017/86.

(29)

L-eżenzjonijiet de minimis għall-ispeċijiet ta' ħut pelaġiku żgħir fl-attivitajiet tas-sajd li jimmiraw għal dawk l-ispeċijiet huma stabbiliti fir-Regolament Delegat tal-Kummissjoni (UE) 2018/161 (6). Min-naħa l-oħra, l-eżenzjonijiet de minimis għall-qabdiet aċċessorji ta' speċijiet ta' ħut pelaġiku żgħir maqbuda fis-sajd demersali jenħtieġ li jiġu inklużi fir-Regolament Delegat (UE) 2017/86.

(30)

Għalhekk, jenħtieġ li r-Regolament Delegat tal-Kummissjoni (UE) 2017/86 jiġi emendat skont dan.

(31)

Billi l-miżuri previsti f'dan ir-Regolament iħallu impatt dirett fuq l-ippjanar tal-istaġun tas-sajd tal-bastimenti tal-Unjoni u fuq l-attivitajiet ekonomiċi relatati, jenħtieġ li dan ir-Regolament jidħol fis-seħħ immedjatament wara l-pubblikazzjoni tiegħu. Jenħtieġ li japplika mill-1 ta' Jannar 2019,